المساعد الشخصي الرقمي

مشاهدة النسخة كاملة : عالم المرأة الواقع


قاصف نيويورك
16-06-2002, 08:08 PM
وحده اتقول حق امها امايا انا سايره عند ربيعتي ريم (والملعونه اصلا مواعده حبيبها او اللي تعرفه)وامها حليلها فقيره اتقولها سيري فديت روحج بس لاتتاخرين اتقولها انشالله ولآنسة تسير حق حبيبها واتم معاه وامها تتحراها عند ربيعتها ....ليش ؟؟؟؟وشو آخره هالمقابلات....تتوقعينا بيخطبج من اهلج لا يا حبيبتي اصحي هو مايريد منج الا شي من ثلاثه اشياء 1..يا ان يريد ياخذ اغلى ما عندج ...2يا ان يريد اشوه سمعتج وسمعة اهلج وخلي الناس يوم امرون قدام بيتكم اقولون (هذا بيت فلان بن فلان اللي بنته فلانه واللي فيها وفيها وفيها..)3 يا انه واحد فاضي ويريد يضيع وقته وياج..ليش تخلين نفسج سلعة بيد الشباب ليش ماتخلين الناس يضربون فيج المثل ويقولون..(جوفوا بنت فلان بن فلان ماشالله عليها مافي منها)بدال مايقولون جوفوا بنت فلان بن فلان فيها وفيها وفيها ...الله لايبلينا ..اذا انتي مب خايفه ولا مهتمه لسمعتج خافي على سمعة اهلج على الاقل ارفعي راسهم هم شو ذنبهم ربوج وعلمووج وانتي آخر شي تسويين فيهم جي هاي هي آآخره تربيتهم حررام والله خلي فيج ذرة احساس وحده تخيلي نفسج ام وعندج بنت نفسج تسوي ها كله شو بتسوين انتي؟؟؟؟؟؟؟؟؟! ...ترا الولد لو عرف 100بنت عمر سمعته مابتتشوه لكن البنت مثل الورده ...الورده الذبلالالالالانه محد يباها ..ليش ماتكونين ورده مفتحه...رحيقها حلو...شكلها حلو..بين ورود حلوه يتمناااااج 1000شخص ليش ماتكونين جذي...والله هاي الساعه الناس كلهم بينظرولج بنظره محترمه وبيحترمونج ..



ترا الولد عمره مابيي يخطبج حتى لو كنتي انتي اول وحده تعرفين ليش؟لانه بقول انا كيف آخذ وحده كلمتني وكلمة عشره غيري؟؟!.انا شو اللي يضمنلي اني اول واحد تكلمه ..ولو كلمتني انا تكلم غيري !!



وبعدين دايما دااايما قبل لاتسويين اي شي فكري بنتيجة الشي اللي تسوينه!!

ليش بدال ماتهتمين بالشباب وسوالف الشباب تهتمين بدراستج وبمستقبلج وبعدين خافي ربج واعرفي ان الساعه قربت شو سوييتي حق ربج شو ؟؟

غازلتي..رقمتي...لعبتي...الخ..

وآآآخر كلمه اقولكم اياها وحطوووووووها في بالكم يالبناااااااات:



ترا ماتملي عين الولد الا البنت المحتــــــــرمه!!



السموحه اذا طولت عليكم :


قاصف نيويورك
تــوتـه
16-06-2002, 10:00 PM
بارك الله فيك..وسدد خطاك..

وفعلا هذا كثير مايحصل ونسمع فيه من بعض الفتيات هداهن الله..




ترا ماتملي عين الولد الا البنت المحتــــــــرمه!!
100%:)


_____________
الحين كلام اهل قطر مثل اهل الامارات:أفكر: بالجيم؟بدل الكاف:أفكر:

انا عارفه ان اللامارات والكويت يتكلمون بالجيم يعني بعد قطر...

ماشاء الله تبارك الله:D
شجـون
16-06-2002, 11:00 PM
سبحان الله نفس موضوعي بس انا محطيتنه بالمنتدى العام :D :D

على العموم مشكوور على الموضوع...;)
قاصف نيويورك
16-06-2002, 11:56 PM
في البدايه اشكركم عالردود


و يا توته انتي ما قلتي شي غلط هو صح ان قطر لهجتهم قرريبه من الامارات في بعض الحروف ممثل الجيم او انهم يقولون جي ما يقولون

كذا


لكن هذا الموضوع مكتوب باللهجه الاماراتيه يعني في كلمة: ربيعتي- اللي في اول الموضوع ما يستعملونها اهل قطر ابدا

لكن على العموم كلها لهجات جايه من لغات غير عربيه واختلطت بالعربيه وصارت مصطلحات بين العامه


واسمحيلي يا شجون على التكرار لكني ما قريت الموضوع


وشكورين عالردود الحلوه:#
شجـون
17-06-2002, 12:00 AM
واسمحيلي يا شجون على التكرار لكني ما قريت الموضوع

مسموح اخوي وزيادة الخير خيرين:) :أفكر: ;)
تــوتـه
17-06-2002, 02:08 AM
مشكور ياأخ قاصف نيويورك على التوضيح..:) :) :)