أفندي في الفيصليه( قصه حلوة )

[رومانسيه]

أفندي في الفيصليه
مذكرات واحد مؤدب اول مره يروح للفيصليه
احم احم... اول شي اعرفكم بنفسي...


مؤدب بن على نياته آل اخلاق ==>تقدرون تنادوني مؤدب


انا من يوم ما فتحت عيوني على الدنيا وانا مؤدب....ما الف ولا ادور
((بالعربي دلخ))....اطلع من البيت للمدرسة....ومن المدرسة للبيت==>
تصدقون اني مرة رحت للبقالة وما قلت لأمي

ومرت السنين....وبعدها سنين....وبعدها سنوات وكبرت...وكبرت معي احلامي
وافكاري....ومرة من المراريت وانا قاعد في حضن امي


سئلتها:
مؤدب: امي امي....الحين انا كملت 18....صح؟


امي: صح يا حبيبي ==>جحش وش كبره ومنسدح في حضن امه



مؤدب: طيب امي...هذا اللي في وجهي شنب ولا لأ؟


امي: الا يا حبيبي...شنب ونص....

مؤدب: طيب ليه ما تسمحين لي يصير عندي اصدقاء زي العالم والناس...يعني
انا مو كبير؟


امي: .....عشان....آآآ.....عشااااان....==> حجر لها الولد

وبعد هالتحجيره قررت امي تدور لي عريس...اقصد صديق....وقامت تدور
وتفر على صديقاتها لما لقت لي صديق حبووووب...اسمه (ابو عتب)...انا
ما صدقت على الله....على طول شبكت مع الولد...وصرنا نسولف مع بعض..
.وتوطدت العلاقة بيننا....حتى صرنا جبن على خبز توست....وفي يوم
((الله لا يعيده من يوم)) من الايام...

مؤدب: هههههههههههه...الله يقطع سوالفك يا بو عتب...


ابو عتب: اييييييييه...فااااااتك امس....رحنا للفيصلية...ولقينا
بنااااات وحركاااااات <==((شاب مراهق من الرياض...اكيد يكون زي كذ))


مؤدب: ايش فيصلية؟! <== ((يا ويييييلي على الادب يا ناس))


بو عتب: أدٌوب ((يدلعني ادوب)) انت تستهبل ولا تستهبل؟!


مؤدب: لا من جد....ايش الفيصلية هذي....دايما اسمع امي تقول لأبوي انها
بتروح للفيصلية واذا سألتها تقول هذي حقت الكبار==> امه خايفه يضيع
تعب تربيتها هباء منثورا
بو عتب: هع هع هع...والله انك تحفة....خلاص...بكرة الساعة 9 امرك
ونروح لها...


مؤدب: طيب ليه ما تقول لي الحين؟!


بو عتب: ما ينفع....لازم تشوف بنفسك.....بس اسسسسمع ابغاك تكشخ آخر
كشخان ((كشخان=المصدر المؤول من كشخه= رسمي)) ولا ترى ما تحلم تشوف
الفيصلية


مؤدب: لا واللي يرحم والديك خلاص....والله لألبس احسن لبس بس لا تجحد...


بو عتب: افا عليك....يله باي......اييييييه تذكرت...جهز معاك ورقة
وقلم بكرة...ومن غير ليه بكرة بتشوف

مؤدب: طيب....


انا بغيت اموت بالسكتة الصدرية من الفرحة....اخييييرا باروح للفيصلة...
.اللللله كيف بيكون شكلها......مربع ولا مثلث....لونها بنفسجي ولا كوحلي..
..طيب وش هي من الاساس....ملاهي ولا مطعم.......ومن زود الفرحة طلعت ملابس
العيد ولبستها ونمت فيها....

وفي اليوم التالي...


انا مرسم ومضبط شكلي ومجهز قلم ودفتر و....اينفلوبز
((مستحي اقول ظروف وتضحكون علي)) <== على بالي بنكتب رسايل انا
وابو عتب

ولا وش لازمة القلم والاوراق؟! ===>مؤدب اسم وفعل


وقاعد اناظر الساعة....


تيك توك...تيك توك...تيك توك....


طوط....عند الاشارة تكون الساعة التاسعة مساء ومافيها ولا ثانية...طوط....


تربتتيت تربتتيت ==>بوري سيارة بو عتب


هو ما امداه يضغط على البوري الا وانا راكب جنبه واقول له: يله عتبتب....خلينا نروح للفيصلية


بو عتب: جهزت كل شي؟؟


مؤدب: ايه...هذي الاوراق والقلم والظروف....


بو عتب: ظروف؟؟....وش بنسوي فيها ذي؟؟؟


مؤدب: انت ما تبغى تكتب رسايل؟؟....اجل وش بنسوي بالاوراق والقلم ==>
طالع على ابوه...على نياته


بو عتب: نرقم يا الكمخة....كم رقمك بسررررعة قربنا نوصل....

مؤدب: 055 الخ الخ ((اخسسس يا مميز انتا)) ==>بلا اهله ما يدرون وش
بيسوي فيه

بو عتب: زين زين....يله ترانا وصلنا....


مؤدب: هييييييء (شهقة) واااااااااااو هذي الفيصلية...والله حلوة
((بلا في شكلي على ذوقي الخايس)) تصدق يا بو عتب اني حبيتها من اول نظرة
==>حبني برص مدعوس على طريق الدمام



بو عتب: ايه ايه بس خلصنا....الحين ابغاك تسمعني زيييييين....اول
ما نلقى عائلة بتدخل ندخل وراها على طول....فاااااهم؟؟

مؤدب: طيب لييييييه


دردوووووووب ==>صفقه على جبهته



بو عتب: اسمع الكلام وانت ساكت....اصلا ممنوع دخول الشباب...


مؤدب: ليه يمنعون الشباب...يعني حنا وش بنسوي؟؟ ==>هذا وش معيشه عندنا بذي الدنيا


ستتااااااح ==>سطره كف لخبط له وجهه


بو عتب: وش قلناااا؟؟


مؤدب: طيب طيب....خلااااص....سكت


بو عتب: يله يله هذي عائلة خلينا ندخل وراها....


واول ما دخلت.....==>يا ليتني ما دخلت

حسيت جاني شلل....


وش ذا؟!


هذا عندنا بالرياض؟!

.

.

.

.

.

.

.


دخلنا الفيصلية....

ومن اولها استفتحت بثلاث بنات...كل وحدة استر من الثانية ما شاء الله
عليهم....


الاولى...لابسة عباية سترتش...ومغطيى وجهها كللللله الا فتحه زغنطوطه
مطلعه منها خشمها ==>ما فيها شي حلو الا خشمها



والثانية..مسكينه تقل عميا مغطيه كل جسمها ووجهها من فوق لتحت==>ما
فيها اي شي حلو اللهم ثلاث شعرات مطلعتهم من فوق تقل انتل لاااا..وكل و
احدة ملونتها بلون


اما الثالثة..فحدث ولا حرج..لابسه ورق شفاف ((صدق اني على نياتي))
اوبالاحرى(حطوا 14 خط تحت كلمة بالاحرى عشان تعرفون اني مثقف وعندي لغات).
..او بالاحرى <== عاجبتني الكلمة. لابسه عباية شفافة وحاطه اللثام ((كنت
احسبها شامه ريحة خياس ))اثرها تبغى تطلع عيونها المغمصة..آآ اقصد.
.عيونها الكحيلة المغمصة

انا معد عرفت وش اسوي...اضحك عليهم بس عييييييب انا مؤدب....ولا اتحمد
ربي على العافية ((تراني ما عرفت انهم بنات الا بعد السالفة باسبوع))..
.قلت يا ولد..ما بدهاااااش طنشهم ومتع نفسك بالفيصلية ==>امحق متعه



التفت يمييييين....والقى كومة شمغ وثياب متجمعة على عبايه وطرحه
((شباب متجمعين على انثى ضغيفة بريئة <== ركزوا على ضعيفة وبريئة))
انا ما ادري وش لقفني وخلاني اروح اشوف وش القصة...وما اسمع الا...


(الشباب(يا حلو ارحمنا وعطنا نظرة.

(البنت(وجع..صدق انكم ما تربيتوا يا قليلين الحيا.

(الشباب( اموت على هالكشرة يا خشة قلبي انتي.

(البنت( اقوووووول ابعدوا..وين اهلكم عنكم..بالله هذي تربية.

(الشباب) طيب ربينا...نمووووت بتربيتك <==((هم قالوا ربينا من هنا وما
اشوف الا يد طالعة من وسط المراهقين ماسكه كعب اسود يلمع ((آخر شي
اتذكره انه كان يلمع))...و

نيااااااااااااااااااااااااا...

طاااااااااااااااااااخ...

طرررراااااااخ..

آآآآآآآآي...

احححححححح...

هيه هيه هيه <=== هذولي البزران اللي في دعاية داناو حليب بالعصير خاشين غلط


مؤدب: آآآآخ...انا ويني فيه.....اييييه..الكعب...الاسود...اللي يلمع...وش صار...آآآخ

بو عتب: اووصصص فضحتنا الله يفضحك...بنت ضعيفة صفقتكم كلكم..هههههههه..
.بعدين انا ابغى اعرف...انت وش لقفك ووداك هناك..


مؤدب: انا ما رحت...بس حبيت اعرف هم ليش متجمعين عليها...قلت يمكن تبيع شي زين ==>والله الادب


بو عتب: طيب طيب طيب...اسمعني...الحين كل واحد مننا يروح في طريق..
.ويدور على رزقه..اوكي...وبنتجمع بعد ساعتين..


مؤدب: اييييش على آخر عمري تبغاني اشحذ...ووين بالفيصلييييية <=== هذا دلخ مو مؤدب


بوعتب: لاااا يا دلخ انا اقصد ترقم بنات...خلاااص...نتقابل بعد ساعتين..باااي

بعد ما تفرقنا انا بو عتب..قعدت افكر..وش اسوييييي...وش اسوييييي..
.فكر يا مؤدب فكرررر....قلت يا ولد ما بدهااااش روح واشرب لك شي وروق

عشان تعرف تركز <=== حشى صارت مذاكرة مو مغازل


قعدت ساعة ونص افكر....وبعد ما قربعت لي سبعة جالون بيبسي
((راعي المحل بغى يصيح يوم جيت اطلع من المحل)) قررت اني ألحق عمري..
.والله..وش فرقي عن باقي الشباب...كلهم يغازلون ويرقمون...يعني حبكت
علي انا....لاااااااا...منيب طالع لما ارقم لي بنت ==>بعدي..آآ اقصد
عيييب عليك


قلت في نفسي....المسألة سهلة....اول ما اشوف عباية تمشي قدامي...على
طوووووول وبحركة خاطفة اصمخها بالرقم ((اذب الرقم عليها))...


طلعت معزم النية على اول عباية تتحرك قدامي.....ماسك البيبسي بيدي
اليمين ((ركزوا على البيبسي..لأنه هو البطل في المشهد القادم)) وماسك
الرقم بيدي اليسار...


مشيت...ومشيت...بعدين مشيت..ومن ثم ركضت.....بعدين هديت عشاني صاير
كأني خبل وانا اركض <=== حشى..صارت قصة حياتي مو مذكرة

فجأة...


مر قدامي شي اسود...................هييييييييه بنت....واجهز الرقم
واستعد..و..................طلع واحد زول لابس اسود <=== يستهبل ذا...




وانا ماشي متحطم...واشوف قدامي..بنت...........بنت............بنت




مؤدب: اصبري اصبري...لا تتحركين <== بيصيدها ذا


مؤدب: يا ربي وش اسويييييي....ايييييه تذكرت ارمي الرقم عليها..




انا من زود الحماس والربشه....رميت اللي بيدي باقوى ما عندي على
البنت((وانا مغمض))....و...


طررررررقاااااااع

اييييش؟!....طررقاااع؟! وش طرررقعه.........والتفت على البنت
((يا ليتني ما التفت))...لقيتها متغرقه بيبسي من اولها لآخرها
((اثري بذكائي المعهود ومن زود الحماس....رميت عليها البيبسي وخليت
الرقم معي ))

وما اشوف الا البنت وعينيها تقدح شرارا

البنت: ايا قليييل الحيا....ان ما ربيتك ما اكون نوير بنت ابو نوير
انا عقب هذيك اللي فقعت لي راسي..تووووووبه اتفاهم مع بنت....وما تشوف
الا غباري....

بس هيهات هيهات....وييييييييين...انا اطلع منها بدون مشاكل.....وانا
منطلق باقصى سرعتي.......درررردوووووب....


مؤدب: اححححح...وش ذا..جدار؟!


???? : ماذا فعلت ايها الفاجر <==((طلع واحد من جيوش الهيئة))


مؤدب: يماااااااااااااه....


واسحب شماغه من على راسه وانط من فوووووق من الدور الثالث ((مسوي
الشماغ باراشوت)) <=== متأثر بشماغ المراسيم


وما تشوف الا كل اللي بالفيصلية يلحقوني.....


الهيئة: الله اكبر...الحقوووووووه لقد اعتدا على فتاة بريئه <=== ((كثر لي منها))


الشباب الفاضيه: هييييييييه مطاقه...الحقووووووه...

البنات:...... <=== ما يحتاج اتكلم...البنات ما يبي لهم سبب هم اصلا ملقوفات


وانا قاعد اراكض...كأني ضاطور يلاحقوني بزران بنعله...اروح يمين
القى ناس.....اروح يسار القى ناس.....خلااااااص...رحت فيها...حجروا لي...آآآآآآه


حجروا لييييييييييي.....آآآآآآآآه..... <=== على طول كمل ما عنده وقت




اغمي علي <=== خكري




وما قمت الا في مكان الله يعلم وينه فيه وقاعد مع شباب طيبه ما تكلمت
معهم من يوم ما جيت....

منقوووووووول

[NICE_ BOY]

مشكورة رومانسيه على هالموضوع


بس توني قبل يومين انا ناقل هالموضوع

[Chad]

مشكورة رومانسيه على نقل التحفه حقت ناف للمرة الثانيه في المنتدى:D :D :D :D

[SMM®]

مشكورة رومانسية :)

بس اشفيكم انتوا؟؟
مؤلف القصة موجود في المنتدى و للحين مرتين ناقلين الموضوع من منتديات اخرى!

ما عليه يا اخت رومانسية
ان شاء الله مرة ثانية القصة راح تكون من تأليفج :cool:

مرة ثانية اذا كنتي تبين تنقلين قصص دققي اكثر :)

انشاءالله ما تزعلين منا :)

















اقول يا رومانسية
انتي جايبة الموضوع من موقع يبدأ اسمه بحرف H?

[EminEm,m&m]

قتلتيني ما خليتي في نفس
ويش ذا المؤدب (آخر العنقود) والله انه مستدلخ

:D :0) :" :D

[سحاب الليل]

شكراً على القصه لكن

واخص بالشكر للأخ ناف NAF

الكاتب الأصلي للقصة

[رومانسيه]

اسفه من جداسفه ثم اسفه للكل ولnaf بالذات انا ما ادري صراحه
كل الموضوع انها وصلتني على الايميل واعجبتني وحبيت انكم توسعون صدركم بس لا اكثر ولا اقل
واكرر اسفي
من جد انا والله خجلانه
ويش ذا الفشيله
اسفه مليون مرررره
وبعدين انا كتبت منقوووووول وما نسبتها لنفسي
اكرر والله انقطع وجهي
ياربي وين ارووح
اخوي naf ان كنت تقرى ردي ارجو منك السموحه واسفه مو قصدي بس من جد حبيت القصه وعشان كذا انا نزلتها والله ما عندي خبر انها لك او انها نزلت قبل وسوري واسفه
.......
ياليت الارض تنشق وتبلعني من الاحراج
...............
والشكر الجزيييل لكل اخواني اللي لفتو لي نظري من جد انا شاكره لكم


..........
سحاب الليل عفوا وشكرا في نفس الوقت لتوضيح صاحب القصه لي
..........

EminEm,m&m بسم الله عليك من القتل وماعاش منيقتلك او يسد لك نفس عن جد سوري
...............
SMM® عفوا على شكرك واتمنى انك توصل اسفي واعتذاري لصاحب القصه وانا قصدت فقط توسيع صدركم بس لا اكثر ولا اقل
وانا مو زعلانه منكم ابدا بالعكس انا جد شاكره لكم ضيعتوا علومي وطاح وجهي والله واتمنى ان اعتذاري يغفر لي وانا ما جبتها من موقع انا جبتها من ايميلي عن طريق صديقه ارسلتها لي
واسفه
.............
A.J عفوا وشكرا للتلميح

............
NICE_ BOY عفوا وشكرا لللتلميح


:": :": :": :": :": :# :# :# :#

[زنجبيل]

ههههههههههههههه والله موقف محرج يا رومنسية:p :p

بس تراكي ذكرتينا بأيام قصص ناف إلي ما تنعاد
وأيام داج وسكوال وسلفي والشلة هذي والله كان
المنتدى ذيك الأيام شي:cool:

[رومانسيه]

طيب زنجبيل وينهم الاخوان اللي انت ذكرتهم انا ما اشوفهم؟؟؟؟؟؟

[زنجبيل]

الرسالة الأصلية كتبت بواسطة رومانسيه
طيب زنجبيل وينهم الاخوان اللي انت ذكرتهم انا ما اشوفهم؟؟؟؟؟؟

أنا أقولك : ناف آخر مرة قريتله موضوع كان تقريبا قبل شهر وشوي وكان يتكلم من القاهرة أما الأخ العزيز داج مرات يجي يطل طلة سريعة علينا ويختفي وهكذا أما الباقي إختفوا فجأة ولا ندري وينهم . هذا والله أعلم:D

[batigool999]

الرسالة الأصلية كتبت بواسطة A.J
مشكورة رومانسيه على نقل التحفه حقت ناف للمرة الثانيه في المنتدى:D :D :D :D

[FSM]

خخخخخخخ ما شاء الله على ناف ...... صار مشهور :D

[EminEm,m&m]

الرسالة الأصلية كتبت بواسطة رومانسيه


EminEm,m&m بسم الله عليك من القتل وماعاش منيقتلك او يسد لك نفس عن جد سوري


:": :": :": :": :": :# :# :# :#

شكرا هذا من طيبتك

==============
المواضيع كلها تفداك :D ;-)

انقلي اللي تبين

[رومانسيه]

EminEm,m&m
شكرا هذا من طيبتك

==============
المواضيع كلها تفداك

انقلي اللي تبي
.........................
العفو اخوي وماقال على الطيب طيب الا اللي اطيب منه اكيييييد
وتسلم على كلامك الحلو
وتسلم لانك هونت على شوي
ومشكوووووور وما قصرت

[زنجبيل]

الرسالة الأصلية كتبت بواسطة FSM
خخخخخخخ ما شاء الله على ناف ...... صار مشهور :D

إييييييييي توك تدري :D من زمان وهو مشهور:cool: