AL_7RBY
04-09-2002, 12:59 AM
طبعا الكل مبسوط بقرب بدأ المدارس إلا أنـــــا..! عارفين ليه؟ السبب بسيط جدا وهو أنى لسة مرتحتش من انتهاء السنة الماضية.. الأسباب آيه سأحكي لكم وتشوفوا عندي حق لا لأ.. أنا أم البنات كتبت لكم قبل كده عنهم "نبقة,وعنبة,وبطيخة" السنة دى نبقة في سنة ثانية وعنبة في ثانية حضانة وبطيخة في الشهر الثالث من عمرها المديد إنشاء الله..أما عن موضوعنا فسأحكي لكم يوم من يوميات أيام الدراسة.. طبعا أول أسبوع مفيش مشكلة يستيقظوا بدري جدا يمكن قبل المنبه ما يضرب .. فرحانين باليونيفورم الجديد و الحذاء الجديد و الشنطة الجديدة وخلافه.. نبدأ بعد كده ثالث أسبوع المنبه يضرب رررررررررررررررن ,ررررررررررررن أساسا أنا مش قدرة أقوم من النوم , لكن شر لابد منه يالا يا بنات قومي يا نبقة" لللللأ مش عايزة أقوم"دى نبقة اللي بتقول" عايزة أنام" , قومي يا عنبة "عايزة أنــــــاممممممم" دى عببة اللي بتقول, مفيش فايدة أدخل على أبو البنات قوم صحي بناتك وإلا تتأخر على شغلك -لأنه هو اللي يوصلهم وبعدين يروح شغله- وإلا مكنش سأل فيًٌٍَُِْ المهم يدخل يشيل عنبة بدون كلام من السرير على الحمام أما نبقة فأنا بقدر عليها وبعد كده الشاطر اللي يخرجها من الحمام بقى, ما هو دخول الحمام مش زي خروجه مش كده ولا آيه؟ بعد التغلب على العقبة السابقة نبقة وعنبة يدخلوا في سباق دولي مين اللي يلبس الأول و بطبيعة الحال وحسب الحجم نبقة تسبق ,, عنبة تشوف أنها حتتغلب تضرب عن السباق وعن اللبس عموما لابد من فض الاشتباك وإلا سنخل فى حرب طائفية أسرية البس أنا عنبة و أقصر الشر .. خلصنا الحمد لله من إمكانية نشوب حرب .. تظهر حرب أخرى في الأفق وسييهامين اللي تسرح شعرها الأول لأنني أنا المسئولة عن هذه العملية للأسف وما أدراكم ما عملية التسريح لبنتين مشاء الله ..المهم تمت العملية بنجاح ولم يبقى من صراع الصباح غير الإفطار ونظرا لأن الساعة كده أصبحت على الحد فيكمل الإفطار في السيارة في طريقهم للمدرسة وبذلك أنتهي الفصل الأول بعد أن أنهكت قواي .. يخلص شغل البيت وده أسهل جزء في اليوم كله وقبل أن يحين موعد عودتهم بالسلامة لابد لي من ساعة على الأقل استرخاء استعدادا للمرحلة القادمة..آلتي تبدأ الهجوم على جرس الباب "" طيب ..طيب هو آيه سرية إسعاف.." المهم ندخل في صراعات على تغير الملابس والحمام مرة أخرى وتناول الغذاء وبعدهــــــا رحلة العذاب والضنا المذاكرة تبدأ بفتح الشنط الدراسية لأكتشف أن سندوتشات الإفطار والغذاء معا داخل الحقيبة يليها تل المذاكرة المفروض الانتهاء منه اليوم يلا على خيرة الله نبدأ ولكن هيهات لابد من صراع الأجيال أولا ثم الصراع بين الأجيال ثانيا ليه بتبصى على نبقة ومش بتبصى علي نيجى بقى لو فيه حفظ أو إملاء نحفظ نحفظ وبعدين نسمع أول مرة طلعت صح بس فيها كلمة نسيتها مش مشكلة, نعدها مرة كمان علشان الكلمة دى.. نعيدها يكون فيها كلمتين غلط .. مش مشكلة نعدها ثاني .. يكون فيها أربع كلمات غلط .. وبعدين؟ إحنا بنحفظ ولا بننسى؟ وكذلك في الإملاء وبتالي بدأت أنتهز أول فرصة عملت فيها صح وأقول خلاص كفاية كده لأني مش ضامنة بعد كده آيه اللي حيحصل دة غير الخناقات الجانبية بين نبقة وعنبة المهم نخلص أكون فقدت القوة الجسدية و العقلية معا ولكن اليوم مازال فيه بقية يالا على العشاء وتجهيز جدول المدرسة والملاحظ أن فيه جدول ولكن الشنطة أتقل من عدم وجود جدول ..حرام عليكم البنات طلع لها عضلات .. الشنطة تروللى ومع ذلك الترولى أتكسر من التقل .. المهم خلصنا يالا على النوم .."لأ مش عايزين ننام "" لازم ننام بدري علشان نصحي الصبح بسهولة " ده أنا اللي بقول وبعد الصراع على النوم أبدأ في تجهيز سندوتشات الصباح والمدرسة وذلك للتفرغ الصبح لفض الاشتباكات و تسريح الشعور.. فيه حد ببقول أسرحهم من بليل؟.. بيحصل صدقوني ولكنهن نظرا للمصارعة الحرة أثناء النوم بيقوموا كما لو لم يسريحوا من أسبوع وبعد الانتهاء من كل ذلك لا يكون أمامي سوى أن أستأذن من أبو البنات و الاتجاه مباشرة إلى السرير.. و الاستعداد لليوم التالي . أما أيام الامتحانات فأنا بشعر بالشفقة عليهم من الإرهاق و التعب فلابد من إنهاء الدروس اليومية والمذاكرة للامتحانات الشهرية خاصة أنها بتكون يوميا البنات بيجوا على أخر العام كرهين المذاكرة والمدرسة والمدرسيين وأنــا كمان, لأنى بكون عاملة زي حارس السجن من ساعة ما يصحوا إلى أن يناموا أوامر ..أوامر علشان نلحق نخلص المطلوب .. معندهمش وقت للعب غير يوم الخميس فقط. وبالتالي مش عندي حق أنى أزعل أن المدارس قربت.......؟ ودمتم .. تمت
:D
منقووووووووول .
:D
منقووووووووول .