لهجاتنا في مهب الريح

[©¤ô§الغامض§ô¤©]

السلام عليكم

اهلين كيف الحال وش الاخبار

ابشركم تراني نزلت موضوع <<< يحظتس
وعارفه انه مهوب وقته وان الموضوع يبي يحزر ويخور
يحزر = كلمه تنقال اذا خرب الدهن(الزيت) بس من تالي اصبحت تستخدم استخدام عالمي
يعني لاتستغرب اذا فتحت التلفزيون ولقيت المذيع مرتزن وفاقن كشرته يقول:
وصرح مصدر عسكري بان العراق لا تملك سوى صواريخن محزره من عقب حرب الخليج
والله مالمحزر الا راسي
ايه وش وصلنا ايه ان موضوعي بيحزر ويخور ومحدن قاريه ولحدن رادن عليه
عاد والله بكيفه الحريّص بيقراه وبيرد
وعلى قولة المثل
اذا جى يوم الامتحان ذيك الساعه فيها الف حلال
ياجماعة الربع يالوجوه الطيبه
وربي احس وجيهكم كلها من النوع اللي مايساعد
<<< خذت راحتها وقامت تنطل حتسي (كلام) ماتدري انها بتنصمخ بالكرت الاحمر
الا ليش الكرت الاصفر يطلعونه قبل الاحمر
المهم عاد ترا الموضوع استفحل << وربي هالكلمه قويه
وكبر وتمدد وتسدح وتبطح وصار ماينسكت عليه والحل بيدك لابيد عمر
وش دخل عمر بالموضوع هالحين
ماييزيه ذا الضعيف ان زيد يكفخ فيه من خبرنا الدنيا
على اساس الجمله الشهيره
ضرب زيدٌعمرَ
ماييزيه = مايكفيه
ماتلاحظون اني اترجم << طيب بشري امتس
ياجماعه الوضع زاد عن حده
<<<< هيه خلاص صجيتينا
اصلا انا قاصده اعيدها عشان احوم تسبودكم
ياجماعه خلونا نتدارك الوضع قبل مايطيح الراس في الفاس وعشان مانقعد نصيح
ونقول : اذا صات الصوت ماينفع الفوت
نتدراك الوضع = شالحتها من النقاش الجاد
الا على طار النقاش الجاد مريت عليهم مره ولقيت سهود تدهر فيه وربي فقعت عليها من الضحك
والا الثانيه بشاير كاتبه كلمتة " سادوحيه " في النقاش الجاد

اقول ياكثر بربرتي الله يخليكم لحد يطلع وربي عندي سالفه

الا تعالو الا الحين ماقلتلكم وش الوضع اللي ماينسكت عليه

معليش
ايه خلونا نقف صفاً واحدن يعني صوا صوا
ونروح ننبط بوش وشارون
امزح اصلا ماعندي نبيطه
يؤ نسيت اقول ترا الموضوع يخص اهل نجد وماجاورها بس مايمنع ان اهل الجهات الاربعه يشاركونا الراي


ياجماعه <<< كني ازعجتكم بها الكلمه والا
وش فيها لهجاتنا خربت وشفيكم قلبتو ابوها وامها << هذا الموضوع
تجي تسولف مع وحده يقالك انها من اهل نجد تاليتها تتحسف انك مسولف معها اقول
ليتني مسولفه مع الشغاله اصرف وربي افهم عليها اكثر

يالربع ترا لهجتنا صارت كوكتيل لاه وكوكتيل مخيس بعد
تجي تسمع كلام بعض الناس تبصم بالعشره انه مهوب نجدي ظهر وبطن واخرتها تطلع امه من ثرمداء وابوه من سدير
يعني كلنا عيال قريّه وكلن يعرف اخيه << مثل دارج
وشوله عوجة هاللسان اللي طايحين لنا فيها
وربي لهجاتنا وش زينها تهبل بس انتم ممو مقتنعين فيها
صحيح اهل شقرا اصطغفر الله ياعليهم تمطيط في الحتسي مادري وش يبي
بس عاد هذي لهجتكم خلاص مافيها بتجين انتي وخشتس تالي عمرتس تغيرين فيها

والا هل سدير مادري وش بينهم وبين تاء النسوه المشدده
مثال
شنطتأّ , جزمتأّ , غطوتأّ <<< مقصودهم عشانهم شديدين لازم غطوه هع

والا اهل الخرج ولايهونون اهل الدلم وش اسباب تضخيمهم للكلام تسن الواحد فيهم جاي يطاق صباح الخير ياهل الدلم

عاد اهل القصيم وش ملح حتسياتهم لولا انهم مايفرقون بين الحرمه والرجال والا كل ذا من زود التفتح
مثال
وحده تحش في وحده ( قبل الترجمه )
اقول حصه شفتي زرجةمنيره مادري ( وراه ماكدتوه) مخليته نافشن يادافع البلاء
ماتسن فيه فرش واستشوارت والا ( شنطته لونه) اخضر ( وجزمته) احمر مادري الحرمه تشجع اتفاق شكلها

( بعد الترجمه )
اقول حصه شفتي شوشة منيره مادري (وراها مامشطتها)
مخليته نافش يادافع البلاء ماتسن (فيه) فرش واستشوارات والا ( شنطتها لونها) اخضر ( وجزمتها ) احمر
مادري الحرمه تشجع اتفاق شكلها

اللي ابغة اقوله لكم ان بنات الحين مهيب عاجبتهم لهجاتنا ولايهونون الشباب طبعا ذولا
حايسين جدتة اللهجه

طيب مهيب اللهجه من التراث
والمحافظه على التراث من الحقوق اللي على المواطن
ياعيني على الوطنيه
<<< تسمع بالوطنيه لحد يشره مالحقت على مادة الوطنيه

هالحين البزر (البيبي) اذا جى يسولف مع جدته يبيلهم مترجم ومتخصص بعد


طيب ماتوا جدادينا
جدادينا = كلمه شامله للجدان والجدات صواصوا يعني كلن على حده قصدي كلن مهوب على حده الزبده خليطي يالله حسن الخاتمه مرفوع عنهم القلم

ايه نكمل وماتو جدادينا وماتو امهاتنا

<<< هيه انتي تراتس زودتيها جدادينا وسكتنا بعد بتموتين امهاتنا

مااقول الا يالله ان تخلي لنا جدادينا وامهاتنا وابوانا وتخلينا لهم بعد
الزبده انهم ماتو من اللي بينقل اللهجه لمبزرتنا عقبنا

لاتقولونلي هالدلوعه اللي اسلم عليها كل صبح وتقول
اهلين ؟؟؟
كيفك
وش اخباركي
الا الحين المره <<يعني الحرمه
الا الحين وهي كويسه ماقالت شي بس
ياعليها دلع وتغنج عاد هذا مهوب موضوعنا بكيفها
تجي تقول :
وش عامله
وش اللي وش عامله
خابرتها بالمصري عامله ايه
وش جابها للقصمنجي

لاتقولون اني حاقده على القصيميات بالعكس وش حبي لهم من قرادتي صديقاتي اغلبهم رساويات وعنيزاويات

طيب انا وش اللي مخليني احتسي فيالبنيات اللي ماينشره عليهم
وربي اعرف لكم عجوز شقراويه معرعره
سالوها ليش تاخرتي
قالت : ابد يادوب خذت شاور واستشورت شعري
المشكله انها تسمي شعرها شعر على خبري ذيك السنه ثلاث شعرات مايزيدن
عاد مادري وش اخبارهاهالحين
ماعليكم منها شكلها توحي بالاستشوار
توحي = تسمع

سيداتي سادتي انا منيب اقولكم الا لازم كلن يحتسي بالهجته لا والله عاد مهوب لها لها الدرجه اصلا هذا ينافي العولمه
<<< اخسي تعرفين العولمه بعد

بس اللي ابي اقوله اطلعو عليها اعرفوها افهموها لا تحتسونها جعلكم للحتسه
لا تجحدونها اجلسو مع جداتكم اسمعو حتسيهم وربي يهبل
<<< ترفقي لاتنهبيلن تراتس خالصه

واخيرا وليس اخرا
انني انا <<<<
انني انا الله من زين التعبير
على طاري التعبير بقولكم سالفه
<<<< انطمي بس
تيب
ايه خلوها مرتن ثانيه اذا عطلناونجحنا قصدي اذا نجحنا وعطلنا

في نهاية حديثي كلمه احب اوجهها للاخت (اتس ) وللاخت (ادز)
اتس = ك
ادز = ق
^
^
التوضيح لغير الناطقين باللهجه
اخواتي معليش وقتكم راح مشو حالكم معاد لكم داعي
وبيجي يوم الاخت ( كي) تسمع بكم ماتشوفكم
بس من جهتي ولايهمكم تراكم عزيزات وغاليات ولاتضيق صدوركم منيب منزله ولا موضوع ولا نيب راده الا وانتن معي على الاقل فيذا بخلي بالك والا بغيره ايه هين اجيب طاريكم تقلعو بس تفشلنني والله
انتهي



قبل ماامشي شوفو اهل الخليج مشالله عليهم ماعندهم نيه يغيرون ( اج ) ليش يعني هم احسن مننا والا احسن منا

اخواني اخواتي ترا ماخلاني انزل هالموضوع الا رد اخوي العزيز - يسالوني ليه احبك _
يوم قالي انا سديراوي ومافهمت كلامك
وربي ضاق صدري


معليش طولت عليكم وترى حتسيي ماخلص يعني فيه اشيا كثيره ماتطرقت لها
<< ياربي عليها بالعه مسجل

بس وش اسوي لازم اضف وجهي
يعن يفيني فيني ضفة الوجه

فمان الكريم لاتبخلون علينا بردودكم