المساعد الشخصي الرقمي

مشاهدة النسخة كاملة : عام بلاي ستيــشن3 ... والخدعــة الكبـــرى!


valvegia
18-07-2003, 06:12 AM
سلامز شباب:)

حبيت أشارك بموضوع صغير عن الجيل الجديد من البلاي ستيشن (البلاي ستيشن 3)

طبعا كلنا متابعين آخباره أول بأول...

بس لاحظت في الأيام الأخيرة بعض ( تقدر تسميها الأرانب:p ) من سوني(وطبعا الكثير من المواقع الي -يصرف- من عنده) عن جهازها الجديد PS3

وهي عن القدرة الجبارة لهذا الجهاز :)

يعني مثلا انه بيكون بقوة 512 او 1024 بت وعن المعالج ذو القدرة

الخياليــــة وعن أشياء أخرى كثيرة


بصراحة وجهي كان كذا شكله :! يوم شفت المواصفات الأوليه له

طيب يمكن تسأل::غضب: ليش سميت هذه المواصفات بالخيالية وانها خدعة من سوني ؟!

الجواب راح يكون ببساطة عدة نقيطات:) :

1- نبدأ بالناحية المادية : بسأل سؤال بسيط : كم دفعت على شان تشتري البلاي ستيشن 2؟؟ راح تجاوبني جواب أبسط : شريته أول مانزل ب2000 ريال تقريبا
حلو . 2000 ريال لمواصفات جهاز مثل البلاي ستيشن2(البسيطة:)) . كم تتوقع راح يكون سعر جهاز قوته 1024 أو 512 ومعالجه مدري كم سرعته وراح يكون فيه كيت وكيت ...الخ(يعني بالعربي سوبر كمبيوتر) . طبعا بالعقل جهاز واحد بهذه المواصفات راح يكلف الشركة آلاف الدولارات (هذا اذا مو عشرات الآلاف:)) طبعا من رابع المستحيلات أن الكل يكون عنده الاستطاعة انه يشتريه ( اذا كان البلاي ستيشن2 شاريه بالتقسيط :p )

2- نتكلم عن الشركات المبرمجة لهذا الجهاز :
تخيل جهاز ألعاب صدر بهذه القوة؟! ايش أول شي تفكر فيه ؟
صح ... الرســـوم والمضلعات :) ماراح ترضى بأقل من جرافيكس مثل جرفيكس فيلم فاينل فانتزي- وطبعا معاك حق في هذا -؟! حلو . هل تعتقد أنه بامكان الشركات برمجة ألعاب بهذه الرسوم الجبارة؟

طبعا لا . ليش ؟ لأن مو كل الشركات عندها التقنيات والتكنلوجيا لجهاز مثل هذا
بتقول هات الدليل . راح اقلك ايش أحلى جرافيكس شفته في حياتك؟ راح تعطيني قائمة للألعاب على كل الأجهزة . لو تلاحظ ان هذي الألعاب من كبريات الشركات مثل : ميتل جير(كونامي) - رزدنت ايفل ( كابكوم) - العاب سكوير - ...الخ . لكن فين باقي الشركات . طبعا مالها حظ في هذا المجال

3- نروح للناحية العسكرية : ايه قريتها صح ( بس قصر صوتك:) ) راح اتكلم في هذا المجال باختصار:) جهاز بهذي القدرة ممكن يسوي بلاوي . وبس:)

4- نروح للشركات المنافسة : والي هم ننتندو ومايكروسوفت . اذا ما خاب ظني فأن الشركتين أعلنوا ان الجهازين الجديدين راح تكون قوتهم 128 بت!
هل تتوقع ان سوني راح تخاطر بجهاز عالي المواصفات(وبالتالي غالي الثمن -يعني محد يقدر يشتريه) مع ان منافسينها أعلنوا ان اجهزتهم راح تظل بقوة 128 بت!

يعني مايكروسوفت والثروة الي تملكها بامكنها صناعة جهاز خارق وتوزعه بالمجان بعد:p
ومع هذا اعلنت ان جهازها راح يكون بحدود 128


يعني باختصار جهاز مثل هذا راح تصرف فيه سوني الكثير وممكن تخسر فيه الكثير واتوقع انه ماراح تخاطر . وكل هذي البهرجة دعاية لجهازها -مثل ماسوت في بلاي ستيشن2 -


طبعا هذا الكلام كله من وجهة نظري:) واعتقد انه معقول:أفكر:
بس احب اعرف آراكم وتوقعاتكم في الجهاز الجديد من يدري ممكن يجينا جهاز جبار وممكن يجينا شي يحبط آمالنا كلها

خلاااص ... داري اني طولت :)

اسف على الفلسفة:)
شالاشاسكا
18-07-2003, 06:44 AM
مشكر على الموضوع والطرح الجميل

1-اول مانزل PS2 عندنا كان يوصل 350دينار

2- احنا نبي لعبة تمتع ناظرينا مايهم قوة المعالج وهالخرابيط

والشركات الصغار خلها تولى ما نبي نخسر بيزات عليهم

واقول ابي احسن من الرسوم الحالية اذا قدرو يطلعون

3-؟؟؟؟ مدري يمكن يشغل دبابات و يشغل ميتل جير :D :D

4- والشركات المنافسة راح تهبط مثل الحال الحين البلاي ستيشن فوق

والباقي يتذابحون


طبيعي اول ماينزل الجهاز ما باخذه لاني مو واحد مجنون لازم

اصبر سنتين لو3 بعدين اشتريه(اذا طلع الكوبي :D )

وتطمن لا احباط مع السوني

;-) ;-)
Final Fantasy 7
18-07-2003, 06:44 AM
الصراحه أنا الحين متحير و أفكاري متشوشه .. و ما أقدر أقول شي غير (( انتظروا الأيام التي ستبين لنا كل شي )) ..







و تسلميشن على الموضوع ^^
Cyber Master
18-07-2003, 09:41 AM
انا اتفق معك ان اكيد في شويت بهرجه ومبالغه
بس برضو اعتقد ان المواصفات الى تعتبر في عام 2003 خياليه ممكن تعتبر عام 2005 او 2006 او "في العام الذي يصدر فيه الجهاز" متوسطه او حتى عاديه
فالتكنولوجيا سريعة النمو واكيد الأسعار راح تكون مناسبه وقت ماينزل الجهاز بس ممكن يكون اقل شوي من المواصفات المتسربه حالياً التى قد تكون لمراوغت المنافسين
اما بالنسبه لللأجهزه الأخري وبالذات الأكس بوكس 2 الحقيقه لم اسمع انه سيبقى على معالج الـ128 حسب ماسمعت من معلومات متسربه ان الجهاز القادم لميكروسوفت قد يكون بقوة 512
وانا اعتقد ان معالج 128 انتهى دوره اجهزة الجيل القادم لن تكون بمعلجات اقل من 256 او 512
mad_dog
18-07-2003, 12:23 PM
اخوي انا اخالفك الراي لان اذا ضل الجهاز على ال 128 بت راح ترفضه

شركات الالعاب لكن اذا صار قوي حوالي 512 راح تفرح شكرات الالعاب لانه

هذا شي راح يوسع مجالها وحريتها .......وشكرا على الموضوع الحلو
فاضل711
18-07-2003, 12:31 PM
مثل ما كذبوا علينا في قوة البلي ستيشن الثاني

أول ما نزل ما في فرق بينه و بين الدريم الا فرق بسيط و قوة الدي في دي !
abu musa
18-07-2003, 02:49 PM
مشكووور اخوي على الموضوع

وحنا نصبر

ويا خبر اليوم بفلوس

بكره ببلاش
valvegia
18-07-2003, 05:43 PM
الرسالة الأصلية كتبت بواسطة شالاشاسكا
مشكر على الموضوع والطرح الجميل

2- احنا نبي لعبة تمتع ناظرينا مايهم قوة المعالج وهالخرابيط

والشركات الصغار خلها تولى ما نبي نخسر بيزات عليهم

واقول ابي احسن من الرسوم الحالية اذا قدرو يطلعون

;-) ;-)

هذا الكلام بالنسبة لنا:)

بس بالنسبة لسوني وننتندو ومايكروسوفت الشركات الصغيرة مهـــــمة لأنه كل ماكان الدعم أكبر كل ما كانت الألعاب أكثر يعني الجهاز راح يكون أكثر نجاح وبالتالي حساباتهم في البنوك راح تزداد أصفار على اليمين وهو المطلوب :D


الرسالة الأصلية كتبت بواسطة شالاشاسكا
3-؟؟؟؟ مدري يمكن يشغل دبابات و يشغل ميتل جير :D :D

الي كنت اقصده انه ممكن بعض الدول تستفيد من القطع المتطورة الي داخل الجهاز وتستخدمها في انتاج وتطوير أسلحة! أنا نفسي ماصدقت بس حصلت شويت أخبار تقول انه بامكانك تطور أسلحة باستخدام قطع البلاي ستيشن 2!:واو: فما بالك ببلاي ستيشن3؟!

بعني لا تستبعد في يوم من الأيام تصحى وتفتح الجزيرة ولا العربية وتحصل اسمك في قائمة أخطر الارهابيين فوق اسم بن لادن والسبة انك شريت بلاي ستيشن3 :D


الرسالة الأصلية كتبت بواسطة Final Fantasy 7
الصراحه أنا الحين متحير و أفكاري متشوشه .. و ما أقدر أقول شي غير (( انتظروا الأيام التي ستبين لنا كل شي )) ..

مالنا غير الصبر :)



الرسالة الأصلية كتبت بواسطة X]b0x]
بس برضو اعتقد ان المواصفات الى تعتبر في عام 2003 خياليه ممكن تعتبر عام 2005 او 2006 او "في العام الذي يصدر فيه الجهاز" متوسطه او حتى عاديه
فالتكنولوجيا سريعة النمو واكيد الأسعار راح تكون مناسبه وقت ماينزل الجهاز بس ممكن يكون اقل شوي من المواصفات المتسربه حالياً التى قد تكون لمراوغت المنافسين

الجهاز يحتاج الى سنوات من التخطيط والدراسةوالتطوير! ما أعتقد انهم بيصبروا لين يشوفوا الاسعار بتنزل ولا التكنلوجيا راح تطلع يعني المفروض انهم يكونوا مضبطين اوضاعهم من الحين والمفروض انه التصاميم الأولية للجهاز تكون جاهزة الآن؟!

وبالنسبة لقوة الجهاز اعتقد انه 512 و1024 مبالغ فيها:أفكر: (مين يدري يمكن يسوها:)) يمكن 256 مناسبة ( وبالنسبة لي قوة جبارة!)


الرسالة الأصلية كتبت بواسطة mad_dog
اخوي انا اخالفك الراي لان اذا ضل الجهاز على ال 128 بت راح ترفضه

شركات الالعاب لكن اذا صار قوي حوالي 512 راح تفرح شكرات الالعاب لانه

هذا شي راح يوسع مجالها وحريتها .......وشكرا على الموضوع الحلو

ممكن ... 512 :أفكر: ما استبعد وانا العب الاقي الشخصيات طلعت من الشاشة:)


الرسالة الأصلية كتبت بواسطة فاضل711
مثل ما كذبوا علينا في قوة البلي ستيشن الثاني

أول ما نزل ما في فرق بينه و بين الدريم الا فرق بسيط و قوة الدي في دي !

تقدر تسميه كذب (ابيض:)) عشان تصبر الناس على جهازها خصوصا انه جهاز ننتندو الجديد راح يصدر أولا . طبعا سوني ماتبغى احد يشتريه لأن مو الكل يقدر يشتري جهازين! فقالوا خلونا نصرف :). طبعا من حقهم . والله لو الشركة ملكي كان قلت انه ممكن تحوله مايكرويف وفيه مكيف وفيه نظام حماية يكهرب كل الي يقرب منه!:D


الرسالة الأصلية كتبت بواسطة abu musa
مشكووور اخوي على الموضوع

وحنا نصبر

ويا خبر اليوم بفلوس

بكره ببلاش

ما راح ازيد حرف واحد:)



بس حبيت أضيف انه سوني مو محتاجة هذي القوة كلها؟ ايام سوني1 الي كان قوته 32 قدر يطرح جهاز ننتندو64 .
والحين جهاز سوني2 هو الأضعف تقنيا مع هذا هو الأنجح؟!

يعني القوة مو كل شي:)

وشكرا لردودكم:)
Squall 9
18-07-2003, 09:38 PM
مشكور أخوي valvegia

أعجبتني النقطه رقم4 ;-)


يالله الأيام حتبين :أفكر:
Haitham999
18-07-2003, 10:00 PM
في البداية تشكر على موضوعك..;-)
ربما تكون قد بالغت قليلاً,هذه التكنولوجيا المستحيلة في وقتنا الحاضر ستكون عام 2006 أو 2007 (موعد اطلاق البلاي ستايشن 3) عادية كما هي ال128 بت الآن بالنسبة لنا,عجلة التطور تواكب الضوء في السرعة,من كان يظن أننا سنرى ما نراه الآن في أيام الأتاري والعائلة؟..نفس الشيء سيحدث مع البلاي ستايشن الثالث..
أما بالنسبة للسعر,فأعتقد أن الأتاري في بدايته كان اغلى من البلاي ستايشن2 الآن!!,لذا أعتقد أن سعره لن يتجاوز ال400 دولار بالكثير..لأنه سيصدر بعد أربع أو ثلاث سنوات وما أدراك ماذا سيحدث خلالها!..أما لو صدر الآن بالطبع سيتجاوز سعره ما ذكرته أنت..

صدقني..لا تهتم لأي كلام يقال..فقط ثق بسوني ولن تخيب ظنك..;)
الرعد المخيف
19-07-2003, 12:05 AM
انا اقوووووول نفس كلامك اخوي ( Haitham999 ) ..



في البداية تشكر على موضوعك..
ربما تكون قد بالغت قليلاً,هذه التكنولوجيا المستحيلة في وقتنا الحاضر ستكون عام 2006 أو 2007 (موعد اطلاق البلاي ستايشن 3) عادية كما هي ال128 بت الآن بالنسبة لنا,عجلة التطور تواكب الضوء في السرعة,من كان يظن أننا سنرى ما نراه الآن في أيام الأتاري والعائلة؟..نفس الشيء سيحدث مع البلاي ستايشن الثالث..
أما بالنسبة للسعر,فأعتقد أن الأتاري في بدايته كان اغلى من البلاي ستايشن2 الآن!!,لذا أعتقد أن سعره لن يتجاوز ال400 دولار بالكثير..لأنه سيصدر بعد أربع أو ثلاث سنوات وما أدراك ماذا سيحدث خلالها!..أما لو صدر الآن بالطبع سيتجاوز سعره ما ذكرته أنت..

صدقني..لا تهتم لأي كلام يقال..فقط ثق بسوني ولن تخيب ظنك..

______________________________________________________
ولمتابعة اخبار البلاي ستيشن 3 ادخلو موضوعي .. وشكرا ,,
نيو-باهاموت
19-07-2003, 11:46 AM
نبدأ بالناحية المادية : بسأل سؤال بسيط : كم دفعت على شان تشتري البلاي ستيشن 2؟؟ راح تجاوبني جواب أبسط : شريته أول مانزل ب2000 ريال تقريبا

الاكس بوكس مواصفاته جباره ونفس سعر البلايستيشن..تركيب البلايستيشن3 بيكون في الصين مب اليابان علشان مايروح سعره فوق..وبعدين اكيد سوني خلت في بالها هذي النقطة..


. هل تعتقد أنه بامكان الشركات برمجة ألعاب بهذه الرسوم الجبارة؟

مسألة بسيطة...انت يوم شفت لعبة تكن ون اتخيلت ان في المستقبل بتنزل لعبة رسومتها قوية مثل سايلنت هل3 على الps2 و هالو:6 (الحين زينو بيستانس) على الاكس بوكس؟اكيد لا...جواب سؤالك بدون لف ولا دوران اي بيقدرون بعد فترة يمكن قصيرة او لا...لكن لاتتوقع ان العاب البلايستيشن 3 تكون في نفس مستوى ps2.



نروح للشركات المنافسة : والي هم ننتندو ومايكروسوفت . اذا ما خاب ظني فأن الشركتين أعلنوا ان الجهازين الجديدين راح تكون قوتهم 128 بت!

جاهز سوني مابيكون عمره خمس سنين بس...بيكون لفترات طويلة..
جهازالنتندو عبارة عن تطوير الجيم كيوب علشان ماتخسر عليه وايد (معترفة بهزيمتها من سوني مقدما)..ومايكروسوفت ما اكدت اكس بوكس 2..



وكل هذي البهرجة دعاية لجهازها -مثل ماسوت في بلاي ستيشن2 -

لحد الحين ما في ولا لعبة قدرت تستخدم كل قوة البلايستيشن2 اشلون تقدر تحكم ان كل كلامها كان دعاية؟؟برمجة الps2 مب سهلة مثل الاكس بوكس...نفس الشي كان في ps1 شوف ميتل جير سولد و شوف سايفون فلتر ...شوف تكن 1 وشوف تكن3..
valvegia
19-07-2003, 08:12 PM
الرسالة الأصلية كتبت بواسطة سكوال 9
مشكور أخوي valvegia

أعجبتني النقطه رقم4 ;-)


يالله الأيام حتبين :أفكر:

يو آر ويلكوم :)





الرسالة الأصلية كتبت بواسطة Haitham999
في البداية تشكر على موضوعك..
ربما تكون قد بالغت قليلاً,هذه التكنولوجيا المستحيلة في وقتنا الحاضر ستكون عام 2006 أو 2007 (موعد اطلاق البلاي ستايشن 3) عادية كما هي ال128 بت الآن بالنسبة لنا,عجلة التطور تواكب الضوء في السرعة,من كان يظن أننا سنرى ما نراه الآن في أيام الأتاري والعائلة؟..نفس الشيء سيحدث مع البلاي ستايشن الثالث..
أما بالنسبة للسعر,فأعتقد أن الأتاري في بدايته كان اغلى من البلاي ستايشن2 الآن!!,لذا أعتقد أن سعره لن يتجاوز ال400 دولار بالكثير..لأنه سيصدر بعد أربع أو ثلاث سنوات وما أدراك ماذا سيحدث خلالها!..أما لو صدر الآن بالطبع سيتجاوز سعره ما ذكرته أنت..

صدقني..لا تهتم لأي كلام يقال..فقط ثق بسوني ولن تخيب ظنك..:)
[/B]



مين يدري يمكن أكون بالغت ( اتمنى:)) . بس حنا جالسين نتكلم عن جهاز خزعبلي:) . يعني جهاز مايتواجد الا عند الشركات (خذ نفس عميييق) الكبرىىىىى (لين يخلص نفسك:)) وبعد كم سنة راح يكون في كل بيت؟!:) ربما . ليش لأ؟






الرسالة الأصلية كتبت بواسطة الرعد المخيف
انا اقوووووول نفس كلامك اخوي ( Haitham999 ) ..
[/B]

:)






الرسالة الأصلية كتبت بواسطة نيو-باهاموت
الاكس بوكس مواصفاته جباره ونفس سعر البلايستيشن..تركيب البلايستيشن3 بيكون في الصين مب اليابان علشان مايروح سعره فوق..وبعدين اكيد سوني خلت في بالها هذي النقطة..
[/B]



الأكس بوكس أقوى من البلاي ستيشن حبتين وتقريبا جاهز عادي مقارنة بالأجهزة المنزلية (يعني الجهاز الي انت وانا جالسين عليهم) كل الي يميزه انه مخصص للألعاب يعني بطاقة عرض قوية (نوعا ما) البرمجة عليه سهلة .ولا كل الي فيه عادي (بنتيوم 3 بسرعة 733 م هـ . 64 MG DRAM ) يعني مو ممكن مقارنته بالبلاي ستيشن 3 بأي حال




الرسالة الأصلية كتبت بواسطة نيو-باهاموت
مسألة بسيطة...انت يوم شفت لعبة تكن ون اتخيلت ان في المستقبل بتنزل لعبة رسومتها قوية مثل سايلنت هل3 على الps2 و هالو (الحين زينو بيستانس) على الاكس بوكس؟اكيد لا...جواب سؤالك بدون لف ولا دوران اي بيقدرون بعد فترة يمكن قصيرة او لا...لكن لاتتوقع ان العاب البلايستيشن 3 تكون في نفس مستوى ps2.
[/B]



أنا ما قلت انهم ما راح يمتعونا بالجرافيكس الجبار . من ناحية انهم يقدروا فهم يقدروا . بس هذا يقتصر على الشركات الكبيرة ( المريشة يعني:)) لأنها مكلفــــــــــــة . وبالنسبة للشركات الصغيرة فهو واحد من اثنين يا سوني تتبرع لهم:) (وتخليهم يستخدموا استديوهاتها) او انهم بينزلوا العاب رسمها اي كلام(ممتازة بس مو لجهاز مثل بلاي ستيشن3)



الرسالة الأصلية كتبت بواسطة نيو-باهاموت
جاهز سوني مابيكون عمره خمس سنين بس...بيكون لفترات طويلة..
جهازالنتندو عبارة عن تطوير الجيم كيوب علشان ماتخسر عليه وايد (معترفة بهزيمتها من سوني مقدما)..ومايكروسوفت ما اكدت اكس بوكس 2..
[/B]



مين قال انه جهاز ننتندو تطوير للكيوب!؟؟ كل الي قالوه انه بيكون بقوة 128 ويمكن يكون صدق بهذه القوة ويمكن لأ . الحين الشركات كلها في حرب الكل يقول انه جهازه الأفضل وغيره تعبان !





الرسالة الأصلية كتبت نيو-باهاموت
لحد الحين ما في ولا لعبة قدرت تستخدم كل قوة البلايستيشن2
[/B]



ولا راح يقدروا ينزلوا العاب افضل. لانه هذي هي قوته الفعلية(اللهم ممكن يزيد شوي) :) لو الجهاز استخدم قوته (كلها) كان حصلته يدخن ودرجة حرارته فوق المليون بعد كم دقيقة من تشغيله! بسبب الضغط على المعالج والدارات الأخرى للجهاز؟!
وبالنسبة لتكن 1 و3 وسيفون فلتر وميتل جير. فما فهمت ايش تقصد؟!
نيو-باهاموت
20-07-2003, 10:59 AM
بالنسبة للشركات الصغيرة...عادة سوني تشتريها...والعابها تكون قوية

ماراح تنزل لعبة تستغل كل قوته؟؟

لاقيني بعد ماتنزل فف12 او يمكـــــــــــــــــــــن كن....:6
(((triple H)))
20-07-2003, 11:46 AM
ننتــــــــــظر الأيــــــــــــــــــام و نشـــــــــــــــــــــــــــــوف ...........................
REACH
20-07-2003, 12:14 PM
انشالله مايخيب ظنا حول قوة بلي 3 :D وانشالله يكون المارد الاسود بحق وانا اقول ان معلوماتك حول قوه الاكس بوكس خاطئه راجع معلوماتك مره ثانيه :)
dragon warriors
20-07-2003, 04:02 PM
أخيvalvegia

موضوعك حلو ومعك حق في بعض النقاط

ولكني سمعت أن سوني ناوية تنافس معالجات انتل وAMD
وتنزCELLللاستخدام في الحواسيب المنزلية وذلك قبل بنحو سنة من طرح
البلاي 3

هنالك نقطة أتمنى أن أعرف رأي الأعضاء بها:

لما بدأ الصراع بين الأجهزة الثلاثة قبيل اصدار الاكس بوكس وأول أيام البلاي2 تقريبا أو حتى قبل كنا نسأل أعضاء الاكس بوكس ليش اخترتم الاكس بوكس وتركتم البلاي ستيشن2 بقلك:أنو الأكسبوكس هو أقوى جهاز على الأرض =أفضل الألعاب

وطبعا هذا خطأ كبير جدا ولا أدري سبب استمرارهم في منتدى الاكس بوكس بعد أن أثبت بلاي2 تفوقه في كل المجالات

ربما سوني تحاول أن تضم المشترين الذين يفكرون هذا التفكير
نيو-باهاموت
20-07-2003, 04:36 PM
هذي رد من سوني لكل من شك في قدراتها...

وما اعتقد ان اصحاب الاكس بوكس بيقتنعون حتى لو كان الاكس بوكس 2 فاشل..
ashley.riot
20-07-2003, 05:56 PM
شباب ((اجهزة السوبر كومبيوتر )) ظهرت من الثمانينات ...وقوة هذه الاجهزة ليست بالعادية ....
يعني باختصار اذا جاء عام 2005 او2006 ما راح يكون هناك اجهزة بضخامة وقوة البلايستيشن الثالث ....
لانه باختصار حسب تحليلات موقع سيلكون فالي ....اقوى من معالج البونتيوم بمائة مرة ...هذا توقع طبعا ...
ويا شباب هاذي تصريحات رسمية من الشركة وما يجوز اننا نكذبها ...
الشركة قالت ان جهاز البلايستيشن3 راح يكون اقوى جهاز لمدة عقد كامل ...
ومن الي قراته من المواقع الاخرى ان الجهاز اقوى من الديب بلو كومبيوتر ....الديب بلو كومبيوتر من متى وهو طالع ...
نقطه اخيره ... المعالج الذي يقام بصنعه لجهاز البلايستيشن3 كلف تطويره 600 مليون دولار حتى الان ... يعني الشيء الذي نتحدث عنه كبير للغايه ...
نيو-باهاموت
21-07-2003, 11:24 AM
فعلا كلامك صحيح 100% ....اذا المعالج بروحه كلف اشقد و مب بس سوني وسويته مع IBM مصممة هذا الجيل من الكمبيوترات الشخصية و Toshiba اللي اكتسبت الخبرة من Compaq/HP...

بالنسبة للذاكرة شركة رامبوس احسن شركة تسوي ذاكرات لكنها عادة تكون غالية نسبيا...وعلى فكرة رامبوس هي اللي سوت الذاكرة للبلاي ستيشن 2 وذاكرة البلاي ستيشن2اسرع من الاكس بوكس بمرااااحل..

X-Box's RAM runs 166Mhz

PS2's RAM runs 800Mhz due to RAMBUS