روتيني ولا ملخبط ؟

[MoaeD]

صح اني من زمان ما كتبت مواضيع :6


بس منب قالب موضوعي ذا سواليف عني مع اني من جد اشتقت للكتابه :p


الموضوع يتكلم عن الروتين


فيه ناس الروتين عندهم ذابحم


تشوفهم اذا جت الأجازات ينمرضون من تغير الأوقات والمواعيد


وفيه ناس حوسه لا جت الأجازه تلقاهم بأي وقت وكل وقت ما لهم اوقات معينه



انت من اي نوع من الأثنين ووشو نظامك الحالي


ارجو انكم تفصفصون الأجابه ولا تقولون روتيني وموب روتيني :6


وترى ما فيه شي اسمه وسط :) يعني يا روتيني يا لأ


لأن الروتيني عادتا تحسه بالدقيقه محسوب يومه لو تأخر عن شي نص ساعه تستغربه :) !!



يله نشوف اجاباتكم :)

[crazy]

انا موووولخبط , يعني تشوفني يوم طالع يوم رايح معهد يوم تطق براسي


واقعد بالبيت ويوم تشوفني نايم اربع وعشرين ساعة والله على حسب المزااااج ماعندي روتييين محدد ..:-)


وياليت تجاوب على نفسك بعد انت ,,,



وصانك يو على الموضوع ,,,:-)

[The Noble]

شي جميل نشوفك تكتب مواضيع من جديد..

بالنسبة لي نظامي تلخبط وانتهى وهذي أسوأ اجازة بحياتي..:)
لكن الحمد لله أولا وأخيرا..
:)

[cubelover]

أنا من النوع بالأجازه مافيه شي محدد ولا عندي جدول ألا شي واحد أني أغلب الأحيان أدخل النت أخر الليل بس بالوقت العادي مره طالع مره بالبيت مره تلعب مره نايم مره ومره ومره ومره:6



حتى السفر يجي فاجئه

[aya brea 4000]

اولا مشكور على الموضوع
الصراحه مااافي شي ألتزم فيه بالصيف..يعني انا مابين الروتيني وما بين الملخبط (على قولتك:o )
اقوم الصبح على النت والظهر على النت والعصر على النت والمغرب على النت والعشاء على النت..واذا بغير مثل الجدول بس على التلفزيون:!
و يعني نروح نتعشى برى ونروح للمجمعات وللأهل جذي..يعني أحيانا أحس اني روتينيه واحينا لا ملخبطه:6
بس لازم أضبط اموري بخصوص النت..شكلي صاير مثل هذا>>:! عيوني راحت فيها وشكلي بلبس نظاره ( انشالله لا) فيعني الفراغ مالي هالصيف بحاول أكسر هالروتين...ولا كسرته بقول لك:p
thanks:)

[MoaeD]

كريزي


بأجاوب انا بس بنهاية ردي هذا :)


اما عن نظامك واضح مره وما يحتاج كلام :p




بوب :


الحين بتدري وش سبب قلة مواضيعي خل اتكلم عن نفسي :6



كيوب لوفر :


شكلك زيي اخر من يعلم عن السفرات :6


على العموم شكل الأجازه ما فيها سفره ولا يمكن باخر الأجازه مع اني ما ودي :o


ايا بريا :


العفو


وصحيح الصيف هو ملجأنا كارهي الروتين عشان ناخذ حريتنا :D



والله يعين الجميع :o


-----

بالنسبه لروتيني في هالصيف فهو حوسه حوسه


واكثر شي متعب بهالصيف اني ماخذ شغل صيفي من مكتب العمل


وشغلي صاير 8 ساعات انواع القرف


فصارت حياتي قرف بقرف صرت ما انام زين وحوسه نظامي ووقت طلعاتي قصر


وحاولت العب العاب الأون لاين واجد بس ما يصفيلي الا ساعتين الى 3 ساعات باليوم


ادخل المنتدى يوميا بس ما القى وقت اكتب فيه ولا اشارك


والنفسيه تكون منتهيه للاخر ولا اقدر اشارك زين :":


على العموم الحمد لله على نعمة الصحه والوعد لا سحبت على الدوام :6


وهاليومين المدير ماخذ اجازه مرضيه تشوف انواع السحب :D


بس حطولنا بصمه عشان ما يصير تلاعب


تجي الصبح وتبصم ولا جيت تطلع تبصم حسيت اننا بسجن موب بشركه ?:


الله يعين الجميع ونبي مشاركات زياده بعد :)

[memy]

انا روتين ممتع هو ..

اكل و مرعى و قله صنعا :6


طانكس و لا تقطع علينا نزل مواضيع http://www.webpost.net/me/memy/%cd%e6%c8%ed.gif

[نيو ايرفين]

أكيد بعد الكرف اللي شفته في الكلية:غضب:


الاجازة خليتها فله:cool: صحيح اني ما اطلع من البيت الا نادرا:-) لكني ماني مقصر في النوم
أنواع السحب في النوم بالاضافة الى النت والPS2 :6

[Fly_Batman]

انا صراحة...بعد ماشفت الإجازة ماصدقت..اني اسهر:6 ..ورحت اسهر حتى تصير عيوني حمره زي الطماطم.==>اكيد طماطم سعودي":"
المهم..بعد اسبوع..حسيت بألفة الى روتيني الدراسي..لذلك رجعت لروتيني القديم مع بعض التغيرات..البسيطة..والحمدالله الأمور ماشية تمام حتى الأن..:)
وتشكر اخوي على هذا الموضوع الرائع..والجميل..سلامي لك..:)

[ارفين]

انا حياتي كلها ... مافيها شيء اسمه بروتين :6



لا في ايام الدراسه ولا في ايام الاختبارات ولا في ايام العطله


حياتي حوووووووسه




حتى انا عندي شغل صيفي 9ساعات يوميا... بس جاحد ام الدوام



الاسبوع الي راح ما داومت ولا يوم ... راح المدير حط توقيع دخول وخروج عشان يحجر لي



صرت اجي اوقع دخول وافخت اقول عندي تقديم في الجامعه :6


وارجع قبل ما ينتهي الدوام واوقع توقيع خروج

[I`m HeRe]

نوم ونت

وبعد المغرب أو العشا نجتمع مع الشباب وأستلام وننج إليفن:6

دجه ما بعدها دجه :p

وافكر ادخل نادي بس مدري متى النيه ?:

ومشكور على الموضوع :)

[MoaeD]

ميمي :



مدري وشو روتينك بس يله :6



وويلكوم :)



نيو ايرفين :


صح الكليه كرف بس بعض الناس يشوفها رهيبه بروتينها ..



فلاي بات مان :


شكلك من النوع الروتيني :6


وسهرك كان تغيير لأنك مليت من الروتين


والعفو :) وشكرا عالرد


ارفين


توقيع تمام موب زينا بصمه وجهاز ورقم سري وحوسه


بس بأكمل شهر وووووز ان شافوني يصير خير



اي ام هير :


اجل روتين صيفي :p



ونادي تبع وشو ؟


العفو والله يوفق الجميع :)

[SNOoOP]

روتين

ابد دوامي كالتالي

اقوم 4 العصر للنادي حتى العشاء

بعد العشاء نطلع انا واخوياي شوي الى الساعه 12

بعد الساعه 12 او 1 نتك ببيت احد العيال وفيديو وبلاي ستيشن وسواليف

اما نمل وبعدها استلم النت


طبعا شي في اليوم هو بعد 1

لأن الطلعات هالايام خيااااااس:أفكر:

[I`m HeRe]

الرسالة الأصلية كتبت بواسطة MoaeD
اي ام هير :


اجل روتين صيفي :p



ونادي تبع وشو ؟



كمال أجسام

[alex]

اخص مشعلاني .. كمال اجسام ... حركات :D




انا الجامعه مخربطه نومي كله ...

[Arsene Lupin]

ملخخخخخخخخخخخخخخخخخبط....


انا روتيني اذا طول استمر اسبوع واحد ثم ينحاس :6


سواء في الدراسه او العطله... محتاااااس..


قبل يومين او ثلاثه كنت انام على الفجر... والحين صاير انام على الظهر...

بعد كم يوم اظن ابصير انام على المغرب (&)

[S-Python]

حوسه X لخبطه ..

اول ما ارجع من الجامعه ادقها نومه الى الفجر ..

ومن الفجر الى الجامعه ... وهكذا :6


والنوم المشكله ذابحني .. ولعد عرفت اذاكر في ذا الترم الصيفي ..

واذا صفا لي يوم من الويك اند ":" دقيتها لعب اونلاين ...

وهلم جرا ..

[flarestar]

كل ما اكتب رد يخرب المنتدى قهر:"



باختصار قلت اني موب روتينية ابد:p


النظام عندي يعتمد على ثلاثة اشياء:

فضاوة السوني...

فضاوة البي سي...


فضاورة الناس لي:p ..


طبعا اهم شيء الناس ثم السوني ثم البي سي:6


يعني كول حاقة تعتمد على الناس:p

[MoaeD]

سنووب :


اجل الروتين حتى بالعطله :6 الله يعينك :)




اي ام هير :


بالتوفيق :)



اليكس :



الله يعينكم حتى الجامعه مسويه قلق ..




ارسين :


هد الوضع شوي شوي :D اجل اللخبطه ذابحتك


اذكرك كنت ما تكلمني الا الفجر يوم انك بأمريكا <-- تحسه ما يسمع بأختلاف الأوقات :6



والله يعينك :)



سنيك :


انت والنوم العله ذا مدري وش يحببك فيه


بس انت يبيلك تأديب جينيرالي وبكرا بأخليك من اسرى الحرب ":"



فلير :



لا لا ما ارضى عيدي الرد :o





<--- سوا نفسه مهم :6

امزح تراي :D <--- ايه صدقتك وبدت تعيده :p



بالنسبه للفضاوات الثلاث (على وزن البقرات الثلاث)


هل لها وقت محدد باليوم او بالساعات ولا حسب المزاج ؟

[Lucky guy]

تقدر تقول نظامي عشوائي زي خوباج ?: بس أكثر شيء في العمل مع الوالد

[{gaia_girl}]

ما أحس بالاجازة.. لو ما كان فيه لخبطة .__.

[Justine]

للأسف أنا روتيني لأبعد حدود :p

لدرجة انك تعرف ايش راح أسوي بعض شوية أو بعد ساعة ...

ما ينخرب الا لمن نروح الكباين ?:

أصحى يوميا 5 صباحا ...

أقعد على النت شوية ...

أقفل أروح ألعب NBA Street ... أطقطق على الفرق بساكرامنتوا ^^

بعدها أعمل لنفسي شكشوكة ...

أنزل العزبة أدقها ساعتين قناة NBA

يجي العصر أروح مشواري ...

أرجع العشاء ... النت شوية ...

أنزل ل RD أفشخ منه أفلام أنمي

أو أقعد على Lunar أو اي RPG ...

الساعة واحدة أكون نايم ...

و هذا روتين يومي أما روتين الربوع و الخميس و الجومعة يختلف :D

[SNOoOP]

الرسالة الأصلية كتبت بواسطة MoaeD
سنووب :


اجل الروتين حتى بالعطله :6 الله يعينك :)



عاد تصدق اقسم بالله اني باوقات الدراسه حوسه?:


اوقات الاجازه منظم ":"


وهو ولله الحمد مب روتين ممل


روتين فله:p

[ash2001]

أسمع روتيني معروووف

=============
في المدارس اكون نهاري (أنام الليل واقوم الصبح)

في الاجازة ليلي (عكس اللي فوق مش فاضي اكتب وبعدين تتعب اصابعي والله حالة )

[8888]

روتين روتين روتين ... الخ :p

الصراحة ما فيه أحد ماهوب ملخبط هالايام وخاصة الطلاب

انا نظامي أبنوم بعد شوي الساعة الحين 5 وربع الفجر

و أبقوم ان شاء الله العصر تقريبا الساعة 3

وأتغدى وأروح أصلي و أرجع أقعد على النت شوي

طبعا الجو عندنا رهيييييييييييييب في الرياض اوف

يخليلك ما تقعد في بيتكم :غضب:

طبعا مافيه أمل أفكر أطلع قبل الساعة 5.30 العصر

وزين ان طلعت

و بعد المغرب أطلع مع اخوياي نروح ندور في محلات الكمبيوتر والاتصالات ونشوف اسعار الجوالات من الفضاوة طبعا

الين الساعة تقريبا 10

بعدها نقلط عند واحد مننا و ناس تقعد على النت و ناس تقعد على PS2

والعب لا تلعب

وبعدها كل واحد يروح لبيت امه

اما السفر فيمكن نسافر الاسبوع الجاي لقدة غير

طبعا بعد ما تخلص التقدايم

وهلم قرا :cool:

سانك يو

[عماد 18]

روتيني و بشدة ..
خصوصا في مواعيد النوم ..
و اكره شي اسمه لخبطة ..
و اخطط لكل شي تقريبا لمدة اسبوع ..
لكن نادر جدا تحصل شوية تغييرات تخليني اتلخبط ..
و على حسب هالتغييرات يتغير مزاجي ..
اذا كانت تغييرات تعجبني انبسطت ":" ..
اذا العكس تلقاني نكدي طول الوقت ..

[flarestar]

الرسالة الأصلية كتبت بواسطة عماد 18
روتيني و بشدة ..
خصوصا في مواعيد النوم ..
و اكره شي اسمه لخبطة ..
و اخطط لكل شي تقريبا لمدة اسبوع ..


ههههههههههههههههه

مدرسة عسكرية:6







هل لها وقت محدد باليوم او بالساعات ولا حسب المزاج ؟

لا على حسب فضاوة الناس... اذا كانوا فاضين لي او لا يعتمد عليه بقية اليوم... يعني مثلا بنات خالتي بيطلعو للسوق العب شوني

موب رايحين نقعد نسولف و لا نستهبل...

صديقتي بتجي الصبح ما انام اواصل اذا كانت مو جايه انام عقب الفجر على طول وكوذا:6

[عماد 18]

الرسالة الأصلية كتبت بواسطة flarestar


ههههههههههههههههه

مدرسة عسكرية:6

لا مسؤولية :) ..
ما احب الفوضوية ..

[Lena]

مدري اذا الي ينحرف دقيقه وحده عن المواعيد يعتبر ملخبط اجل انا ملخبطه..:6


مدري احس اني وسط لا انا لخبطه ولا روتيني طيب وش اسوي:":


يعني انا كل اليوم الصبح

احيانا 6 احيانا 5 احيانا 9:6 <==شكلي ملخبط من قلب هههههههههه:p




بس ما عمري نمت العصر او الظهر شفتوا اني مرتبة":"



مدري بس اكره الروتين وع:6 ..


حول الحوسه الوسط:# <===وش ذي؟

[Mahdee87]

متخبط :6

انا ما ادري شو يعني روتين اصلا خخخخخخخخخخخخ

[انجلينا17]

ملخبط ونص :6

مرض اعوذ بالله :":

[CARLA]

شبه روتيني

اصحى من النوم 3 بالليل اقعد صاحيه الين الساعه 2 الظهر بالكثر في اثناء هذاالوقت تلقاني مابين النت والأنايم

ومن الساعه 2 الظهر الين الساعه 4 او 5 العصر بالكثير انام بعدين اصحى اقعد مع العيله كم ساعه يعني 9 10 بالكثير واذا فيه طلعه نطلع بعد 9 ونرجع على 12


اتفرج تلفزيون من 1 الين الساعه 3 واروح انام

وهكذا دواليك


والخرجات قليله مره لاني مشغوله حبتين هذي الاجازه بالتقديم في الجامعه اللي مو راضي يبدأ ...عناد الشغله:غضب:

ووووبس


ايام المدارس ارحم من الوضع الحالي اللي انا فيه:"

[Tidus]

روتيني لكن العالم مخليني ملخبط >_<

روتيني لانه كل يوم يعدي عالنت و نفس مواعيد الخمده بالضبط و جذي وقت مع نفسي شوي او اقعد ارسم اغلب الوقت اللي فاضي فيه :o

أما مرات تصير عزايم و طلعات و زيارات تلخبط هالروتين مره وحده >_< و تشغلك عن وقت كنت تفضل تقضيه مع غيرك ?: او تسوي فيه شي مهم :o