نشيد الحلنجية

[عماد مصطفى]

بصراحة بكل أمانة لينا شرفنا و سمعتنا
وناس بيقولو لمامة يوم مانقلوظ عمتنا
علشان لينا كرامة شوفو ازاي وقفتنا
رجالة وبكل صرامة قلناها فين حصتنا
حندافع عنكم كلكم ده طريقنا و سكتنا
بدل مايكلوم أكلكم حنعينه احنا فحلتنا
ياباشا كلنا عارفينك طنشت ليه و نسيتنا
خلينا بس مسعادينك طبل حتشوف هزتنا
و احنا ورانا الهتيفة بنعرف نلقح جتتنا
ونبيع ذمتنا بتعريفة زودها تزود فرحتنا
حنسرح ونلعب بيهم ياباشا دي لعبتنا
نكلة وملاليم ليهم الباقي يدخل ذمتنا
العملية خلاص متسوية الايحة جاية فحتتنا
دى عيال دماغها مهوية حينامو ودي شغلتنا
حنصوم كمان ونصلي بايدينا نشيل سبحتنا
معلوم بالكوم مانخلي و بيه حنطلع حجتنا
عالم صحيح حثالة ازاي يشكو فذمتنا
ويقولو علينا لمامة يوم مانقلوظ عمتنا