][½½الكينج 911 في عالم القطط ...قصة لا تفوتكم½½][

[Scorpion KING-911]

بسم الله الرحمن الرحيم
السلام عليكم ورحمة الله وبركاته وبعد
اتمنى ان تقبلوا اعتذاري لانني قررت الابتعاد عن منتديات المنتدى بسبب سؤء التنظيم وبالذات في الترفيهي
لكني عدت اليكم بعد الاصلاحات التي تمت ومن اهمها وضع الرجل المناسب في المكان المناسب بالترفيهي

لن اطيل عليكم وسابدا القصه التي الفتها من نسج الخيال ( يعني لامنقوله ولا شي)

مره من المرارير كنت جالس بالحارة انا والشباب وكان فيه بيت بجنبنا تسكن فيه امراءه عجوز ساحرة وماكنت ادري انها ساحرة
كنت الله يهديني ااذيها دايم الين ما صارت من جد حاقدة علي
جيت في يوم من الايام مار من عند بيتها الفجريه وانا راجع على رجليني من الحارة اللي جنبنا وطلعتلي ومعاها عصى ملونه ضربتبها على راسي وتحولت الى بس (قط) اسود ويخوف بعد
والشكله انها ها العجوز ماراح تردني ادمي زي ماكنت لو ويش صار :02:
بس اللحل الوحيد اللي كنت اقدر ارجع فيه ادمي انها تكون بعيدة عني بمسافه 3000 كيلو متر حتى يفك تاثير السحر
((ومن وييييين تجي ها المسافه يعني لو اني بالغربيه وهي بالشرقيه برضه ما يفك السحر))

المهم اني جيت ابا ادخل البيت على نياتي وقابلت اخواني عند الباب طالعين للمدارس وصقعوني بالحجار والصنادل (وانتوا بكرامه) مساكين مايدورن ان اخوهم صار قطو اسود بعد وقاعدين يرجمونه بالحصى

عطيت عنهم ويوم راحوا جيت ابا ادخل ثاني الا ابوي طالع للدوام وقالي بادب هش هش الين تقلعت
راح ابوي للدوام وطلعت الخدامه بعد ساعه تبي ترمي الزباله (وانتوا بكرامه ) وتركت الباب مفتوح وتسللت للداخل

صادفت الوالدة توها صاحيه من النوم وزعععععقت بقوه جنننننننننيييييييييي جنيييييييييي

حزنت حزناً شديداً وخرجت من البيت حتى لا اسوي رجه

طلعت وحطيت راسي بالحوش الييين صختني الشمس زي الناس
وقمت وانا جايع مررررررررررة

قعدت افكر وش اكل ومالقيت الا اني اطلع ادور في الزبايل :D :D

وجااااااءت الطامه الكبرى



البقيه في الحلقه القادمة غداً باذن الله

يتبع

[$الخليجي$]

خخخخخخخخ لا يكون شربت لك شطه ولا حاجه .. :p

قصتك روووووعة وثاني مره خلها طويله شوي علشان نستمتع شوي ياقطو .. :09:

[* مطلع الشمس *]

قصتك حلوه

وبستنا الجزء الثاني

على احر من الجمر

[Pr.Game]

قصة رائعة وجميلة

واظب عليها

وننتظر الجزء القادم

وأشكرك بشدة عالموضوع الحلو والقصة الجميلة

[TEDUSE 1=BAGGIO]

ههههههههههههههه حلوة منك اخوي بس ما لقت غير قط اسود .

و على فكرة لو تدور في الزبايل تعال عندنا الزبايل متروسه اكل .:09:

و تسلم على القصة و ناطرين الجزء الثاني .:biggthump

[haman]

ههههههههه احلى يا قطوه

[Scorpion KING-911]

اخواني الاعزاء : الخليجي_ مطلع الشمس_بيغ بوس3_ تيدوس_ هامان
اشكركم لتشجيعي على اكمال القصه المتواضعه

الخليجي: خليت الجزء الاول قصير لسببين الاول اني ماكان عندي الوقت الكافي لاكماالها امس
الثاني: عشان يكون قصير ما يخليك تستصعب القرايه لطوله

مطلع الشمس: مشكور لاشادتك بقصتي المتواضعه وراح اكتب لكم الجزء الثاني الان

بيغ بوس 3: تسلم اخوي والعفو


تيدوس:انا حطيت قطو اسود عشان ما احد يهتم فيني لو ابا اجي عندكم قان قطعت اميال لين اوصل الامارات :D

هامان:اقول بس اسكت لا تنشب فيني قطوة مثل بعض ناس ابو لحسه :D

وشكراً جزيلاً لكم

[Scorpion KING-911]

نستكمل
الجزء الثاني والاخيـــر

طلعت ادور لي غدا في الزبايل
يوم قربت من الزباله والقالك بس واقف عليها يقولي ياااا صديق دخول للعوايل بس
قلت انا لله حتى القطاوة عندهم عوايل وعزاب :D
قلت له طيب منا منا يا صديق جب لي لقمه بس
قال لا لا ما فيه صديق انتا ما في مالوم هذا بس عوايل

المهم طنشتنه واروح لك زباله ثانيه بعيدة شوي و صغيره بعد
دخلتها والقالك قطو فحل عربجي وشويه علييييييييييييه كلمة اسود
قالي: ياااااااااا هوه ترا هذي الزباله حقتي . يغني بالقطاوي( بدل بالعربي :D ) اقلب وجهك لا اكسمر لك عضامك
قلت له يا شيخ تكفى لقمه وحد يا ابو الشباب اللون يحن ....الخ
قعد اتحلله الين ما صكني بجمع خلاني الف ثلاث لفات واطيح

طلعت من عنده بسرعه لا يكمل علي وقعدت افكر: وش الحل وش الحل وش الحل

بعد دقايق اشم لك ريحه ذااااااك السمك الفاااااااايحه . وقلت بس ضمننا الغدا
رحت اركض ورا الريحه والقاها طالعه من بيتنا .
والخدامه قاعده تقلي السمك بالحوش . تعرفون عشان لا يخيس البيت

طمرت السور ودخلت الحوش واسقبلوني اخواني بكم حصاة وكم زبيريه (شرقيه)
وطلعت من البيت حالتي حاله مكسمر ولانيب قادر اتحرك عقب ضرب العربجي واخواني اللي كملوت علي

قبل العصر بشوي جاني قطو ابن حلال جايبلي قطعه سمك ما فيها الا شوك (من بقايا الغدا حق اهلي)

طبعاً اهلي زي العادة يحسبوني نايم بالاستراحه عند الشباب والا مسافر ولا جبتلهم طاري :D :D

نرجع للقطو ابن الحلال قالي: يا الطيب انت شكلك غريب عن ها المنطقه
قلت له: الا انا غريب عن ها العالم العجيب
خذني معه لزبالتهم وضيفني ثلاث ايام (طلع القطو ولد قبايل وعلوم رجاجيل :D :D )

وشف سوووووووء الحظ كيف ( يعني ماتركني حتى وانا قطو)
كانت حرمة القطو ابن الحلال حامل وولدت في اليوم الثالث خمس بسلس صغيييرة
عاد انا حسيت اني ابا اثقل عليهم وطلعت بكرامتي .

رحت جهة مخطط بعيد كله عزب واستراحات .هه
لقيت لي رزق . احيان جلد واحيان عظم اقعد اعرشه واحيان جبن فاسد واحيان النكبه برست حراق من البيك :D
بعد كم يوم رجعت للرجال( القطو ابن الحلال) علشان اسلم عليه وابارك له بعياله والقالي عنده لقمتين تسد الجوع :D

وانا رايح له في الطريق بديت اتعب وقلت يا ولد قصدي يا قطو :D خل اريح شوي في الصناديق حقت البلديه اللي يجمعون فيها الجرايد

يوم دخلت والقالك مصييبه كبرى

قريت خبر في جريدة عكاظ :
شاب يدعى الكينج 911 مفقود من 3 اسابيع
وعمرة 21 سنه
نتمنى منكم مساعدتنا في وجود ابننا . وجنب الخبر صورتي وش كبرها

قلت والله ياكنج وصرت مشهور والله وجرايد اجل اكيد في التلفزيون :D :D

قعدت افكر شوي وحزنت حزناً شديداً وقلت الله يعين اهلي وبالذااات الوالدة تلقاها متقطع قلبها علي ها الحين
ما تدري اني صرت قطو وحسبتني جني :D

المهم
رحت للقطو ابن الحلال وقلت له بالسالفه حقت الساحرة ويوم حولتني قطو . وعن اهلي اللي يدوروني

قالي يا رجال اللي صار صار وخل اهلك يحسون شوي من اللي نحس به يوم انهم يتركون بزارينهم بالبنادق الهوا يذبحون عيالنا واخواننا وحريمنا

بعدها بديت احس بالذنب باللي يسوونه الناس وبالذاااااات اخواني الله يهديهم :D

بعدها قالي : تدري انا عندي لك حل
قلت : وشو حلك عطنا اياه

قال اختي ارمله مات زوجها ووراثه منه 4 زبايل ماجره 3 وساكنه في وحده منهم
قلت له: افكر وارد لك ( مسوي ثقيل :D )

قعدت في الليل افكر في كلامه شوي واقعد اصايح على حالتي انا واهلي شوي
بس في الاخير قررت اني اتزوج القطوه اخته عساني القا لي حياه جديدة مع بني قطو :D

رحت خطبت اخته وبالقوه والطقاق وافقت

تزوجتها وجبت منها عيال 3 قطاوه و4 بساس :D

وفي يوم من الايام وبعد مرور سنه ونص على دخولي عالم القطاوة قمت من النوم وناديت ام العيال طالعت فيني وخافت وقالت مييييييييييو مييوووووو وخمشت خشتي وعطت من الزباله هي والعيال

طلعت من الزباله وتحسست نفسي ولقيت اني رجعت آدمي زي ماااااكنت

انتبهولي شباب ساكنين في الحارة اللي جنبنها ( اللي فيها الزباله)وقاموا يتشمتون فيني
((مو هذا الكينج اللي ضايع من اهله قبل فترة .. الا والله هو .. كاكاكاكاكاكا شكله حابله قطوة ومطنش اهله.. كاكاكاكاكاكاكاكاكا.. من الحقد قمت ارجمهم بالحصى


بعدها رحت بيتنا مكسمر وحالتي حاله بعد ما تطاقيت مع عيال الحارة اللي جنبنا

دقيت الجرس وفتحولي الباب , استقبلتني الوالدة هلااااااااا هلااا بوليدي هلا ببعد حيي هلا

وينك من سنه ونص ما ندري عنك حسبناك ميت . وبعدين وش ها الريحه ووراك مبهذل وحالتك حاله
(تعرفون ساكن في الزبايل سنه ونص اكيد بتكون ريحتي طالعه :D )
قلتلها والله يمه اللي صار.......وحكيتها قصه الساحرة والقطاوة ...الخ

قالت : الله يخسك خليتني جدة . لاااااااااا وبعد جدت قطاوة :D :D

رحت الحمام اللي لي سنه ونص ما شفته وتروشت لي حول 3 ساعات وحلقت دقني اللي صارب تقل عش غراب

وطلعت لعيال الحارة

هلا بالكينج والله هلا
سمعنا انك كنت متسردح من زباله لزباله .. مسرع ما وصل الخبر من الحارة اللي جنبنا :D تقل BBC

قلت لهم القصه حقت الساحرة النيجيريه وكيف حولتني قطوووو

ضحكوا علي اليييييييييين المغرب

وقالولي

على طاري العجوز ذي (طبعاً ما يدرون انها ساحرة الا مني ) تدري وينها

قلت : وينها

قالوا: مسكوها الجوازات وسفروها نيجيريا

قلت: اممممممممممممممم وانا اقول ليش فك السحر



تدرون ليش

















عشان المسافه بيني وبينها صارت اكثر من 3000 كيلو متر
بعدها فك مني السحر اتمنى تكون القصه عجبتكم


اتمنى تكون القصه عجبتكم

لكم تحياتي


حقوق الطبع محفوظه ½][KING-911][½

[$الخليجي$]

خخخخخخخخخ .. الله يرجك بس يالقطو .. :p

أقول الحرمة والعيال لازم تشتري لهم زبالة وتسكنهم فيها مايصلح تخليهم مشردين .. :09:

[Scorpion KING-911]

خخخخخخخخخ .. الله يرجك بس يالقطو .. :p

أقول الحرمة والعيال لازم تشتري لهم زبالة وتسكنهم فيها مايصلح تخليهم مشردين .. :09:

ههههههههههههههههههه
الله يرجك انت

هذا اول اشتريلهم زباله يوم اني قطو
خخخخخخخخخ :D

مشكور اخوي الخليجي على مرورك الرائع ولك تحياتي

[darkitp]

برافو .. كينغ .. :fing02:

عجبني فيه النكت و الطريقة في الكلام :tongue2:

و بصراحة احلى قصة خيالية أقراها ها الشهر :33:

بالتوفيق أخوي و نشوف لك قصص أحلى و أروع

سلام :ciao:

[BLuE^BoY]

هههههههههههههههههه...حلوه خخخخخخخخخخخخخخ

تدري وش مجمل القصه حقتك مسكت التحويله للقطوه :D بس حلوه النهايه خخخخخخخخخ

SiLeNT EviLL

[Scorpion KING-911]

برافو .. كينغ .. :fing02:

عجبني فيه النكت و الطريقة في الكلام :tongue2:

و بصراحة احلى قصة خيالية أقراها ها الشهر :33:

بالتوفيق أخوي و نشوف لك قصص أحلى و أروع

سلام :ciao:

اخي العزيز دارك
تسلم اخوي على تشجيعك وهذي شهادة اعتبر اني حصلت عليها من المنتدى ككل

Thank you
Bye :ciao:

[Scorpion KING-911]

هههههههههههههههههه...حلوه خخخخخخخخخخخخخخ

تدري وش مجمل القصه حقتك مسكت التحويله للقطوه :D بس حلوه النهايه خخخخخخخخخ

SiLeNT EviLL

مشكور اخوي بلو بوي على مشاركتك
ونتمنى المرات القادمة تشاركنا بالعضوية الاصلية :D

[haman]

هامان:اقول بس اسكت لا تنشب فيني قطوة مثل بعض ناس ابو لحسه
ليحين تتذكر هامان ابو لحسه هههههه

مشكور يا ابو القطاو اقصد يا كينج قطو يه شفيني هههههه

[القلب المرح]

:ciao: :jester: صج صج فلة والله عجبتني واجد
أتمنى لك التقدم وعدم الهروب من المنتدى :05:

[زوون 7]

مشكور الاخ كنج والله قصة رائعة
تسلم والله وان شاء الله نري منك قصة جديدة

[أســ2008ــامة]

هههههههههههههههههههههههههههههههههههههههههههههههههههههههههههههههههههههههههههههههههههههههههههههههههههه هههههههههههههههههههههههههههههههههههههههههههههههههههههههههههههههههههههههههههههههههههههههههههههههههههه ههههه
الله يقطع شرك أنت والقصص اللي زي كذا والله القصة حركة وياليت تستمر في التأليف

[Scorpion KING-911]

اخواني الاعزاء : هامان_ القلب المرح _ زوون 7 _ اسامة
مشكورين على تفاعلكم مع القصه

هامان : ومن ينسى ابو لحسة :D

القلب المرح: هروبي من المنتدى بسبب الظروف

زوون 7 : باذن الله قريب ابا اكتب قصة لاجل عيونك

اسامة : الله يقطع شرنا جميع . وياليت تقولي ليش حاط 2008 انت تجهز للالعاب الاولومبية :D

اكرر شكري مرة ثانية واعذروني على الانقطاع الطويل بسبب الظروف

ولكم تحياتي

[بهجت الأبصيري]

يا رجال كم مره اقلك مالك ومال العجائز

ترى وراهم جريات قويه وصعب الخروج منها :)

بس تصدق عالم البسس مشوق جدا :tongue2:

ما دريت انه بس عندنا علوم قبائل....والون يحن :)

اثاريه حتى عند القطاوي


الله يقطع سوالفك يا شيخ :)


المهم لاعد تتحرش حتى في الهنود نبي نشوفك مره ثانيه

سلام ياعسل

[الرهـــــــــيب]

والله شوقتني نفسي اعيش عالم الببسس يوم خهخخخخخخخخخخ...تصدق انا متابع معك الموضوع من البداية بس نسيت ارد عليك:)
وشكرا عالموضع:)

[Scorpion KING-911]

:
يا رجال كم مره اقلك مالك ومال العجائز

ترى وراهم جريات قويه وصعب الخروج منها :)

بس تصدق عالم البسس مشوق جدا :tongue2:

ما دريت انه بس عندنا علوم قبائل....والون يحن :)

اثاريه حتى عند القطاوي


الله يقطع سوالفك يا شيخ :)


المهم لاعد تتحرش حتى في الهنود نبي نشوفك مره ثانيه

سلام ياعسل

والله اخوي بهجت ما كنت ادري ان العجايز وراهم كل هذي العلوم :D

وان شا الله لقاءنا راح يكون قريب قريب جداً

ومشكور يا عسل على الطلة الحلوة



اخوي الرهيب
نفسك تجرب عالم البسس ؟؟
سهله
























بهذل العجوز :D :D

مشكور اخوي عا لمشاركة الرائعة


ولكم تحياتي