سلام

[ODIN]

سلام .. كيف الحال يا رسامين ؟:)

صراحه جد مادري كيف ابدى بالموضوع .. هل اعتذر على غيابي الطويل عن منتدى الرسم ام هل ابدى بالسؤال عن احوالكم واخباركم ..

اول شي اعذروني جد اعذروني على الغياب هذا .. صراحه من دخلت للجامعه وتوظفت بنفس الوقت وانا ماني قادر احصل وقت احك فيه راسي .. كل دخولي للمنتدى يكون سريع ويقتصر على الامور الاداريه اذا كان يحتاج تعديل وغيره ..

ان شاء الله تكونون عاذريني ومقدرين الوضع ..

بسألكم انتم اخباركم ؟ مادري احس كثير اعضاء نعرفهم غايبين ومالهم حس ابد بالفترة الحاليه .. ان شاء الله يردون بالسلامه .. من من الاعضاء الي غايب وللحين ما رجع ؟

الشي الثاني .. يمكن تعرفون اني تخصصت بقسم هندسه المعمارية بسبب رغبتي لها .. حيث القسم الوحيد الموجود في السعودية ويحتاجله رسم وتصميم هو المعماري .. هو انسب مكان يتوافق مع قدراتي ..

والحمدلله ماشي بهذا القسم من اروع ما يكون والله يسهل الباقي ..

راح اعرضلكم بعض اللوحات الي رسمتها في بعض مشاريعي .. بس المشكله اللوحات حجمها a3 ماقدر احطها بسكنر .. جمعتها كلها وصورتها .. صراحه مب واضحه لكن تأدي الغرض ..

اذا كنتم تريدون اصور كل وحده على حده حتى تطلع اوضح انا مستعد ..

الشي الاخر في طلب اذا كان يحقلي اطلب شي منكم مع اني مستحي والله ..

مشروعي الفاينل بديت فيه الحين .. وهو تصميم شاليهات على البحر ..

طبعا لازم نستخدم فيه الوان الـــ water color الوان مائيه .. وبصراحه جد جد انا خبرتي شبه منعدمه فيها ولااعرف كيف استخدمها بطريقة مناسبه .. اتمنى من احد يعلمني الطرق المثلى للتعامل معها .

المشكله ان الالوان المائيه متعبه .. لما استخدم الفرشه وابي الون ارض خضراء مثلا .. مشكلتها ان اللون ما يطلع نظيف مع اني احاول دايم الون باتجاه واحد .. لازم تطلع خطوط مشوهه .. مادري كيف اقدر اوصف لكن اجد صعوبه بتعامل معها ..

اتمنى نصايحكم الله لايهينك باسرع وقت .. لان بعد اربع ايام ببدى الون المشروع :)

* ملاحظات على الصورة المرفقه /

- للاسف الرسم مو واضح ابد كثير تفاصيل اختفت والسبب الكاميرا ضعيفه .. الرسومات فيها تفاصيل كثيرة خاصه بالمبنى الي فوق ورسمة المنظور الداخلي الي فيها درج .. يعني حتى اللمعه على الرخام كانت واضحه بالرسمه وامور تفصيليه كثيرة غايبه ..

- لاحظو تلويني بالوتر على اللوحه الي لونها اخضر . لونتها بالوتر لكن تلويني غير جيد صراحه احتاج لبعض التوجيهات منكم ..لاحظو كيف اللون طالع غير مرتب ومحيوس فيها :)


انتظركم :)

[darkitp]

الله يوفقك ويعينك أخوي ...

لكن عندي استفسار .. هل للحين تستخدمون الالوان المائية .. :31:
بصراحة انا لما دخلت على مكتب عقارات وإعمار للتصميم .. :أفكر:
شكلهم كلهم يستخدمون برامج الثلاثية الابعاد .. مثل الماكس ثري دي .. :33:
وهو عمل متقن افضل و مستحب وذلك بسبب الطور وحاجتنا للتغير ... ( ( رأي شخصي ) )

ملاحظة : ما ظهرت الصور بالمرفقات .... :blackeye:
اذا فيه مشاكل وتريد مساعدة .. ارفعها في >> خدمة رفع الصور (http://www.q826.com/Picture/)

سلام ..

[ODIN]

المعذره نسيت ما ارفق الصورة

[ODIN]

دارك تيب حياك الله اخوي

بالنسبه للبرامج الثري دي والكمبوتر بشكل عام .. هذي ما نبدى فيها الا بسنه ثالثه .. السنوات الاولية تكون سنوات تأسيسية وكلها رسم باليد ...

مستحيل الكمبوتر يخلق الحس المعماري عند المهندس .. لابد من البدايه بالطبيعه ..

[Rex]

حيالله بالاخ أودين!
الحمدلله عالسلامة ^^

منزمان مالك حس بالمنتدى!
ان شاء الله نشوفك تشارك من يديد وبشكل أفضل ;)

ورسوماتك اليديده حلوه مره ,وملاحظ تطور مستوى الرسم!! ما شاء الله!
وعجبتني جدا هالجملة بردك!!


مستحيل الكمبوتر يخلق الحس المعماري عند المهندس .. لابد من البدايه بالطبيعه ..

بالضبط :D

موفق...

[C.Falcon]

ماينفع الفوتوشوب :D ؟؟؟



بالنسبه للبرامج الثري دي والكمبوتر بشكل عام .. هذي ما نبدى فيها الا بسنه ثالثه

غريبة عندنا ((بجدة)) تدرس الرسم الهندسي 101 و 201 كلها من سوليد ورك و أوتوكاد وانت ماشي ...
الله يعينك في دراستك و يوفقك في الدنيا و الآخرة ...

[ODIN]

رفلكس .. حياك الله حبيبي نورت الموضوع والله :) اشتقنالك صراحه واشتقنا لباقي الاخوان الي مالهم حس ..

والحمدلله بالنسبة لمستواي فهو تطور كثير عن اول .. بس من ناحيه الرسم الواقعي والطبيعي لان هذا اكثر شي امارسه بالجامعه .. اما رسم الانميشن فصراحه تطوري فيه قليل بالنسبة للواقعي .. لان كل وقتي على الواقعي ..


سي فالكون /

اخ يابعد قلبي الفوتوشوب .. بعد كم يوم بساعد واحد بسنة خامسه .. راح يلون مشروع تخرجه بالفوتوشوب !! وانا راح الونله ..

وبالنسبة لجامعتكم .. هو صراحه اريح الكمبوتر .. لكن قارن بين طالب سنه ثانيه من الي عندنا ومع الي عندكم .. راح تلاقي صراحه فرق شاسع بالنظرة المعمارية والحس كذلك ..

[C.Falcon]

وبالنسبة لجامعتكم .. هو صراحه اريح الكمبوتر .. لكن قارن بين طالب سنه ثانيه من الي عندنا ومع الي عندكم .. راح تلاقي صراحه فرق شاسع بالنظرة المعمارية والحس كذلك ..
...................
ما عندي تعليق :D
بس بعد ما تخلص من تلوين المشروع أرسله لي ، تيب ;)

[Renoa Heartilly]

ول, شفيه الموضوع كله أولاد؟ >_> أخوي أودين, أنا شفت أنك تبغى ملاحظات على الرسم بالألوان المائيه و فرحت, قلت بالقى لي درس ببلاش, بس ما أحد طرى الألوان المائيه للحين >_< و بعدين شكبركم طلاب جامعه و حركات و تلونون بألوان مائيه؟ <== نست أيام الثانوي يوم المدرسه تقول لهم رسموا بالاألوان الزيتيه و حاست الدنيا )
الله يوفقك أخوي, و تطلع مهندس رفيع المستوى و الذوق :)
أقول, الرسمه الي آخر شيء تحت, هذا المبنى خلص و لا لسه؟ أقدر أتزحلق على الدرج؟ :D
بس أنا لسه ناطره دروس الألوان المائيه >_<

[g. byte]

ياهلا والله , عاش من شافك يابو بثينة :laugh:
واوتش !! أخيرا في أحد مهتم بالألوان المائية في المنتدى :11:
صدق أو لا تصدق , اليوم اللي قريت فيه موضوعك لقيت موقع فيه دروس للألوان المائية ماحصلتش , بس خلص اشتراكي <_> وماقدرت احطه , زين ان الاخت رينوا رفعت الموضوع والا بغيت انسى !
الموقع ممتاز جدا وشرح صاحبة الموقع سهل وواضح متأكد انه راح يعجب المبتدئين والمحترفين في آن واحد ! ( سارع فالكمية محدودة ..) بس لازم تطبقون اللي فيه للحصول على الاستفادة القصوى :vereymad: وهذا الكلام مش لاودين ورينوا فحسب ! لكن لأي شخص يبغى يتعلم أي شي , لازم تطبقون لازم لازم لازم :17:
إفغص هنا من فضلك (http://www.fountainstudio.com/watercolor_tips.html)
أنا شخصيا استفدت منه كثير مش بس في التلوين المائي لكن في نظريات تقدر تطبقها حتى على الباستيل والألوان الزيتية والخشبية .. الخ ., واحد من الدروس الممتازة في الموقع يتكلم عن الخيال , لايطوفكم :cool:

وبالتوفيق ياأودين في هندستك وان شاء الله تصمملي ورشة عمل في مشروع تخرجك :D