ماهو لعبه

[mo7trm]

اذكر انهم كانوا يسمونه "ابو البنيات" وبعضهم كان يسميه "البنيه"..يوم هو صغير ..مهوب علشانه كان يشبه البنات او يتشبه بهن ..لكن لأن البنيات كانن عليه مثل الفراش على الضو ..



كان يمشط شعور البنيات الصغار اللى بعمره واللى اكبر شوي واللى ادون ..ازين من تمشيط امهاتهن او خواتهن لهن .. ويعرف يتفنن بحط الحنا بالايدين ويشكله على اشكال حروف والا نباتات ..وعلى صغره كان يعرف يمدح الشي اللى يسويه للبنات بحيث ماكانن يبن غيره يزينهن ..وانسحرن به سحر ..الامهات قبل البنات حتى ..

كانن الامهات يرسلن بناتهن لم اهله الا من صارن يبي يروحن لم عزيمه او عرس وتلقى البنت ابد تقول :تسلم عليكم امي وتقول "خلو عزوز"يمشط البنات الله يعافيه ..

همن تلقاهن ابد يصفن سرا ..كل وحده تنتظر دوره قدامه ..وهو تلقاه ابد مستغرق بالتفنن والتزيين ولا اكبر بروفيشنال ..وابتكاراته بانواع القصات وربطات الشعر وطرق التكحيل وما كانن لهن عنده حد ..

على انسجامه ذاك واخلاصه لفنه كان يتعرض طبعا لعواطف هاللى على ابواب المراهقه من الصغيرات ويجيه من حراره مشاعرهن الشي الكثير .. كانن يحاولن يحاكنه او يمزحن معه مثلا ..وياحظ اللى مثلا يسولف له سولافه طويله او يقول لها كلمه حلوه ..مثل انه يمدح شعره او شي به .. هذيك تلقاه تعيش اللى قال له ايام واسابيع ..وتلقاه تعلم خوياته وقد تزود وتبالغ وقد تخلق منه قصة حب ووجد وغرام ..



وكان يعرف يتعامل معهن كلهن وبدون أي مجاملات مستهلكة او كذب ..يعني ماكان يسوي اكثر من انه يلقى بموهبته المميزه بأي وحده يتعامل معه من هالصغيرات ..ويمدح به الشيى الحقيقي ..وبالمقابل مايحكي عن العيوب ابد ويداري وينتبه وحتى لو طلبت منه البنت نفسه انه يقول له عيوبه ..بس يحاول يداري العيب بالكياج او الكحل او قصة الشعر لكن عمره مايحكي عنه ..



كان سابق عصره اكالولد وكان الاهم متجاوزٍ ظروف عصره بعد ..وكسب احترام وثقة الجميع ونال المجد من اطرافه ..وصلت لان الوحده من هاكالبنيات كانت عادي تكتب اسمه بالقلم مثلا على ذراعه او ساقه ..او يمكن تاصل للوشم الصغبر اللى كان يزين بعود كبريت او شي ..وقام جيل كامل من بنات هاكالحاره على عشق هال "عزوز".. وبدون مقابل يعني مثل عشق البنات ل"نيكولاس كيج" او "براد بيت" هاليومين ..لكن ..ماشي يكمل الا وجهه..



ماحد يقدر يكسب الجميع كذا ..واللى يحبنه الحريم يكرهونه الرجاجيل ..واللى يحبونه الرجال مايواطننه الحريم ..وبكذا كان "عزوز" يأجج الاحقاد بصدور اللى حوله بدباشه وبدون مايقصد او يحس ..

واول مابدت الامور تاضح له يوم بدا ياصل الستطعش ويكبر وبدن الحريم يتغطن عنه واضطر فجأه لمخالط الملاعين ..كان يعير "البنيه"من حينه لكنه لاحظ نكهة التشفى والحقد بادية تظهر ..وعجز يلقى له احد يصادقه ويرضى به ..ومن ناحية ثانية عجز بعد هو انه يقتنع باحد من جنسه عقب مخالطه الكثيف للبنات ..واستمر على كذا شبه معزول ..واللى كانن يحاولن يكلمنه بالتلفون وكذا ماكان يقدر يصير معهن مثل منول ..كان مثل السمكه اللى طلعوه من الما..وبدا يذبل ويبيد سبحان الله..



بتل على كذا لمين جا وقت الزواج ..وبدت امه واللى حوله يزنون عليه ..وبعد اخذ ورد وافق يدورون له ..وكانن امهات اللى يتقدمون لهن والبنات يوافقن ..لكن الامنه جت للأبو عيَا .. وعرف وعرفوا اهله انه بسبب ماضيه وحقد الابوه والاخوان عليه ..وشكهم باخلاصه وولائه بنفس الوقت..دور دور لما عجز..ومير يخر ..ويقعد ببيت اهله مايدري وش يسوي ..



نصحوا اهله يطلعون عن الحاره اغاديه يعبر الا منه ابعد عن اهل حارته اللى عارفينه ..وفعلا طلعوا ودورا له ..ومير يوم لقوا له وحده وشافه وجازت له ونووا العرس خلاص ..جاه يوم العرس هاكالالم اللى لايحتمل بداخليته..وتلوى وتوجع لما قالوا خلاص راح فيها الولد يبي يموت الله واعلم ..ولا خففه الا يوم رقد بالمستشفى له يومين ..

وانحرجوا معازيبه بالحيل ..وفات موعد الزواج ..وجو معازيبه من باكر يشوفون عنه .. واعتذر لهم وبين لهم انه طاب وكلش وطلب منهم يحددون له من باكر لو يبون ..وبعد تردد وخوف انه يفشلهم ثانيه وافقوا للاسبوع اللى عقبه.. وتكرر الموضوع مرتن ثانيه يوم جو يعيدون الكره عقبه باسبوع ..ومير يفهمونه اهل البنت ..فكوا العقد وخلوه يطلق وقالوا كفانا فضايح وبهاذيل لبنيتنا ولدكم ممسوك ..



من عاد يبي يطلع هاللى ماسكته بين هاكالعشرات من البنات اللى كد عشقنه ..أيس وطفى ..وعرف انه محجر له من كل جهه ..أحقاد من كل هالرجاجيل اللى حوله وشماته ..وأنفس ممسكته من هاكالبني اللى كد عايشهن ..وولاهوب اللى يقدر يرجع لمنول ..



وآمن بعمق ان ماله طلعة من هالحفرة اللى هو به ..وحاول انه مير خلاص يوطن روحه على هالشي ..

وقام اكالصبح واتجه لسيارته يبي يروح للعمل ..ومير والله تاقع عينه على ورقه لقاه ملفوزه بيد باب سيارته ..



أنيقه ومعطره ..



وبخط بناتي دقاق ..



وهو عاد اخبر الناس بخطوطهن..



والا مكتوب عليه ..



....الحب

ماهو لعبه ...











عــبــدون"