المساعد الشخصي الرقمي

مشاهدة النسخة كاملة : المرحلة الجامعية كلية الحاسب ولا علوم مالية؟؟؟


ALcATRAZ
02-02-2005, 08:06 PM
انا الحين في ثالث ثانوي
بس محتار قاعد أفكر وش ادخل...اي كلية
كنت افكر بالحاسب الآلي..وان مستقبله مضمون
لكن اعرف كثير ناس في جامعة الملك سعود حولوا من الحاسب وتركوه..مع انهم ممتازين بالدراسة
بعدين فكرت ادخل حاسب جامعة الامير سلطان..وفيه بعد ناس حولوا منها وفيه ناس يقولون انه ممتازة لكن اختباراتها صعبة!!!؟؟؟


هذا خياري الاول اللي هو الحاسب
الخيار الثاني علوم مالية...يمدحونها ويقولون ممتاز جدا...وان دخلتها بدخلها في جامعة الامير سلطان

انا ابي رايكم ياشباب...وخاصة الطلاب اللي درسوا احد هالمجالين..
غير متصل
04-02-2005, 10:19 PM
السلام عليكم

من كلامك انك بالرياض

اذا انصحك حاسب جامعة الامام
shadow man
05-02-2005, 03:46 AM
والله شوف يا اخوك

اذا عندك رغبه في اي قسم بتمشي فيه مهما كان صعب

اما على الحاسب ففيه ماده اسمها الخوارزميات ( كلها رياضيات ) اذا عندك رغبه بتمشي

اعرف واحد من الشباب ما عنده خبر فيها مشي بس انته شد حيلك

اما على العلوم الماليه والله ما عندي شي فيها

لكن مهما كان الطريق اللي بتختاره امشي فيه

وعلى قولة واحد من الآباء :

انك تكون في الشي القليل الرأس
احسن من ان تكون في الشي الكبير الذنب

بالتوفيق
ALcATRAZ
05-02-2005, 07:03 PM
مشكورين على ردودكم

غير متصل: بالنسبة لحاسب جامعة الإمام..تعرف احد داخله؟؟ وهل الدكاتره فيه افضل من جامعة الملك سعود؟؟ ولا المناهج أفضل؟


shadow man: كلامك صح....لكن انا اعرف ناس دخلوا حاسب وكانوا عندهم رغبة فيه...ومامشوا زين...مع انهم مميزين
tahaab
07-04-2005, 12:57 PM
السلام عليكم

علوم ماليه تعلم الانسان الامور الماليه والمصرفيه والمحاسبيه فارجو لك ان تدخل هذا القسم لتتعلم عالم
المال والاقتصاد ..........ولك النجاح والتوفيق.



اخوك
طــــه عباس الســـــــــعيد
العراق \ البصره
ALcATRAZ
07-04-2005, 03:01 PM
شكرا على ردك أخوي tahaab وتشجيعك:)
غير متصل
08-04-2005, 04:31 PM
السلام عليكم

انا بالامام ولكن لست لاني بالامام اقول لك ادخلها ولكن لعدة اسباب

اولا : وجود سنة تحضيرية فقط انجليزي + رياضيات + فيزياء خفيفه + مقدمة حاسب <<<< ان شاء الله تطلع تتكلم انجليزي 90 % بعد السنة التحضيري خصوصا ان الحاسب الالي يعتمد على اللغة الانجليزية بشكل رئيسي

ثانيا : السنة التحضيرية لا تدخل بالمعدل التراكمي <<<< يعني لاتشيل هم المعدل

ثالثا : دوام الكلية صباحي <<<< ليست كسعود مسائي

رابعا : الدكاترة دللللللللللللللللللللللع <<<<< خصوصا السعودييييين

خامسا : الدراسة التخصصية (( الحاسب الالي )) هناك تخصصان علوم ( برمجة ) ، نظم

اما المناهج فنفس المناهج بالعكس حتى انك تقدر تاخذ صيفي في سعود لان الامام مافيها صيفي



الزبدة تراها اطلق من سعود بسبع مئة مرة
Phantom x
09-04-2005, 01:43 AM
العلوم الادارية اصرف لك اعرف واحد هناك ما قد شفته مره ذاكر من يوم خشها واعرف واحد بالحاسب مقطع عمره من المذاكرة وياليته فلح اخرتها حول من الحاسب وعلى العموم اختار التخصص الي ترغب فيه لو كان تاريخ اهم شي تبدع فيه :)
رووبيي
10-04-2005, 04:53 PM
اهلين اخوي ALcATRAZ

اسمعني

انا حاسب بالملك سعود واشوفه حلو ويهبل بعد

شف اذا انت تحب الرياضيات وتحب المعادلات راح تمشي فيه

هو يعتمد على الرياضيات بالدرجه الأولى ويعتمد عالذكاء بعد

بس الشي اللي مو زين هو انه صعب شوي يعني لازم تشد حيلك وتصير دايم مذاكره للدرس اللي تاخذه

بس والله وانت تحل برنامج صح تحس بمتعه

لا تحسبني دافوره ترى معدلي مره طايح بس هو حلو وانا الحمد لله مستمتعه فيه

بس خذها نصيحه مني


اذا انت تحب الحاسب وحاس انك بتبدع فيه لا تتردد ادخله وربي ما راح تندم بس راح تواجه صعوبه واذا انت قدها ما عليك

انت يمكن تحمل مواد بس معناته هالشي انت فاشل بالعكس الفشل احيانن هو بداية النجاح

هذا كلامي اللي قلته لك واذا انت تشوف ان العلوم الإداريه ازينهذا شي راجعلك انت ادرى بمصلحتك

واسفه عالإطاله :biggthump
ALcATRAZ
23-04-2005, 12:01 AM
مشكورة اختي رووبيي على مرورك...مازال اهتمامب محصور بين المجالين اللي ذكرتهم
وحمستيني للحاسب...وهو فعلا...من يوم اني صغير وانا اميل للحاسب واعرف بلاويه
ونفس الشي عندي رغبة بالعلوم المالية

اتمنى لك التوفيق اختي:)
the_hex_13
26-04-2005, 05:17 PM
السلام عليكم


اخوي انا في جامعه الملك سعود حاسب الي

اولا منهاجنا قويه الدكاتره متمكنين من الماده<<<ما اظن مناهجهم نفس الشي

و بعد عندهم اطلق تخصص في الحاسب هندسه كمبيوتر <<ما فيه بالامام

صحيح انه في المستوى الاول و الثاني المعامله و الاختبارات بك عليها بس هم يبون الخلاصه

زي الي يجيك ما قد شاف كمبيوتر في حياته جاي من قريه ولا اي مكان و يخش حاسب من جد وش يبي

زي اذكر بالمستوى الاول الدكتور يقولننا افتحوا الفيجوال بسيك يقوم واحد دلخ يقول طيب ما عندي ايميل ما راح اقدر اسوي شي
:17:
اما عن جامعه الامام ما اقولك فيها شي لاني ما قد جربتها الا في اختبار القدرات و كان تعملهم زفت زفت زفت

و اذا كنت راعي اغاني و فله و شعر طويل او قصات و بددل

ما انصحك مره

بالامام واحد من العيال فصل ثياب قصيره علشان الجامعه بسسس

خخخخخخخخ

بس اهم شي

تكون تحب الحاسب يعني داخله على هوااك مب علشان مستقبل

و تهتم من البدايه ب لغات البرمجه و الرياضيات


و ااسف على الاطاله
boo boo
27-04-2005, 03:29 PM
السلام عليكم ورحمه الله وبركاته....

هلا اخوي....
انا طالب في جامعةالملك سعود -قسم حاسب الي ومعلومات-بدون تخصص بس ان شاء الله نظم معلومات..ان شاء الله

اسمع
انا بالنسبه لي احمد ربي كل يوم اني دخلت حاسب الي....
تدري ليه...؟
قسم الحاسب مستقبل مضموووون 100%
صحيح ان دراسته صعبه وترفع الضغط شوي..
بس ... فيها متعه
لأنك تكتب برنامج وتتعب عليه .... تعب ...بس يوم تطبق الربنامج بدون اخطاء ...انت راح تستفيد بالبرنامج ... ماراح تقول وش الفايده منه ...
مثلأ ...
مره سويت انا برنامج عباره عن ساعه ...
يعني يوم خلصت منه ... مارحت وحذفته بالعكس خليته عندي ....

شوف انا راح اقول لك حاجه...
انا يوم دخلت الحاسب كنت اقول خلاص الحاسب مضمونه ماراح اشد حيلي..بالعكس المذاكره لازم اول بأول...
انا بعد الاختبارات الشهريه الاولى كنت احيانا اقول ياليتني ما انقبلت في الحاسب ...وتجيني ايام والله العظيم كنت ابكي فيها من القهر...
لانهم يدرسونك مواد اول مره تمر عليك ...مثلاً:112عال
لغة برمجه ب c++ الله لا يوريك ياشيخ
الطلاب اللي ينجحون فيها ينعدون على الاصابع والله


المهم طولنا عليك بس ...نصيحه ادخل الحاسب..واذا ما استفدت في الجامعه راح تستفيد في التطبيقات اللي تصادفها على النت في حياتك (هذا العصر عصر الكمبيوتر)

واسف على الاطاله
back street
04-05-2005, 07:33 PM
هلا أخوي
نصيحه مني لاتدخل جامعه الامام
ترى الشركات ماتطلب خريجيها . والسبب؟؟؟؟؟؟ ماادري

بس للحق جامعه الامام دكاترتها دلع واخر كلام ومناهجهم سهله


أنا أقولك أدخل جامعه الملك سعود علوم اداريه سواء محاسبه أو ادارة اعمال أو قانون

وإن ماقدرت على جامعه الملك سعود

ادخل معهد الادارة
أحسن مافي المعهد بعد ماتتخرج تحتار بالوظايف

الان يقام معرض في معهد الادارة معرض توظيف ولا يقبل الا خريجي المعهد ورواتب على مستوى


صل الاستخارة وتوكل على الله
وترى الدنيا ماوقفت على شهادة (سواء من أي جامعه أو أي تخصص)