{ .. صورة لأكبر زبيدي لقطته في حياتي كلها!! .. }

[ثريول]

http://www.trustdot.com/images/bismilah.gif




هذا الشتاء كان مميز عن غيره عندنا, من ناحية الجو والمطر والبر, ومن مناحي كثيرة كالها علاقة بالمناخ تصادف وقوعها لي في هذا الشتاء. والحمد لله السنة طلع الفقع وبكثرة في قطر, في أماكن متفرقة ومتباعدة. عن نفسي, السنة ماقصرت أبد في الشتا, وماخليت حزم ولا وادي إلا وطيته.

المهم, الناس كانوا يروحون بعيد وهم يدورون الفقع, وبحكم تجربة سابقة لي.. كنت ما أباعد, دايم في المناطق الــ"مغفول عنها" , يعني مثلاً : أطراف المزارع , أطراف المنطقة الصناعية فيها فراغات كبيرة على حالتها الطبيعية, وفيها رقروق بكثرة–النبات اللي يطلع الفقع- .. في يوم من الأيام نزلت هناك قريب من قاعدة عسكرية, وما فيه أمل يكون أحد فقع المكان قبلي. التفت يمين ويسار مالقيت, ألا على بعد تقريباً 30 متر فرقوعة تروع اللي يشوفها من كبرها, شي ماقد شفت مثله في عمري!! .

فــ هذي صور لما كان تحت الأرض, ورفعها مثل الجبل!! :


{ .. http://a3ul.jeeran.com/DSC00497.jpg .. }

الزبيدي, بعد لقطة بساعتين , في يد أخوي سلطان, وتلاحظون أنه مشقق وطالع كأنه زهرة, وهذا دليل عند العارفين بالفقع أنه كان في حالة نمو, يعني لو لقطته بعد شهر كان أكبر من هذا بوايد!




_______

{ .. http://a3ul.jeeran.com/DSC00488.jpg .. }

هذي صورة ثانية له, وهذي الصور بعد ما انقطع جزء منه, وتلاحظون هذا في القطعة الكبيرة طرف يده!!




_______

{ .. http://a3ul.jeeran.com/DSC00492.jpg .. }

صورة لسلطان نفسه سنة 1996 3 - 29 -بنفس تاريخ اليوم يعني!- , وفي يده زبيدي ضخم بنفس حجم هذا, لقاه الوالد في وقت ماكان فيه فقع وحطوا صورة الزبيدي في الجريدة. وهذا الزبيدي كان فريد من نوعه, شجره نبتت في الزبيدي نفسه !! , تصوروا !!




_______

{ .. http://a3ul.jeeran.com/DSC00479.jpg .. }

فقع خلاصي لقيته في منطقة النقيان, والنبات الأخضر اللي على طرف الدبل يسمى "حمّيض" , وله من أسمه نصيب.. طعمه حامض ولذيذ!




_______

{ .. http://a3ul.jeeran.com/DSC00428.jpg .. }

فرقوعتين جنب بعض, جنوب عين خالد.




_______

{ .. http://a3ul.jeeran.com/DSC00515.jpg .. }

صورة مالها علاقة بالفقع , لكن لها علاقة بجو الموضوع. الصورة قربية من الغشامية -مدينة شمال الدوحة 90 كيلو- , وهي سبحان الله كل سنة يجيها ربيع أكثر من أي مكان ثاني. والنبات اللي طالع اسمع "صمع" , وإذا اشتد الحر يصير أصفر وأسمه "سفا" , والسفا كريه شوكي, لكنه وهو صمع يكوّن منظر جميل مثل ما أنتوا شايفين.





_______



في النهاية, شكراً على حسن المتابعة , وأعاد الله علينا الخير كل سنة.


ثريول

[Da S.O.S]

والله ما شاء الله حركااااااااااات
بس وينك ثريول عن المنتدى زمان ما قرينا كتابات لك..
بالنسبه للفقع مالي اهتمامات كثيره بالحاجات هذي مرة...
بس من الي شايفه بالصور شئ قوي والله^^

[Lena]

واااااااااااااااااااااااااااااااو
حدث عالمي ذا

لالالا نبي صورك بالجرايد مع الفقع لا تضيع فرصه الشهرة بعها بالااف ذي :p

مشالله من جد كبير

تكتيك يوم رحت تدور هناك@___@

ياي ذكريات الفقع شي قديييييييم

ياحب القصمان له يحطونه مع المرق ماقد اقتنعت بطعمه كنه تراب:28:

حلوة الصورة هذي مرة

http://a3ul.jeeran.com/DSC00479.jpg

:17:حممممممييييييييييييض

يمي يمي ذكريات شي قديم ابي اذوقه ..!!
كنا نلقاه ف يالجبل في القصيم ونقعد ناكله من دون مانغسله بعد
خطييييييييير طعمه يا سبحان الله



ابقولك سالفه عن الفقع يومني صغيره
كنت متحمسه الكل يفقع
يالله ياليونه لازم تلقين شي يرفع راسك قدام العيله

وادور وادور

وفجاه!!
القى ورى السهل
مئات الفقعات
والله من قدي طحت على كنز !!
واجمعهم في فستاني واجمع واجمع والدموع تتطاير من الوناسه ههههه

واركض لاهلي ابزعط بالي عندي محد مثلي :icon6:خصوصا اني اشوفهم خالين الايدي

وفتحت فستاني وكبيت الغنيمه عندهم ونفخت صدري:28:
واشوفهم تسدحو من الضحك

طيب ليه :boggled:

يجون يربتون على كتفي يالمسكينه
زين الفقع
بس دمن الابل مب زين


تخيل:17:

[Kubaj]

ماشاء الله وش هالزين.. رجعت لي ذكريات انا الثاني.. << منقطع عن البر وعلومه لي Decade

ورا ماتبيعونه طيب.. اخبر الفقع غالي.. بعدين يا اخي انا ما ادري ليه سعره غالي.. يعني ما اذكر ان له طعم :31:

الا اذا كان فيه خلطة سحرية.. تفيد البدن.. مثلاً ؟

[ثريول]

العزيز / Da S.O.S,
شكراً في البداية على تفضلك بالمرور, وأما عن غيابي عن الكتابة, فالسبب إنشغالي بغيرها. ولو أني أكتب موضوع الآن بانشره غدا أو اللي بعده.
شكراً.


العزيزة/ لينا,
هههههههه .. لا الجرايد خليها بعيده عني.
وعن الحميض, تراه وايد عندنا, لدرجة أني ألقاه في الجامعة -أطرافها الخالية- بكثرة !! , والشي الثاني اللي يستاهل العنوة هو : اليراوة, وللأسف ماعندي صور لها الحين.


ياحب القصمان له يحطونه مع المرق ماقد اقتنعت بطعمه كنه تراب

يععععععععع, ويا مرق!! , العادة ناكله مفيوح في الماء ولامقلي مع شوية زبد, وفي أحيان يحطونه في المجبوس. بس مرق!!.



يجون يربتون على كتفي يالمسكينه
زين الفقع
بس دمن الابل مب زين

ههههههههههههههههههههههه, مقلب قوي :biggthump .

ثانك يو أقين, آند ويلكم.


العزيز / خوباج,
بدايةً, الصورة الشخصية هذي حلوة وزين أنك رجعتها.


ورا ماتبيعونه طيب.. اخبر الفقع غالي.. بعدين يا اخي انا ما ادري ليه سعره غالي.. يعني ما اذكر ان له طعم

الا اذا كان فيه خلطة سحرية.. تفيد البدن.. مثلاً ؟

سعره غالي لأن الناس صعب يلقونه, وأما عن طعمه , فهو حلو برأيي, ومميز , خاصة للي يتعنى له. وأما عن البيع, فمحسوبك اللي مرتز في اليد فوق راح لجدتي, وهي ودته لوحدة ثانية, وماأدري حقيقة في أي بطن استقر!
وله فايدة, وهي اللي ذكرها الرسول بأن ماءه شفاء للعين:).
شكراً لك.

[Macho Man]

هلاووووو ^_^

والله اشتقت للحميض من زمان ماذقتـــة :17:

وماشاء الله البر عندكم اخضــر موب زينـــا هخخخخخخخ :D ..

وشكرا على الموضوع ثريول ..:)

[Moon Boy]

خخخخخخخخخخخ
زبيدي يشبه ولد حارتناا.. :09:

[Trapped Inside]

هلا ولله ثريول ^^ ..


من اسمه يروع -__- .. فقع .. فقع الله كرشك :laughing: ..

ما عمري ذقته ولا لي نيه ..

مشكور عالموضوع والصور الحلوه ^^ ..

[asf4ever]

زكرتني بأيام نروح الجبل
بس كنا نجمع حماض(إلي تقولون عنه حميض) ويعد إلي نسوي منه الحلول(يغسلك المعدة غسال ويخليك تحتاج لرؤية الحمام حبتين زيادة)
أما هذا الفقع فما شفته إلا في كتاب الأحياء عدنا ولكن كان عندي ربع يشوفونه عندهم في السيح(يعني البر)
وأول مرة أعرف إنه له فايدة
وأريد منك طلب أو من أي واحد يعرف الحديث إلي قاله الرسول عليه الصلاة والسلام عن شفاءه للعين...

وشكرا على الموضوع وأعاد الله عليكم الخير كل سنة إن شاء الله...

[Tidus]

الله يالزبيديه! حدث عالمي

يا أخي اغبطكم اجل عالربيع اللي جاكم... ربيع هالسنه جانا متاخر مره! لا فقع و لا حميض الا ما ندر =_=

العام كان فله...


الله يعز "ام قليب" بالخير, المكان الوحيد اللي الظاهر كسرت خاطره و طحت لي على كنز فقع :laughing: لحظات لا تنسى~

[NsaN]

ما شاء الله..ذكرياااااااات..
اذكر يوم انا صغار كنا نسير الامارات الشمالية و يا جدي و الاهل كلهم..
احيدهم كانوا يدورون فقع و حميض بعد..
للأسف لست من محبي الفقع..بس ما شاء الله الوالد و اخواني Huge Fans له..
بس احوب الحميض و أي شي حامض بشكل عام :08:

http://a3ul.jeeran.com/DSC00515.jpg

:bigeyes:

ابغي اسير قطر :17:
النبات هذا احيده..مب هو اللي يلصق فيك؟؟
كان دايماً يعلق بكناديرنا...و غلس.. :boggled:

ان شاء الله يتحقق حلمي في يوم من الايام و اسافر قطر..ياااا رب -________-..

[Angel whisper]

ههههه يوم قريت العنوان تحسبتك تقصد سمجة الزبيدي T_T

ما شاء الله الصيده حلوه ..

بس تعرف .. من يمكن 10 سنين ما سرت البر ..

احيد كنا نسير ايام المطر ونسوي مسابقات .. منو اللي بيمع اكثر الحميض ... كانت مسابقات حلوه وممتعه ..

.. بس ما في عمري فزت ..

حلوه الصور .. تفتح النفس ^^

ومشكور يا ثريول على مشاركتنا فيها

[ODIN]

ماشاء الله والله شي رائع صراحه


وموضوع من جد جديد ومميز


الا ياخي على طاري الفقع خوفونا العالم :31:


يقولون الفقع خطر خاصه بعد حرب العراق .. الارض متشبعة من الاسلحة والمواد الضارة الي فيها ...

صحيح كلامهم؟

[Mista Koo]

ما شا الله كووول هذا ^_^ صحة وعافية على بطونكم
بس الصراحة انا ماحب الفقع لما كنت صغير كنت احبه
والحميض وات از دس؟

كمشور

[ثريول]

- أعتذر عن عدم عمل روابط الصور, وبكرة بتشتغل إن شاء الله-

العزيز / Macho Man,
ترى بركم أحسن ولايغرّك .. الربيع هذا تقدر تقول استثنائي, وربيع حايل والشمال بل حتى الوسط مثل روضة التنهاة وفيضة نورة ووو أفضل بكثير.

العزيز/Moon Boy ,
شكراً على الرد.

العزيز / Trapped Inside,
مب خسران شي لو ذقته, أضمن لك أنه بيعجبك! -هذا لو انطبخ عدل-.

العزيز / asf4ever,
معلومة جديدة عن الحميض. وبالنسبة للفقع عندكم, ودي أعرف عنه أكثر.. لأني سمعت أن فيه أماكن في شمال عمان فيها فقع, ومناخ وتربة الإمارات الشمالية نفس شمال عمان.


العزيز / Tidus,
حدث عالمي ونص, صراحة أثلج قلبي يوم شفته وحسيت بإشباع بمعنى الكلمة.
أم قليب هذي وين ؟

العزيز / NsaN,
بعد أكرر السؤال اللي طرحته فوق, أبغي معلومات زيادة عن الفقع عندكم.
صحيح, هو اللي يلصق ويغث.. وحياك الله في أي وقت في بلادك الثانية:).

العزيزة / Angel whisper,
لا , السمج ما أحبه ولا آكله, لكن حداق أحدق.
أضمن أنج بتحسين بفرق بين البر الحين وقبل عشر سنوات , البيئة كل يوم أدمر من اللي قبله والله المستعان.

العزيز / ODIN,
بالنسبة للأشعّة , سم الله وحط اللقمة في لهاتك ولا عليك من الكلام, كلام الناس مابيأدم ولا يأخر مثل ما يقول جورج وسوف. شمال رفحا, عند الحدود العراقية فقعت ولقطت وكلته وكاني قدامك كني حصان, نص الفقع اللي في السوق من العراق, والناس ماغير تاكل وتترس بطونها وتفضي جيوبها.

الزبدة, سمعنا عن هذا الكلام, لكن ماقرأت عنه أي كلام علمي, لذلك, أشغل القاعدة اللي تقول كلام الناس كذب ما لم تثبت صحته.

العزيز / مستر كول,
الحمّيض طال عمرك نبات بري يشبه في الشكل الجرجير, طعمه حامض شوي, ياكلونه الناس:).



- أعتذر عن عدم عمل روابط الصور, وبكرة بتشتغل إن شاء الله-

[ابتسامــــــه]

اللـــــــــــــــــــــه اشتهيت الفقع

والله خاااااااااطري آكل فقع أتذكر العام كان سوق دبي يبيع وأبوي اشترالنا صراحه وااااايد غالي

بس لذيـــــــــــــــــــــــذ ...



مـــا أدري طلع بالإمارات ولا لأ .. الحمد الله هالسنه خير من رب العالمين إن شاء الله دوم يـــارب

يبالنا نسير البر اندور .. في سنه من السنوات دورنا بس حصلنا إشوي وصغير ما ينتكل






تسلم ثريول على الموضوع .. :)

[FinalFantasy9]

O.o .. خوش صيده !! ..:bigeyes:

ذكرتني بأيام مضت ..:09:.. ايام كنا نروح العزبه من الفجر ومانرجع الا المغرب واليوم الثاني نفس الشيء ,,:D.. وهكذا :09:.

بس خلاص انا كبر راسي وماقمت اروح مع الاهل ,,:08:,, وواحد من الربع حاول يسحبني معاه بس انا مو راضي ..:أفكر:.. بس والله كانت وناسه !

وشـــــــــــ:yup::yup::yup::yup:ـــــــــــكراً

[Yamato]

اول شي انا ما احب لا الفقع ولا الحميض.. اكرههم ورغم ذلك كنا نطلع البر ندور عليهم.. اكثر شي الحميض.. والله كانت وناسة ذيك الايام.. ينزل المطر اليوم.. بعد كم من يوم عالبر ندور حميض.. ووناسة يوم انك تحصل حميض اكسترا لارج.. كنا ندش تحت اي شجرة وندور فيها.. بالطبع اخوكم كان يدش وهو ميت خوف من انه يطلعله عنكبوت او عقرب او حتى حية.. >.<
وين ايام زمان يوم الواحد كان يقدر يحصل مكان في البر.. نظيف.. اما الان فالكسارات مليانة الدينا عندنا :12:
اما الفقع.. ما يطلع عندنا دائما.. بس كانت في مرات تقدر تحصلها.. :28:
ما ادري كيف تاكلون هالشي.. مرق او مع العيش.. ما اقدر ما اقدر.. T_T

وعلى سالفة انه الواحد يبيعه.. سمعت انه الفقع مطلوب في فرنسا وسعره غالي.. بس بالطبع اللي هناك من النوعية الممتازة اكيد.. يعني تقدر تقول انه مثل الذهب..

اما الزبيدي فما عرفته ابدا... شو هذا يا اخينا..


ترا نسيت ترمس عن الفطر... وناسة تدور عليه... بس هم ما اكله وما احبه.. :28:

[Master ArNab]

موضوع تشكر عليه أخي ثريول .. أعدت لي تلك الذكريات والأيام الخوالي .. كانت جميله ..:)

ما فيه عنصل بنصل .. ( هو زي البصل الbaby ) .. ويسمى بصل الفار :p

http://usera.imagecave.com/MasterArNab/stuff/anSal.jpg


أتذكر .. كنا نذهب الى البر وعند الكثبان الرمليه .. تجد العناصل بكل مكان .. رحيته حلوه
http://usera.imagecave.com/MasterArNab/stuff/anSal_meadow.jpg

تحرير: :reporter:

فضولاً مني .. كتبت حميض في جوجل .. وطلعت لي هالصفحة التي تعود الى سنة 2002 !

http://www.alwatan.com.sa/daily/2002-11-15/first_page/first_page11.htm

حاطين الحميض من ضمن النباتات السامه ؟! :boggled: ..


منع زراعة واستخدام ( 42 ) نوعاً من النباتات السامة في شوارع وحدائق السعودية













قائمة النباتات السامة



ذيل القط, أكونشيرا, الأومندا, زهرة العنكبوت, لخف (أريسنما), أذن الفيل - قلقاس, عقيبي - أريل, أسبرجيس, أتروبا, بيومونتيا, كلاديوم, سداد - آبار شوكية, كاريسا, سيستروم, كروتون المزركش,كوليثيكم, كولوكاسيا, كوتينس, داتورا, الديفنباخيا, زهرة الكشتبان, لبين, فيرنس, التنوم (دفره) عنصل, رمان الأنهار (هاي بيريكم) شرابة الراعي, اللانتانا, جلبان (لا ثيرس), نرجس, الدفلة, حميض (أوكسالس), بيدي لانشس, أذن الفيل, الفتنة الهندية, بتريديوم, الخروع, سندبس, الدفلة الصفراء (اتفتيا) تكسس, البفتة, كلاليلي.










وبعدين فيه أسامي عجيبه ...!!


إذا ممكن واحد فاهم .. يشرحلنا كل نبته .. أو يعلق عليها :09:


قلقاس .. الظاهر أعرفه ... يمكن


الخروع ... بسم الله !! وش ذا الإسم ههههه


زهرة الكشتبان .... :06: كشتبان .. كشتبان ..كشتبان .. الإسم مر علي ...


ذيل القط .. يا سلام على الأسامي

[ثريول]

العزيزة / ابتسامــــــه,
شكراً على المرور والتعليق اختي الكريمة.

العزيز / FinalFantasy9,
البلدية ماقصرت و"قشعت" غالب العزب.. الحين عندنا زرع نجتمع فيه, ومب بعيد نسبياً.

العزيز / Yamato,
بالنسبة للكسارات, مثل ماتفضلت, لوثت البيئة وذبحت الشجرة والنبات.. البر صار أملح منها.
سمعت عن قرار عندنا بإلغاء كل الكسارات عدا أربع, قرار حكيم ننتظره, وننتظر قرار يحد من الإبل!
والفقع عزيزي بنأكل بكذا طريقة, بعضهم يقلونه من شوية زبد, بعضهم يفوحونه في ماي وملح, وبعضهم يحطونه في قصدير ثم يحذفونه في الضو. ويحطونه أحياناً "أودام" في المجبوس :).
وعن الزبيدي, الزبيدي طال عمرك نوع من الفقع وأحسن أنواعه, الفقع أربع أنواع :
1- الزبيدي : أبيض, ملكي, قابليته للضخامة أكثر من غيره, ريحته مميزة محببة.
2- الخلاصي: بني -مثل اللي في الصورة الرابعة- , طعمه عن الكثير أحسن من الزبيدي, بس منتشر أكثر منه وسعره تقريباً 50% من سعر الزبيدي.
3- اليبا -الجبا- : هذا يا أما يكون فائق الجودة -مثل بعض الأماكن جنوب قطر- أو قليل الجودة -مثل فقع الدبدبة, شمال النعيرية للغرب.
4- الهوابر: لونه أسود ومن داخل أبيض مثل الثلج, لايُطبخ, البعض ياكله نيء.

:).

العزيز / Master ArNab,
هذا طال عمرك نسميه "مصيلمو" , والعادة يطلع في التربة الشبه رملية, وحلو جداً, كأنك تاكل بصل بدون طعم كلش. بس مب مثل اللي في الصورة الثانية , لقيت المصيلمو مرة في شمال الصمان للشرق, وكان أحلى مصيلمو كلته, حيث أنه "راوي" بمعنى الكلمة!
ما أعتقد أن المقصود في القائمة الحميض نفسه اللي نتكلم عنه, لأننا ناكل منه وما فيه أي مشاكل :).