ممكن قصة بسرررعه بليييز [الأرشيف]

ميستي

27-10-2005, 06:45 AM

:D
اهلييين وسهليين
هلا وغلا اختي شخبارك؟؟

تبين قصة لللأطفال عن موضوع ترشيد أستخدام المياه

مافيه أسهل من كذا..انتي تقدرين تألفين قصة من عنك

كان في واحد متعود كل يوم يلعب في الماي.. البزنس حقه (لعب في الماي وناسه)

وقولي مثلاً انه اهله قررو يروحون رحله إلى البر..وجهزو اشياهم وكل معداتهم .. والأبو جاب له كمن مطارة ماي..للشرب وبعضها للوضوء وحاجات ثانيه..
ويوم وصلو للبر..الأبو نزل كل شيء..وفرش الخيمه .. وتماام ووناسه ..عاد بالليل الولد ماجاي له نوم.. يروح يلعب في الماي << شيطان

هو مايقدر يتحمل ..قلت لكم الولد متعود على كذا.. لاتلوموه..يده تاكله إذا مالعب ..عاد كل يوم يلعب بالماي(كم مره قلتها اخخخ..يقولون التكرار يعلم الشطار)..

المهم خلونا نكمل..يقعدون الاهل بالصبح ومايشوفون فيه ماي..ويضطرون يرجعون للبيت..والولد يقعد يبكي

عشان صديقه عمر بيجي للبر..وعاد يقول ببراءه طفوليه وصوت ملائكي : بابا خلنا نبقى هنا شويه

أبوه: شلون ياولدي مافي مويه

الام وهي تكفخة(ام قاسيه حيل) : يامجنون لعب بالماي<< ماشاء الله أمهات آخر زمن هذا الأدب

الزبده هي:
انه الولد يعرف شكثر الماي غالي..ويصير له درس..ويتغير حيل..ودايم يحافظ على الماي

لدرجة انه شاف اخوه الكبير يغسل سيارته(فرحان فيها توه شاريها) راح قال له اخويه

الأخو الكبير: نعم شتبي انا مشغول مانيب فاضي لهل أشكال

الصغير: تعال بعطيك شي

الأخو الكبير : شنو

الصغير: قرب وتعرف

الكبير: ويقرب منه

الصغير: بعطيك بوسه بس استحي لاتطالعني

الكبير: زين بغمض عيني

يجي الجار يشوفهم يتكلمون والماي يهد ويصرخ عليهم ..يقول صج ماتحسون فينا..الماي كل ماله وينقص
وانتو تهذرون والماي مفتوح

يجي الولد الصغير يشمخ اخوه الكبير بوجهه..يقول له ثاني مره استخدم سطل ..انت تبينا نصير فقره بدون ماي.ترى سعر الماي ارتفع صار اغلى من الذهب:D

عاد الاخو يتطنز على كلام اخوه الصغير..و عاد يقول هل سالفه جنب ربعة..وينقل لهم كلام اخوه الصغير..وعاد هم يعلمونه درس

يخلونه بدون ماي:( الله ارحم..لحد ما يقولون له عطنا ساعتك ونعطيك شربة ماي..ويوافق..بعدين يقولون له عطنا جوالك ..وكذا وكذا

لحد ماشاف انه كلام اخوه صحيح..ان قطرة الماء اغلى من الذهب

~~~~~~~~~~~~~~

أو تقولين كان يامكان في قديم الزمان كان في بنت حلوه اسمها ساره :D وكانت دايم تهتم في نظافتها

ولباسها..ودايم تستحم..لكنها إذا جات تستحم تترك الماي مفتوح ..وتلمأ حوض الأستحمام ماااي وتخليه يفوض
واخوها الصغير إذا استمعل مايسكر الصنبور(الحنفيه) وامهم شافتهم وجات فهمتم ..بس مانفع معهم الكلام هذا

عاد في يووم انقطعت عنهم المياه..

والقهر انه ساره تهاوشت مع اخوها الصغنون :D وكان عنده غرشة كاتشاب وسكبها على ملابسها وشعرها..وهي مسكينه معزومه على حفلة عند رفيجاتها
وتبي تغسل جسمها وشعرها بس مافيه ماي..وتجلس تبكي.. :أفكر: :D وجلست تدي الله انه الماي يرجع

وقامت تقول لها امها ..هذا الماي انقطع من ساعة..وشفتي وشو سويتي..وش كانت حاجتنا له كبيره
اجل وشلون لو ينطقع لمدة أيام وشهور وربما للأبد..فتقول ساره وعد ياماما أحافظ على كل قطره من الماي

وحاولي تتفننين في هل قصص..ترى ما فيه اسهل من موضوع الماي..خاصة انه العيال يموتون على اللعب في الماي

وخاصة اخواني :vereymad: صراحة غاثيني لدرجة فضيعه..

ومرة انا شفت اختي تبكي(الكلام من 8 سنوات) رحت لها ركض وكانت ساكبه ماي بالأرض واجي انا واتزحلق فيه
وبغيت اقوم والله ما قدرت :02: ..خفت حيل..قلت خلاص ظهري انكسر..شكلي مابمشي..اصلاً ماكنت قادره ارفع راسي

وحتى الحمام(اعزكم الله) امي توصلني له ..وتنتظرني لحد ماخلص وتطلعني>_< و الحمد لله كل شيء صار تمام
والفضل يعود لله سبحانه وتعالى ثم من دعوات امي..و كم مره تصير لي هل حركة اجي ركض واتزحلق ..وخاصة بنعلة الشب شب..الله يكرمكم إلي احنا نسميها (زنوبه)