للّي بيصلّوا فقط...أنتو م بتصلّوش...موضوع ديني بشكل جديد

[sadek55555]

مقدمة غريبة حبّتين



الحمد لله الذى هدانا لهذا وما كنّا لنهتدى لولا أن هدانا الله...

إن الدين عند الله الإسلام... فرسالتي لكل المسلمين..ذكر أو أنثى .. إنس أو جن .. عاقل أو غير عاقل ..المهم..إن رسالتى لكل اللى نطق بالشهادتين ((إلحقوا نفسكوا وإنطقوها دلوقتى احسن من الإحراج)) ... رسالتى للمُصلّين..أو بالمعنى الأصح للمتخيلين إنّهم بيصلّوا وللعلم... أنا وأعوذ بالله من كلمة أنا.. كنت زيّكم وأسخم ... لغابة ماربّنا سبحانه وتعالى هدانى والحمد لله...واللّى مش مصدّق إنه هنا فى موضوعنا هايتعلم الصلاة من أول وجديد..يبقى ماعليه سوى إنّه يقرا .. وبقولها من دلوقتى...اللّى هاينفّذ الكلام اللّى فى موضوعنا..هايعرف من نفسه..إن اللّي نفّذُه دا...إسمه جميل جداً جداً جداً...مش بس كده...دا جديد عليه كمان...إنها .....الصلاة .......... كما يجب أن تكون ... قولاً... وفعلاً،،،

[sadek55555]

قال الله تعالى:(( وأقم الصلاة لذكرى)) ، وقال تعالى:(( ولا تكن من الغافلين)) وقال عز وجل :((لا تقربوا الصلاة وأنتم سكارى حتى تعلموا ما تقولون)) ، ناس قالوا اننا ممكن نكون سكارى من الهم.. وناس تانية قالت من حب الدنيا ، إنما ياجماعة .. الآية فيها تنبية من سكر الدنيا وملذّاتها..فخدوا بالكوا من آخر الآية((حتّّى تعلموا ما تقولون)) وكم واحد مننا بيصلّى ومش بيشرب خمرة وهوا برضه مش دارى باللّى بيقوله فى صلاته...

وقال سيدنا محمد صلّى الله عليه وسلم..:(( وإذا صلّيت فصلِّ صلاة المودِّع))، ومعنى مودّع هنا يعني مودّع لنفسه،مودّع لهواه،مودّع لعمرُه،ماشي في طريق المولى سبحانه وتعالى...لأنه عز وجل قال((واتقوا الله واعلموا أنَّكم مُلاقوه))...

وقال صلّى الله عليه وسلم:((من لم تنهه صلاته عن الفحشاء والمنكر،لميزدد من الله إلا بعدا)). ومن ضمن مفاهيم الصلاة عندنا فى ديننا الإسلامي إنها مناجاة لله سبحانه وتعالى..فإزَّاى تكون صلاة مع غفلة؟؟؟

وآخر حاجة وفعلاً حبّيت إني أذكرها فى آخر موضوعنا ... عن الخشوع فى الصلاة..واللّى نفسي بجد إننا نعمل بيها ..........أقروا معايا كده:
يُروى عن حاتم الأصم رضى الله عنه...أنَّه سُئِلَ عن صلاتهُ،فقال:
إذا حانت الصلاة..أسبغت الوضوء...وأتيتُ الموضع الذي أريد الصلاة فيه..فأقعد فيه حتّى تجتمع جوارحى..ثم أقوم إلى صلاتى ...,أجعل الكعبة بين حاجبيَّ...والصِراط تحت قدمي...والجنَّة عن يميني..والنار عن شمالى...ومَلَك الموت ورائي..وأظُنها آخر صلاتي...ثم أقوم بين الرجاء والخوف...وأكبر تكبيراً بتحقيق..وأقرأ قراءة بترتيل ...وأركع ركوعاً بتواضع..وأسجد سجوداً بتخشُّع...وأُتبعها الإخلاص...........ثم...لا أدرى..أقُبِلَت منّي أم لا؟؟؟

هممم...إيه رأيكم ؟؟؟

أعتقد إن من بعد اللي قريناه عن حاتم الأصم باقول ليكم ولنفسى ياريت نحس على دمّنا بجد...إحنا بنبري ذمّتنا ...لمّا بنعمل ونؤدّي الفروض اللّي علينا...لكن..هل كان فيه خشوع؟...أعتقد إن بعد ما فهمنا معنى الخشوع الحقيقي كل واحد مننا يحاول ...ويجرّب وبمشيئة ربنا ...سبحانه وتعالى ..أكيد هانوصل.....

وكدروس مستفادة من موضوع النهاردة أحب إنّي ألخّص اللّي قلته في عناصر للإفادة الكاملة:

1- إحنا بنصلي ذِكر وتَذَكُّر لله رب العالمين ...(طه:14)...
2- معنى إنّي غافل عن شئ : يعني إني تركت الشئ دا إهمالاً من غير نسيان...يعني تركته بتعمُّد...(الأعراف:205)...
3- السُكر.. مش لازم يكون بسبب خمرة أو فنكوش أو منقوع البراطيش ... لكن برضه ملذّات الدنيا وشهواتها بتسبّب برضه السكر للإنسان..(النساء:43)...
4- محدش بقي تاني مرّة يصلّي وهوا سكران((طبعا فهمتوني دلوقتي)) ومحدّش يصلّي وهوا مش عارف هوا بيقول إيه في صلاتُه...بمعنى... إنّي لمَّا أقول (الحمدُ للهِ ربِّ العالمين) بأكون عارف إنّي واقف قُدَّام ربنا عز وجل .. دا أولاً ... ثانياً إني بافتتح صلاتي ...ثالثاً إني باحمد ربنا رب الثَقَلين أجمعين..((النساء:43))...
5- بجد بجد نصلّي بقى بخشوع (وبالّتي هيا أحسن)..
6- صلُّوا صلاتكوا وكأنكم هاتموتوا بعدها..وخدوا بالكم ...وإتأكِّدوا..إنكم مش بس ممكن تموتوا بعد أي صلاة..ولا فـ نُصَّها.. دا ممكن كمان دلوقتى...وانتوا بتقروا معايا.. وليكم حرية الأختيار..فى إنكم تحاولوا إستغلال الوقت..علشان أخرتكم تكون فى صلاتكم..أو آخرتكم تكون وانتوا بتسمعوا أغنية بالهاند فري...والعياذُ بالله...((البقرة:223))..
7- إذا كنتم بتصلُّوا ..وبتعملوا أي عمل قبيح أو شنيع...من قول أو فعل...أعرفوا ..وإتأكِّدوا...إن صلاتكوا دي بتبعدكوا عن ربنا عز وجل...لأن بالعقل....أصلي وباعمل خير...يبقي الصلاة ليها مقام عندي...وعاملها حساب إنى باقف قدام ربنا عز وجل...وباحمده عالخير....إنما باصلِّي وباعمل شر....واقوم واقف قدام ربنا.....فـ بكل بجاحة...كأني باقف قدام ربنا وأقول أيوة أنا اللي باغلط وباعمل شر ومع ذلك باصلي...راعوا كويس وإفهموا الحتة دي لأنها بجد خطيرة على الكل...فياريت نِقَرَّب بصلاتنا لربّنا مش نبعد بيها...
8- ماينفعش إنكم تكونوا واقفين وقاعدين فى نفس الوقت...أو تكونوا نايميين وصاحيين فـ نفس الوقت...واللّي هايقول ينفع...أقولُّه.... اللون الأبيض...ينفع يكون أسود في نفس الوقت؟؟؟....إذا حاولت هتلاقي لون جديد حصل.... لاهو أبيض ولاهو أسود....وكذلك في الصلاة...أنا بناجي الله سبحانه وتعالى....ينفع وإني أكون بناجى وباكلّم ربنا سبحانه وتعالى...وأكون مش مركّز في أي كلمة باقولها؟؟؟؟؟ ياريت بقى اللّي هايقول ينفع يرفع إيدُه...
9- وأخيراً وليس آخراً الكل يحاول على قد مايقدر ينفّذ الخطوات الجاّة في وقت صلاته..لغاية ما إن شاء الله...تبقي فيكوا بالفطرة...:
أ- نتوضأ كما يجب أن يكون الوضوء...
ب- مكان صلاتنا نقعد فيه شوية صغيّرين نجمّع كل جوارحنا...
ج- نقوم للصلاة...
د- مش هاقول بقى نتخيّل لكن هاقول إننا بجد نعرف إن الكعبة قُدَّامنا...
هـ- والصراط تحت رجلينا...
و- والجنّة على يميننا...
ز- والنار على شمالنا...
ح- ومَلَك الموت ورانا وكأنها آخر صلاة لينا...
ط- نرجو من الله سبحانه الرحمة ونخاف من عذاب وغضب الله عز وجل علينا ...
ي- نركّز في تكبيراتنا في الصلاة...
ك- نقرا بترتيل .....
ل- ركوعنا يكون فيه تواضُع...
م- سجودنا يكون فيه تعظيم وخُضُوع وذلّ وإنكسار لله عز وجل...
ن- نِخلص في صلاتنا...فهى جزء من كُل عبادتنا لله سبحانه وتعالى...
س- لمّا نخلّص وننتهي من صلاتنا... محدّش يكون شايف نفسه ويقول...أنه عمل كل اللي إحنا قلناه.. وبناءاً عليه صلاته مقبولة...بالعكس..لازم نخاف أكتر..لأن من الممكن إن يكون ربنا عز وجل مش راضي علي صلاتنا مهما كُنّا مركزين وخاشعين فيها...


إخواني وأخواتي في الله... بالرجاء ننال الجنّة..وبالخوف نبتعد عن النار.....وبالمحبّة ننال رضا ربّنا سبحانه وتعالى..........وبتوحيدُه عمَّن سواه نكون من الأبرار المُقرَّبين...

النصيحة
((ولكل يوم نصيحة))
نستغفر ربّنا في كل يوم أكتر من 70 مرّة..ويُستحسن 100 مرة.......................
وطبعا سيّد الإستغفار..
اللهُمَّ أنت ربي... لا إله إلا أنت..خلقتني وأنا عبدُك...وأنا على عهدِك ووعدِك ما استطعت..أعوذُ بِكَ من شرِّ ما صنعت...أبوُءُ لك بنِعمتِك علي..وأبوُءُ بذنبي...فاغفر لي...فإنَّهُ لا يغفرُ الذُنُوبَ إلا أنتَ سُبحانَك...


اممممم ...مش عارف هل ممكن إنكم تتقبلوني لتكملة الموضوع ولاا لاء... موضوعي اللّي جاي عن الظواهر في الصلاة....وبرضه برضه هانعرف حاجات كتيرة...وبرضه برضه هانقرب من ربّنا تعالى شأنه أكتر واكتر...وبرضه برضه نفس الشخص المُمل اللّي كتب الموضوع الجميييييييييل دا..هوّا هوّا إنش اء الله اللّي ها يقرفكو#+...... أقصد اللّي هايمتعكوا بالموضوع اللّي جاي....وعموماً...وبجد....اللّي عايز إننا نكمّل الموضوع هنا يقول...واللّي عايزي أقطع إيدي وبيندم أنه قرالي حاجة وبيدعي عليّا يقول.....مستنّي ردودكم.....السلام عليكم ورحمة الله وبركاته....

[بوالوليدلكويتي]

بسم الله الرحمن الرحيم
جزاك الله خير يا أخي على طرح الموضوع المهم جدا جدا
يجب على المصلي أن يخشع في صلاته وأسأل الله أن يجعلنا من الخاشعين وأن لا يجعلنا من الساهون عن صلاتهم

وجزاكم الله خير الجزاء