مجودي والحرامي الضخم الله ياخدو

[إنـسـان ثـانـي]

السلام عليكم ورحمة الله

... ... ...
... ...
...
القصه لجل ان ارسم البسمة على شفاتك
:)
... ... ...
... ...
...
في حي من الاحياء كان في رجال مخلص في عملو(عمله) اسمو مجودي...عايش حياة سعيده لاهو متزوج ولا مغلب نفسو,من البيت للعمل ومن العمل للبيت,يروح الدوام بدري ويرجع متاخر..ومايصدق ينام المسكين وعلى دا الحال...المهم<<<دي لازم منها,المهم في يوم وهو راجع من العمل لمن جا يقفل السياره طاح منه المفتاح الاسبير(النسخه الاحتياطيه)حق السياره طبعا..مسكين طلع البيت وحط راسو ونام.

(اليوم الاول)
صحي من النوم ودخل التواليت وجهز ملابسو وكد شعرو ونزل خصله من قادم(طبعا هو اعزب)..المهم خرج من البيت لمن جا عند السياره لاحظ شي غريب !! كل شي كان في السياره انسرق ؟؟ مصيبه دي !!من فلوس ومناديل وورق بلوت واشرطه...كلو كلو مره...المهم الغريب في الهرجه انو ما اهتم ؟ شغل السياره وراح عملو..اخلاص للعمل سبحان الله .. المهم لمن رجع من العمل جلس يفكر؟؟مين الي سرق العده ؟ وكيف فك السياره ؟ عموما هذي الافكار الي بتدور في راس مجودي.

(اليوم الثاني)
صحي وجهز نفسو كالعادة وخرج,لمن فك السياره؟؟نفس الحكايه الي سارت امس؟؟كل الي في السياره انسرق تاني مره؟؟هنا الادمي طرطع..احتار..قال(هذي المره لازم اكفش الحرامي الدب دا)،المهم راح عملو المسكين وبعد مارجع قال(اليوم انا ماحنام حجلس اراقب من الطاقه(النافذه)الين مايجي الحرامي دا واكفش ابوه)،فعلا جاب كاسه نسكفيه وكيس جلكسي كامل وبسكويت على الطاير...وحط جنبو مسجل وشغل محمد عبدو(الاماكن طبعا)..المهم بعد مرور ساعتين تقريبا وعلى اخر الليل...شاف واحد بنقالي جاي من بعيد وكانو متجه للسياره .. قال مجودي في باله (اكيد هذا الحرامي..والله لو طلع هو حكفشو واكسر راسو)..المهم جا البنغالي عند السياره ولمن قرب منها ! شال العلبه الي مرميه جنبها مع شوية اوراق وكنس الارضيه وراح في حال سبيلو..اخخخخ طلع مو هوا الحرامي..المهم طرطع اخونا مجودي وقال(خليني اقوم انام وبكره اكمل الهرجه) .. وحط راسو.


الرجاء عدم الرد

[إنـسـان ثـانـي]

(اليوم التالت)
نعم..زي العادة صحي وراح العمل وجا وكل الي في السياره انسرق ..المهم لمن جا الليل وجا وقت المراقبه ،جاب العده حقتو وشغل محمد عبدو كالعادة...المهم جلس استنا استنا ويطالع الين ما جا واحد ولد صغير شكله مفجوع ومرتبك وكانو متجه للسياره..قال مجودي(اها والله شكلو دا ...البزوره شياطين وجن .. بس لو طلع هو حقطعو تقطيع)المهم قرب الولد الين عند السياره وفك باب بيتهم وطلع ؟؟ لان الباب جنب السياره..اعععع برضو مو هو..عموما اخونا خلاص معصب وحالته حاله..قال(خليني اقو انام اليوم وبكره ربنا يحلها .. الله يشيلو دا الحرامي الفاضي الي ماوراه شغله ولا مهنه)... وحط راسو.


(اليوم الرابع)
نفس الهرجه,قام وراح رجع وجا وكل الي في السياره ميح..اشتغل مراقبه زي العادة وشغل محمد عبدو وجاب العدة ..بس دي المره ماجاب نسكفيه لا ! جاب ببسي مع جنبري ليز وسندوتش طعميه كان حاطو في التلاجه سخنو وجهزو .. المهم جلس يطالع ويطالع .. ما جا احد والشارع هدوء...طفش ومل وحاس انو بيومت من التعب.. عاد اغنية محمد عبدو (الاماكن) عشر مرات .. المهم وهو مسرح وعلى غفله! شاف واحد جاي من بعيد وكانه متجه للسياره... واحد متشيك ولابس كنتره كلام وحاط في يدو ساعه ولابس شماغ وثوب وعقال...اها قال مجودي(هذي مايبغالها كلامي ! اكيد دا هو الحرامي ؟ بالعانيه مسوي نفسو محترم عشان لحد يشك فيه..بس لو طلع هو !حنزل اشوحو بالعقال الين ما اخلي جسمو الوان)..المهم جلس يطالع في الرجال الين ماقرب من السياره وفعلا جا عند الطاقه ونزل المناديل وجلس يمسح القزاز..ها اخونا مجودي المسكين طرطع وقال(اكيد هو دا الحرامي..ماشاء الله لا كمان قاعد يمسح القزاز عشان يركب السياره ويسرق وهوا مبسوط)المهم الرجال بعد مامسح القزاز جلس يضبط الشماغ حقو والعقال وبعدين راح في حال سبيلو ...يووووه برضو طلع مو هوا الحرامي...مجودي خلاص وصلت معاه ..بيتجنن..المهم قام المسكين نام عشان يقوم يكمل اليوم التاني.

(اليوم الخامس)
كالعادة...رجع من العمل وجلس يطالع من الطاقه وجاب العدة معاه عشان تصبرو،جلس وجلس وجلس الين اخر الليل وخلاص طفئ وجالو النوم والارهاق والارق<<<الكلمه دي لها سالفه طويله,المهم قال (خليني اقوم انام ولمن اصحى اليوم التاني ان شاء الله اشوفو).. وهو قايم سمع صوت خطوات احد يمشي في الشارع !! رجع بسرعه وطالع من الطاقه ؟؟شاف واحد جاي من بعيد من جهة الجبال وكانه متجه للسياره..؟؟ واحد ضخم وشعرو منفوش وعيونو حمر وراسو كبير وملابسه مقطعه ولون جسمو مصفر ..يعني شكلو مره مره مصيبه ! المهم اخونا المسكين مجودي جلس يدعي ويقول(يارب مايكون دا الحرامي .. انا مني ناقص غلب)،المهم قرب الرجال الضخم من السياره وجلس يدور حولها ويطالع في السياره من جوا ويضحك ويبتسم واخونا مجودي خلاص شويه يغمى عليه من الخوف(المشكله انو خواف)،المهم جلس الرجال الوحش الضخم دا يطالع في السياره الين ما جا عند الباب...

(فاصل اعلاني ونعود)
والله ياشباب انا بكتب الموضوع في الدفتر امي قالتلي:قوم ياواد جيب قلم وورقه فاضيه من الدولاب...عارفين ايش سويت؟؟كلو منكم!!بدل ما اعطيها قلم وورقه اعطيتها مفتاح السياره ههههه (كلجه فعليه ...<<<لو رعبه وفراوله يشوفو الهرجه دي مشكله، والله امي تطالع فيا مبلوهة!تقولي ياواد انتا عقلك فين...هه مشو حالكم بالي مع القصه المشوقه دي ..هههه.

(تابع اليوم الخامس)
المهم جلس الرجال الوحش الضخم دا يطالع في السياره الين ما جا عند الباب...ودخل يدو في جيبو... ودخل يدو في جيبو... وطلع المفتاح الاسبير الضايع؟؟!!.. اخخخخ طلع هو دا الحرامي.. واخونا مجودي على وشك الموت ..رجولو تخبط في بعض من الخوف،قاعد يدعي ربو...المهم فك الحرامي السياره ودخل جوتها،جلس يطالع!فك الدرج حصل خمسين ريال ؟انبسط واخذها،وطالع ورا حصل علبة مناديل جديده !فرح واخذها،طالع على التابلون حصل مطويه(الفرد والمجتمع)برضو اخذها،وطالع عند المسجل حصل كم شريط معاها شريط(باك ستريت بويز)الاخير,وكمان شريط (عبادي الجوهر جلسه 95) اخخ على الفله،لا وكمان فك الشنطه وحصل فيها فرشه مقطعه و ارقيله مع الجراك حقها ومفك عجل مصدي .. اخدها طبعا الله ياخدو،لا ودا كلو اخونا جالس يطالع من طرف الطاقه ومو داري ايش اسوي من الشي الكبير دا...المهم خلص الحرامي الضخم وفرد الشماغ حقو في الارض وحط كل المسروقات ولفها وربطها وقفل السياره ومشي..واخونا مجودي مو عارف ايش اسوي؟قال(خليني اقوم انام وبكره ربي يحلها).


الرجاء عدم الرد

[إنـسـان ثـانـي]

(اليوم السادس)
قام في الصباح ولبس اي شي وخرج من البيت يطالع يمين ويسار وهو خايف ،المهم فك السياره وطبعا مافيها ولاشي ،راح العمل وبعد مارجع وهو خارج من السياره قال (اخلي الاغراض في السياره ولا اشيلها؟؟)فكر وفكر..قال(خليني احط فيها اغراض لانه لو جاء الحرامي الضخم وشافها فاضيه يعرف اني انا دريت عنه وبعدين يجيني ويسويلي مصيبه)المهم ساب الاغراض وطلع البيت،جلس يطالع من الطاقه ينتظر كالعاده..مر الوقت الين ماجا الحرامي الضخم دا في اخر الليل...واخونا كاعادة نشف من الخوف..المهم اخذ الحرامي الضخم كل الي في السياره وراح..واخونا مو داري كيف يحل هذي المشكله..المهم نام.

(اليوم السابع)
صحي في الصباح وشغل السياره وراح العمل...وهو راجع من العمل مرت في باله فكره؟قال(الحرامي الضخم دال كل ما يجي يسرق ما يخلي شي في السياره..طيب انا ليش ما اعبي السيارة اغراض ! لعل الحرامي ماسيقدر يسرقها...يس فكره جميله)المهم الذكي دا راح السوبر ماركت وراح الصيدليه وراح الحلقه وراح المطعم...يعني كبس السياره اغراض..المهم رجع البيت وزي المعتاد جلس في الطاقه يراقب...جا الحرامي الضخم في اخر الليل، اول ماشاف السياره مكبوسه اغراض قام يصفق وينطنط..واخونا مجودي انبله منو!..المهم فك الحرامي الضخم السياره وجلس يطالع فيها مو عراف ايش يسوي وكيف ياخذ الاغرض؟...طلع الجوال حقو من الجيب(نوكيا العنيد ون) واتصل على واحد حرامي الين ماجا ومعاه ونيت كمان...اخخخخ حطو الاغراض كلها في الونيت وراحو...واخونا مجودي مبلط في الطاقه مو عارف ايش اسوي ؟؟على وشك تجيه حاله نفسيه ،قال(انا الان ماقدامي الا اني اتصل بالشرطه..بس المشكله حيدري عني ويكلم صاحبه الحرامي التاني ويجي وينكب اهلي..)جلس يفكر كيف يتخلص من الحرامي الضخم دا..المهم راح نام كالعاده.

(اليوم الثامن)
قام اليوم التاني وهو مهموم..المهم نزل من البيت وباله مشغول..لمن جا يشغل السياره جالو واحد صاحبو وسلم عليه واعطاه كرت دعوه عشان يعزمو على زواجو...اخونا مجودي اخذ الكرت وهو زعلان...مرت في باله فكره؟؟رجع تاني لصاحبه وناداه ! قالو(اعطيني كرت ثاني عشان اعزم صديق عمري) صاحبو العريس اعطاه..المهم عارفين ليه اخذ كرت تاني؟عارفين ايش بيسوي الذكي دا؟اخذ الكرت وكتب عليه:(اهلا وسهلا بك صديقي الحرامي في حفل سفاف زميلي وجاري) ههه...بعد كذه اخذ الكرت وحطو في السياره وراح العمل...بعد مارجع ساب الكرت في السياره عشان لمن يجي الحرامي ياخدو ويحضر الزواج...تفكير سليم..المهم طلع البيت وجلس يطالع من الطاقه الين ماجا الحرامي في اخر الليل وفك السياره وفتشها وماحصل الا الكرت !اخذو طبعا وراح..اخونا مجودي انبسط قال(خلاص مادام اخذ الكرت يعني حيحضر الزواج وحكفشو مع المعازيم...بس دحين خليني ارتاح وانام),المهم راح وحط راسو.


الرجاء عدم الرد

[إنـسـان ثـانـي]

(اليوم التاسع)
في حفل الزفاف(الزواج) جلس اخونا مجودي ينتظر الحرامي الضخم بحرقه..يطالع يمين ويسار .. الين مافعلا جا الحرامي الضخم..هه او مادخل الحرامي من الباب !لفت انتباه كل المعازيم من شكلو الغلط !!مستغربين منه ؟؟ كل واحد يقول في باله (مين عزم الشكل الغلط دا)عموما اول مادخل الحرامي الضخم في القاعه قام يصرخ ويصيح يقول(ياهو ياعالم فين العشا ترى ماسير كذه ..)..اخخخ المعازيم مستغربين ومفجوعين..عموما جالو العريس وقالو(ياخي انتا مين عزمك؟فين الاحترام فين الادب..)قالو الحرامي(اي احترام واي ادب يابن الحلال..شوفو داك الي عزمني !الي عندو سياره كده كده..)،اها عرف العريس الان ليش اخونا مجودي اخذ منه الكرت الثاني ! علشان يعزم الشي الغلط دا..المهم راح العريس لمجودي وقالو(ياخي انتا ماتحصل تعزم الا دا...)،طبعا الحرامي جالس يصيح ورا!فين العشا فين العشا...المهم فكر اخونا مجودي وقال(اذا كل المعازيم ما قدرو يمسكو الطحش دا !انا كيف حمسكو؟اتصل بالشرطه ..مممم طيب لمن تجي الشرطه حيكونو رجالين كيف حيمسكوه..اخخخ ماينفع)المهم قام العريس واهلو وحطو العشاء عشان يخلصو من الحرامي الضخم دا... ومن سوء الحض لمن حطو العشا جا الحرامي وجلس في نفس الطاوله الي جلس فيها اخونا مجودي..اخخخ اخونا خلاص مو عارف ياكل ولا يسوي شي من الخوف ..لا وكمان الحرامي يطالع فيه ويقولو(ياواد ياحلو كل اشبك خايف..هههه ياعسل انتا)،المهم مرت فكره على بال مجودي .. قال انا ليش ما احط سم في صحن الحرامي ولا في علبة البيبسي حقتو امكن ربي ياخدو..المهم قام وراح دورة المياه واخد علبه بيبسي معاه ! حط فيها شويت صابون وخلطها مع البيبسي...المهم رجع لمكانه الي كان جالس فيه وحصل الحرامي الضخم مو في؟؟لا وكمان صحن الرز مخلص!!إهب عليه من حرامي..المهم راح يدور عليه الين ماحصلو في طاوله تانيه جالس يضرب في الاكل ..راح وجلس معاه..لمن شافو الحرامي قالو(هوا انتا جيت ياعسل حيو حيو الله يالجار العزيز تفضل تفضل)واخونا مجودي يقول في باله (الله ياخذ عمرك ياشيخ)عموما اخونا مجودي غفل الحرامي الضخم وبدل علبه البيبسي حقته بعلبة البيبسي الي فيها السم..شرب الحرامي من البيبسي وهو يطالع في اخونا ويبتسم الين ماخلص العلبه..شويه كده بدء يغيم الجو عنده وحاس انه سكران الين ماداخ وطاح ومات..الغريب انو محد من المعازيم عبرو رغم انهم شايفينه..اخونا مجودي فرح وقام ينطنط ويصفق...رجع البيت وهو مبسوط وسعيد..نام وهو مرتاح..

(اليوم الاخير)
صحي اخونا من النوم وطبعا باله مرتاح ومبسوط دخل التواليت وفرش اسنانه وجهز ملابسو وسرح شعرو وميل الخصله وشغل السياره وراح العمل...لمن رجع وجا ينام قال(اطالع من الطاقه ولا لا) يعني بيترق ههه..المهم قال (ياشيخ خليني اعطيها سهر اليوم بمناسبة موت الحرامي الضخم دا)..قام وفك النور وشغل باك ستريت بويز(الاماكن) قصدي محمد عبدو(الاماكن)..وجاب الفصفص والبسكوت...وهو في نص السهرة سمع صوت سياره مقربعه تحت في الشارع...قام وفك الطاقه وهو مبسوط...اخخخخخ عارفين ايش شاف ؟؟؟ حصل صاحب الحرامي الضخم الي معاه الونيت جالس يسرق من السياره..اخخخخ اخونا مجودي اغمى عليه ومات الله يرحمو..تمت

وشكرا على المرور
:)
... ... ...
... ...
...
اخوكم/ مجودي ;)

[raof2000]

ههههههههههه


مسكين مجود


يحق له انه يموت من اللي شايفه :09:


خلص من هذا جاله الثاني :09:


يروح يبيع السيارة ويريح نفسه :09:


قصة حلوة


شكرا


:D

[Ahmed Blight]

خخخخ حكاية لا تنتهي :p

we seek for a good end but there is no good end :P

قصة ممتازة و لو ان طابع السرد كثير خخخ يشعرك بالملل احيانا :أفكر:

بالتوفيق

سلااااااامز

[Fly_Batman]

وعليكم السلام ورحمة الله وبركاته
ههه حلوووة القصة..أخونا العزيز والنهاية رووعة:09:

مقطع أعجبني..:09: ..
.
ياواد ياحلو كل اشبك خايف..هههه ياعسل انتا)

ههه حلوة:09:

[DARK BOY]

هههههههه . قصـة حلوة


يسلموو

[A.R.T]

مشكور على القصة ويصراحة أعجبني الفاصل الأعلاني

ومكشور <<مشكور

[TiTaN]

صراحة لاحظت من القصة شي واحد :D إنك مكاااااااااااوي <<والله من غير ما أطل في محل الإقامة



لجل ان


وفرش اسنانه وجهز ملابسو وسرح شعرو وميل الخصله

بس بصراحة القصة جييييييييييييييييييييييييييدة

بس النهاية حزينة:D

[:: Rai ::]

الله يرحم مجودي و يسكنه فسيح جناته

مسكيييييييين

خخخخخخخخخخخ

مشكوور مجودي عالقصة