المساعد الشخصي الرقمي

مشاهدة النسخة كاملة : عملية كوماندوز في أفغانستان ج5 (دجو النكبة)


الوسط
20-11-2001, 11:28 AM
حياكم الله جميعاً ... مر 5 أيام من رمضان ... الله يخلفه علينا بخير ...
هذا الجزء الخامس وأتمنى إني ما أوجعت رؤوسكم فيه ... وإن شاء الله بيبقى جزء واحد ...
اللي بيتابع الموضوع من الأول ...

الجزء الأول (http://montada.com/games4arab/showthread.php?threadid=47835/forum//forum//forum//forum/)

الجزء الثاني (http://montada.com/games4arab/showthread.php?threadid=47997/forum//forum//forum/)

الجزء الثالث (http://montada.com/games4arab/showthread.php?threadid=48191/forum//forum/)

الجزء الرابع (http://montada.com/games4arab/showthread.php?threadid=49139/forum/)




(الجزء الخامس)


الفريق الثاني يعبر الحدود


المكان: الحدود الصينية الأفغانية
الزمان: حوالي منتصف الليل
درجة الحرارة: 5درجات

دخل الفريق الثاني للحدود بين الصين التي وصل لها من تايوان بعد مطاردات مثيرة ... وبواسطة الخرائط ... وصل الفريق الثاني لأحد المناطق الغير مراقبة من حرس الحدود ...

الدوم (وهو ممسك الخريطة): هممممم ... المفروض إننا دخلنا داخل أفغانستان ...

خالد1: المكان مرعب هنا ...مافيه شيء حي ... وشي المنطقة هذي بالضبط ...

Selfer : مافيه أوآدم ... أحسن ... حتى ما يلحقنا أحد.. بس وش بيفكنا من البرد ... بررررر

Dr.Lucifer: أما أمس ... ركضت عن السنة كلها ...

الدوم (وكأنه تكهرب فجأه): أأأأ ... فيه مشكلة كبيره ...

خالد1: فيه شيء...

الدوم: الظاهر إننا دخلنا بالغلط منطقة حقل ألغام...

باقي الأعضاء: كيييييييييييييييفففففففففففف !!!!!




الفريق الأول في الأسر

قبضت مجموعة من البدو على أعضاء الفريق الأول وهو متسللين من الحدود الصينية لأفغانستان ...وأخذت تلك المجموعة الأعضاء لقبيلتهم ...
وهناك أخذوهم لرئيسهم ... وبعد ما دخل الأعضاء على الرئيس بدأ الاستجواب...
وكان الرئيس يداعب حية طولها 10 أمتار واللي كانت حيوانه الأليف.

الرئيس: من أنتم ... ووش جابكم هنا...

دجو: ما تخاف إن هذي الحية تاكلك ...

الرئيس: قلت من أنتم !!!

دجو: إحنا من المخابر ...

عماد18 (وهو يضرب بكوعه دجو حتى يسكت) : أأأ ... إحنا سياح ... وضايعين لنا يوم كامل ...

دجو: والله ؟؟؟؟

الرئيس: كيف تقول لي إنكم سياح ... وأنتم لابسين ملابس رعاة ..

دجو: هذا فيه واحد إسمه (واهاوا) هو اللي ...

عماد18 (وهو يشوت دجو مره ثانيه) :أأأأ ... هذي ملابس شعبية إشتريناها ... علشانها مريحه .... ههههه ... دجو: بصراحة هي مريحة ، لدرجة إن باتيقول سرق ملابسي و ...

الرئيس: ؟؟؟؟؟

وشات Naf دجو بقوة المرة هذي حتى يسكت ...

دجو: أأأي ي ..

عماد18 (يهمس لدجو) : إن تكلمت مرة ثانية بأرميك لثعبان رئيسهم ...

وبدأ الرئيس ينظر بريبة لأصدقائنا ... وبدأ يشاور مساعدينه وبصوت عالي ...

الرئيس: وش رايكم في الموضوع ..

مساعد1: الظاهر إنهم فعلاً سياح ... شكلهم أغبى من إن يكونون مع طالبان ...

مساعد2: أنا أؤيد رأيه ...

دجو: أحنا أغبياء ... أنت وياه اللي غبي و ... أأأأأأيييييي
(هذي المرة تلقى دجو ضربه ثلاثية من عماد18 و باتيقول و Naf)

عماد 18 (وهو يتكلم بخوف) : هههه ... إعذر صديقي ... تراه مصاب بضربة شمس ... هههه

الرئيس: لكننا في منتصف الليل ...

باتيقول: زميلنا تجيه حالات إذا أكتمل القمر.

مساعد2: اليوم ماطلع القمر ...

باتيقول (وهو يهمس) : ألا والله البلشة ... وش بيفهمهم هذولي ...

Naf (وهو يكلم دجو) : تكفى إسكت الله يخليك ...

دجو : ليه أنا وش قلت ؟؟

Naf: أنت إسكت وبس ...

وجلس الرئيس يفكر ويشاور مساعدينه ... وأخيرا

الرئيس: إحنا بتأكد من روايتكم ... وبتجلسون عندنا ... وبنعطيكم خيمة ... و إذا تأكدنا ،بكره تقدرون تروحون زي ما تبغون ... ولكن لو صدر منكم أي تصرف مريب ...بتندمون ...

وبدون ما يشاور دجو أحد قام وطلع الخيمة ...
ومسح عماد18 قطرات عرق على جبينة ... فدجو الله لا يهينة بغى يجيب العيد ...
وما كاد الأعضاء يطلعون من الخيمة حتى تفاجئوا بدجو يركض ووراه كم واحد معهم عصي بيضربونه ...

Naf: وش اللي صاير؟

باتيقول: هههههه ... أحسن خلهم يأدبونه...

Naf: الآدمي هذا ما نخليه خمس دقايق بحاله إلا وجاب المشاكل لنفسه ...

عماد18(وهو يستعد للركض) : قصدك جاب المشاكل للي معه ... أركضوا تراهم جايين ناحيتنا

وبدأ مشهد مثير ... أربعة أصدقاء ... يطاردهم حوالي خمسين بدوي ضخام الجثة ...




في حقل الألغام


أعضاء الفريق الثاني يطلعون من مصيبة ويدخلون في ثانية ... والآن هم في منطقة ألغام ... ولا يعرفون وش يعملون...

خالد1(وهو يكلم الدوم): أول ما بدينا نمشي معك دخلتنا في ألغام !!!

الدوم: وأنا وش دراني إنه حقل ألغام ؟؟؟

Dr.Lucifer: كيف مادريت إنه حقل ألغام ؟؟؟ بعد ما دخلتنا فيه علمتنا إنه حقل ألغام .

Selfer : يا حسافة شبابك يا Selfer ... وأنا اللي كنت مخطط لما أرجع أطلب ترقية من "الوسط" ...

خالد1 (وهو يتصل بالجوال) :والله إنك جبتها ... نتصل بالوسط وهو اللي يشوف لنا الحل...

كان "الوسط" يتابع فيلم مصري محزن ،وكان يبكي من قلبه وهو يتابعه... وفجأة رن الجوال عنده ..
ترررررالااااام ...ترررررالاااام ...

الوسط: ألو ... إهيء ... إهيء ... مين...

خالد1: إحنا الفريق الثاني في مهمة (أفغان3).. إحنا الآن عالقين في حقل ألغام نبي منك التعليمات.

الوسط: كييييييفففف ... عالقين وين ...لحظة ... لحظة بأوقف الفيلم ...لحظة المشهد هذا مؤثر خلني بأكمله وأكلمك ...

خالد1: ؟؟؟؟

الوسط(وهو يعلق على الفيلم): أحسن ... إيه أضربه ... يستاهل والله ...

خالد1: ألو ... الوسط ...إنت سامعني...

الوسط: إيييه ... سامعك ... حدد لي منطقة الألغام اللي أنت فيها ...

خالد1: حسب الخريطة إحنا في المنطقة 43 ...

الوسط (وهو يقلب خرائط عنده) : المنطقة43 ... المنطقة43 ... إيه هذي هي ...

(ثم فجأة صرخ "الوسط" بغضب) : ياخي حرام عليكم ... منطقة الألغام اللي تتكلمون عنها ... قديمة ومافيها أي ألغام...
(وزاد صوت صراخة) قطعتوا علي الفلم على الفاضي ... (وسكر السماعة) ..

(ووضح الخبر على خالد1 ) : أبشركم الحقل اللي إحنا فيه ... مافيه أي ألغام ...
وبعد ما أكد عليهم خالد1 أكثر من مرة ...مشي أعضاء الفريق وهم واثقين ...
كان فيه راعي غنم يراقب الفريق الثاني من أول ما طاح في المشكلة حتى طلعوا منها ...ولما طلعوا أتجه لهم مباشرة ...

الراعي: لو سمحتوا يا لأغراب ... أنا ودي أطلب منكم طلب ...

الدوم : بسم الله الرحمن الرحيم من وين طلع لنا هذا ...

Selfer : وأنا اللي كنت أقول إننا لوحدنا ...

الراعي (وهو متجاهل التعليقات ، أو ما فهمها) :ودي أطلب منكم الخريطة اللي طلعتكم من منطقة الألغام ... حتى يتفادى أهل المنطقة هذي الألغام ،وتتفاداها غنمهم ... وأنتم تخدمون أهل المنطقة كلها ...

خالد 1(وهو واثق): الألغام اللي تتكلم عنها ماهي موجودة ...الأخبار اللي عندك عن وجود ألغام قديمة مره ...

الراعي: مستحيل ... أنا خروفين من غنمي أنفجر فيها لغم أمس في المنطقة اللي كنتم فيها بالضبط ...

وقام الأعضاء يناظرون بعض ووجوههم صفراء ... ولا قدروا يبلعون ريقهم .



لا أحد يروح ... بنكمل الجزء على هذا الرابط بعد ساعة بالضبط
Arsene Lupin
20-11-2001, 12:44 PM
تصلح حلقه من طاش ما طاش:D


كمل يا مال الغناة
الوسط
20-11-2001, 12:56 PM
نكمل هذا الجزء

في خيمة البدو


دخل أعضاء الفريق الأول خيمتهم اللي أعطاهم إياها البدو اللي مسكوهم ... وكانت آثار الضرب بادية عليهم ... وأجسامهم مليانه رضوض ...

عماد18: آآآه ياجسمي ... آآآآآه ... حسبي الله عليك يادجو ... إنضربنا بسبتك ... آآآآخ...

باتيقول: أي .. أييييي ... قايل لكم من الأول خلونا نذبحه ونفتك ...

دجو: أنا ووش سويت؟؟؟ آآآآه ... من سمعكم قال ما إنضربت معكم ...

Naf : كله منك ... آآآه ... دخلت في خيمة حرمة رئيسهم ... وخليتهم يلحقونا ويضربونا ...

دجو: آآآه ياظهري ... وأنا وش يدريني ... كنت تعبان وأبي أنام ... أووووه ... وبعدين هم قالوا بنعطيكم خيمة ...
باتيقول: وليش تروح مثل المطفوق وتدخل خيمة ما تدري وش هي ... تأكد قبل ما تنطفق وتدخل ...آآه ياظهري

دجو: بس تصدق ... والله ياهو ماخذ قطعة ... رئيسهم ... والله يا حرمته شي ...

عماد18 (وهو يحاول يجلس) : والآن وش العمل ... هذولي أخذوا مننا كل شيء ... الجوالات ... والأغراض ... وحتى البغال ...

وجلس أصدقائنا يفكرون شوي ... ويتألمون شوي ... وفجأة دخل عليهم واحد من البدو ومعه جوال عماد18...

البدوي: من منكم أسمه عماد18 ...

عماد18 (وهو يناظر الجوال وهو مرتبك) : أنا ... فيه شيء ...

البدوي: أخوكم الكبير متصل وشكلة معصب ... (وأعطى الجوال لعماد 18اللي زاد ارتباكه)

عماد18: ألو ...

الوسط (وهو معصب): ألو ... وينكم فيه يا أغبياء ... لي ساعة كاملة أحاول أتصل فيكم ...

عماد18 : إحنا ...

الوسط (وهو يرتفع صوته من الغضب): من هذا اللي رد علي ؟ ... أنا كم مره قايل لكم لا تعطون جوالاتكم لأحد ...

عماد18: أنا ودي أقول ...

الوسط (وقد إنتقلت الحرارة منه للجوال): بأذبحكم إذا شفتكم ... أنا جتني فواتير جوالاتكم ... مرسلين مسجات لنص سكان الأرض ... خلوني أشوفكم بس ... خاصة دجو المشاكل هذا ... باذبحه وأشرب من دمه ... فواتيره كلها خط الصداقة ... (وسكر الجوال بقوة) ...

عماد18: ألو ... ألو ...

البدوي (وهو ياخذ منه الجوال) : الله يعينكم ... أخوكم معصب بالمرة ... أول ما رد عليه الرئيس قام يسب رئيسنا ويلعنه ... الظاهر إنه معصب لإنكم تأخرتوا على أهلكم ... أنا بأحاول أكلم الرئيس علشان يطلعكم بسرعة ...

ومثل مادخل البدوي بسرعة ... طلع ...

Naf : ليش ما قلت له عن اللي صار ..

عماد18: وهو خلاني أتكلم ... من أول ما إتصل وهو يصارخ ... وكان يتكلم عن إرسال مسجات ... وعن خط الصداقة...
(ويكمل عماد18 كلامه) :دجو !!! وش قصة خط الصداقة !!!

دجو (وهو مرتبك) : أأأأ ... هههه .. تعرف ... يعني .. الطريق كان طويل ... و ...

باتيقول: الظاهر إنهم بيتركونا نمشي بسرعة ... رحمونا ...

Naf : شكل "الوسط" أثر فيهم ... وخافوا منه ... ما يدرون إن ماعنده سالفة

باتيقول: إيه والله ساعدنا"الوسط" وهو مايدري ... هههههه ...




الوصول لمكان التجمع


وصل أعضاء الفريق الثاني للمكان اللي طلب منهم الوسط يقابلون الفريق الأول عنده ...

Dr.Lucifer: "الوسط" هذا لازم يموت بعد اللي سواه ... خلانا نمشي في حقل ألغام ...

الدوم: تكفى أسكت ... أنا أحاول إني أنسى إني كنت أمشي وتحت رجولي ألغام وأنا ما أدري.

Selfer : إلا ذا البدوي اللي ما يفهم ... نحاول نقنعه إننا ما نعرف مكان الألغام .. ولا هو راضي يصدق...

خالد1: لا تلومه ... أحد مهبول يطيح في هذي المنطقة ويطلع منها سليم ... الله سلم ...

ويلمح أصدقائنا خيمة في نفس المكان الالتقاء ... وإتجهوا لها مباشره ... وكانت الخيمة ما فيها أحد بالداخل ... وفيها أغراض ... وبدأ أصدقائنا يشوفون الأغراض الموجودة...

Dr.Lucifer: فواكه ... خبز .... معلبات ... مويه ... تموين يكفي أسبوع ... والله دلع ...

ولقى Selfer ورقه موضوعة بعنايه على الأرض وفتحها يقرأ وش فيها ...


========================

أعزائي أعضاء الفريق الأول ....
تحية طيبة وبعد ،،،

أرجو منكم إنتظار الفريق الأول في هذه الخيمه التي وضعت لكم ...
وستأتيكم الأوامر بمجرد وصول الفريق الأول ... التموين راح يكفيكم كلكم مدة 10 أيام إذا ما أكلتوا بفجاعه ...
ملاحظة: الفاكس سينفجر بعد دقيقة من فتحة ...

رقيب ركن/ الوسط.


========================


Selfer : يا شباب لقيت فاكس من " الوسط" يقول فيه إننا ننتظر الفريق الأول في الخيمه إلى أن يجون ...

خالد1 (وهو مرتعب) : أنت فتحت فاكس من " الوسط" ؟؟؟؟ إرميه برا بسرعة !!!

Selfer : دقيقة خلني أكمل لك ... تكلم "الوسط" في الفاكس عن الأكل وإنه ...
(بووووووووووو م م م م م )


في خيمة الساحرة


عرف أصحابنا إن فيه ساحره عجوز في القبيلة اللي محتجزين مؤقتاً عندها... وإنها تعرف المستقبل زي ما تقول ... وكان ودهم يجربون يعرفون مكان الفريق الثاني ... وهم ينتظرون الأوامر ... خاصة إن ما عندهم شيء يعملونه ... وبالفعل راحوا لخيمتها ... ووقفوا عند بابها ...

ودخلوا في خيمتها ... وكان من شكل الخيمة يدل إنها مشعوذة فعلاً ...

العجوز : وش تطلبون من الأرواح يا غرباء ...

عماد18 (وهو مرتبك شوي) : أأأأ .. أحنا ننتظر زملاء ... وددنا نشوف هم وينهم ...

دجو: أنا ودي أشوف زوجة رئيسكم بدون ما حد يدري ... أأأأي (ضربه Naf بكوعه)

Naf: أنت ليش ما تنطم ... ما يكفي اللي صار منك أول مره ...

دجو: ليش ياخوي ... أبغى أشوفها مره ثانيه بدون ماحد يدري ...

العجوز: وش نوع الجني اللي تبونه يطلع صورة أصدقائكم ...

عماد18: كيف ؟؟؟

باتيقول: نبغى نوعه مرسيديس موديل 2000 .... هههههه

العجوز (وهي تتجاهل تعليق باتيقول) : فيه عندي جن غاليين ... وجن رخيصين ... وكل ما غلى السعر كانت الخدمة أحسن ...

عماد18: أعطينا أرخص واحد عندك ..

العجوز: من حظكم إن فيه جني إسمه (جلعوط) عليه تخفيض هذا الإسبوع ...

دجو: (جلعوط) ؟؟؟ الله يشفيه ...

العجوز (وبدت تعصب) : إسمه (جلعوط) ... ما قلت إنه مريض ... (جلعوط) أسم ، ماهو مرض

ثم بدأت العجوز تفرك الكرة السحرية اللي عندها وتقول كلام غريب

العجوز: جلعوط ... مربوط ... أطلع ... وورينا البوط...

ثم طلع في الكره صروة جهاز تسجيل مكالمات ... وطلع صوت من الكرة البلوريه يقول : عفواً أنا غير متواجد الآن يرجى ترك رسالة قصيرة بعد الصافرة ...

العجوز (وهي معصبة) : أنا عارفه إنك تسمعني يا (جلعوط) ... إذا ما رديت بتندم ...

فجأة ظهرت صورة (جلعوط) في الكرة البلورية وقال: خلاص ... خلاص سمعتك ... أأأف ... الواحد ما يقدر ينام ..

كان وجه (جلعوط) مثل وجه الحصان وفيه شنب ... وكان لابس ملابس النوم ...

جعلوط : بأغير ملابسي وأجيكم ....

وظهر في الكرة البلورية كلمة Hold وصوت موسيقى انتظار المكالمات ...
دجو: وش السخافه هذي ...

وطلع لهم (جلعوط) لابس ملابس سهرة ...

جلعوط : بسرعة قولوا وش تبون أنا مستعجل وعندي سهرة ...

عماد18: إحنا مضيعين أصدقائنا ... وودنا نعرف مكانهم ...

جلعوط: هذا مكانهم ... (ووراهم صورة خيمة والأعضاء وجوهم سوداء من أثر تفجير الفاكس).

Naf: سواها فيهم " الوسط" وأرسل لهم واحد من فاكساته...

عماد18 : طيب هذي صورة خيمة ... وينها فيه بالضبط .

جلعوط: ما أعرف ... أنت طلبت أوريك وينهم ... وأنا وريتك ...

Naf: تكفى يا (جلعوط) ورني صورة رئيس مخابرات المنتدى العربي ... إلا الآن ماحد شافه...
(وكمل Naf وهو مرتبك ... بعد ما حس إنه أخطأ): طبعاً أنا أسمع عنه وما أعرفه...

وظهرت له صوره في الكرة البلوريه مكتوب فيها ... (الوصول إلى هذن الصفحة غير مسموح فيه ... يرجى تعبئة النموذج التالي إن كنت ترى أن الصفحة يجب ألا تحجب)..

باتيقول: إلا ورنا رئيس... قصدي أخونا الكبير "الوسط" وش قاعد يسوي...

وظهر لهم "الوسط" حاضن له دب دمية ... وقاعد يناظر فيلم مصري وهو يبكي ... وضحك أصدقائنا كلهم...

دجو: تكفى ورني صورة الحرمة اللي تحبني في هذي الدنيا ...

وطلعت صورة عنز ...
وضحك جميع الأصدقاء ، وبدأوا يهنون دجو بعبارات مثل (والله خير من إخترت) ومثل (الله يخليكم لبعض) ... و قام دجو يسب ويلعن في (جلعوط) ...




أتمنى إن الجزء هذا أعجبكم ... وأتمنى إن ماحد يزعل... الجزء الأخير بأنشره يا بكره يا السبت إن شاء الله
الوسط
20-11-2001, 12:58 PM
هلا والله بأخوي Arsin Lopeen

مشكور أخوي... إلا طمنا عن أخبارك ... وكيف الدراسة ...


الوسط
باتيقـول
20-11-2001, 01:32 PM
ههههههههههاااااااااايييييييييييي

حلوووو وررررروعه ومشكوووووور يالوسط على

القصص المنسمة

...............























واللي يرحم والديك فكنا من دجدج
Arsene Lupin
20-11-2001, 01:36 PM
فعلا تصلح في طاش ما طاش ;) بس فيه حاجات راح تقطع :D


كلو تمام الله يسلمك و الشهر عليك مبارك بعد الزحمه


الا كيف امتحانك اللي كنت ظايع في العجه:D <<<<<<<<< يا قدمي ادري
الوسط
20-11-2001, 02:01 PM
باتيقول

عندي لك خبر سيء ... دجو باقي ...
ماهو بيدي ... بيد رئيس مخابرات المنتدى اللي إلى يومك ما شفته ولا كلمته...
تحمله علشان مصلحة المنتدى ... علشاني...
===========================


Arsin Lopeen


زين إنك طمنتنا على أخبارك...
أما بالنسبة للإختبارت ... الظاهر إن هذا الترم بأشيل معي مادتين على الأقل قابلة للزيادة :(


=============================

ومشكورين كل اللي تابعوا

الوسط
صقر الألعاب
20-11-2001, 03:30 PM
تعجب يا الوسط
تنفع تألف قصص وتنشرهم
بس متى الجزء الأخير
وشكراً
عماد 18
20-11-2001, 03:55 PM
دجو: تكفى ورني صورة الحرمة اللي تحبني في هذي الدنيا ...
خخخخخخخخخخخ :D
قوية ..
الا اقول ترى ما في داعي تكتب عماد 18 اكتب عماد تكفي و توفي :)
داج2222
20-11-2001, 05:15 PM
ههههههههههههههههههههههههههههاااي توب ميه ميه يا قدع خخخخخخخخخخخخخخخخخخخخخخخخخخخخخخخخخخخخخخخخخخخخخخخخخخخخخخخخخخخخخخ ابدعت يا بعد تسلاي:p<<<<خوش غزل

ياخي يا اني جريه هع هع راعي اكشن ابي احرك هالزوله:p

الله يوفقك كمل:)
عاشقة كيد
20-11-2001, 07:36 PM
حلوة يالوسط


بس تكفى أخصرك من الي مايبغوا دجوو بصراحة هو الي ملطف الجو
باتيقـول
20-11-2001, 07:42 PM
كتب العضو (عاشقة كيد)
حلوة يالوسط


بس تكفى أخصرك من الي مايبغوا دجوو بصراحة هو الي ملطف الجو

اية انتي وش عليك جاسة وتسمعين القصة
وانا وعماد وناف ماكلين هواء مع دجو النكبة ذا :غضب: <<<مصدق
Chandler
20-11-2001, 07:47 PM
حلووووووووووووووووووه...


ههههههههههههههههههه...

اجل دجو يكلم على خط الصداقة......((والله لأفضحك)):D :D
عاشقة كيد
20-11-2001, 07:49 PM
لا بس بصراحة انتو باردين مررررررررة يعني يبغالكم واحد يحركم
باتيقـول
20-11-2001, 07:52 PM
كتب العضو (عاشقة كيد)
لا بس بصراحة انتو باردين مررررررررة يعني يبغالكم واحد يحركم

اية خليكي تجين معنا وتعرفين البروود حنل في غربة وانتي

تقولين بارديين حسي فينا شوي حرام

حرااام
حرااام :(


<<<قلبته فيلم هندي
Lucky guy
20-11-2001, 08:02 PM
كخخخخخخخخخخخخخخخخخخخخخخخخ هذا الجزء حركة كخخخخخخخخخخخخخخخخخ الداج أستلم أنواع تشويت كخخخخخخخخخخخخخخخخخخخخخ بالله كملللللللللللل :D
عاشقة كيد
20-11-2001, 08:04 PM
خلاص أهو دحين باحس فيكم

ياالله :( ياحرام:( والله إنكم تكسرون الخاطر:( ماحد يلومكم:( بعد التعب الي مسوينه مع الوسط مالأقول إلا الله يعينكم:( والله يخليكم عشان ترفعوا رؤوسنا وراس رئيس مخابرات المنتدى
باتيقـول
20-11-2001, 08:15 PM
كتب العضو (عاشقة كيد)
خلاص أهو دحين باحس فيكم

ياالله :( ياحرام:( والله إنكم تكسرون الخاطر:( ماحد يلومكم:( بعد التعب الي مسوينه مع الوسط مالأقول إلا الله يعينكم:( والله يخليكم عشان ترفعوا رؤوسنا وراس رئيس مخابرات المنتدى

ههههههههههه

تصدقين حسيت اننا مساكين من جد :p
الوسط
20-11-2001, 09:19 PM
مشكوريين كلكم

============================
صقر ا|لألعاب
الله يخليك ... مشكوررررر
الجزء الأخير إن حصل لي نشرته بكره ,إلا السبت ...

بس تراه مصرقع

========================
عماد (بدون 18)

أنت تأمر أمر ... عسى الجزء هذا أعجبك ؟؟؟

===========================


عاشقة كيد


أنا معاك .... دجو هو ملح القصة ... ولا يزعل مني أحد ... والحمدلله الموضوع بيد مدير المخابرات ماهو بيدي

========================

naf


شفت وش قاعد يسوي دجو ... خط صداقة ... وإرسال مسجات ...والفواتير يدفعها المنتدى

=======================

باتيقول

أنا معك إن دجو نكبة وراعي مشاكل ... بس وأنا أخوك تحمله إلى أن تنتهي المهمه ... راح الكثير وبقى القليل
إن الله كان مع الصابرين ... والله قلبي معكم من مقالب دجو

========================
THE LUCKY GUY

مشكورر أخوي ... وإن شاء الله بيكون ختامها مسك

============================
داج2222

والله ياخوي حاول تخف على الشباب ... تراهم ربعك ...
صدقني ماحد يفهمك إلا أعضاء المنتدى اللي يتابعون القصة

========================


ومشكوريين كلكم

الوسط
عماد 18
20-11-2001, 09:24 PM
كتب العضو (عاشقة كيد)
خلاص أهو دحين باحس فيكم

ياالله :( ياحرام:( والله إنكم تكسرون الخاطر:( ماحد يلومكم:( بعد التعب الي مسوينه مع الوسط مالأقول إلا الله يعينكم:( والله يخليكم عشان ترفعوا رؤوسنا وراس رئيس مخابرات المنتدى

اهيء اهيء ان شاء الله ما راح نخذلكم :( <== دخل جو :) ..

الوسط بالعكس هذا احلى جزء خاصة اني صاير رزة فيه :D
النايم
20-11-2001, 09:50 PM
مشكوووووووووووووووووووووور

والى الامام لانك مؤلف ممتاز
الدوم
25-11-2001, 04:38 AM
تراك احسن من اسامه انور عكاشه في التاليف

مشكور علي اتاحت الفرصه للمشاركه في القمندوزالعربي

ونتمناها حقيقيه ونشوف مين اللي يثبت من الرجال

وتحياتي لك وقبلاتي:) :) :)