الجهاز و القطع اقتراحاتكم وخبراتكم لفتح محل شبكة في مدينة الرياض :) [الأرشيف]

مشاهدة النسخة كاملة : الجهاز و القطع اقتراحاتكم وخبراتكم لفتح محل شبكة في مدينة الرياض :)

(Ntada)

14-10-2006, 01:08 AM

بسم الله الرحمن الرحيم

هلا وغلا بكم جميعا .. :D
اخواني بغيت افتح محل شبكة في مدينة الرياض ..
لكن تنقصني بعض الخبره ..
طبعا ابي منكم اقتراحات لأشياء هذي :
اولا :
الموقع : وهذا يعتبر اهم شيء ابي اقتراحتكم للموقع بس مو يجي احد يقولي بشارع التحلية .. تعرفون
ليه ؟

ثانيا:
مواصفات الأجهزه :
طبعا حطو ببالكم أني مارح احط الا هل الألعاب التالية :
CS:1.6
WOW
WC:FROZEN THRONE
FAR CRY
FLAT OUT
وكم لعبة مثل باتل فيلد لذالك . . حطو ببالكم هذا الشيء

ثالثا:
تنسيق الديكور ..
من ناحية خلفية .. وكم فتحه المحل وكم جهاز احط ..

مبدئياً هذا هو المطلوب ..
ارجوا ان لا ننحرم من مشاركاتكم البنائه وفعاله

(Ntada)

14-10-2006, 01:09 AM

بغيت انوه ان الميزانية مفتوحه الى 500000 الف ريال

BeaUnkill

14-10-2006, 09:40 AM

ورى ما تفتح بالشرقية :D

(Ntada)

14-10-2006, 12:48 PM

BeaUnkill (http://www.montada.com/member.php?u=101423)
هلا اخوي . .
والله الخبر فكرة جيدة للإستثمار لكن جوها يبط كبدي .. جيتكم قبل يومين ومت من الحر ..
عموما اخوي تقدر تفيدنا من ناحية الديكور ومواصفات لإجهزه

MaGn.ae

14-10-2006, 03:14 PM

محد بيفيدك في هذا الموضوع الا الي عندهم مقاهي ...

على ما اذكر انه الاخ amajed عنده مقهى ولا انا مخربط :D ؟!

(Ntada)

14-10-2006, 04:45 PM

يأخوان ماطلبت منكم تحلون مشكلة فلسطين ..
كل المطلوب منكم مواصفات الأجهزة . .
وموقع حلو ..
هذا هو بس ..

amajed

14-10-2006, 04:57 PM

ايه عندي مقهى في بيتنا ^^ 4 اجهزة :p تبي تفزع بالاجهزة الي عندك ونلعب 4 ضد 4 خخخخخخ

اممممممم والله يالطيب بصراحه انا كنت ناوي اسوي مقهى في الرياض ووصلت المواصيل الى اني شوي وادفع العربون ! يعني ضبطت اموري من ناحية الديكور والاجهزة والمحل الي بيدبر الاجهزة وووو الخ

بس فيه شيئ غريب ! انت بتحط WOW يعني ناوي انترنت في المقهى ؟؟ في هذي مااقدر افيدك لاني ماجربت كيف احط انترنت في مقهى ^^
على العموم من ناحية الميزانية ماشالله عاليه جدا ! المقهى الي كنت ناوي اسوي كان بيكلف 150000 ريال فقط

طيب خل نجيها حبه حبه ...

اولا :
الموقع : وهذا يعتبر اهم شيء ابي اقتراحتكم للموقع بس مو يجي احد يقولي بشارع التحلية .. تعرفون
ليه ؟
ليه ^^؟
والله بصراحه انا اكثر شيئ تعقدت فيه هو الموقع ×_× يعني ماتدري وين تروح ووين تجي
في النهايه فكرت اني ابحث عن الاحياء الاكثر تواجد للشباب فيها !
وبصراحه اكثر شيئ قدرت اوصل له هو حي المروج في شارع تمير ! الي ينتهي على الدائري الشمالي
مااقول لك انه ممتاز لكن هو افضل ماوجدت !

ثانيا:
مواصفات الأجهزه :
المواصفات هذي امرها سهل ماشالله الميزانيه شبه مفتوحه ! لكن عدد الاجهزة يحكم
نقول 32 جهاز ؟؟ اضنه العدد المناسب في جميع الاحوال ! الا اذا ناوي تحط الرقم القياسي وتقلد اهل جدة ^^ هذا كلام ثاني
على العموم الاجهزة بمواصفاتها كالتالي :
Intel Core2dou E6600
ASUS P5L-VM 1394 Intel 945G
NVIDIA GeForce 7950GT 512MB
DDR2 667 (PC2 5300) (2x1GB) 2GB
WD 160GB SATA2 7200RPM

باقي عليك الكيس والباور سبلاي وسي دي او دي في دي روم !
بخصوص الباور سبلاي المحل راح يضبط بافضل شيئ يتناسب مع القطع الي فوق !

بخصوص القطع هذي لو كنت مستعجل
اما لو كنت غير مستعجل انتظر الى بداية 2007 وراح تنزل كروت DX10 ومعالجات رباعية النواه
وانت وخطتك التجاريه !

بخصوص الالعاب ماتلاحظ انك ساحب على الالعاب الاستراتيجية ×_×
مثلا The Lord Of The Ring Battle for Middle-Earth II
لها شعبيه قويه عند الناس ! وبرضو
Command and Conquer Generals Zero Hour

يعني شف لك من الالعاب الاستراتيجيه شوي عشان ازورك ^^
المهم نرجع للموضوع
ثالثا:
تنسيق الديكور ..
من ناحية خلفية .. وكم فتحه المحل وكم جهاز احط ..
امممممممم بالنسبة لي يعجبني الجو الهادي :) يعني بدون شخابيط كثيره وخرابيط
الي فكرت فيه ماادري اذا بتتخيل معي والا لا !
انا فكرت في ان لون الجدار سواء سقف او جدران جانبية يكون لونها كحلي !
وعلى الجدران الجانبية فيه جبس يتم تمريره دار ما دار حول المحل على شكل امواج ! ويكون مجوف من الجانبين ! ونضع في التجويف انوار نيون زرقاء ! بحيث يكون مشع !
ونفس الشيئ مع السقف ! لكن يكون في السقف بقعه كبيره من الجبس واطرافها مجوفه وفيها نفس الانوار ! عاد انت وذوقك يمكن مايعجبك الثنائي هذا فتغيره بالي تبي !
وبرضو فكرت في الاضواء الليلية ان كانك تعرفها ! راح تعطي جو حلو :) خصوصا اهل الرياض اغلبهم يلبسون ثوب ^^ يعني انعكاس قوي ;)
ماادري هل هذا هو الي كنت تنتظره مني او من الاعضاء اني اقوله ! ؟؟

هذا كل الي عندي وكل مالدي من اسرار في انشاء صالة العاب :p

بالتوفيق ولا تنسى تعطيني ساعات مجانية :p

MaGn.ae

14-10-2006, 08:40 PM

اعتقد الامور وضحت :D ..

اهم شي انه ظني ما خاب .. يعني كنت بتفتح محل .. او عندك خبرة في ها المجال :) ..

MAYAM

15-10-2006, 06:47 AM

يالغالي وشرايك بتقاطع المعذر مع شارع الضباب
1- بجانب مجمع سكني
2- قريب من العليا ووسط المدينة

(Ntada)

15-10-2006, 05:29 PM

هلا وغلا اخوي امجد
ماشاء الله عليك .. تخطيط مهوب صاحي
حي المروج فكرة جيدة خصيصا انه كل عيال الجامعات اغلبها هناك . .
بس ربي يفكنا من البدو . .

بنسبة للميزانية قد تصل بأذن لله الى 500000 الف ..
لكن يمكن اقللها شوي يعني نبدأ من فتحتين وحول 20 جهاز والله شفنا الشغل تمام صفقنا 4 فتحات ..

الشي الثاني:-
الإنترنت : وهذي مشكلة كبييييييرة بنسبه لي . .
لإن خايف نجيب شركة وتطلع لاقات في wow .. بس بفكر اروح احد المقاهي وحاول اكلم راعيها
اسأله عن الإنترنت <<< شكله بيعطيني معلومات كلها من جنبها علشان ما انافسه

من ناحية مواصفات الأجهزة ..
هذي اتوقع تشغل الألعاب من هنا الى بعد سنتين ..

طيب بقولك المواصفات الي براسي وش انت ..

mather borde: msi 915 compo صراحة ماذربورد حلو استخدمه حاليا .
ram:1024 DDR2
كرت الشاشة :
افكر 6600 جي تي رح يشغل كل الألعاب الي ذكرتها لك والي انت قلتها ..
والباقي يحلها ربك ..
بالنسبة لديكور .
افكارك . . حلوه بس لو تجينا كم فكرة ونشبكها بعض ان شاء الله تطلع حلوه ..

لا تخاف لك مني اكاونت من هنا الى سبعين سنه مفتوووح .. :)
ومشكور وماقصرت اخوي امجد

amajed

15-10-2006, 06:29 PM

بخصوص فتحتين بعدين 4 تتوقع بتحصل فتحتين زياده جمبك لما تبي تزيد :) ؟
ولا تنسى لما تاخذ الفتحه تشترط عليه عقد لاطول مدة ممكنه
بحيث انه مايزود عليك الاجار بعد سنه ! ومن ناحيتك تقدر تطلع باي وقت ! الشرط هذا لصالحك 100% واضنك عارفه من قبل :)

بخصوص البورد تعتبر ضعيفه نوعا ما ! اولا انت ماقلت شيئ عن المعالج ! فاذا تبي المعالج الي انا نصحتك فيه على البورد هذي فماراح يركب ! المعالج هذا له بوردات خاصه ! ولا يكفي النظر الى السوكت (المقبس) الخاص باللوحه لتتوافق مع المعالج
بالنسبة للرام فهي قليله للالعاب الخاصه بالسنه المقبله
فمثلا لعبة HALO2 الي بتنزل بعد كم شهر ! فترة قصيرة جدا ! وهالو2 تشوف النور ! اللعبه لها شعبية كبيره جدا تنافس CS و 1 جيجا لها قليله في حقها خصوصا ان الاجهزه راح تضل مشتغله بما لا يقل عن 8 ساعات متواصلة !
خذ بنصيحتي عشان ماتندم :)
بالنسبة لكرت الشاشه ! برضو نفس سبب الرامات ! HALO2 راح تعلق مع الكرت هذا تقريبا ! يبغالك تحط اللعبه على LOW عشان تشغلها !
والكرت الي نصحتك فيه ضعف سعر 6600GT :) لا تنسى ان 6600GT راح يدخل الى قائمة الفئة الضعيفه مع بداية 2007 يعني ابعد عنه ! لو بتشتريه كأنك تنظف السوق منه !

مواصفاتي للاجهزه معقوله وبتساعدك لاطول فترة ممكنه ! تطوير الاجهزة عمل يقص الظهر ويلعب في حسابات المحل لعب ! فلا تستهين فيه !

بالنسبة للانترنت فحسب دوراني في شركات الانترنت والافضل لمقاهي الالعاب فسيبيريا هي الافضل ! لكن لا مانع من السؤال ! فمافيه شيئ ينتصدق اذا كان الموضوع متعلق بالنت

وتكفى لا تكون الطاولات للاجهزة على شكل دوائر في المحل مثل بعض المحلات !
خلها مسطره والي يلعب يشوف الي جمبه بسهوله ! عشان التيم وورك والحاجات هذي
بصفتي زبون للمقاهي اكره اني اجلس بجهاز مايخليني اشوف الي جمبي ! تجيني ضيقة صدر ×_×
الي بيلعب ضدي يروح للسطر الثاني !

وبخصوص عدد الاجهزة لا بأس فيها جيده كبدايه ! لكن لا تنسى ان عدد الاجهزة وطريقة تصفيفها يبهر الزبائن اكثر ! فمحل ضيق واجهزه من المنظر يحس الواحد انها قليله راح يكره المحل :) فحاول تزودها شوي . بالنسبة لي كنت ناوي 24 لان الميزانيه مو ذاك الزود ! لكن بما ان ميزانيتك 3 اضعاف ميزانيتي فمايمنع انك تحط 34 جهاز ! وهو العدد الامثل في الشبكات :)

وبخصوص فتحتين و 20 جهاز راح يكفلك المشروع مابين 140 الى 180 الف !
المبلغ مايقارن بـ 500 الف حتى لو قللتها :)

ومن ناحية الاجهزة ! اقولها مره ثانيه ! اختر اجهزة قوية تساعدك على الصمود لسنوات من دون تغيير ! عشان لما تغيير بعد فتره طويلة راح يتحمس الزبائن لك ويزيد اعجابهم بالمحل ! لان الزبائن يتطلعون للامور هذي .
ولا تنسى ان بعد شهر راح تنزل الكروت الداعمه لـ DX10 وانصحك وبقوة تقني احدها ! الالعاب القادمه تقريبا كلها على DX10
و FarCry الي بتركبها انت راح تتخلها عنها مع وصول الجزء الجديد وهو Crysis وهي ايضا على DX10 وتتطلب مواصفات عاليه ! واقل كرت ممكن لتشغيلها هو 6600 مع معالج بسرعه 3000 فلا تتهور وتشتري مواصفات اقل الامكانيات :) ! ترا الزبائن يهمهم الشيئ هذا :)

بخصوص الديكور ماعندي والله ذيك الافكار خصوصا انه كان آخر مرحله في المشروع ثم وقفته لاسباب خاصه ! لكن تقدر مثل تسوي درجة وحده في بداية المحل وتكون فيها انوار اسفلها
او مثلا تخلي الاجهزة نفسها مضيئة باستخدام اضواء النيوم للاجهزة ! راح تعطي مظهر خصوصا ان المحل راح يكون مظلم نسبيا :) هناك ايضا لوحات مضيئة تعطي مظهر ممتاز للمحلات المظلمه ! وايضا استخدام الالمنيوم في تزيين طاولة الكاونتر (الاستقبال) ووضع زجاج راح يعطي انعكاس ملفت للمكان ! اشياء مثل هذي ! وماعليك من الديكور ! اسهل محل تحط فيه ديكور هو المحل الشبه مظلم ! لان مافيه عيوب تواجهك ! كلها انوار وادوات عاكسه فقط :)

(Ntada)

16-10-2006, 04:30 AM

اخوي امجد مشكوووور والف مشكووووور ..
لكن حصلت لي مشكلة ..
*_*
طبعا دائما الي يطيح مع شركاء يبلش ..
وانت تعرف انه كيف طالب في الجامعة بيجيب 500000 الف ريال ..
طبعا الشركاء هم اخواني ..
المشكلة الي صارت انه . . .
سألو اخواني كم واحد ..
انه كيف شغل المحل ..
طبعا حسب ماعرفت منهم .. انه قال لهم انه خساير محل الشبكة اكثر من ربحه ..
وهذا شي مرررررررره يخوف ..
طبعا غيرو رأيهم في هل فكرة ....
............
ولم يبقى من المبلغ سوى 120000 الف ريال ..
طبعا يعتبر مررررررررررره تحطيم ..
من افكار وتفكيرات ..
من هنا اخوي ابي اشوف ايش رايك ........
هل افتح فيها محل شبكة .. او محل متخصص في قطع الهاردوير وصيانة .. . .
يعني بدال هل حرامي ارض البرامج نجيب احسن من القطع تبعه ونبيعا ارخص بكثيييير منه ...
فأنت ايش رأيك .. ؟؟؟
رأيك مرررررررررررررره يهمني لأنك افكارك خياليه ..
×_+ طبعا انا مرررررررره خجلان منك .. لأني مررره تعبتك معي بس استحملني ....

Gentleman

16-10-2006, 04:33 AM

شخصيا .. اعتقد انه محل الشبكات او الكافيه .. يطلع ذهببب .. ولي يعرف شلون يشغل محله ويخليه مشهور ما اعتقد بيخسر .. والرزق من الله .. وما اوصيك بالدعاء ..

والله يوفقك ..

وشكرا ..

amajed

16-10-2006, 07:17 AM

اخوي تقدر تخلي اخوانك يعيدون النظر في الموضوع
لان فعلا محل الشبكات يطلع ذهب + الشبكات السنتين او الثلاث سنوات الجايه راح تكون الاكثر انتشار في الرياض وبتكون مثل جدة تقريبا
لو رحت جدة راح تفهم كلامي
محلات العاب شبكه يجي في المقهى الواحد فوق 100 جهاز !
وهذا ان شالله قريبا في الرياض كذا

فحاول تخلي اخوانك يعيدون النظر في الموضوع ! الموضوع فعلا مربح ! واي مشروع لابد من المغامره
على الاقل افضل من الاسهم
ربح وربح ثم خساره فوق الربحين كلها :)

بالنسبة لمحل الهاردوير برأيي صعب اساسا تجيب قطع قوية ! وثانيا القطع لو بتجيبها بتكون غاليه جدا
مافيه وكيل قوي في السعوديه
يعني الوكلاء هنا مايعرفون ان فيه كرت NVIDIA 7950 فحاول تنسى السالفه هذي الا اذا كان في بالك طريقة اخرى مثل الطلب من برا وكذا ! هنا يكون كلام ثاني
وبرضو لا تنسى ان فيه منافس لا بأس فيه وشهرته قوية والي هو باث ! صحيح ان مكانه مو ذاك الزود بس المحل شهرته قوية نسبيا :)

BeaUnkill

16-10-2006, 08:45 AM

تقريبا ً اؤيد اخي انس في الي قاله .

وبالنسبة للاجهزة فعلا ً ، الى يومك ما شفت محل يرضي رغباتي كلاعب PC .

--------

بالنسبة للانترنت فحسب دوراني في شركات الانترنت والافضل لمقاهي الالعاب فسيبيريا هي الافضل ! لكن لا مانع من السؤال ! فمافيه شيئ ينتصدق اذا كان الموضوع متعلق بالنت

فعلأ ً ، سيبيريا أفضل مزود خدمة للعبة WOW , وانا مجربه .. بس الاهم انه يكون اشتراكك عبارة عن اشتراك شركات وليس افراد .

وبالتوفيق في محلك ، وان شاء الله نزورك بصفتنا اعضاء المنتدى :D

والشكر موصول للاخ أنس * Amajed * على المتابعة والتعقيب =)

snoke

17-10-2006, 03:27 AM

شخصيا .. اعتقد انه محل الشبكات او الكافيه .. يطلع ذهببب .. ولي يعرف شلون يشغل محله ويخليه مشهور ما اعتقد بيخسر .. والرزق من الله .. وما اوصيك بالدعاء ..

والله يوفقك ..

وشكرا ..

انا اايد الأخ فيما قاله...لأني اشوف هذا الشي بعيني..أنا شخصياً لما أروح على محل شبكات أصرف أقل شي وهذا وقت الطفره 50 ريال..:أفكر: ويكون معاي 5 شباب ..يعني كلنا نصرف 250 ريال..هذا واحنا مطفرين. :Dفشوف كم واحد بيجيك وكم واحد بيدفع ...:33: نصيحة خلك على محل الشبكات..إن شاء الله بكون من اول الزبائن عندك إذا فتحته..لأني تعبت من محلات الشبكات التعابنه اللي أروحها...

سؤال للاخ amajed : أخوي في أي محل تلعب انت؟؟ لايكون القرش بس..:p

والسلام..

amajed

17-10-2006, 04:02 AM

العفو اخوي حسام ^^ واجبنا << يبي ساعات باي طريقة :p

================

هلا اخوي سنوك ! والله ماعندي مقهى معين اروح له ! لاني مارضيت بالمقاهي الي في الرياض ×_× تحس انها بايخه واجهزتها زفت !
لكن اروح لسستك ! العب فيه DotA مدري تعرف المقهى والا لا ؟ يكون في آخر طريق ابو بكر من جهة الجنوب
واروح لمقهى PC GAMES العب فيه DotA بعد ! ومكانه مع مخرج 11 اتجه شرق ثاني اشاره يمين ! اول اشاره وقف على جمب وتحصله قبالك

مقهى سستك سيئ من ناحية التصميم والاجهزة ! لكن اروح له لاني اعرف ناس هناك والعب معهم :)
مقهى PC GAMES ممتاز من ناحية التصميم ويعتبر سيئ من ناحية الاجهزة
كان شاريها من 4 سنوات ووقتها كانت ممتازة ! لكن ماطورها للحين للاسف ×_×

رحت لي كم مقهى ثاني وكانت ممتازه لكن مااحب اروح لمكان مااعرف فيه احد !! خلني على الي اعرفهم ابرك لي ^^

ولو تعرف مقهى يلعب العاب استراتيجية بشكل جيد مثل جنرالز او بفمي 2 لا تبخل علي :)
ولو اني متأكد ان مافيه احد يلعبها في المقاهي
السبب جنرالز قديمه
وبفمي 2 قوية على اجهزتهم ^^

يالله الشكوى لله واملنا في اخونا ntada

snoke

17-10-2006, 07:38 AM

amajed

17-10-2006, 03:15 PM

انا مو قصدي فيه يعني مثبتينها على اجهزتهم
انا قصدي فيه ناس تلعب الالعاب هذي في المقهى والا لا :) ؟

snoke

18-10-2006, 03:06 AM

انا مو قصدي فيه يعني مثبتينها على اجهزتهم
انا قصدي فيه ناس تلعب الالعاب هذي في المقهى والا لا :) ؟

والله نادر ما أشوف ناس يلعبوها...يعني انت عارف انه مافي ناس كثير يحبون هذه الألعاب..علشان اغلبهم ما يفهمها..

والسلام

(Ntada)

01-11-2006, 12:36 PM

هلا والله اخواني ..
اسف على التأخير بس جاتني ظرووووف قاهره ..
اوكي نرجع للموضوع ..
.........
حاولت اقنع من رفضوا وان شاء متفائل خير ..
المهم ياشباب ...
نبي موقع حلو حتى الآن مالقيت ولا موقع ..
يستاهل .. .. تكفون شباب احتاج لموقع .. حتى الآن مالقيت

(Ntada)

01-11-2006, 12:37 PM

وبمناسبة ..
الحديث عن الإنترنت ..
سألت عن الإنترنت اكتشفت انه لازم احط اشتراك شركات يكلف تقريبا 2000 ريال للشهر ..
علشان كذا تقريبا نبي نكسل الفكرة حاليا الى مانتفدم ششوي ..

amajed

01-11-2006, 01:15 PM

wb

ايه صحيح لازم اشتراك شركات و 2000 ريال هذي سرعه قليله بعد :) يعني في الالعاب يمكن ماتنفعك
بالنسبة للموقع والله مدري مااقدر افيدك

فيه مواقع حلوه مثل الشارع الي يكون عليه اسواق الجزيره
هناك فيه تجمهر شبابي قوي :)
لكن مااضن بسهوله تحصل فتحه فاضيه

وفيه في حي الروضه تقريبا على مخرج 11 تقريبا حول اتصالات الروضه الشباب فيها كثير وفي نفس الوقت عدد مقاهي الالعاب لا بأس فيها في ذيك المنطقه
اعرف في 4 مقاهي حول بعض وكلها ماشالله تمتلي ! لو تجرب هناك ممكن حلو
الغبهم يلعبون كاونتر ودوتا
وفيه الي يلعبون wow لكن لازم نت :)

على العموم الموقع صعب تختاره وانا معك في النقطه هذي لكن هذي المناطق الي انا انصح فيها وان شالله تحصل مواقع افضل :)

بالتوفيق :)

CyBorG

01-11-2006, 07:56 PM

السلام عليكم ورحمة الله
بالنسبة للموقع, انا أقول: لا تبعد عن العليا..:D
زي ما قالو الشباب إن الروضة مليانة, وما أعتقد إنها فكرة حلوة إنك تفتح هناك..
لكن في العليا ما فيه إلا محلين أو ثلاثة, ولو فتحت محل بالإمكانيات اللي قالو لك الشباب عنها, إن شاء الله ما تخسر..
ثاني شي موضوع النت, من اللي سمعته إن البلدية تسوي مشاكل وقلق إذا حاولت تاخذ رخصة نيتورك و إنترنت..
وفي كل الأحوال لا تنسى تصلي الإستخارة قبل ما تقرر..
الله يكتب لك الي فيه الخير..

أخوك حسام..

BeaUnkill

01-11-2006, 10:47 PM

* يا حبي لهالمستخدم اعلاه D= *

يا ولد وين اراضيك ؟ بالسعودية ؟!

وحمدلله على سلامتك مقدما ً

Luv CyBo

D=

الـخــــارق

02-11-2006, 03:51 PM

اخوي natada ما ادري فكرة في الشيءهذا او لا ..
لكن ليش ما تجيب أجهزة كونسل (Xbox و Xbox 360 )
اولا هي بتكون أرخص لك في الشراء ( 600 ريال للأول - 1700 للثاني )
خاصة ان الـ Xbox 360 مواصفاته عالية وفيه ألعاب قوية قادمة فيها مولتي بلاير قوي..

ممكن تشتري 24 جهاز Xbox 360 بسعر أقل بفارق ملحوظ من انك تشتري أجهز PC قوية ..
خاصة انه الـ Xbox 360 يشغل ألعاب قوية بتكلفك أكثر لو أردت تشغيلها على أجهزة الـPC ..

انت ممكن تجيب في البداية 10 أجهزة كونسل وبعدين تزيد العدد اذا لاحظت ان فيه اقبال كبير ..

الأمر طبعا في النهاية راجع لك :)

CyBorG

03-11-2006, 04:50 AM

Halaa wallah a5oy 7sam..:)
wsh a5bark ya walad?
la wallah ana mneeb fee el KSA, Still in Australia..:(
Anyway, This is my email:
hammett37@hotmail.com
Add me..;)
See ya soon bro..:biggthump

ابوزاهد

03-11-2006, 05:31 PM

السلام عليكم ورحمة الله وبركاته
اقول يا بعدي انا لي تجربة مع محلات الشبكات مدة سنتين واكثر

ونصيحة اخوية حطها في باللك ولا تغيب عن خيالك

لازم تبدا قوي وقوي جدا يعني انصحك تجيب اشتراك نت سريع جدا تحمل في البداية حتى لو كان فيه شوية خسارة وان شاء الله ما يحصل اي خسارة

والكروت انصحك وبقوة انك تجيب من 7600 جي تي وطالع والرام لايقل عن 2048

وبهذه الطريقة انت ضربت عصفورين بحجر العصفور الاول انك خليت اجهزتك خرافية
ما راح توقف اي لعبة قدام جهازك في الوقت الراهن وباعلى المواصفات والعصفور الثاني انك راح تذهل الزبائن اللي تفهم واللي انت تخطط لاستحواذهم .
طبعا بهذه الطريقة تكون انت با بعدي سويت لنفسك بداية قوية وسمعتك راح تتنشر
وبهذه الطريقة راح تصبح سمعتك الى ان يشاء الله انك قوي وانك رهيب حتى مع الزمن بعكس انك تكون في البداية وسط وبعديت تطور حالك لذا يجب انك في البداية تكون بيرفكت وبعدين تفكر شلون تقتصد بالمصاريف دون ان يحس زبونك بشيء .
وانصحك انك تكون انت اللي تاثر بزبونك يعني انت اللي تصنع للعبة شعبية من الاخر يعني انك تشكل زبونك وتعجنه مثل ما تبغى ولازم تفاجاه بالعاب ما عمره جربها
يعني انا استغرب انك ما حطيت لعبة call of duty 2
من اهم العاب المالتي بلاير ولها شعبية جارفة جدا وعندي في المحل هي المتسيدة بجانب العاب سباق السيارات
موست ونتد واندر جراوند 2 وقريبا كربون
وكمان لاتنسى العاب الرياضية اقصد سلسلة العاب فيفا ووننيج الفن
لهما شعبية جارفة ولاتنسى توفر جويستك في المحل ترى فيه ناس كثير ما يستغنون عنهم خصوصا عشاق الكرة
واخيرا اهتم ببعض الامور مثل جودة الكي بورد والسمعات والماوس
تاثيرهم رائع جدا
اخير الموقع انصحك نصيحة اخوية ومن القلب المكان يكون قريب من اماكن سكن طلبة الجامعات
يعني اللي جاين من برا الرياض او حاول تجذبهم تراهم فاضين ما عندهم الا الدراسة الصبح ووبليل
على المقاهي او في مقاهي العاب
حاول تكسبهم وخل عدد الاجهزة 20 بس على اعلى مستوى واذا لقيت انه الطلب اكثر من 20 فا زود
وكيف تعرف يعني اذا صار عندك ال20 جهاز كومبليت وفيه ناس واجد تجي تسال على مكان فاضي
اذا الوضع ممتاز زود على بركة الله
واذا لقيت انه العدد مناسب فا اكتفي بهذا القدر
واذا بغيت اي خدمة انا جاهز

اهم شيء " اصنع زبونك بطريقتك "
والمعاملة الجيدة والود والترحاب والتفاعل معهم في اللعب يجعلك محبوبا جدا حتى لو كانت جودة اجهزتك اقل من اماكن اخرى سيفضلونك لانك محبوبا بينهم
وسلامتك

دختر فرانسوا

03-11-2006, 08:05 PM

مدري ... بس في أحد راح النتوورك اللي في جده؟

في اثنين مرة متميزين, الساعة بـ5 ريال .. DSL 1 Mega ... كل الألعاب اللي في بالك ..

واحد منهم فيه 300 جهاز عدا و نقدا, بدون مبالغة أبدا.

(Ntada)

04-11-2006, 07:32 PM

مرحبا وبعد عودة طويلة لأسباب الله بها عليم ..
الله يعينكم على بربرتي .....
امجد : اخ يا امجد من جد اكثر انسان متعبك معي هو انا .. اخوي بعد الفرارة في هل الرياض
والحوسه ودوسه .. لا لقيت في المروج ولا عند اسواق الجزيرة .. لقيت حول العقارية بس الإيجار
غالي مررررررررررررررررررررره .. لا وفتحه واحده ..
حسام : ياخلفهم .. المواصفات مقدوووور عليها لكن البلاء الموقع .. بالنسبة لنت هذي طريقتها سهله
لأن مارح يشتغل النت الا على wow وحقين البلدية وش دراهم اني حاط نت !! *_*
الخارق : والله ياخوك فكرة لا اتوقع لها اي نجاح هل ايام .. عموما مشكور على مشاركتك

(Ntada)

04-11-2006, 07:35 PM

ابو زاهد : خصصتلك رد لحالك بما ان لك خبرة ..
عموما اخوي الموقع داء مرره كبير ..
سأعمل بنصيحتك . . . لكن ادعيلي اجيب موقع زي الناس عموماً من هنا الى ان اجد موقع
ممتاز بقولكم كل جديد يصير علي

دختر فرانسوا :
إن شاء الله المحل الي بفتحه رح يحط جده كلها وراه

عـPS2ـاشق

05-11-2006, 02:13 AM

نصيحنتي لك أخوي أدرس مقاهي الألعـــاب قبل لا تبدأ

أنــا شخص مجرب مقاهي الريـــاض كلهــا ولاكن أفضل البيت أحسن من المقهى ليه ؟؟

مــافيه شئ يشجع بالمقهى 20 جهــاز وإذا ضربتهــا الحمى 40

بس إذا رحت جدة يا سلالالام أخذ لي براد شــاي أبو 10 ريــال ولا ثلاجة من البيت وبيالة شــاهي وأدعس على مقهى اسمه جيم نت طبعاً عدد الأجهزة فوق 200 جهــاز ولا مشــاء الله فل يبيلي أحجز قبل لا أحرك من البيت على أمل أحصل مكــان ..

هذا بالنسبة للمميزات

الموقع يكون وسط حـــارة يعني زي المقهى المذكور أعلاه وسط حــارة حتى إلى يوصفك راح تضيع ولاكن لو تسأل إلى على بعد 5 كيلو من المقهى يدلك عليه ويكون قريب من مسجد وهو الأهم لأوقــات الصلاة ..

ولاتنسى إذا دخلت للمقهى تحصله دور ثاني حاجز دور كامل يعين راح تضيع بالمقهى ،،

بالنسبة للأجهزة والمواصفات أتوقع الشباب وخاصة أمجد كفى ووفى يبيلك مواصفات تخلي إلى شغال على الجهــاز ينام على الكيبورد ولا عاد يقوووم ويطحن باللعب ولا يطفش من تقطيع وغيره

ونجي عن الإتصــال وهو المهم لأن نجاح أي مقهى من إلى شفتهم وبعد مقارنة سويتهــا لـ 2 مقاهي في جدة تعتبر الأكبر بالسعودية واحد فيه إتصال والثاني بدون إتصال تحصل الزحمة أكيد عند إلى عنده إتصال ،،،

لتشتغل معضم الالعـــــاب ومو شرط الألعــاب تكون أصلية على جميع الأجهزة (( فهمت قصدي ))

وبالنسبة للألعــــــــــاب وهي الأهم لأن الأذواق تختلف ولا تقيد أو تقتصر المقهى على لعبة معينة يعني حط جميع الألعـــاب حتى لو سنجل بلير ماعندك مشكلة ،، أعرف ناس يجون يلعبون كذا على السجل بلير مع إن فيه نــاس يلعبونهــا لوكل ،،،

ونأتي على التصميم والديكور المقهى أي شئ بالديكور ترى يمشى إلى إذا أنت تبي تحط لمسه خاصه فيك ،، وكمـــان أقترح عليك تحط بوفية داخلية توفر الأكلات السريعة والمشروبات وعمــال نظافة فوق 4 بالشفت الواحد وفني صيانة كل 6 ساعات + 2 كاشير بالشفت الواحد وعلى ذلك لا ننسى دورات المياة وهي الأهم إذا تبي راحة الزبون ،،،

وبالختام برنامج مدير مقهى قوي ويحفظ حقوقك كاملة من التلاعب حتى ولو في الدقيقة الواحدة ،،
مثال : Netcraft بس غالي نوعاً ما ولاكن هو الأفضل بحيث تعرف دخلك وأنت بالبيت وراح تعرف كل شئ لما تاخذه من شركته ،،،

وأتمنى من الله إنني وفقت ولو بالقليل في فائدتك
ولاكن نصيحة أخيرة إذا بدأت فبدأ بقوة وأضرب الجميع ولتكن لك بصمتك بالرياض ،،

الميزانية للمشروع تقريباً : 600000 ألف ريال

وبالتوفيق

جميع حقوق برمجة vBulletin محفوظة ©2025 ,لدى مؤسسة Jelsoft المحدودة.
جميع المواضيع و المشاركات المطروحة من الاعضاء لا تعبر بالضرورة عن رأي أصحاب شبكة المنتدى .