المساعد الشخصي الرقمي

مشاهدة النسخة كاملة : خواطر و نثر -- كتابات غير مكتملة --


Ahmed Blight
07-06-2007, 10:54 AM
السلام عليكم
كيف الحال جميعا :)

كنت متردد هل افتح موضوع في القسم او لا كوني من فترة طويلة ما كتبت خاطرة كاملة ^^" و الي كاتبه تقريبا مو خاطرة , انا كنت ابغي اكتبه على اساس شعر بس هو يطبع عليه اكثر طابع الخواطر يمكن لعدم إالتزامه ببعض اساسيات الشعر العادي @@ , سو مادري ايش ممكن يعتبر بس ما تفرق معي شعر او خاطرة الموهيم تظل كتابة :09:

اني واي حبيت اعرض مجموعة كتابات متفرقة و مقاطع قد ما ترتبط ببعضها , كنت فترة الي انتظر متى تبدأ المحاضرة في الجامعه احاول اكتب اي شيء عشان يمر الوقت و تبدأ المحاضرة :09:

_____________________________________________

6-6-2007

(مثل ما قلت هي كتابات متفرقة قد لا تكون لها بداية فعلية بس مجرد الي يجي في بالي اكتبه , هذي الكلمات كتبتها بس عشان اليوم الي قبلها كنت سامع اغنية تعبر عن فكرة مماثلة فجاء في بالي اكتب كلام عنها :09:)

كنت أعدك اخو و صديق و مكانك في قلبي محفور على سطوره

بس للأسف حتى ذكراك ما عادت لها و لا بقايا محفوره

يا ريت كان قلبك من القلوب إلي تخون مجبوره

يا ريت كان قلبك يحس بجروح غيره

بس افا طلعت من إلي ما يتأثر بشوفت مشاعر الغير مكسوره

كنت معاك و و كنت معاي لما الفرح ينثر بذوره

وكنت معاي و كنت معاك لما الحزن يقتل زهوره

ما توقعتك تخون و تجرح و تنسى الهوى و بحوره

و لا ظنيتك تكسر صورتك في قلبي و تمسح الوفا من جذوره

خلاص روح و ابتعد عني و أنا رايح و تارك لك ذكرى صارت مهجوره

و اعتبر هذا آخر كلام أكتبه لك في قلبي و هذا أنا ماسح سطوره

___________________________________________

30-5-2007 الى 5-6-2007

(هذي كتابات مبعثرة بعضها مو مرتبطة بشكل صح كتبتها في الفترة المحددة :09: و كالعادة قبل 15 منت من احدى محاضراتي XD )

كفاية عذاب و إذلال
كفاية جروح مهما احاول ما تنزاح من البال
اذكر لي يوم حن في قلبك و سأل عن الحال
_____
تقدر تنسى شكثر حبيتك و اني عشانك بعت راحة البال
كنت في حياتي دايم بدر مو مثل الدنيا مرة فيها بدر و مرة فيها هلال

*~~~~~~~~~~~*

كثر ما نحب و كثر ما نحاول
كثر ما القلوب للهوى تشتاق

كثر ما نعشق و كثر ما نهوى
كثر ما المشاعر ترسم لنا صفحة عشاق

قلت أحبك و قلت أهواك تظن اني اقدر أنساك
لساني يقول أموت في هواك
و قلبي على مراسيه دوم يتمناك

ممكن تجي لحظة أضعف فيها و أقول خلاص بنساك
تلقى لساني لقلبي يقول كيف تحب من ما عمره رواك

بس يرد القلب و يقول مو كل ماي يروي بصبه الذبلان
اهو خاف .. اهو خاف يرويني و يزيد ذبلاني ذبلان
قال اخليه مثل ما هو يبكي و يصيح عطشان
و لا أرويه بماي يسمه و ينهي كل شوق و وجدان

*~~~~~~~~~~~*

حسبت البحر شوق يضرب بموجه - حاسب انه يعذب بلطماته الشطآن

ما درى أن القلب ماتت اشواقه - و في فرق بين ميت و ضميان

يوم كنت أتريا مده و جزره - خذلني مثل ما تخذل سحابه رجا العطشان

ضاعت الاشواق و ماتت قلوبها - توك تجي تناديني بعد ما صرت في طي النسيان

___________________________________________
حلزونه
07-06-2007, 12:46 PM
السلام عليكم والرحمه ^^
كيف الحال والتحوال ..^^..

ماشاء الله لوس كلماتك رووعه
اول كتابة عجبتني بالكامل :biggthump




لساني يقول أموت في هواك
و قلبي على مراسيه دوم يتمناك



كمان شي شي هالعبارات :D
عجيييبه منك لووس ^^

الله يوفقك ويسهل عليك امورك
بالتوفيق ان شاء الله :أفكر:

جاااناا ^^
~*RoSaMaRia*~
07-06-2007, 02:41 PM
وعليكم السلام والرحمة والاكرام ..من غير مقدمات ادري انو الكل بخير :09:
سو نخش في صلب الموزوع ...اولا انا بعلق على الاولى فقط ..
وحبيت اقول انو عادي الكتابة ما تكون خاطرة او شعر ...
اهم شي يكون فيها احساس ...ترا نا اغلب كتاباتي تكون من النوع اللي يجمع بين الخاطرة والشعر ..
يبغى لنا نرتبه ونعدله ونطلع نوع جديد من انواع الكتابة ...وبكون انا الرائدة حقته ..هع ..
اقترح تسميته الاسلوب الروزي في الكتابة ...:09:


كنت أعدك اخو و صديج و مكانك في قلبي محفور على سطوره
بداية هادية وحلوة ...جا وراها التسلسل والتدرج في وصف عمق وقوة الموقف او الحالة ...عجبني هالاسلوب ...

بس للأسف حتى ذكراك ما عادت لها و لا بقايا محفوره
انا اقول كلمة محفورة ما تتناسب مع الموقف ولا مع كلمة بقايا ...
يعني البقايا تكون شي منمسح او قليل جدا ..فكيف رح تكون محفورة ..؟
انت عشانا تبين لهذا الشخص انه ما عاد له وجود في قلبك ...
رح تقول له ما عاد لك بقايا مطمولة او مدفونة ...
وخاصة انك استخدمت محفور في البيت الاول للدلالة على عظم مكانة هالشخص ...فلما تجي تعاتبه تبغى تبين له انه هالمكانة راحت ...
انا فكرت في كلمة مناسبة بس ما لقيت غير كلمة ما اتوقع انها مناسبة لكن رح توصل لك قصدي ..وهي كلمة " بقايا مبتورة " ...
يعني حتى بقايا مقطوعة وما لها تكملة ما بقت لك في قلبي ..
ذا رايي وانت واللي تشوفه عاد ...

يا ريت كان قلبك من القلوب إلي تخون مجبوره


يا ريت كان قلبك يحس بجروح غيره


دخول جميل ...عجبني فيه اللوم وتأنيب الضمير اللي ما كان بشكل صريح ...انما بتلميح ...

بس لو كنت زايد كمانا جملة ثالثة تبتدي بكلمة ياريت كان قلبك ...
بيكون اقوى تأثيرا ...

بس افا طلعت من إلي ما يتأثر بشوفت مشاعر الغير مكسوره
عجبني وضع كلمة افا ..مرررة في محلها وعطت للعبارة قوة وعمق ...

كنت معاك و كنت معاي لما الفرح ينثر بذوره


وكنت معاي و كنت معاك لما الحزن يقتل زهوره


حلووووو مرة عجبتني حركة تغيير الضماير في البيتين

" معاك / معاي " ..
عندي هينا نقد ولو اني ما ابغاك تاخذه في عين الاعتبار ..
ليه ؟ لانو اغلب القراء خاصة اللي يقرا بدون تأمل مرح ينتبهو ..
بس كلمة زهوره والحزن ....هل الحزن له زهور ؟
لماذا يقتل زهوره طيب ؟ على الفرض قصدك بالزهزر هي بذور الفرح اللي وصفتها في البيت اللي قبل بعد ان نمت ..
الا تحس بانو تشابه الصياغة من اجل المحافظة على وزن واحد ..
يسبب تشويش في المعنى وسوء فهم ؟
وعلى كل حال ..انا حسيتها مررررة نايس وراكبة ...
وزي ما قلت لك قليل اللي يركزو في هالامور سو ما احس انها مشكلة او ضعف في الشعر ...

ما توقعتك تخون و تجرح و تنسى الهوى و بحوره


و لا ظنيتك تكسر صورتك في قلبي و تمسح الوفا من جذوره


كمانا نااايس ..بس لو بدال كلمة تمسح الوفا ...

تجيب كلمة تتناسب مع الجذور لانو الجذور لا تمحى ...
مثلا تقلع الوفا او شي زي كيدا ...والقلع نفس قوة المسح بل ربما اقوى ...
انت لما تقتلع شي من جذوره كنك تستأصله خلاص ...بينما تمسح الشي ربما تبقى فيه امور لم تمح

خلاص روح و ابتعد عني و أنا رايح و تارك لك ذكرى صارت مهجوره
جميل كختام لكل هالابيات السابقة ...بس كلمة " صارت " احسها تطول الجملة وتقدر تستغني عنها عشانا يصير التركيز بس على كلمة روح وخلاص وابتعد ...اي الفراق والصد

و اعتبر هذا آخر كلام أكتبه لك في قلبي و هذا أنا ماسح سطوره
حلووووو ...عجبني الاستدراك " هذا نا ماسح سطوره " ...
قوي جدا ويحطم بالحيييل ...<<< لو كان خطاب لي كان متت قهر :09:
الموهيم ...هذا رايي ..على المقطع الاول ...
برجع اقول رايي في المقاطع الثانية اذا فضيت <<< لانو السبت اختبارات الوزارة :02:
واهلين بيك في قسمـ "ـي " نورتنا ..:09:
sweet Mio
07-06-2007, 03:50 PM
مرحباااا
خوااطر يا الله نفسي اقرا مليون خاطره وخاصه هالايام
سو نااايس انك كاتب موضوع خواطر عشان اشوف مهارتك بالتعبير
اذكر مرة رديت على خاطره لك كانت مدمرة وبقووووووووووووة
المهم


كنت أعدك اخو و صديق و مكانك في قلبي محفور على سطوره

بس للأسف حتى ذكراك ما عادت لها و لا بقايا محفوره

يا ريت كان قلبك من القلوب إلي تخون مجبوره

يا ريت كان قلبك يحس بجروح غيره

بس افا طلعت من إلي ما يتأثر بشوفت مشاعر الغير مكسوره

كنت معاك و و كنت معاي لما الفرح ينثر بذوره

وكنت معاي و كنت معاك لما الحزن يقتل زهوره

ما توقعتك تخون و تجرح و تنسى الهوى و بحوره

و لا ظنيتك تكسر صورتك في قلبي و تمسح الوفا من جذوره

خلاص روح و ابتعد عني و أنا رايح و تارك لك ذكرى صارت مهجوره

و اعتبر هذا آخر كلام أكتبه لك في قلبي و هذا أنا ماسح سطوره


الاغنيه اللي كنت تسمع لراشد الماجد لان فكره الخاطره هي نفسها بالضبط فكره الاغنيه واظن يا ربي هي "توصي شي" صح ؟؟؟ مادري بس انا احس ان الاغنيه لراشد
بصراحه عجبني هالمقطع حيييييييييييل وتعبيرك ما شاء الله روووعه تقدر توصل الفكرة والشي اللي بخاطرك
احساسك عجبني واايد فيها
مثل المكسور من شخص عزييييز وقريب من القلب وهذا شعور بصراحه صعب واايد


كفاية عذاب و إذلال
كفاية جروح مهما احاول ما تنزاح من البال
اذكر لي يوم حن في قلبك و سأل عن الحال

يا الله اخااف اقرا هالكلام والله ياثر علي وهذي المشكله
تعجبني المقاطع الصغيره وتكون معناها كبير وله اثر قوي عالقارئ


تقدر تنسى شكثر حبيتك و اني عشانك بعت راحة البال
كنت في حياتي دايم بدر مو مثل الدنيا مرة فيها بدر و مرة فيها هلال


لا تعليق لانه رووووووووعه


ممكن تجي لحظة أضعف فيها و أقول خلاص بنساك
تلقى لساني لقلبي يقول كيف تحب من ما عمره رواك

صح صح صح والله
الي يحب مستحييييل ينسى وكل انسان يمر بلحظه ضعف وكسر لكن اكيد بيرجع لبيته ولقلب حبيبه
وباقوى من السابق لانه مليان شوق وحنين
هالمقطع عجبني وايد وايد وايد وايد ما تدري شكثر له تاثير
بس اكتفي بجذي اخاااف اتهور


بس يرد القلب و يقول مو كل ماي يروي بصبه الذبلان
اهو خاف .. اهو خاف يرويني و يزيد ذبلاني ذبلان
قال اخليه مثل ما هو يبكي و يصيح عطشان
و لا أرويه بماي يسمه و ينهي كل شوق و وجدان
شنو هذاااااا
والله كل مقطع اروووع من الثاني ومعناه كلمه رهيييب شوي عليه
تعرف اني ما اجامل واكره اجامل وردودي عالخواطر تكون من نوع ثاني وصااادق وبقوة لوول >> ما تتغشمر اهني
بس لو ما ريوته يمكن يموت والموت من بعد الحبيب افظع من الموت مسموم ف لو رويته كان ارحم >> وجه نظر خاصه فيني


حسبت البحر شوق يضرب بموجه - حاسب انه يعذب بلطماته الشطآن

ما درى أن القلب ماتت اشواقه - و في فرق بين ميت و ضميان

يوم كنت أتريا مده و جزره - خذلني مثل ما تخذل سحابه رجا العطشان

ضاعت الاشواق و ماتت قلوبها - توك تجي تناديني بعد ما صرت في طي النسيان
لا لا انا اخااف من هالكلام وبقوة ف ما رح اعلق عليه ><"

بصراحه موضوع رووووووووووعه وخوااطر رهيييبه
موفق
سي ياااا
Ahmed Blight
07-06-2007, 05:17 PM
السلام عليكم والرحمه ^^
كيف الحال والتحوال ..^^..

و عليكم السلام فيتو ^^
انتي الي كيفك ؟ من زمان ما نشوفك مبينة ^^
و مبرووك لون الرقابة >> سوري ما باركنا على اللون القديم ^^"


ماشاء الله لوس كلماتك رووعه
اول كتابة عجبتني بالكامل :biggthump


هذا من ذوقك ولله ^^ تفاجأت بردك خخ ما توقعتك عدتي تدخلي القسم :09:


كمان شي شي هالعبارات :D
عجيييبه منك لووس ^^

^^" ميرسي :)



الله يوفقك ويسهل عليك امورك
بالتوفيق ان شاء الله :أفكر:

جاااناا ^^


و يوفقك كمان ^^ المفروض خلصتي امتحانات اور وات ؟
ميرسي على الطلة الحلوة و الله لا يحرمنا منها sis ^^

مع السلامة
Ahmed Blight
09-06-2007, 12:09 AM
وعليكم السلام والرحمة والاكرام ..من غير مقدمات ادري انو الكل بخير :09:
سو نخش في صلب الموزوع ...اولا انا بعلق على الاولى فقط ..
وحبيت اقول انو عادي الكتابة ما تكون خاطرة او شعر ...
اهم شي يكون فيها احساس ...ترا نا اغلب كتاباتي تكون من النوع اللي يجمع بين الخاطرة والشعر ..
يبغى لنا نرتبه ونعدله ونطلع نوع جديد من انواع الكتابة ...وبكون انا الرائدة حقته ..هع ..
اقترح تسميته الاسلوب الروزي في الكتابة ...:09:


اهلين روزا خخخ ^^
ما شاء الله تعليق مثل الي توقعته منك:09:
و ليش اسميها الاسلوب الروزي :09: كذا تاخذي كل الفايدة لك لازم انا استفيد ^^"
اني واي نعلق على تعليقك





بداية هادية وحلوة ...جا وراها التسلسل والتدرج في وصف عمق وقوة الموقف او الحالة ...عجبني هالاسلوب ...



يعني اوكي البداية ^^



انا اقول كلمة محفورة ما تتناسب مع الموقف ولا مع كلمة بقايا ...
يعني البقايا تكون شي منمسح او قليل جدا ..فكيف رح تكون محفورة ..؟
انت عشانا تبين لهذا الشخص انه ما عاد له وجود في قلبك ...
رح تقول له ما عاد لك بقايا مطمولة او مدفونة ...
وخاصة انك استخدمت محفور في البيت الاول للدلالة على عظم مكانة هالشخص ...فلما تجي تعاتبه تبغى تبين له انه هالمكانة راحت ...
انا فكرت في كلمة مناسبة بس ما لقيت غير كلمة ما اتوقع انها مناسبة لكن رح توصل لك قصدي ..وهي كلمة " بقايا مبتورة " ...
يعني حتى بقايا مقطوعة وما لها تكملة ما بقت لك في قلبي ..
ذا رايي وانت واللي تشوفه عاد ...


انا في هذي الجملة روزا قصدت البقايا هي بقايا ذكريات و الذكريات تنحفر في القلب او المخ فانا قلت و لا بقايا منها عادت محفوره ^^"
بس كمان حلوة كلمتين بقايا مبتورة ^__^





دخول جميل ...عجبني فيه اللوم وتأنيب الضمير اللي ما كان بشكل صريح ...انما بتلميح ...

بس لو كنت زايد كمانا جملة ثالثة تبتدي بكلمة ياريت كان قلبك ...
بيكون اقوى تأثيرا ...


يب ربما معك حق ^^
بس انا كنت اكتب قبل المحاضرة يعني كانت كلها 30 منت او اقل ما كان في مجال اكتب كثير :09:



عجبني وضع كلمة افا ..مرررة في محلها وعطت للعبارة قوة وعمق ...



^__^ كلك ذوق




حلووووو مرة عجبتني حركة تغيير الضماير في البيتين

" معاك / معاي " ..
عندي هينا نقد ولو اني ما ابغاك تاخذه في عين الاعتبار ..
ليه ؟ لانو اغلب القراء خاصة اللي يقرا بدون تأمل مرح ينتبهو ..
بس كلمة زهوره والحزن ....هل الحزن له زهور ؟
لماذا يقتل زهوره طيب ؟ على الفرض قصدك بالزهزر هي بذور الفرح اللي وصفتها في البيت اللي قبل بعد ان نمت ..
الا تحس بانو تشابه الصياغة من اجل المحافظة على وزن واحد ..
يسبب تشويش في المعنى وسوء فهم ؟
وعلى كل حال ..انا حسيتها مررررة نايس وراكبة ...
وزي ما قلت لك قليل اللي يركزو في هالامور سو ما احس انها مشكلة او ضعف في الشعر ...



لما انا كتبت وضعت اقواس اشرح شيئين ممكن يكونوا غامضين و كان منها هذي الجملة
بس لما اعطيتك طبيعي مسحت ما بعد الاقواس
زهوره هنا عايده على بذور الفرح انا عملته كتعاقب الفرح و بذوره و الي راح تكون في السطر الثاني على اساس صارت زهوره فالحزن قتل زهوره و هي زهور الفرح






كمانا نااايس ..بس لو بدال كلمة تمسح الوفا ...

تجيب كلمة تتناسب مع الجذور لانو الجذور لا تمحى ...
مثلا تقلع الوفا او شي زي كيدا ...والقلع نفس قوة المسح بل ربما اقوى ...
انت لما تقتلع شي من جذوره كنك تستأصله خلاص ...بينما تمسح الشي ربما تبقى فيه امور لم تمح


يب يب اكيد روزا بس المسح يكون صيغة مبالغة لان المسح اقوى من القلع
المسح نهائي بعكس القلع يظل الجزء باقي



جميل كختام لكل هالابيات السابقة ...بس كلمة " صارت " احسها تطول الجملة وتقدر تستغني عنها عشانا يصير التركيز بس على كلمة روح وخلاص وابتعد ...اي الفراق والصد



اها معك حق ^^ ميرسي على الملاحظة




حلووووو ...عجبني الاستدراك " هذا نا ماسح سطوره " ...
قوي جدا ويحطم بالحيييل ...<<< لو كان خطاب لي كان متت قهر :09:
الموهيم ...هذا رايي ..على المقطع الاول ...
برجع اقول رايي في المقاطع الثانية اذا فضيت <<< لانو السبت اختبارات الوزارة :02:
واهلين بيك في قسمـ "ـي " نورتنا ..


ههههههههههههه ميرسي جدا على ردك :) , و سوري تعبانكي في التعليق :09:
ان شاء الله المرة الجاية خطاب لك عشان تموتي قهر :09: >> خخ امزح
لوول موفقة في امتحانتك روزا ^^

:)
~*RoSaMaRia*~
10-06-2007, 10:06 PM
نوت : انا كتبت رد يوم الجمعة بس في نفس الوقت اللي علق المنتدى ...:31:

كنت في حياتي دايم بدر مو مثل الدنيا مرة فيها بدر و مرة فيها هلال
تشبيه أكثر من رائع السراحة ابداع ...أفضل تشبيه شفته لك ...
وأخيرا قدمت لنا تشبيه حلو غير خرابيط الفراشات ومدري وشو :09:

كثر ما نحب و كثر ما نحاول
كثر ما القلوب للهوى تشتاق
كثر ما نعشق و كثر ما نهوى
كثر ما المشاعر ترسم لنا صفحة عشاق
حركة " كثرا ما " جميلة ...تعجبني انا حركة تكرار المطلع في اكثر من جملة متتالية لانه يعطي عمق وقوة للمعنى المطلوب غير الموسيقى الحلوة اللي يضفيها على الكلام ...

بس يرد القلب و يقول مو كل ماي يروي بصبه الذبلان
اهو خاف .. اهو خاف يرويني و يزيد ذبلاني ذبلان
قال اخليه مثل ما هو يبكي و يصيح عطشان
و لا أرويه بماي يسمه و ينهي كل شوق و وجدان
مدري ما عجبني هالمقطع ...بالاحرى الفكرة ما عجبتني ...
ما احسها مبرر ..عموما كل واحد له نظرة معينة ...وهذا رايي ..

يوم كنت أتريا مده و جزره - خذلني مثل ما تخذل سحابه رجا العطشان
ضاعت الاشواق و ماتت قلوبها - توك تجي تناديني بعد ما صرت في طي النسيان
المقطع هذا رقيق ...لكن عدم توحيد اللغى واللهجة يسبب ربكة للقارئ ...
مثل كلمة " اتريا " كان المفروض تكمل وتقول " ريا " وليس رجا ...ولانو مومكين تنفهم رياء :09: هع ..وكمانا تجي ...لازم تصير تيي ..سو الافضل اتريا تصير اترجا عشان يصير تلافي للفوضى ..
ملاحظة ع العنوان ...انا اشوف انها كتابات مكتملة ..لانو انت تكتب مشاعر والمشاعر تتوقف فقط عند حد معين ...لكنها تكون اكتملت عند تلك النقطة اللي توقفت فيها ...بس هذا مو معناه انو انت ما تقدر تكمل عليها ...
وعموما حتى لو كتبت سطر او مقطع صغير مومكين تعتبره نك نيم والا مسج <<< توريك كيف تستفيد من اقل كلمة تكتبها هع :09:
يللا بالتوفيق ..وخلنا نشوف لك جديد ...
Exodia
19-06-2007, 07:56 AM
السلام عليكم ورحمة الله

ما شاء الله عليك أخوي لوس كل هذا قبل المحاظرة :D

ويش كنت بتكتب لو كنت رايق :D

الصراحه الخاطره الأولى هي اللي لفتت نظري وفعلاً حسيت توجهها واحد وصيغتها قوية وحلوة




كنت أعدك اخو و صديق و مكانك في قلبي محفور على سطوره

بس للأسف حتى ذكراك ما عادت لها و لا بقايا محفوره

يا ريت كان قلبك من القلوب إلي تخون مجبوره

يا ريت كان قلبك يحس بجروح غيره

بس افا طلعت من إلي ما يتأثر بشوفت مشاعر الغير مكسوره

كنت معاك و و كنت معاي لما الفرح ينثر بذوره

وكنت معاي و كنت معاك لما الحزن يقتل زهوره

ما توقعتك تخون و تجرح و تنسى الهوى و بحوره

و لا ظنيتك تكسر صورتك في قلبي و تمسح الوفا من جذوره

خلاص روح و ابتعد عني و أنا رايح و تارك لك ذكرى صارت مهجوره

و اعتبر هذا آخر كلام أكتبه لك في قلبي و هذا أنا ماسح سطوره


أعتقد لو أعطيت نفسك الوقت أكثر كان بتطلع أجمل ولكن هذا ما يلغي جمال الخاطره عموماً ..

الله يعطيك العافية وإن شاء الله نشوفك دايماً معانا ^_^

أطيب تحية
Ahmed Blight
19-06-2007, 12:47 PM
مرحباااا
خوااطر يا الله نفسي اقرا مليون خاطره وخاصه هالايام
سو نااايس انك كاتب موضوع خواطر عشان اشوف مهارتك بالتعبير
اذكر مرة رديت على خاطره لك كانت مدمرة وبقووووووووووووة
المهم


اهلين سويت
اشوف كل شيء off عسى ما شر ؟ عشان الإجازة يعني ؟
لوول مادري ليه ناس تحب تقرا خواطر و هي ما تكتب :09: و لو انك تكتبين بس اظن مو عربي @@


الاغنيه اللي كنت تسمع لراشد الماجد لان فكره الخاطره هي نفسها بالضبط فكره الاغنيه واظن يا ربي هي "توصي شي" صح ؟؟؟ مادري بس انا احس ان الاغنيه لراشد
بصراحه عجبني هالمقطع حيييييييييييل وتعبيرك ما شاء الله روووعه تقدر توصل الفكرة والشي اللي بخاطرك
احساسك عجبني واايد فيها
مثل المكسور من شخص عزييييز وقريب من القلب وهذا شعور بصراحه صعب واايد

لول لا اغنية اسمها مبروك ل عبدالله السالم :09:
خخ انا لما كتبت كنت مقهور من سالفة بعد :09: فقلت اكتب و ندمج القهر بالوصف XD
ميرسي جدا على كلامك و هذا من ذوقك :)



يا الله اخااف اقرا هالكلام والله ياثر علي وهذي المشكله
تعجبني المقاطع الصغيره وتكون معناها كبير وله اثر قوي عالقارئ


خخخخخخخ انتي خوافة مادري ليه @@ حلوين الكلمات الي كذا , مو لازم الواحد يحس بمعناها يحس بكلماتها :D


لا تعليق لانه رووووووووعه


ثانكس ^^


صح صح صح والله
الي يحب مستحييييل ينسى وكل انسان يمر بلحظه ضعف وكسر لكن اكيد بيرجع لبيته ولقلب حبيبه
وباقوى من السابق لانه مليان شوق وحنين
هالمقطع عجبني وايد وايد وايد وايد ما تدري شكثر له تاثير
بس اكتفي بجذي اخاااف اتهور

لول التهور حلو >> بالنسبة له عشان يحب يتهور خخخ
لول يب مستحيل ينسى بس يقدر يتناسى maybe



شنو هذاااااا
والله كل مقطع اروووع من الثاني ومعناه كلمه رهيييب شوي عليه
تعرف اني ما اجامل واكره اجامل وردودي عالخواطر تكون من نوع ثاني وصااادق وبقوة لوول >> ما تتغشمر اهني
بس لو ما ريوته يمكن يموت والموت من بعد الحبيب افظع من الموت مسموم ف لو رويته كان ارحم >> وجه نظر خاصه فيني

لووول و انا كتابتي مادري هل تعبر عن وجهة نظري او وجهة نظر ناس اعرفهم @@
اذا بفكر شوي اممممممممم كثير كذا نظرتهم نفسك و انا كمان من نفس نظرتك يمكن :09: و لو اني اشوف نظرتنا غلط XD
و ميرسي على اللا مجاملة ^^" و ادري انك ما تجاملين >> تحبين تفشلين الواحد اذا اخطأ



لا لا انا اخااف من هالكلام وبقوة ف ما رح اعلق عليه ><"


تشوفي افلام رعب خخ ؟



بصراحه موضوع رووووووووووعه وخوااطر رهيييبه
موفق
سي ياااا


ميرسي :) كلك ذوق
و سوري سويت اني معلق على ردك متأخر >> بيقول ضغوط الجامعه << لا بس كسلان ارد خخخ
موفقة توو
سي يا بعد ال off