اجهزة الـ Xbox 360 المعدلة الآن بالاسواق

[NikoBellic]

اعزائي اعضاء منتدى المنتدى كيف حالكم؟
حبيت اقول لكم انه الاجهزة الجديدة وصلت الاسواق الخليجية
والشي الجيد بالأمر ان الـ Premium "الابيض" الجديد يحتوي على مدخل HDMI ويحتوي على اللوحة الام الموجودة في الـ Elite بالاضافة الى مشتت حراري مزدوج يمنع المشاكل المستقبلية.
وعادة تجدون هذا الجهاز الجديد بتاريخ التصنيع شهر يوليو 2007 .. والخبر الجيد الآخر انه الاجهزة التي يعتقد بأنها الفالكون والتي تحتوي على معالج 65 نانومتر ومعالج رسومي 65 نانومتر ايضاً صدرت بالاسواق مع مشتت حراري مزدوج و فتحة HDMI
وللتعرف على الفالكون مطالعة كرتون الاكس بوكس 360 على الجانب الايسر على ما اظن ستجد
LOT # 0728 وفوق هذا الرقم هذا هو الفالكون اما ما قبله بتاريخ تصنيع يوليو هو الجهاز الجديد ايضاً لكن 90 نانومتر وبالعربي "ما عليه خوف" .
وهذي صورة البريميوم الجديد من الخلف
http://xs218.xs.to/xs218/07320/image-o-matic.x.jpg
انظر فتحة الـ HDMI.

وهذا رابط للشراء عبر موقع Amazon.com (http://www.amazon.com/gp/product/B000UQAUWW/ref=amb_link_5328132_1/105-6083489-2867647?pf_rd_m=ATVPDKIKX0DER&pf_rd_s=special-offers-1&pf_rd_r=0DJ0JCYGGXCTREQ4X3VJ&pf_rd_t=201&pf_rd_p=303637001&pf_rd_i=B000B43OY4) بالسعر المخفض الرسمي الجديد

اضفت استبيان من اجل مزيد من التفاعل

[NGC]

طالماً وجود مشتت حراري ثاني وماذبورد إليت ما عليه خوف من مشكلة RROD

أيضاً على حسب ما سمعت إنه الدرايفر صوته اخف من الموديلات السابقة لأنهم يستخدمون Benq :D هالمرة

يعني بالنهاية البريميوم = الإليت لكن من غير هارد درايف 120 جيجا :D

[NikoBellic]

نعم اخي الاجهزة الجديدة تستخدم قارئ اقراص DVD من شركة Benq غير مزعج ابداً.

[yawelle]

الحين الـ360 جاهز ليكون الجهاز الأول في التاريخ:AR15firing:
ويعطيك حبيبي ألف عافيه على الخبر الحلو إلي جاء من عضو أحلى:biggthump

[NikoBellic]

حياك الله اخي yawelle

[yawelle]

ما أتوقع الدرايف هو السبب في الصوت لأن الأليت الدرايف فيه هيتاشي لكن صوته يكاد ينعدم ما تحس فيه خفيف جدا:33:

[NikoBellic]

الهيتاشي القديم يفرق عن الهيتاشي الجديد
ببساطة الهيتاشي اللي موجود بالاليت معدل وافضل من اللي قبل

[Mr.Chief]

مشكور اخوي ..بس سؤال .,,


انت متاكد انها 65 نانومتر ؟؟؟؟

[NikoBellic]

LOT # 0728 فالكون معالج 65 نانومتر

[hamoud05]

كم سعره الحين بالسوق ؟؟

لأني شفت محل النسر في أبراج الدوسري بالخبر
يبيع 360 اوروبي مع ضمان سنة ب 1899

فهل هذا هو ولا لأ ؟؟

[NikoBellic]

اوروبي؟ ما اعتقد انه الجديد، انا اتكلم عن الامريكي.. لانه اغلب المحلات اللي بالاسواق الخليجية يجيبون الامريكي فقط.

[Emirates]

اكيد وبشتري لي جهاز جديد بذان الله

[devil x]

أخوي هل وصله الـ HDMI تكون اوضح من الـComponent cable ...؟؟؟

يعني فيه فرق كبير في الوضوح والرسوم تكون محسنه اكثر ولا لا ...!!؟

أرجوا الاجابه الكافيه ...

[NGC]

لول قبل شوي اشتريت جهاز الإكس 360 المعدل من أمازون :D

فله:D

[NikoBellic]

devil x بيني وبينك من اللي شفته عند بعض الشباب، ما اشوف فرق بين الـ component و الـ HDMI سوا انه راح يريحك نوعاً ما، لانه كيبل واحد يحتوي على وصلات الصورة والصوت شي مريح يعني.
مبرووووووووك اخوي NGC على الجهاز وتتهنى فيه ان شاء الله ولله اتمنى اسحب لي واحد بس العين بصيرة واليد قصيرة

[devil x]

دام انه مافي فرق والله حرام اشتريه ..أنتظر الفالكون احسن ... على العموم الي عندي مقزر لين مايصير فيه شي ذيك الساعه اشوف شسوي ...


سلااام اخوي وشكرا على الجوااااب

:biggthump

[NikoBellic]

الفالكون متوفر عندكم بقطر بس شوف على كرتون الاكس بوكس
LOT # 0728

[Winter_wolf]

مبروك NGC, بالنسبة للفرق في الوضوح مع الـHDMI.

الـVGA + Component يعتبرو Analog Signal.

الـHDMI is Digital Signal, ومن ميزاته انه يلغي الـBlurring بالحركة و يقلل من الحدّة في الحواف, والالوان فيه مركّزة اكثر, لكن للعين غير الخبيرة, الفرق ماهو كالفرق بالوضوح اللي صار اثناء النقلة من الـComposite للـComponent.

[devil x]

الفالكون متوفر عندكم بقطر بس شوف على كرتون الاكس بوكس
LOT # 0728

wow :wow: ....

أخوي انت متأكد...

انزين وكم سعره ؟؟

[PremaFrost]

والله شركه مايكروسوفت صراحه طلعت اكبر حراميه بالسوق
بالخفيف تطيح من عينى جم اصدار باصدرا للاكس بوكس نزلوا الحين وجم اكسسوارات نزلوا
والله عيب المفروض من اول تحط فتحه hdmi مو تجبر الناس تشترى جهاز ثانى عشان الفتحه والمراوح الاضافيه والمعالج الاصغر يااخى بدلوا اجهزتنا باليديده وخلاص لاموكافى هذا موتارس عسنهم غير اشتراك اللايف وغير المايكروسفت بوينت يعنى بوق عينى عينك
وبعدين محد يقول انا متعصب ومادري شنو انا اصلا عندى اكس بوكس بس الشركه الى تسويه عيب على اسم مايكروسفت
لامومافى بعد ننطر جهاز فالكون يعينى 7 اصدارات للاجهزه وكلهم يقدر يصير فيهم ريد لايت والله حاله
داش بمزاجى السونى 3 هالايام بو 80 غيغا:12:

[NikoBellic]

اخوي انا متأكد وعلى كلام اشهر عضو في منتدى الاكس بوكس الرسمي xbox.com يقول انها 0728 ويدعى MRCUR
http://forums.xbox.com/281/ShowForum.aspx



والله شركه مايكروسوفت صراحه طلعت اكبر حراميه بالسوق
بالخفيف تطيح من عينى جم اصدار باصدرا للاكس بوكس نزلوا الحين وجم اكسسوارات نزلوا
والله عيب المفروض من اول تحط فتحه hdmi مو تجبر الناس تشترى جهاز ثانى عشان الفتحه والمراوح الاضافيه والمعالج الاصغر يااخى بدلوا اجهزتنا باليديده وخلاص لاموكافى هذا موتارس عسنهم غير اشتراك اللايف وغير المايكروسفت بوينت يعنى بوق عينى عينك
وبعدين محد يقول انا متعصب ومادري شنو انا اصلا عندى اكس بوكس بس الشركه الى تسويه عيب على اسم مايكروسفت
لامومافى بعد ننطر جهاز فالكون يعينى 7 اصدارات للاجهزه وكلهم يقدر يصير فيهم ريد لايت والله حاله
داش بمزاجى السونى 3 هالايام بو 80 غيغا:12:


اخوي Hardware Revisions تصير بكل الاجهزة لابتوب و اجهزة العاب "صارت بالـ PS2 كذا مرة" ايضاً بالـ Wii الريفجن الجديد اللي يمنع تطوير الكوبي، و مايكروسوفت تسوي revision على شان المستخدم يرتاح، وبالنسبة للرد لايت تخلي جهازك عند الصيانة هم يضيفون لك مشتت حراري ثاني هذا صار ستاندرد عندهم، اما الـ HDMI ما هو بالشي الضروري امتلاكه كومبوننت مع مقاومة ذهب بنظري تكفي اما الـ HDMI دجتل ما يحتاج مقاومة ذهب الا على شان يطول عمر الكيبل فقط.

[Winter_wolf]

هو من ناحية الطيحة من العين يا SALMORE, لو جيت تقارن مزايا واكسسوارات الـ360 بتلاقيها مكمّلة اما الـPS3 فكل شي متوفر معاه من البداية.

شاحن يد الـ360 لازم تشتريها, في حين انها متوفرة بالبداية بيد الـPS3 كل اللي محتاجه هو شبك اليد بالجهاز عن طريق USB وانتهينا.

الـHDMI الان اتوفرت للـ360.

وقريب HD-DVD مع الـ360 في حين ان الـBlue-Ray موجود بالـPS3 من البداية.

لايف بفلوس و PS3 Online ببلاش.

وفوق كذه الجهاز فيه بورد جديد ومراوح محسّنة, اجل نحنا اصحاب الاجهزة القديمة خلاص مالنا رب يعني, لكن اضطرينا واشترينا مراوح نايكو وقربعتلنا عفشنا :28:
كأنهم يقولو : معليش اجهزتكم مصيرها تنعدم عشان كذه مشو حالكم اشترو الاجهزة المطورة ووعد ماراح تخرب.

بتحس انهم بيطورو في الجهاز بالقطـّارة عشان كذه متردد اشتري الـFalcone او استناهم الين مايصدرو جهاز آخر مطور بـ2008, لكن بعد ماقريت انه الـHDMI ماهو متوفر بالـCore, وتقرير ان الـPS3 لعبو بيه 108 ساعة متواصلة في حمام سونا بـ100 درجة وماخرب حتى او علّق, فالـPS3 خش دماغي وبقوة, لولا الالعاب الجبارة على الـ360 اللي تخليني مااقدر افارقه بس...

[NikoBellic]

انا متأكد اني قاعد اقرأ الموضوع اللي انا كتبته؟ ولا لا يا شباب؟
اخوي اي SALMORE الله يهداك ؟ وين سالمور؟ هذا SARUMAN

[Winter_wolf]

* يفكّر في ترقيعة *

المهم اني جبت اول حرفين صح <_<, ايوا, وعشان مانخرج عن اطار الموضوع, بشتري الاجهزة الجديدة اول مايزورني الـRed Rings of FUBAR بجهازي الحالي, وهو شي مااستبعد يحصل بالمستقبل القريب لان جهازي بدأ يعلّق في الـDashboard بشكل ملحوظ.

[NikoBellic]

شنو يعني FUBAR ؟

[Winter_wolf]

http://en.wikipedia.org/wiki/FUBAR

وايضا من الاسباب اللي بتخليني اشتري الاجهزة المعدلة اني محبوس بجزيرة الباند السحرية وبديت افتقد اللايف.

[NGC]

* يفكّر في ترقيعة *

المهم اني جبت اول حرفين صح <_<, ايوا, وعشان مانخرج عن اطار الموضوع, بشتري الاجهزة الجديدة اول مايزورني الـRed Rings of FUBAR بجهازي الحالي, وهو شي مااستبعد يحصل بالمستقبل القريب لان جهازي بدأ يعلّق في الـDashboard بشكل ملحوظ.

الله يبارك فيك

ومبروك ونتر لأنه جهازك قرب يحوشه RROD .. جهازي بالأول قام يعلق بعدها بكم يوم بوووم 3ROD لكن ما راح اخليها جذي راح اصلحه إن شاء الله :naughty:

[PremaFrost]

* يفكّر في ترقيعة *

المهم اني جبت اول حرفين صح <_<, ايوا, وعشان مانخرج عن اطار الموضوع, بشتري الاجهزة الجديدة اول مايزورني الـRed Rings of FUBAR بجهازي الحالي, وهو شي مااستبعد يحصل بالمستقبل القريب لان جهازي بدأ يعلّق في الـDashboard بشكل ملحوظ.
لول ونتر للحين تلعب كاونتر :D شحلاتك اول كنت معانه ويا سامى وxnnx وامارت راحت هالايام :D

[NikoBellic]

http://en.wikipedia.org/wiki/FUBAR

وايضا من الاسباب اللي بتخليني اشتري الاجهزة المعدلة اني محبوس بجزيرة الباند السحرية وبديت افتقد اللايف.
اللايف فيه بان ؟ على اي اساس شلون؟


ومبروك ونتر لأنه جهازك قرب يحوشه RROD .. جهازي بالأول قام يعلق بعدها بكم يوم بوووم 3ROD لكن ما راح اخليها جذي راح اصلحه إن شاء الله :naughty:
اخوي تصلح جهازك بنفسك انت؟

[Winter_wolf]

NGC صدقني عندي خبرة, لو جهازك بدأ يعلق في الداشبورد بشكل متكرر, فجهازك بيكحكح/يحتضر/بيزوره الـFUBAR قريب.

يالله, راح يكون خامس جهاز يتوفى علي.

--

كاونتر الجين بتسبح في سلة المحذوفات هي و STEAM, بالنسبة لذيك الايام, R.I.P, Good times bro.

--

البان الى الان " على الرغم من مرور قرابة 5 اشهر على بدأها " ماحددو على اي اساس يصيدو جهاز الواحد, لكن شي واحد متأكدين منه, لو جهازك فيه كوبي, راح تتبند اليوم او بكره.

استلفت جهاز ولد خالتي عشان احمل كم شي من اللايف, احلى شي لمن تحمل ديموهات انك لمن تطفي الـ360 التحميل راح يستمر والجهاز مطفي, بكذه تريح راسك من هرجة حرارة جهاز عالية او وسوسة زي كذه, الحين مابقي بالهاردسك غير 75 ميجا لول

[NikoBellic]

ولله توني ادري انه اكس بوكس فيه كوبي
خامس جهاز ؟ الله يعينك شكلك قاعد على بنك
وانا جهاز واحد بالغصب مو قادر اشتريه

[Winter_wolf]

مو بنك, انما المحل اللي اشتريت منه الـ360 اعرف كل اللي يشتغلو فيه واللي وظفهم وأهل صاحب المحل...الخ All the way up, كل مايخرب علي جهاز اروح ابدله بجهاز جديد, هذا على مدار سنتين التبديل, واعرف كيف اهتم بأجهزتي فـUser Error خارج المعادلة اذا ماجا الامر لاسباب حدوث الـRRoF, رهاني على خلل تصنيعي من البداية بالـ360, المشكلة الوحيدة هو لمن تشتكي بالمنتديات الاجنبية يبدأ الـDamage Control Machine بالعمل بردود مثل : كان احسنلك تشتري ضمان, ايش المشكلة ودي الجهاز لمايكروسوفت بسيطة مافيها مشكلة What's your problem, اكيد الخلل من جهتك...الخ

هذا غير انهم يتهموك انك Sony FanBot/Troll/Wiper/P&G..etc لو حاولت تشرحلهم ان الخلل من جهة مايكروسوفت نفسها ومو من جهتك.

وارسال الجهاز لمايكروسوفت امر منتهي منه, شحن رايح وجاي للولايات وهاتك انتظار واحتمال 80% الجهاز يخرب عليك باول شهر من الترجيع مايترك للواحد خيار غير انه يشتري جهاز جديد احسنله, او في بعض الاحيان, اسوأله.

[NikoBellic]

ولله من بعد الخدمة عندهم ثلاث سنين كفالة ببلاش يحق لهم يفرحوا ياخي
ما يدرون عنا احنا في النصف الثاني من كوكب الارض
من وين انت اخوي بما انك تعرف محل ممكن يضبطنا بالسعر؟

[Winter_wolf]

ضمان الثلاث سنين راح يكون عذاب ثلاث سنين لو الجهاز خرب عليك وانت بالجهة الثانية من الكوكب.

بأية حال, حاليا ماانصحك بأي محل خصوصا المحل اللي اتعامل معاه بدأ يشطح بالاسعار, وانا من جدة, لو كنت من نفس مدينتي فأنصحك بـ"سوق الجنوبية ", هناك بتلاقي اسعار الاجهزة بسعر الجملة, لقيت Xbox 360 Core بـ1050 ريال, ياباني ومعدّل, و PS3 60 Gigs معاه لعبتين اختيارية ويدين بـ2300.

[NikoBellic]

لا ما ينفع اخوي توقعتك من الكويت
مالي الا موقع امازون اطلب منه الجهاز سعره 95 دينار مع فتحة HDMI

[عاشق يوشي]

الفالكون متوفر عندكم بقطر بس شوف على كرتون الاكس بوكس
LOT # 0728

اخوي انت متأكد انه جهاز الفالكون نزل :33:

[NikoBellic]

اعتماداً على كلام MRCUR يؤكد انه الـ LOT # 0728 كلها اجهزة فالكون.

[ramizak]

الاوروبي الجديد بيوصل في سبتمبر

[ibrahim goo]

اخوانى هل يوجد xbox ايليت معدل اى يشغل الكوبى

[samir4d]

اخوي صاحب الموضوع بألاصل مايكروسوفت لم تعلن عن الفالكون فليس واحد مثل MRCUR او غيره يستطيع تأكيد ذلك غير مايكروسوفت وعلى فكرة المودشيب فيه 90nm وليس كما تفضلت 65nm هم فقط اضافو الhdmi
وبالنسبة للفالكون اكيد لونه اسود مثل الاليت وايضا الهارد دسك 20 جيجا وليس 120 جيجا فكيف لك ان تقول انه الفالكون علما بأنه سينزل بشهر 11 نوفمبر اي بالخريف القادم وارجو ان لا تزعل مني ولكن كلمة الحق يجب ان تقال وشكرا

[محمد15315]

شكرا اخوي على الخبر الحلو مع الشكر

[محمد15315]

لاكن انت متاكد انها نزلة ولا لا

[محمد15315]

ارجو الرد على السؤال الي فوق

[ramizak]

لا يوجد شيء اسمه فالكون.

هذه على ذمة موظفي مايكروسوفت.

الجهاز اللي بينزل في الاسواق بفتحة hdmi يبدو والله أعلم انه الجهاز اللي عليه الكلام.

هذا الجهاز ما بينزل اسود(على الاقل حتى الان) الإليت بس أسود.

في جهاز الشهر الجاية أعتقد ال halo 3 special ed ويرمز له باسم mangoose على اسم العربة في اللعبة لونه أخضر وأطراف حمراء.

سلام

[~ SoKo ~]

يعني بالنهاية البريميوم = الإليت لكن من غير هارد درايف 120 جيجا :D

همممم كنت مفكر آخذ إليت بس شكلي بغير رايي :33:

سؤال مهم :

وين أقدر الاقي الجهاز مع ضمان في الامارات..

طبعًا أقصد الجديد ( يوليو ) و كيف أقدر اتأكد من التاريخ ؟

[قاتل المجهول]

سؤال مهم :

وين أقدر الاقي الجهاز مع ضمان في الامارات..

طبعًا أقصد الجديد ( يوليو ) و كيف أقدر اتأكد من التاريخ ؟



من اي امارة الاخ ؟

على فكره اجهزة يوليو بتنزل عدنا في سبتمبر

اذا تبغي الاليت فهو بينزل باكر الجمعه وبيتوزع على المراكز ( كارفور مثلاً ) الاسبوع الياي........,

[~ SoKo ~]

من اي امارة الاخ ؟

على فكره اجهزة يوليو بتنزل عدنا في سبتمبر

اذا تبغي الاليت فهو بينزل باكر الجمعه وبيتوزع على المراكز ( كارفور مثلاً ) الاسبوع الياي........,

من الامارات الشمالية بس اقدر اوصل عجمان او الشارقة او دبي .. ابعد لا :D

صارلي اسبوعين محتار و شكل اجهزة يوليو مطولة شوي ( سبتمبر )

بتوكل على الله و باخذ اليوم إليت بدون ضمان..

[قاتل المجهول]

من الامارات الشمالية بس اقدر اوصل عجمان او الشارقة او دبي .. ابعد لا :D

صارلي اسبوعين محتار و شكل اجهزة يوليو مطولة شوي ( سبتمبر )

بتوكل على الله و باخذ اليوم إليت بدون ضمان..


شكلك من راس الخيمه او من ام القيوين

المهم الاليت بتحصله الاسبوع الياي + ضمان

ممكن الاثنين او الثلاثاء

[snoke]

السلام...

طيب واللي اشتروا الجهاز اللي مو معدل..راحت عليهم ؟؟؟

شسالفة مايكروسوفت..؟! لي اكثر من سنه انطر في جهاز خالي من المشاكل..الى ان طفشت وقلت علي وعلى اعدائي..
انا تاريخ صنع جهازي في 9/2006 ..مع اني شاريه قبل كم يوم ..ولكن لما ادخل عالSystem من الجهاز يكتبلي 2007 ..

عموما انا المكيف 24 ساعه شغال عندي.... والHDMI مو فارقه معي..وبصراحه زودها بيل :12:

والسلام مسك الختام

[قاتل المجهول]

السلام...

طيب واللي اشتروا الجهاز اللي مو معدل..راحت عليهم ؟؟؟

شسالفة مايكروسوفت..؟! لي اكثر من سنه انطر في جهاز خالي من المشاكل..الى ان طفشت وقلت علي وعلى اعدائي..
انا تاريخ صنع جهازي في 9/2006 ..مع اني شاريه قبل كم يوم ..ولكن لما ادخل عالSystem من الجهاز يكتبلي 2007 ..

عموما انا المكيف 24 ساعه شغال عندي.... والHDMI مو فارقه معي..وبصراحه زودها بيل :12:

والسلام مسك الختام




هذا كلام واحد في بعض المنتديات



قرأت بعضاً من آراء من يستاؤون من إنزال إصدار جديد للجهاز ، لكن لا أدري أين وجه الاستياء ؟ أنت اشتريت الجهاز ويعمل معك ، ما المشكلة هنا ؟ هل لا بد من شراء الجهاز الجديد ؟ النسخ الجديدة التي تنزل مثلاً لمن لم يقم بشراء جهاز بعد ، ثم إنني أرى إنزال أجهزة بإضافات جديدة أمر يستحق الثناء .. الجهاز نزل في أواخر عام 2005 ، أي قبل حوالي السنتين ، ما المانع من إنزال جهاز معدل ومحسن أو مضاف له بعض القطع التي افتقدها الجهاز في إصدارات السنتين الماضيتين ؟
الصورة والوضوح هي هي لم تتغير ، ما دام جهازك يعمل فلا داعي لشراء جهاز جديد مضاف له بعض الأمور البسيطة إلا إذا كنت بحاجة لها .. عن نفسي أنا لن ألتفت لا إلى Elite ولا إلى Falcon ما دام جهازي يعمل وبكفاءة وبوضوح على شاشة تلفاز LCD بـ 32 بوصة .
حتى إنني سمعت البعض عندما حصل عطل في جهازه القديم وكان عليه ضمان ، أبدلوه له بجهاز مضاف له مدخل HDMI ، بمعنى التعديل على الجهاز يشمل أصحاب الضمان أيضاً فيبدلون له جهازه بجهاز من الإصدار الجديد .
ثم إن نزول الإصدارات الحديثة من الجهاز مفيدة للمستهلكين ذوي الدخل البسيط ، فهناك فئة متوسطة الدخل لا تستطيع شراء جهاز بسعر الفالكون أو الـ Elite مثلاً ، لذا يتوجهون لشراء الإصدار Pro أو Core مثلاً ، دام أنه ليس بحاجة للإضافات الجديدة والتي لن تغير إلا بشكل طفيف وقد يكون غير ملحوظ (خاصة مدخل الـ HDMI) وغالبية الناس ليس لديهم التلفاز الذي يدعم HD بشكل كامل ، لذا شراء جهاز جديد لا داعي له ألبتة .

هذا رأيي من ناحية إصدارات الجهاز ، أنا أراها ميزة وليست سيئة .

[عاشق يوشي]

من الامارات الشمالية بس اقدر اوصل عجمان او الشارقة او دبي .. ابعد لا :D

صارلي اسبوعين محتار و شكل اجهزة يوليو مطولة شوي ( سبتمبر )

بتوكل على الله و باخذ اليوم إليت بدون ضمان..

اخوي ليش مستعجل خذايليت مع ضمان احسن عشان لاقدر الله اخترب بيصلحونه اوتاخذ

واحد جديد :)

[snoke]

هذا كلام واحد في بعض المنتديات

السلام..

بصراحه كلامه عين العقل..جعلني اتراجع عن ندمي بشراء الجهاز..لأنني بصراحه PS Fan .. أو بالأحرى كنت كذلك... والX-Box بالنسبة لي تجربه جديده... ^^

شكرا لك أخي الغالي..ريحتني بردك.. ^^



والسلام خير الكلام..

[SFS]

يا جماعة ما تعرفون متى تنزل هالاجهزة المعدلة بالكويت ؟؟

[~ SoKo ~]

المهم الاليت بتحصله الاسبوع الياي + ضمان

ممكن الاثنين او الثلاثاء

صبرت و اليوم اتصلت بأحد هالمحلات الكبيرة في الامارات

http://www.xbox.com/en-AE/hardware/buy/

يقول لازم ننتظر معرض جيتكس ، مافي إليت هالاسبوع -_-

يمكن يكون غلطان ؟

[Mr.Chief]

اذا هذا جوابه ننتظر جايتكس