"ألوان القلب" الجزء التاني (اللحن الحزين) [الأرشيف]

MALER

11-09-2007, 10:17 PM

للتوضيح
دا الجزء التاني من قصة " سعاده "

الوان القلب
الجزء الثاني
اللحن الحزين

مقدمه

الجزء التاني تبدأ احداثو عام 2000وتحكي القصه عن المحقق انس وعيلتو
يدخل انس في قضيه اختفاء 6 اشخاص ومن بعدها تبدأ المشاكل
حتلاحظو انو القصه مافيها ارتباط في الجزء الأول
لكن مع تقدم الأحداث حتلاقو خيوط الجزئين بترتبط ببعض
القصه مختلفه قليلا في الأسلوب عن الجزء الأول
بس اوعدكم انها حتعجبكم
حتدخلو في قصه غامضه وغريبه ومخيفه قليلا
ومعاها زي ما اتعودتو لحظات مضحكه ولحظات حزينه
ما ابا اخرب عليكم القصه
اسيبكم مع الجزء التاني من الوان القلب
اللحن الحزين

الفصل الأول
العام 2000

كانت ليله باردة
امكن ابرد ليله عشتها في حياتي
كنت اشتغل في قضية اختفاء 6 اشخاص في مدينتي
وكلهم تقريبا من نفس الحي
اختفو واحد ورا واحد يوم بعد يوم
اختفو بدون اثر

وصلنا اخبار من بعض الناس
قالولنا انو سيده غريبه تتمشى كل يوم في الليل في الحي
وقالو انهم يشتبهو في كونها المختطفه
مع انو شي غريب انو سيده تقدر تخطف رجال
بس كان لازم اتحقق من الموضوع
ممكن تطلع المختطفه منجد

طلعت من مركز الشرطه وركبت سيارتي واتوجهت للحي
وانا في السياره اتصلت زوجتي لما
كانت بتطمن عليا عشان اتأخرت
قلتلها انو عندي مهمه اخلص منها وارجع
ودعتها وقفلت السماعه
وكملت طريقي

وصلت تقريبا على الساعه 12 الليل
كان الهدوء يعم الحي
وما في احد في الشارع
وقفت سيارتي ومشيت برجلي
الجو كان برد مره

وانا بمشي شفتها
السيده الغريبه على قولتهم
شفتها من بعيد
ولحقت وراها لكن بتخفي عشان ما تكشفني
كانت مشيتها عجيبه , تترنح يمين وشمال
وصلت عند بيت قديم مهجور ودخلتو
لحقتها ودخلت البيت
لمن دخلت شميت ريحه عفنه مره
كان البيت ظلمه وما يبان شي
وما اقدر اشغل الكشاف عشان ما تكتشفني الحرمه
وانا وسط الظلمه ضيعت الحرمه
قلت خليني اكمل قدام
وفجئه سمعت صوت موسيقى
موسيقى حزينه
اللين الحين متذكرها
وانا في الظلام ماكان عندي حل إلى إني الحق ورا الموسيقى
الحق ورا اللحن الحزين
وياريتني ما لحقتو
كل ما اقرب من الصوت تزداد الريحه العفنه
اللين ما وصلت لغرفه مليانه شبابيك
ونور القمر داخل للغرفه من كل الجهات
وكانت الحرمه واقفه في الغرفه وماسكه في يدها صندوق بتطلع منو الموسيقى
اللين الحين ما انسى وجهها المرعب
ونظراتها المخيفه

طلت فيا وابتسمت ابتسامه مخيفه
انا طلعت الكشاف وولعتو
وجهت الكشاف عليها فزعقت وغطت وجهها بيدها
كانت في اشياء طايحه في الأرض
وجهت الكشاف عليها
واكتشفت شئ مرعب
كانت جثث ناس متعفنه مرميه في الارض
طلعت مسدسي بسرعه ووجهتو على الحرمه
وقلت " لاتحركي ولا حركه"
شالت يدها عن وجهها وضحكت
ضحكت ضحكه مجنونه وقالت " اليوم محا احتاج اصطاد عشايا , لأنو العشا جاني بنفسو
هههااا "
انا انفجعت من اللي قالتو وقلتلها " ارفعي يدك فوق وانزلي على ركبك "
كنت بحاول اخليها تسوي كده عشان اكلبش يدها بس هيا رفضت
وهجمت عليا زي الحيوان المفترس
ما كان عندي فرصه إلا اني ادافع عن نفسي واطلق عليها بالمسدس
طلقت الطلقه الأولى على رجلها قلت امكن تستسلم
طاحت على الارض وصرخت بس قامت تاني
وطلعت سكين من جيبها وهجمت عليا
طعنتني في يدي
دفيتها وطيحتها على الارض
بس هيا قامت وهاجمتني تاني
ماكان بيدي إلا إني اقتلها

في اليوم التاني اعلن انو الجثث مطابقه للأشخاص المختفين
واتعرفو على شخصية المجرمه
اللي اتضح انها مختله عقليا زي ما قالو اهلها واسمها غروب

الجرح اللي في يدي كان بسيط
انا فكرت انو القصه انتهت هنا
لكن القصه لسه في بدايتها

رابعة العدوية

12-09-2007, 11:30 PM

:ponder:احم ... مرحبا ..
الجزء الاول كان جميل و لكنه بالعامية ..
عموما أنتظر الجزء الثاني !!
دمتْ

MALER

14-09-2007, 02:44 AM

الفصل التاني
بعد الحادثه بدأت اشياء غريبه تحصل في حياتي
صرت احلم كوابيس كل يوم
وفي الكوابيس تجيني غروب بشكلها المخيف
زوجتي تقول اني صرت اتكلم وانا ناي
موانا مني مصدقها
قامت قالتلي انها حتصورني وتوريني الحقيقه
\اليوم اللي بعدو سألتها صورتيني ولا لأ ؟قالتلي " طبعا اجل ايش "
انا ما صدقت نفسي لمن شفت الفديو
طلعت منجد بتكلم وانا نايم
لا وكمان اقول كلام عجيب
( بعدي عني – ما ابغى اموت – شعري حلو – روكوكو -- )
كلام عجيب مالو معنى
ضحكت لما عليا وقالت " صدقت الحين ؟ "
انا حكيت راسي وقلت " والله طلعتي صادقه "
قامت قالت " طبعا طبعا , اصلا انا يسموني الجميله الصادقه"
انا ضحكت وقلت " طيب ايش رأيك تقومي تعمليلي فطور يا الجميله الصادقه"
لا ياحبيبي قوم اعمل الفطور بنفسك , دا عقابك عشان ما صدقتني من اول " قالت "كده بكل غرور
المهم قمت وعملتلي فطور اللي هوا شاي وبسكوته , مشي الحالو
رحت الشغل طبعا بعد ما ودعت الجميله الصادقه
وانا في الشغل جاني اتصال من اختي الصغيره سم
راسيبكم مع الكلام اللي دار بيننا
انا : الوسمر : الووووانا : سموره كيفك ؟
سمر : انا طيبه كيفك انتا ؟
انا : طيب طيب الحمد لله , كيف حال امي وابويا ؟
سمر : طيبين كلهم طيبين , لما ايش مسويا ؟
انا : لما..... اها قصدك الجميله الصادقه , طيبه مره ماشاء الله عليه
اسمر : ههههه , مين فين طلعت دي الجميله الصادقه
انا : اسأليها بنفسك
سمر : والله زوجتك دي ضحكك
انا : منجد, لسه ما شفتيها لمن تقلد الدعايات , تضحكي ضحك
سمر : كمان تقلد دعايات , طلعت موهوبه من ورانا
انا : ايوه اشبك متصله من بدري
سمر : عشان بقولك انك معزوم انت ولما على الغدا عندنا اليوم
انا : الحمدلله على الأقل افتك من اكل لما التحفي
سمر : هههه انتبي لا تسمعك
انا : طيب خليني اتصل بيها اقولها اننا معزومين عشان ما تطبخ
سمر : لا لا تتصل انا كلمتها قبلك
انا : طيب كويس , وعلى متى انشاء الله حتحطو الغدا ؟
سمر : على الساعه 4 كالعاده
انتهت مكالمتنا ..... بعد نص ساعه
اختي دي كلامها كتير ما يخلص
o]d[i
بعد الشغل رجعت البيت ولقيت لما بتتجهز
قالتلي " معزومين على الغدا "
قلتلها بكل استهزاء " لا ياشيخه , عارف"
ردت " عارفه انك عارف , بس كده طلعت من الحماس"
انا " حماس !!!"
ضحكت وقالت " عشان بوريهم الفديو وانت بتتكلم وانتا نايم ههاهاها "
انا " ممنوع "
ردت " مو على كيفك .... بوع "
انا " ايش بوع هادي"
ردت " مؤثرات صوتيه "ا
نا " لا ياشيخه "

وصلنا على بيت ابويا الساعه اربعه بالزبط
قبل ما اكمل القصه خليني اكلمكم عن اهلي

اولا:-
ابويا محمد
كان يشتغل مهندس بس قريب اتقاعد وفتح مطعم كبير
ابويا انسان عصبي بس قلبو طيب
ياما اتسطرت منو انا واخواني لمن كنا صغار

ثانيا :-
امي خديجه
اطيب انسانه في الدنيا
هاديه حكيمه حنونه وطباخه ماهره

ثالثا :-
اخويا احمد
اصغر مني بسنتين
من صغرو كان يحب التلفزيون والحين يشتغل في برنامج تلفزيوني
دا اللي خلاه يعيش في العاصمه
لسه ما اتزوج

رابعا:-
اختي الصغيره سمر
دلوعة العيله
لسه تدرس في الثانويه
تحب الكتابه مره ودايما تكتب قصص وتخلينا ابطالها ,ما ادري ليش
اخر قصه اتذكر خلت لما ساحره شريره وانا البسه حقتها
بما اني بحكيكم عن عيلتي خليني مره وحده احكيكم عن زوجتي وأهلها
لما
زوجتي العزيزه
تشتغل مدرسه في روضه
اتزوجنا قبل سنتين
نعرف بعض من ايام الطفوله
كانت جارتنا وكنا نلعب سوا دايما
لمن كنا صغار كنا ديما نتضارب, وكانت دايما تخربشني في وجهي بأظافيرها الطويله
وتعلم الجروح في وجهي وشكلي يصير تحفه
اتصورو بعد ما كبرنا اكتشفنا اننا نحب بعض
عيلت لما اكبر من عيلتي الصغيره
ابوها الله يرحمو مات قبل 3 سنوات
وامها ماشاء الله عليها لمن تشوفها وتشوف نشاطها تقول شابه
كل يوم تخرج من البيت ما عمري شفتها في بيتها
اخوانها كتاااار مني فاضي احكيلكم عنهم
عندها 5 اخوان واختين اكبر منها
اخو واحد اصغر منها اسمو سامي
دا الولد تحفه كل يوم طابب بيتنا
بس والله مسلي ومرح يغير جو البيت ( اشبو معطر جو )نرجع للعزيمه
لمن دخلنا البت لقيناهم قاعدين على الطاوله ومستعدين للأكل
قلتلهم " ماشاء كنتم حتبدأو من غيرنا "
" قلتلك حنحط الغدا الساعه اربعه ولا لأ " قالت سمر وكملت " خلاص من اليوم بنصير دقيقين في مواعيدنا "
المهم سلمنا عليهم وقعدنا على الطاوله
كانت الطاوله مليانه بكل انواع الطعام الشهي
اصلا لمن اشوف طبخ امي سعابيلي تطيح
" كيف حالك الحين يا انس ؟ لسه بتجيك كوابيس وكده؟ " قالت امي وهيا بتغرفلي رز
اكلت لقمه وقلت " والله لس بتجيني كوابيس فظيعه , وصارتلي اشياء غريبه دي اليومين كمان "
ابويا قال " اقول دا من كتر الجثث والجرايم اللي بتشوفها كل يوم "
رديت " لا انا طول عمري بين الجثث وعمرو ما صرلي شي إلا دي الفتره, تصدقو قبل امس كنت في الشارع وشافني رجال قان وقف مكانو وقعد يرتجف , قلتلو ايش فيك قام صرخ وقال الله يخليك بعد عني ما ابغى اموت , وبعدين هرب مني "
امي حطت يدها على صدرها وقالت " وي بسم الله "
دخلت سمر دخله من دخلاتها اللي مالها داعي وقالت " مسكين شاف وجهك البشع انفجع هو هو "
قلتلها " احلى من وجهك بوع "
سمر " ايش بوع هادي ؟ "
انا " مؤثرات صوتيه . اخترعتها زوجتي الجميله الصادقه "
طلت سمر على لما وقالت "اصلازوجتك من كتر ما قعدت مع الاطفال صارت تتكلم زيهم "
ردت لما بكل قوه " هو هو اصلا انا طول عمري يسموني الطفله البريئه بووع "
انا " الطفله البريئه ولا الجميله الصادقه حيرتينا "
لما " انا اسمي الجميله الصادقه واسمي الحركي الطفله البريئه بس نادوني لما "
الكل " ههههههه"
لما " ولا إذا مره فاضيين نادوني الطفله الجميله البريئه الصادقه "
" انا حسميكي السيده بطاطس , يناسبلك الاسم مره هو هو هو " وحده من دخلات سمر
ردت لما " وانس ايش حتسمي سيد برجر ولا سيد كاتشب "
الكل " ههههههه"

اكلنا وشبعنا وبعدها فرجتهم لما الفديو اللي اتكلم فيلو وانا نايم
الكل فطس ضحك عليا طبعا

من احلى اللحظات في الدنيا اللحظات اللي اكون قاعد فيها مع عيلتي
نفعد نتكلم ونفضفض لبعض
نشارك افراحنا واحزاننا معاهم
تحس بالأمان والانتماء

هايلد

14-09-2007, 06:24 PM

مشكوور اخوي على الجزء الثاني
بس اقول الجزء الاول كان احلى
بكثييييييييييييييييييير
انشوف التكمله يمكن يطلع الجزء احلى من الجزء الاول
"^.^
المهم
ننتظر التكمله
سلام

MALER

14-09-2007, 09:41 PM

لسه القصه في اولها
قصة الجزء الثاني حلوه
بس مو زي الجزء الأول
بس في ارتباط كبير بين القصتين عشان كده ما اقدر اكمل قصة عمار قبل ما اخلص الجزء التاني

اسيبكم مع التكمله انشاء الله تعجبكم
وأصبرو عليا حتأخر شويه
بس حرجعلكم بتكمله كبيره
وممكن انشاء الله القصه كامله

الفصل الثالث

بعد ايام

الكوابيس بطلت تجيني وما صرت اتكلم في النوم
ما ادري ايش اللي خلاها توقف , بس الحمد لله خلصت منها

كنت قاعد في بيت اهلي بتكلم مع سموره
كتبت قصه جديده وفرحانه بيها مره
القصه غريبه مره
انو انا ولما جبنا ولد وسمينا كنان
وانو كنان عندو قدرات عجيبه ومدري ايش ( خرافات عجيبه ) وانو يكرهنا عشان نحنا نخاف منو
المهم
طلعت لسه ما كملتها
تقول محتاره ايش تسوي النهايه
ياتخلي كنان يقتلني انا وامو ويعيش تعيس
او انو كنان يصير يحبنا ويعيش معانا حياه سعيده
انا اقترحت عليها تختار الاختيار التاني لأني مني ناقص اموت

والله هادي سمر بتجبلي الجنان بقصصها دي
بس القصه مو هنا
القصه انو بعد كم شهر من دا اليوم اعلنت لما خبر سار جدا جدا
لما حامل

لمن عرفت مررره فرحت
ولمن عرفو اهلي فرحو مررره كمان
اخيرا حيصرلي ولد
وامي وابويا حيصرلهم حفيد

شهور الحمل مرت بسرعه انا ما حسيت بيها بس اكيد لما حستها سنين

اخيرا اليوم هو يوم الولاده
الكل متجمع في المستشفى
حتى سمر ماراحت المدرسه عشان تجي معانا
احنا عارفين من اول انو النونو ولد
وقعدنا ندورلو اسم ومرره احترنا

ولدت لما بالسلامه
لمن شفت ولدي حسيت اهيرا بمعنى اني اكون اب
شلتو في يدي واعطيتو لأمي
امي مسكتو وقالت " شبه ابو "
انا قلت " شبهي!!! "
قالت امي " ايوا لمن اتولدت كنت نفس الشكل , ايوا صح اخترتو الاسم ولا لسه ؟"
انا " لا والله لسه , محتارين وموعارفين ايش نختار "
سمر مسحت على راس النونو وقالت " انا حخترلو اسم , سموه كنان زي اسم ولدكم في القصه "
انا " لا يا شيخه "
لما " لا والله الأسم مره حلو عجبني مرره خلاص نسميه كنان "
اول شي اعترضت بس في النهايه وافقت
صار عندي ولد
اسمو كنان

هايلد

15-09-2007, 01:19 AM

مممم تكمله
حلوه أضن ان القصه
راح تمشي مثل ما ألفتها سموره
والله العالم
المهم
ننتظر التكمله
^^

MALER

19-09-2007, 02:03 AM

الفصل الرابع

مرت الأيام بسرعه
مني مصدق انو اليوم بنحتفل بعيد ميلاد كنان
اليوم يصير عمر كنان سته سنين
خلال السنوات اللي مضت كان كنان زي اي ولد عادي
يحب امو وابوه ويحب اللعب ويحب الحلويات ويكره النوم والأكل بستثناء الحلويات
كنان الولد المدلل مو بس عندي انا ولما
امي وابويا وسمر مدلعينو اخر تدليع ( مين قدو ملك زمانو )
اي شي يبغاه يجي الين عندو
والله انو ابويا يمشيه ويشتريلو العاب اكتر مننا لمن كنا صغار
بس والله ما الومهم لأن لمن تشوفو كنان يدخل قلبكم بسرعه
لأنو ولد لطيف ولزيز
يعني لو قلي ابا كده ولاكده ما اقدر اقولو لأ

المهم
كل شئ حيتغير اليوم
كنان اللي اتعودنا عليه حينتهي
وتبدأ المشاكل

العام 2007

الكل بيستنى دي اللحظه من زمان
انا ولما وكنان وابويا وامي وسمر
واخويا احمد جانا من العاصمه مخصوص عشان دي اللحظه ( لا تصدقو اصلا جاي عشان عندو شغل هنا )
اليوم عيد ميلاد الولد المدلل عند العيله ولدي الغالي كنان
البيت كلو بلالين وزينه من اوله لأخرو
وجايبين كيكة عيد ميلاد كبيره فيها سته شموع ( محنا دارين انو في اختراع اسمو تحط شمعه على شكل رقم سته )
المهم
اشتغلت الكميرا
وبدأ التصوير ( هادي سمر جايبه معاها كميرا عشان تصور الحدث الكبير )
طفينا الأنوار وولعنا الشموع وقعدنا نغني هابي بيرثداي تو يو
كنان كان مبسوط مرررره طاير من الفرحه ( من كتر الهدايا اللي جاتو )
بعد ما خلصنا الأغنيه
قالت سمر لكنان " يلا اتمنى ستة اماني وبعد كل وحده طفي شمعه
انا قلتلها " من فين خرفتي التخريفه دي "
طلت فيا وقالت " مالك شغل دي الحركه من القصه حقتي "
وقف كنان شويه كأنو قاعد يفكر في امنيه في راسو
بعدين طفا اول شمعه
وقعد شويه كمان بعدين طفا تاني شمعه
لما قالت " ولدك دا ماشاء الله عليه يسمع كلام سمر على طول وانا امو ما يسمع كلامي "
طفا تالت شمعه
قالت سمر للما " انت ايش فهمك انا الكل يسمع كلامي "
طفا رابع شمعه
قال احمد " كنان اتمنالي اني برنامجي الجديد يكسر الدنيا "
طفا خامس شمعه
انا " يلا بقيت وحده ....غمض عينك وتمنى شي من كل قلبك ويعدين طفي الشمعه "
غمض كنان عيونه وقعد كده عشره ثواني
وبعدها قرب وجهو من الشمعه الأخيره وهف الهفه الخيره
وطفا اخر شمعه
........

عمت لحظة سكوت المكان
الكل حسه احساس غريب
لثانيه نسيت كل شي
والدنيا صارت بيضه
بس بعد ثانيه رجع كل شي
حطيت يدي على راسي وطليت حوليا
كانو كلهم حاطين يدهم على راسهم وفي وجههم نظرة تعجب
الكل صابهم نفس الحاله
ماعدا كنان
قعدنا ساكتين كده وكل واحد يطل في التاني
قطع السكوت صوت كنان " ماما قطعي الكيكه ابا اكل "
لما " ططيب الحين اقطعها يا حبيبي "
لمن شالت لما السكينه عشان تقطع الكيكه طاحت من يدها على الأرض
قامت شالتها من الأرض وقالت " اوه مدري اشبي مني مركزه ... استنو الحين اجيب سكينه تانيه من المطبخ "
راحت جابت سكينه جديده وقطعت الكيكه

بعد ما اكلنا الكيكه نام كنان على نفسو
واهلي رجعو بيتهم

شلت كنان وحطيتو في سريرو وغطيتو
لاحظت انو في حاجه غريبه على جبهتو
قربت من وجهو عشان اشوف ايش هوا
عندها فتح كنان عينو وكان لونها احمر وشكلها مخيف مخيف
انا انفجعت وطحت على ورا
لمن رجعت طليت فيلو لقيت نايم
قلت في نفسي شكلي بتخيل يبغالي اروح انام

خرجت من غرفة كنان ورحت غرفتي

لمن دخلت لقيت لما قاعده مبلمه على كرسي التسريحه
سألتها " اشبك مبلمه بتفكري بأيش؟"
لما " ما ادري ايش فيا , بس حاسه انو في شي صار ..... شي غلط صار "
انا " يابنت عن ايش ببتتكلمي انتي؟"
لما " ما ادري .... "
انا " نامي نامي هادا من قلت النوم "

انتهى اليوم على خير
بس الله يستر من اللي جاي

اسف مره حتأخر في التكمله الجايه
امكن الأسبوع الجاي انزلها
بس ابشركم القصه الحين تبدأ ( الحمس بدأ ):D

هايلد

19-09-2007, 12:42 PM

مشكور اخوي على التكمله الروعه
من جد بدأت القصه تحمس
اتمنى انك تقدر تحطها بسرعه
انتظر التكمله على احر من الجمر
سلام

MALER

24-09-2007, 07:22 PM

الفصل الخامس

اليوم التاني صحيت من بدري ورحت الشغل كالعاده
جاتني قضيه عجيبه غريبه ما تتصدق
50 شخص ماتو في ثواني
لمن قالولي اول مره ما صدقت
بس جاني رئيس الشرطه وطلب مني اني اروح لمكان الحادثه
اخدت معايا مساعدي عماد وركبنا السياره
واحنا في الطريق قعد عماد يفهمني ايش الحادثه
قالي انو عيله كامله كانت متجمعه في بيت واحد
وفجئه انطفت الكهربا ورجعت والكل ماتو
وسبب الوفاه إلا الأن مجهول
وأغلب الأطباء قالو موته طبيعيه
والأغرب من كده انو واحد من العيله بقي حي
اسمو عمار وعمرو 16 سنه

وصلنا للموقع
كانت الدنيا مقلوبه
البيت محوط بالشرطه
والصحفين متلمين في الموقع
دخلت من بيت الناس انا وعماد اللين ما وصلنا لباب البيت
لمن جيت بأدخل جا شرطي منعني
قلتلو انا المحقق انس وطلعتلو بطاقتي
طل في البطاقه وقال " انا اسف , اتفضل"
دخلت انا وعماد البيت
الشرطه شالت الجثث امس
كان البيت عادي ومافي اي اثر لأي شي غريب
دخلت المطبخ وأخدت عينه من المويه والأكل عشان نفحصها في المختبر ممكن يكونو اتسممو
دورنا البيت كلو بحثا عن مسبب للوفاه
لكن مالقينا اي شي
طلعت فوق بالدرج
ولقيت غرفه صغيره بابها ازرق
دخلت الغرفه وشفتو
شفت عمار
كان قاعد فوق السرير زي الميت ما يتحرك
رحت وقعدت جنبو
قعد ساكت وما اتحرك ولا حركه
ملامحه كانت طفوليه مع انو عمرو 16 سنه
شعرو بني ناعم بس ملفلف شويه
حطيت يدي على راسو وقلت " كيف حالك ياعمار ؟ "
.........
ما رد عليا
نزلت يدي من راسو وقلت " عارف انو اللي صار معاك شي ما يتصدق... وليك الحق انك تكون بدي الحاله "
دخل علينا مساعدي عماد وقلي انو فتش الدور التاني كلو وما لقا شي
قلتلو ينزل يستناني تحت
طليت في عمار وقلت " لازم تساعدنا عشان نوصل لحل هاذي القضيه .... ممكن تقلي ايش صار امس بالتفصيل ؟ "
فجئه بدأ عمار يبكي ودموعو تنزل من عينو
قلتلو " انا اسف بس لازم اعرف ..... ايش صار امس "
رفع يدو وغطى وجهو وقال " ما ادري ..... ما ادري "
انا " طيب انت كنت فين لمن حصلت الحادثه "
رد عليا وهوا بيبكي " انا كنت هنا .... في الغرفه ... و و بعدين انطفت الكهربا ... الكل كان بيصرخ ... وبعدين سكتو "
انا " طيب ممكن اعرف ليش كانت كل العيله متجمعه عندكم في البيت "
رد عليا " ابويا ...... ابويا قلهم يجو دا اليوم .... وهوا ما جا ... طلع من يومين وما رجع "
انا " طب عندك اي احد تروح عندو ؟ "
قعد يبكي وما رد عليا
انا قمت من السرير وطلعت من جيبي بطاقتي
وحطيتها على طاوله صغيره كانت جنب السرير
وقلت " هادي بطاقتي ... اي شي تبغاه اتصل بي "
طلعت من الغرفه
ونزلت تحت عند عماد وسألتو عن ابو عمار
قلي انو خرج من يومين وما رجع إلى الأن
وانو الشرطه بتدور عليه

رجعت قسم الشرطه وقعد افكر في القضيه
وانا بفكر فيها دق التليفون
رديت على التلفون

المتصله : الو الو
انا : الو ايوا
المتصله : المحقق انس ؟
انا : ايوا انا انس مين معايا ؟
المتصله : ممكن تجي تقابلني بكره في مطعم ابوك
انا : ممكن اعرف انتي مين ؟
المتصله : الأمر متعلق بغروب , اكيد ما نسيتها , في شي ضروري لازم اكلمك فيلو .
انا : .........( ما عرفت ايش اقول بعد ما سنعت اسم غروب )
المتصله : اسمي فاتن ..... اشوفك بكره

قفلت السماعه وتركتني غارق في بحر من الحيره
بعد ما مرت سبع سنوات
شكلو قضية غروب حتنفتح مره تاني

هايلد

25-09-2007, 12:56 PM

مشكور اخوي على التكمله ^^
مشاء الله عليك بارع
عجبني هالجزء^^
وننتظر الباقي

MALER

25-09-2007, 07:08 PM

شكرا مرررره هايلد ردودك تشجعني مرررره
ترى فاتن اللي اتصلت بأنس هيا نفسها فاتن اللي في الجزء الأول
انتظروا اليوم التكمله انشاء الله

هايلد

25-09-2007, 07:26 PM

ترى فاتن اللي اتصلت بأنس هيا نفسها فاتن اللي في الجزء الأول
@.@ @.@ @.@ @.@
ماكنت ادري ؟؟!؟!؟!؟
المهم مشكور ^^

MALER

27-09-2007, 04:52 AM

الفصل السادس

بعد الدوام رجعت البيت

لمن دخلت شميت ريحة طبيخ

قلت في نفسي ياسلام حناكل اكل بيت

دخلت المطبخ ولقيت لما قاعده تطبخ مكرونه بالبشميل

قالتلي " اهلا وسهلا "

رديت عليها " ما شاء الله ايش التطورات دي مكرونه بالبشميل وحركات "

لما " ايش عرفك , انا اصلا كانو يسموني الطباخه المحترفه لطبق المكرونه بالبشميل "

انا " ما شاء الله ايش دا اللقب الطويل "

حطت لما المكرونه في الفرن وقالت " بس خليها تستوي وحتاكل اصابيعك وراها"

طلعنا من المطبخ وقعدنا في الصاله

سألت لما " كنان فين ؟ "

ردت عليا " جا من المدرسه مره تعبان و نام , تعرف امس نام متأخر "

قعدنا ساكتين شويه وبعدين بدينا نتكلم تاني

اسيبكم مع الحوار اللي دار بيننا

انا : تعرفي اليوم من اغرب واعجب الأيام في حياتي .
لما : ليش عشان اكتشفت اني طباخه ماهره هع هع .
انا : هههه لا ياشيخه .
لما : طيب قلي ليش اليوم اغرب واعجب يوم في حياتك .
انا : جاتني قضيه غريبه , عيله بكاملها ماتت فجئه بدون سبب وواحد ولد نجي منهم .
لما : بسم الله , من جدك بتتكلم انت ولا تمزح ؟!
انا : والله منجد , خمسين شخص ماتو في ظروف غامضه .
لما : والولد المسكين ايش صار فيه ؟
انا : والله حالتو تبكي , قعدت معاه شويه قلبي اتقطع .
لما : الله يعينو , طيب يعني ما بقيلو احد من عيلتو .
انا : ابوه مختفي , وفي اتنين اقاربو وحده تعيش في العاصمه والتاني بره البلاد .
لما : والله منجد قضيه عجيبه .
انا : لا ولسه كمان .
لما : كمان ايش ؟!
انا : ماعرفتي فاتن كلمتني .
لما : انس مين فاتن دي اعترف .
انا : هههه وحده اتصلت اليوم عليه , وحددت معايا موعد عشان تقابلني .
لما : كمان موعد يا خاين .
انا : ههههه لو تدري بتقابلني عشان ايش .
لما : عشان تحددو موعد الفرح , طيب طيب انا اوريك يا انس بتتزوج عليا .
انا : الحين انا قلت شي عن الزواج !!
لما : انا قلبي كان حاسس من اول .
انا : لا لاتخافي انا عمري محا اتزوج عليكي وطول عمري حكون مخلص ليكي .
لما : ايوا سكتني بكلمتين .
انا : يا بنت الحين منجدك انتي زعلانه .
لما : ازعل طبعا اجل ايش , بس تعرف اشتريلي الشنطه اللي نفسي فيها من اول هديه وانا ابطل زعل ههههه .
انا : ماشاء الله عليكي جاهزه.
لما : ايوا صح ما قلتلي مين فاتن وايش تبغى منك .
انا : والله ما ادري , اتصلت بيا وقالت تبى تقابلني بخصوص قضية غروب .
لما : ومين غروب دي كمان .
انا : غروب المجنونه اللي قتلتها قبل سبع سنين .
لما : اها الحين اتذكرت .
انا : ايش دي الريحه ؟!
لما : ...... يالهوي المكرونه اتحرقت .

انحرقت المكرونه

وأكلناها محروقه

طعمها مره مو جيد

وانا بأكل قلت للما " ياسلام هيا دي الأكله اللي حاكل اصابيعي وراها "

ردت لما " انت السبب شغلتني بالكلام "

اما كنان اكل شويه بعدين بطل

قمت قلت " سيبوكم من دا الأكل , يلا نروح مطعم ابويا ناكل هناك "

غيرنا ملابسنا ورحنا المطعم

طلبنا كل ما تشتهيه انفسنا , طبعا مطعم ابونا نطلب اي شي نبغاه

خلص كنان اكلو بسرعه وراح يلعب في الألعاب الموجوده في المطعم

انا ولما قعدنا وكملنا اكلنا

مره كان فيا النوم ولما مهي راضيه تخلص اكل

قمت غفيتلي شويه على الطاوله

صحيت على صوت لما وهيا تقولي " روح جيب كنان خلينا نمشي"

رحت اجيب كنان من مكان الألعاب

لمن دخلت لقيت كنان قاعد يلعب لوحدو والأطفال التانين مبعدين عنو ويطلو فيه بنظرات غريبه

مسكت يد كنان وقلتلو " يلا كنان نرجع البيت "

واحنا في السياره راجعين للبيت

سألت كنان ليش الأولاد التانين ما لعبو معاه

قام قال " هما ما يلعبو معايا عشان يخافو مني "

انا ولما انفجعنا لمن قال زي كده

انا " لا ياحبيبي ماكانو خايفين امكن كانو مكسوفين "

طل كنان فيا نظره مخيفه وقال بصوت غريب " لاتكذب , انت عارف انهم كانو خايفين , وانت عارف ليش "

طل في المقعد اللي قاعده فيلو لما وقال " صح كلامي يا ماما ؟"

رد صوت مخيف " صح يا ولدي "

هادا مو صوت لما ... دا صوت ......

طليت جنبي وشفتها

غروب بشكلها المخيف

انا انفجعت واختل توازن السياره

وما قدرت اصيطر عليها

قطعت الأشاره وجات شاحنه من الجنب

حاولت ابعد عنها لكن الشاحنه كانت مسرعه

وطخخخخ

هايلد

27-09-2007, 12:17 PM

التكمله حلووه
^^
وننتظر البقيه

MALER

28-09-2007, 05:53 AM

الفصل السابع

صحيت لقيت نفسي فيي المطعم
شكلي كنت بحلم
كانت لما راجعه للطاوله ومعاها كنان
وقفت عندي وقالت " يلا نمشي "
انا " طيب يلا "
طلعنا من المطعم وركبنا السياره
واحنا في الطريق قالت لما " انس جبلي شغاله خلاص انا تعبت , كل يوم ارجع من الشغل تعبانه ولسه ورايا شغل البيت "
انا " طيب يا حبيبتي , طلباتك اوامر "
كان كنان قاعد في الكرسي اللي ورا يتفرج من الشباك
وقفنا عند الأشاره وكانت موقفه جنبنا سياره سودا
شاور كنان عليها وقال " بابا تتحداني اخلي السياره دي تنصدم "
انا استغربت وقلت " يا ولدي ليش تقول كده "
مشيت السياره السوده مع انو الأشاره لسه ما فتحت
وجات من الجنب شاحنه كبيره مسرعه
وطخخخخخ

كان حادث مروع
السياره ما بقي فيها شي سليم
والسائق الله يرحمو

رجعت البيت ودخلت الغرفه مع لما
كنت مرتبك مره
معقوله يكون كنان السبب في الحادث
قلت " لما انا خايف "
ردت عليا " خايف من ايش ؟ "
انا " خايف يكون كنان منجد السبب في الحادث "
ردت " يارجال بلا غباء , اللي حصل مجرد صدفه "
انا " انتي ما تعرفي ايش اللي صار "
استغربت لما وقالت " ايش صار ؟! "
انا " لمن نمت في المطعم حلمت حلم فظيع "
حكيتلها الحلم بالتفصيل وبعدها قلت " حتى الشاحنه اللي صدمت السياره السوده هيا نفسها الشاحنه اللي في الحلم "
لما " منجدك انت ولا بس بتخوفني "
رديت عليها " والله العظيم ما بكذب عليكي "
لما " طيب برضو تحصل , مرات تشوف في الحلم اشياء ممكن تصير في المستقبل "
انا " ممكن , بس انا حاسس اانو في شي غريب بيصير "
لما " خلاص بطلك تخيلات , حسستني اننا عايشين في وحده من قصص اختك سمر "
دق جوال لما
لما " هههه لسه بنجيب في سيرتها اتصلت "

لما : الو
سمر : الوووو
لما : الوووو
سمر : بابا فين .. بابا هنا ... هنا هو هههههههه
لما : دمك مره خفيف .
سمر : طبعا طبعا
لما : شو بدك ؟
سمر : لا والله قلبتي لبناني
لما : هع هع
سمر : انا متصله عشان اقلكم انتو بكره معزومين عندنا على الغدا
لما : انا وكنان حنجي بس انس بكره عندو موعد مع فاتن
سمر : مين فتن دي ؟!
لما : يييي قصه طويله بكره احكيكي اياها .
سمر : طيب خلاص مستنينك بكره , على الساعه اربعه كالعاده
لما : طيب يلا باي
سمر : باي

خلصت لما كلام وطلعت بره الغرفه
وانا اخدتلي غفوه قلت خليني اريح مخي من الأفكار الي في راسي

اليوم اللي بعدو

لمن رحت الشغل جاني عماد
قلي انو نايج التحاليل طلعت ( تحليل المويه والأكل اللي كان في بيت عمار )
وانو ما لقو اي ماده سامه او غريبه
انا قلت " كده القضيه صارت صعبه مررره "
عماد " بتصوري انو الأفضل اننا نركز على البحث عن والد عمار , اتوقع انو هو يعرف السبب "
انا " هذا اذا ما كان هوا السبب "
دق التلفون
رديت

انا : الو
فاتن : ايوا انا فاتن
انا : عرفتك من صوتك
فاتن : موعدنا اليوم الساعه اتنين في مطعم ابوك
انا : اوكي بس .....
فاتن : لا تتأخر

انتهت المكالمه

هايلد

28-09-2007, 01:26 PM

التكمله عجييييبه
ماكنت اتخيل انه بكون حلم
بس مشاء الله عليك افكارك حلوه
ابدعت فالقصه
غيرت رايي انا اشوف الحين هالجزء احلى

MALER

30-09-2007, 03:29 AM

لمن خلص الدوام طلعت طوالي على المطعم

كان بقيلي خمسه دقايق على الموعد

لمن وصلت المطعم كانت الساعه 2 وخمسه دقايق

دخلت المطعم جاني محمد ( جرسون ) وقلي " في بنت سألت عنك يا سيد انس "

قلتلو " ايوه فينها ؟ "

قلي " اتفضل معايا اوديك طاولتها "

اخذني معاه ووداني عندها

اول ما شفتها طلت فيا وقالت " انس ؟ "

انا " فاتن ؟ "

ضحكت وقالت " اتفضل اقعد "

مره ما اتوقعتها تكون صغيره قد كده

عمرها يجي 16 او 17 سنه مو اكتر

شعرها اسود رابطتو على ورى وعندها قصه ومنزله خصلتين من الجنب

كانت لابسه نظاره شمسيه شالتها وحطتها على الطاوله وكشفت عن عيونها الزرقه

عيونها مره حلوه ماشاء الله عليها

قلتلها تشربي شي

ردت عليا " لا شكرا مستعجله , ما اقدر اطول "

قلت " على راحتك "

مدت يدها وقالت " هات يدك "

انا استغربت وقلت " اسف ايش قلتي ؟ "

عادتها تاني " هات يدك "

مديتلها يدي

مسكتها وقعدت ساكته شويه

كأنها بتقيس نبضات قلبي

وفجئه اترسمت على وجهها ملامح غريبه

تركت يدي وقالت " انت قتلت غروب ولا احد تاني قتلها "

قلتلها " انا قتلتها .... بس كان دفاع عن .."

ماخلتني اكمل كلامي وقالت " طيب جبت ولد بعد ما قتلت غروب "

رديت " ايوا ... ولدي كنان "

قامت فاتن من الكرسي بسرعه وقالت " هادا اللي كنا خايفين منو "

انا مني فاهم شي

جات بنت تانيه من بره المطعم وقفت جنب فاتن وقالتلها " بسرعه لازم نمشي "

فاتن قالت " سيد انس ... نتقابل مره تانيه "

وطلعت هيا والبنت التانيه من المطعم

كنت احسب انو لقائي مع فاتن حيجاوبلي على اسئله كثيره

بس اتضح انو الأسئله الأن زادت تعقيدا

هايلد

30-09-2007, 03:01 PM

التكمله حلوه
ومشوقه
^ــ^
مشاء الله على هالابداع
ننتظر التكمله^^
دمت

MALER

01-10-2007, 06:10 PM

الفصل الثامن

مر اسبوعين وما صار شي جديد في القضيه

وما جاني اي خبر من فاتن

اما على الصعيد المنزلي حصلت بعض الأمور الجديده

جبنا خدامه اسمها سومياتي

ولسؤ حظنا طلعت شغاله مو كويسه

ما تعرف تسوي الشغل وشايفه نفسها مررره

وولدي كنان مره ما يحبها

في يوم قلتلها تسويلي شاهي بالحليب قامت سوتلي كورنفلكس , ون دون حليب كمان

ولما خلاص طقت منها , وانا اقلها اصبري عليها لسه جديده مع الوقت تتعلم

اليوم كنا معزومين على فرح انا ولما

لما من خمسه ساعات بتتجهز وانا بستناها

خلينا كنان مع سومياتي ورحنا الفرح

كان الفرح ملل

ما صدقت ألين ما حطو العشا اكلت بسرعه و خرجت من الفرح

اتصلت على لما وقلتلها " انا ماشي , تمشي معايا ولا اجي اخدك بعدين "

قالت " لا لا استناني الحين اجي الفرح طفشش "

قلت " يلا مستنيكي بره "

لمن رجعنا البيت كانت الساعه 1 الليل

كنان كان نايم في غرفتو

انا دخلت المطبخ اجيب مويا

وانفجعت لمن شفت سومياتي في المطبخ وماسكه في يدها سكينه

انا قلتلها " سومياتي ايش في ؟ "

قانت قالت بصوت عالي " بعد عني "

وقعدت تتكلم كلام اندنوسي بسرعه

انا خفت وناديت لما

جات لما تحاول تفهم منها ايش في

قامت عصبت سومياتي وقعدت تصرخ

قلت للما بصوت واطي " خلينا نطلع من المطبخ ونقفل الباب عليها لاتقوم تسوي فينا ولا في ولدنا شي "

طلعنا من المطبخ وسكرنا الباب

واتصلت على اصحابي في مركز الشرطه عشان يجو بيتنا يحلو الموضوع

جات الشرطه بعد ربع ساعه تقريبا

رأيسهم هو خالد واحد من اعز اصدقائي

اعطيت خالد مفتاح المطبخ وقلت " انتبه ترى كان معاها سكين "

اخد المفتاح وقال " لاتخاف انت بتتعامل مع خبير "

فتح الباب بشويش

لمن دخلنا كانت سومياتي على الأرض ما تتحرك والسكين لسا في يدها

قرب خالد منها واخد السكين بسرعه

بس برضو ما اتحركت

دفها خالد من كتفها دفه خفيفه قامت طاحت على الأرض

كانت عيونها مفرصعه وفمها مفتوح

شكلها مخيف اعوذ بالله

طل فيا خالد وقال " الحرمه ميته "

انا انفجعت وقلت " ممميته "

قلي خالد " بس واضح انها ما استخدمت السكين "

انا وقفت في مكاني وما عرفت ايش اقول

قال خالد " ممكن تكون اخدت نوع من انواع السم او انها ماتت بسبب سكته قلبيه او اعراض مرضيه "

انا " بس يا خالد الحرمه كانت سليمه ما فيها شي "

قال خالد " انا حطلب من الطبيب انو يفحص الجثه ويعرف سبب الوفاه "

اخدت الشرطه الجثه وطلعت بعد ساعه

لما خافت وقالت بروح اطمن على ولدي

رحت معاها لغرفة كنان

كان كنان نايم في سابع نومه

ومبتسم وهو نايم

باستو لما على خادو وقالت " الحمد لله انو ماشاف اللي صار "

كانت في ورقه تحت رجلي

شلتها وطليت فيها

كانت رسمه رسمها كنان

راسم وحده حرمه مخيفه طايحه في الأرض وماسكه سكينه

انا ما صدقت لمن شفت الرسمه

هل ممكن انو الحرمه اللي في الرسمه

هيا سومياتي

هايلد

01-10-2007, 08:21 PM

يهبل كنان ^^
انا حاسه انه هو السبب فصطدام السياره
وموت الخدامه
المهم ننتظر التكمله
بديت اتحمس اكثر لاتتأخر

MALER

02-10-2007, 10:41 PM

حسيت نفسي ضايع ومني عارف ايش اسوي

هل اللي بيصير حوليا حقيقه ولا انا بتخيل

صرت احس انو ولدي مخبي سر كبير

بحاول اوصل اللي حاسس بيلو للما بس هيا ما تصدقني

مافي غير شخص واحد اقدر اتكلم معاه في دي الحاله

سمر

اليوم اللي بعدو كان خميس

قلت اروح بيت اهلي وأكيد حلاقي سمر لأنو اليوم ما عندها جامعه

لمن وصلت هناك كانت امي بتطبخ

سلمت عليها وسألتها " فين سمر ؟ "

قالت " نااااااايمه "

انا " طيب انا حطلع اصحيها "

طلعت غرفتها وصحيتها

وقلتلها تقوم بسررررعه بتكلم معاها

صحيت وغسلت وجهها ورجعتلي

قالتلي " ايش الشي المهم اللي مصحيني من النوم عشانو "

انا قلت " حأقولك بس اسمعي القصه كلها ولا تضحكي عليا "

قالت " طيب يلا قول "

قلتلها على كل الأشياء الغريبه اللي صارت الأيام الأخيره

عن السياره السوده وسومياتي

لمن سمعت اللي قلتو ملامح وجهها اتغيرت

وقالتلي " انت منجدك تتكلم "

رديت عليها " والله العظيم ما بكدب "

قالتلي " مستحيل , مستحيل يصير كده , كل شي بيصير زي ........ "

وسكتت

انا قلتلها " زي ايش ؟ "

طلت فيا وقالت " زي القصه اللي كتبتها زمان "

انا " لا تكدبي "

ردت " والله العظيم ما بكدب , وإذا منتى مصدقني اليوم ادورلك في ملفاتي القديمه واطلعلك القصه "

سكتت شويه وكملت " بس كيف ممكن يصير زي كده ..... ممكن عشان انا اخترتلو نفس اسم الولد اللي في القصه "

انا قلت " في سر كبير ورا كل دي الأشياء , انا لازم اكلم كنان "

الفصل التاسع

في البيت

" كنان ممكن تفهمني ايش يعني دي الرسمه ؟ " قلت لكنان وانا ماسك رسمتو في يدي

اخد الرسمه من يدي وقال " دي سومياتي ماتت "

قلتلو " طيب انتا متى رسمتها ؟ "

سكت شويه وقال " امس قبل ما أنام "

انا خلاص ما قدرت استحمل وقلت بصوت عالي " كنان كيف عرفت انها حتموت طيب مدام هيا ماتت بعد ما نمت "

خاف كانان مني وقعد يبكي

جات لما وقالت " ايش في , ايش سويت للولد "

انا ما رديت عليها وطلعت بره الغرفه

لحقتني لما وقالت بصوت عالي " خلاص بطلك خرافات , سيب ولدي في حالو "

انا رديت " خرافات , تدري انو كل شي بيصير كان مكتوب من 7 سنين "

وقفت لما وسكتت

انا " الأشياء اللي صارت مكتوبه في قصة سمر "

لما بدأت تبكي " مستحيل , مستحيل " قالت لما ودموعها بتنزل من عينها

وفجئه ونحنا كده سمعنا صوت باب غرفة كنان انقفل بقوه

لما راحت وحاولت تفتح الباب بس ما قدرت

شكلو كنان قفل على نفسو من جوا بالمفتاح

لما " كنان حبيبي افتح الباب "

بس كنان ما رد عليها

انا قلتلها حطلع من بره البيت اطلعلو من الشباك امكن صرلو شي وسط الغرفه

لمن وصلت لبابا البيت

حاولت افتحو ما فتح

قلت للما " الباب مو راضي يتفتح , انتي قفلتي بالمفتاح "

ردت عليا " لأ طبعا "

طلعت مفتاح البيت من جيبي

حاولت افتحو برضو ما فتح

" ايش اللي بيصير " قالت لما

قلتلها " لاتخافي تعالي نطلع من واحد من الشبابيك "

جريت لما لواحد من الشبابيك فتحتو بس ما طلعت منو

قربت من عندها وقلت " يلا اطلعي اشبك ؟ "

صرخت وبعدت عن الشباك

لمن طليت من الشباك شفت شي ما يتصدق

مع اننا في الدور الأول

كانت الأرض بعيده مره , كأننا اترفعنا 20 دور

لما قعدت على الأرض تصرخ وتقول

" ايش دا , ايش بيصير "

انا ما عرفت ايش اسوي

قعدت واقف مكاني وارتجف من الخوف

معقوله

معقوله نكون انحبسنا هنا

هايلد

02-10-2007, 11:45 PM

الجزء يحممسسس وعجيييييييب
انا اقول من زعل كنان عصب على اهله
وحبسهم او ان هو اساسا ميعرف شي عن نفسه
ولا يدري بلي يسويه
والله العالم
المهم فنتظار التكمله الجايه

وحيده كالقمر

04-10-2007, 01:50 AM

مشكووووور اخوي على القصه توني ماقريتها كلها بس شكلها حلوه على العموم لاتطول بالتكمله ^^

MALER

04-10-2007, 11:57 PM

حاولت اهدي لما بس هيا كانت خايفه مره
دق جوالي
رديت

سمر : انس اطلع من البيت انتا ولما بسرعه .
انا : للأسف اظن انو فات الأوان .
سمر : انا اسفه , دوبي لقيت القصه في واحد من ملفاتي القديمه , كان لازم احذركم قبل ما يصير شي .
انا : ايش اللي بيصير طيب فهميني .
سمر : انتو محبوسين في عالم تاني , عالم من اختراع كنان وهوا الوحيد اللي يتحكم بيلو .
انا : طيب ايش الحل ؟
سمر : الصفحات عندي ناقصه ما اعرف ايش اللي حيصير بعد كده
انا : طيب انت منتي متذكره اي شي .
سمر : متذكره شي واحد , انكم محا تطلعو من عالن كنان بسهوله ... ايوا صح اتذكرت , انتبهو لاتقربو من المط........

انقطع الأتصال
حاولت اتصل تاني بس مو راضي يتصل
اخدت جوال لما بس برضو مو راضي يتصل , وكمان جربت تلفونات البيت نفس الشي
رحت عند باب غرفة كنان احاول اتكلم معاه
" كنان خلاص وقف دا الشي امك حتموت من الخوف "
ما رد عليا بس اداني ورقه من تحت الباب مكتوب عليها بخط كنان " السطوح "
امكن كنان يبغاني اطلع السطوح , اكيد في شي هناك
رحت عند لما وقلتلها لازم نطلع السطوح
مسكت يدها و ساعدتها عشان تقوم من الارض
وطلعنا سوا الدرج
وصلنا لباب السطوح لكن للأسف كان مقفل بحبل , والحبل كان معقد مره وما قدرت افك العقده
قالت لما " روح جيب سكينه من المطبخ "
انا قلت " طيب استنيني هنا انا حنزل اجيب السكينه وارجعلك "

نزلت الدرج بسرعه ورحت جهة المطبخ
فتحت باب المطبخ ودخلت
فتحت الدرج اللي فيلو السكاكين بس ما لقيت فيلو اي سكينه
سمعت صوت الباب بينقفل من ورايا
لمن طليت ورايا شفت سومياتي
انا انفجعت وصرخت
كان وجهها ابيض كأنها طلعت من القبر , وكانت ماسكه في يدها سكينه وهجمت عليا
انا مسكت يدها ومنعتها من انها تطعني ورميتها بعيد برفزه قويه
طاحت على الأرض وانفتح فمها وبدأ يطلع منو ديدان شكلها مقرف
طلع من فمها ديدان بالألاف وكانت بتتوجه ناحيتي
انا قعدت ادعسها برجلي بس كانو اكتر من اني اقدر عليهم
بدأو يتسلقو على جسمي ويتلمو عليا الين ما طيحوني على الأرض
عندها قامت سومياتي من الأرض وجات عندي وقالت " مستر انت لازم تموت , انتا السبب " وهجمت عليا بالسكينه
ماكنت قادر اتحرك بسبب الديدان وسمياتي طعنتني في قلبي وقعدت تضحك بصوت عالي
في دي اللحظه حسيت بألم فظيع وصرت اشوف الدنيا بيضه

لمن رجعتلي الرؤيا كانت السكينه في يدي
وسومياتي مافي , حطيت يدي على قلبي اكتشفت اني سليم مافيا شي
كأني كنت بتخيل

طلعت من المطبخ وطلعت الدرج
قالت لما " اشبك اتأخرت "
قلتلها " بعدين اقلك خلينا نفتح باب السطوح اول "
قطعت الحبل بالسكين وفتحت الباب
لمن فتحتو دخل نور قوي مره
قلت " اظن لو عبرنا دا الباب حنرجع لبيتنا الحقيقي "
دخلت وسط النور ومديت يدي للما وقلت " يلا تعالي خلينا نرجع "
طلت فيا وقالت " ونترك كنان لحالو"
قلتلها " المكان خطر هنا انت ما تعرفي ايش صرلي , يلا هاتي يدك "
مسكت يدي وقالت " طيب "
وفجئه طلع من ورى لما ايادي كثيره مسكتها وسحبتها
فلتت يدي يد لما
وجات يد من قدامي ودفتني جوا النور
لما صرخت " انس لا تسيبني "
انا حاولت ارجعلها لاكن الباب انقفل في وجهي

فجئه النور اختفى
رجع كل شي حوليا طبيعي
فتحت الباب بسرعه عشان انقذ لما
بس لمن فتحت الباب ما لقيتها
نزلت تحت ودورت عليها كل مكان وما لقيتها

كل شي رجع على طبيعتو
حتى باب البيت انفتح
غرفة كنان كانت مفتوحه بس ما كان في كنان

اظن اني رجعت للعالم الحقيقي

بس لما لسه محبوسه هناك

هايلد

05-10-2007, 12:17 PM

عجيييييبه التكمله^^
مشاء الله مشاء الله
مبدع×مبدع
المهم ننتظر التكمله
بفارغ الصبر

MALER

05-10-2007, 04:21 PM

الفصل العاشر

خلاص وصلت لمرحلة الأنهيار
قعدت على الأرض وبدأت دموعي تنزل لا اراديا
ليش بيصرلي زي كده ؟
ليش كل شي حوليا مو طبيعي ؟
انا صاحي ولا بحلم
حاسس اني شويه واتجنن

دق جرس البيت
فتحت الباب طلعت سمر
لمن شافتني ببكي قامت بكيت هيا كمان وقالت " انا اسفه , انا السبب , ما كان لازم اكتب ديك القصه "
قلتلها " مو المهم مين السبب المهم كيف نخرج من الورطه دي "
قالت سمر " لما انحبست وانت رجعت صح ؟ "
انا مسحت دموعي وقلت " ايوا وانا لازم ارجعلها , لقيتي الأوراق الناقصه من القصه ؟ "
ردت عليا " ايوا لقيت بعضها "
انا " قوليلي كيف ارجع اجيب لما وكنان , امكن لمن اكون عارف ايش اسوي اقدر امنع اللي في القصه انو يصير "
كملت سمر على كلامي " وعندها حتخرج عن القصه وكل شي ممكن يرجع زي ما كان "
انا " ايوا هدا اللي كنت بقولو "

طلعت سمر اوراق من شنطتها
وزعتها على الأرض وقالت " اكتشفت اني لمن كتبت القصه كنت اوقف عند مكان في القصه واحط اتجاهين للقصه "
انا قلت " ايش يعني دا الكلام مني فاهم "
شاورتلي على الأوراق اللي على الأرض وقالت " شوف انا كتبت البدايه اللين اللحظه اللي صارت اليوم بأتجاه واحد "
انا " ايوا بعدين "

كملت سمر " بعدين انقسمت إلى اتجاهين , يا انو انت ولما ترجعو من العالم الخيالي مع بعض , او انو لما تنحبس هناك وانت ترجع , وباين انو القصه مشيت على الأحتمال التاني "
انا قلت " غريبه ليش طيب ما مشيت على الأحتمال الأول؟ "
ردت سمر " ما ادري ليش امكن مافي سبب معين "
انا " طيب يلا كملي الحين ايش حيصير؟ "
سمر " واكي في الصفحه اللي بعد رجوعك للعالم الحقيقي , مكتوب انك حتنهار وتبكي ودا الشي صار "
انا " ايوا كملي بعدو ايش ؟ "
كملت سمر " بعدين انت حتدور في البيت على طريقه ترجعك عند لما , وحتكتشف انك تقدر تنتقل هناك بواسطه صندوق موسيقي صغير حتلاقيه في غرفة كنان تحت السرير "
انا قمت من مكاني وقلت " كويس يلا نروح غرفة كنان نجيب الصندوق "

قمنا ورحنا غرفة كنان
مديت يدي تحت السرير ولقيت الصندوق
قالت سمر " استنى لا تفتحو , لو سمعت الموسيقى حتنتقل على طول "
انا " لا محا افتحو , ابغاكي اول تقوليلي ايش حيصير بعد ما اروح هناك عشان اعرف اتصرف "
قالت سمر " حتروح هناك وحتلاقي البيت شكلو اتغير شويه , حتهاجمك بعض المخلوقات الغريبه اللي هيا جزء من خيال كنان كان يرسمهم ويعلقهم على جدار غرفتو "
شاورتلها على جدار فيلو رسومات كنان وقلت " قصدك هادي الرسومات "
راحت سمر وطلت فيهم وقالت " الله يعينك شكلهم ما يطمن بالخير "
انا " وكيف ممكن اهزم دي المخلوقات الغريبه "
قالتلي " لازم تحرق الرسمه حقتهم , حتكون موزعه في انحاء البيت , الأولى حتلاقيها في حمام الضيوف في السقف , والتانيه في غرفة الطعام حتكون معلقه وره وحده من اللوحات "
وقفت كلامها فقلتلها " ايوا كملي الرسمه التالته فين الاقيها ؟ "
قالتلي " انا اسفه الورقتين اللي بعدها ناقصه , وانا مني متذكره ايش كتبت , بس اتذكر انها بس تلات مخلوقات اللي حتهاجمك"
انا قلت " خلاص مدام واحد مقدور عليه , حدور على الرسمه بنفسي "
قالت سمر " ايوا صح .... سومياتي طعنتك في بطنك , يعني خسرت وحده من ارواحك في العالم التاني "
انا استغربت من اللي قالتو وقلت " ايش قصة الأرواح دي كمان "
ردت عليا سمر " كل واحد في عالم خيال كنان عندو تلاته ارواح , كل ما تموت مره تخسر روح وحده ولو خلصت الأرواح التلاته تموت حقيقي , عشان كده لازم تنتبي , في القصه الأصليه في واحد من التفرعات اتذكر اني حطيت انك تخسر ارواحك التلاته وتموت "
انا قلت " لا تخافي انشاء الله محا يصير دا الشي "
اعطتني سمر ولاعه وقالت " هادي خليها معاك عشان تحرق الرسمات , يلا افتح الصندوق "
انا " طيب انتي حتنتقلي معايا ولا لأ ؟ "
انا " الله اعلم , بس اظن اني محا انتقل عشان انا مني وحده من شخصيات القصه , تعرفني ادخل كل الناس في قصصي إلا انا"
حطيت يدي على غطى الصندوق وقلت " طيب , اذا اكتشفتي اي شي جديد اتصلي على جوالي "
سمر " هدا اذا رضي يتصل "
انا " طيب , انشاء الله حأرجع لما وكنان وحأرجع في اسرع وقت "

فتحت الصندوق
وبدأت الموسيقى

فين سمعت دي الموسيقى قبل كده

دا اللحن مو غريب عليا

معقوله

دا نفس الصندوق اللي كان مع غروب

طليت حواليا وما لقيت سمر
شكل البيت كان متغير
كنت لسه مصدوم من حقيقه انو الصندوق دا نفسو اللي كان مع غروب
كنت ماسك الصندوق في يدي قبل ما انتقل لدا العالم بس الحين اختفى

كيف ممكن يوصل دا الصندوق لغرفة كنان
معقوله يكون لغروب دخل في دي القصه كلها

فوجئت بصوت من ورايا
وقدم ضخمه بتحاول تدهسني
اتشقلبت على قدام عشان اتفادا القدم الضخمه
كان مخلوق ضخم شكلو غريب
لونو اسود وعيونو حمره وجسمو مغطى بالريش
كان ريشو الأسود بيتطاير في كل مكان
انا وقفت مذهول قدامو

ونست ايش لازم اسويي

هايلد

06-10-2007, 10:22 AM

الاجزاء كل مره تحلى
قصه الصرااحه عجيييبه
وخيالك ماله مثيل
ابدعت اخوي فالقصه
بشكل كبيييير..
ننتظر التكمله^^

MALER

06-10-2007, 06:43 PM

شكرا هايلد ردودك تشجعني مرررره
واتمنى انك تكملي معايا القصه للنهايه وأنشاء الله تعجبك

MALER

07-10-2007, 01:05 AM

حاول المخلوق انو يهاجمني تاني بس انا هربت منو

اتذكرت انو لازم احرق الرسمه حقتو

جريت بسرعه لحمام الضيوف وكان المخلوق بيلحق ورايا

دخلت الحمام وقفلت الباب

بدأ الوحش يضرب في الباب بيحاول يكسرو

انا طليت في السقف ولقيت الرسمه

طبعت فوق كرسي الحمام ومديت يدي بس ما قدرت اوصل للرسمه

لازم الاقي طريقه اوصل بيها للرسمه قبل ما المخلوق يكسر الباب ويدخل

قعدت ادور حوليا على اي شي ممكن يساعدني

كانت في شموع على طاوله صغيره جنب المغسله

اخدت شمعه وولعتها

ومسكت الطاوله ورميتها على الارض وكسرتها

اخدت وحده من ارجل الطاوله الخشبيه

خليت الشمع الدايب ينقط فوق راس الخشبه

الين ما اتجمعت فوق الخشبه كميه كافيه من الشمع

غرزت الشمعه فوق الخشبه ولصقت في بعض

طلعت فوق كرسي الحمام وفي يدي الخشبه وفوقها الشمعه

كسر المخلوق الأسود الباب ودخل الحمام

انا بسرعه رفعت الخشبه وخليت الشمعه تحرق الرسمه

في نفس الوقت اللي انحرقت فيلو الرسمه , اتلاشى المخلوق الأسود

التقت انفاسي وقلت " هووو كنت حروح فيها "

طلعت من الحمام بحذر

قلت اروح احرق الرسمه التانيه بسرعه قبل ما يجيني المخلوق التاني

جدران البيت صار لونها ازرق , وما صار في شبابيك

المطبخ كان مسكر بقفل كبير

انا قلت في نفسي اصلا كأني بدخل هنا

الممرات في البيت صارت اطول

وفي لوحات على الجدار مرسوم فيها ناس اول مره اشوفهم في حياتي

وانا في الممر اللي يوصل لغرفة الطعام سمعت صوت شي من ورايا

طليت ما لقيت شي

بس فجئه طلع شي من تحت الأرض وقاعد يتحرك تحت السجاده

صار دا الشي يتحرك بسرعه ويتجه نحايتي

انا جريت بسرعه الين ما وصلت لباب غرفة الطعام , دخلت جوا وقفلت الباب

انكسر الباب وطلع المخلوق التاني من تحت السجاده

شكلو شبه الكلب بس عندو ديول كتيره وطويله ولونه ابيض وعيونو حمره

طليت على الجدار اللي ورايا كان فيلو خمسه لوح

يا ترى ورى اي وحده من دول الرسمه موجوده

الكلب الأبيض هجم عليا بواحد من ديولو

الضربه جات على طاولة الطعام وكسرتها كليا وحولتها لقطع صغيره

الله يستر لو ضربني بديلو حروح فيها

انا بسرعه رحت عند اول لوحه وشلتها بس ما لقيت وراها شي

الكلب هجم عليا بتلاته ديول

اخدت واحد من الكراسي الموجوده في الغرفه وحميت نفسي بيها

بس الكرسي اتكسر واصبح فتات

رحت على اللوحه التانيه برضو مالقيت شي

هادي المره اختار الكلب انو يهاجمني من تحت الأرض

دخل واحد من ديلو تحت الأرض

ما عندي إلا فرصه وحده

لازم اختار اللوحه الصحيحه واحرق الورقه قبل ما يوصلني الديل ويقضي عليا

اخترت اللوحه الرابعه عشوائيا وبالحظ طلعت وراها الرسمه

ولعت في الرسمه والكلب اتلاشى

لولا حظي السعيد لكنت ميت الحين

طلعت من غرفة الطعام وعبرت الممرات الين ما وصلت للصاله

سمعت صوت لما " انس ساعدني "

كان الصوت جاي من الدور التاني

طلعت الدرج بسرعه

من السرعه طاحت الولاعه مني تحت

جيت ابغى انزل اخدها بس سمعت صوت صراخ لما قمت كملت الدرج

في اعلى الدرج كان مستنيني المخلوق التالت والأخير

شكلو ما يخوف , كورتين فوق بعض لون وحده ابيض والتانيه اسود

بس المشكله مو هنا , المشكله انو هادي المره ما اعرف فين محل الرسمه ولازم ادور عليها البيت كلو

الكورتين فجئه اتكائرو صارو 4 وبعدين 8 ولسه بيتكاثرو اكثر واكثر

شلت لوحه من الجدار ورميتها على الكور فولعت اللوحه نار

يعني لازم الكور دي ما تلمسني

الكور قعدت تتكاثر اكثر واكثر

وبعدين بدأت تتجه ناحيتي بسرعه كبيره

انا نزلت جري من الدرج وهربت على غرفة الضيوف وقفلت الباب

لكن بدون فايده الكور حرقت الباب وحولتو لرماد في ثواني

ما في اي مكان اهرب منو

هجم عليا كورتين وحده بيضه والتانيه سوده

البيضه كنت سريعه مره وما قدرت ابعد عنها

خبطت فيا الكوره بس ما صار شي

اها اذن الكور البيضه ما تسوي شي

لكن برضو الكور السوده كانت مره كتيره

كانت في فتحه من السقف الكور البيضه بتدخل منها

انا نطيت ومسكت الحافه بيدي واتسلقت

وصلت لغرفة نومي في الدور التاني

الكور السوده ما سابتني لحالي لحقت ورايا لفوق

وكل شي في الغرفه بدأ ينحرق

جات كوره سوده من فوق انا انبطحت على الأرض عشان اتفاداها

ولحسن حظي لقيت ورقه تحت السرير

كانت رسمه مرسوم فيها كور بيضه وسوده

جيت ابا احرقها بس الولاعه مو معايا

ايش اسوي في الورطه هادي

خطرت في بالي فكره

رميت الورقه على كوره سوده فانحرقت ومعاها اتلاشت كل الكور

اخذت وقت عشان القط انفاسي

بس سمعت صوت صراخ لما من بره الغرفه

حاولت افتح الباب بس مو راضي يفتح

نزلت بسرعه من الفتحه على غرفة الضيوف وجريت بسرعه ناحيت الدرج

وطلعت اللين ما وصلت الدور التاني

شفت قدامي رجال لابس قناع اسود وملابس سوده

طلع مسدس ووجهو ناحيتي وقال " كده حيبقالك روح وحده " وطلق بالمسدس عليا

انا من قوت الضربه طرت على ورى واتدردبت كل الدرج

حسيت بنفس الألم اللي حسيت بيلو اول مره

والدنيا صارت بيضه وفقدت وعيي

هايلد

08-10-2007, 10:13 AM

واتمنى انك تكملي معايا القصه للنهايه وأنشاء الله تعجبك
أكيييييييد راح اكمل واكيد راح يعجبوني لانك مشاء الله عليك تجيب الافكار من تحت الارض
وكل جزء تحطه يكون احلى من الي قبله هالجزء كان
عجييب يله ننتظر التكمله اليايه

MALER

09-10-2007, 03:38 AM

الفصل الحادي عشر

لمن فتحت عيوني كنت تحت الدرج

فقد روح تانيه وبقيلي روح وحده

لازم انتبه اكتر لأنو الوضع صار خطير

سمعت صوت واحد بيمشي جنبي

طليت لقيت الرجال اللي لابس اسود

انا خفت وهربت بسرعه على الدور التاني

والرجال ما لحق ورايا ,الظاهر انو ما كان شايفني او انو طنشني

سمعت صوت لما جاي من غرفة المخزن

لقيت قدامي مشكله كبيره

في دولاب كبير مقفل على باب المدخل

نادت على لما وردت عليا

قلتلها " في دولاب كبير قدام الباب "

قالتلي " طيب بعدو وافتح الباب "

حاولت ادف الدولاب بس كان مره تقيل ما اتحرك ولا سنتيميتر واحد

قلتلها " محا اقدر احركو لحالي "

قعدت تصرخ وتقول " خرجني بأي طريقه بسرعه "

انا قعدت افكر فأي طريقه اقدر ادف بيها الدولاب

لو كان في احد تاني يساعدني ممكن نقدر نزيح الدولاب

قلت للما " لما استني شويه انا حجيب معايا احد يساعدني "

لما ما ردت عليا

ناديتها " لما .... لما"

ممكن يكون صرلها شي بسرعه لازم اروح اجيب مساعده

طلعت الدرج بسرعه للسطوح

فتحت الباب ودخلت في النور ورجعت لعالم الواقع

سمر كانت قاعده على كرسي بتستناني

لمن جيت قالتلي " ايش صار ؟ "

انا " ما عندي وقت لازم اجيب احد يساعدني "

سمر " اها الحين اتذكرت , في شي تقيل على باب المخزن صح ؟ "

انا " ايوا دولاب كبير , ولما جوت المخزن "

سمر " طيب اذا تبغى احد يساعدك , لازم يكون من شخصيات القصه وإلا محا يقدر ينتقل للعالم التاني زيي "

انا " طيب مين ؟ "

سمر " بعد الصفحات الناقصه عندي صفحات فيها احمد معاك في العالم التاني "

انا " احمد !! اكيد احمد في العاصمه "

سمر " اتصل بيلو محا تخصر شي ممكن يكون هنا "

اتصلت على جوالو ورد عليا

احمد : الو
انا : الو احمد , انتى فين ؟
احمد : انا جنب بيتك , اسف ما قلتلك اني جاي بس حبيت اسويها مفاجئه
انا : جيت في وقتك , تعال بسرعه
احمد : ايش في ؟
انا : انتا تعال وبعدين تعرف
احمد : انس ايش في خوفتني
انا : تعال بسرعه

بعد خمسه دقايق وصل احمد البيت

قعدنا انا وسمر نفهمو اللي صار

ما صدقنا طبعا

مسكت الصندوق الموسيقي وقلت " يلا نروح "

سمر " قبل ما تمشو بقلكم ايش حيصير , مكتوب عندي انكم حتبعدو الدولاب وتفتح الباب , وبعدين القصه تتفرع , يا انكم حتلاقو لما , او محا تلاقوها . اذا لقيتوها حتكون فاقده للوعي وحترجعو هنا تاني عشان تودوها المستشفى , اما اذا ما لقيتوها حتكتشفو فتحه في السقف وحتدخلو منها , حتوديكم لمكان غريب البلاط في الأرض ابيض واسود . انتبهو في فخ بيستناكم هناك , لاتدعسو على البلاط الأسود , وإلا حينطلق عليكم سهم ويقتلكم , مكتوب عندي انو احمد حيخسر روح , بس مدام انتو عارفين انو في فخ , فحتقدرو تتفادو دا الشي "

انا " طيب بعدين ايش حيصير "

سمر " الصفحه اللي بعدها مكبوب عليها مويا والحبر دخل في بعضو "

انا " طيب خلاص حنتصرف من نفسنا , احمد مستعد "

احمد " هههه , تحسبني صدقت الخرافات حقتكم "

انا " كلها ثواني وحتشوف بنفسك "

فتحت الصندوق واطلقت اللحن الحزين

وفي ثانيه اتنقلنا لعالم كنان

احمد شاف بعينو وصدق

قلتلو يلا نطلع بسرعه

طلعنا ورحنا عند الدولاب الكبير

استخدمنا كل طاقتنا عشان ندف الدولاب

فتحنا الباب بس مالقينا لما

طلينا فوقنا لقينا الفتحه اللي في السقف

جبت السلم اللي كان اصلا في المخزن وطلعت ودخلت من الفتحه

واحمد لحقني

قدامنا في البلاط الابيض والاسود وفي الأخر في باب

اتتبعنى تعليمات سمر ومشينا على البلاطات البيضه بس , الين ما وصلنا للباب

ورا الباب كان في غرفه فاضيه ما فيها اي شي

نبهني احمد على شي غريب في الأرضيه

كأنو في ممر سري

وبالفعل اكتشفنا ممر سري يوصل لغرفة كنان

نزلت من الممر ونزل احمد معايا

اخيرا حأقدر اوصل لكنان

لمن دخلت غرفتو اتفاجئت بالألعاب اللي بتطير في كل انحاء الغرفه

لقيت كنان قاعد في ركن من اركان الغرفه

كان مبتسم ابتسامه شريره

في ديك اللحظه اتذكرت اليوم اللي شفت فيلو غروب

وابتسامتها الشريره

نفس الأبتسامه كانت على وجه كنان

حاولت اتكلم معاه " كنان تعال معايا نرجع لبيتنا الحقيقي "

ضحك كنان وقال " دا بيتي "

قلي احمد " انتبه الألعاب اتوقفت فجئه , انا مو مطمن "

قال كنان " انا احبك يا بابا عشان سويتلي كل دا "

انا استغربت من كلامو وقلت " انا سويتلك كل دا !!! "

ضحك وقلي " انا احبك بس انتا حتدل الظلام عليا , وانا اخاف من الظلام , عشان كده لازم تموت "

لمن قال كده كل الألعاب اللي طايره اتحولت سكاكين وطارت بسرعه باتجاهي

من سرعتها ما كان في وقت اني ابعد عنها

لكن احمد نط قدامي وخلا جسمو درع لحمايتي

كل السكاكين دخلت في جسمو وطاح في الأرض

عندها طلعت بنت صغيره من تحت الأرض زي الأشباح

بدأت انوار الغرفه تنطفي وتتولع

وكنان قعد يصرخ ويقول " بعدي عني "

رفع كنان يدو فانفتحح الباب وطيرني على بره الغرفه وانقفل الباب

حاولت ارجع للغرفه بس الباب مو راضي يفتح

سمعت صوت احمد من ورايا يقول " لقيت لما تعال بسرعه "

رحت عندو ولقيت لما على الأرض فاقده للوعي

انوار البيت كلها كانت بتنطفي ووتولع

قال احمد " انا صحيت هنا ولقيتها على الأرض "

انا " لازم نوديها المستشفى بسرعه ما بتتنفس كويس "

عندها سمعنا صوت صراخ كنان

كان الصوت عالي مره

بدأ البيت يهز ويتهدم

انا شلت لما وطلعت الدرج بأسرع ما يمكن , وطبعا لحق ورايا احمد

وصلنا للسطوح وفتحنا الباب ودخلنا في النور ورجعنا للعالم الحقيقي

لمن شافتنا سمر قالت " ودوها المستشفى بسرعه ولا ممكن تموت "

بسرعه رحت على السياره وحطيت لما في الكراسي اللي ورا ومشيت على المسشفى

هايلد

09-10-2007, 09:49 AM

الجزء كان يحممس
وكالعاده ابدعت فيه بشكل كبيير
ننتظر التكمله

MALER

09-10-2007, 09:03 PM

باقي فصلين على نهاية الجزء التاني
ترقبو النهايه المثيره

MALER

10-10-2007, 02:41 AM

الفصل الثاني عشر

بعد اسابيع

لما لسه في المستشفى
دخلت غيبوبه وما صحيت منها

حاولت ارجع لعالم كنان وارجعو معايا
لكن للأسف الصندوق الموسيقي خرب , صار ما يطلع موسيقى
فقدت حلقت الوصل بين العالمين

حالتي في دي الأسابيع صارت سيئه
ما صرت اروح الشغل
ولا اكل كويس
حياتي كلها انهارت مره وحده
ولدي ضايع في عالم غريب
وزوجتي في غيبوبه

الأطباء كلهم ما قدرو يكتشفو السبب اللي خلا زوجتي تدخل في الغيبوبه
ومهم قادرين يلاقو طريقه عشان يصحوها

سمر قالتلي انها وقفت القصه هنا وما كملتها

كنت خلاص حأفقد الأمل
لكن جاتني مكالمه رجعتلي الأمل
كلمتني فاتن وقالتلي انها حتجي ومعاها وحده من صحباتها
وقالت انها حتصحي لما من الغيبوبه
دليتها على مكان المستشفى وحددنا موعد اللقاء

وعند الموعد بالزبط
جات فاتن ومعاها بنت في نفس عمرها شعرها اسود وتلبس نظارات
قالتلي فاتن " دي صحبتي اللي كلمتك عنها , اسمها لينا "
انا طليت في لينا وقلت " ارجوكي ساعديني , زوجتي في غيبوبه من اسابيع "
حركت لينا نظارتها وقالت " ححاول "

وديتهم للغرفه اللي فيها لما
مسكت لينا يدها وطلعت كتاب من شنطتها وقعدت تدور فيلو
اخدتني فاتن على جنب وقالت " انا عارفه كل شي بيصير , بس لاتخاف , بمساعدتك ممكن ننهي كل دا "
انا استغربت من كلامها وقلت " مساعدتي !! "
قالت فاتن " ولدك بيحاول يوسع دائرة عالمو في دا الوقت , بس لو اعطيتني المعلومات اللي ابغاها حنقدر نمنعو "
انا " ايت معلومات ؟"
رخت نبرة صوتها شويه وقالت " قلي فين محل الظلام , فين عمار ؟ "
اول شي ما اتذكرت مين عمار بعدين اتذكرتو وقلت " انا ما ادري فينو بس مساعدي عماد اكيد عندو معلومات عن مكانو "
اتصلت بعماد واخدت منو العنوان اللي ساكن فيلو عمار في دا الوقت
طلع ساكن في بيت صاحبو سوار
اعطيت فاتن العنوان
عندها سمعت صوت لما تنادي عليا
رحت عندها لقيتها صحيت من الغيبوبه
مسكت يدها وقلت " انا هنا معاكي "
قالت لينا " مهمتي انتهت هنا "
قالت فاتن " خلاص نحنا حنمشي "

طلعو بره الغرفه
وانا قعدت مع لما

بعد اسبوع اتعافت لما كليا وطلعت من المستشفى

ممكن تكون لما اتعافت جسديا
بس نفسيا كانت بتتعذب
صارت حزينه طول الوقت , ما تاكل ولا تتكلم مع احد
فقدان كنان اثر فيها مره

يوم من الأيام طلعت من البيت عشان اروح اشوف اهلي
قلت للما تجي معايا بس ما رضيت
سبتها في البيت ومشيت
وانا في الطريق شفت حادث كبير صاير في الشارع
باص بكبرو منقلب وسيارات كتيره صقعت في بعضها
ويقولو ناس كتيره ماتت
الطريق كان زحمه عشان الحادث قفل نص الطريق
وانا في الزحمه شفت شي غريب
من بين ركام الحادث لمحت كنان
طل فيا وضحك
انا مسحت عيوني وطليت تاني بس ما لقيتو
شكلي بتخيل
اخدت وقت طويل اللين ما وصلت لبيت اهلي
بس الحمد لله وصلت بالسلامه

هايلد

10-10-2007, 03:26 PM

التكمله حلوه
>.<"
ننتظر أخر بارت من هالجزء
^^
بس اقول اذا بتحط الجزء الثالث اكتب الرابط اهني
اذا ممكن
سلاام

MALER

12-10-2007, 07:04 AM

الفصل الثالث عشر

دخلت بيت اهلي , دخلت سلمت على امي

قالت امي " ليش ما جبت لما معاك "

انا " والله لما تعبانه وما تقدر تجي , نفسيتها مره تعبانه "

ردت امي " والله مسكينه , اذا انا نفسي لسه مني مصدقه اللي صار "

انا " فين سمر من زمان ما شفتها "

ردت امي " تلاقيها في غرفتها "

انا " طيب انا حروح عندها "

رحت غرفة سمر ودخلت سلمت عليها

قالتلي " لما ما جات معاك "

انا " لا "

قالت " الله يصبرها المسكينه , المهم ايش صار معاك ايش اخر الأخبار "

انا " لسه قبل شويه لمن كنت في الطريق , كان في حادث كبير وصار الطريق زحمه "

قالت سمر " ايوه كمل ايش صار "

انا كملت " بعدين من وسط الركام اتخيلي اني شفت كنان , بس لمن طليت تاني اختفى "

وجه سمر اتغير انا خفت وقلتلها " ايش في "

قالت سمر " القصه بتتكمل "

انا انفجعت وقلت " ايش قصدك بتتكمل مو قلتلي انت ما كملتيها "

قعدت تبكي وتقول " انا ما كملتها على الورق بس في عقلي كملتها , بس كيف ممكن يصير كده , انا حتى ما قلت التكمله لأي احد "

انا قلت " طب ليش تبكي ايش حيصير , ايش تكملة القصه "

سمر قالت بصوت خايف " لما "

انا مسكتها من كتفها وقلت " ايش فيها لما "

قالت سمر " لما حتنتحر "

انا انصدمت

كملت سمر " الحقها بسرعه "

في ديك اللحظه قمت بسرعه من مكاني وطلعت على السياره وسقت بأسرع سرعه

لو لما انتحرت انا ايش حيصرلي

ولدي اختار انو يعيش في عالم تاني

وزوجتي حتختار انها تنهي حياتها

لازم الحق عليها لازم

وصلت البيت ونزلت من السياره بأسرع سرعه حتى ما قفلتها

وفتحت الباب ودخلت البيت

ناديت على لما بس ما جاوبتني

دورت عليها في الدور الأول ما لقيتها

قلت اكيد هيا في غرفة النوم

طلعت على غرفة النوم بس ما لقيتها

فوق السرير كان فيه برواز فاضي كانت محطوطه فيلو صورتنا انا ولما وكنان

بس شكلو لما شالت الصوره من البرواز واخدتها

شلت البرواز لقيت تحتو ورقه

كانت رساله سابتها ليا لما

في الرساله كان مكتوب

انس انا اسفه

ما قدرت استحمل

كنان ولدي الوحيد راح

محا اقدر اعيش من دونو

ومحا اقدر اعيش معاه بعد اللي شفتو منو

انتا ما تدري ايش صار

ايش صار لمن كنت لحالي في عالم كنان

شفت كنان وكلمتو

بس هوا كان متغير مره

قلي انتي مين , بعدي عني

قلتلو انا امك

ضحك وقلي انتي مو امي

انتي زباله

انا عصبت عليه وضربتو كف

قام هوا عصب ورفع يدو جهتي

بعدها دخلت في الغيبوبه

بعد كل اللي صار

ابغى اروح بعيد

بعيد عن كل شي

بعيد عن الحياه

بس انا ما ابغاك تستسلم

ابدا لاتستسلم

انت اقوى مني

دور على الحقيقه

ومين يدري

ممكن يوم نتقابل

ممكن يوم نجتمع سوا

انا وانت وكنان

المهم ما نوقف نحلم

نحلم بدا اليوم

احبك

بعد ما قريت الرساله قعدت ابكي

دورت على لما في كل مكان

بس ما لقيتها

سمر تقولي انها كانت مسويا انو لما تنتحر

بس انا ما وقفت البحث عنها

ولا وقفت ايماني بأنو لما لسه حيه

ولسه بحلم باليوم اللي نتجمع فيلو سوا

في نفس اليوم اللي اختفت فيلو لما

صارت حادثه في وحده من المستشفيات

100 شخص ماتو

وجميع الأدله تشاور على شخص واحد

عمار