ياوحوى .... صوره رمضانيه أخرى .... صلاح جاهين

[ادكاوى]

من قبل رمضان بجمعه الهرس دار فى الـــــــدار
شالوا الموبيليا وحطـــــوا العفش بالمنـــــــــــدار
بالمكنـــــسه دور وبالفرشــــــه سبع تــــــــدوار
صبح البــــــلاط زى خـــد المزمزيل ناعـــــــم
والشـــــقه بصت لهيـــلتون نفسه باستحــــــقار
***********
جابـــــوا قمر دين وتين وزبـــــيب وصنيــــبر
ومكســــرات فى شــــكارات مقفوله بالميـــــبر
فاضـــل فى شعبـــــان تلات ايام ياشحيـــــــبر
راح تعملــــــم ايه فى رمضان ابقــوا تعالولنـا
والكل بات فى حســــابات تلــخم يهود خيـــبر
************
رمضـــان دخل .. كل عام وانتم بخيـــر قالــوا
مشــاوير كتير مشــوروا واتحطـــوا واتشالـــوا
علشــــان كنافــة ( ميدان الست ) واحتالــــــوا
حتى الولـــد لمـــا راح - واتهـــربد القفطـــــان
اضطر ينـــــزل معاه البـــــيه يجيـــبهالــــــــه
*************
ومن حوارى (الحسين) راحوا اشتروا الطرشى
خيــــار ولفت وبصل ولمــــــون قديـــم محشى
فوق البـــــوفيه رصوا برطماناته ولا ســاعشى
أحمـــــر وبنى وبمــــبه وعنــــبرى واصفــــر
ويومـــــين يادوبك ده كله يروح مــا يرجعشــى
*************
الســمن نازل يرف .. وكانــــوا جايبـــين كوم
والبيت معـــــبأ بريحة قلى طول اليـــــــــــوم
فيشاوى بالليـــــــــل ومن بدء النهـــار النـــوم
ولا شـــغله ولا مشـــغله غير بــس (ياوحوى)
والكل فاطــرين ياعينى ولــم لهــم فى الصوم