المساعد الشخصي الرقمي

مشاهدة النسخة كاملة : الريدل ونبوية أجمل قصة حب على المنتدي - حلقات متجدده - كوميدي جدا


TheRiddle
11-11-2007, 05:59 AM
إهداء
إلى حبيبتي نبوية
التي لولاها لجائت القصة أجمل بكتير
TheRiddle
11-11-2007, 06:00 AM
الحلقة الاولي



وها قد فعلتها .. وها انا قد وقعت فى شرك الحب .. نعم اعترف واقر امام الجميع اننى احب .. فهي التي حطمت قلبي .. وهي التى كسرت عقلي .. انسانة كالملائكة .. هي معنا فى المنتدي ..
وهي اجمل بنت فى المنتدي .. عندما ترد فى موضوع يقع المنتدي .. وعندما تراسلني برسالة خاصة جهازي يهنج .. وعندما تكلمني ع الماسنجر .. النور يقطع .. ياااااه لم ارى فى حياتي مثلها .. اعلم انكم تريدون ان تعرفوا من هي .. انها .... انها .. مش هطول عليكوا كتير .. انها نبوية اوعي رجلك .. تلك المرأة التي جعلتني اشعر بالحب لأول مرة فى حياتي ..
بداية الأمر حاولت جاهدا ان اوقعها فى حبي .. لكنا كانت تتفادي توقيعي لها بمهارة تؤهلها للانضمام للسيرك القومي .. اجيبها يمين مفيش شمال برضه مفيش
لحد ما اعترفت لها وريحت دماغى وريحت قلبي
- بحبك يا نبوية انتى اول حب وآخر حب انتى ملكتي كل القلب
قالت نبوية شوف ياسطي عشان حبنا ده يدوم .. وعشان نحب بعضنا طول العمر منكلمش بعض الا لما نتخطب .. انا هعمل لك بلوك لحد ما تخطبني
وع الرغم من انها تتكلم مع باقى شباب المنتدي إلا انا طبعا.. زعقت وقولت ازاى ده يحصل؟ يعني ايه منكلمش بعض الكلام ده هبل
لم تعرف نبوية بغيظي الشديد واعتراضى على ما تفعله و رفضي لما تفعله حيث انني كنت اتحدث مع صديقى كاتم الاسرار الذى لن يخبرها طبعا
لكني حاولت ان اقنع نفسي .. هو ده الحب ولا بلاش الله عليكي يا نبوية بس انت يا ريدل انت مش عارف حاجة ربنا يخليكي ليه يا نبوية .. قولوا امين
ولا أنسي ذلك اليوم الذى رأيتها فيه بسم الله ماشاء الله ملاك
كانت لابسه حلة فوق دماغها .. وكانت لابسة فى اديها جزمة ومشمرة رجل البنطلون ونازلة رقص وهي بتغني وتقول بتبصوا لى ليه .. مجنونة انا ولا ايه؟
قلت لها نبوية ايه اللى انتى بتعمليه ده؟ ايه الحلة اللى على دماغك دي؟ وحد يلبس جزمة في ايده؟
ردت وقالت انت جننتني انا اتجننت بحبك
قلت لها للدرجة دي بتحبيني يا روحي؟؟
لم ترد ولكنها قامت وواصت رقص مرة اخري بتبصوا لى ليه .. مجنونة انا ولا ايه؟؟
اخذت اهدئ من روعها وأكبر لها فى اذنها إلى ان هدأت
قولت لها يا نبوية يا روحي اللى بتعمليه ده غلط .. لو حد شافك مش هيبص لك .. هيطلب لك ع طول العباسية
بدأت فعلا نبوية تقتنع بكلامي .. لكني فزعت على صوت امى ايه ده قاعد قدام المراية وبتكلم نفسك؟ والحلة على دماغك وانا دايخه عليها .. انا لازم اكلم ابوك يشوف حل معاك لأن انا خلاص زهقت منك ومن هبلك
مرت ايام والصمت بيني وبين نبوية احاول اكلمها متردش .. اقول لها ازيك متردش ..
ياعم اسمعني متردش
مرت شهور ومرت ايام ولازال الصمت هو لغتنا لا نتكلم ولا نتحدث
الى ان ذهبت لأهلها طالبا يدها
وياريتني ماروحت ....
ونكمل الحلقة الجاية
رابعة العدوية
13-11-2007, 11:40 PM
.. مرحبا ..
طبعا اللغة المصرية والكلام مصري كلو مصري بمصري لكن على العموم لا بأس ..
بنائك السردي يلزمه المزيد يعني الكلام مختصر جدا جدا ...
طبعا فقعت ضحك على مقطع "الحلة الي عدماغها دي " ..
دمتْ
TheRiddle
18-11-2007, 06:12 PM
.. مرحبا ..
طبعا اللغة المصرية والكلام مصري كلو مصري بمصري لكن على العموم لا بأس ..
بنائك السردي يلزمه المزيد يعني الكلام مختصر جدا جدا ...
طبعا فقعت ضحك على مقطع "الحلة الي عدماغها دي " ..
دمتْ

ميرسي لردك
وفعلا اللغة مصرية وكلامي مصري
والكلام أنا قصدت اني اختصره عشان متجيش حالة ملل للقارئ
يارب تكون عجبتك فعلا
وان شاء الله تعجب باقى الاعضاء
TheRiddle
18-11-2007, 06:14 PM
سابقا فى الريدل ونبوية

مرت ايام والصمت بيني وبين نبوية احاول اكلمها متردش .. اقول لها ازيك متردش ..
ياعم اسمعني متردش
الى ان ذهبت لأهلها طالبا يدها
وياريتني ماروحت ....


الحلقة الثانية



قلت : وانا طبعا جاى اتقدم طالب ايد المفعوصة نبوية
قالى اوعي رجلك ( أبوها ) وانت شوفتها فين؟
قلت : شوفتها فى المنتدي مشيت وراها عاكستها قالت لى كلم بابا وجيت كلمتك ع طول
قال : تعالى يا نبوية قدمي الشاي
ودخلت نبوية مرتدية فستان ابيض ..ايه ده ...الله ... بجد جمال مشوفتش بعد كده .. بجد فيه بنت بالجمال ده؟
لم ارفع عيني من على وجهها
الى ان قال لي والدها : فوق يابني معايا
قلت : معاك يا معلم
قالى : بص من الآخر شكلك مش عاجبني وانت مرفوض
قلت : لأ .. بتقول ايه؟
قال : مرفوض
قلت : لا
قال : مرفوض
قلت : لأاااااااااااااااااااااااااااااااااااااااااااااااا اااا
استيقظت والدتي على صرختي مالك فيه ايه؟ .. اللهم اجعله خير .. تجري لتحضر لى كوب ماء .. اذن كنت احلم .. قالت وهي تناولني كوب الماء خير؟ حكيت لها على الحلم فقالت فى غيظ : عشان تبطل تاكل محشى وتنام .. وعلى الرغم من اني مش باكل محشي لكن خلاص هسمع الكلام ومش هاكل محشي وانام برضه قلب الام اللى بتحس بابنها واحساسها زي القطنة مبيكدبش
ذهبت هي لتنام وجلست افكر في مقابلة اليوم انا دايما بتفائل بالاحلام الوحشة لأنها بتتعكس معايا دايما يبقى خير ان شاء الله النهارده هتفرج وهتبقى عال العال
وفى الموعد المحدد للذهاب ذهبت لأشترى دستة جاتوه
بكام دسته الجاتوه يا حج؟ قال لى فيه ب 30 وفيه ب 20 وفيه ب16 جنيه
قلت له هات ام 16 هما هينهبوا ولا ايه
اخذت دسته الجاتو ومشيت لكن فجأه سمعت صوت هيصه
حرامي .. حرامي نظرت خلفى لقيت الشعب كله بيجرى ورايا
ايه ده يا جماعة فيه ايه؟
لم ينطلق احد بكلمه .. بل نطقوا بالشلاليت والاقدام وفين يوجعك
ثم ظهر قدامي بائع الجاتو قالى : فين الفلوس يا حرامي
قولت له : فلوسك اهي نسيت اديهالك
ولكن اين دسته الجاتوه دي ب 16 جنيه يا عالم نظرت الى يدي لم يتبقى من الدسته الا قطعة جاتو واحدة
يالا مش مهم هروح لهم بيها واهو مدخلش للناس بايدي فاضية
الساعة كام؟ يااااااااه دي 8 ونص وانا معادي 8 اجرى على منزل اهل العروسة وأثناء جري .. حرامي حرامي نظرت خلفي لقيت الشعب كله بيجرى ورايا .. ايه يا جماعة فيه ايه؟
لم ينطق احد بكلمه .. بل واصلوا جري وامسكوا بحرامي تاني ونزلوا فوقه ضرب وفين يوجعك .. لم استطع ان امسك نفسي وضربت معاهم انا كمان
ذهبت لبيت العروسة وطرقت الباب كانت تقريبا الساعة 12ونص
اعمل ايه مفيش ولا ميكروباص كان عايز يقف
فتح ليه اخوها الصغير
اهلا يا كميل امال فين بابا؟ قال لى : بابا نايم .. قلت : طيب خلاص طالما هو نام قوله الريدل موجود وصحيه يالا اجري
ودخلت البيت تجولت به لأرى مكان الصالون ودخلت قعدت
ووضعت قطعة الجاتو قدامي
وجلست فى انتظار عمي مستقبلا وكلى ثقة فى كيفية التعامل معه
فتعاملى مع اعضاء ومشرفي منتدي المنتدي اكسبني خبرة فى كيفية التعامل مع المضطربين عقليا
وجاء عمي وقال لى ثوانى اغسل وشي
جاء عمي وقال : بص ياسطي عشان قصة حبك تدوم متفتحش بوقك
الا لما اسألك .. انت شغال ايه دلوقتى؟
قولت له فاتح معمل تحاليل ومقدم اوراقى اسافر الامارات بس شكلى هحولها لمعهد الصم والبكم عشان اعرف اتعامل معاكوا هي تقولى متفتحش بوقك وانت تقولى متفتحش بوقك
ضحك عمي وقال والله باين عليك دمك خفيف
قلت له : عارف.. قال لأهل بيته : فين الحاجة الساقعة؟
قولت له : لأ انا عايز كاكاو معايا جاتوه كنت جايبهالكوا
بس لقيت العدد كبير هاكلها انا .. ضحك اوعي رجلك ضحكة صفراء
وقام يكلم مراته .. رجع مرة اخرى.. وقال لى خليك براحتك انت منورنا وذهب مرة آخرى ولبس الزنوبة ونزل بالبيجامة لاعنا فى زوجته .......... تقريبا كان بيشترى كاكاو
جاء الى ابنه الصغير اللى فتح لى الباب .. نسيت اعرفكوا عليه اسمه نبوي هو كمان ... قالى لى نبوي : هو انت العريس بقى اللى جاي لنبوية ؟ .. قلت له : ايوة يا نبوي
قالى احنا استلفنا الفستان اللى هتقابلك بيه نبوية من ام اسماء جارتنا بس طلع واسع عليها رجعناه واستلفنا فستان تاني من ام سيد واستلفنا طقم كوبايات واستلفنا صينية نعمل فيها كيك
قولت بيني وبين نفسي ناقص كمان تستلفوا عروسة
جاء اوعي رجلك اخيرا .. وقال لى معلش يابني انت منور
قوام الكاكاو يكون جاهز
وجاء الكاكاو ادخلى يا نبوية قدمي الكاكاو .. ودخلت نبوية
ورأيتها وقلت متغزلا : يعععععععععععععع ايه القرف ده
طلعت وحشة قوي
قلت بيني وبين نفسي : بقى عشان كده مش عايزاني اكلمها ماسنجر عشان مقولهاش نتقابل واقابلها واتصدم فيها كانت عايزة تدبسني على طول كده فى جواز اما طلعتي خبيثة يا نبوية

ونشوف ايه اللى هيحصل الحلقة الجاية
TheRiddle
29-01-2008, 11:13 AM
سابقا فى الريدل ونبوية

ودخلت نبوية
ورأيتها وقلت متغزلا : يعععععععععععععع ايه القرف ده
طلعت وحشة قوي
قلت بيني وبين نفسي : بقى عشان كده مش عايزاني اكلمها ماسنجر عشان مقولهاش نتقابل واقابلها واتصدم فيها كانت عايزة تدبسني على طول كده فى جواز اما طلعتي خبيثة يا نبوية


الحلقة الثالثة



أما طلعتي خبيثة يا نبوية نظرت اليها وانا مصدوم وانتى اللى كنتى بتقولى على نفسك صاروخ دانتي طلعتي مضروبة بصاروخ .. سألتها فى سخرية انتى بقى نبوية اوعي رجلك؟ اللى مشيبة المنتدي كله ردت وقالت لأ نبوية سد الحنك .. قولت وكمان بتنكري نفسك .. ردت عليا وقالت وانت مين بقى بسلامتك؟ قولت لها وكمان مش عارفة ريدل .. حبيب قلبك .. الريدل يا ماما .. قالت ريدل مين ده؟ هنا وقفت وسألت والدها مش انت ياعم الحج أوعي رجلك .. قال فى عصبية يابني ما البت قالت ان اسمها نبوية سد الحنك .. سد الحنك .. مبتفهمش .. مسكته من ياقة القميص يعني انت مش دكتور؟ قالى لأ شغال نقاش .. يعني ولا نبوية طلعت نبوية ولا نبوي طلع اخواها ولا ده ابوها ولا انا فى بيتهم اساسا
قولت له امال فين الدكتور اوعي رجلك؟
قالى ياحبيبي يابني تعالى معايا كده .. وأخذني الى شرفة المنزل وقال شايف العمارة اللى قصادنا دي .. الدور الرابع .. قولت له ابوسك و .............. اااااااااااااااه
وجدت نفسي ملقى على الأرض.. انتهي الموقف برمي من الشرفة
صعدت وطرقت الباب فتح لى مرة آخرى وقال انت تاني ؟ قولت له فى طيبة عايز حته الجاتو بتاعتي
اعطاني الجاتو وبوكس فى عيني .. مما جعلني آخد السلم كله كر
لكن مش مشكلة كله يهون عشان خاطر نبوية
وذهبت الى منزل نبوية وكالعاده صحيت الراجل من النوم وكالعاده جسلت ووضعت حته الجاتو امامي وكاكاو لو سمحت
جاء والدها وقال لى اتأخرت ليه يابني وايه اللى فى وشك ده؟ انت كنت بتتشاكل ؟
حكيت له على اللى حصل من أول طق طق لحد سلاموا عليكوا قال لى عليكم السلام
بس هو ده كل اللى حصل .. ضحك وقالى بس تفتكر فى واحد عاقل يزور حد الساعة 3 الفجر؟
شكله بيحرجني .. بصيت له وبلمت
قال لى خلاص تعالى بكرة العياده نتكلم
قولت له ونبوية مش هشوفها؟
قالى مش لما اوافق عليك الاول
لم اقلق ولم اخاف فلقد رأيتها فى الخباثة .. عارفين ازاى .. صورة العيلة كلها كانت على الحائط
ويعني مطلعتش الصاروخ برضه .. طلعت بنت عادية .. انا مش عايز اكتر من كده .. واما رخامة اهلها فدي بسيطة انا مش هلاقى ارخم من العيال بتوع الديفيدي يبقى مبروك يا واد ياريدل
قمت وذهبت الى البيت لأنام نوم هادئ عميق
وذهبت الى والدها فى العياده
قال لى عشان اوافق عليك لازم اعمل لك اختبار نفسي
نهض دكتور اوعي رجلك وهو يطلب ان انتظره فى غرفة جانبية بالعياده
وكان الممرض يدخل بين حين وآخر يقول لى الدكتور جاى اهو
وساعة ورا ساعة وابص فى الساعة .. هو مجاش ليه لحد دلوقتى ؟!
الى ان خفتت الاصوات تدريجيا خارج الغرفة
فتحت الباب لأجد ان العياده قد اغلقت
حاولت ان ادق على باب الشقة من الداخل فلم يسمعني احد
حتي التليفون فى الاوضة بتاعته المقفولة
والموبايل بتاعي مش معايا
قلت لنفسي الظاهر ان البنت مستلماني هي وابوها الله يخرب بيت دي عيله
والحقيقة فرح الدكتور اوعي رجلك بتصرفاتي فى هذه الليلة الغبية لأن جهاز التسيجل اللى خباه اثبت انني أتحمل المحنه فى صمت وقال ده بيدل على ان عندي قدرة رائعة فى مواجهة المصاعب
فى هدوء وسيطرة كاملة وكان فرحي انا الاكبر من سعاده الدكتور اوعي رجلك
لأن جهاز التسجيل مسجلش الشتايم اللى شتمتها للدكتور طول الليل .. وده راجع الى خلل فى جهاز التسجيل نفسه
قالى الدكتور تمام قوي بس طبعا انا لسه موافقتش عليك
ونشوف هيحصل ايه الحلقة الجاية
TheRiddle
29-01-2008, 11:20 AM
سابقا فى الريدل ونبوية


قولت امال فين الدكتور اوعي رجلك؟
قالى ياحبيبي يابني تعالى معايا كده .. وأخذني الى شرفة المنزل وقال شايف العمارة اللى قصادنا دي .. الدور الرابع
قال لى اوعي رجلك عشان اوافق عليك لازم اعمل لك اختبار نفسي
قلت لنفسي الظاهر ان البنت مستلماني هي وابوها الله يخرب بيت دي عيله
قالى الدكتور بعد اول اختبار تمام قوي بس طبعا انا لسه موافقتش عليك


الحلقة الرابعه



خلص الاختبار الاول وقالى الدكتور اوعي رجلك انا لسه موافقتش عليك
المشهد التاني اختبار تاني المشهد التالت رايح انا واهلى نقرأ فاتحة
بعد كده انا فاكر طشاش .. كل اللى حاسس بيه اني عمال اجري من مكان لمكان
وعمال ادفع دم قلبي .. واقابل كمية ناس عمرى ما اتخيل اني اقابلهم عمال صنايعية بتوع ديكور سباكين مأذون القاعة.. الفرح واللى كان مشكلة .. كانت لما تيجي الكاميرا على ماما تعمل فيها ام العريس وترفع ايدها تمسح راسها من العرق .. وانا عارف انها عايزة تظهر الغوايش والاساور الذهب اللى فى ايدها بعد كده رقصت انا والعروسة سلو يالا ياعريس يالا ياعروسة ارقصوا سلو .. ويعلوا صوت المصور .. سعيد شغل مكنة الدخان ويشغل سعيد مكنة الدخان .. اللى احاط بينا انا ونبوية ووانا اكح ونبوية تكح والمعازيم تكح من الدخان .. ونقعد
بعد كل ده يجي المطرب اللى فاجئ الناس بالمفجأة الكبري العروسة هتغني .. وتقول نبوية انا مش بعرف اغني وتاخد المايك و تبص لى فى كسوف قال يعني البنت مكسوفة وتغني وتقول مكسوفة مكسوفة منك مش قادرة مش قادرة اقولك .. هنا طلبت من صديقى عود كبريت اسلك بيه وداني
وخلص الفرح وخلصت الليلة .. بعد شهر ملقتش عذر مقبول للجواز من نبوية طلعت عليها اشاعة انها جميلة عادية يعني لكن لما اصحابي شافوها اضطريت اغير العذر واقول انها طباخة تمام
صدمة كبيرة اصابت ماما لما اكتشفت ان نبوية ملهاش فى الطبيخ .. لكن كان فيه حاجة غريبة بتشدني فى شخصية نبوية عشان اساعدها واقف جنبها
كانت طيبة وحنينة ورقيقة رغم انها مش امورة .. وحاولت اساعدها فى انها تكون طباخة كويسة .. جبت لها كتاب ابلة حظيرة
وفعلا بدأت تجتهد فى دراسة الكتاب وبدأت تذاكر فيه .. وفى ليلة راجع واقع من الجوع فتحت التلاجة
عشان اشوف اول نتايج الكتاب .. طبق مكرونة بالبشاميل .. الله .. ربنا يخليكي يا نبوية الطبق شكله تحفة اكلت حته لقيت نبوية بتدخل عليا وهي بتستحلفني اني اقول رأي فى التورتة
- تورته؟؟؟؟؟؟؟ ..... التورتة فى خدمة الشعب
دي مكرونة بالبشاميل يا جماعة .. لكن قولت ممكن كانت فاتحه الكتاب على صفحة التورتة واتقلب على صفحة العجة
وهي بتتكلم فى التليفون هو ده التفسير الوحيد
اما لو مكنتش دي مكرونة بالبشاميل يبقى انا جالى عاهة فى حاستي الشم والتذوق لقيت نفسي فى موقف محرج
بدأت امجد لها فى التورتة .. وتسلم ايدك يا نبوية والله عليكي بجد ربنا يخليكي ليه
التورتة دي ملهاش حل اه والله ملهاش حل
ولما هي أكلت منها حته لقيت الدهشه على وشها وانسحبت من المطبخ بطريقة ظريفة عشان مشاعرها
البنت طيبة
بقى شئ عادي بالنسبة لى اني اقعد واكل طبق شوربة اخضر مجهول الهوية .. بس لو تحط بطاقة على الطبق تشرح فيها ده سبانخ ولا قلقاس مهروس
مرة واحدة عرفت نوع الشوربة لما سألتي وقالت لى
ايه رأيك فى الملوخية؟
قولت لها حلوة بس واضح انك بتحطي فيها سكر
قالت لى كنت بشوف ماما دايما بتحط فيها سكر بس انا حطيت فنجان عسل
ولا فى مرة وانا قاعد اتفرج على ماتش الزمالك والزمالك مغلوب وانا دمي محروق لقيتها حلفتني زي كل مرة انى اقول رأى فى الايس كريم
ولما اطمنت لرأي قالت لى انا هعملها كل مرة بالطريقة دي
قولت لها وانا اجز على اسناني وايه هي الطريقة؟
قالت لى مكنتش عارفة اعمل سكر بودة فاستعملت للايس كريم فصين توم
انا عارف انها تعبت كتير عشان تتعلم لكن الظاهر ان الطبخ موهبة مش هتقدر عليها
بدأت اتأخر عن ميعاد شغلى لسببين :
اولا اسيبها تطبخ الطبخ البطئ اللى اتعودت عليه
ثانيا عشان اكل فى اى حته و ارجع اعمل نفسي اني باكل معاها
لحد ما جت حماتي العزيزة تطبخ لنا ولأني عضو فى الديفيدي اتعلمت ازاى استمع لعطية هانم والده نبوية .. حماااااااااتي يعني ..
ونشوف حماتي هتعمل ايه المرة الجاية
TheRiddle
03-02-2008, 12:46 PM
سابقا في الريدل ونبوية

لحد ما جت حماتي العزيزة تطبخ لنا ولأني عضو فى المنتدي اتعلمت ازاى اجيد الانصات لعطية هانم والده نبوية .. حماااااااااتي يعني ..
ونشوف حماتي هتعمل ايه المرة الجاية


الحلقة الخامسة



حضرت الينا عطية هانم لتعد لنا الطبيخ وعطية هذا الاسم الحركي لها اما اسم حماتي الحقيقي فهو
ظنانة هانم وفعلا اسم على مسمي
فهي تظن فى ابسط الاشياء واتفهها
اقول لها يا ظنانة هانم ان بعض الظن اثم .. ترد عليا وتقول تعالى احسن اديني درس فى الموعظه
اللى بتعمليه ده حرام ... تعالى احسن اديني درس فى الموعظة
غلط وربنا ظنك ده .. تعالى احسن اديني درس فى الموعظة
ظنانة هانم تليفون علشانك .. تعالى احسن اديني درس فى الموعظة
صارت كلمة على فمها
اما سبب اننى اريد اصلاحها من الظن
فظنانة هانم تظن دائما انى اعرف واحدة تانية على مراتي
ظبطتني مرة ظنانة هانم وانا بقرأ الفاتحة
فقالت : بتقرأ الفاتحة على روح مين بقى؟ أرد عليها وأقول على روح المرحوم جدي
فتقول أمال بتقرأها فى سرك ليه؟
أول يوم طبخت لنا حماتي العزيزة المصونة ربنا يخليها ليه ويريحني منها فى نفس الوقت
وضعت امامي طبق لم اتبين هويته
ده رز؟ لأ مش رز .. يبقى لحمة مفرومة .. بس اللحمة المفرومة انا حافظ ريحتها وطعمها وعارف لونها كويس
سألت حماتي فى ود : الجميل طابخ ايه النهارده؟
ردت فى زهق : كل وانت ساكت مسمعش صوتك
قولت بيني وبين نفسي : اعوذ بالله منك وليه
ردت سمعاك كويس.. بتقول ايه؟
قولت لها بقول الحمد لله ع النعمة الازلية حرام كمان اقول كده؟
قالت تعالى احسن اديني درس فى الموعظة
اكلت من الطبق مجهول الهوية لحد ما استقر رأيى ان ده نشارة خشب وعشان كده فكرت احط عليها كاتشب
انا عايز كاتشب
قالت ظنانة هانم مفيش كاتشب وكل وانت ساكت مسمعش صوتك
ارد حماتى ..
تقاطعنى وتقول تعالى احسن اديني درس فى الموعظة
خلاص يا ناس مش قادر ببلع نشارة الخشب دي بصعوبة
طلبت من نبوية شوية فلفل اسود وشطة على نشارة الخشب دي
فقالت : اعصر ليمونتين
عصرت الليمونتين لكن النشارة وقفت فى زورى
ولا انسي ذلك اليوم الذى اقمنا فيه عزومة كبيرة وكانت حماتي ظنانة هانم هي الطباخة
وضعت يدي على قلبي وقولت ربنا ربنا يستر
حماتي عملت كفته
الناس تاكل وانا اكل واحدة اتنين
الكفتة من غير طعم لا يمكن تكون دي كفتة
وفى الخباثة اخذ زميلى الكيميائي العزيز سامح قطط قطعة من الكفتة ووضعها فى جيبه
وذهب ليحللها وقال لى من طعمها وبعد تحليلها قال لى واضح انها عبارة عن قش مضغوط
قش يا حماتي؟!
اكتشفت ظنانة هانم فطيرة تقول انها توصلت الي مكوناتها بعد دراسة عمليه وتقول انها ستعد كتاب عن الطبيخ سيعد قفزة مهولة فى عالم الطبيخ والفطيرة عبارة عن فطيرة بطاطس عادية
ومكوناتها بطاطس على لانشون على شوية حاجات تانية مجهولة الهوية على سكر زائد رومي مبشورة
قالت ظنانة هانم لو كان المرحوم مرعي العضاض اخيها الراحل حرص على أكلها لعاش لسن المائة
لكنه كان دايما عنيد وعصبي ويرفض اكل الفطيرة
وتذكر يوم دخلت لتعد له الفطيرة فى عيد ميلاده ظنا منها بانهم سيضعون الشمع فى الفطيرة ويطفون الفطيرة .. فاحت رائحة الفطيرة فى انحاء البيت وعندما شم المرحوم مرعي العضاض رائحة الفطيرة وصاح من غرفته بتعملى ايه يا ظنانة؟ بتهببي ايه عندك يا ولية ؟ اسرعت اليه لتقنعه بأكل الفطيرة فوجدته مات بالسكته
وهي فى المناسبة دي بتأكد ان قصر عمر الراجل بيرجع لقسوته وعصبيته وقسوة قلبه
وكانت دايما بتلمح انها كانت تقنعه بأكل الفطيرة لأنها تضع له عقار مهدئ للاعصاب
لكنه عندما كان يشم راحة الفطيرة كان يركبه الف عفريت
حسيت ان شئ غريب بيربط ظنانة هانم بالفطيرة دي .. قولت بس عشان اوصل لقلبها لازم اشجعها
على الفطيرة
فكنت دائما اقول لها على مزايا هذه الفطيرة ومزايا البطاطس والسكر واللانشون
وكانت ترد برد واحد لا يتغير .. تعالى احسن اديني درس فى الموعظة
الا ان قالت لى فى مرة
الفطيرة ينقصها عنصر الفسفور .. قولت لها ضعي بدل اللانشون تونة
الله تونة بالسكر هيبقى هايل يا حماتي
فقالت ظنانة هانم .. تعالى احسن اديني درس فى الموعظة .. انا هعملها مرة باللانشون ومرة بسمك التونة عشان التنويع .. وهكذا صارت الفطيرة شغلها الشاغل
ودخلت لتعد فطيرة البطاطس بالتونة .. وعندما فاحت الرائحة نبحت كل كلاب المنطقة
وأصبح نبيح الكلاب مقترنا برائحة الفطيرة
الى ان اكتشفت ظنانة هانم بعينها ان الفطيرة التى تصنعها لى كل يوم كنت القى بيها من شباك الاوضة اللى ورا للكلاب الضالة .. وأصبحت الكلاب تنبح كلما فاحت ريحة الفطيرة من شباك المطبخ
ايه اللى حصل بعد كده

الحلقة الجاية هنعرف