موضوع للنقاش حول ارتفاع اسعار الالعاب!!

[We7 Master]

السلام عليكم ورحمة الله وبركاته

اخواني ابي اتكلم عن موضوع مهم جدا والكل عارف عنه
اللي اهيا عمليات نصب المحلات في بيع الالعاب
صارت الالعاب اسعارها خيالية والمحلات لا وراها لا حسيب ولا رقيب
والاعلام ماشاءالله عليه يعني مانع العاب الكوبي
ومخليا المحلات تسرح وتمرح باسعار الالعاب الاصلية
بعض الامثلة على هذي لعبة PES2008
وصل سعرها 45 دينار كويتي!!!!
واللي قاهرني اكثر امس كنت بمجمع الرحاب سألت عن لعبة Gran Turismo 5 Prologue
وطبعا تدرون كلكم ان اللعبة ديمو سالت جم سعرها قالي 28 دينار!!!
معقولة يعني لعبة ديمو توصل هالسعرعيل لو تنزل اللعبة كاملة جم يبون يبيعونها
طبعا انا ماقصرت بالمحل شخطته وقهرني يوم قالي ماتبي روح اشتر من محل ثاني
وطبعا كل المحلات متفقين مع بعض على سعر الالعاب يعني ماتحصل مكان يبيعلك بسعر معقول
الا لو كنت تعرف محل
طبعا هالمشكلة صايرة في ظل غياب الرقابة على الاسعار وبس همهم العاب الكوبي وناسين اللعب اللي صاير بالالعاب الاصلية
واكثر محل يستغل الناس معروف بالرحاب اللي اهوه جيم سنتر
بس ابي اعرف شغلة الغلط من البلدية او منا احنا اللي نشتري وماتهمنا هالشغلة
وفي بعض الاشخاص ينطرون تنزل سعر اللعبة وبعدين يشترون
يعني مافي رادع لهم يمنعهم من انهم يرفعون بسعر الالعاب
بالعكس اعتقد احنا اللي مخلينهم يلعبون بالاسعار دام ان احنا ساكتين
البعض منا موظف ويمكن يقط نص راتبة على الالعاب وعادي عنده لان هالشغلة هوايته
بس في اشخاص طلبة وياخذون مصروفهم من اهلهم يعني صعبة يشتري لعبة سعرها 45 دينار
واهوه حتى لعبة ب 20 دينار يمكن بالغصب يشتريها
تخيلو لو تنزل العاب مثل
Grand Theft Auto
Metal Gear 4
وغيرهم من الالعاب المعروفة شنو راح يسوون باسعارهم
يا انك تشتري منهم او تنطر لمن تنزل سعر اللعبة يعني هذا حل ؟؟؟؟
حبيت اتناقش بهالموضوع واشوف آرائكم او هل في حلول لهذي القضية اللي تمس شريحة كبيرة من الاشخاص
بانتظار ردودكم اخواني واسف على الاطالة

( اذا كان الموضوع مو بالقسم المخصص له اتمنى من المراقبين عدم اغلاق الموضوع بل نقله الى المكان الصحيح لان المراقبين هالايام مبدعين بهالسالفه :p )

[Uncharted81]

المشكلة مو من أصحاب المحلات.. المشكلة من الناس اللي يشترون بهالأسعار.. ولا المحل التكلفة عليه وحده وماهو خسران لو يبيع اللعبه بـ16 دينار يطلع ربحان على الاقل 25% من قيمة اللعبة.. بس هذا طمع وجشع بعض التجار..

[AL ADMIRAL]

طيب ليه تتقيد بالقانون ضل مراقبة المحلات

أنت بنفسك نزل الألعاب من هل موقع www.gamestorrents.com (http://www.gamestorrents.com)
وشتريلك لستة أسطوانات DVD (يعني 50 أسطوانه بـ 55 ريال سعودي في جريري ) وأبدا لا تاخذ شركة روكو

وخلاص

و PS3 قريب تنحل مشكلة البلو راي

[AfroNinja]

المشكلة مو من أصحاب المحلات.. المشكلة من الناس اللي يشترون بهالأسعار.. ولا المحل التكلفة عليه وحده وماهو خسران لو يبيع اللعبه بـ16 دينار يطلع ربحان على الاقل 25% من قيمة اللعبة.. بس هذا طمع وجشع بعض التجار..

-فعلا .. لو الناس ما يدفعون هالمبالغ المحلات راح تضطر تخفض الاسعار .

-او احد يشتري مجموعه العاب من امزون و يبيعهم بأرباح منخفضه و هذا يجبر المحلات تخفض اسعارها .

[Sparkster]

ألعاب الـPS3 بالسعودية في حدود 220-250 ريال عند المحلات الكبرى . و لو أنك بتشتري الألعاب من النت مع سعر الشحن يطلع لك 300 ريال تقريباً. هذا عن السعودية و المحلات الكبيرة اللي تجيب الألعاب المتأخرة، لكن الكويت و محلات الجيمز (النصابة على حد تعبيركم) أكيد بتطلع أغلى.

[LANCE VANCE]

اطلبوها من امازون ارخصلكم
انتو احسبوها و شوفو الارخص
ولا لا تشتروا من عندهم

وانا مع افرونينجا في النقطة الثانية

[ShinGundam]

^
^
شيء متوقع لأن أجارات المحلات غالية جداً + موت السوق نظراً لقلة الألعاب + عدم وجود كوبي
أتوقع ميتل غير بتضرب 50 دينار و لكن في نفس الوقت الأسعار بشكل عام بـ18 تقريباً مثلكم بسعودية

[ShinGundam]

اطلبوها من امازون ارخصلكم
انتو احسبوها و شوفو الارخص
ولا لا تشتروا من عندهم

وانا مع افرونينجا في النقطة الثانية
أمازون ماعنده ألعاب يابانية

[Sparkster]

أمازون مع الشحن أكثر من 290 ريال، و بعض الألعاب موجودين بـ 220 ريال و الأغلب بـ 250 ريال. لكن الألعاب اللي عليهم هايب كبير زي Call of Duty & Assassin's Creed يجون 300 و بالراحة بعد. الله يخلي لنا التورنت عموماً.

[tobaid]

تصدقون يوم رحت ماليزيا السيديات على 16 دينار عندهم :\ والله فرق بينا وبينهم

[AfroNinja]

تصدقون يوم رحت ماليزيا السيديات على 16 دينار عندهم :\ والله فرق بينا وبينهم


^^
بماليزيا كنت اشتري العاب ps2 كوبي بـــ 200 فلس

[The Shadow]

الرجال يقصد هنا العاب الـجيل الجديد وبالاخص PS3 فلا تدخلونا في العاب الـPS2 ... بصراحة اول امس واجهني موقف يوم اتصل علي احد الاصحاب طلب مني نصيحة على لعبة PS3 ممتازة ، ماترددت وقلت عليك باشارتد ياولد ، دار المحلات مالقاها الا العاب طوكيو .....عفوا نصاب طوكيو ، لقى عنده انشارتد .....بـ500 ريال !!!!!!!!! ايضا GT5 P لقاها بـ350 تقريبا -_- ! مايصير ! اذا البلدية فرضت ( في الكويت ) وستفرض ( في السعودية ) نظام منع الكوبي فهذا دليل على الوجه الحضاري للدولة ، لكن مهما كان امنعوا أصحاب الاوريجنال من الضرب الخيالي في الاسعار لاتتركوا لهم الحبل عالقارب .. نجي للطلب من (امازون\ايباي\بلاي اسيا ) فهو قد يكون صعب للبعض ، سواءا لعدم معرفته للطريقة او متطلبات الطريقة قد لايمكن يوفرها مثل حساب في البنك او بطاقات فيزا والماستر كارد ، يمكن تقول : ابوك\اخوك\عمك \ الوالدة (&) ... مو الكل يقدر هناك عقبات بسيطة في هذه النقطة

[التانغو7]

خساره على ايام الأولى اتشوف الغلاف عجيب على طول تاخذها بدينار ولا كأنا شي صار

[ShRsHr]

السلام عليكم

عجبني طرحك للموضوع وخصوص وانت قاعد تتكلم عن مشكله كبيره والي اهي غلاء الاسعار وهل موضوع مو واقف على الالعاب وبس

وبخصوص المحلات والجشع ورفع اسعار الالعاب صراحه ماينلامون لان المحل اول ماتنزل لعبه بسوق وعليها طلب يرفع سعر 35 دينار وسبب ان في ناس يدفعون هل مبلغ بدون تكلفه وانت تدري ان ديرتنه ديرة خير ونعمه الحمدالله فاتلاقي المحلات يستفيدون من هل اقليه من ناس وبعدين لمن يقل طلب على لعبه يرد سعره طبيعي

يعني انت حط نفسك مكان احد هل محلات اكيد تبي تسفيد طالما ان في ناس يشترون في هل مبلغ ليش انزل سعر لعبه والعيب مو في المحلات العيب في البلدية ولجنة حماية المستهلك ولو شباب يتفقون انهم مايشترون في هل مبلغ اكيد ان اصحاب المحلات عمرهم مايفكرون يبيعون في هل سعر

وتسلم على هل موضوع

[ماسنيسا]

السلام عليكم
يا اخي لما تزاول التجارة سيكون هذه الفئة من الناس احب اليك بكثير من الباقي .....ليش ما في شجار و مناقشة على سعر و لاشي تبيع بفايدة اكبر
و دون عناء....بمعنى هم يمثلون 50 بالمائة من ربحهم في وقت قصير مقابل 50 بالمائة مع الباقي اصحاب المناقشة و وووو في الاسعار....
على العموم في الجزائر ما في اصلي تماما ليش لان الاصلي لا احد يستطيع ان يشتريه فهو نصف شهرية عامل .....
القرص في الجزائر = 150 دينار جزائري=5 ريال سعودي =1.5 اورو ^^ بس نحن مع التورنت افضل

[We7 Master]

طيب ليه تتقيد بالقانون ضل مراقبة المحلات

أنت بنفسك نزل الألعاب من هل موقع www.gamestorrents.com (http://www.gamestorrents.com)
وشتريلك لستة أسطوانات DVD (يعني 50 أسطوانه بـ 55 ريال سعودي في جريري ) وأبدا لا تاخذ شركة روكو

وخلاص

و PS3 قريب تنحل مشكلة البلو راي

انا عندي اكس بوكس 360 طورتها على ايامها واشغل العاب كوبي وكنت العب اون لاين وبعد فتره ميكروسوفت صادت هالحركة وقامت تعطي باند للاجهزه اللي تشغل كوبي وانت شايف العاب الجيل اليديد حلاوتها بالاون لاين
فحتى لو صار ال PS3 يشغل كوبي ماراح اغامر واطور الجهاز
وانا قريت خبر بالمنتدى ان سوني تدرس السوق العربي علشان تسوي ريجون خاص للعرب بس لو تشوف ان الكل يشتري العاب كوبي
ماراح تفكر تسوي شي لنا واصلا ماراح يستفيدون منا
والشي الوحيد اللي مستفيدين منه اهمه الحروب والمشاكل اللي صايره عندنا احنا العرب وتسوي العاب عنها
يعني باختصار ماخذه هالمشاكل اللي تصير عند العرب كفايده لهم مو لنا

[The Snipers]

ألعاب الـPS3 بالسعودية في حدود 220-250 ريال عند المحلات

لا
أنا رحت عند محل أسئل عن الأشرطة(للفضول طبعاً) عطاني سعر الشريط 400 ريال يعني أنصدمت وأنا ما راح أشتري البلاي3 إلى إذا طلع الكوبي
لأن مافي حل أحس غن الأسعار بتوصل 500 ريال سعودي

[We7 Master]

^
^
شيء متوقع لأن أجارات المحلات غالية جداً + موت السوق نظراً لقلة الألعاب + عدم وجود كوبي
أتوقع ميتل غير بتضرب 50 دينار و لكن في نفس الوقت الأسعار بشكل عام بـ18 تقريباً مثلكم بسعودية

اخوي المحلات مو متشابهه بالبيع يعني مثلا في محل اييبلك الالعاب قبلا تنزل بموعدها الرسمي او عالاقل بنفس اليوم الرسمي لصدور اللعبة
وفي محل يتميز فبيع اكسسوارات الاجهزه
ومحل يتميز فتطوير وبيع العاب ال PSP
ومحل ليلحين قاضب فبيع العاب كوبي ال PS2 حق الفئة اللي ليلحين ماشرت اجهزه الجيل اليديد
وفي بعض المحلات قالبة محلهم محل رياضي ويبيعون اكسسوارات رياضية مثل محل كراش او المنتخب حاليا
يعني اللي اقصده اجار المحل يطلعه من الشي اللي يتميز فيه
يعني كل محل ماخذ فئة معينة من الناس وتبيعلهم
والسوق مايموت في ظل تعدد الاجهزه يعني اذا مات سوق البلايستيشن ممكن ال Wii تنزل العاب يديده عليه
واذا مات ال Wii ممكن الاكس بوكس تنزل عليه العاب وجذي

[We7 Master]

الرجال يقصد هنا العاب الـجيل الجديد وبالاخص PS3 فلا تدخلونا في العاب الـPS2 ... بصراحة اول امس واجهني موقف يوم اتصل علي احد الاصحاب طلب مني نصيحة على لعبة PS3 ممتازة ، ماترددت وقلت عليك باشارتد ياولد ، دار المحلات مالقاها الا العاب طوكيو .....عفوا نصاب طوكيو ، لقى عنده انشارتد .....بـ500 ريال !!!!!!!!! ايضا GT5 P لقاها بـ350 تقريبا -_- ! مايصير ! اذا البلدية فرضت ( في الكويت ) وستفرض ( في السعودية ) نظام منع الكوبي فهذا دليل على الوجه الحضاري للدولة ، لكن مهما كان امنعوا أصحاب الاوريجنال من الضرب الخيالي في الاسعار لاتتركوا لهم الحبل عالقارب .. نجي للطلب من (امازون\ايباي\بلاي اسيا ) فهو قد يكون صعب للبعض ، سواءا لعدم معرفته للطريقة او متطلبات الطريقة قد لايمكن يوفرها مثل حساب في البنك او بطاقات فيزا والماستر كارد ، يمكن تقول : ابوك\اخوك\عمك \ الوالدة (&) ... مو الكل يقدر هناك عقبات بسيطة في هذه النقطة


صح كلامك وسالفه ان الواحد يطلب من بره مو حل ومو الكل يقدر يطلب من النت
خالنفرض طفل عمره 7 سنين يبي لعبة وماقدر اييبها لان سعرها غالي شعرفة يطلب
فهذول فئة قليلة اللي يعرفون يطلبون وهم لازم ينطر فتره على ماتوصل الطلبية

[راؤول الأسطورة]

والله حالكم أرحم من وضعنا المزري..!!
آخر الأسواق الخليجية اللي توصل عندها الألعاب عندنا بعمان ، والقهر ان ما في سيوق بيخف منا الصدارة في غلاء الأالعاب..!!!
من كثر ان اللي يبيعون ما يفهموا شي بمهنتم ، أي لعبة توصل على طول بـ 270 ريال سعودي سواء أنتشارتد ولا لوكوروكو ولا مدري وش اسمها :D
الا PES2008 لها سعر خاص نظرا للاقبال الحاد عليها ، فتضرب الـ 370 ريال..!! ، هذه كله بالمحلات الشريفة عندنا :D
اتخيلوا فيفا الي هي فيفا ، أول ما وصلت وسألت صاحب وحدة من المحلات "النصابة" تدروا كم حط السعر طبعا بدون لا يتنازل عن فلس واحد...800 ريال :D
طبعا تو بيشحت لـ 800 ريال عشان يعدل باب محله اللي كسرته وأنا طالع من العصبية :D
هالفترة بديت أعتمد على الالعاب المستعملة والتبادل..مع اني ما أنجزت صفقة وحدة للحين ، لكن أظن مالي حل غيرها..!!!



نجي للطلب من (امازون\ايباي\بلاي اسيا ) فهو قد يكون صعب للبعض ، سواءا لعدم معرفته للطريقة او متطلبات الطريقة قد لايمكن يوفرها مثل حساب في البنك او بطاقات فيزا والماستر كارد ، يمكن تقول : ابوك\اخوك\عمك \ الوالدة (&) ... مو الكل يقدر هناك عقبات بسيطة في هذه النقطة


والله معاك بهالنقطة..بالفعل مالي خبرة كبيرة ولا كل تعاملاتي بتصير من خلال هالمواقع..!!!

^^
بماليزيا كنت اشتري العاب ps2 كوبي بـــ 200 فلس
هههه الله يرحم ذيك الأيام بس..والله من جد كنت أشفق على المطورين ومنتجي الألعاب ، يقاتلوا سنين عشان لعبة وتنباع بشربة ماي :D

[We7 Master]

السلام عليكم

عجبني طرحك للموضوع وخصوص وانت قاعد تتكلم عن مشكله كبيره والي اهي غلاء الاسعار وهل موضوع مو واقف على الالعاب وبس

وبخصوص المحلات والجشع ورفع اسعار الالعاب صراحه ماينلامون لان المحل اول ماتنزل لعبه بسوق وعليها طلب يرفع سعر 35 دينار وسبب ان في ناس يدفعون هل مبلغ بدون تكلفه وانت تدري ان ديرتنه ديرة خير ونعمه الحمدالله فاتلاقي المحلات يستفيدون من هل اقليه من ناس وبعدين لمن يقل طلب على لعبه يرد سعره طبيعي

يعني انت حط نفسك مكان احد هل محلات اكيد تبي تسفيد طالما ان في ناس يشترون في هل مبلغ ليش انزل سعر لعبه والعيب مو في المحلات العيب في البلدية ولجنة حماية المستهلك ولو شباب يتفقون انهم مايشترون في هل مبلغ اكيد ان اصحاب المحلات عمرهم مايفكرون يبيعون في هل سعر

وتسلم على هل موضوع

اتوقع ان اللي يشترون اللعبة بهالسعر اول ما تنزل ماتفرق معاهم لو كانت اللعبة ارخص
اللي شاريها مو ساعه او بوك علشان يتشيحط بسعرها :p
فلازم يكون في حل توقف فيه جشع عالمحلات وهالشغلة المفروض تبادر فيها البلدية اولا ولجنة حماية المستهلك لان احنا مابيدنا شي
دام اهمه يرفعون بالاسعار اول الايام ويبيعونها وبعدين يردون ينزلون بالاسعار ويبيعون على باجي الناس ماكو شي يوقفهم

[dro]

و PS3 قريب تنحل مشكلة البلو راي



كيف ... ؟؟ و متى أن شاء الله راح يصير ها الكلام ... ؟؟

[ساهر الليل]

المفروض يحطون السعر على ظهر اللعبه مثل مايصير في بعض سيديات الافلام ..

هالشكل المحلات بيلتزمون غصب عنهم

والله يعين الجميع

[AL ADMIRAL]

كيف ... ؟؟ و متى أن شاء الله راح يصير ها الكلام ...؟؟


زي الـ DVD أول ما نزل كانت مشكله والحين أمر عادي
وجاي دورك يا البلو راي في القرصنه

شوف هذي خمس ألعاب تقدر تنزلها من النت لـ PS3 بس أتوقع أصلنها DVD !!! هنا (http://www.gamestorrents.com/juegos-ps3-bittorrent.html)

[محترف بلاي ستيشن]

صراحة موضوعك كما يسمونه الموضوع المناسب في الوقت المانسب

نقدر نلخص الحكاية في كم نقطه:
*الحين ماحد يقدر يشتري الا العاب اصليه لانو الكوبي ما نزل لسه واعتقد انو ما راح ينزل على المدى القريب ويمكن ما ينزل اساسا لانو احنا حتى مش سامعين اي خبر عن اي محاولة للنسخ او حتى مش سامعين اي خبر على انو ايش اصلا المشكلة في النسخ يعني اتوقع انها مشكلة مالها حل الكوبي حتى انك لو لاحظت الـpsp مالو كوبي لحد الان البلاي ستيشن الوحش اللي نازل ليه اكثر من سنه ماسمعنا اي خبر له عن الكوبي

*خلصنا من موضوع الكوبي ننتقل للأصلي
طبعا الاصلي سعرو غالي جدا ومبالغ فيه بشكل خرافي في بعض المحلات وخصوصا للألعاب ذات الشعبيه الكبيرة يعني لعبة قيمتها 800 ريال بالله مين راح يشتريها . والنقطه هذي اللي سببها غياب الرقابه فالحين هم مركزين على الكوبي ومانعين الكوبي صحيح هي ضاهرة (صحيه ومفيده وتدل على التحظر) ولاكن احنا تعودنا عليها خلينا نقول انهم منعو الكوبي ليه ما يحطو رقابه على محلات الاصلي ويراقبو الاسعار لمنع رفع الاسعار لهذي الاسعار الجنونيه ؟ بس الله المستعان

*من الملاحظ ايظا غير سالفة الكوبي والاصلي والاسعار سالفة منع بعض الالعاب يعني تسمع عن العاب ضخمه منعت زي COD و assassin's creed و MGS و GOW يعني ليه الالعاب هذي ممنوعه يعني هم مش لاقين شغلانه غير المنع منع الكوبي ومنع الالعاب فشغلانه منع هذي الالعاب تلجئك انك تدور في السوق السودا بما ان ما فيه تنزيل وطبعا سوق سودا يعني اسعار سودا

وفي النهاية احنا بنحاول التحضر من جوانب مع اغفال جوانب عديده فسعينا باء للفشل يعني شغلانه مش منظمة تولى جانب منها هيئة الامر بالمعروف والنهي عن المنكر اللي انا ودي اخصص موضوع كامل عن هذي الهيئه المتخلفه اللي من عصور الظلام فزادت الطين بله

رجو اننا نجد حل للمشكلة هذي والله المستعان

[Grand Marshal]

يامعود صدقوني ياشباب مجمع الرحاب عرف على منو يضحك ويلعب...

لقى له ناس شرايه صح غاليين بس العيب مو فيهم العيب فينا اللي مانطالب ونشوف حقنا ينوخذ واحنا ساكتين...

هذي يبيلها دفعه شباب نروح حمايه المستهلك ندش واحنا الف واحد نهز المركز بكبره ونشتكي ونمد لساننا...

حنا ناس لنا حق بالمطالبه واذا استمرت هالمشكله راح ياخذون حقنا اكثر واكثر باجر والله العظيم تلقى الاسعار تصك الـ50

وانا والله شخصياً مو ملحق عندي اقساط سياره ودفع فواتير اخر الشهر وتبديل زيت ومازيت وفلان يجي يتسلف واخوك ناقصته الشغله الفلانيه والله مرات اصفى بـ40 دينار من معاشي شنو 40 وين الحق على عمري عشان الحق على بلاي ستيشن...

لا ياحبيبي هذي يبيلها مطالبه,, وماضاع حق وراه مطالب...

بس عطونا دافع ومايصير خاطركم الا طيب

[your8]

الحين كل شي غالي للأسف مع جيل التطور وخصوصا تعدد الأشياء

نحن في زمن يجب على كل فرد يكون له مداخيل وليس مدخول واحد المفروض يفكرون فيها

كل شخص يود ان يلعب ويستانس ولكن اللي قاعد يصير كله من العالم وليس فقط المحلات مجمع الرحاب وغيرها

المحلات مالهم ذنب لانهم على باب الله بيرتزقون اما المشكلة في الشركات ذاتها المفروض ولو 20% عالاقل تخض لجميع اسعار السلع ... ومقياس اللعبه لاتقاس بالسعر وهذا أكبر غلط بل المقياس هو عدد مبيعات اللعبه من حيث نجاحها يعني مثلا الدوري الياباني اكيد مبيعاته كثيره وراح يربح كثير خلاص هذا كافي وماله داعي زيادة للسعر المفروض اسعار الالعاب اتكون موحده


وشكرا جزيلا لصاحب الموضوع

[half life 2 fan]

شباب مادري ليش قاعدين تواجهون هالمشكله؟؟

المركز الكويتي (عبدالباسط) دايما يبيع ب20 وعمره ما رفع مثل جيم ماستر ((ذا اللي صج نصاااااااب ههههههه)) ...

خرا فيه يبيع جيتار هيرو نسخه الوي ب65 دينار.. عالنت بأقل من 90 دولار!!!
يببببببببببببببببببببببببط الجبد ... وكول اوف دوتي 4 عالبي سي ب25؟؟ ليييييييييييييييش؟؟
والله طقت جبدي بس بعدين اكتشقت اني أقدر انزل اللعبه كامله واصليه من steam وبسعر اللعبه بأمريكا...
والله زقرت :) حتى ماكو شحن ولا بطيخ

[your8]

^^^

جيم ماستر معروف بالنصب :D

خصوصا في واحد اسمه شعبان لوووووووووول

هذا المعلم مالهم :D

[half life 2 fan]

your8 اي شعبان هذا أخس واحد ... ودايما نفسيته خايسه

وياجماعه ترا المشكله حله سهل .. اهو ليش قادر يرفع السعر على راحته؟؟ لأنه في شراااي يشتري
لو شاف شعبان وربعد انه لما يرفع السعر الناس ما يشترون فراح مثل ال .... ينزل السعر ويحترم نفس
فتكفه ساعد نفسك وساعدنا بانك ما تشتري من اي نصاب ...
تقدر تشتري من عبدالباسط او من النت
واهو اصلا (شعبان) يرفع السعر بأول اسبوع بعدين يرد السعر بس الشباب ما يقدرون يستحملون ... اول ما تنزل اللعبه لاااااااازم تكون عنده :p

[المأثور]

مثل ما قالو الأخوان الحق علينا
المفروض نكاسر بالسعر ولا ندفع على طول

[تحـدوه البشـر]

السلام عليكم

ترى اسعار الاشرطة الاصلية 59,99 دولار يعني تقريباً 240 ريال سعودي
احنا عندنا في البحرين المحلات الكبيرة تبيع الاشرطة بحدود 250 ريال الى 290 ريال
اما المحلات العادية .. لحد الان شفت لـ 390 ريال ،، و للحين ماسألت عن الالعاب العدلة
بس اذا وصلت الاشرطة في الكويت 40 دينار كويتي يعني جم بيطلع بالبحريني !!!
والله حرام ..

[f.c.a7medo0o]

السلام عليكم
اخاني انا اشتر الالعاب من محل مركز الكويتي موقع زين ورخيص والبياع كويتي يعني
تقدر تتفاهم معاه ولد خالي شرى pes3 ب20 دينار وشكرا

[ماسنيسا]

الشيئ الذي لا افهمه ان اغلب الالعاب تباع على مواقع غربية مشهورة ب 40 اورو اي حوالي 150 ريال فاين هي من 250 او 290 ريال و الله شي يحير....

[][-][Mr.ZeNoN][-][]

ياجماعة قدامكم النت إذا عندكم الفيزا فالمشكلة محلولة من أول بس مالاحظتوها..حط 500 ريال (40 دينار) بالحساب فقط وإفتح حساب بأي شركة شحن وإنتهينا بلا رحاب بلا نصب :dancing:

[PS Player]

الكل قاعد يتحلطم على شي واقعي

ياجماعة اللعبة الاصليه سعرها الرسمي من الشركة 60 دولار

يعني 17 دينار كويتي

والمحل يبيع الالعاب ب20 دينار

يعني الربح 3 دنانير

ماتبون الرجال يربح يعني ؟

يبيعها لكم ب17 مثلا ؟

او تبونها ب15 ؟

ياجماعة مايصير وبعدين انتوا مو مجبورين على الرحاب اللي يرفعون الاسعار على كيفهم

روحوا لسوني او الغانم عندهم خوش العاب وبسعر موحد يعني مايرفع وينزل على كيفة

وشكرا

[Uncharted81]

الكل قاعد يتحلطم على شي واقعي

ياجماعة اللعبة الاصليه سعرها الرسمي من الشركة 60 دولار


أنا اختلف معاك اخوي PS Player. الـ60 دولار اللي تندفع هذي Retail Price حق المستخدمين مثلي ومثلك.. لكن الموزعين والموردين لهم اسعار جملة ثانية. اللعبة ما تكلفه حتى 15 دينار :)

[فيشر]

الحل الوحيد هو مقاطعة جميع المحلات اللتي تبيع الالعاب بأسعار عالية