المساعد الشخصي الرقمي

مشاهدة النسخة كاملة : توابع انقطاع النت, شباب مصر المسكين


yusuf3d
08-02-2008, 02:48 PM
خدت نفس عميق جدا جدا ... لدرجة إني حسيت إن خلصت الأوكسجين من البلد (قال يعني البلد لسه فيها حاجة مخلصتش) ... ورجعت أركز عشان أقفل الشغل اللي في إيدي ...
خلصت بدري في اليوم ده ... وقفلت الجهاز وأنا بمني نفسي بسهرة لذيذة تشيل عني قرف الشغل ....

نازل من على السلم بهدوء وسلاسة وفرح وعبير وهبة وعبلة و ....

" يوسف ... يا يووووووووسف "

اتنفضت وأنا نازل وخدت خمس سلالم مرة واحدة على ركبي المبجلة
" ايه يا عم إسلام ... مش توطي حسك شوية"
لقيت إسلام بيقرب مني بسرعة وكأنه هيقولي على سر القنبلة الهيدروجينية وهوه بيوشوشني بصوت مبحوح ... مقدرتش أميز منه غير :
" فصل ... راح .. النت ... وقف"
حاولت أهديه وأعمل نفسي حنين ... رحت خابط على ضهره خبطة مرزبة توقع برج القاهرة ... وقولتله بكل حنية :
"انت ياله ... اتعدل كده وخد نفسك زي البني آدمين ... واكلم عدل عشان مش ناقصاك "

لكن باين إن الخبطة الخفيفة بتاعتي جابتله إنزلاق غضروفي حاد وهبوط في الدورة الدموية ... فجحظت عيناه ووقع على الأرض وهوه بيردد :
" النت فصل ... النت قطع ... احنا خلاص فينيتو "

طبعا آخر فيوز في دماغي كان فص ... رحت سايبه ومكمل السلالم بكل هدوء وسلاسة وفرح بس من غير عبير ...
نزلت تحت وركبت المواصلات وحطيت دماغي على دراع الراجل اللي جنبي, راح باصص بكل قرف وعادلي دماغي بكف محترم ... طبعا زي ما قلت دماغي مش ناقصة قرف, رحت مريح على الكرسي ومديها سيمفونية التشخير المشهورة ...

قلقت في السكة علي كلام من عينة :

"الظاهر الكلام ده حقيقي ... أنا معنديش نت"
"بيقولوا النت قاطع في مصر كلها "
" أنا سمعت إن في كابل عمومي اتقطع عند البحر"

بدأت أقلُّق ... يكونش الواد المنيل إسلام كلامه صح ؟؟؟

" أنا بقى عرفت إن في طبق طاير على شكل قصافة نزل البحر وقطع السلك"

آآآآآآآآآآآه ... كده بقى دول شوية عيال مهيسة ضاربين بانجو ....
رجعت أنام تاني , وللأسف الشديد ريحت على دراع اللي جنبي و ... طااااااااخ .... اتعدلت الناحية التانية

-----------------------------------------------------

وصلت البيت وأنا وشي وقفايا حمر من كتر التحويل .... ودخلت الشقة من غير ما أعبر حد وطيران على أوضتي
قفلت الباب وفتحت الشنطة أتأكد إن العدة معايا .... كيس دوريتوز الأزرق عائلي, لتر بيبسي , بنص جنيه حلاوة , لبانتين سمارة ...
طبطبت على الكيس بحنان أبوي يمتزج به شعور شيطاني بالنشوة والأنتصار والفرح والهناء وبالمرة العبير ... وقعدت الجلسة المقدسة قصاد الجهاز ....

شغلت الجهاز وحمل بكا سرعة ... فركت إيدي كمن ينوي فتح خزائن علي بابا أو فتحي بابا مش هتفرق ...
بصيت في الشاشة ... ولقيت أيقونة الفاير فوكس بتلمع قصادي بثعلبها البرتقاني الرائع ... رحت ناحيتها بالماويس وضغطت كلكتين واستنيت ....
قغدت أستمتع برؤية الموقع وهوه بيتحمل واللودينج بيعد تحت و .......

ERROR LANDER

ايه ده ؟؟؟؟؟؟؟؟؟؟؟ دعكت عينيا وبعدين النضارة وقريت تاني .... أول مرة أشوف العبارة دي ....
مممممم -عملت عبقري يعني- .... يمكن عشان عامل موقع جوجل default وهوه حاول يفتحه لقاه واقع ؟؟؟

قلت أجرب موقع الياهو .... قعد يحمل ويلود و ...... ERROR LANDER

إيه ده ؟؟؟ ... طيب موقع Youtube, altavista deviantart ..... كله نفس الحكاية ...

رجعت بضهري لورا وأنا حاسس بصدمة محسيتهاش من ساعة ما جبت مادة تحليل نظم دور تاني ....

ترررررن

ايه اللي حصل ؟؟؟
تررررررررررن

أنا أكيد بحلم ...
ترررررررررررررررررررن

مفيش نت ؟؟؟؟؟؟
تررررررررررررررررررررررررررررررررن

فوقت على صوت التليفون ... رفعت الموبايل و رددت وأنا مسبهل ...

"ألو" (وأنا تايه)

ألو ... ازيك يا يوسف" (صوت تايه غير بتاعي)

"مين ... مين معايا" (لسه تايه برضه)

" أيه يابني ... أنا إسماعيل" (تايه هوه كمان)

"في إيه يا إسماعيل؟؟"

(صوت ريق بيبلع بصعوبة وكأنه بيبلع جزمة ريدوينج) " انت... انت شفت الليحصل ... حصل لخط ... النت"

"حصل إيه"

"النت فاصل في مصر كلها عشان الكابلات اتقطعت "

صرخت بصوت سمعه سكن غابات الأمازون:
" فاااااااااااااااااااااااااصل ... ليييييييييه ؟؟؟ ... وازاي اساسا الكابلات اتقطعت؟؟؟ .... اوعى تقولي فضائيين ومركبات فضاء"

سمعت صوته بالعافية وهوه بينهار
"انت عبيط ياله ... ده واحد في إيطاليا شد السلك من عنده عشان كان محشور ... قام اتقطع عندنا ..."

عيطت وأنا بقول بعيون بتنقط داتا :
"طيب والحل إيه دلوقتي ؟؟؟؟ "

فجأة صوته بقى جد وواخد نبرة صارمة وهوه بيقول :
"مافيش غير حل واحد"

"انت بتفكر في اللي أنا بفكر فيه ؟؟؟ "

"أكيد ... مفيش خيار تاني"

--------------------------------------------------

العناوين الرئيسية في جرايد اليوم اللي بعديه :

"انتحار جماعي لعدد كبير من الشباب بسبب انقطاع خدمة الانترنت"
" نقص في عدد شباب مصر بنسبة 80% على خلفية عمليات انتحار النت"
"الانترنت يقتل شباب مصر"


عنوان آخر تحت هذه العناوين :
"عودة خطوط الانترنت إلى مصر بعد التخلص من القصافة"

---------------------------------------------
رابعة العدوية
10-02-2008, 09:45 PM
:D:D:Dاسمحولي بقليل من العامية باعتبار الموضوع عامي " ..

طول عمري وأنا بقول الشعب المصري شعب خفيف دم :أفكر: مش عارفة من وين مقتبسة الجملة دي ..

المهم , سمعت عن أزمة الانترنت عندكم والي انحلت الآن , :ponder:هو فعلا لو جوالي ما بيخدمش نت كنت حانتحر معاكم عشان النت بتاعي محكوم بدراسة اخوتي @@ ونظرا انو اخوتي عباقرة جدا جدا جدا " أصلك عارف البير وغطاه " فعمناه مفيش نت ..

عموما شكرا جدا "على الحدوتة " ..

:D أضحك الله سنك ..

ساكون أنانية وأبقيها هنا في قسم القصص ولن أنقلها الى القسم العام

دمت
رفعت خالد
22-02-2008, 08:21 PM
السلام عليكم..


من الممتع أن ينتحر الإنسان من حين لآخر فذلك، لعمري، يُذهب التعب و الملل..


و فعلا، أفظع الأشياء هي تلك التي تفاجئك و أنت غير مستعد لتضيفها لقائمة مشاكلك..


- أين كان هذا الثقب في السروال ؟؟.. تبا !.. ماذا سأرتدي الآن ؟..


- تدخل سايبر نت فتلفحك نسمة لطيفة من المكيف فتبتسم و أنت تحيي الجالس إلى المكتب..
- احم.. صباح الخير.. كرت ساعة من فضلك... آآآ.. و كاسك جيد لو سمحت..
- صباح الخير.. كيف الحال ؟.. ممتاز، جيد.. الحمد لله... أحم، عذرا، و لكن الخط منقطع..
- ! ! !


- عندما تفتح الثلاجة و أنت تلهث من الحر، فترى بجوفها كل شيء إلا قنينة ماء بارد كنت تحلم بمنظرها و أنت ترمي خطوات منهكة بالشارع !!


- لما تجهز نفسك و تعد المكتب و ترش بالغرفة عطرا زكيا، و توصد الباب و تأتي بقنينة ماء و تمكث بالمرحاض ما شاء الله حتى لا تفر من المكتب تحت أي داعي.. لما تفعل كل هذا، و قبيل لحظات من البدء في مراجعتك الأسطورية ينقطع الكهرباء بكل بساطة !..


- عندما يخبرك أخوك الصغير بحماس عن ظرف أنيق وجده أسفل الباب و أنه قادم من مدينة مكناس، فتهرش رأسك بوقار لتتذكر من يهتم بوجودك في مكناس إلى هذا الحد، فتتذكر بسرعة لشدة ذكائك أنك أرسلت طلبا إلى كلية الطب بهذه المدينة الشهر الماضي.. فتهلل و تقبل وجنة أخيك التي تصفعها عادة و تجري و أنت تهلل و تكبر و تزغرد و تغرد.. تحمل الظرف، تقبله، تفتح الظرف، تخرج الورقة، تعود لتقبل الظرف، تفتح الورقة المطوية، تعود لتقبل الظرف... أحم، لحظة.. إنها الوثائق التي بعثتها !.. و لكن... لا بد أن هناك خطأ ما !..


طبعا :D ، لا تكف الحياة عن تقديم المفاجآت السارة لنا.. لكنها الحياة.. و من أمنها فهو إما جاهل أو غبي.


و السلام عليكم و رحمة الله.
ياسمين الشام
25-02-2008, 08:10 PM
موضوع جميل ومسل بحق...

سلم قلمك...

بالفعل كما قال رفعت خالد..

لا تعرف من أين تأتي الحياة بهذا المفاجآت...

دائماً تدهشنا ...

تحياتي...^_^
yusuf3d
04-03-2008, 09:43 PM
جزاكم الله كل خير على ردودكم ...
وكما قلتم الحياة مفاجآت ... وإلا ما كانت حياة ^_^
yusuf3d
04-03-2008, 09:47 PM
جزاكم الله كل خير على الرد ... سعيد أنها أعجبتكم
وكما ذكرتم, الحياة هي المفاجآت ... والمفاجآت أحيانا تكون من النوع القاتل ^_^