المساعد الشخصي الرقمي

مشاهدة النسخة كاملة : ـــ"ـ"الوان القلب"ـ"ــــ


MALER
14-03-2009, 10:46 AM
http://img15.imageshack.us/img15/1548/fronthsg.jpg (http://img15.imageshack.us/my.php?image=fronthsg.jpg)
http://img15.imageshack.us/img15/fronthsg.jpg/1/w800.png (http://g.imageshack.us/img15/fronthsg.jpg/1/)



<object width="480" height="295"><param name="movie" value="http://www.youtube.com/v/vb7vmg_IncQ&hl=en&fs=1"></param><param name="allowFullScreen" value="true"></param><param name="allowscriptaccess" value="always"></param><embed src="http://www.youtube.com/v/vb7vmg_IncQ&hl=en&fs=1" type="application/x-shockwave-flash" allowscriptaccess="always" allowfullscreen="true" width="480" height="295"></embed></object>

ألوان القلب
الجزء الأول
سعاده (النسخه المعدله)



مقدمه


"سعاده " هي الجزء الأول من أجزاء الوان القلب
والقصه تحكي عن الولد عمار اللي عمرو 16
وقصة بحثو عن السعاده

يوم من الايام يصير شي يغير حياة عمار للأبد
تابعو القصه وحتعرفو ايش هوا

القصه تجمع بين الغموض والاسرار
والحياه الطبيعيه بكل ما فيها من فرح وحزن وضحك وبكى

انا أتمنى انو القصه حتعجبكم عشان انا استمتعت بكتابتها
والقصه عجبت الكتير من القراء اللي حابب اشكرهم لدعمهم ليا
والله لولاهم ما كنت كملت

ملاحظه: اللي قري القصه قبل كده يقراها تاني لأنو في تغيرات كتيره لازم تعرفوها عشان تكملو الأجزاء الباقيه ودا بالإضافه إلى فصول الذكريات اللي أضفتها جديد للقصه

ملاحظه تانيه: القصه بأكملها ترى بدون تحديد مكان أو زمان , لو تقرو النسخه القديمه حتلاقو أننا بنتكلم عن مكان وزمان محدد بس دا غلط ودا واحد من الأسباب اللي خلتني أعيد كتابة القصه
القصه في عالم تاني ومو ضروري أنو الأسماء عربيه يعني أنا بتكلم عن مكان في العالم العربي أو مجنمع وثقافه وعدات عربيه , أنا أخترت أسماء عربيه عشان أسهل

وبالنسبه للأجزاء القادمه
راسلوني على ايميلي
او استنو النسخه المطبوعه

اسيبكم مع القصه
وانشاء الله تعجبكم



الفصل الأول

الكل بيستنى دي اللحظه من زمان
الكل كان متجمع عندنا في البيت
عماني عماتي , اولاد عماني اولاد عماتي , خيلاني وخالاتي , وأولاد خيلاني وأولاد خالاتي إلخ
طلعت غرفتي وقفلت الباب , بهرب من الزحمه والإزعاج
اكيد تبوا تعرفوا ايش في اليوم
كل سنه زي دا اليوم تجتمع كل العيله عندنا في البيت على وليمة عشاء كبيره
ما أدري ليش دااليوم بالذات؟
ودا اليوم من أكثر الأيام اللي أكرهها في السنه
لأني أولا ما طيق عيلتي
وثانيا عشان كمية الشغل اللي أشتغلو في هذا اليوم
ما اصدق متى يخلص دا اليوم وأرتاح من العيله الهم

أبويا اليوم خرج من الصباح وما رجع ألين دحين
البيت مليان وإزعاج
كنت قاعد في الصاله مع بقية العيله وكلهم بيستنو أبويا لما يرجع عشان يبدأو العشا
جاني واحد من أولاد عماني الكبار وقلي " ولد قوم روح جيبلي كاسة مويا "
قلتلو بعصبيه " جيب لي نفسك , أنا مني خدام عندك"
قام عصب ولد عمي وضربني كف على وجهي
أنا من قوة الكف طحت على الأرض
طليت حواليا لقيت كل اللي حواليا يضحكو ولا كأنو شي غلط صار
سمعت كم واحد يقول " يستاهل أكثر من كده "
أنا بعدها من كتر القهر دمعت عيوني وقمت من مكاني وقلت " أكرهكم...... أكرهكم كلكم"
كل اللي في الصاله سكت شويه وبعدين قعدو يضحكو تاني
أنا طلعت غرفتي بسرعه وأنا قاعد أبكي من القهر
لم دخلت الغرفه لقيت كم واحد من أولاد العيله الصغار قاعدين يلعبو بأشيائي
صرخت عليهم وطردتهم من الغرفه
كل كتبي ودفاتري كانت مرميه على الأرض
كان عندي دفتر أكتب فيلو خواطر وكلمات من تأليفي وكان مرمي على الأرض
لما شلتو أكتشفت أنو كل الأوراق مشخمط عليها
كل الكلمات اللي قعدت سنوات أكتب فيها راحت
كل المشاعر اللي كانت مكبوته بداخلي وكتبتاها في دا الدفتر
في دي اللحظه كان في قلبي شي واحد وبس
الحقد
ليش أنا الوحيد اللي في العيله
ليش أنا الوحيد اللي يتعامو معاه بدي الطريقه
حتى أمي و أبويا و أخواني نفس الشي
كلهم نفس الشي...... كلهم يعاملوني كأني خادم ليهم
أنا خلاص ما أقدر أتحمل أكتر
" أطلعو من حياتي " صرخت بأعلى صوت
عندها الكهربا أنقطعت
وفي ثواني قليله رجعت تاني

البيت صار هادي ومافي أي صوت
كل اللي في البيت سكت بعد ما كانو عاملين أزعاج

دا اليوم اللي أتغيرت فيلو حياتي

هذا اليوم اللي ماتت فيلو كل عيلتي
من صغيرهم إلى كبيرهم
إلى الأن محد عارف كيف ماتو
50 شخص ماتو في ثواني!!!
Hamano Hotaru
14-03-2009, 06:17 PM
السلام عليكم
كيف حالك Ray-Kun؟ ((إن شاء الله بخير))...
ممكن أرد هنا ولا لأ "@.@, أنا أول وحده أنا اول وحده أرد, ماااااااااااااااااااااااااااا شاااااااااااااااااااااااااااء الله القصة تجنن ودعايتها بكاني "@.@ يعني بالأصح على وشك "^_^... القصة حلوه وفكرتها غريبه ومبتكره مبدع ما شاء الله أخي ^^ النهاية شوقتني للتكملة ^_^, بالتوفيق نستنى جديدك.



With My Love:
Taru-chan.
MALER
15-03-2009, 02:49 AM
شكرا على الرد Taru_chan
اتمنى انو تعجبك التكمله







الفصل الثاني


مر شهر من بعد الحادثه
ما بقي من عيلتي غير شهد بنت عمي و خالد ولد خالتي
بتقولو ليه ما ماتو؟؟
عشان ما كانو في يوم الحادثه
شهد متزوجه وعايشه في العاصمه مع زوجها عشان كده ما كانت في
خالد يدرس بالخارج عشان كده برضو ما كان في
امكن قعدت كل الأسبوع الأول لسه مني مصدق الي صار
وشهد وخالد ما صدقو كمان
ولا احد صدق
سبب الوفاه كان مجهول زي ما قالو الشرطه
والشرطه طلعتني من باب الأتهام عشان كده
مع إنو كان في شك من بعض الناس عشان انا الوحيد الي ما مت
وخاصة بنت عمي شهد , لسه معتقده إني انا قتلتهم
بس في حلقه مفقوده في القضيه
ابويا
للأسف ابويا مختفي من داك اليوم
ولا أحد شافو للأن

كانت ايام صعبه من جد وكنت حزين من جد
مع أني كنت أكرههم أغلبهم بس دحين ما بقيلي أحد في الدنيا
اصحابي لما دريو جو يعزوني
الكل كان حزين عليا
اصحابي اساتذتي جيراني
ماعادا شخص واحد لئيم اسمو شهد
شهد الشريره طردتني من البيت
لأنو طلع البيت مسجل بأسم عمي إلى هو ابوها
لما قلتلها ليه تطرديني من البيت حرام عليكي
قالت تستاهل ياقاتل
اخد شنطه فيها أشيائي وطلعت بره البيت وانا منكسر حزين
مني داري فين اروح ولا لمين اروح
مشيت ومشيت
وكملت مشي وانا اصلا مني داري فين رايح
تعبت
وقفت وحطيت الشنطه وجلست عليها
وفجئه سمعت صوت بوري سياره قدامه
نطيت من الفجعه
طليت للسياره
والله مو غريبه عليا
انفتح الباب الي ورا وطلع منو صديقي العزيز سوار

(سوار هو أقرب صديق ليا وأنا و هوا أصحاب من أيام المتوسطه
سوار كان مسافر بره البلد من بداية الأجازه الصيفيه وشكلو دوبو رجع)

" عمار إيش قاعد تسوي في الشارع " قال سوار وهو يبتسم ابتسامه بريئه
انا انكسفت وقلت "لا ولا شي بتمشى"
قام قلي" تتمشى مع الشنطه "
طليت عليه بوجه حزين كيوت وقلت " انطردت من بيتي"
قام هو بدون تفاهم سحب الشنطه من تحتي وقلي للسواق يحطها في الشنطه
ومدا ليا يدو وابتسم " تعال معايا "

عمري محا انسى دي اللحظه
كأني كنت ضايع في الظلام ولقيت النور

ركبت السياره وكانت فخمه جدا ( طبعا ابو سوار من كبار رجال الأعمال في البلد )
قعدنا في السياره ومحد فينا اتكلم
كل ما اطل عليه الاقيه يطل من الشباك يوزع ابتسامات
وانا جيت اوزع ابتسامات انفرط وجهي
مني عارف ايش اسوي
طليت عليه مره تاني لسه عمال يوزع
بس يحقلو ابتسامتو مرررره حلوه ( ما شاء الله ) لا احسدو

اخيرا وصلنا بيتو

بيتو ...... قصدي قصرو
دخلنا من بوابة القصر الكبيره وكملنا بالسياره وسط حديقة القصر الكبيره جدا
الين ما وصلنا للمدخل حق القصر
لم طلعت من السياره وطالعت على القصر الخيالي اللي قدامي أنبهرت
قعدت مبلم ساعه

جات الخدامه واخدت الشنطه وشالتها
مسك يدي وشدني " تعال اعرفك على بابا وماما"

دخلنا عند امو وابو
ابو كان قاعد يقرأ جريده
وأمو كانت قاعده تقرأ كتاب

" اعرفكم بصاحبي عمار , من اليوم حيعيش معانا "
قال سوار كده وامو وابو ولا كأنهم معانا في الغرفه
ولا احد فيهم اتحرك
وأنا أستغربت من كلام سوار
لأنو ما أتكلمنا على موضوع إني حعيش معاهم
إلا شويه ابو زغرلي زغره قويه
انا وجهي حمر
إلا الاقيهم يفطسو من الضحك
" ههه لا تخاف تعال اقعد معانا " قال ابو سوار
قعدت انا وسوار معاهم
قلهم سوار انو انا انطردت من بيتي
وأني ما عندي مكان تاني أروحلو
قامو حزنو عليا وقال ابوه " لا تخاف من اليوم بيتنا بيتك واعتبرني زي ابوك و ساره زوجتي زي امك"

والله طلعو ناس طيبين مره
انا مدري اشبي قعدت ابكي وهم قعدو يبكو معايا
وبكينا كلنا بكاء جماعي
كان منظرنا تحفه

اخدني سوار وراني الغرفه الي حنام فيها
كانت الغرفه كبيره وفيها بلكونه تطل على الحديقه
والأثاث مره حلو وفخم
قلي اذا تبغى اي شي اضغط على زر في الجدار تجي الخدامه
" اسيبك ترتاح شويه" وطلع برة الغرفه
قعدت مني عارف ايش اسوي
دخلت الحمام المتصل بالغرفه
ياشيخ الحمام افخم من مجلس الضيوف حق بيتي
اخدتلي دش وغيرت ملابسي ونمت لأني كنت تعبان
MALER
15-03-2009, 03:05 AM
الفصل الثالث


اليوم التاني
صحيت من النوم رايق
طلعت على البلكونه اتفرج على الحديقه
الجو مره حلو
منظر اشجار الحديقه والورود الملونه مره حلو
سبحان الله كأنو رسم

نزلت تحت جات الخدامه وقالتلي اروح افطر في غرفة الطعام
لما دخلت لقيت ابو سوار قاعد على الطاوله وقدامو كل اصناف الاكل
والطاوله ماشاء الله كبيره , ما فيها مساحه فاضيه من الاكل
قلي اتفضل
انا قعدت واخدتلي كروسونه
اخد ابو سوار رشفه شاهي وقال " نسيت اعرفك بنفسي , انا اسمي سمير, وزوجتي ساره "
حطيت الكروسونه من يدي وقلت " انا عمار "
قلي " لا ياشيخ كني مني داري" وقعد يضحك
يعني انا الي ماكنت داري معروف سوار أسمو سوار سمير يعني بالله ايش حيكون اسمك
وزوجتك معروفه من اكبر واشهر الرسامات ساره
وانا قاعد اقول في نفسي كده دخلت ابله ساره
قالت " صباح الخير" وجلست في الكرسي اللي قبالي
" صباح النور " ردينا انا وعمو سمير
طلت فيه وابتسمت الين ما عينها اتسحبت " كيف كانت نومتك امس "
جيت ابتسم ما قدرت ورديت " كويسه , الغرفه حلوه والسرير مريح وكل شي مرره كويس مرره شكرا على استضافتكم ليا "
مسحت على شعري بكل حنان وقالت " الحمد لله , يلا افطر كويس "

من زمان ما حسيت بلمسة الحنان دي
ولا امكن عمري ما حسيت بيها
حسيت بشعور دافئ
امكن دا هو الاحساس بالحنان
وهادي اول مره اعيشو

المهم نرجع لقصتنا
بعد شويه دخل علينا سوار
اول مره اشوف شكلو وهو دوبو صاحي
ما شاء الله عليه دايما حلو في كل الأوقات
جلس جنبي وحط يدو على كتفي
طليت فيلو ابتسم
حاولت ابتسم ما قدرت كملت اكلي

الحين اسيبكم مع الحوار الي دار في الطاوله:

سوار : صباح الخير
الجميع من غير سوار: صباح النور
ساره : سوار بعد ما تخلص فطور روح اكل الأرانب.
سوار: طيب يا احلى أم في الدنيا.
سمير : بس يا ولدي تراني اغار.
الجميع معادا انا : هههههههه.
سمير : اليوم عندي صفقه مهمه ادعولي تنجح.
ساره وسوار : الله يوفقك وينجحك امين يا رب العلمين .
ساره : اليوم بكمل رسمة الحديقه ادعولي تطلع حلوه .
سوار وسمير : ربي يوفقك وتطلع الرسمه حلوه زيك امين يا رب العالمين .
سوار: اليوم بالعب سوني ادعولي ما يعلق .
سمير وساره : يارب يوفقك ويخلي السوني ما يعلق امين يارب العالمين .
سوار : وانت يا عمار ما عندك دعاء تبغانا ندعيلك هو .
سمير : دا تقليد اسري لينا انو كل يوم في الفطور كل واحد يطلب من التانين الدعاء.
ساره : عشان ربي يوفقو في دا اليوم ويتحققلو الي يبغا .
سوار : وبما انك عضو من الاسره الحين لازم تجيب دعاء عشان ندعيلك .
انا : اااا..... طيب ...ادعولي اني ... اممممم ..... الاقي ابويا .
الجميع ماعدا انا : يارب وفق عمار وخلي يلاقي ابو امين يارب العالمين .
سمير : ايوا صح هما لسه ما لقو ابوك.
انا : لا للأسف , دورو في كل مكان ما لقو.
ساره : مسكين الله يكون في عونك.
سوار : يلا ايش رأيك تجي معايا نروح نأكل الأرانب .
انا : طيب .
سمير : بس انتبي لا ياكلك جومبا .
انا : مين جومبا ؟؟
سوار : حتعرف بنفسك.
ساره : استنوني لا تروحو عليا بدخل اجيب ادوات الرسم واطلع معاكم الحديقه .
سوار: طيب بس لا تتأخري .
ساره : لا تخاف ثانيه بس.
سوار : نشوف هادا وجهي إذا ما لطعتينا ساعه .
ساره : لا ياولدي لا تزعلني منك انا الحين اروح ساعه, والله بس عشان اول ما كنت لاقيا الفرش حقت الرسم عشان كده اتأخرت .
سمير : ها ها بتدوري على الفرش , ولا شوفتي مسلسل حلو في التلفزيون قعدتي تتابعي وسبتي ولدك يستنى .
ساره : للأسف كفشتني .
الجميع ما عدا انا : هههههههههه



اخيرا طلعنا الحديقه بعد ما استنينا ابله ساره امكن نص ساعه قلك قلك ثانيه.
مشينا ومشينا ومشينا ..... الحديقه ما شاء الله مره كبيره
الين ما وصلنا لمكان كده جنب بحيره صغيره فيها سمك صغير .
وقفت ابله ساره وقعدت تحك راسها وتقول : يووووو فين انا اول قعدت ارسم .
شاور سوار على الأرض وقال " هنا , شايفه هادا اثر قاعده الرسم .
حطت ساره القاعده على نفس المكان وقالت " ايوا صح ياولدي والله انك ذكي"
طلعت ابله ساره عدتها وبدأت تكمل الرسمه
اما انا وسوار مشينا متوجهين ناحية قفص الأرانب .

بعد مشوار طويل اخيرا وصلنا لقفص الأرانب
اشكالهم مره لزوووزه
والقفص كان مررررره كبير ومليان ارانب
دخلت انا وسوار القفص ومعانا خس وجزر
اخدت خسايه وجيت بأعطيها لأرنوب صغير
إلا الاقي شي كبير جاي من بعيد يجري
وهع اكل الخسه كلها مره وحده
انا صرخت "ايش دا ؟"
ضحك سوار وقال " هادا جومبا اسمن ارنب عندنا "
طليت في جومبا وقلت " دا ارنب دا بسه , ما شاء الله . وأيش الاسم الغريب دا ؟ بس الصراحه لايق عليه "
مسك سوار ارنوب صغير وقلي " دا اسمو دودو "
وشاور على واحد تاني " هادا سوشي, وديك ميرا, وداك شوربه ,والاسود داك انشتاين , والي قاعده تاكل ديك روري , والمسكين الي قاعد جنبك عزوز و ......................"
وقعد يكمل الين ما خلص اسمائهم كلهم
ماشاء الله عليه كيف حافظ الأسماء كلها
ويا سلام على الأسماء , من شتى انحاء العالم.
بعد ما خلصنا وطلعنا
قلنا نتمشى شويه في الحديقه
ونحنا بنمشي قلي سوار " تعرف اليوم في ضيف جاي عندنا "
انا طليت فيلو وقلت " منجد "
ابتسم وقال " بنت عمي لارا جايه اليوم من السفر"
انا " منجد "
سوار " هي كل سنه تجي عندنا , مرات مع ابوها وامها ومرات لحالها "
انا " منجد " مني عارف اقول شي تاني
سوار " امكن تقعد هنا شهرين تلاته "
انا " اها " اخيرا غيرت الكلمه
" كلمك أمجد " قال سوار
( أمجد دا تاني أفضل صديق عندي, أنا وهو وسوار دايما نقعد مع بعض في المدرسه )
" أيوا كلمني لما سمع بالخبر.... وقلي أنو محا يقدر يرجع من العاصمه إلى أخر الإجازه
" أها " قال سوار
بعدها مسك يدي وقلي " تعرف ؟ انا مره فرحان انك حتعيش معانا "
انا انكسفت ما عرفت ايش اقول
سحبني معاه وقلي " يلا نروح نشوف امي ايش سوت "
في ديك اللحظه وهو ماسك يدي
حسيت احساس غريب
كأنو اول مره احد مهتم بيا ... اول مره احد يحس بيا
حسيت اني ابغى امسك يدو للابد
وعمرو ما يفرقنا شي
للأبد
وصلنا عند ابله ساره
كانت قاعده تتكلم بالجوال وهيا قاعده ترسم
بعد ما خلصت كلام قالت " بسرعه يلا نروح نتجهز لارا وصلت المطار والحين السواق رايح يجيبها , يلا ايش تستنو جرييييييي للبيت "
إلا جريت بسرعه وطلت علينا من ورا وقالت " انت شيلو عدة الرسم ها ها ها ( ضحكه شريره ) "

فصل من الذكريات 1

أول مره قابلت سوار
كنت جاي مدرسه متوسطه جديده
كنت خايف إني ما ألاقي أصحاب جداد
أتذكر داك اليوم جيت متأخر والطلاب قدهم راحو على الفصو
أنا ما كنت عارف فين فصلي فرحت عند واحد مدرس وسألتو من فين أعرف فصلي
قلي في أورا معلقه في الساحه عليها تقسيم الفصول
رحت للساحه وكان في واحد ولد تاني برضو متأخر زيي
قعدنا انا وهو ندور على أسمائنا
هو لقا أسمو قبلي وقال " لقيت فصلي .... تبغاني أساعدك في البحث .... أيش أسمك ؟ "
قلتلو " عمار "
قلي " أنا سوار " وأبتسم
كانت دي أول مره أشوف فيها أبتسامتو
حاولت أردلو الأبتسامه بس ما قدرت ( أصعب شي عندي الأبتسام )

" أهو عمار لقيتو.... شفت طلعنا في نفس الفصل " قال سوار
أنا " كويس "

بعدها روحنا الفصل وقعدنا في ماصتين جنب بعض
ومن بعدها صرنا دايما نجلس جنب بعض
Hamano Hotaru
15-03-2009, 03:03 PM
السلام عليكم
كيف حالك Ray-Kun? ((إن شاء الله بخير))...
مااااااااااااااا شااااااااااااااء الله تبارك الرحمن التكملة مرررررررررره حلو بكتني وضحكتني وفرحتني وعصبتني حسيت اني ولا شعور ما شاء الله ما خليتني أشعره من قصتك الحلوة ^_^ يلا عقبال ما أشوف التكملة "^_^ عندي ملحوظة صغنونه: في كلمتين من فصل الذكريات آخر حرف ناقص يعني بس داه ألي لحظته لكن القصة كلها نايس وحلوة تجنن ((عارفه بتقول مشي حالك وما قصدي أتبع أخطائك وسوري لو غلط في كلامي "^_^)) , بالتوفيق أتمنى رأيت تكملة القصة عما قريب شكرا ^^.


With My Love:
Taru-Chan.
MALER
16-03-2009, 10:17 AM
اسف على الأخطاء الإملائيه الكثيره
بس ما كان عندي وقت اراجعها

يلا هاذي التكمله



الفصل الرابع


بعد ربع ساعه
وصلت لارا
والكل راح يستقبلها عند الباب
انا طليت بشوفها
طلعت بنت مره حلوه
شعرها قصير بني وعيونها زرقه
سلمت عليها
طلت فيا باستغراب كأنها تقول مين دا؟
انا قلت " انا عمار صاحب سوار "
لارا " انا لارا " وابتسمت
وانا كعادتي انكسفت
اما البقيه كانو مبسوطين جدا
وقعدو يرحبو بيها الين ما قالو بس
والخدم كلهم جو سلمو عليها
كل البيت يعرفها
المهم
دخلنا غرفة الجلوس وقعدنا
انا قعدت جنب سوار
وبدأ الحوار :
ساره : يييي مره كبرتي يا لارا مره احلويتي .
سمير : كيف حال ابوكي وامك انشاء الله بخير.
لارا : كلهم طيبين ويسلمو عليكم
سوار : شكلك تعبانه من السفر .
لارا : والله منجد الرحله مره طويله
ساره : اتذكر لمن رحنا عندكم بغيت اموت في الطياره , تعرفيني اخوف ما عندي ركوب الطيارات.
سمير : عمار أنت تخاف من الطيارات ؟
انا : لا ما عمري ركبت طياره .
ساره : حرااااام مسكين حزنتني , والله لو ما اخاف من الطيارات لكنت دحين حجزت رحله وسافرت معاك .
سوار : لارا تدري أنو عمار حيعيش عندنا
لارا : منجد ؟!
أنا : لا بس فتره مؤقته ألين ما يرجع أبويا
لارا : ليه فين أبوك ؟
سوار : دي قصه طويله بعدين أقولك إياها



امكن قعدنا ساعه نتكلم
وبعدين طلعت لارا الغرفه حقتها
وانا رحت مع سوار نلعب فيديو جيمز
قعدنا نلعب إلا شويه دخلت ابله ساره
وانضمت للعب
وبعد شويه جا عمو سمير
وانضم للعب
اول مره اشوف ابو وام يلعبو مع ولدهم
اول مره احس انو ممكن تكون العلاقه بين الولد ووالديه علاقة صداقه
امكن علشان في البيت كان ابويا وامي ما يهتمو بيا
وابدا ما كانو يعبروني
كأني مني موجود
في ديك اللحظه دمعه نزلت من عيني
سبت اللعب وقلت " بروح الحمام " وطلعت غرفتي
دخلت الحمام وغسلت وجهي عشان اخبي دموعي
سمعت صوت من ورايا
" ليش تبكي مدام انتا فرحان"
طليت ورايا , لمحت طيف بنت صغيره
ولكن الطيف اختفى بسرعه
انا قلت شكلو بيتهيألي
غسلت وجهي مره تانيه وطليت في المرايا
إلا اشوف البنت مره تانيه
قالت " انت قتلتهم , خلاص انساهم "
رجعت للغرفه بسرعه
طليت يمين وشمال ما في احد
رجلي بترتجف
وخلاص مني قادر اوقف
طحت وقعدت ارتجف وخايف
صرخت بصوت عالي
الا دخل سوار الغرفه بسرعه
" ايش فيك ايش صار ؟"
انا مسكت يدو وطليت فوجهوا وقلت
" انا ما قتلت احد "
وبعدها اغمى عليا

صحيت لقيت نفسي في السرير
وسوار قاعد في الكنبه
سوار " اخيرا صحيت "
انا ما كنت فاكر ايش صار
سوار" لا تخاف الدكتور قال ما بيك شي , بس اغمى عليك من فجعه ولا خوف "
انا " اغمى عليا !!"
سوار " منتا فاكر شي "
انا " ااااا دوبي افتكرت "
سوار " يلا قوم من السرير لا تتدلع , تعال نروح نتعشى "
انا " كم الساعه الحين "
سوار " الساعه عشره "
انا " اووووف كم صرلي مغمى عليا "
سوار " خمس ساعات "


بعدين اتعشينا لوحدنا
لأنو الباقين اتعشوا قبلنا وطلعو نامو
بعد ما اتعشينا قعدنا نتفرج تلفزيون
كان قاعد يجي فلم كوميدي
وف نثص الفلم احس شي طاح على كتفي
طلع سوار نام على نفسو
خلصت الفلم وصحيت سوار وكل واحد طلع غرفتو ينام

قبل ما انام قعدت افكر
افكر بلي صار اليوم
هل كان الي شفتو وسمعتو
خيال او حقيقه
Hamano Hotaru
16-03-2009, 01:54 PM
السلام عليكم
كيف حالك Ray-kun؟ ((إن شاء الله بخير))...
عارفه ما لو أمه داعي ارد بس يعني بعمل حركة شوية وببين أني متابعه جيدة والحمد لله ^.^... ما شاء الله بستنى بكره عشان التكملة كأني بشوف أنمي أو مسلسل "@.@ بدي أعرف مين ديك البنت عندي توقعات عليها يلا متى يجي بكره ((البنت مملة صح "<.<...)) بالتوفيق للتكملة شكرا...


With My Love:
Taru-Chan.
MALER
18-03-2009, 11:14 AM
taru شكرا على ردودك
وبالعكس انا انبسط لما تعلقي
انا عندي القصه كامله بس بنزلها شويه شويه عشان الحماس:D




الفصل الخامس


اليوم الي بعدو

صحيت وفرشت اسناني وغسلت وجهي وغيرت البجامه
ونزلت تحت غرفة الطعام
دخلت الغرفه لقيتهم كلهم قاعدين يفطرو
شكلي اتأخرت اليوم مو زي اول كنت تاني واحد يصحى
جلست في الكرسي نفسو الي قعدت فيلو اول
كان على جنبي اليمين سوار واليسار لارا
وقدامي ابله ساره وجنبها عمو سمير
اسيبكم مع الحوار الي دار اثناء الفطور:


ساره: كيف حالك عمار ؟
انا : الحمد لله .
سمير : ياولد ايش صرلك امس فجعتنا .
انا : والله ما ادري ايش صرلي , سمعت صوت يكلمني وشفت بنت صغيره تطلع وتختفي .
ساره : يامامي لا تخوفني .
سوار : شفتي يا امي قلتلك القصر مسكون جن ما صدقتيني .
سمير : ياولدي امكن يتهيألك .
انا: امكن.
لارا : انا مره اخاف من دي الاشياء , لو كنت مكانك كنت مت بدل ما يغمى عليا.
ساره : هههه الحمد لله ما طلعتلك الجنيه .
سمير : احم احم ... خلونا نبدأ ندعي .
ساره : انا اول , ادعولي ما اشوف الجنيه الي طلعت لعمار .
الجميع ما عدا ساره : يارب لا تخلي ساره تشوف الجنيه اللي طلعت لعمار .
سمير : ادعولي ربي يصبرني على زوجتي .
ساره :لا ياشيخ قد كده معزبتك في حياتك .
الجميع : هههههههههه
لارا : ادعولي لو شفت الجنيه ما اموت .
الجميع ما عدا لارا : يارب اذا لارا شافت الجنيه لاتخليها تموت.
انا: ادعولي انو الي صار امس مايتكرر .
الجميع ما عدا انا : يارب لا تخلي اللي صار لعمار امس يتكرر.



بعد الفطور رحنا نأكل الارانب
لما دخلت القفص هجم عليا جومبا
انا صرخت وقعدت اجري وهو يجري ورايا
اللين ما جات لارا ومسكتو وقالت " ما شاء الله يا جومبا مرره كبرت "
طليت فيها وقلت " انتي تعرفيه؟ "
طلت فيا وابتسمت وقالت " طبعا جومبا المفضل عندي "


بعد ما اكلنا الارانب قعدنا نتمشى في الحديقه
سوار " ايش رأيك يا لارا ناخد عمار مقرنا السري "
لارا " يلا "
انا" مقر سري!!!"
سوار " تعال معانا الحين نوريك أياه"
مشينا ومشينا ومشينا
إلين ما وصلنا عند شجره كبيييره
وتحت الشجره كان في مخبأ سري يوصل لنفق تحت الأرض
لما دخلت النفق حسيت بجسمي يتقشعر
ما ادري ليش
كان النفق كبير والجدران مليانه نقوش غريبه
كأني شفت دي النقوش قبل كده بس مو متذكر فين
طل فيا سوار وقال " دا النفق اكتشفناه انا و لارا لما كنا صغار , وما قلنا لأحد عنو "
لارا " يعني انت اول واحد يعرف عنوغيرنا "
انا " غريب ايش الفايده من دا النفق وايش النقوش الغريبه الي على الجدار "
سوار " والله علمي علمك "
لارا " امكن دا المكان يرجع للقصر القديم "
رديت بكل استغراب " القصر القديم !!!!"
ردت عليا لارا " انا اقولك القصه بالتفصيل , زمان ابو جدي اشترى دي الارض , وكان فيها قصر قديم حالتو حاله , قام ابو جدي بنى قصر تاني وهو دا القصر الي سوار عايش في , اما القصر القديم فأغلبو اتهدم وما بقي منو غير جزء صغير في طرف الحديقه "
مسك سوار يدي وقال" تعال اوريك الجزء الباقي من القصر القديم "
طلعنا من النفق ومشينا اللين ما وصلنا لمكان زي الخرابه
دخلنا من الباب المكسور
وكان جو خرابه اكتر من بره
طليت في الجدار لقيت نفس النقوش اللي كانت في النفق
وبين الخرابه كان في تمثال ابيض
وكان على شكل بنت صغيره
قربت منو اكتر عشان اشوفو بوضوح
وكانت المفاجئه كبيره
الصنم يشبه البنت الجنيه اللي شفتها امس
فرصعت عيوني وطليت لسوار ولارا بوجه مفجوع وقلت " دا الصنم نفس شكل الجنيه حقت امس "
قمنا صرخنا وهربنا جري على الباب
ولما وصلنا خلاص
إلا نسمع صوت الجدار بيتكسر
ويطيح على المدخل
وانقفل طريق الرجعه
وبقينا محبوسين في الداخل.


فصل من الذكريات 2

أمجد صديق عزيز عليا
أول مره أتقابلنا في أول سنه من الثانويه
كان دايما يقعد يتكلم معايا عن الكوه وأنا ما أفهم شي
هو مشارك في فريق كوره للشباب
ودايما يروح التدريب وخاصة في الفتره الأخيره
ودا الصيف راح العاصمه عشان في مخيم تدريب هناك للفريق وكمان في أخر الصيف في بطوله

أتذكر يوم من الأيام كنت في المدرسه وشايل دفاتر الفصل كلها بوديها لمكتب المدرسه منى
أبله منى دايما تطلب مني إني أجمع دفاتر الواجب حق الفصل وأوديها لمكتبها
دا اليوم كنت في طريقي للمكتب وشايل معايا جبل من الدفاتر
فجئه جو قدامي كم ولد من سنه تالته وصقعت في واحد بالغلط عشان كنت مركز إني ما أطيح الدفاتر وما أنتبهت على الطريق
طاحت كل الدفاتر على الأرض جيت بلمها إلى مسكني الولد اللي صعت فيلو من رقبتي ورفعني وقال " ما تشوف أنت ...أعمى"
الولد كان مره ضخم ومخيف ومعروف عنو أنو كل يوم في مضاربه
أنا كنت خايف مره وقعدت أتأسف ليه بس هو ماينفع معاه
رماني على الأرض بكل قوتو
وجا يبى يكمل عليا ضرب
لكن فجئه طلع أمجد مدري من فين ورفز الولد الضخم في بطنو وطيرو بعيد
"أنت كويس ؟" سألني أمجد
"أيوا " رديت عليه وأنا بقوم من الأرض
الولد عصب مره وقال لأصحابو أنو يدخلو معاه في المضابه
أنا " أمجد تعال نهرب محا نقدر عليهم "
بس أمجد وقف مكانو وقال " أنا ما أهرب من ناس زي كده, أنا لازم أوقفهم عند حدهم "
هجم الأولاد علينا وأنا قلت أنتهينا
" كفايه" كلمه جات من ورا خلتهم يوقفو
" أبله منى " قال الولد الضخم
الحمدلله جات أبله منى وأنقذتنا
صرخت عليهم وقالت" كيف تتجرؤو وتهاجمو الولد اللي يشيل دفاتر طلابي "
والله عندي أسم
أدتهم أبله منى نظره قاتله قامو هربو وهما قاعجدين يقولو " أسفين محا نعيدها تاني"
إلى النظره حقت أبله منى تقتل
جات عندي أبله منى وقالت " أنت كويس ...يا الولد اللي يشيل دفاتر طلابي "
أنا كنت كوي بي بعد ماقالت كده أتحطمت
" أبله صرلي معاكي سنتين ولسه ما حفظتي أسمي " قلتلها بنبره محطمه
" لا كيف أكيد أعرف أسمك ......... أنت .....أممممممم ..... ع....عع....عدنان...هاههاههاا... قولتلك أعرفو"
أنا طحت على الأرض من التحطيم
قلتلها " أبله أنا عمار مو عدنان "
ضحكت وقالت " كلهم بحرف العين ما تفرق " طلت في أمجد وقالت " صح يا أمجد؟ "
أنا بعدها أتدمرت أيش معنى عرفت أسم أمجد و أنا لأ

اليوم اللي بعدو كنت قاعد في الفصل في حصه فاضيه المدرس كان غايب
فجئه دخلت طالبه الفصل وقالت " أبله منى تقول خلي الولد اللي دايما يشيب ليها الدفات يجي ياخد الدفاتر من المكتب"
والله عندي أسم
Hamano Hotaru
18-03-2009, 02:24 PM
السلام عليكم
كيف حالك Ray-Kun? ((إن شاء الله بخير))...
كويس أنه ما تضايق من ردودي المهم...... بالنسبة للتجزيء ما شاء الله حلو بالنسبة لوحده في النادر ما تقرأ كتاب داه كويس لأنه لو كانت طويله ومره وحده تحلم اقرأها وفكرة التحميس حلوة.... بس ما حبكت عليك غير توقف قما يقفل النفق عليهم "@.@ بتشوقني عقبال الله يحفظ عمار وسوار ولارا من كل شر ^_^ وفصل الذكريات حلو تعرفنا على كيف أتعرف عليهم وفزيعة أبله منه مع الولد الي يجمع لي دفاتر الفصل هاهاهاهاهاهاها حرااااااااااااااااااااام عمار مسكين غلبان تنسى أسمه كده يبغالي أدعي له تفتكر اسمه المره الجاية ^_^ تعرف بالنسبة لاسم عمار فكرني بداك المسلسل التركي ألي أمي جننتني به وهو دمعة ورد كانوا مسمين البطل عمار وأنا أساسا ما اطيق التركي وأعوانه "^_^...... يلا لا تطول علينا بالتكملة, بالتوفيق وشكرا ^^.


With My Love:
Taru-chan.
MALER
19-03-2009, 11:09 PM
الفصل السادس


بعدها ما عرفنا ايش نسويي
كنا خايفين ومترعبين موت
لارا من الخوف صارت تصرخ وتبكي
وسوار بيحاول يهديها
وانا عاد رجولي بترجف ومني عارف ايش اسويي
بعد دقايق هدينا شوي وقررنا ندور على مخرج تاني
حاولنا نخرج من الشبابيك بس كل الشبابيك كان عليها حديد
قعدنا ندور وندور
الين ما لقينا فتحه صغيره امكن ولا احد فينا ممكن يكفي فيها
قال سوار للارا تجرب لأنها انحف وحده فينا
دخلت لارا من الفتحه وقدرت تعدي
سوار " روحي البيت ناديهم خليهم يجو يساعدونا "
لارا " طيب "
وانطلقت لارا بسرعه عشان تطلب النجده
اما انا وسوار قعدنا نستنى
طله فيا سوار وقال " انت منجد شفت جنيه امس"
انا " ايوا والله العظيم شفتها "
سوار " طب ليش كنت قاعد تقول انا ما قتلت احد ؟"
انا ماعرفت ايش اقولو ارتبكت وقلت " انا اسف "
قام سوار من مكانو وصرخ " اسف ليش ؟ انت ليه شايل في نفسك ؟ "
انا بدأت ادمع وقلت " اسف انا ما ........"
بعدها ما حسيت إلا كف سوار في وجهي
وقال " تعرف ليش ضربتك ؟ عشان تصحى . انت ما قتلت احد عيلتك ماتت خلاص لاتحمل نفسك المسؤوليه"
انا قعدت ابكي " طب ليش انا الوحيد اللي عاش ؟ ليش مامت معاهم ؟ "
سوار " الله ما اراد انك تموت خلاص لا تحسس نفسك بالذنب "
انا " مو دا الشي الوحيد اللي مخليني احس بالذنب . انا حاسس بالذنب عشاني احس نفسي سعيد اكتر من غيرهم . احس بالسعاده معاكم اكتر من لما كنت معاهم . كأني انا اتمنيت موتهم كأني انا قتلتهم "
وفجئه سمعنا اصوات جايا من بره
كانو بيكسرو الحجر الكيبر اللي على الباب عشان يطلعونا
قلي سوار " الحمدلله جو ينقذونا "
بعد دقايق انكسر الحجر
وطلعنا من القصر القديم
وانا طالع حسيت بشعور غريب
كأنو احد بيسحبني للقصر ويمنعني من الخروج
طليت ورايا وشفت الصنم اللي على شكل الجنيه
ضحكت على نفسي وقلت
الحين لما طلعت شكلها ما يخوف هههه


الفصل السابع

بعد اسبوع
مر الاسبوع سريع وما حسينا بيلو , ما كان في تطورات كبيره في دا الاسبوع اللي فات
بس اليوم كان في شي غريب
من يوم ما صحيت لقيت ورقه في غرفتي مكتوب فيها
(افتح الباب وخد سلاحك وانزل قابلنا في الحديقه )
انا ما فهمت شي 
فتحت باب الغرفة لقيت رشاش
لاتخافو رشاش مويا
وكان في طوق يتحط على الراس فيلو حلقه من الحديد في وسطها ورق
اخدت الرشاش ولبست الطوق ونزلت الحديقه
لقيتهم بيستنوني هناك
سوار ولارا وعمو سمير وابله ساره
وكلهم معاهم رشاش وطوق
ابتسم سوار وقال " اقلك قوانين اللعبه ولا تعرفها "
انا قلت " لا لا ايت قوانين ؟ ايت لعبه؟ "
سوار " كل واحد معاه طوق ورشاش تطلق على طوق التاني الين ما يتقطع , اذا اتقطعت الورقه اللي في طوقك تخسر , وأخر واحد حيبقى حيفوز "
لارا " حعد لتلاته ونبدأ اللعب ….. واحد ….اتنين…….تلاته "
وبدأنا اللعب
كل واحد راح استخبى في مكان
وانا دخلت بين الشجر
استنيت 5 دقايق محد جا
قلت خليني اطلع ادور عليهم
وفجئه الاقي عمو سمير طالع في وجهي
انا انفجعت وطاح الرشاش من يدي
وهو ما صدق قعد يرش على طوقي
وانا هربت وسبت رشاشي في الارض
وهو يلحق ورايا وانا اجري
الين ما اخدت دوره كامله حول الشجر ورجعت للرشاش واخدتو
ومسكت الرشاش وهاجمت عليه بكل قوتي
هععععععععععععععععععععع
هزمتوووووووو
خرقت ورقتو
اما انا ماشاء الله عليا ما صار لي شي
قالي عمو سمير " لا تفرح كتير ترى كلهم احسن مني انا اصلا دايما اخسر اول واحد "
انا " لا تخاف انا حفوز"
عمو سمير " لا واثق من نفسك مره , انا اقلك هيا من الحين أنسى "
المهم تركتو ورايا وكملت طريقي بحثا عن الضحيه التاليه
سمعت صوت خطوات اقدام بتقترب مني
هع هادي لارا جايا من بعيد
قربت منها من غير ما تحس
ورشيتها بالمويا على الطوق
وهيا قعدت تصرخ في مكانها
هعععع فزت للمره التانيه
ودي المره كان الفوز سهل جدا
قالت لارا " انا اوريك كدا تخسرني والله لسه حتى ما استخدمت ولا قطرة مويه"
انا " هع هادا اللي يسمو الهجوم المفاجئ"
بينما نحن نتحدث كانت هناك اعين تراقبنا عن بعد
تنتظر اللحظة المناسله للهجوم عليا
اشبي قلبت عربي فصحه
وفجئه ومن فوق الشجر نطت ابله ساره
ورفعت رشاشها في اتجاه طوقي
وضغطت على الزناد
وطشششششششششششششششششششششششششششش
شششششششششششششششششششششششش
شششششششششش
لاكن للاسف المسافه كانت بعيده جدا
وما وصلني ولا شي
وما بقيلها ولا قطره
اما انا فطليت عليها بنظره لئيمه ههههااااااا
وقربت منها بسرعه واتخلصت منها في ثواني
هاااااااااااااي الانتصار التالت
ساره " اهئ اهئ وانا اللي عامله ننجا ومتسلقه الشجر في النهايه انهزمت "
بقي خصم واحد مختبئ داخل الاشجار
يارب اتغدى بيه قبل ما يتعشى بيا
سوار أنا قادم

بديت ادور على سوار
كنت خايف مره لا يطلع من ورايا وينقض عليا
مشيت بين الاشجار بكل حذر
الين ما وصلت لمكان مليان ورود
المكان كان مره يجنن الوان الورود وريحتها ولا احلى
وانا قاعد استمتع بالمكان
ما الاقي إلا سوار طالع من بين الورود وهاجم عليا
انا من الفجعه طحت على الارض
والورود تحتي الله يرحمها
تمالكت نفسي بسرعه وقمت على حيلي وقاتلت سوار بكل شراسه
انا اهجم وهوا يتفادى الهجوم
هو يهجم وانا اتفادى الهجوم
وكل الباقين وصلوا لساحة المعركه وقعدو يتابعو المعركه ويشجعو
طبعا كلهم كانو قاعدين يشجعو سوار عشان ينتقمو مني انا هزمتهم
ما عدا لارا كانت قاعده تشجعني
وانا اسمع صوتها ينادي اسمي
كأني اول مره اسمع اسمي
احساس غريب انا عارف بس…
وهيا قاعده تشجعني وتتمنى اني افوز …
دي اللحظه اللي تحس فيها انو لازم تفوز …لازم
هادي المره محا اخطئ الطوق وحأفوز…. علشانها
سوار استغل الفرصه وطلق عليا
وانا طلقت عليه كمان
غمضت عيوني وصرخت
هعععععععععععععععععععععععععععع
وانا مغمض عيوني سمعت لارا تقول " ياهووو قلتلكم انو عمار حيفوز "
فتحت عيوني وطليت في عمار
ياهوووووووووو خرقت الورقه اللي في طوقو وورقتي سليمه
انا فزت
عمو سمير قال " مدام اتبلبنا يلا نلعب حرب مويه مره وحده "
كل واحد راح عبى رشاش المويه حقو وقعدنا نلعب اللين ما غرقنا


الفصل الثامن

في الليل
كنت ميت من التعب وخلاص مني قادر افتح عيني من التعب
طلعت غرفتي انام
وانا في الغرفه سمعت صوت جاي من الشباك
اول شي خفت وقلت خلي ولي عسى عمري ما عرفت ايش دا الصوت
بس لما زاد الصوت رحت وفتحت الشباك
لقيت رجال لابس اسود في اسود قاعد يتسلق الجدار
وكسر شباك لارا ودخل منو
سمعت لارا تصرخ
لازم اتصرف لازم اروح انقذها
طلعت من الغرفه وجريت بسرعه لغرفة لارا وانا انادي على اللي في البيت عشان يساعدوني
وصلت غرفة لارا
كان الباب مقفل
واصوات صريخ وتكسير جايه من داخل الغرفه
صقعت الباب بكل قوتي مو راضي ينفتح
طليت حوليا لقيت سيف معلق على الجدار زينه ( اظن انو من كنوز العيله )
اخدت السيف من الجدار وبديت اضرب بيلو الباب
اللين ما كسرت فتحه صغيره بعد عناء
طليت من الفتحه ماكان في احد في الغرفه
شكلو خطفها وهرب من الشباك
جا سوار عندي يجري يقولي ايش في
قولتلو لارا اتخطفت
قال " ايش؟ منجدك تتكلم "
انا قلتلو " روح نادي عمو سمير واتصل بالشرطه انا حروح الحق وراهم "
سوار " طيب بس انتبي على نفسك "
انا طليت في السيف اللي في يدي وقلت " لاتخاف عليا "
انا طلعت للحديقه وسوار طلع ينادي عمو سمير
سامع صوت لارا من بعيد تصرخ
وانا اصرخ " لارااااااااااا"
جريت بتجاه مكان الصوت
ولقيتهم كان الرجال شايل لارا على كتفو وبيدخل القصر القديم
انا لحقتهم للقصر
معايا السيف وداخل وسط الظلام في القصر القديم
داخل وما في بالي غير شي واحد …. لازم ….لازم اطلع من هنا ومعايا لارا
Hamano Hotaru
21-03-2009, 02:36 PM
السلام عليكم
كيف حالك Ray-Kun? ((إن شاء الله بخير))...
ما شاء الله زي العاده موقف في مقطع فظيع كأنك بتقاضيني على ألي بسوي في الجماعة مع قصتي The Truth dream هه المهم عندي ملاحظه صغيرة "@.@ (( فتحت عيوني وطليت في عمار)) هو مو عمار ألي يتكلم طيب يعني هو بيطالع في سوار بس أنت كاتب عمار "@.@ داه شيء لحظته "@.@... المهم بالتوفيق نشوف التكملة في أسرع وقت ^_^.... شكرا...


With My Love:
Taru-Chan.
MALER
27-03-2009, 11:12 AM
شقيت طريقي داخل الظلام
وبلحق ورا صوت صراخ لارا

ولاكن فجأه سكتت

اكيد صرلها شي

مشيت شويه وكان في غرفه من بعيد منوره

دخلت الغرفه وكان فيها شمعه

دعست على شي سائل
طليت تحتي لقيت دم

معقوله دا دم لارا

لا ..... لا ... لارا طايحه في الارض
والارض مغرقه بدمها

لمن شفتها اتصنمت في مكاني , وطاح السيف من يدي
قعدت على الارض المليانه دم ومسكت يدها
وقعدت ابكي
وفجئه سمعت ضحكه شريييره

طليت قدامي لقيت الرجال اللي لابس اسود في اسود قدامي وماسك في يدو مسدس

صوب المسدس عليا وانا اتشهدت
ضغط على الزناد و...........

طلع المسدس ولاعه

طليت فيلو بكل تعجب وقلت " ايش؟؟"

سمعت صوت لارا تضحك من ورايا
قعدت تضحك وتقولي " الكاميرا الخفيه"

انا خلاص حسيت بنتعاش والخوف كلو راح

وطلعت كل العيله بره وكلهم كانو مخططين عليا

والرجال اللي لابس اسود في اسود طلع واحد من الخدم

كلهم ماتو من الضحك عليا
وانا اقولهم في احد يسوي مقلب زي كده بغيتو تموتوني من الرعب

قام قلي عمو سمير " يييه لسه ما شفت شي , قد سوينا مقالب اقوى من كده"

سوار " لا اكتر شي يضحك لمن قلتلو انتبي على نفسك قام طل على السيف وقال لاتخاف , انا قلت في نفسي لا معاك سيف وما تباني اخاف الله يستر لاتقتل احد ههههه"

ابله ساره " ايوا صح فين السيف "

انا " اووو نسيتو جوا القصر عشان طاح مني , الحين اجيبو"

لارا مسكت يدي وقالت " بروح معاك "

دخلنا القصر ومشينا اللين ما وصلنا للسيف اخدناه ومشينا راجعين للباب

ونحنا بنمشي قالت لارا " تعرف ....مع انو كل اللي عملنا مزحه ... بس منجد حسيت انك خفت عليا ... وانك منجد كنت تبا تساعدني ...عشان كدا بقلك شكرا ...شكرا مره على دا الاحساس اللي عيشتني هوا "

انا انكسفت كالعاده وخدودي صارت طماطم وقلت " عفوا "
قامت هي ضحكت وقالت "انت بطلي هههه"

قعدت أسأل نفسي داك اليوم قبل ما أنام
ليش أنا عملت زي كده؟
ومن فين جاتني كل الطاقه والشجاعه دي وأنا اللي كنت أهرب إذا واجهتني أي مصيبه؟
معقوله تكون دي طاقة الحب
أنكسفت وغطيت نفسي بالبطانيه وقلت في نفسي" حب...... أنا أصلا مو وجه حب ....نام نام أحسن"
MALER
27-03-2009, 11:18 AM
الفصل التاسع

مرت الأيام بسرعه وقربت الإجازه الصيفيه تخلص
صرلي هنا في دا البيت أكتر من شهرين
أتعودت على المكان وأتعودت على الناس ومنجد صارو زي أهلي
أتعلقت مره بعمو سمير ونكتو البايخه
و أبله ساره ومقالبها الفظيعه
و سوار وتوزيعو للإبتسامات اللي ما يخلص
و لارا اللي كل ما تكلمني وجهي يقلب طماطم
أهم شي اللحظات السعيده اللي عشتها معاهم واللي محا أنساها أبدا
أحس أنو الأيام دي هي أكتر أيام كنت سعيد فيها في حياتي

اليوم رحت مع لارا السوق عشان هي تبا تشتري شي وطلبت مني إني أروح معاها
قعدنا في السوق 3 ساعات
تعرفوا عاد البنات ما يرتاحو إلا بعد ما يلفو السوق كلو
" أناعارفه إني تعبتك .... خلاص دا أخر محل ندخلو ههههه " قالت لارا
أنا أنكسفت وقلت " لا عداي خدي راحتك أصلا ما ورايا شي تاني "
دخلنا المحل ولارا شافت ميدالية مفاتيح على شكل بسه زعلانه
" مره تشبهك البسه" قالت لارا
أنا " ليش تشبهني ؟؟ "
قالت "عشان أنا ما عمري شفتك تبتسم "
أنا مره أنكسفت وما عرفت أيش أقول
أشترت لارا الميداليه ولما طلعنا من المحل أعطتني هيا وقالت " هادي هديه ليك عشان تعبتك معايا اليوم "
أنا " لا ما يحتاج "
بس هيا أصرت أني أخدها

لما رجعنا البيت كان في شي غريب يستنانا
جا البيت أربعه بنات يقولو أنهم يعرفوني مع أنو أنا ما عمري شفتهم في حياتي
أقلهم من فين تعرفوني يقولو نعرفك من زماااااااااان
أبله ساره عزمتهم على الغدا
وقعدنا معاهم على طاولة الطعام وقعدنا نتكلم
البنات دولا مره غريبات من فين طلعو ما أعرف
وحده اسمها يارا شعرها قصير مره زي الاولاد واصلا حركاتها وملابسها زي الاولاد اول ما شفتها حسبتها ولد

والتانيه اسمها لينا بس تقعد ساكته ما تتكلم وشعرها طويل اسود وتلبس نظارات

والتالته وعود هادي عكس لينا , ما توقف كلام عيونها خضره وشعرها بني

اما الرابعه والاخيره اسمها فاتن وشكلها عامله الرئيسه عليهم رابطه شعرها على ورا

اسيبكم مع الحوار اللي دار ونحنا بناكل:

ساره: كيف الاكل انشاء الله عجبكم .

فاتن : لا والله الصراحه مرررره لذيذ تسلم ايدك يا ابله .

ساره : الله يسلمك بس الطباخه اللي طبخت مو انا هههههههه.

سوار : لا بس طبخ ماما حاجه تانيه جنااااان تاكليه من هنا على المستشفى على طول .

ساره : اقول سوار لا تطلع الفضايح .

لارا : عمار احطلك سلطه .

انا :لا شكرا ما احب السلطات .

وعود : ههه من صغرك وانتا ما تحب السلطات .

انا : والله اللين الحين مني متذكر فين شفتكم قبل كدا.

فاتن : نحنا حنسيبك تعرف بنفسك محا نقولك شي .

يارا : نشوف اذا كنت ذكي حتتذكر .

لارا : شكلكم تعرفوه كويس .

فاتن : طبعا طبعا كنا دايما سوا ما نفارق بعض .

سمير : كل دا ومو فاكر بالله عليك ياعمار.

انا : والله مني فاكر .

ساره: ممكن انا احزر .

فاتن : طيب عادي.

ساره : انتو كنتو جيرانهم .

فاتن : لا خطأ مره مو جيرانهم.

انا : اصلا انا ما اعرف احد من جيراني .

سوار : طيب امكن انتو تقربولو من بعيييد .

فاتن : لا لا ما نقربلو .

لارا : امكن انتو صحباتو في المدرسه أيام الإبتدائيه .

فاتن : لا اصلا انا ما اعرف مدرستو الإبتدائيه ولا المتوسطه ولا الثانويه.

وعود : بس لو تدري قد أيش تعبنا ألين ما عرفنا أنت فين قلبنا الدنيا فوق وتحت عشان نلاقيك
انا : انتو متأكدين انو انا هو عمار اللي تعرفوه ؟
فاتن : هه طبعا متأكدين .





بعد الاكل نادتني فاتن وقالتلي تعال الحديقه نتكلم لوحدنا

انا رحت معاها للحديقه

طلت فيا وقالت " انا اسفه على اللي صار لعيلتك "

انا نزلت راسي في الارض
قامت قالت " بس هو دا اللي كان لازم يصير , اسفه"

انا انفجعت من اللي قالتو وقلت " ايش قصدك ؟"

طلت فيا وابتسمت وقالت " لا شكلك مره منتا فاكر "
" عمار أنت مكانك مو هنا .... أنت لازم ترجع لمكانك الحقيقي " قالت بنبره جديه
أنا ما فهمت أيش بتقول
حطت يدها على كتفي وقالت " يوم من الأيام حنحتاج ليك وعندها أنا حبلغ عن مكانك وحيرجعوك بالغصيبه..... بس أنا ما أبا دا الشي يصير"
طلعت من شنطتها قلاده وأعطتني هيا وقالت " لما تحس أنك مستعد أنك تعرف الحقيقه ...أمسك دي القلاده في يدك وناديني بقلبك وأنا حوعدك أني حجيك "
مشيت شويه وقالت " لا تخاف قريب حتعرف كل شي , يلا لازم نرجع "

أنا وقفت في مكاني ولساني عاجز عن التعبير
كنت حابب أسألها عن الحقيقه بس في شي منعني
كنت خايف أني ما أتقبل حقيقتي

راحو البنات الأبعه وسابوني غارق في بحر من الحيره


قعدت طول الليل افكر
بالله كيف ممكن الواحد ينسى قد كده
كأنو جزء من ذاكرتي انحذف
دولا البنات خلوني اشك في نفسي

جاني سوار وقعد معايا
قلي اشبك ما تنام
قلتلو مو جاييني نوم
سوار " البنات صح؟"
انا " طبعا"
سوار " انا خايف انو يطلعو ناس كدابين "
انا " ما اظن , تعرف ايش قالتللي فاتن قبل ما تروح "
وحكيتوا ايش قالت
سوار" والله كلامها يخوف "
انا " منجد"

وقعدنا نتكلم اللين ما طلع الفجر
بعدين نمنا
Hamano Hotaru
27-03-2009, 04:59 PM
السلام عليكم
كيف حالك Ray-Kun؟ ((إن شاء الله بخير))...
ما شاء الله أخيرا التكلمة خليتني أتحمس كتير "^_^ وبعدين وقفت كم يوم تدخل عارفة مشغول الله يوفقك وبس المهم..... يااااااااااااااااااااااااااااي ممكن أكون لارا وأصير صحبة عمار بليز بليز بليز ^_^ ((البنت معجبة من زمان في عمار شخصيته حلوه)) لينالي لو عرفت بتقولي حتى داه ما سبتي غير قلتي بدك هو "@.@ رح أرد ويش زنبي لو هو يجنن "^_^... المهم ويش دوله البنات الأربعة بدي أقتلهم كده يخوفوا عمار ما يسير جيبولي هما بدي أقتلهم... "^_^... المهم بالتوفيق لكله ويارب تجي التكلمة بسرعه ^^... بالتوفيق...



With My Love:
Taru-chan.
Hamza A.S Ashor
29-03-2009, 08:08 PM
ماشاء الله دعست يا ريان ^_* وصلت 8 فصول ... وإحنا لسع في الثالث ... يلا نحاول نلحقك ... بس صراحة الين الحين تمام والفكرة اللي عجبتني انك حطيت الدعاية على اليوتيوب .. حركات ريان ...