العشـــــــق الأزلي ( 1 ) [الأرشيف]

محروم

11-01-2002, 10:40 AM

العشق الأزلي

في يوم ..مشرق بالليل..ومن صباح هذا المساء...ولد فتى مملوح ..يدعى صويلح

وكان هذا الفتى..يتميز منذو نعومة اصابعه ..بأنه خرشه ..مع شيء من الطفاقه..ولايهون الأستدلاخ

ويعد صويلح..ايضا..اول من انولد بالعالم..وهو عمره سبعطعش..يعني سبعطعش..سنه منسدح ببطن امه يقول منيب طالع لين تشرون لي سيارة..

وكذلك..وبعد اربع دقايق ..وست وسبعين ثانية..من مولد صويلح...ولدت الفتاة حصيصه..

والتي تتميز..بقناصيعها..والتي كانت سبب ضياع مستقبل صويلح...وايضا..تتميز ..بطول القامه..حيث انها اذا جت تركب السيارة يصفطونها بالشنطه اللي ورا

بعد ..ان مرت عدة سنين...وتوالت الأيام ...وفي اليوم العاشر..من شباط الخامس حزيران السابع من عام الف وسبعمية وسبع وثمانون من سبتمبر نوفمبر الجاري..للميلاد قبل الهجرة

في ذلك التاريخ اللي قبل شوي..والله منيب قايله مره ثانيه..

ومن صباح ذلك اليوم.......

ترررررررررررررررررررررررررررررررررررررن = هذي ساعة صويلح الخراشه

قام صويلح من فراشه..وبكل أدب اخذ الساعه..وفلق بها هندي (نفس الهندي اللي جلده صويلح يوم يقوله وراك تنسدح قدامي..في موضوع كيف تسوق السيارة بالرياض)..

فتح اللمبه..حيث كانت لمبه لونه اسود ..على باله بتصير ظلام..

وكان صويلح يحس..باحساس ..نفس احساسك اذا ارسلك ابوك تشري مقاضي ويوم وصلت البقاله نسيت وش تشري..

فتح صويلح الطاقه ( النافذه - الشباك )..وقعد يتمغط ..ويتمغط...لين تمصع ..ولكن مازال يتمغط ..يوم ناظر تحت ..ترارا (موسيقة تصوريه) انصدم ..وصابه الذهول..مع شد عضلي بالخشم...وانهبل..وجاه اسهال باصبع رجله اليسار...ياللهووول ماذا رأى صويلح...؟؟

عندما..قام صويلح..الى الطاقه (الشباك - النافذه ) ..نسينا نقولكم انه كان فيه ستارة على الطاقه..تونا مركبينها....

لأن مساعد المخرج ..الأخ محماس..توه يجيب القطة حقت الفلم..حيث انه قاط معنا بستارة..خربزية مائلة الى اللون الأخضر..اللي لاشفته من بعيد قلت انه اسود..كاروهات..مقلم ببرتقالي..مع قليل من الشخابيط عليها..تقل شخابيط واحد بثاني ابتدائي حاء....كل ذا وصف الستارة..

اهم شي..فتح صويلح ..الستارة ..ومن ثم الطاقه..وبعده قليل من التمغطات المتتابعه...لفت نظره ..شيء بحوش الجيران..

وصرخ صويلح فجأه قائلا : وجع ياملا البلا وش ذي الجنيه..وانطلق يجيب حطبه موزيها بالدولاب..

تنبهت له الجنيه : عض على شحمه لا اجي احوسك ..انا حصيصه بنت جيرانكم ..اول مره تشوف..وحده منفقع بشوشتها قنبله ؟

رد عليها صويلح...بالفعل..وليس بالقول...حيث..نشب الحطبه بجبهتها...واتبعها..ببعض الشتائم...منها ..قال : انثبري بس ياللي خشتك كنها حاصل قسمة 72 على 87 .

ردت ..عليه حصيصه..بنظرة خاطفه..تدل على ..مدى ماتتمتع به من خبث ولعانه ونجاسه لو يفرقونها على فصل اولى ثانوي طاء بمدرسة خزاعة بن اموكاشي..بنيجريا لكفتهم ..

وردت عليه..قائله : كش عليك..يارب تزلق بقوطي صلصه على خشتك..ويمر ددسن محمل رز ..ويدعس خشمك ..انت ووجهك اللي كنه ..دفتر توحيد ابو سبعين

فيه هذه اللحظه..الحاسمه من الهوشه..صويلح فهم غلط..

وقال بنفسه..ياعمري ياحصيصه تقول يارب يدعسني ددسن محمل رز بس ؟؟ ياربيييه ماقالت محمل اكياس سمنت (علما ان كيس السمنت اثقل من خيشة الرز بخمسة كيلو ) ياربييييييه ما تحمل..حبتني حصيصه لا ما اقدر اي كانت اي كانت = يعني ما اقدر بس بالأجليزي

وبلحظات ماكان صويلح يهوجس..جته بياله مسرعه مره ..ماردها الا خشته ..وانتبه انها حصيصه ..كانت تشرب شاهي...

جاء حس بهول الموقف..وقال لها بيتين شعر ...:

ماكنت ارضى تزعلين ....وانتي بتهديني الزعل ( بعذره والله فالقته ببياله )

محروم عيني شوفتك (الله من النصب ) ........لا تحرميني كلمتك ( يقصد فلقتك )

ردت عليه حصيصه...وبــــكل ماتحمله من رومانسيه في وجدانها ..قائلة...: اقول انثبر وهات بيالتنا لا اجي اتوطى ببطنك

قال صويلح : هاه ايه البياله سمي هذاه ( فهم غلط صويلح وقال بنفسه..اكيد تبين احط لها رساله بالبياله..بس على مين تلبعها ..وحط لها علك ابو طبعه ..وكانت الطبعه صورة عنز منسدحه )

----------------------------------------------- فترة اعلانية اصبروا شوي الحين نجي ------------------------

صابون ابو عنز الرهيب....تراه ازين شي..اشره تراه رهيب ....حتى بصوا على عصاقيل صويلح في المسلسل

عصير بردقان ..ذو الصفطه الذهبيه....تشربه بالشفاط..مايتنثر ولا شي..واذا تنثر على ثوبك...جب ثوبك نغسله

--------------------------------------عودة لأكمال المسلسل -----------------------------------------

اخذت حصيصه البياله ..وقزت العلك ...( وفهمت غلط هي بعد ..وقالت بنفسها..ياربيييه ..شكله حبني..وش دراه ان ابريق الشاهي حقنها فيه شخر..واننا نبي نسده بعلك )

ومير تلتفت على صويلح ..وتقوله : خذني بقايا جروح ...ارجوك داويني (بهاللحظه صويلح قال يووه الصيدليه صاكه) صاكه = مسكره

صويلح ...وصمخ ...صويلح وصندوقين صمخ يا السلوقي وش قاعد تسوي = هذا ابو صويلح جاي يركض

صويلح : سم يبه هاه وشو نعم وش سويت والله موب انا اللي اخذ موترك وفحط بالشارع اللي ورا وصدم الهندي وفقع كورة جيرنا ..

طبعا ابو صويلح..مسك صويلح وعبر عن مشاعره ..بحيث انه صفقه تصفيقا مبرحا

وبنفس ذيك اللحظه ...

حصيصه ...حصيصه .. ياجعل يطيح عليك مكيف صحراوي وجع وش تسوين بالحوش = هذي ام حصيصه ..جايه تركض

حصيصه وبكل لطف ردت : اصلا ماعندنا مكيف صحراوي

طبعا ام حصيصه ..مسكت حصيصه ..ووربطت قناصيعها بالمروحه وشغلتها على رقم 5

في صباح ..يوم جديد..وبعد ماانتهى ابو صويلح من تصفيق صويلح...وطاحت حصيصه من المروحة..

حصيصه...قررت تروح للبقاله ..وبكل براءة..اخذت معها شنطته الرهيبه.. اللي مليانه صواريخ وطرطعان..وفشق للشوزن..وعلكين من اللي يطقطقن..(يجدر الذكر ان حصيصه ذات سوابق بسرقة الولاعات من الباكستايه اللي يعمرون عمارة قبالهم..واكتشفوا انها تستخدم الولاعة لشب الصواريخ والطرطعان)

فتحت حصيصه باب الشارع...وكالعاده...مر ددسن ..محمل سبعشرين هندي..كلهم ملتفتين للجهة الثانيه مايبون يشوفون حصيصه..

سارت حصيصه بالشارع متجهة للبقاله..واثناء مشيها..حست ..بأنها مراقبه ( نفس الأحساس اللي يجيك اذا كنت قاعد تنقل واجب الرياضيات بالفسحه )

وبحركه سريعه ..التفتت حصيصه .. على بالها كافشتهم..واذا بها تدعس قوطي الصلصه (الذي سبق ذكره بالحلقه السابقه) وتزلق فيه ..

وتخم الأرض...وبذيك اللحظه كان صويلح..جاي يركض لاحقينه شباب الحارة يبونه يجيب قطة الكورة..

يوم شاف صويلح حصيصه ...ويكعععع ضحك ..هييييييييع هيع هيع هيع ( صويلح وهو فاق كشرته يضحك)

جت ابتسمت له تلك الأبتسامه ..الخضراء.. ذات الرونق اللي مهوب..سهل..واللي لا شفتها تحسبها كروكي توصيف قصر افراح..

بس ولو ..ذا الضحكه كانت سبب ..ادى الى ان صويلح..نقز لحصيصه..ومد يده يبي يقومها عن الأرض..

يوم مدت يدها له..جا قالها بكل ماتحمله خشة صويلح من رومنسيه : قومي يابعد جنوط الماكسيما اللي واقفه هناك....سلامات لكرتون العلوك اللي معك ..

ناظرته حصيصه بازدراء ( مادري وشي بس مشوها) ..قائله : صلوحي

رد صويلح ..وبعد انا اصابته حالة من الذهول..وعم على خشته هالة من السعابيل ..وقال : هاه ياخشم ياصلوحي

حصيصه : تصدق اني لاشفتك اتذكر حمزة ادريس يوم يضيع البلنتي ( حصيصه كانت حاضرة مباراة المنتخب )

صويلح : ياعمري ياشيخ ...تصدقين اني لا شفتك اتذكر اني ماحليت واجب العلوم ..

حصيصه..ياربيييه ذبحتني تراك ..براطمك البنفسجيه ماخلتني انام الليل

صويلح : وانا وش اقول اجل..مع قناصيعك..آه بس ..ياليتني البوكله اللي فوق راسك ..

بهذه اللحظات..جاء صوت واحد ساحب جلنط عند اللفه..وجاي طاير ناحية صويلح وحصيصه..

---------------------------------فترة اعلانية ..اصبروا الحين نجي----------------------------------

شمبو الحبشوش الزين..انواع النفيخات تطلع لك..ويجي معه هدية عبارة عن مسواك ..استخدمه صويلح بالمسلسل

-----------------------------عودة لأكمال المسلسل---------------------------------------

تربت تيت تربت تيت تربت تيت = هذا فيحان طاق الترنق البرتقالي ابو شخطين على جنب..وقاعد يشربك

فيحان : صويلح..ترى عندنا مباراة اليوم بالحبشه ..لآ زم تجي

صويلح..مازال خاق مع حصيصه ..ويناظرها وهي رايحه ..ويقول بنفسه..آه ياحلوها..تشبه ثلاجتنا ام 36 قدم ..

صويلح : خل عنك ..بس قم شغل اللكزص ( اللكزص = الهايلكس..بس يدلعونها )

وينقزون..للكزص...ويلحقون حصيصه..حصيصه فهمت غلط..وتحسبهم البلديه كفشوها انها مهربه صواريخ وطرطعان ..عاد هجت ..للبقاله

دخل صويلح البقاله..وهو متلطم ( هذي قمة التنكر عند صويلح )

شاف حصيصه..وجا يركض نحوها ..شافته هي..وضحكت ..باشر عليها صويلح بحمضيات ..جت فلقته بالحمضيات ..وقالت : بالله يابن الناس..ابعد عن دروبي..منتا ولي علي..وصوبك مهوب صوبي

صويلح ..وهو متأثر بجراحه قال اغنية باك ستريت بويز اللي بالوجه الأول من آخر شريط لهم ..

I need you ..tonight..I need you...this time...

حصيصه : ولكن ياصويلح..تدري اني بسافر عقب اسبوع .بروح للكاميرون اكمل دراستي بفن شب الصواريخ ..

وقبل ان يقول صويلح شيئا

سمعوا دوي انفجار..من بعيد..وهو كان صوت ابو صويلح وهو يعطس..

واذا بصويلح بدا يتنافض...وصار كنه من بياجر منول

واطلق صويلح عصاقيله للريح...ياترى الى اين ؟

صويلح..يركض..ويركض..ويركض..يلتفت ورا ..ويشوف خشة ابوه وهو معصب يلحقه بالددسن..

ابو صويلح : اوقف لا ادعسك ..انت وسيقانك اللي تقل عسبان نخله..

صويلح : وه وه ..لا منيب كل يوم تصفقني حرام عليك

ابو صويلح..وبكل مايحمله من كرهه لولده صويلح..سحب جلنط ..مما ادى الى انه صدم صويلح .. مع اصبع رجله الصغير..

ويخر صويلح صريعا.....‍‍‍‍‍‍‍‍‍‍‍‍‍‍

نروح لحصيصه...كانوا يلحقونها اربعه هنود موب حبن فيها..بس يبونها ترجع لمبات سياكلهم ..ماخذتهم تقول نبيهن عندنا عمل فني لأبله هيله..

اهم شيء..رجعت حصيصه للبيت مادرت وش صار لأصبع صويلح..

كاننوا اهلها مايبون يعلمونها بالخبر ..المحزن

كلهم يتصددون عنها ...لين جت ام حصيصه ..وقالت لها بكل ماتحمله خشتها من حزن : انتي يالخبله ..دريتي ان صويلح انكسر اصبعه

ردت حصيصه والدموع تغمر عينيها قائله : احسن

وذهبت حصيصه لفراشها تبي تنام..ولكن فكرت وتبادر الى ذهنها فكررة خطيرة ...اخطر من هجمة الكاتو اللي بالعارضه يوم مباراة الهلال والنصر..

وقالت..حصيصه بنفسها..خلاص ابلعب حسب تكتيك حبيبي صويلح..وحسب نظريته اللي تقول خربانه خربانه

ولبست ملابس الخطة..وهي عبارة عن كنادر الخلطه ( ماخذتها من ابو بستك = الباكستاني )

شماغ ابو كريم ..ابو جيرانهم ..كان معلق شماغه بالسطح يبيه ينشف..واختفى فجأه

ملابس الرياضه حقت اخوها سعيدان..وكانت عبارة عن الوان فريق نادي مدغشقر اللندني بواشنطن..علما انا سعيدان كان عنده حصة رياضه بكرا..

نزلت حصيصه للحوش..تلفتت ذات اليمين ..قليلا..وذات اليسار..واذا بها تنقز من شدة الخوف

ماذا رأت ؟...يالهي انه صويلح

حصيصه : الله ياخذك وش جابك حوشنا

صويلح : هاه وشو لا جاي اشوف وش اطول نعال ابوكم والا نعال ابونا

حصيصه : تصدق اني كنت بنقز على بيتكم..بشوف ايهن احلى صحونكم والا صحوننا

صويلح : حصيصه بلا نصب..تراي جاي اقولك سر خطير

حصيصه : وشو صلوحة عمري

صويلح ..وبعد ان صابته حالة استدلاخيه دامت ربع ساعه من هول كلمه عمري قال : ما اعتقد ان فيه بالدنيا ملاك....تشبه لزولك تصور مجمعه

حصيصه ..وهي ضايعه علومها : لا تنصب شغالتنا احلى مني

صويلح وبكل مايحمله في براطمه من لعانه : هاه وين شغالتكم تنام

حصيصه : وجع ياشينك انت ووجهك تراي اغير عليك .

--------------------------------------- وقفة مع ..اهم الأنباء --------------------------------

الموجز..

صواريخ من نوع ابو فاس...قطع امدادات ميرندا الفراوله عن المتضررين بحارة ابو صويلح....قنابل الفكس بألمانيا

الأخبار بالتفصيل....:

هددت رئيسة وزراء النرويج ..السيدة فطيمة ام العصاقيل..بتصريح نقلته وكالة ابو زهقه للأنباء..انها ستقوم بارسال صواريخ من نوع ابو فاس الى زغرب

وقالت ايضا ان باستطاعتها قطع جميع المويعينات (تصغير مواعين) عن تلك البلاد..مما اثار ضجة بالوسط الجنوبي من بتنجنيقا

لحظه بقلب الورقه

قام السيد جون دويرج رئيس المانيا الأنفصاليه..باهداء جائزة نوبل للسلام للسيدة وضحى الشناوي..حين ابطالها للقنبله ..الفكسيه المسيله للدموع

قال مصدر موثوق بكذبه..ان السيد دغيليب افتتح الخيمة الجديده بحارة ابو صويلح..وقام بشب حطب البرسوبس بدلا من السمر حفاظا على الحياة الفطرية

------------------------------------اعزائي المشاهدين طولنا عليكم بس معليش------------------------

صويلح : حصيصه ..الى متى وانا بصير محروم من شوفة خشتك السحريه ..اللي احبها اكثر من حبي لأبوي

حصيصه : خلاص هانت ..وشرايك نهاجر لبيت خويك فيحان

صويلح : اما نروح لفيحان معصي والله لو تموتين

يجدر بالذكر ان فيحان مملوح وذو شوشة ..ويتمتع بأسلوب في كلامه ..مما يسبب في تضييع علوم الفتيات ..

لذلك لزم التحذير من فيحان لما يتمتع به جاذبيه

حصيصه : ياربييه متى نتلاقى ونقعد نلعب بلاي ستيشن بشريط الكورة

صويلح : اص بس تخبرين يوم اعطيك فريق البرازيل وانا آخذ السعوديه ..وارقعك 5 صفر

حصيصه : ايه اصلا كنت ناسية وش اللي يشوت كل ماضغطت شي مايتحرك

( علما ان صويلح كان فاصل اليد حقت السوني ولا عبن على حصيصه ..وهي مصدقه )

وفي تلك اللحظه..اذن الفجر ..وحان وقت سفر حصيصه

بعد معاناة دامت نص ساعه ..بين صويلح وجدار بيتهم..حيث انه عجز ينقز..الجدار..بما انه كان لابس وزرة كاروهات

مما ادى الى صعوبة التعامل مع الجدار..وفي اثناء نقزة للجدار..لاحظ شيء مكتوب على الجدار..

واذا به يرى رسمة قلب ..شاقه ساطور..ومكتوب جنبه ..حص + صلح = حب وفصفص..ونود لفت انتباهكم لما تتمتع به حصيصه من ذكاء في التمويه..عشان ماتنكشف انها تحب صويلح

عندنا عاد صويلح لغرفته..قرر ان يتروش..( وهي تعتبر المرة الثالثه في حياة صويلح ..وقد سبق له ان تروش في عام 1407 وعام 1415 )

واثناء ماهو يسبح..انكسرت الطاقه ..وطاحت عليه بلكه مربوط عليها صحيفة( بلكه هي حصاته (حجر) متوازي الأضلاع ذات لون رمادي تشوفه دايم عند العماير اللي توها تنبني )

وينزل صويلح يركض للحوش حصيصه..وهي دالقه خشتها ( يعني مبتسمه مع قليل من الدلاخه ) ويمسكها صويلح ويصفقها لين عضت الأرض

صويلح : انتي يالمهبوله كسرتي فرشة اسنان ابوي

حصيصه : وش اسوي عاد البلكه اخف شيء لقيته..والا كنت ناويه احلت ( ارمي ) جنوط الجمس

صويلح : طيب اصبري بروح اقرا الرساله

حصيصه : ايه تراي مستحيه ..حتى شف خدودي..اول مره يصير لونهن برتقالي

نود لفت عناية الساده المشاهدين ..اننا قمنا بقطع هذا المشهد السابق ..من قبل الرقابه..حيث ان صويلح كان جاي يركض ولا امداه يلبس شي..غير المقوصر..( والمقوصر عبارة عن شورت ولكن ساده يعني بدون الوان )

رجع صويلح...انسدح..فتح الرساله..وبدا يبحر في اموج الرساله..وكل مايقرا سطر,,يقعد يضحك مره ويصيح مره اخرى

نقز صويلح للتلفون..دق بيجر على صديق عمره فيحان..

صويلح : 999 ....عالو فيحان عندكم ؟؟

999 : ايه وشدراك...

( فيحان مشهور بأنه يحب يقطع الأشارات لأنه يحب سندويشات الجبن اللي بالحجز )

فيحان : صويلح ..وش تبي ياخي قاعد العب بلوت مع اكبر عربجي بالشرق الأوسط..عبدالكريم ابو جلمبو..وخليته يفلقني بحطبه تذكار

صويلح : اها بس لا يكثر ..هج من الحجز ..ورانا مطاردة

فيحان : تامر امر يابو صلوحه

صويلح : هلا عساك من عواده ( صويلح مايعرف يرد ابد )

سعيدان ( اخو حصيصه ) قاعد يشغل الددسن..وينادي حصيصه قائلا : اختاه هيا بنا سوف نذهب ( سعيدان من اشد المعجبين بعبسي صديق عدنان )

حصيصه : ورا ماتنثبر لا اجي اعفط خشمك ذا اللي كنه ركبة مصطفى ادريس..

سعيدان..يمسك حصيصه ويركبها بالصندوق حق الددسن..ويمشون ....ولكن اين صويلح..؟؟

حصيصه ..قلبها يطقطق..وتقول بنفسها..ياربييه وين صويلح اطلبه تسعطعش ريال

لحظه..ماذا نرى...نشوف غبار وعجاج قادم من بعيد..يالهي انه اللكزص حق فيحان ..

سعيدان..مسرع ..وجرس السرعه يرن لأنه تعدى سرعة 16 ..بس ولو يقول عادي..ومشغل اغنيته المحبوبه..يابنات المدارس ليتني عندكم سواق

حصيصه..بصندوق الددسن..والهوا مطير شوشتها..ولا تهون عصاقيلها الفسفوريه

صويلح..يقول لفيحان بكل حماس..: قرب لمهم بسرعه

وبحركه من صويلح..تشبه حركة توم كروز بفلم ميسيشن امبوسيبول 2 ..مع فارق الخشش..ونقز فوق كبوت اللكزص

صويلح..والهوا لاعب بخشته ولا يقدر يشوف زين : فيحان الله ياخذك ورا كبوت السيارة حار..اقرب شوي لمهم

حصيصه ..ناظرت صويلح..وعم في قلبها..الفرح..مثل فرحتك اذا قمت الصبح لقيت موترك معبا بنزين فل

وتنقز ..لآخر صندوق الددسن..وتمد يدها لصويلح...قائله : صويلح دوك يدي حط التسعطعش ريال

صويلح : وجع هذي يد والا ملعقه ..والله على بالي ذي مغرفة الرز..

وبلحظه جت اشارة وصارت حمراء..وينقز صويلح لصندوق الددسن

وينسدح..متغبي..ولكن ..توهق صويلح ...كان بالأشارة ..شرطة اللي يقولون حط حزام الأمان

طبعا سعيدان..مسوي فيها ينكت وقاعد يسولف مع الشرطه..

ولكن الشرطي الفذ جبران خليل جبران..لفت نظرة شيء بصندوق الددسن..

وعندما اقترب من الصندوق.......!!

صويلح..وهو يهم بالأنسداح ..خوفا من ان يراه الشرطي جبران..قال هامسا بأذن حصيصه : احبك

حصيصه : صلوحه ..وشو وش قلت

صويلح : احبك ....خلاص تعبت..قلبي يعورني كل يوم ابي اقول هالكلمه ..خلاص ماني ( منيب ) قادر اتحمل..

حصيصه : ياعمري انت..عطني يدك..

صويلح : خذي قلبي خذي عمري..مو بس يدي..

اخذت حصيصه ..يد صويلح..وحطتها بين كفوفها..وغمضت عيونها..وقالت : صويلح ..احبك اموت فيك

صويلح : وانا احبك ..لو تجافيني..على كل الخطا مسامحك..احبك يانظر عيني..ورضاك الزم..

التقت عيون العاشقين..وكل منهما يغمرهما الحب ..

هم صويلح..بابعاد خصله من شعر حصيصه..نزلت على عيونها..

وقالها : من شفاتها ماميز الصوت من همس *** يسبح النظر فيها ولا يمل نظرتها

غظيت عيني عنها كان بالأمس ***واليوم انا من بعدها ملك ضحكتها

لو تنظر بعين اللطف للحجر حس***تحت القدم حس الثرى بخف خطوتها

حصيصه : آه ياصلوحه عمري كافي عذبتني..

ونزلت من عينها..دمعة ..لما اعتراها من حب جامح لصويلح..وقالت له :

دمعتي تنبيك عن حب اكيد ** غيرها ياروح روحي وش بعد

وفجأه..واثناء هذا المشهد العاطفي..واللي كلنا انا وطاقم التصوير..كنا قاعدين نشاهق من الصياح..

طب الشرطي جبران خليل ( الله ياخذك انشاء الله قطعت علينا احلى مشهد بالمسلسل )

وقال جبران : ايش هاذا ..ايش قاعدين تسووو هونا

صويلح : اقول كل تراب..لا اقوم احوسك ..ولا تناظر حصيصه لا اتوطى ببطنك

حصيصه : وجع وش ذا الخبل..وراه يناظرني كذا

جبران : اقلك انتا مين ..وش قاعد تسوي هنا

صويلح : ياخي ياشين الدلوخه....قاعد اسوي خبز..وش شايفني اسوي بعد انت

حصيصه : صلوحة عمري..انقز بنا لسيارة فيحان خل نهج

ويشيل صويلح ..حصيصه ( ولو انها اطول منه ) ويركض بها بين السيارات ..وحصيصه ..تغمرها اسعد لحظات عمرها

صويلح ..والعرق يتصبب من جبينه .. : ودي آخذك لمكان بعيد لحالنا..وبس اناظرك مابي اكثر..حدي نظر مابغيت اكثر..الله امر لعيونك اسهر

حصيصه : ياليت يابعد كل من لي يا اغلى من الغالين ياروح روحي

( اقول ملاحظين مدى تأثر المخرج انا بأغاني خالد عبدالرحمن )

وصلوا لسيارة..فيحان...حيث كان فيحان..قاعد يناظر النخله..ويقول باستغراب..وراهم مالقحوها

فيحان : هاه صويلح..وش القصه

صويلح : فيحان طلبتك ..مابيهم يمسكونا

فيحان : افا عليك بس..اوريك بجبران ذا

وينطلق بهم فيحان..

وطردي...بالشوارع..يمين يسار يمين يسار..وتخييط بالعالم..

حصيصه : صلوحه روحوا لطريق خريص ترى الزحمة زينه

فيحان : قلها تنثبر لا احوسك انت وياها

صويلح : حصيصه حبيبتي..خل نلعب اونو بس خلي عنك السيارات

حصيصه : تيب ياعمري انته ( لا حظوا حصيصه مسوي فيها رقيقه ...ايه افلقني )

وهم بالطريق..فيحان شاف ددوريات من بعيد..وبدا يخترش..ويسوي نفسه انواع ابراءة..واستخدم اسلوب صويلح المشهور..وهو الذكاء الأستدلاخي ..آنف الذكر في موضوع سابق..

وهم طايرين..فجأة..وقف طريق خريص.من الزحمه.يالهي..وهم يمشون بسرعه 160

فيحان وصويلح وحصيصه ..لاحظوا انه فيه جمس موديل واحد على ما اظن واقف قدامهم على مسافه قريبه جدا

وحسوا انه سوف يحدث عناق اخوي بين اللكزص والجمس....؟

بدأ يقترب الجمس..الأحمراني..شيئا فشيئا...ويكبر ..ويقتر..ويكبر....ولكن..ماذا..صويلح..بكل مايحمله..من براءة الأختراع..بحركة الغزاله اللي بالسيكل..قام وسحب الجلنط..

هو سحب الجلنط...وبدت اللكزص..وتسوي خمسميات..وصارت السيارة..تقل الصحن الدوار..االي التذكرة حقته بعشرة..

وبعد...عدة دورات....وبينما..كان راس حصيصه..رايح جاي مابين الدريشتين الي ورا..

حدث العناق الحار بين اللكزص..والجمس ..طبعا..فيحان..مزبن عمره..حيث طلع له من السواقيه ( الدركسون ) مجموعة من النفيخات ( بالونات - اير باقات )

اما صويلح..فبكل مايحمله في طيات خشته من لعانه..قام وفتح دريشة السيارة..ونقز..وهو متعنقط ( متعلق ) بقنصوع حصيصه..

ويخمون الأرض....وبينا كانوا خامين الأرض..حدث مالم يكن بالحسبان..!!

سيارة..تمشي 2 ميل ....منهو ؟؟ انه ابو صويلح شخصيا

ابو صويلح ( وهو مطلع رقبته مع الفتحه اللي بالسقف ) : وجع وش ذا العالم المتسدحه بالأرض..

صويلح ..يهمس بأذن حصيصه : اص..سوي نفسك كرتون بطاطس

حصيصه : اقول انثبر وش بطاطسه انت وخشتك..قل كرتون ثلاجه ..ويالله يالله

صويلح : حصيصه..جبتي المقوصر حقي الكاروهات ( مقوصر = شورت )

حصيصه : مهوب وقته ..بس تراي بقولك اني ماخذه مقوصر ابوي ..

صويلح : ترى بجلدك ..ومن قالك اننا رايحين نكشت وناقصنا خيمه ( مهوب سهل صويلح يعرف يذب على مقوصر ابو حصيصه )

حصيصه : اهجد بس ..من زين ابوك عاد ..اللي لاشفته من بعيد..تحسبه زمزمية

..واستمر هذا الحديث العاطفي..مدة دقائق..معدودة..لأنه ابو صويلح..قزفيحان يتعارك مع الأير باق

وهب ابو صويلح لنجدة فيحان..حيث..صفقه بالزبيريه قائلا : لا تخرب نفيختنا

فيحان وبينما هو غايص بالنفيخه : ياشين ذا الشيبان لا سوو لي فيها معصبين

واثناء ذلك..كان صويلح وحصيصه يركضون ..

ويلتفت صويلح لحصيصه ..ويقولها وهو متحمس..: انسدحي قدام ذا الددسن اللي جاي

حصيصه : كل تبن والله مانسدح..والا عشان سيقاني تقل مطب

صويلح : انسدحي بس عشان نلعب عليه وناخذ الددسن

وصدقت حصيصه ..بحكم ماتحمله من عشق لصويلح...وتزلق على راعي الددسن بكل حماس

ولكن هنا المفاجأه....راعي الددسن كان شليويح ..توه جايب اخته فطيمه ..( والملقبه بالفطمي ) من المدرسه

ويجدر بالذكر..ان بين صويلح وشليويح كره..منذو الطفوله..حيث كانوا يتنافسون على حصيصه..

وكان يستعرضون قدام مدرسة حصيصه..حيث كان شليويح بحكم ان ابوه يعتبر من اعضاء شرف نادي الكيرم الوطني

فقد كان يستورد شورتات وبعدة الوان ..ونذكر منها الشورت الفوشي المقلم بالأخضر والأحمر ( تحسون صار ستارة زيود ) اما صويلح ..فلم يستعرض الا بشورته الكاروهات وكان هدية من شغالتهم

صويلح : وجع ..انكبنا يا حصييصه..طحنا بذا الكمخه

حصيصه : ماعليك الحين العب على اخته ..( يجدر ان حصيصه مسلفة فطيمة لفافات الشعر..واربع بوكلات )

فطيمة : هاي حصيصه ازيك عامله ايه ( ولو صارت حسنيه مهيب فطيمه )

حصيصه : ياعمري انتي يابعد سروال السنه حق ابوي

فطيمة : وش عندك بذا..اكيد عندكم عمل فني بمادة الوطنيه ( فطيمة متعدية لوحه دلخه بتسع وثمانين ميل )

حصيصه : ايه بالحيل..بس وخري بنركب انا وصويلح

شليويح : حصيصه ..احبك ..يابعد برطمي..( شليويح يتمتع ببراطم تقدر تقول رصيف بشارع )

صويلح ..وهو يهم بأن يجلد شلويح : حبك سوداني حول عنده اختبار فيزيا ومذاكر توحيد ..ياملا الوجع ياجعل يطيح عليك جدار مكتوب عليه ذكريات سليمان ابو جلمبو

ويتلاقطون ..وتعصب حصيصه..وتمسكهم وتركبهم صندوق الددسن..وبكل جراءة..تسوق الددسن

( ارجو انكم ماتفهمون غلط وتحسبون ذا الحركه اني ودي البنات يسوقن ..وانا ارفض ذا الكلام بتاتا وقاطعا ....ولكن حنا توهقنا..ولازم نسوي كذا )

وجت حصيصه تبي تسوق..والتفتت على فطيمه ..وقالت : الله يازين رقم جوال اخوك شليويح ..( حصيصه تناظر عداد الكيلوات ..تحسون ان الددسن طاق المليون )

وتشغل السيارة..ولكن..هل تبي تمشي..؟

شغلت حصيصه..السيارة...وعشقت القير بالثاني..بحكم انه تموت على القناة الثانيه..

ودعست كل البنزين..مما ادى الى انلزاق خشة فطيمه بالقزازة..وايضا ادى الى انحلال المضاربه القائمة بالصندوق..فنعتبر حركة حصيصه ..على ماقال صويلح يوما ما..رمية بغير رامي..وايضا طيحت قوطيين حمضيات بزبيرية واحده

حصيصه : فطيمه..طلعي خشتك مع الدريشه ..واذا نغزتك مع بطنك اصرخي..بما ان ذا الددسن مافيه بوري

فطيمه : طيب..اوريك البواري شلون

وتناظر حصيصه بالمرايه..لتطمئن على خشة حبيبها صويلح..وتتفاجأ..بأن خشته لازقه بالقزازه ..حيث ان شليويح ماقصر..

ومسوي له حركة متعلمها من يوم هو صغير..

وفي نفس تلك اللحظه...كان فيحان..قد تخلص بكل حرفنه وبطرنه..من الشرطه..وجاء مسرعا لأنقاذ صديقه صويلح

ولكن ..تلك كانت حزة طلعت مدارس....وفيحان فتى الحارة..المملوح..والذي حصل على جائزة ملك جمال الحارة لسبع سنوات متتاليه

ويحجر فيحان باص فتيات..مما ادى الى انه باشر عليهن بكرتون سنكرس ليتخلص من هذه المشكله

واسمحوا لي اقف احتراما لهذه الحركه الذكيه من فيحان

وصل فيحان الى الددسن..وبكل حرفنه..حط زبيرته على البنزين..عشان يثبت السرعه....وذلك بعد ان غطس الزبيريه بطاسة مويه

( هنا يتبين لنا قمة الذكاء لدى فيحان..لأنه استخدم نظرية ..العربجي الشهير طاحوس والتي تقول .. ان الزبيريه يزداد وزنها بالماء وتصبح خفيفه كالريشه بالشمس )

وبعد ان ثبت الدركسون برجله..طلع من الدريشه..مع ملاحظة انه تعلق بصندوق الددسن بيديه ( اخس يافيحان غطى على فان دام )

وبكل مايحمله من تهور في كيانه..قفز قفزة لولبيه..تذكرني بنقزة كابتن ماجد يوم هو كتفه يوجعه بالمباراة النهائيه

وفعلا تمكن من الوصول للدسن..ولكن ..بعد ماذا

بعد ماتصفق صويلح شر تصفيق..ووجد شليويح..طاق ابتسامته المعهوده..واللي كنها واجهية هايلكس

ويمسك شليويح فيحان..ويمردغه .ويصفقه تصفيقا..نتج عنه..ان انشق برطم فيحان

وتساقط شعيرات قذلته بمعدل اربع شعرات بالثانيه..

ولكن ..هنا تقع المفاجأه...انه ابو صويلح مجددا

ويتهور ويسحب جلنط على حصيصه..مما ادى الى انهم صدموا عمود اللمبه..( يجدر بالذكر انه كان جنب العمود ثلاث لحجيات يبيعن تيم وسفن اب ..)

وقالن اللحجيات لأبو صويلح : كنقر صثبيمسثتش تنلمكؤءطؤء ءخؤءد طكرلانسزؤء ( قالنها بصوت واحد ..والله مالقينا لحجي يترجم لنا ..ولكن اعتقد انها مديح لأبو صويلح )

التفت ابو صويلح لهن قائلا : الشرهه مهيب عليكن ..الشرهه على السفن اب اللي قاعد معكن

وراح طب على صندوق الددسن..ومسك صويلح..مع عصاقيله..واخذه اللى البيت

حصيصه : صــــــــــويلح لالالالالالالالالالالالالالالالالالالالا مش آدرة مش آدرة

صويلح ..وهو يسحب على الأرض..وطالع سرواله السنه ..وشكله ينرحم صاير كنه دفتر املاء مشقوق : حصيصه ..ترى الحب يحيا بالجوع ويموت بالغذاء ..

صراحه ..ماندري وش قصة ذا الجمله ولكنها تحمل في طياتها معانن جمة

عادت حصيصه الى البيت..واستلمتها امها تسطيرا وتصفيقا وتكفيخا ..مما نتج عنه صعرور في الجبهه ..بزاوية 22 درجة شرقا عن الخشم

انسدحت حصيصه..وهي تفكر..وتهوجس....واذا بها تجيها حطبه طائرة من فوق الجدار..ومكتوب عليها ..الى حص .. الوعد 9 ليلا تحت نخلة السكري ..التوقيع فيحان .

وبعد ان عدة شتائم من حصيصه لفيحان حيث ان الحطبه جت بنفس مكان الصعرور..عم بخشتها ابتسامة الفرح ..لماذا ياترى..؟

وفي الصباح الباكر..كان ابو صويلح..من زود الفضاوة قاعد يلعب اكس اوو مع الهندي اللي يغسل السيارات

وتطن براسه..يروح يستهبل على ولده صويلح ..على اعتبار ان ابو صويلح مسوي فيها عادل امام

دخل ابو صويلح غرفة صويلح : صلوحه وينك جايب لك هديه ..

ويدور بالغرفه ..ومالقى صويلح....وانتبه ان سروال السنه ابو كرسي المفضل لدى صويلح ليس موجودا ..؟

وهذا يدل على ان صويلح هاجر ؟؟

ويصرخ ابو صويلح بأعلى صوته : وجع وين ذلف ذا الدلخ..

وينقز مع الدريشة ( وين صار سوبرمان ) ممتطيا الددسن

في هذه الأثناء..كانت حصيصه ..توها قايمه وخشتها صايره تقل صطل بوية ..يوم فتحت نور الغرفه ...تفاجأت بوجود شخص ...؟؟؟؟؟

قالت حصيصه..وبكل دهشه : هاااااو ؟ صويلح ؟؟؟؟؟؟ صلوحه عمري وجع وش مدخلك غرفتي

صويلح ..وهو يناظر من الدريشه : انثبري شوي ..تراي متنكر على شكل شماعة ثياب ..اص

حصيصه : صلوحه ..قلي مكان نتلاقى فيه ..وخلاص..

صويلح : انا بس جيت ابشوفك وابمشي..القاك بنفس المكان اللي حدده فيحان..تحت نخلة السكري

ونقز صويلح ..من الدريشه..وتزحلق من الماصورة..ويطيح بشغالتهم قاعده تلعب كيرم..جا صويلح بكل نجاسه نثر الحبوب..وقال ..ياشين السرج على البقر..

كان فيحان ..الصديق الصدوق ..والفتى المخلص لصويلح ينتظره باللكزس..عند برادات المسجد

صويلح : فيحان.. ابشرك ماشافني ابو حصيصه..

فيحان ..وهو يناظر البراده مستغربا : ياخي ذا العربجي ابو جلمبو ماخلى مكان الا كاتب فيه ذكرياته..

صويلح : فيحان وراه ماتعقل لا اجي انتف ذا الشعره اللي بقرعتك

( يجدر ان فيحان عقب ما انجلد من شليويح طاح شعره وصرفها وحلق صفر ..على باله ظلال رونالدو )

فيحان : اركب بس ..انت ووجهك اللي كنه برشامة املاء باختبار تعبير

وصلوا لنفس الموعد للنخله...ولاحظا وجود غزال الصحراء..انها من انها حصيصه ..ومعها صديقتها فطيمه

صويلح وهو يركض وفاق كشرته ..ويصرخ : حصيييييييييييييصه ....وحصيصه تركض لمه وتصرخ : اصبر اصبر لا تجي الله ياخذك مالبست الكعب زين ..

فيحان كان يناظر فطيمه بكل استغراب ..ويقول بنفسه : وش ذا الطخمه الله ياهي حلوه ..شكلي ابستعرض مهااراتي

فطيمه وهي تناظر فيحان وتقول بنفسها..ياربييييه وش ذا الملاك ..ولو انه قرعه.

صويلح ..بعد ان خطف حصيصه خلف الشجره..وقال..حصيصه..شلونك عمري..مهما فرقونا العواذل..مهما صفقني شليويح ..لن اتركك ....وقالها اغنية ..وين مايروح الأخضر انا وياه ( على اعتبار انا حصيصه لابسه تنورة اخضرانيه مقلمه بالبرتقاليي..ولو تحسون انها علم بنجلاديش )

حصيصه : عيوني صلوحة..ابي اهاجر معك لأي مكان ..

صويلح : خلاص انا مجهز كل شي..نبي نمشي للشرقيه هالحين..

وفعلا كان صويلح ..مستاجر هايلكس....وانطلقوا به متجهين لطريق الشرقيه..

وكانت فطيمه لحالها..وقالت لفيحان : افا وش ذا لجحده

فيحان : هااه ايه وش ذا صح...وشرايك اوصلك ؟

فطيمه : مش آدرة ...مش آدرة ...مش عارفه ليه ..

فيحان : اقول اص بس يا ظلال اصاله ....ويسحبها مع شوشتها بكل حنان الى اللكزص

بينما كان صويلح طاق سواليف مع حصيصه ..نقتطف منها هالسولافه : تصدقين يا حصيصه يوم انا صغير تضاربت مع اربعه كبارين وصفقتهم كلهم

حصيصه : ايييه على مين ماكني شايفتك يوم يتوطى ببطنك شليويح .

اهم شي وصلوا تفتيش الرياض الأول..

الشرطي عقاب جزاء وقفهم وقال : اربط الحزام

صويلح ..على باله يستعرض عند حصيصه : لا مالي خلق

عقاب : اجل مالك خلق..طيب انزل

ويصفطون على جنب..وبعد قليل من الهوشات ..مشوا صويلح..بعد ان توسطت له حصيصه

وصلوا شاطي نصف القمر...طبعا صويلح طب يركض مشفوح اول مره يشوف بحر..اما حصيصه ..كانت تغير الأستبنه بحكم انه فيه كفر منسم شوي

وبينما كانت تغير الكفر..جا ظلال واحد جنبها والتفت ..وتفاجئت ...انه شليويح ؟

ويخطف حصيصه ويركبها بالغصب..وتصارخ وتصارخ..

ويجي صويلح يركض وهو يتقاطر ماء...ويصرخ نجوى ..اوه قصدي حصييصه ..حصييييييييصه..وجت موسيقى حزينه

وهو يركض والسيارة تبعد..وحصيصه تناظره بالقزاز وتصيح.....طاح صويلح من التعب ..وقعد يقول

اقفت مراكبهم الا يالله الخيره ....عيني تفيض الدمع بفراق خلاني

وحس صويلح بفقدان الأمل..ولكن ..كالعاده..المنقذ يأتي في وقته انه فيحان

فيحان : صويلح ياخي ضاقت الأماكن الا تنسدح فيذا ( فيحان مسوي فيها من اهل الرياض )

صويلح : فيحان تدري اني احبك اكثر من ميرندا الفراوله..

فيحان : اهم شي اركب بس ..ويا انا ياشليويح ذا ..وهذا شنبي احلقه اذا ملقيته لك..

صويلح : تشلم تشلم .... بس وراك جايبن معك نوال الزغبي ( فطيمه قاعده تغني على دلعونا على دلعونا )

؟

بعد ان خلصت فطيمه من اغنية على دلعونا..وجت تبي تغني اغنية ام كلثوم اقبل الليل..

واذا بصويلح..يركض الى شنطة اللكزص..ويجيب حطبه ويصفق بها فطيمه....ويبدو ان صويلح ..قد ضاق ذرعا بفطيمه

وقال له فيحان : ياخي وراك عليها..صوتها ازين من صوت كنداسة مازدا مشقوقه ..بس ولو حلو

فطيمه ..وهي تمسح خشتها : فحوني..ايش بوه هادا ..على باله معصب ( فحوني على بالها دلع )

صويلح : اجل فحوني..اقول اهجدي بس لا اقوم امحطك بالعقال

فيحان : صويلح تراك زودتها...من زين حصيصه ذي وخشتها اللي كنه جدول ضرب خمسه

....ولننتقل الى حصيصه..حيث بعد ماخطفها شليويح..كان رابطها بالمرتبه الي ورا..وقايلها..حصيصه..يابعد ركبتي..لا تتحركين لمين اجي

ونزل للبقاله يبي يشري عسكريم ( هذا كبرك ياشليويح وتاكل عسكريم = آيس كريم )

وبينما كانت حصيصه تهوجس..دق جوال شليويح..نقزت تبي تشوف الرقم

يالهي ...انه رقم سعيدان اخوها

وتضغط على يس بخشمها وترد

سعيدان : الوه..شليويح صديقي فينك بوه

حصيصه : سعيدان اخوي ياحبي لك هيلب مي تكفى

سعيدان : وش ذا شكلي غلطت ودقيت على جوال شغاله

حصيصه : سعيدان يالدلخ انا اختك حصييصه لا تقهرني.

سعيدان : هاه..يا ذا البنات ابلشوني..لا رحت اشري خبز ..اللحجيات ينشبن بحلقي حتى هنا بعد

حصيصه : سعيدااااااان ..وجع ( وتبادر الى ذهن حصيصه معيارة سعيدان الشهيرة )

ياسعيدان ..يابو فنيخه

سعيدان ..سمع ابو فنيخه من هنا..ومير يصاب بالذهول..وقال : حصيصه وجع وش جابك لجوال شليويح..ليش تسرقين جوال صديقي

حصيصه : يالدلخ شليويح ذا الحمار خطفني..يالله رح ازهم على صويلح وقله اننا واقفين عند بقاله اسمها الورود

سعيدان : هاه ايه طيب مع السلامه

ويدق بيجر صويلح..وينقز يروح يدق على سعيدان..صويلح : هلا سعيدان وش تبي منيب لاعب ياخي لا عمرك تدق علي

سعيدان : ياخي ابيك تجيب اختي من المدرسه..قصدي تقولك اختي انها هي وشليويح عند بقاله ..اسمها وشو ياربي نسيت

صويلح : وشو ..حصيصه وينها سعيدان ياتبن تكلم تذكر يالله بسرعه

سعيدان : ياخي..اصبر بشرب سفن اب...ايه تذكرت بقاله اسمها الشجر مدري الزهور مدري ورود

صويلح : ياشين الدلوخه ياناس..ودي اجي واجلدك لين تعض الأرض

سكر الخط..التفت صويلح على فيحان..حيث كان فيحان ..يناظر جبهة فطيمه مستغربا ويقول بنفسه : الحين ليش جبهتها تقل مربوعه

صويلح : فيحان..تعرف بقاله اسمها الورود....؟

فيحان : ايه افا عليك..بس ياخي ليش فطيمه تشبه صدام الهايلكس..بس ولو حلوه

ويبتسم صويلح..وتبان الدرايش اللي باثمه..وهي من اسباب الركبه اللي جته من شليويح..

وينطلقون الى البقاله المذكورة...وصلوا ..ولا لقوا احد..بس لقوا..ورقة مكتوب بها ..من حص الا صلح..سمعت شليويح مواعد صديقه على كورنيش الخبر

ويروحون لكورنيش الخبر..وينزلون يمشون ..وفيحان ..يمشي ..ويقول مستغربا..وش فيه ذا البنات ماعمرهم شافوا واحد مملوح

ويدهر فيحان..يباشر على البنات...ويطق معهن سواليف..وفطيمه ودها تجلده

وصويلح كان يمشي ويدور..وفجأه لفت نظرة قرطاسة علك ابو طبعه اللي تاكله حصيصه..

ويركض..وفعلا يجد شليويح..منسدحا..وحصيصه ..قاعده تناظر البحر ..ويتغبى صويلح ورا الجدار..وينادي فيحان ..ويرد فيحان : هاه ياخي ترى شليويح صفقني لين قلت بس

صويلح : ماعليك ابهجم عليه بقارورة..وانت بالحطبه

وهم يمشون شوي شوي..شافت فطيمه حصيصه..وقامت تصارخ...هع هع حصيصه تعالي نلعب

ويلفت فيحان على فطيمه ..ويصكها بالحطبه..قائلا : الشرهه مهيب عليك الشرهه على اللي جايبك

وانتبه شليويح وقام عليهم,...ويهج صويلح ويلحقه فيحان..ويراكضون..ولكن فيحان بكل ذكاء..وبحكم معرفة بنقطة ضعف شليويح..صرخ وقال..شليويح ..( حيث فيحان كان ماسك الجوال ويبي يحلته ( يرميه ) بالبحر )

ويصرخ شليويح..الزبده..ركض صويلح لحصيصه..واخذها ..وجاهم فيحان يركض..ويهجون..ويلحقهم شليويح

وقرووا يرجعون للرياض....وهم في طريق العودة..مسكتهم الدوريات..بقيادة جبران خليل جبران

قرر صويلح..قرار..خطير بعد وصولهم للرياض..و..اتجه الى بيت ابو حصيصه..

نزل حصيصه..وطق الباب..فتح ابو حصيصه..وقاله : ابو حصيصه..ابقولك سر خطير

ابو حصيصه وهو يناظرة بنظرة اشمئزاز مع قليل من الأستغراب : خير وش عندك

صويلح : انا طالب يد بنتك حصيصه..ابي اتزوجها..

ابو حصيصه : ابد اذا نجحت هالسنه ..انت وياها افكر انشاء الله

نقز..صويلح ..لفيحان..وقاله..واللي يرحم والديك وين وصلنا بالجغرافيا ( صويلح بثالث ثانوي ادبي )

فيحان : ياخي وش دراني ..آخر مره حضرت يوم يعطونا الكتب

صويلح : ياخي لازم نجتهد يالله امش نروح لهاني يدرسنا ( يعتبر هاني..من دوافير المدرسه ..ماخذ بالجغرافيا 17 من 15 ..لأنه حل اسئله زود )

لقوا هاني..ببيتهم كالعاده..فتح هاني الباب : اهلين صويلح وايضا فيحان..اكيد جايين تبون..واجب الجغرافيا..بس منيب مديكم هوا..

فيحان وبكل رقه : ورا ماتعقل انت لا اجي اوقع على جبهتك..

هاني : اوكي تيب تيب ادخلوا......وقعدوا يذاكرون..وصويلح بدت تظهر عليه اشباه مدحت من كثر المذاكره..

وبعد ..اوقات عصيبه..مع هاني..وتفحيط على دفتر التاريخ..وطقاق مابين صويلح وفيحان على برشامه الفقه..مع انه كان اختبار حديث..

واقتربت الأختبارات..واليوم الأربعاء..والسبت اختبار علم اجتماع وحديث..كان صويلح و فيحان متسدحين بالملحق..قام صويلح فجأه

ناظر فيحان..وفهمه فيحان ..كالعاده..وقال صويلح...: احبها يا فيحان ..آه يا حصيصه....ويمسك الكتاب..ويغطي وجهه فيه..

ويجيه فيحان ويحضنه ويبكي صويلح على صدر فيحان..وكان فيحان يناظر رقم الفنيله حقت صويلح..ويقول مستغرب ..ياحبي لك صويلح من عرفتك وانت حدك فنيله علاقيه مشخله بعد..

طب علييهم ابو صويلح..يوم شافهم..قال : لا ياشيخ انت وياه يا جايبين هدف التعادل الحين ..قم لا الحين امحطكم بسعفة النخله

وهم يذاكرون..والشواهي تدهر عليهم من هيله ..اخت صويلح ..ولاتهون فطاير الجبن اللي ترسلهم حصيصه..واللي ماياكلهن احد لأن صويلح مخليهن معه ذكريات..

جا صبح الخميس..وكان فيحان..توه يقوم وخشته صايره كنه طرمبة حقت الهوا ( طرمبه = اداة تستخدم لنفخ الكورة بالهواء ..واسألوا راعين لعب الكورة بالشارع )

وتفاجأ ان صويلح الى هالحين يذاكر...وشاف نص دفتر صويلح ..يكتب فيه حص ..ولا تهون القلوب..وكان فيحان يناظر مستغرب يقول وش ذا التفاحه المعوقه يا صويلح..

جا يوم الأختبار..كانوا رايحين مبكرين..وصويلح مشغل اغنية..متى اشوفك ..متى القاك متى قلبي يحس انه..لقى نفسه ..لقى عمره..ونبضه يكتب احساسه..

وفيحان..وهو يسوق ماسك الكتاب..ويفتح الصفحات بسرعه..يقالك اني اذاكر....وصويلح..فاتح الدريشة ومطلع يده..وخذ يا هواجيس ( ذابحه الحب )

ويقول بنفسه..حصيصه ..الحين تتنفس نفس الهوا اللي اتنفس..وتشوف هذي السما..ونفس الطريق هذا هي شافته ..آه ياقلبي..والتفت للمرتبه اللي ورا..وقال وكانت قاعده هنا..احبها ياناس..اييه يا الدنيا...وقعد يتذكر لحظات طفولته مع حصيصه ..

ويتذكر يوم كان يعلمها تلعب مصاقيل..وكانت تناديه اذا ضربها شليويح..ويجي صويلح يركض..وينقز على شليويح اهم شي عنده يدافع عن حصيصه..

ويتذكر..يوم كانوا يلعبون كورة بحوشهم..والبنات يطلطلون ( يويقون ) عليهم..وايام ماكان يستعرض قدامها بسيكله..وعلى باله يبي يسوي غزاله..ويصلفط على ظهره..

ونزلت من صويلح دمعه..تذكر..يوم يلاقيها صدفه عند باب بيتهم..بعد ماطاحت شنطتها وتنثرت الكتب بالأرض..وجا صويلح وشال الكتب ..وحصيصه تناظره بحياء..

ويقطع حبل ذكريات صويلح..فيحان وهو قاعد يسمع تعريف علم الأجتماع..ومير يتفلت عليه صويلح ويقول : منتب سهل يا هاني ..وراه ماتركد لا اصفقك

وكل هالهواجيس..بطريق المدرسه..مع انها جنب بيتهم بس طول الوقت واقفين اثر فيحان ناسي يفك الجلنط..( لأول مرة تعتري فيحان حالة دلاخه )

مشوا للمدرسه..كانوا متأخرين..وهم بالفصل..صويلح مدهر يحل..وينغزه فيحان ..صلوحه سؤال جيم ياخي

ويسوي صويلح حركته الشهيره اللي على باله مزكم ..ويحكي شوي ..لفيحان....وبعد ماخلصوا اختبارات ..

جت توزيع الشهادات..وصويلح..متشقق من الوناسه..ويقول لفيحان..خلاص مابقى الا شوي واتزوج حصيصه....اخذوا الشهادات..صويلح ..نجح نسبته 93 % وفيحان نسبته 87 % ..ويرجعون للبيت مستانسين..وصويلح..خشته صايره تقل وسبر محطوط عليه ايقنور ( هذه الفاظ مستقاه من الشات )

ومن صباح بكرا نقز صويلح..لأبوه ..يقول مشينا يالله لحصيصه....وبعد هوشات مشوا العصر..لبيت حصيصه

فتح لهم ابو حصيصه..ودخلوا..وبعد عدة فنيجيلات قهوة..قال ابو صويلح..حنا جايين نبي بنتك حصيصه لولدي صويلح..ابشرك نجح واشتغل بمستشفى التخصصي ..

رد ابو حصيصه..وقال مبرووك...بس

صويلح : بس ؟؟؟؟؟

ابو حصيصه : والله مدري وش اقولكم بس حصيصه مخطوبة ..!!!

صويلح : %&*#$ٌلألأٌ^&%#@ = سبات متلاحقه قطعناها

ويبكي صويلح ويذرف الدموع ..ويطلع يركض من الحوش..ويلتفت يلقى حصييصه تطل من الدريشه..ويناظرها وهي تبكي وتبكي ..وهو صد عنها وقال : تركتني يا غدار بليا عذر ....وهذا الجرح بصدري قهر

وطلع من البيت..وركب السيارة...ومشى بكل تهور ......!!

بعد ان طلع صويلح..مشى بالشوارع..مايدري وين يروح..حس انه كره هذي الدنيا كلها ومافيها..

خلاص..بدا يحس احساس اخذ كرت احمر بمباراة نهائيه..واول ماتبادر الى ذهنه صديقه فيحان..

لقى فيحان...واخذه فيحان..وراحوا للبر..وقعدوا يفكرون..قال فيحان لصويلح : شرايك نسافر ندرس برا ؟

صويلح : اللي تبي يافيحان بس فكني من هاللي انا فيه..

فيحان..خلاص من جد نبيع سيارتي(اللكزص) وانت بع موترك..ونسافر للوس انجلوس..خابر لي واحد اعرفه هناك

صويلح : خلاص يالله خل نتجهز..

وزبط فيحان كل الشغلاات وباع السيارتين..وراحوا يتقضون ..وكل منهما طق له شورت فوشي ماندري ليش

وقالوا للأهلهم..والعالم تصيح وراه تسافرون ومدري وشو

وصويلح..جايه تبلد احساس..من كل شي...بعكس فيحان اللي كانت الدنيا مش سايعاه

قبل يوم من السفر..صويلح كان يفكر..وش يبي يسوي..هناك..كل تفكيره شلون يضيع فلوسه

ابشري موستنج..وابضف من هالشقر اتمشى بهن..انا وفيحان ..بلا هالخربطه اللي هنا ..مطاريس حصيصه وشليويح

جا موعد السفر..مر صويلح على فيحان..وكان ابو صويلح هو اللي يبي يوديهم...

وصلوا المطار..واذا بالعالم كلهم يودعونهم

كل بزارين الحارة ..ولا يهون شليويح اييضا وفطيمه متوزية ورا العمود على باله مستحيه من فيحان.

وفيحان ماجاب خبر..قاعد يناظر ارقام الرحلات مستغرب..يقول ياذا ابو جلمبو حتى هنا حاطين اسمه

وصويلح جالس..على الكرسي ينتظر فيحان يخلص من التجهيزات

حس صويلح ..بشي في قلبه..بدا يتحرك شي بمشاعره..وصار يتلفت ويدور

وبين جموع هالبنات المحتشدات لوداع فيحان

وهو يدور مابين العيون والوجيه

وحس انه وده يبكي ...حس ان الأمل بعودة حصيصه ..موجود ....وفقد الأمل بعد ماشاف خشة شليويح وهو مبستم..

اخذوا الشناط..وهم يمشون..ويلتفت بكل حزن يودع اهله..وهو يحس انه الوداع الأخير

ويقول بنفسه..حصيصه..هذا آخر شي بيننا..خلاص منيب شايفك طول عمري..

ابترك كل هالديرة اللي فيها ...بترك كل اهلي..خلاص

وفيحان كان ..يلوح بيده الكريمة على جموع الفتيات..وهن متسدحات يصارخن من اجل فيحان

ولا تهون فطيمة..اللي ماسكه صورة فيحان وقاعده تشجع ( حشا صارت مباراة الهلال )

وبعد ماجوا يدخلون الطياره..فجأه ..وقف صويلح ..!!

فيحان : صويلح وش جاك

ويلتفت صويلح ورا..وراح يركض ..ويركض..والناس تناظر صويلح ..وابوصويلح يصارخ ..صوويلح وين تبي تروح

وفيحان يلحق صويلح ....صووووووويلح لا تروح

ومن بين كل هالزحمه...كانت تلك البنت..الفتاة التي احبها صويلح..

الفتاة التي ذرف صويلح دموعه لأجلها..

جايه تركض من اول المطار..بعد معاناة مع ابوها..جايه وهي تبكي..

وصويلح شافها و..راح يركض ويبكي وهي تركض وتبكي..

وحدث اللقاء ....!!

انه صويلح ..يلتقي بحصيصه من جديد..

وتغمر حصيصه دموع من الفرح...وتعجز على الكلام ..وصويلح ماقال شي الا كلمة احبك ..

وحصيصه..ترد عليه ..احبــــــــــــــك

وصويلح..يرد...احبــــــــــــــــــــــــــــــــــــــك

وياخذ يدها..ويحطها بصدره..ويقبلها..بكل ماحمله من رومنسيه في تلك اللحظه..

وفطيمه..انهارت من هول المشهد..وخمت العمود وقعدت تصيح..

وفيحان..راح نقز على جموع الفتيات يباشر عليهم بسندويشات فلافل..

وشليويح...........اختفى

وابو حصيصه..وابو صويلح..مو مصدقين