******* موعد فى الفيصليه ********

[محروم]

موعد في الفيصلية..(( من مغامرات عزيّز الشهيرة ))..

في صباح يوم الخميس..وبعد قضاء امسية الأربعاء الجميله..بين خوالي وخالاتي..ياحبي لهم..

قمت الساعة 10 صباحا..يعني كان فيه المملكة هذا الصباح..واخواني..متسدحين في انتظار فلم كرتون..ولو انهم حافظينه عن ظهر قلب..

جت قالت لي اختي الصتيمة (( هيله ))..ترى بنرووح للفيصلية اليووم..ياحظنا..
قلت .. خير انشالله ..وش الطاري..؟
قالت..ابوي يبي يودينا انا ومناير..هيييييه...ياسعدنا..

انا طبعا وكالعاده لاجا طاري مناير..يقلب لوني فستقي على تفاحي..(( يعني زي لون كتاب اناشيد ثالث باء ))..
قلت لها..متى بتروحون ..؟ (( طبعا سألتها وانا غير مكترث بتاتا = ياعمري ياعزوز سيبيويه ))..
قالت لي .. وانت وش عليك...بس الظاهر العصر..او بعد العشاء..
قلت ..اييه..(( لاتغركم كلمة اييه من اربع حروف..بس هذي اللي مذوبه مناير ))..

وتطري براسي فكرة..قلت دامي فاضي ..هاليوم..خل اروح للفيصلية..كني مادريت يعني..واشوف مناير..
وانقز..ادق على خويي أبوكريّم..وقلت له اني بروح للفيصلية..

قال .. ياعمي اليوم خميس..ياشيخ احلق شنبي..وامصع الشعره الوحيده اللي بصدري كانهم دخلونا..
قلت له..ياخي وش فيك انت كذا..انت بتروح معي..خابرني اسلووب..ياشيخ لا خليهم يدخلونا..بالقوة..

صراحة ماكان ودي ندخل للفيصلية..عشان امصع شعرة ابوكريّم ذا اللي بازن فيها..(( بازن = من بزّ يبز..يعني كاشخ فيها ))..
جاء وقت الروحه...واروح واطق ثوبي..اللي توي مفصله..والبس شماغ لابلين (( ياروحي على الدعايات ))..
هذا بعد فاصل..من التسبح..تخلله مطافش بالماء..
يعني وانا اشوف نفسي بالمرايه..ضاعت علومي مع نفسي..حسيت اني ولا براد بيت ..القصيم..(( براد بيت = ممثل امريكي مملوح ..... وفي قول آخر .. براد بيت = براد يعني بريق شاهي...بيت يعني منزل..))..

وانا قايل للشغاله..تغسل الفكتوريا..ياعمري يا ام فكتر (( تدليع سيارتي ))..
وطاق التظليله..السوداء..ياولييييه والله اني كشخه..
واركب موتري...وامر على ابوكريّم..ونروح..للفيصلية..

ومشغلين اغنية صارحيني..يعني من زود الرومنسية..يوم وصلنا..طبعا صاكين الدرايش..بعد لايقولون وش ذا القراوى ماعندهم مكيف..
مادريت ان أبوكريّم فاتح الدريشة ومطلع يده بعد..صايرين كننا جايين نشري خرفان..

بعد ماوقفت بالمواقف..رحنا..نبي ندخل للسوق..
وانا طاق الإبتسامة..الصفراء اللي على جنب..
يوم جينا نبي ندخل...الا ذا واحد ..اسمراني حليوه..كذا..واقف قدامي..

انا اصابتني حالة من الدهشه..والذهول..وصارت خشتي علامة استفهام باختبار مطالعه..
واناظره نظرة..تعبر عن اني ودي ادخل..
جا قالي...وين يابو الشباب ؟..
قلت ..ابد نبي ندخل..؟
قال..لا ياخي ممنوع..؟
قلت ..يؤ ممنوع ..؟ (( طبعا اقولها وانا خشتي صايرة كنها خشة مصري ناسي يحل الواجب ))..
قال أبوكريّم..وش اللي ممنوع..دخلنا واللي يرحم والديك يارب تقوم من النوم تلقى سيارتك معبيه بنزين..
قال السكيورتي..قلت ممنوع ..ماتفهم انت وياه..
وجاء مسكني..مع يدي...وسحبني ..(( عاد هنا ياربيه خرب برستيجي قدام الصبايا ..))

انا ..هنا حسيت انه انهانت كرامتي .. وخرب علي هدف من اهدافي بالحياة (( هذا على اساس ان لي هدف بالحياة..وحتى لو لي هدف بيطلع تسلل بعد ..من زين الحظ ))..

واروح للسيارة...وانا التفت من بعيد على وجيه الصبايا المعجبات..ولسان حالهن يقول..ياخسارة هالمملوح موب داخل..
وقاعد اغني يالله ياقلبي سرينا..ضاقت الدنيا علينا..

هنا..أبوكريّم..بدت تخرب..اخلاقه..لأنه ..يموت ولا يشوفني زعلان..
قالي..مالك الا اللي يدخلك ياعزوز..امش معي بس..

ونروح لمدخل ثاني للسوق..وقالي ابوكريّم..ادخل كنك ماتدري عن احد..يعني خلك مدرعم..لايهمك احد..

وفعلا..طبقنا هالنظرية الطرديه ..وسمعنا واحد..ينادي..يقول .. هييه انت وياه ..
وحنا..جاحدينه....ونادانا مره ثانية..هييه يا الدب والعصل..ياسلنتح وين داخلين..
انا من يوم قال سلنتح حسيت انه يقصدنا..
ومع الزحمه دخلنا..ولا امداه..يمسكنا...

يووووووووووه واخيرا دخلنا..الفيصلية..(( تحس اننا تقل داخلين المدرسه = على بالي احب المدرسه بمناسبة بداية الدراسه ))..
يوم دخلنا..بدينا نتمشى..وأبوكريّم..ماعمره شاف..خير..كل الوقت..شف ذي..
وحنا نمشي..قابلننا ثلاث لابسات برقع يشق الجبهه..

جا ..قال ابوكريّم..يلعن ابوجدهن..محلى براقعهن..(( اخس يابوكريّم المريخي ))..

وحنا نمشي..الا ذي وحده..مادري وش جاها..وطاحت..الأكياس اللي معها..
طبعا..انا متعود لا طاح شي انقز اشيله..(( مامسكوني حارس منتخب المدرسه عبث)) ..يعني مهوب حب بالبنت..

يوم شلت لها..الأكياس..ناظرتني..وقالت شوكرا ..
قلت .. عفوا..(( في هذه الأثناء كان أبوكريّم مغمى عليه من زين صوتها..))..
وحنا ندور بالسوق..لقيت نفس البنت صدفة..وقلت هالأبيات..

التفت صدفة..ولاني فعينها ** واقفة تطالعني ولا مني استحت

هي ماتعرفني..ولا اعرفها انا ** بس دروب الفيصلية هي اللي جمعت

قالت تساعدني..؟ وقلت هذا المنى ** ولابد اساعدها..مدام انها طلبت

حملت انا اغراضه وجنبته العنا ** ثم شكرتني..ولي بعينه ضحكت

..
بعد هالموقف..انا عادي..مابي منها شي..بس يقالي شهم..وهي الظاهر اول مره تشوف مملوح مثلي..
فحاولت..تحتك بي .. وانا..حاولت اني ابعد عنها..

لادخلت محل دخلت وراي..وكل مارحنا مكان واثرها بوجهي..
وانا صراحة بلشت بعد اخاف تطيح علينا مناير..تحسبني خاين والا شي..

ومره من المرات..تفاجأت انها واقفة جنبي..بمحل..قالت..انت وش فيك تتهرب مني ..؟
قلت..ليه..وش بيني وبينك..عشان احاول اقرب منك ..؟
قالت .. انت اصلا ماتقدر الجمال..؟
قلت .. اسف موب قصدي..انك مو حلوه..بس انا مو راعي هالحركات..(( تكرر قول مو مرتين ..لا متطور الولد ))..
قالت..اوكي..راح تندم..

وشوي..مادريت الا اربعه جايين يمي..
انا من نظرتهم لي..حسيت ان الدعوة خربانه..
وهي وراهم تقول..ايه هذا هو اللي كان يغازلني..
وانا ..صراحة من زود الأندهاش..عجزت اصدق انها بهالحقارة..
وافسر يديني..على اني بضارب..واحد..
مادريت انهم اربعه..وادور أبوكريّم..واثره حاط رجله الله ياخذه..
واستلموني ذا الأربعة..تصفيق..الله لايوريك...خشمي اعتزل..مهوب صاير خشم شكله..
والعالم يناظرون..ولا واحد فكر يساعدني..
عاد قلت هاللأبيات..

صفقوني ياخوك تصفيق ** يوم رحت اشوف خلي

اللي ببياله..واللي ببريق ** وواحد من بعيد يصفق لي.....(( على باله يشجعني والله لو اني طرزان بضارب اربعه ))

وواحد قاهرني من السطح يويق ** ولاطب معي يفزع لي......(( ياليت من دفه من السطح ))

وأبوكريّم اللي كنه مغرفة سليق ** شافني انطق وحط رجله كويكلي.......(( كويكلي ولو ذابحني الأنجليزي))

ليش هالخربطه وليش هالمحاويق ** بتسدح ببيتنا اصرف لي........(( ايه منيب وجه فيصلية..سوق حجاب ويخب ))..

-----------------

مع تحيات



محروم