Almstlej
17-01-2002, 10:38 AM
صجونا هالسياح بشارع الشانزلزيه وكل واحد يطس لفرنسا لازم يمر هالشارع ويجلس على اطرافه ويقعد يتمقل في الرايحه والجايه وحنا الله يخلف علينا نتمقل في مهبل يفحطون :) عاد انا طبقت المثل اللي يقول ( اللي يشوف مهوب مثل اللي مهوب يشوف :) ) وبحكم <== حكم والا صن اني منيب اواطن ركوب الخيل ولا الطيارات فانا قررت اروح بموتري كسرة هالعراوي اللي غيرت زيته وشيكت على عدته وفلفلت والديه بنزيم وانا اصحى هاك الفجريه واروح اهز الشجر واقوّم العصافير واكتم الدعسه وسيده على باريس وعقب رحله استمرت 3 ايام وصلت بحمدالله وحط العراوي رحاله عند برج ايفل في ظلال البرج وانا افتح كبوت الموتر عشان يتبرد شوي وافرش بساطي وانزل الشنطة فيها عدة الشاهي واشب على الدافور اللي ما ودك يسكت من زين ( وشيشه) وكل من مر يقعد يناظرني ويحاتسي اللي جنبه وانا مدري وش يقولون لكن دريت ان اللقافه واصله برج ايفل مهوب عندنا بس .. المهم جاني واحد منهم ونحر الشنطه حقت البر وقعد يقلب فيها ويحوس وعينك ما تشوف الا (الذرايه) في ظهره وهو يقوم يهوش ونتشابك باليدين على انه بيتطاق معي وما دريت الا وهو يتراقص بي ويمغط يديني وجنوبي لعنبو دارهم هالرقص ماخذينه قطوعه وانا ارجفه بوز مع مقفاه والحّقه قطمه الرز في جبهته ماعاد الا هي ارقص معك انت وسكسوتك اللي كنها صدر غراب عاد جاني سايح من اشباهه انه عربي <== والا فيه اشباه مازولا وعرف اني من نمونته يوم سمعني ادعي على هاك الفرنسي سلّم علي وسألته عن هالناس وش قصتهم طابين عندي قال انهم يحسبوني جايبن بضاعه وباسط بها هنا ؟ وجع وش بضاعه كلها دافور معفوج وابريق اسود وبسكوت ابو ولد المهم دريت اني مالي سنع عندهم وشلت قشي كله وخذت وصف الشانزلزيه وادعس لبو عرو ورحت للشارع عاد جاز لي هالشارع الوسيع وخترشة الناس فيه وطق فيني عرق الاستعراض وانا آخذ لي عزم واتك لك هاك الجلنط اللي زحف بي والاي داخل في كشك فرنسي :( وبما اني خابر ان حقين الكشك يبون يواسوني مع الارض ويفرشوني فرش فنا سويت روحي مغمى علي من الصدمه <== الله وكبر ياللي صادم عامود كهرب والا نخلة فحال .. وجا واحد منهم وقعد ينفضني ويصب على راسي مويه ومافيه فايده ويفرك فص بصل في خشتي وما نفع ( اشوى اني كاتم خياسه ) وراح يتصل على الاسعاف ومن زود الذهانه صكيت باب العراوي واخرط الريوس وانحاش وينتبه لي راعي الكشك ويلقط موتره ويلحقني وخذ يامطاردات في شوارع باريس ومن لفه للفه ويجونك حقين الصحافه ورانا كننا في موكب وما دريت الا بكفر العراوي منفقع ( طرطع ) اثر حق الكشك راميه من النجاسه ويزحف بي ابو عرو والاي خامع هاك الكبري <== ايه الحين سو روحك مغمى عليك ..بس اشوى الخمعه جت مع الصندوق ويوم شفت الموتر انتهى امره وانا ارفع ثويبي واطلق العنان لسروال السنه وما فيه الا العطه يولد واشوفهم من بعيد مجتعمين عند العراوي والفلاشات تدهر وتحقيقات وراعي الكشك الوسخ اشوفه يحمل شنطة البر شكله يبي ياخذها تعويض عن الصدمه اللي جت محله <== من زين محله عاد بردقانتين معرعرات وتفاحه ومعلق حبة اناناس لعبوبه :) .. وانا اجيك راجع لديرتي وكلي ألم وحسره على فقدان اعز الحبايب والمشكله الدعوى ما انتهت لحد هلاّ يوم جا من بكره والا الجرايد الفرنسيه حاطه صور للعراوي وتحقيق عن اسباب الحادث وكم لقطة وهو معرّض ولقطتين وهو مخشب في الكبري يعني مافيه فرق بين قضيتي وقضية ديانا بنت سبنسر الا الموتر بس لكن ما اقول الا سرا ليلك يبو عرو يكفيك انك ختمت حياتك بشهره ماعقبها شهره عاد وفاءا مني للعراوي صديق رحلتي طالبت الحكومه الفرنسيه بارسال بعض اشلاء الموتر المتناثره والمتبقيه عشان ادفنها في المعشاش حقه ورحم الله عراويا لقي حتفه في بلاد العطورات <== سنين ضعيف وهو منكتم في خياس معشاشه :) ايه مثل ما انكتمت بفص البصل J
وش عاد لو مات العراوي بباريس يكفيه فخر انه بباريس ميّت
وش عاد لو مات العراوي بباريس يكفيه فخر انه بباريس ميّت