مبروك عليكم.... جهاز ps3 تهكر !!!!!

[.::RaK_BoY::.]

هل يكون فعلاً انتهى وقت حماية الالعاب المقرصنة من تشغيلها على جهاز PS3 ؟
نعم طبقاً لم يقوله موقع PS Jailbreak الذي أكد انه لن تحتاج الى فك الجهاز فقط من خلال قطعة USB تركب في منفذ USB سيكون بإمكانك نسخ وعمل نسخة من قرص اي لعبة وحفظها على هارديسك جهاز PS3
او هارديسك خارجي وبعدها لن تحتاج الى قرص اللعبة !
هناك صور ومقطع فيديو يثبت ذلك , وقال الموقع انه سيبدا ببيع هذه القطعه خلال هذا الاسبوع وستعمل على جميع أجهزة PS3 Slim – PS3 Fat
وجميع الريجنات ( امريكي – اوروبي – ياباني – كوري ).
لمشاهدة مقطع الفيديو

http://www.youtube.com/watch?v=4jOEbZEkp9A

مبروك للمهتمين
بالنسبة لي مب مهتم ابدا ;)




لاااا للمتعصبين

[SALM0RE]

اذا كانت القطعة لتشغيل العاب منسوخة فلا انه مب مهتم و لا راح استخدمها
اما اذا هالقطعة تخلينا في المستقبل نلعب العاب Dreamcast و Gamecube فـ نعم ;)

[EL Madridsta]

الموضوع منقول
ومواضيع الهكر ممنوعه علما اعتقد O_o


بس فعلا هالسالفه مالها داعي لأني سمعت انه سعر الـ USB هذي بيكون 170 دولار
ولازم تحتاج الـسي دي الاصلي حق تنسخ الالعاب
يعني مافي فايده
خلنا على الاصلي احسن :D

[The Snipers]

إذا هالكلام صح .. سوني ما بتخليهم و بتنزل تحديث يحل هالمشكلة

[.::RaK_BoY::.]

بيكون له فريم وير معدل خاص فيه
ما بتدخل سوني فيها

نفس موضوع البي اس بي

[J-C]

والله انا مافكر حاليا اني اهكر جهازي لأني مرتاح منه صراحة
بس اذا في المستقبل اعجبتني الفكرة اجرب ليش لا ^__^
يعطيك العافية اخوي على الخبر

[Alucard.4.ever]

اذا فقط يعمل على تشغيل العاب الباك -اب انا مش مهتم له .


لكن اذا فيه خاصة تشغيل محاكيات nes -sega- snes ...والأخرى

اكيد باخذه .

[Arashi]

انا مب من النوع اللي اهتم بهالشغلات لكنه خبر رائع

كنت افكر ان هالجهاز مستحيل يتهكر @@

[hemo memo]

انا اشوف انه ممتاز صراحه :D
1- اول شي الـplay يكون عن طريق الباكب وهالشي بيصير اسرع بكثير من تشغيل اللعبه عن طريق القرص
2- امكانية تشغيل العاب ps2 & ps1
3- ضمانك مايروح مافيها فكفكت جهاز المسألة سهله USB تركبة والسلام عليكم الخطوات مره سهله
4- واحد مجربها ولعب اونلاين ويقول ماشي زي الحلاوه :D للي يقول معد فيه اونلاين

صححولي إذا انا غلطان :33:

لحد يجيني ماشي مليون يبي يطقني :D انا ما احرض على القطعه انا اوضحلكم لا اكثر ولا اقل.., :D

[Nez 17]

^

لحد الان مافي شي يثبت انه تهكر ننطر و نشوف سوني شنو تبي تسوي و اذا في اي خطا او شي او تهكير ..

اكيد الأبديت الجاي بيوخر هالمشكله

[Tockuchi]

Useless
إلا إذا تشغل ألعاب الPS2 الكوبي , و أصلا يعني كم بيكون حجم فاينل 13 و انشارتيد 2 عشان انزلهم 30 جيجا -__- أو أكثر حتى -_-"

[hemo memo]

^



لحد الان مافي شي يثبت انه تهكر ننطر و نشوف سوني شنو تبي تسوي و اذا في اي خطا او شي او تهكير ..



اكيد الأبديت الجاي بيوخر هالمشكله



القطعه قاعده تنباع واكثر من هكر محترف اكدها وفتحو الموقع الرسمي للقطعه وناس جربتها وفيه اكثر من مقطع فيديو يأكد هالشي

[The Snipers]

^^^
بس وش إلي يضمن لك ان سوني ما تبند الجهاز =(
للآن انا ما ارتحت لسالفة التهكير هاذي !!

[hemo memo]

^^^
بس وش إلي يضمن لك ان سوني ما تبند الجهاز =(
للآن انا ما ارتحت لسالفة التهكير هاذي !!



هنا الكلام بس كلها اسبوعين ثلاثه بالكثير شهر وكل شي بيبان بيوصلون القطعه لحد البيت :09: :D:D

[Prince Noctis]

بالنسبة للتهكير
حسب اللي قريته بالموقع
اول شي تشغل بس العاب بي اس 3 يعني ما تشغل العاب بي اس 2 و1 ولا فلام البلوراي
ثاني شي اذا سويت ابديت يديد راح تتكنسل السالفة يعني لازم اتم ع آخر ابديت نزل واهو اعتقد 3.41
يعني تقريبا بيكون ما في اولانين لان سوني بتنزل ابديت اجباري وعلشان تلعب اون لازم تنزله واذا نزلته تتكنسل سالفة التهكير

[AL- M a T a D o r]

اذا الاون لاين شغال زي الحلاوة فيه ..
انا اول وااحد بياخذ القطعه:Dمع اني كرهت الكوبي من ايام الاكس

[hemo memo]

اذا الاون لاين شغال زي الحلاوة فيه ..
انا اول وااحد بياخذ القطعه:Dمع اني كرهت الكوبي من ايام الاكس



انا اقول لاتستعجل اذا انت بتخربها اصبر اقل شي شهر خل نتأكد من السالفه نشوف سوني وش بتسوي :D عشان ماتدفع فلوس عالفاضي بعدها روح لايوقفك احد :09:

[hemo memo]

http://www.dailymotion.com/video/xei7h7_psjailbreak_videogames


انبسط يالـ AL- M a T a D o r يالله من قدك :09::D:D:D ههههههههههه

[jinabil]

صدقنى كلها شوية وسونى حتنزل ابديت يلغى
فكرة التهكير ما تفرحوا
وبعدين فى شىء خطا كيف فى نفس اليوم
يلى طلعوا فية القطعة يبيعونها !!! معانها عارفين
ان الفكرة لن تنجح لان سونى راح تحاربهم بالابديتات

[hemo memo]

الـ BBC كاتبة مقال بعد وش اكثر من كذا :D:D !! للحين كذبه !! او اشاعه !! :28:
http://www.bbc.co.uk/news/technology-11035928

[Tockuchi]

^^^^^
Yup
ليلحين -_-

[Fazz]

والله ما ادري يمكن ويمكن

احس ان القصه مو داخله راسي بالمره ... بس نشوف وش يصير وبعدين تمشي الامور

[ienzo]

إلا إذا تشغل ألعاب الPS2 الكوبي , و أصلا يعني كم بيكون حجم فاينل 13 و انشارتيد 2 عشان انزلهم 30 جيجا -__- أو أكثر حتى -_-"
my thought exactly

[موت عالمي]

اخيرا!!!بس ان شاءالله مايكلف واذا نزل تحديث ولا صار شي احتمال كبير اشتريه
اوفر العاب الـoffline بدال ماختم اللعبه وانطلها ...
والعاب الـonline اكيد اصلي

[سكون بحر جدة]

لا مستحيل نلعب اونلاين لو قطعة في ( على ما اظن )

[hemo memo]

لا مستحيل نلعب اونلاين لو قطعة في ( على ما اظن )


صاحب القطعه يقول العاب الاونلاين شغاله بشكل ممتاز واللي جربو القطعه كلهم قالو كذا وللحين محد نفى هالشي يعني صحيح

روح youtube كلها مقاطع عن ناس يجربون القطعه واللي يقول انه فايك ماتوقع لانه لو كذا كان مقطع مو مليون مقطع :D

بعدين الهكرز والمواقع الاجنبيه للحين مافيهم احد نفى الموضوع ..

الغريب سوني ماصرحت :28:>> شي غريب :boggled:

[KasiH]

مسالة التهكير الحين مامنها فايدة لو جات في بداية السوني كان ممكن تفيد
لكن الحين خلاص 90% من الناس مقتنعين بالاصلي وبالاونلاين والتحديثات واخر حلاوة ..
محد راح يهكر جهازه لانه راح ينحرم من الاونلاين والخدمات الي تقدمها سوني والحال نفسه في الـ PSP
كل فترة تتوقف العاب وينعملها باتش عشان تشتغل والستور مو شغال والاونلاين مو شغال ويرجع يتوقف
يعني مامنها فايدة .

btw ، مواضيع الهكر ممنوعة بس بخلي الموضوع شوية مفتوح عشان نتناقش فيه ونشوف اراء الاعضاء .

[Tockuchi]

^^^^
الPSP مو مهم الأونلاين و لأن ما أشوف فيه ألعاب كثيرة أونلاين و تكون اب مستوى عالي , و في شغلة تسويها مثل باتش عشان تقدر تدخل الستور , الPS3 مثل ما قلت كلنا اقتنعنا بشراء الأشرطة و الأونلاين و الستور , و أصلا ماراح أعطي بال للألعاب لما أنزلهم و يكونون اب لاش مثل لما أشتريهم و أدفع عليهم مبلغ مو هين ^^"

[dely10]

انا ضد هالفكرة ويارت من سوني تعاقب كل واحد يهكر جهازة وتحرمة من الأونلاين
ومميزات التحديث

[ســSaKeــاكي]

انا مافهمت نشتري الـــUSB فاضي من وين نحمل الألعاب :) ؟

[Itachi 2121E]

لو كان الكلام صح بقول الحمدلله ما بغو :D... بس المشكلة انو مواقع التورنت للحين أشوفها ما فيها iso لألعاب ps3 :28:

[evil-kusanagi]

لست ادري لماذا بعض الناس تعمل فيها متاثرة و حزينة لتهكير الجهاز لكي يعطوا عن انفسهم صفة العضو المثالي .
اللي يبغي ينزل الالعاب ينزلها و اللي يبغي يلعب اصلي يلعبه اما الماثم فلا فائدة منها .
و العيدي منا الذين يغنون معزوفة الحقوق الفكرية ينافقون انفسهم . لما تحمل البراامج و الاغاني و الافلام الست تسرق كذالك حقوق الناس الاخرى .
انا لست مع الكوبي او ضده . كل منا يلعب اللي يبغيه كوبي او اصلي.
مع هارديسك 1 تيرا بايت الحياة حلوة بس نفهمها .

[devil cober]

مسالة التهكير الحين مامنها فايدة لو جات في بداية السوني كان ممكن تفيد
لكن الحين خلاص 90% من الناس مقتنعين بالاصلي وبالاونلاين والتحديثات واخر حلاوة ..
محد راح يهكر جهازه لانه راح ينحرم من الاونلاين والخدمات الي تقدمها سوني والحال نفسه في الـ PSP
كل فترة تتوقف العاب وينعملها باتش عشان تشتغل والستور مو شغال والاونلاين مو شغال ويرجع يتوقف
يعني مامنها فايدة .

btw ، مواضيع الهكر ممنوعة بس بخلي الموضوع شوية مفتوح عشان نتناقش فيه ونشوف اراء الاعضاء .

كلام سليم 100%

الاصلي له طعم خاص مع الاونلاين

[hemo memo]

ترا الطريقه مو ممنوعه حسب الاستخدام تكون ممنوعه حسب ماقريت
نسمع منكم ليت تفيدونا بهالموضوع
والاون لاين سواء بالاصلي او بدونه بهالقطعه حتى الآن يعني ماندري بالمستقبل بس لحد يقول الاونلاين بالاصلي لان هذي تشغل اونلاين وضعف سرعة الالعاب لانها تعمل عن طريق الجهاز مو من القرص

لحد يقول اني احرض لهالقطعه انا بس اعرض المعلومات وزي ماقلت حسب استخدامك لأن انا بتفيدني كثير لو اجمع العابي بدل مايضيع قرص او يصيرله شي واتوهق

[Tockuchi]

لست ادري لماذا بعض الناس تعمل فيها متاثرة و حزينة لتهكير الجهاز لكي يعطوا عن انفسهم صفة العضو المثالي .
اللي يبغي ينزل الالعاب ينزلها و اللي يبغي يلعب اصلي يلعبه اما الماثم فلا فائدة منها .
و العيدي منا الذين يغنون معزوفة الحقوق الفكرية ينافقون انفسهم . لما تحمل البراامج و الاغاني و الافلام الست تسرق كذالك حقوق الناس الاخرى .
انا لست مع الكوبي او ضده . كل منا يلعب اللي يبغيه كوبي او اصلي.
مع هارديسك 1 تيرا بايت الحياة حلوة بس نفهمها .
انا السبب الوحيد إلي يخليني ما أبي يهكرونه لأن بعدين تلقى الي يسوى و إلي ما يسوى يلعب الألعاب و خصوصا الجهال تلقاهم يشترون اللعبة كوبي و يشوفون البلاوي و سوالف مو كبرهم -_-" , نفس ماصار بالبلاي2

[EL Madridsta]

انا السبب الوحيد إلي يخليني ما أبي يهكرونه لأن بعدين تلقى الي يسوى و إلي ما يسوى يلعب الألعاب و خصوصا الجهال تلقاهم يشترون اللعبة كوبي و يشوفون البلاوي و سوالف مو كبرهم -_-" , نفس ماصار بالبلاي2
والقهر الاكبر انه بينزل مستوى الالعاب اكثر خصوصا اليابانيه
وبيحطونها على الهاكرز وقلة المبيعات
والله اذيه وبقيمة هاـ USB تقدر تشتري 3 العاب اصليه جديده

[ما انسى بغداد]

الاصلي افضل من ناحيه الاونلاين

[u,a,e]

يوم كنت بفرنسا
بالمطار كان فيه PS3
وكان مكتوب تحت ع الزاوية Debug Mode

المهم كان بالبليستيشن عدة ألعاب كاملة
Fifa Street
سباق سيارات F1
ولعبتين زيادة
(كاااملاات)


ومثل ما نشوف في فيديو التهكير
مكتوب بالزاوية Debug Mode
Debug mode هو الوضع اللي يستخدمه مبرمجي الألعاب لتجربة ألعابهم

[.::RaK_BoY::.]

رد سوني بخصوص الجيل بريك


يبدو ان سوني بدأت بالدفاع عن جهازها PS3 بعد نجاح قطعة PS Jailbreak التي تمكنك من نسخ العاب جهاز PS3 وتنزيلها على القرص الصلب ” الهاردسك ” وطبقاً لبعض من اعضاء منتدى Hax Network قالو ان البرنامج الخاص بعمل نسخة للالعاب وهو Backup Manager بإمكان سوني تعقبه عبر شبكة PSN . وهذا بطبيعه الحال من حق شركة سوني ان تقوم بعمل حظر لمخالفي شروطها والحقوق الفكرية , وقد نرى في القريب موجات من الحظر كما تعمل مايكروسوفت في جهازها X360 .
سوني الآن تقوم بحظر شبكة البلايستيشن نتورك “PSN” عن الاجهزة التي تستخدم PS Jailbreak بظهور كود خاص يفيدك بعدم مقدرتك للدخول الى الشبكة 8002A227 .

[EL Madridsta]

Debug mode هو الوضع اللي يستخدمه مبرمجي الألعاب لتجربة ألعابهم

اعتقد سمعت شي جذي
انه هالـ usb مسربينها من سوني :12:
وهي سوني تعطيها للمطورين حق يجربون العابهم

[Tockuchi]

رد سوني بخصوص الجيل بريك
كما هو متوقع , إلي يبي يسوي كوبي ماراح يدخل الPSN = ماكو أونلاين

[Al-RaQmi]

يويويو
حسبت السالفة مثل الكذبات القديمة .. طلعت السالفة صدق .. لكن بعد ايش ^^"

الحمد لله 90% من الالعاب مولتي من يبغا العاب كوبي يشتري جهاز الاكس بنفس سعر القطعه ويلعب كوبي
والاصلي يبقى على الثري

سالفة التحديث الاجباري راح تحوسهم او تلعب بدون شبكة

[Tockuchi]

^^^^
ال360 عادي تلعب أونلاين حتى لو كوبي؟ , إذا إي شكلي بطقلي واحد بالعيد عشان فيسبيريا و عشان لوست أوديسي و حصريات الجهاز ^^

[Al-RaQmi]

تلعب شبكة بالكوبي
لكن الطريقة بالضبط ماعندي الخلفية عنها .. لان فيها باند وبطريقة معينة تقدر تتجنبة
ولد عمي عنده الجهاز من 2006 وشغال على الشبكة لا باند ولا ريد لايت .. الله لا يضره عيني عليه باردة :)

[dely10]

وجاء الرد من سوني ؛)

.
سوني الآن تقوم بحظر شبكة البلايستيشن نتورك “PSN” عن الاجهزة التي تستخدم PS Jailbreak بظهور كود خاص يفيدك بعدم مقدرتك للدخول الى الشبكة 8002A227 .

[EL Madridsta]

سوني الآن تقوم بحظر شبكة البلايستيشن نتورك “PSN” عن الاجهزة التي تستخدم PS Jailbreak بظهور كود خاص يفيدك بعدم مقدرتك للدخول الى الشبكة 8002A227 .
ان شاء الله الابديت الجاي يمنعهم من انهم يشغلون البلايستيشن اصلا :D
حق يتعلمون ويجوزون عن هالحركات

[Tockuchi]

تلعب شبكة بالكوبي
لكن الطريقة بالضبط ماعندي الخلفية عنها .. لان فيها باند وبطريقة معينة تقدر تتجنبة
ولد عمي عنده الجهاز من 2006 وشغال على الشبكة لا باند ولا ريد لايت .. الله لا يضره عيني عليه باردة :)
حلو جدا ^^ , ننطر ليلعيد و بعدين أقرر ^^"

[بدون اسم 2007]

ما ادري ليش في ناس زعلانين!! كان شركة سوني ملكهم....او انهم مطورين العاب و خايفين على العابهم:09:

انت و انا نقدر نشتري اصلي بـ250 او300 غيرنا ما يقدر
و بعدين في العاب ما تستاهل الـ200 ريال

I am just saying

الحمد لله مرتاح مع الاصلي :wink2:

[dely10]

^^^^

اخوي الكوبي والمنسوخ سرقة لحقوق الملكيه والشركات اكيد بتخسر !!!! $$$

ومافي احد زعلان!!!
وهالموضوع مهم لعشاق اللعبه وشي طبيعي في معارض ومؤيد
واللي عنده جهاز ps3 ما اظن ما يقدر يشتري لعبه ؟ >>>>> رأي خاص
وعلى فكره الكوبي والتطوير الجهاز يسبب مشاكل للجهاز ويتعب العدسه ويقصر من عمر الجهاز

والأصلي أصلي ^_^

[NiN RevO]

ليش احس ان hemo اكثر واحد متحمس للموضوع .. :09:

والله ما عندي كلام اقوله لكن الي بيحط ها التعديل راح يحارب من سوني اكيد ..

كاسح
اعتقد اذا السالفه ما فيها هارد وير يعني تركيب قطع داخل الجهاز فما اعتقد ان فيها مشكله وحتى لو كان بأمريكا يعتبر Legal انك اذا اشتريت شيء ولعبت بالـ Software حقه ..
فأتوقع ان الموضوع مو مخالف ..

[Nez 17]

خلاص سوني حلة المشكلة و بتعطي باند لكل الي يستخدمن القطعة في الاونلاين

+

يقولون التحديث الجاي يبي يوقفهم من نسخ الالعاب الجديدة يعني بس تقدر تنسخ القديمة يعني بياخذ عمر القطعة سنة تقريباً و خلاص ماعاد في شي جديد
كل شي جديد ماتقدر تنسخه بس القديم و طبعاً بتفريط في الاونلاين و اكثر اللعاب بدون الاونلاين صراحة مالها داعي

[evil-kusanagi]

يقولون هناك تحديث قادم للبرنامج usb .
يعني ما في امل سوني.

[.::RaK_BoY::.]

ترا الحرب ما راح تخلص
مثل ما سبق وقلت لكم ان الموضوع نفس سالفة البي اس بي.... تنزل الفريم وير وتثبته وتفصل الوايرولس
هو اكيد بتكون في العاب ما تشتغل وبيفترض انك تنزل تحديث البي اس ان
واليو اس بي جيل بريك بينزلون تحديث للتغلب عالبي اس ان

[KasiH]

كاسح
اعتقد اذا السالفه ما فيها هارد وير يعني تركيب قطع داخل الجهاز فما اعتقد ان فيها مشكله وحتى لو كان بأمريكا يعتبر Legal انك اذا اشتريت شيء ولعبت بالـ Software حقه ..
فأتوقع ان الموضوع مو مخالف ..


هو يقولوا انه سوني ماتقدر تقاضي لانها قطعة خارجية ماتلعب في قطع الجهاز الداخلية ..
ننتنظر ونشوف اخر الجايل بريك هذا وش بيسوي اذا كان بيخليك تلعب العاب بلاي ستيشن 1 و2 كوبي ودريم كاست وجيم كيوب كوبي
وتشغل ميديا مثل MKV. راح ينجح بشكل هائل وضخم وتزيد مبيعات الاجهزة لسوني . واغلب الناس اللي تبغى تحافظ على الاصلي
راح تشتري جهاز اضافي فقط للشغلات هذه . لانه حيصير مشغل ملتي ميديا خرافي .

[evil-kusanagi]

يعني تنزيل العاب المقرصنة للبلايستيشن 2 و الكيوب حلال و كوبي بلايستيشن حرام و اضاعة لمجهودات الغير .
انا اعتقد انه بالامكان ان تلعب الاونلاين بتلك القطعة مثل 360 . العديد من اصدقائي يلعبون الاونلاين بالكوبي بواسطة تعديل جديد .
الموضوع متشابك جدا هناك معسكرين فريق مؤيد و فريق معارض .
اعتقد انه مثلا لو كان صديقي له لعبة و نسختها في جهازي الامر عادي مثل ما يحدث في الانترنت من تبادل الملفات كالموسيقى مثلا .يعني ما دام مصدر اللعبة اصلي فين المشكلة.
اما انك تشتري جهاة اخر للاصلي فهذا تبذير واضح .
زيادة الذين يلعبون الكوبي يكون دخلهم قليل . و ما دام في مقدورك شراء جهاز اخر ما تخليك على الاصلي احسن ما دام الفلوس متوفرة و ما عندك مشكلة .

[kotomoto.73]

انا بالنسبة لي سالفة الأون لاين مو فارقة معاي
لسبب بسيط جداً
وهو ان النت عندنا في البحرين عبارة عن زبالة
كل شركات الاتصال عندنا عبارة نصابين وحرامية
ولا عندنا جودة ولا حتى حماية مستهلك
جربنا بتلكو وزين ومينا تلكوم
كلهم زبالة وخصوصاً شركة زين
أكذب وأزفت ناس تعاملت معاهم في حياتي
النت عندنا في البحرين عبارة عن ثلاثة في واحد
بطيئ وسيئ وغالي = زبالة

[BoOoOo7a]

بالمناسبة .. مو شرط تنسخ الألعاب على هاردسك البلايستيشن 3

يمديك تجيبها من هاردسك خارجي .. لأن اساساً الهاردسك ابو 250 قيقا مابيكفي الا حول الـ 7 اللى 9 العاب بالكثير ..

وثالث شي .. للمكبرين الموضوع ويقول ما اقدر العب اونلاين ووو..الخ .. في حل وسط وممتاز لكم

انت لو تفكر فيها .. اصلاً كل الالعاب اللي تستحق تلعبها اونلاين من يوم مانزل الـ PS3 ماتجي الا 5 او 6 العاب (او يمكن اقل) .. والباقي حلاتها بس بالـ Single Player وبس

لذلك الحل هو .. انك تشتري لك بلايستيشن جديد وتخليه للاونلاين بس .. والقديم تعبيه العاب لين تقول بس ! واذا امتلا الهاردسك .. خذلك واحد بـ 280 ريال فيه 600 قيقا وتحط فيه مايقل عن 19 لعبة .. وهالـ 19 لعبة لو تحسب الوحدة بـ 250 ريال راح تكلفك مايقل عن 4750 ريال ! شوف التوفير! من 4750 ريال خليتها بـ 300 ريال ..

هههههههههه والله دخلت الفكرة براسي ونص !

بخلي الجهازالحالي اللي عندي على نفس الأبديت وبشتري له هالقطعة .. وبشوف لي جهاز جديد ابو 40 قيقا مايوصل سعره الا 1200 ريال واخليه للاونلاين بس

و اذا نزلت لعبة تستحق انك تلعبها اونلاين وممتازة جداً نفس حالة CoD: MW2
ذيك الساع اشتريها اصلية :)


وعيش حياتك :)

[EL Madridsta]

انا بالنسبة لي سالفة الأون لاين مو فارقة معاي
لسبب بسيط جداً
وهو ان النت عندنا في البحرين عبارة عن زبالة
كل شركات الاتصال عندنا عبارة نصابين وحرامية
ولا عندنا جودة ولا حتى حماية مستهلك
جربنا بتلكو وزين ومينا تلكوم
كلهم زبالة وخصوصاً شركة زين
أكذب وأزفت ناس تعاملت معاهم في حياتي
النت عندنا في البحرين عبارة عن ثلاثة في واحد
بطيئ وسيئ وغالي = زبالة

انا من البحرين واستخد ابطئ وارخص نت في البحرين ( بتلكو 10 دينار ) فعلا سيئ في التصفح
لكن ممتاز حق الاون لاين وانا على طول العب عادي

وما يصير تعتبر الاونلاين سبب حق التهكير !!

[evil-kusanagi]

شباب هل ممكن ان يكون لك 2 هارد ديسك واحد لنسخ الالعاب و الثاني عادي .
اذا اردت ان تلعب اونلاين تعمل الهارد ديسك الاصلي و تشيل القطعة .
و اذا اردت ان تلعب كوبي اعمل العكس.
مع اني متاكد انه ممكن تلعب الاونلاين بالكوبي .

نفسي ارى الناس اللي كانت تقول مستحيل يتهكر الجهاز و بلوراي و الخرابيط . طلعت اسهل بكثير .

يبدو اني سافكر بشراء جهاز و هارد ديسك هائل .

و اللي يقول ان الهارد ديسك ما يكفي و ان العاب بلوراي ضخمة . هي فقط العاب سوني الحصرية هي اللي كبيرة اما الالعاب الاخرى ما تتجاوز 8 جيجا و لك في ريد ديد خير مثال .

[Tockuchi]

بالمناسبة .. مو شرط تنسخ الألعاب على هاردسك البلايستيشن 3

يمديك تجيبها من هاردسك خارجي .. لأن اساساً الهاردسك ابو 250 قيقا مابيكفي الا حول الـ 7 اللى 9 العاب بالكثير ..

وثالث شي .. للمكبرين الموضوع ويقول ما اقدر العب اونلاين ووو..الخ .. في حل وسط وممتاز لكم

انت لو تفكر فيها .. اصلاً كل الالعاب اللي تستحق تلعبها اونلاين من يوم مانزل الـ PS3 ماتجي الا 5 او 6 العاب (او يمكن اقل) .. والباقي حلاتها بس بالـ Single Player وبس

لذلك الحل هو .. انك تشتري لك بلايستيشن جديد وتخليه للاونلاين بس .. والقديم تعبيه العاب لين تقول بس ! واذا امتلا الهاردسك .. خذلك واحد بـ 280 ريال فيه 600 قيقا وتحط فيه مايقل عن 19 لعبة .. وهالـ 19 لعبة لو تحسب الوحدة بـ 250 ريال راح تكلفك مايقل عن 4750 ريال ! شوف التوفير! من 4750 ريال خليتها بـ 300 ريال ..

هههههههههه والله دخلت الفكرة براسي ونص !

بخلي الجهازالحالي اللي عندي على نفس الأبديت وبشتري له هالقطعة .. وبشوف لي جهاز جديد ابو 40 قيقا مايوصل سعره الا 1200 ريال واخليه للاونلاين بس

و اذا نزلت لعبة تستحق انك تلعبها اونلاين وممتازة جداً نفس حالة CoD: MW2
ذيك الساع اشتريها اصلية :)


وعيش حياتك :)
في ناس كثيرة تهتم بالتروفيز و ما تبي يكون لها أكاونتين و وكل واحد عدد التروفيات غير عن الثاني , خصوصا إلي لفله عالي و عنده شيء أساسي التروفيز إن يخلصه كله أو معضمه

[ســSaKeــاكي]

يعني لو اشتري القطعه ما احدث الـps3 ؟

[hemo memo]

ليش احس ان hemo اكثر واحد متحمس للموضوع .. :09:







:silly::silly: لا والله مو كذا بس بيني وبينك سالفة البطء في التحميل للعبه وسالفة ضياع القرص او انه يتعرض لمخش ولا شي تهمني وكل واحد واستخدامه يعني محد يقدر يتهمني يقول انت تساعد على القرصنه لان كل واحد واستخدامه

[OLD SNAKE 19]

تستااهلوون يا سوني

اجل متنا وحنا نصوت نبي عربي نبي عربي

وما رديتوا

والحين تبونا ما نهكر خخخخخخخخخخخخخخخخخخخخخخخخخخخخخخخخخخخ

[XORO]

شباب يقولون ما تحتاج تشتري القطعة بس حمل الملفات المطلوبة وحطها في الفلاش

هذا رابط الفيديو : http://www.youtube.com/watch?v=keTnpzXgdW0&feature=related

رابط تحميل الملفات :
Download Mirror 1: http://filesmy.com/1F5Wr ( No Password )
Download Mirror 2: http://www.megaupload.com/?d=AG2PF1W1

بس انا حملت من ميجا ابلود وطلع الملف محمي بكلمة سر اما الموقع الاخر فما اقدر احمل منه جربوا وشوفوا

[.::RaK_BoY::.]

يعني حتى الهاكرز هكروا عليهم لوووووول

[dely10]

خبر يقول ان سوني بتسوي صيانه آخر الشهر على الستور وكل مايتعلق بالشبكة ما عدا الاونلاين تقدر تلعب
وهذا يبين ان سوني بترد على الهكرز وبتصدى لهم

[Sparta Ghost]

اللي يحب يدخل اونلاين فانصحه لا يجرب القطعة لاني قاري خبر ان سوني تقول انها تقدر تعرف اللي يستخدموا القطعة يعني بيعطوهم باند محترم.

و اللي ما يحب الاونلاين فيتهنى بالقطعة =)

[ســSaKeــاكي]

القطعه حاليا مالها فائده لان حتى الان مافيه مواقع تحميل العاب ps3

[dely10]

ابديت سوني بدأ اليوم >>>> لا لتهكير

[Tockuchi]

القطعه حاليا مالها فائده لان حتى الان مافيه مواقع تحميل العاب ps3
من قال , هذا (http://www.ps3sos.com) موقع ألعاب نزل و أعتقد وصله 5 صفحات من الألعاب إلي نزلوها

[Itachi 2121E]

من قال , هذا (http://www.ps3sos.com) موقع ألعاب نزل و أعتقد وصله 5 صفحات من الألعاب إلي نزلوها
سبحان الله :) أنا كنت أدور بس ما حصلت غير موقع فيه 5 ألعاب بس دا الموقع ما أعرف بأي لغة و ما أعتقد انو فيه كل الألعاب بعا , و المواقع المعتاد عليها مثل isohunt ما فيها ألعاب للحين ... أعتقد اني بنتظر لين تستقر الأمور كليا و يكون فيه ألعاب تنزل بكل سهولة و بعدين بفكر أشتري ps3 :أفكر:;)

[Tockuchi]

^^^^
اللغة هي الأسبانية , تقدر تغير اللغة في آخر شيء من من الصفحة على اليسار , كاتبين Castellano , غيره و حط English

[KasiH]

توكوتشي راح ابلغ عنك في فرع سوني الخليج ... P:

[SALM0RE]

^^^^^

لول . . . ايه يبغيله هو أكثر واحد متحمس للقطعة في المنتدى

[Itachi 2121E]

اللغة هي الأسبانية , تقدر تغير اللغة في آخر شيء من من الصفحة على اليسار , كاتبين Castellano , غيره و حط English
جزاك الله خير :biggthump ...عقبالي أشتري 3 بالعطلة مال السنة الياية إن شاء الله , الجامعة بتبدي بعد شوية أسابيع :12:

[رزدينت إيفيل]

كذب في كذب طب لو الطريقة صحيحة هات المصدر

[Tockuchi]

توكوتشي راح ابلغ عنك في فرع سوني الخليج ... P:
ترا ماراح أهكر جهازي xD

^^^^^

لول . . . ايه يبغيله هو أكثر واحد متحمس للقطعة في المنتدى
بس جذي نبي نجرب بالناس بالأول xD

[u,a,e]

مبرووووووووووووك

هكرت جهاز عمي <<< ما يلعب اونلاين

ونسخت شريط الكورة ع الهارد وجاري نسخ شريط ناروتو


الطريقة بسيطة

لكن لازم يكون عندك تلفون n900

[Tockuchi]

^^^
شكو التلفون بالسالفه!؟

[u,a,e]

تلفون n900 به نظام المايمو
ونظام المايمو مبني على اللينكس
وهو مفتوح المصدر

لذا
اقدر اخلي هذا التلفون يتعامل مع الـ PS3 ( لانها تدعم الـ اللينكس )
وادخل بعض الاوامر في الهاتف وانقلها للـ PS3
http://i785.photobucket.com/albums/yy131/Nokia7Vista/Screenshot-20100904-133641.png

http://i785.photobucket.com/albums/yy131/Nokia7Vista/20100904_001.jpg

[بدون اسم 2007]

^^^
DUH
..............................

[Michael Scofield]

شباب القطعة مو موجه بالرحاب ولا لآ ..؟

[Tockuchi]

تلفون n900 به نظام المايمو
ونظام المايمو مبني على اللينكس
وهو مفتوح المصدر

لذا
اقدر اخلي هذا التلفون يتعامل مع الـ PS3 ( لانها تدعم الـ اللينكس )
وادخل بعض الاوامر في الهاتف وانقلها للـ PS3
http://i785.photobucket.com/albums/yy131/Nokia7Vista/Screenshot-20100904-133641.png

http://i785.photobucket.com/albums/yy131/Nokia7Vista/20100904_001.jpg



طيب إذا ما عندي التلفون , يعني ما أقدر أهكر أي جهاز ثاني بدونه؟ , إذا ما أقدر عيل أكيد السالفة مكلفة -_-"

[.::RaK_BoY::.]

لو يخلون البلاي ستيشن 3 يشغل البي اس بي بيكون شي حلو

[Falling Angel]

^^
على طاري الـ PSP
واحد من أصحابي هكر الـ PS3 حقه بالجوال..
طبعا هو من جنبها (: واحد ثاني هكرها له..
ونسخ أغلب الألعاب عنده..
المهم .. اتصل على يبغاني أجي أشوف الطريقة لكنت أنا رفضت
المهم.. الشخص اللي هكر الـ PS3
يقول " أنه يقدر يهكر الـ PS3 عن طريق الـ PSP
لكن ما كانت متوفره PSP أمس..
كل أمس مزعجين العالم عندكم PSP
هو ما قال لي الطريقة ولا شيء.. لكن بيجوز ليش لا..

فـ السؤال: في أحد سمع عن هالشيء التهكير عن طريق الـ PSP

[Tockuchi]

^^^^
أول مرة أسمع عن هالطريقة xD

[KasiH]

يقولوا تقدر تهكر البلاي ستيشن 3 بواسطة الة حاسبة P:

شباب الموضوع هذا للنقاش فقط اتمنى ماشوف اي طريقة للتهكير للجهاز ، لانه مخالف للقوانين .

[u,a,e]

عن طريق PSP ما سمعت فيها

لكن انا قدرت اهكر عن طريق التلفون .. وما بذكر الطريقة لانه ممنوع

[Falling Angel]

^^
أنا مثلك ما كنت سامع فيها غير أمس..
فـ كان الموضوع مضحك..
لأنه جهاز من سوني يهكر جهاز أخر من نفس الشركة..
فـ بحثت في المواقع الأجنبية عن الموضوع.. وفعلا وجدت الطريقة

المهم.. أنا ماهمني سالفة التهكير
لأني مرتاح مع الأصلي..

[Al-RaQmi]

التهكير ماشي سوقة
ماتوقعت راح ينتشر ويصير بهذي السهولة ..
تقدر تدخل اونلاين !!

[american.u.s.a]

اذا الكل هكر الحهاز حقه بتخسر سوني :biggthump
يعني باختصار مانشوف العاب ضخمة زي UNCHARTED وLITTLE BIG PLANET :33:

يقولوا تقدر تهكر البلاي ستيشن 3 بواسطة الة حاسبة P:
لول كاسح
انا قدرت اهكر البلاستيشن ب
http://www4.0zz0.com/2010/09/07/01/143498208.jpg (http://www.0zz0.com)
:09:

[ToUaReG]

لوووول ..
شسالفه ؟؟؟
تصدقون ماهتميت لسالفة تهكير الـ PS3 ..
ولا حتى اقرا اخبار او ادخل مواضيع التهكير ..
بس لما دخلت انصدمت من اللي شفته !!!
معقوله طول هالسنين محد قدر يهكر الجهاز .. و بعض الهكر اللي اعتزل و لي انتحر و لي تاب الى ربه ..
و بالأخير ادخل واتفاجأ انه الجهاز يتهكر بفلاش ميموري و آلة حاسبه و جهاز تلفون ؟؟؟!!!

صج مصخره XD ..
حاس قلبي بعد فتره انه الجهاز بصير حاله حال الـ iPhone ..
يعني اقدل اعدل عليه على كيف كيفي ..

[GT4 SKYLINE]

السلام عليكم:)
الطريقة هذي تحتمل النجاح وتحتمل الفشل نجاحها مؤقت ان كانت صحيحة
هكر او مجموعة قليلة جدا ضد شركة سوني من الاقوى
بنشوف نجاحات وفشل وسقوط حتى واشاعات ونصب الوضع ماراح يبقى على حاله :32:
واقرب مثال الPSP في البداية التهكير صعب ومتعب وبعدين تطور الوضع حتى وصل ان كل تحديث تقريبا له كاستم "تهكير"..وصل الوضع لقرصنة غير طبيعية للجهاز كل واحد يقدر يبرمج جهازة ويلعب اللعبة بنفس يوم صدورها الان و صل الامر لطريق مسدود :blackeye: تقريبا
اصحاب التحديث الاخير مايقدرون يبرمجون الجهاز لاكن محاولات الهكر مستمرة الا ويلقون طريقة وينجحون وبعد تعب مدة طويلة تنزل سوني تحديث ويفشل التهكير
الجهاز PS3قوي وليس جهاز لايقهر يعني الوضع صعب وفيه امل ولو نسبة قليلة للهكر:o
اعتقد الوقت بيطول حتى يكون تشغيل الالعاب وضع عادي ومتوفر في كل مكان
اخر شي التهكير من زمان موجود للPS3 لاكن طرق ماتهم الكثير وانتهى وقتها وبعد كل مدة تنزل طريقة جديدة

شفت الفيديو الطريقة حلوة برمجيا ماتضر القطع الداخلية مثل العدسة وغيرها واذا نجح الاونلاين حاليا سوني بالمرصاد
لازم فلاش جديدة او برنامج جديد :boggled:

[THEGAME2050]

كان هذا هو الهدوء الذي يسبق العاصفة ...

تم تحديث جهازي الى 3.42 ;)

http://www.m5zn.com/uploads/2010/9/6/photo/090610210933qr0v36k58zvfhl1k.jpg (http://games.m5zn.com/cooking_games.html)

[Judge Balthier]

نزل التحديث الجديد وقفل التهكير الذي حصل وهذا الكلام موجود في هذا الرابط لموقع ps news

http://www.ps3news.com/PS3-Online/ps3-firmware-update-3-42-is-now-available-details-incoming/

واخيرا انحلت المشكلة ان شاء الله.

[american.u.s.a]

^^^^^
التحديث اجباري بالنهاية انتصرت سوني

[ToUaReG]

[ النصر للهكر ] : تم تجاوز تحديث 3.42 من قبل الهكر



كما تعلمون فقد قامت شركة سوني بإصدار تحديث جديد 3.42 و كلنا نعلم أيضا بأن هذا التحديث يقوم بتعطيل عمل PSGROOVE/JAILBREAK الذان يسمحان لك بتحميل الألعاب على جهازك و لكن ظهر مؤخرا على صفحات الأنترنت برنامج صغير يدعى بـ **** يقوم بالسماح لك من الذهاب إلى الأونلاين و تخطي تحميل التحديث الجديد 3.42 و بالتالي سوف يمكنك من متابعة نسخ ألعابك على الجهاز

من موقع NG4A ..
لوووول ..

[Tockuchi]

الهكر مو سهلين أبدا xD
كنت حاس إن راح يحلون مشكلة الأبديت إلي نزلته سوني , سوني لازم تسوي شيء أقوى من جذي

[Fantasy Legend]

[ النصر للهكر ] : تم تجاوز تحديث 3.42 من قبل الهكر






كما تعلمون فقد قامت شركة سوني بإصدار تحديث جديد 3.42 و كلنا نعلم أيضا بأن هذا التحديث يقوم بتعطيل عمل PSGROOVE/JAILBREAK الذان يسمحان لك بتحميل الألعاب على جهازك و لكن ظهر مؤخرا على صفحات الأنترنت برنامج صغير يدعى بـ **** يقوم بالسماح لك من الذهاب إلى الأونلاين و تخطي تحميل التحديث الجديد 3.42 و بالتالي سوف يمكنك من متابعة نسخ ألعابك على الجهاز



من موقع NG4A ..
لوووول ..



وعُدنا من جديد,,
احس انو نهايه سوني قربت :sgrin:

[evil-kusanagi]

اعرف لماذا الناس منقسمين .
واحد ربما يكفر كل من يقول بتهكير الجهاز. مثل ان احد افراد اسرته في مجلس ادارة سوني .
لو القرصنة عند البعض حرام . ممكن اسئلك سؤال .
هل جميع برامج جهاز الحاسوب ليدك كلها اصلية.
هل تدفع ثمن تحميلك للاغاني او الافلام او اي شيئ .
اذا كان كل مشترياتك اصلية فانا معك .
اما ان كنت فقط وقفت معاك في سوني فارجوك لا تكيل بمكيالين .
خلي الناس تلعب و خلي الكل سيتمتع . في ناس تدافع عن سوني ربما كانها من قضية قومية .
لو تفكروا جيدا مايكروسفت هل من الصعب عليها ان تمنع القرصنة و هي اولا شركة برامج قبل كل شيئ .
يعني لو سمحت سوني بالقرصنة ربما تتجاوز الاكس بوكس في المبيعات . مجرد راي شخصي .
و انا ارى ان سوني لن تستطيع ان تقاوم اكثر او ربما هي ترضي شركات الالعاب بهذا التحديث السادج.

[موت عالمي]

ان شاءالله الهكر يصير لهم كلمه
ملينا وحنا ندفع ندفع
اشتري 3 العاب قيمة جهاز كامل......

[Judge Balthier]

بالعكس ,حنا ماصدقنا نحصل على الخدمات وتبونها تروح علينا ,يكفي انهم عملوا ستور لنا وبطاقات شحن بعملتك (ريال ,دينار وخلاف ذلك),وعن قريب سيقام معرض للالعاب وتجربتها في الرياض ان شاء الله , والفضل يعود للمبيعات التي ارتفعت بشكل ملحوظ في المنطقة العربية ,وعقبال المعارض القادمة لكل الدول العربية ,وصارت الاسعار للاشرطة ارخص (لان الاشرطة الاصلية الامريكية على ايام ال ps2 كانت تجي من امريكا لكن الان في السعودية اصبح هناك موزع رسمي ,يكفي انك تذهب لأي محل واسئلة عن سعر اللعبة الامريكية والاوروبية وشوف الفرق ,وبعدين ابشرك ترى كل البرامج التي املكها اصلية ,وهل في نظرك ان القرصنة حلال ,ابحث وشف وافدنا
ولا تخاف سوني قدها ان شاء الله.(لما ناس تتعب وتسوي موضوع كامل ومرتب ثم يجي واحد يأخذه ويضعه في منتدى اخر ويدعي انه هو كاتبه مو غلط , فما بالك ناس تتعب وتدفع اموال على صناعة هذة الالعاب ويجي احد يأخذها ويهكرها ويأخذ المال هو مو الناس الذي تعبت عليه مو غلط , اظن الصورة وضحت ).
وبالنسبة للمعرض , هذا رابط فيه معلومات متى واين سيقام ,وراح تسركم الالعاب القابلة للعب (كلها العاب لم تصدر حتى الان ).
واسف على الاطالة.
http://www.ng4a.com/archives/55197

[biohazard x]

أخوي Judge Balthier

شكرا لك وفرت علي الكتابه ....

[Judge Balthier]

ولوا حنا في الخدمة .

[evil-kusanagi]

ممكن احد يجاوبني .
ماذا ستخسر انت اذا تم تهكير الجهاز ما دام انك ستشتري الاصلي .
قل لي فين المشكلة لو سمحت .
خلي الشعب يلعب لو انت عندك فلوس في الف واحد لا يملك .
في ناس تتكلم كانها الفاروق عمر و تجلس تفتي و تحرم و تحلل .
في الاخير لو انت لا تريد ان تهكر جهازك لا تفعل . سواء قاموا باختراقه او لا .
يعني الاكس بوكس و الوي فيهم قرصنة و شركات الالعاب ما زالت تدعمهم و مبيعاتهم خيالية .
انا لا اشجع لا على الاصلي و لا على الكوبي .
المهم الكل سيتمتع .
و سلام .

[EL Madridsta]

ممكن احد يجاوبني .
ماذا ستخسر انت اذا تم تهكير الجهاز ما دام انك ستشتري الاصلي .

بنخسر دعم الشركات
وبنخسر جودة الالعاب
لأنه كلما زاد الهكر والكوبي كلما قلت المبيعات وتقل جودة الالعاب
فالشركات تضضر ماديا واحنا نتضرر من ناحية الجوده
والي يشتري كوبي المفروض يعتزل الالعاب احسن له لأنه جذي يكون ضد تطور صناعة الالعاب


ومثلما قالJudge Balthier
ما بغينا يعطونا وجه ويقدمون لينا بعض الدعم شوي
وان شاءالله يزيدون الي يشترون اصلي حق يصير عدنا ريجن خاص بالشرق الاوسط او بالخليج العربي

[Judge Balthier]

اول شيء ما افتيت ولا جبت شيء من رأسي ,واتحداك تحدي ان تجد في ردي السابق كلمة حلال او حرام ,انت شكلك راد وانت ماكملت قراءة ردي ,كل ما في ردي عن المبدأ لا اقل ولا اكثر , وركز انني قلت كلمة غلط مو كلمة حرام حسب ماتدعي . انت ومبدأك تبي تهكر هكر محد ماسكك , لا انا ولا سوني بنردك , سو الي تبي .
وبالنسبة للاشياء التي سنخسرها (راجع ردي السابق عشان تتضح لك الصورة ), والرجاء اذا بغيت تقصد احد حدد .
واتمنى ان سوني تجد الحل الكافي لسالفة التهكير هاذي
والسلام عليكم ورحمة الله وبركاته.

[GT4 SKYLINE]

صحيح اذا بنخسر المميزات اللي حصل عليها السوق عندنا بسبب التهكير بتكون مصيبة لناس وخبر مفرح لناس
على الاقل سوني قامت تفحط وشكلها بتسوي عروض وتخفيض اسعار بهذي انا مع الهكر خل سوني تذوق طعم الخوف شوي وتنزل الاسعار في منتجاتها واذا نزلت الاسعار ماراح ترتفع
وهذا من صالحنا

[evil-kusanagi]

عفوا اخي الكريم لم اقصدك انت و انما ردود سابقة .
الذين يحرمون التهكير و في نفس الوقت الواحد منهم يشتري ثلاث لعب في الشهر هي ميزانية اسرتين في فلسطين
اليس هذا تبديرا . .
انا لم اقل لك لا تشتري الاصلي . لا و الله ما قصدت .0 اللي قصدته ان القيامة تقوم عندما يذكر التهكير.
و الاخ اللي يقول ان دعم الشركات للجهاز راح يقل .
ممكن اسئلك سؤال و يا ريت تجاوبني .
لماذا شركات الالعاب تدعم الاكس بوكس و انت تعرف انه اول ما نزل تهكر .
ممكن تقول لي السبب يا حبيبي .
اجاوبك انا لان الشركات لا ربح لها معنا يغني العرب و امريكا الجنوبية و اروبا الشرقية و جنوب اسيا .
مبيعات الخليج كلها لا تساوي شيئا لتلك الشركات .
يعني تهكر الجهاز ام لا الشركات راح تصنع عليه العاب .
يعني بالمنطق شركات الالعاب لا يمكنها ان تستغني عللى الاجهزة لانه بدونها كيف راح تعمل .
يعني بالعربي الشركات ستنتج العابا تقرصن الجهاز ام لا .
بالاضافة سوني ماذا قدمت لكم . هل هناك دعم للغة في الجهاز . هل هناك العاب بالعربية ....زيادة لماذا جهازها لا يدعم العاب الجيل السابق و تضحك عليكم بكوليكشن اللي ما هو الا حلب في حلب .
اللي يريد الاصلي يلعب اصلي و اللي يبغي الكوبي يا مرحبا .

[Tockuchi]

اللي يريد الاصلي يلعب اصلي و اللي يبغي الكوبي يا مرحبا .
وبس خلاص انتهت السالفة انت قلتها , إلي يبي الأصلي يلعب فيه و إلي يبي الكوبي يلعب فيه , ما أشوف إن النقاش قاعد يحل مشاكل

[evil-kusanagi]

ممكن شباب سؤال بسيط ما الفائدة التي تجنيها سوني من مقاومة التهكير .
اذا علمنا انها اقل الشركات ارباحا.
جهازها في المرتبة الاخيرة بين اجهزة الجيل رغم تفوق التقني .
شركات الالعاب لم تكافئ سوني على مقاومتها للتهكير و لا تعكيها العاب حصرية اللهم ميتال جير
شركات الالعاب ما زالت تدعم الاجهزة المقرصنة للشركات المنافسة لسوني.

ممكن احد يجاوبني.

[Fantasy Legend]

يالله قلبتوها حرب القراصنه ,,,
ياخي انا اشوف انو مافي اي شي لو اتهكر الجهاز يعني بالله ذلحين قولولي لما كنا نلعب بلايستيشن 1 و 2
كنا مرتاحين واي حاجه كمان لا كنا نقول هكر ولا اي جاجه كنا نشتري الشريط بعشره ريال زي الطيبين واذا علق اشترينا واحد ثاني يعني كل الخساره عشرين ريال مو 200 ريال
ولا من جد اشتريلي 6 اشرطه بقيمه جهاز جديد والله انا اشوف انو هذي بطره يعني والله في ناس يالله يشتري الجهاز تقلي يشتري شريط ب200 مثلا راح يقول اشتر اكس بوكس اشرفلي اشتريلي 20 شريط
بقيمه شريط 1 من بلايستيشن 3,,
ياخي الزبده اش بتخسرو لو اتهكر من جد لا حد يقول الشركات بتخسر وماني عارف ايش اهو بلايستيشن 1 و2 كان كوبي وكانت الشركات ماشيه زي الحلاوه وكانت تنزل العاب بطرانه,,
وثاني شي لو هكروه بينزل سعر الشريط بشكل كبير وهذا لمصلحتنا,,
لو نزل الكوبي ياخي لا تشتريه احد قلك اشتريه احد غصبك اشتري الاصلي وكأنو ما حصل شي,,,

[evil-kusanagi]

يسلم فمك يا اخي .
و الله اني احبك في الله .

[Judge Balthier]

http://www.ahlalhdeeth.com/vb/showthread.php?t=78082 (http://www.ahlalhdeeth.com/vb/showthread.php?t=78082)

ادخلوا الرابط وان شاء الله تجدوا الجواب الشافي والكافي , اخوكم Judge Balthier .

[OLD SNAKE 19]

شو السالفه

الدنيمارك سبوا الرسول وما انتفضتوا كل هالانتفاضه
لهالدرجه سوني مهمه

حبايبي اللي ما يبي يهكر لا يهكر كيفه محد رازه في خشمه غصب
واللي يبي يهكر كيفه بعد

بس لحد يقولي انه بيبي يفقد ميزات وخرابيط لانو سوني من الاساس ما دروا عنا ولا هميناهم

[Alucard.4.ever]

اشوف ان هذا الهاك محترم عن غيرة ...

يعني تحفظ اللعبة على الهارد فقط ، يعني ماشي شرايط كوبي ولا نسخ تورنت " واذا توفرت احجامها 5-30 جيجا "

لو في ناس متفاهمين يقدرون يمشون عمارهم " الشريط الواحد يدور على كل شباب الحارة !! "

لكن المشكله كما ذكروها بعض الاخوان هي ان بعض الالعاب الداعمه للشركة ستفقد جديتها في انزال الالعاب بسبب كابوس الهكر والكوبي ..

سوني ماراح تخسر شي غير السمعه ، لان جهازها الوحيد ما اخترق وضل صامد لمده طويلة جداً ، يعني ثقة الشركات من الطرف الثالث كبيرة مما يساعد على اصدار العاب حصرية ..

لكن شي ما مقتنع فيه وهو كما ذكره اخوي " ايفل كوساناجي " اجهزة الكونسول الاخرى متهكره من زمان ولكن مبيعاتها اعلى من السوني مع هذا الشركات تظل في اصدار العابها !!


انا ما احرض على التهكير ، لكن :

كل واحد وله ذوق اصلي ام تقليد ، بالاخير هي لعبة .

--------------------------

لو كان الهاك فقط مختص في تشغيل البرامج والمحاكيات افضل بـ 100 مرة من هذا الهاك ..

[Judge Balthier]

بيض الله وجهك يا وايت نايت على اغلاق بعض المواضيع المخالفة والتي منها التهكير , اشهد ان المنتدى بأيدي امينة , وارجوا من العضو evil -kusanagi الاطلاع على الرابط وعدم تجاهله لتبرير رغبة في نفسك وارجوا من البعض اختيار الالفاظ الحسنة في الرد لاننا في منتدى محترم وجميع اعضاءه محترمون .والله الهادي الى سواء السبيل.

[snake.ae]

السلام عليكم

اتمنى ان ما يتحسس اي عضو من ردي او يزعل احنا كبار على هذي السوالف

الصراحه الكوبي حل مشكله ارتفاع اسعار الالعاب عذر اقبح من ذنب للكوبي

كونك ما تقدر تحصل على شي تبغيه مب معناه انك لازم تاخذه باي طريقه

و اذا كنت مصر فالحل الوحيد انك تشتغل الراتب بيكون بين الفين و ست الاف درهم اماراتي لحامل شاهاده مثل الثانويه او طالب دراسات عليا

هذا منتشر عدنا في الامارات كان لي زملاء في الكليه يدرسون من 8 الى 4 و يداومون في شركه بعد الكليه و عايشين حياتم عادي

او تسجل مرشح في شركه تستلم راتب و عندك تفريغ دراسه و بعدها تعمل في الشركه لمده

المهم عدد الالعاب اللي تستحق الشرء معدود و في الغالب اسعارها رخيصه لا نها في الغالب قديمه و الباقي يغبر على رف المحل احسن

انا اتعامل مع الاصلي من عشر سنوات و ماعندي اي مشكله معاه

الكوبي ما ارجعله الا اذا كان نادر وجود اللعبه في السوق كاصلي

متى ما حصلت اللعبه اصليه اشتريها حتى لو ما العبها الا لوكان في اللعبه شي مسيء للاسلام او مشاهد خلاعيه كثير << في هالحاله اللعبه تروح للمايكروويف

اما الشخص اللي يبحث عن المحاكيات و الالعاب اللي ببلاش يمدحون دسكتوب بينتيوم فور و رام 2 GB و كرت شاشه ATI و وندوز XP مهكر و انسى الPS3 لان مواصفته اقوى بستثناء المعالج

ولا تنسون يا شباب احنا مسلمين و احنا في رمضان وين اخلاق المسلمين للي لازم تتحلون فيها

حد منكم يرضى انه يشتغل في مكان ما يعطيه حقه كامل طبعاً لا

انتوا تعطون الكثير من الالعاب اكثر من حقها بس من ابسط شي وبعد ما تشتريها تبداء الشكاوي في المنتدى

وبالنسبه للخلاعه اللي منتشره هاليومين في الالعاب اعتقد ان الواحد يقدر يتجاهلها اذا كانت في لعبه ممتازه

[american.u.s.a]

ممكن شباب سؤال بسيط ما الفائدة التي تجنيها سوني من مقاومة التهكير .
اذا علمنا انها اقل الشركات ارباحا.
جهازها في المرتبة الاخيرة بين اجهزة الجيل رغم تفوق التقني .
شركات الالعاب لم تكافئ سوني على مقاومتها للتهكير و لا تعكيها العاب حصرية اللهم ميتال جير
شركات الالعاب ما زالت تدعم الاجهزة المقرصنة للشركات المنافسة لسوني.

ممكن احد يجاوبني.
معيلش اخوي حاليا حصريات البلاستيشن تفوقت على المنافسين بقوتها
من اول مانزل PS3 كل لعبة حصرية له تاخذ الجوتي:
2007 UNCHARTED 1
2008 MGS
2009 UNCHARTED 2
غير الالعاب الضخمة الثانية :33:

[Fantasy Legend]

والله جاني الصداع ,,,
judge balthier اولا شكرا لحرصك على انك ما تسرق حق احد ,, بس ياخي لو جينا بالعقل انتا ابغاك تقلي بكل صراحه كنت تشتري اشرطه بلايستيشن 1و2 اصلي ولاكوبي؟
لو كان اصلي ديك الساع معاك حق في كل كلمه قلتها بس لو كان كوبي عاد هاذا شي ثاني,,
بعدين انا عجبني رد هذا الشخص لما وضح الصوره


يجب عند ذكر السؤال للمفتى تبيين الصورة بأكملها.
و أن أسعار هذه البرامج مبالغ فيه جداً.
و هذا سيفضى إلى أن كثيراً جداً من المسلمين لن يستطيعو ا استعمال الحاسب.
و فرق مثلاً بين اسطوانة الموسوعة الشعرية الأصلية التى ثمنه 10 جنيهات.
و بين اسطوانة الويندز التى ثمنها 500 جنيه!!!

ياخي والله من جد كلامو ,,
Judge Balthier اتمنى انك ماتكون زعلت مني لانك والله زي اخويا وانا اقدر حرصك للحلال ,, بس نحنا نتناقش نقاش يعني كل واحد يطرح وجهت نظره



يسلم فمك يا اخي .
و الله اني احبك في الله

الله يسلمك وانا كمان احبك في الله,,

[evil-kusanagi]

اصلا لو فكرنا قيليلا انت لا تسرق احد . لانك تعمل نسخ من قرص اصلي .
يعني لما صديق لي يعطيني لعبته و اعمل لها نسخة في جهازي ابقى مخالف للشريعة الاسلامية
و اتفاقية جنيف للتبادل الحر .
يعني القضية ليست قرصنة واحد يعطيني لعبة و انا لا اسرق احد فين المشكل .
و شكرا .
على فكرة ما احد اجابني على تساؤلاتي .
و ايام PS2 كانت هناك حصريات اقوى من هذا الجيل و كان الجهاة مهكر .
بالاضافة كيف سمعة الشركة يعني مايكروسوفت و نينتندو فقدوا سمعتهم لما تهكر جهازهم .

[u,a,e]

لا للهكر ..
الحين الموف فيه العاب تدعم العربي

وذلك لانهم شاافو فيه سوق عربي للالعاب ..

اتمنى عدم التهكير ..
صح اني هكرت لكن للتجربة فقط .. حذفت برامج التهكير من عندي

[snake.ae]

لما صديق لي يعطيني لعبته

هذي في باب العاريه


و اعمل لها نسخة في جهازي

وهذي في باب السرقه



ابقى مخالف للشريعة الاسلامية
و اتفاقية جنيف للتبادل الحر .

وهذي شكلها استهزاء بالدين

تبغي تتاكد من كلامك اطرح سوالك في اي موقع فتاوي

و ان شاء الله بتحصل موقع يعطيك آيات من القرآن و احاديث تأمر بنسخ الالعاب و بيعها و تمنح الناسخ درجه اعلى من درجه العشر المبشرين بالجنه

[NiN RevO]

اصلا لو فكرنا قيليلا انت لا تسرق احد . لانك تعمل نسخ من قرص اصلي .
يعني لما صديق لي يعطيني لعبته و اعمل لها نسخة في جهازي ابقى مخالف للشريعة الاسلامية
و اتفاقية جنيف للتبادل الحر .
يعني القضية ليست قرصنة واحد يعطيني لعبة و انا لا اسرق احد فين المشكل .
و شكرا .
على فكرة ما احد اجابني على تساؤلاتي .
و ايام PS2 كانت هناك حصريات اقوى من هذا الجيل و كان الجهاة مهكر .
بالاضافة كيف سمعة الشركة يعني مايكروسوفت و نينتندو فقدوا سمعتهم لما تهكر جهازهم .

يا اخوي انت شفيك تتعمد تزعل الشباب :)

يا اخي هكر على كيفك محد منعك وخلنا ما نبي نهكر بكيفنا نحب سوني ونبي نسرف فلوسنا ^^

[EL Madridsta]

يا اخوي انت شفيك تتعمد تزعل الشباب :)

يا اخي هكر على كيفك محد منعك وخلنا ما نبي نهكر بكيفنا نحب سوني ونبي نسرف فلوسنا ^^

اي والله احنا مستانسين جذي وعاجبنا الوضع ^_^
ما بغينا نجوف العاب تدعم اللغبه العربيه مثل toy story 3

[evil-kusanagi]

و انا ماذا اغني من زمان .
لا انا ضد التهكير و لا انا معه .
الكل مجتمع على انه كل واحد حر .
و عفوا اذا جرحت احاسيسك .

[Judge Balthier]

evil kusanage الله يهداك بس انت بديت تقول الناس تحرم وتحلل على كيفها والحين تشوف الفتوى وتقول لا مو حرام (ترى snake ae وضح لك في رده عن ماتريد ),اذا عندك دليل قاطع افدنا به , ماعندك فلا تتكلم في امور انا وانت نجهلها , انا وانت لسنا مفتين , المفتين ناس درست وتعبت سنين في العلم الشرعي حتى وصلوا الى ما وصلوا اليه ويتحرون الدقة في اي فتوى , فخلي عنك لو فكرنا لأن لو تفتح عمل الشيطان ,ولاتخجل من قول كلمة لا اعلم فانها تسوى نصف العلم , والله الهادي الى سواء السبيل.

[White Knight]

ممممم قريبا

http://usera.ImageCave.com/sultanroma/shrta.com-80451747bd.jpg

[Tockuchi]

^^^
أنصح بإستعمال الطريقة P:

[Al-RaQmi]

يا اخوان << اسلوب جذب P:

الموضوع نحتاجه حتى نشوف نهايتها مع التهكير واخر مستجداته
نقاش طريقة تفعيلة وخطواته ..... الخ تمنع من الموضوع .. ويحذف الرد

المقصد حتى نستفيد .. اتمنا حذف الردود الاخيرة ونكمل اخر اخبار الهكر .. متشوق لافعال الهكر حتى الرمق الاخير^^
اذا احد يوافق الرأي .. المراقبين ماراح يقصرون ^^

[NiN RevO]

^
thumbs up ^_^

[Judge Balthier]

ممممم قريبا

http://usera.ImageCave.com/sultanroma/shrta.com-80451747bd.jpg


ياليت اتمنى (وباقي كلمات الترجي)

[Fantasy Legend]

خلاص خلاص ماحد راح يتكلم والله توبه
بس انا اييد راي الرقمي خلي الموضوع مفتوح عشان نعرف اش النهايه مع الهكر
واي واحد يتكلم احدف ردو وطاح الحطب ,,,

[kllor]

أنا مع الرقمي, على الاقل نعرف شسالفه و شنو اخرتها, شنو سوني راح تسوي و اشلون الهكر راح يردون عليهم و شنو ردت فعل سوني ... الخ

كأنها قصة :09:

[KasiH]

احنا خلينا الموضوع مفتوح عشان النقاش ونشوف كيف الامور ماشية لكن الموضوع صار فيه حلال وحرام وبدات فيه مشادات ، لا
هذا مانبغاه مافي داعي نوقف احد على موضوع مايستاهل . الي يبغى يهكر بكيفه واللي مايبغى لايهكر خلاص انتهينا ، فيه مؤيد وفي معارض
وانتهت القصة مافي داعي تقنع المعارض انه يهكر بالقوة . وخلوا عيدكم سعيد .

[Tockuchi]

^^^^
عشان جذي أيدت فكرة تصكير الموضوع /:

[snake.ae]

دام ان المساله مثل ما قال كاسح انا انسحب من النقاش

[FARES360]

بالمناسبه.. وصلت القطعة بالكويت
سعر التطوير 25 دينار مع لعبة من اختيارك يحطونها بالجهاز
http://img408.imageshack.us/img408/6223/copyhh.jpg

[u,a,e]

ههههههههه المحلات ما يصدقوون هع

[GT4 SKYLINE]

احلا مافي المحل اللوحة متعوب عليها ><
ههههههه كم تكلفتها ومن اللي صممها

http://img408.imageshack.us/img408/6223/copyhh.jpg

فعلا المحلات ماصدقوا انها نزلت بس مهابيل كذا بتبدا الالعاب ينخفض الطلب عليها عندهم

[Nexun]

^
لووووول على اللوحة
سوني 3 ( بدال مايكتب بلاستيشن3 كاتب سوني 3 )
مثل مايجيك واحد يقول مايكروسوفت 360

[kotomoto.73]

على فكرة السوني فقدوا صوابهم بسبب التهكير
هالأيام انا أحاول آدخل على اون لاين أو السوني ستور وما يدخلني
يقولي اني أحتاج آعمل أبديت للنظام
آروح آعمل أب ديت يقوم يناقض نفسه ويقولي انت ماتحتاج أب ديت
انا مب عارف الصراحة هالخربطة
صاور كإنهم دائرة حكومية
موظف يقولك شي وواحد ثاني يقولك شي غير
وفي النهاية مثل مايقولون لا ينقلي ولا ينشوي
انا مب عارف الصراحة شالحل

شالحل ياجماعة ؟؟؟

[XORO]

انا صارت لي نفس المشكلة كل ما عليك انك تسويه انك ترجع تشيك على الابديت كل فترة الى ما يضبط معاك

بعد التحديث الجديد لعبة انشارتيد 2 خرفت عندي العروض تطلع بدون صوت لكن الحين اعتدلت