صور مكملاتي ونظامي الغذائي + هدفي

[مبتدأ حديد]

معلومات المتقدم بالاستفسار :
العمر : ١٨ , الجنس : ذكر

الطول :١٦٨ متر
الوزن : ٦٩ كيلوجرام

نسبة الدهون : ١٨

و الاستفسار كالتالي :
السلام عليكم ياخوان ..



شباب انا صار لي شهرين ونص بالجيم واللحمد لله من تقدم لتقدم ..
الموضوع بقسسمه ل ثلاث اقسام وياليت تعدلون لي اللي انا مخطا فيه
كثير خطوني بالليبو ٦ معا هذا الكورس

اول



[التغذية ]
تغذيتي تتقسم الى ٥ الى ٦ وجبات وهي

-الفطور: بياض بيض ٢ + خبز بر + بيضة مقلية

-بين الفطور والغداء احيانا اخذ بروتين واحيانا لا حسب الدوام

-الغداء: صدور دجاج + سلطة + شوربة احيانا + شوية رز

-قبل التمرين موز او كت كات

*واحيانا اجل الغداء وانام واخليه وجبة قبل التمرين

- بعد التمرين سكوبين بروتين

- العشاء : كباب او ريش او تونة

- قبل النوم سكوبين بروتين


نجي للقسم الثاني اللي هو المكملات :
(موجودين بالمرفق)
١-بروكوبلس
٢- bcaas
٣-اوبتن مان فيتامين
٤ - ليبو ٦ x

نجي للاستخدام :

اول ماصحى قبل الفطور ب٢٠ دقيقة او نص ساعة حبتين ليبو + حبتين بي سي + حبة فيتامين
قبل الغداء بنص ساعه حبتين ليبو + حبتين بي سي
قبل التمرين حبتين بي سي
بعد التمرين حبتين بي سي
قبل النوم حبة فيتامين - احيانا -


نجي ل [الهدف]

الهدف الحصول على جسم مشدود هاذي الفترة يعني بعد انتهى الكورس خصوصا ان عندي دهون اسفل الصدر وترهل اسفل البطن
بعدين تضخيم كبير
باختصار تقليل الدهون + بروز تفاصيل الجسم

الجدول والتمرين :
صدر + باي
ظهر + سواعد
راحه
اكتاف + تراي
ارجل
طبعا العدات ١٢ - ١٠ -١٠ باوزان ثقيلة شوي
طبعا البطن اكثر من ٣ مرات بالاسبوع على حسب البور والنفسية
قبل التمرين ١٠ دقايق سيكل
بعد hitt على السير ١٠ دقايق

ارائكم ياشباب وكم احتاج وقت للحصول على الجسم الفرنسي او الفتنس

[بردان1]

وعليكم السلام

اول شغله واهم شغله

لازم تتخلص من البي سي اي اي هالنوع يحتوي على جلاتين خنزيري
ومن ترك شيئا لله عوضه الله خيرا منه
اتركه لعل الله يعوضك بالقوة وحصولك على هدفك
ثانيا الاكل حاول تبعد عن الدهون
وتزيد البروتين
الصباح خلها 5 بياض بيض وواحد صفار فقط

والليبو 6 مايناسب عمرك يسبب لك مضار بالغدة الدرقية بهالعمر

لو تبعد عنه احسن لك وتقدر تستخدم بداله ال كارنتين

لكن لاتنسى تتخلص من البي سي اي اي الموجود عندك

[احمـد العتيبـي]

كفى ووفى اخوي بردان ..

اضف الى ذلك حتى وان كان عمرك مناسب لاستخدام حارق الدهون .. نسبة دهونك لاتستوجب الليبو 6 !
ظبط اكلك .. وجرب التشاي الاخضر و وال كارنتين وراح تشوف الفرق ان شاء الله ..

موفق يا وحش

[مبتدأ حديد]

مشكورين ياخوان ويعطيكم العافية ، والله صدمتوني بخصوص البكا لنه للاسف النصيحه جت من هنا عنه ..
بخصوص الليبو اخوي العمر مناسب لي وبيني وبينك حرام ادفع مبلغ حوالي ٧٠٠ ريال بعدين ما استفيد
الا من مكملين والباقي ؟!
انا ودي اخلص ها العلبة ويوصل وزن الدهون لل١٥ ع الاقل يالليت تفيدوني بافضل طريقة
وبعدها ماراح اشتري حوارق ابد وابدا بالكراتين

[بردان1]

اخي الفلوس اندفعت وخلاص يعني مش حتفرق اذا استخدمته او لا مافيه شي حرام

ع العموم انت حر تقدر تستخدمه
لكن البكا احذر مرضاة للرب
ولو جديد مافكيته رجعه افضلك

[مبتدأ حديد]

اخوي مو مسالت الفلوس المسالة ان حرام اشتريه وارميه
بالنسبة للبكا طبعا ماراح استخدمه
لكن وش الاثار اللي ترتب على استخدامه ؟
معا ان العمر مناسب جدا !؟
وشنو تنصحني منتج بور ان اكسبلود وغيره؟ وهل كويسه للشد ؟

[بردان1]

لكن وش الاثار اللي ترتب على استخدامه ؟
هنا تقصد البكا ولا الليبو
اذا على الليبو الحوارق عامة ممكن تأثر على عمل الغدة الدرقية سلبا
وغريبة انت هدفك بعد تنشيف
وتبي منتج باور ؟!
غير انك راح تاخذ الليبو
راح يصير ضغط كبير بالكافيين
غير انك ماتحتاج منتجات الباور بوقت التنشيف لانها تعبيك ماء

[مبتدأ حديد]

لا اذا اخذت البور راح اقطع الليبو بالنسبة للهدف زي ماقلت بالموضوع اختفاء الكرش + مسح الصدر السفلي البارز قليلا
يعني ابي ارفع ولو شي بسيط من العضل معا تقليل نسبة الدهون هل ينفع الكراتين لي ؟

[بردان1]

انت كذا تخسر وقت وتخسر مكملات
بتفكيرك بهدفين

ببساطة
عشان تكسب لو شي بسيط من العضل تحتاج لنظام غذائي عالي السعرات عالي الكارب
عشان تقلل الدهون بالجسم
تحتاج نظام غذائي قليل السعرات وقليل الكارب ومنعدم الفات


يعني الجمع بينهم مستحيل كا هدفين رئيسيين

ممكن تضخم
عضل صافي
تسوي لنفسك نظام اكل صارم ودقيق وموزون
وتلقى نسبة الفات تقل نتيجة زيادة العضل وهذي ممكن لكن نفس وزن الدهون مايتحرك للاسفل ممكن يتوقف او يرتفع بشكل بسيط
لو تخسر دهون مع زيادة عضل صعبة

انت حدد هدفك
اما انك تنشف تماما وتكون مستعد بقوة للضخامة
او تضم حاليا وبعد فترة عاد تنشف

[مبتدأ حديد]

المشكلة اخوي انا داخل على فترة اختبارات بعدها سفر يعني قطعة تقريبا شهر كامل او اكثر شوي

وش تنصحني بهاذي الفترة اضخم ؟ عضل صافي او انشف ؟

واقدر اضخم وامسح الكرش والصدر بنفس الوقت ؟

ويعطيك العافية اتعبتك بسالتي

[بردان1]

ماتعبتني يالغالي انا بالخدمة

انا ذكرتلك انه صعبه هدفين لكن
ممكن تمشي على هالطريقة ان شاءالله تشوف تحسن بس ما اضمن لك
امش على نظام ضخامة صافيه اكل نظيف من الدهون بروتين عالي كارب متوسط الى عالي وابعد عن السكريات والنشويات

+ ال كارنتين حبة او حبتين قبل التمرين
وبعد التمرين مشي سريع 10 دقايق

بالتوفيق ان شاءالله

[مبتدأ حديد]

يعطيك العافية اخوي بس سوال اخير انا الكارب مالي خبرة فيه يالليت المكلات اللي تحتوي على كارب والاكل اللي يحتوي على كارب وكم احتاج غرام باليوم من الكارب

[بردان1]

تحتاج تقريبا
من 150 الى 250 قرام من الكارب في فترة الضخامة
لكن لازم تعرف توزعها وترتبها وتعرف الكارب الي ينفعك بالوقت هذا والكارب الي ينفعك بالوقت الاخر

كارب معقد : بطاطا شوفان خبز بر ماكرونا وغيره
كارب بسيط : السكريات والنشويات