النوادي في أمريكا موضوع للنقاش اذا فيه مبتعثين يتفضلون

[متعطش]

سلام عليكم ورحمه الله وبركاته

سبق وطرحت هذا الموضوع لكن حذف وليه حذف؟ مدري
قلت اكتبه بصياغة أخرى وأتمنى أن لا يحذف!

المشكلة ياشباب إن لي أسبوع بأمريكا .. وما اكل باليوم إلا وجبة وحده أو وجبتين إن كثرت!
وأغلب أوقاتي مشي على رجولي والله مشي مو صاحي!
عموماً واضح جداً من خلال النظر إلى المراية إن وزني نزززززززززززززززززززززززززززززززززل!
من خلال التخمين ممكن وزني صار 57 بعد ما كان 63 وانا بالسعودية!!

الزبدة إني أعاني من شيئين:
- الأكل ... مرة أعاني منه كل المطاعم اللي هنا اكلهم مدري كيف! كل ما اكلت وعلى كثر ما أكل أحسني ماشبعت بس شبعت! حلوها عاد .. يعني شبعت انا بس بطني توصوص!!! اكلهم مدري كيف!
- النوادي .. للآن مادخلت نادي .. نواديهم مشكلتها زحمة .. غير الزحمة ان فيها بنات وهذا الشي ماتعودت عليه! .. الشي الثالث يشغلون موسيقى صاخبة وهذا يشعرني بعدم الارتياح!

زيادة على ذولي فيني homesick مشتاق للسعودية وللأهل وللكبسة والنواشف واكل البيت وحياتنا بالسعودية ونادي وقت اللياقة ااه بس
انا الحين مو مستقر للان ساكن بـ موتيل .. بس استنى الملحقية تنزل لي الراتب باذن الله مع انهم تاخرو علي حسبي الله ونعم الوكيل
على طول يصير انتقل عند عائلة .. واستقر .. وراح اشتريلي مكملات .. لكن المشكلة بالنادي! كيف اتغلب على الخجل وروح اتمرن معهم .؟

[الدب الروسي]

حط موضوعك بالاستفسارات و ابشر راح اجاوبك

[متعطش]

هو ماهو استفسار يتعلق بالمكملات او شي ..
موضوع عادي للنقاش

[هاوي كمال اجسام]

مبتعث و عندك و قت للنوادي !!!!!
ماشاء الله
موفق

[متعطش]

خخخخخخخخخخخ
النادي ماياخذ من يومك الا ساعة

[مشتاق للرياض]

اخوي اذكر فيه واحد طرح سؤال وجاوبت عليه قبل فتره مدري هل هو انت ولا لا!!
شكلك مالك خبره في المكملات والاكل والغذاء

عموماً بالعكس الحياه والاكل الصحي في امريكا اكثر ومتوفر بكثره انا لي اكثر من 3 سنوات في امريكا ومرتاح واشوف الاكل الصحي والمكملات الغذائيه متوفره بكثره هنا اكثر من السعوديه انت عشانك توك جديد ومتغير عليك الوضع تحس بالاحساس هذا اصبر لك 3 شهور وراح تتأقلم على الوضع وعلى الغربه عندك مطاعم كثيره صحيه صبوي تلقاه في كل مكان وفي كل جامعه وبنسبه للنوادي عندك نوادي حقت الجامعه اغلبها مجاناً للطلاب وفيه نوادي خاصه مايكون فيها بنات واختلاط وزعاج وفيه عندك سوبر ماركت الول مارت فيها كل شيء تبيه صدور دجاج خصروات فواكه وجبات خفيفه فيها بروتين يسمونها سناك تحياتي لك ودعواتك لي بأن الله يوفقني ويسر اموري

[متعطش]

الا لي خبرة بالمكملات والاكل وكل ابو شي ...
وادري ان امريكا يوجد بها الغذاء الصحي لكن تسويه انت بيتك مو اكل المطاعم ...

الا تقولي طيب النوادي الخاصة الي مافيها اختلاط وين احصلها ؟؟؟

[.hamad.]

الا تقولي طيب النوادي الخاصة الي مافيها اختلاط وين احصلها ؟؟؟

السلام عليكم

اعتقد الموضوع كله ينحصر بهذا الشيء وهذا سبب حذف موضوعك السابق

عموماً هاذي ماهي مشكله خطيرة والاختلاط نواجهه بكل مكان وكل دوله نروح لها

حتى فالشارع ..

انا بترك الموضوع للنقاش مثل ماتحب ولكن اتمنى يبقى الحوار فالحديث بأسلوب راقي ..

[ياضلوم]

يا بوي انا مثل حالتك ... هذا بس تغير عليك الجو .. صدقني شهر او شهرين بلكثير وراح تتعود ... انا قعدة اسبوع بدون نادي وبدون مكملات .. لكن الي يسال ما يضيع

حصلت لي gnc قريب .... ونادي قريب... وصب واي جمب البيت ... وش تبي اكثر من كذا ..ههههه ...انت دور وراح تلقى ... وبلنسبه للاختلاط هذا شي عادي

[Rashid.S]

مع اني مو مبتعث لكن راح أكلمك عن واحد من ربعي

يقول لي ان النوادي مره حلوه عندهم والوقت اللي يروحله بالأغلب يكون الجيم فاضي .. وذالك لانه مشترك بنادي 24 وما يروح الا بالليل ..
جرب ولا راح تخسر شي .. أشترك بنادي مثل كذا وتمرن بالليل قبل النوم بساعتين او ثلاث

[حسموو]

السلااام عليكم

انتا ليك اسبوع وطفشت وقرفت واشتقت!! طيب ايش رايك الي كمل سنة!! (انا :p)

المهم يالحبيب انا مستغرب منك تقول زحمة يمكن قصدك في الصباح الين المغرب فهذا شي طبيعي لانهم كلهم يتمرنو بدري بالنسبة ليا انا في كندا اروح الساعة 9 كدا يكون مراا الجو رااايق
وتاني شي انتا اكيد ساكن عند عيلة الله يعينك حتواجه مشكلة في الاكل والطبخ انا ساكن في شقة وكل الوجبات اسويها بنفسي حمدلله والنادي جمبي فل الفلك وبالنسبة للختلاط خل عنك يا رجل
حتقنعني انو مافي اختلاط ا لا في النادي مثلا :33: وبالنسبة للغاني تلاقي نوادي مافيها اغاني او انهم رايقين بس ما الومك اول الشهور تحس دا الاحساس بس ان شا الله تنقل شقة وتزبط اكلك وتمشي زي اللوووووز واحلى شي تطلب من بدي بلدنج وانتا مرتااح خخخخخخخخ لا تشيل هم ولا شي بس بطاقة ائتمانية والسلام وحمدلله رجعت وزني من 59 لي 65 وكولو مية مية بس حاليا عندي مشاكل مع الملحقية القلق والنفسية مو قد كدا

بالتوفيق:D

[go man.]

الله يعينك اخوي .. انا حصلت نادي بس يبعد مشي ٣٠ دقيقه لكن بشتري سيكل وبكذا اسخن جسمي وانا رايح للجيم.

بالنسبه للاكل انا قررررفانه وما حد يتخيل الوضع الا اذا جربه..

وبالنسبه للبنات يارجال هن بنات وانت رجال يعني انت رجال اكيد فهمتني. لاتستحي واحب اقولك ان هنا كل واحد عليه من نفسه يعني تخش وتطلع والله محد ينتبه ، وبعد سنه لو تساله انت عمرك شفتني بيقولك لا!!

وشفلك شقه او عيله لان الموتيل غالي عليك.. وبالاخير اذا بتبحث عن جيم بس روح لقوقل وابحث عن gym وحط خرايط وبتحصلهن ع الخريطه..

ولا تنسي ان الجيم هنا راح يكون اكثر كفايه من الي في السعوديه يعني لاتضيع الفرصه...

[humax2007]

بعد سنه لو تساله انت عمرك شفتني بيقولك لا!!

هههه صدقت بكل كلمه
يحسبهم نفس ربعنا من يدخل الصاله يلتفت يمين يسار ويشوف من الموجود ومن الغائب علشان يجلده

[ياضلوم]

ههههههههههههه

[|me|]

يالغلا بالنسبة للنوادي
ما فيه غير نوادي السكن الي تجي فاااضية دائماَ ومافيه موسيقى انت دور لك شقة قريبة من المعهد او الجامعة والجيم يصير قريب منك ويصير اطبخ في البيت وعال العال
بس عااااادي والله مالهم فيك هم كل واحد بحاله لا احراج ولا شيء والاختلاط في ككل مكان بس انت يبيلك كم شهر تتعود على الوضع
بالنسبة للاكل افادوك الشباب
لاكن انا مشكلتي من جد في الاكل :(
الطبخ مو قد كذا وسب واي ما يقصر بس انه بعيد شويتين

بالتوفيق :)

[shombeh]

السلام عليكم
الله يعينك اخوي اولا
بعدين ياخي ادخل الجم ولاتستحي من حد تمرن واذكر الله قبل لاتدخل وتوكل

[HONE]

راااح تتعود اخوي

[بو عزوز البصمان]

............

[بو عزوز البصمان]

بداية الله يوفقك يا رب بدراستك وترفع راسنا وراس ديرتك بالشهادة ويرجعك سالم غانم ,,

بالنسبة للزحمه , حاول تروح تلعب أول ما يفتح النادي , أو وقت متأخر شوي بالليل , بالعربي إبتعد عن الذروة واللي متعودين عليه ,


إقتباس من توقيع أحد الاعضاء ( جسدك عبارة عن لوحة فنية ترسمها وتشكلها كما تشاء من خلال التزامك بمنظومة تدريبية وغذائية سليمة وصحية
وفرشاة الرسم تعبر عن مدى دقة ومهارة تطبيقك لمتطلبات تلك المنظومة والجهد الذي تبذله ومع مرور الايام والاشهر والسنيين لتصل الى الجسد الذي
طالما كنت تحلم ان تملكه )

حطها بين عيــونك,
والله يوفقك يا رب وتوصل للي تبيه , أهم شي لا تنسى دينك وصلاتك وأخلاقك السعودية :p ,
وما اوصيك تبـلغنا شنو يصير معاك .

تقبل مروري