مرق شعوم

[Karazhan]

السلام عليكم

شلونكم وشخبارك اعضاء و عضوات المنتدى وكل الزوار الاعزاء

بالبدايه اعتذر عن كلامي اللي قلته ان ماراح اسوي سمك بعد اليوم الا لما اشوف طبخات ثانيه غير السمك مثل الدجاج واللحم و بعدين اذا حصل و عملت سمك احطه بالمنتدى , اعتقدت اني عمل المشوي والمطبق والمرق لكن اكتشفت ان المرق ماحطيته

و راح يكون هذا الطبق اخر الاطباق لهذا الموسم من الاسماك

عشان ما اطول عليكم اكثر بدخل بالتفاصيل , و ايضا قبل ما ادخل بالشغل راح اقولكم على شغله و هي اني راح احط الصور بالحجم الصغير واللي تضغط على الصوره عشان تكبرها , لأن الصور الكبيره سببت لي مشكله و ثقل بالتصفح وقام جهازي يعلق

لذلك قلت احطهم بالشكل الطبيعي واللي يحب يشوف اقرب يضغط على الصوره

و بسم الله نبدأ




357538

هني بدايه التنظيف . تتنظف السمكه من الخارج والداخل , يعني شيلو الصفط منها عشان راح تكون مرق , واذا شوي بس تنظيف من الداخل والخارج لأ عشان الصفط يكون الحمايه من النار على اللحم

نفس موضوع النقرور

-

357539

هذي خضرتنا و اهي خضره السمك عاده , شبنت و كزبره مفرومين واللي تشوفونهم بالسطل الاحمر , بصل و ثوم مفرومين بالخلاط وبعد اخراجهم منه حطينا طماط و فرمناه مع ما تبقى من البصل والثوم و بالاخير الزنجبيل مفروم بعد

-


357540

بهاراتنا , البهارات صوب الساعه 12 اهي بهارات سمك لكن العلبه تختلف واللون ايضا يختلف الظاهر بهارات سمك الاوربيين , الساعه 2 بهارات سمك المعروفه , الساعه 4 كركم , بالنص ملح مكان العقارب , الساعه 8 كزبره مطحونه , الساعه 9 ونص فلفل اسود مطحون

-

357541

الكزبره الخضره و الشبنت مفرومين

-

357542

الشعم و اهو يبتسم للكاميرا

-

357543

نخلط البهارات كلهم مع بعض و نتبل فيهم السمك من الخارج والداخل مثل ماتشوفون بالصوره

-

357544

نحط البصل والثوم والزنجبيل بالزيت و نحركهم لما يتداخلون ببعض , ترى الجدر كبير لكن الصوره ظالمته

-

357545

نضيف البهارات عليهم , تقريبا تقريبا ملعقه كبيره من كل نوع , بهار سمك , لومي , كزبره , فلفل اسود . ملح حسب الرغبه , مو كيفك يعني , لا حط ملح لكن ذوق وشوف قياس او لأ

-

357546

راح يطلعون بهذا الشكل , اوكي ياجماعه , خطوات سهله ومايبيلها شي

-

357547

نحط زيت بالمقله و نحط السمك فيها , يعني بذمتكم وين نحط السمك ؟ اكيد نحطه بالمقله اجل ليش حاطين زيت

نطبخ السمك على كل جهه تقريبا 4 الى 5 دقائق حسب قوه النار , لكن مو تكثرون طبخ لأن نبيهم 3 ارباع استواء بس والربع الاخير يكون بالمرق


راح نكمل معاكم في المشاركه القادمه , يعني السابقه ؟ اكيد القادمه

[Karazhan]

تأخرت شوي رحت مشوار طلعلي وانا احط الصور

المهم نكمل الموضوع وماتبقى منه

-

357548

بعد ما تداخل كل شي مع بعض حطيت الطماط المفروم , اللي ضربته بالخلاط

-

357549

حطيت 3 علب معجون طماط جاهز

-

357550

حطيت الخضره المفرومه فوقهم

-

357551

حطيت ماء نص الجدر تقريبا

-

357552

هني بالصوره هذي الهدف منها اوريكم حجم الجدر و حجم المكونات اللي حطيتهم عشان تعرفون شكثر من المقادير حطيت

-

357553

نشوف السمك ونقلبه كل ما استوى من جهه و مثل ماقلت 3 ارباع استواء بس

-

357554

شفتوا الصحن هذا , حطيت فيه كيس كامل صباره "تمر هندي" و ضفت ماء عليه تقريبا الى 3 ارباعه , و لما استخرجت العصاره و اخرجت البذر صبيت ربع الكميه على المرق و باقي ربعين او نص الصحن عشان اسوي صباره لوحدها

حطيت عليها كزبره مثل ماانتوا شايفين


357555

ثوم

357556

شويه من الخضره اللي تبقت

357557

الحين المرق قاعد تفوح , الحين جاهزه بس انا ما خلصتها ليش ؟

المفروض والطريقه المعروفه عندنا بمرق السمك , ان بعد مايفوح الجدر مثل اللي بالصوره , اوطي على النار اخر شي , يعني نار خفيفه جدا و احط السمك فيها

و مده 5 دقايق بس اسكر النار و اشيل الجدر و ينتهي الطبخ

لكن 2 من اصحابي دقوا علي وقالوا حنا جايين لا تاكلون انطرونا

اذا حطيت السمك راح يتقطع و تخترب الطبخه لأن بالكثير 5 دقايق من احط السمك بالمرق , لذلك عملت الآتي

-

357558

اطفيت النار و قعدت اشوف الطعم شلون اذا يحتاج شي مثل ملح او بهار

-

357559

عشان الشباب بالدرب و مايبي الاكل يبرد طلعت صحنين فرن , و حطيت الشعم فيهم مثل ما انتوا شايفين و صبيت عليهم المرق

-

357560

وهذا الصحن الثاني

357561

وهني الصحنين فيهم السمك والمرق عليهم

المفروض احط السمك بالجدر نفسه اللي مبين بالصوره اللي فوق و اتركه على نار هاديه 5 دقايق وبعدين احطهم بصحون التقديم لكن هذي الطريقه البديله و ماتفرق عن الطريقه التقليديه بأي شي ترى

-

357562

حطيتهم بالفرن مثل ماانتوا شايفين و نار هاديه اللي تحت بس

-

357563

هذا الزيت اللي قلينا السمك فيه

357564

اصفيه واصبه بالجدر

357565


هذا جدر العيش فيه زيت السمك و حطيت كركم عشان العيش يكون اصفر

357566
357567


الصورتين فوق العيش , بعد ما حطيته قعدت احركه على نار قويه و تركته يتشرب


-



نطلع فاصل و نواصل بعد

[Karazhan]

هم اعتذر لأن المنتدى مادري شفيه انقفل

المهم

هذي السلطه واللي مسويها اهو نفسه , بسميه ملك الزلاطه


357574

-


357575

هذا العيش الاصفر , كركم يعني عيش مكركم

-

357576

دقوا الشباب وقالوا احنا مطولين اكلوا و خشوا لنا , واللي عندي ذبحهم الجوع بعد فقررنا اننا بما ان حاطين صحنين فرن فيهم السمك , نطلع واحد لنا والثاني نخشه لهم

وهالصحن لنا

357577

اي هذا لنا بعد ما اخذنا سمكه زياده و انشلع راسها , بدون راس هالوين

357578

هذي المرقه نشربها على ما يجهزون الباقيين ويتجمعون

357579


هذا الشكل العام , بس الروب يمين و اللبن هذوله بالغلط جايبينهم , يعني احنا ما ناكل السمك مع روب او لبن او حليب والعلبه اللي يسار الروب هذي سمن




جذي نكون وصلنا واياكم الى نهايه التقرير , واتمنى اني وفقت بوضع 3 تقارير عن 3 طرق عمل السمك بالكويت , يعني اشهر 3 طرق نعملها بالسمك عندنا حطيتهم في 3 تقارير منفصله

واتمنى اني قدمتهم بالطريقه الصحيحه او الطريقه اللي اشوفها صحيحه


للأمانه : انا حطيت الصور بحجم صغير لأني حلمت اليوم حلم , طلعلي بالحلم كريس , اي كريس مغيره اللي معانا , وقالي فهد تدري ليش مواضيعك لما تدخلها تصير بطيئه ؟

قلت ليش ؟

قال لأن الصور بالحجم الكبير و عشان جذي يصير الموضوع ثقيل , وانا بعدل مواضيعك السابقه وبحط الصور بالحجم الصغير عشان يصير اسرع

انا قعدت من النوم و قلت بسويها , وفعلا اشوف الموضوع سلس وسريع ولا يهنق جهازي

فشكرا لكريس "اللي بالحلم" وشكرا لكريس "بالصج" عالوسام

وشكرا لكم اعزائي الاعضاء والزوار على مشاهدتكم لموضيعي المتواضع


---

الحين بنشوف طبخات غير السمك , لأن خلصنا من المشوي والمطبق والمرق


دمتم بود

[ام ابـراهيم]

الله يعطيك العافية مشكور على الطبخات إللي تقدمها.
أحسن لما وضعت صور صغيرة الحجم و تكون على الطبخة فقط .
شكرا مرة اخرى.