الجزء الثاني من ممنوع النشر من داخل مكتب زعيم عربي

[bravo4ever]

منـــــــــــــقول


ها هو سيادة الريس ومعاونه ( خيشة ) يطلون عليكم من جديد من خلال رحلة سيادته الى أمريكا والاعداد لها

ينقلها لكم مراسلكم ( فرفشة ) :

=== ما قبل رحلة سيادة الرئيس الى امريكا ====

سيادة الريس في مكتبه صباحا بصحبة معاونه يحتسي كوباً من الشاي باللبن و يتصفح الجرايد المحلية وما كتبته عن رحلة سيادته المرتقبة الى امريكا , وما تكتبه عن الدور القيادي والريادى لمصر في المنطقة

س. الريس : كدا كويس ,, العيال عاملين شغل هايل ,, ابقى خليهم يزودو الكتابة عن الريادة والقيادة هو احنا بنشقى ليه , غير عشان القيادة والريادة

المعاون : طبعا سيادتك ,, خصوصا بعد مبادرة البدوي اياه

س. الريس : آه والله فكرتني ,,, بعد مبادرته بسلامته شكلنا بقى وحش أوي ,, الراجل خلى رقبتي اد السمسمة ,,, انا عايز افكر في حاجة ترجع الأمور الى نصابها زي ما بيقول ابن مسعده

المعاون : سيادتك ,, انا فدماغي حاجه زي كده ,, بس يا ريت تعجب سيادتك

س.الريس ( مبتهجا ) : قول ,, قول ,, أنا من زمان وانا اقول الواد ده يجي منه ,, قول يا مدهول

المعاون : سيادتك ,, احنا نعلن مبادرة

س.الريس: ايوووه ,, مبادرة ازاي ؟؟

المعاون : مبادرة سلام ,, نجيب اتخنها جرنانجي فأمريكا ,, ونخليه يعمل معاك حديس صحفي

س.الريس ( يكاد يطير من الفرح ) : ايوه أهو ده الشغل ,, وإيه كمان ,, قول انا عارفك مصيبة مسيحة ,, قول
ِ
المعاون : وتعلن سيادتك مبادرة سلام زي ما عمل شيخ البدو اياه , وكده يبقى مافيش حد احسن من حد ,, ويا دار ما دخلك شر .

س.الريس(غاضبا ) : ايه ياله ,,انت فيه حد مسلطك علي ؟؟ مبادرة سلام ايه دي اللي حنعلها ؟؟ هو لعب عيال ؟؟ انت ما جربتش قبل كده الم رئيس جمهورية على أفاك ؟؟ دي آخرة اللي يشغل سواق نص نأل عنده , منك لله يا سوزان ,, تقول لي شغله عندك تكسب فيه سواب ,, ده واد لهلوبة وبيفهم في السياسة و يجي منه , طب أنا راضي زمتك ,, عمرك سمعت عن معاون رئيس جمهورية واسمه خيشه ,

المعاون : سيادتك ,, شغلانة النص نأل دي كانت زمان , واسمي لو كنت عاوز نغيره ,, نغيره ,,

س.الريس : انا لو ما كنتش بتفاءل بيك وباسمك كنت كرشتك من زمان ,,

س.الريس: المهم ,, انا فبالي مبادرة وحعلنها هنا ,, وأغني عليها فأمريكا

المعاون : مبادرة ايه سيادتك ؟؟

س.الريس: نعمل دعوة نجمع فيها شارون وعرفات في شرم الشيخ

المعاون : بس سيادتك ,, شارون ما تضمنش يوافق ولا لأ

س. الريس : يعني هو شارون كان وافق على مبادرة شيخ البدو ؟ أهي مبادرة ننفخ فيها ونكبرها ,, وأهي ترجعنا في الصورة تاني ,, ما هو البدوي واكل الجو كله اليومين دول .

المعاون : وهو كزلك يا ريس ,, مش عارف من غير سيادتك كنا حنعمل ايه

س.الريس : انا عايز أقرأ كلام جامد عن مبادرتي بتاعة شرم الشيخ , وعن زيارتي لأمريكا تنبه عالولاد في الأهرام والأخبار والجمهورية يشوفو شغلهم كويس

المعاون : وده كلام برضه يا ريس ,, تأكد سيادتك انك حتقرا كلام ما حصلش

المعاون : حنكتب ان امريكا واقفة على رجل مستنية زيارة سيادتك

المعاون : حنكتب اللي ما اتكتبش في لقاء بريجنيف وكارتر

المعاون : حنقول ان بوش مش جاي له نوم مستني سيادتك

المعاون: حنكتب ان العالم كله مستني نتائج زيارة سيادتك لأمريكا

س. الريس : ايوه كده ,, شايف ازاي بتفكر كويس لما تشيل حتة البلغة الي فـ دماغك

المعاون : أحلام سيادتك أوامر ,, وده مش كتير على سيادتك ,, أمال ايه ,, ده انت مصر ومصر انت ,, وانت الــ...

س. الريس ( مظأططاً ) : ايه ياله ,, انت حتغني لي ,, طب عملت ايه في أجندة أمريكا

المعاون : سيادتك احنا فـ أول يوم حنسرح على كام دايرة هناك , يعني وزارة الخارجية و..

س. الريس : ايه يا خيشة ,, اييييييه يا خبشة ,, هو احنا رايحين مولد ؟؟ دي الملافظ سعد يا خيشة ,, اسمها نعمل سلسلة لقاءات , مش نسرح .

المعاون : حاضر سيادتك احنا حنعمل سلسلة لقاءات نلم فيها من وزارة الخارجية والدفاع والكونجرس وكله,, معونة اقتصادية على معونة عسكرية على معونة الشتا ,, يعني من غير مقاطعة ,,, مش حنخلي

س.الريس: طيب , والأجندة بتاعة حرمنا المصون

المعاون : ما يكونش عند سيادتك أي فكرة , أجندة سيادتها معروفة , حتلف على كام دايرة هناك وتقول البؤين بتوعها فكام محاضرة أدام ستات أمريكا في الكونجرس وغيره , عن المرأة وعن انجازات سيادتها في مجال تحرير المرأة فمصر,, وأهي تلم هي الأخرى قرشين باسم المرأة وحقوق المرأة , وبالمرة تعمل لها شوية شوبنق

س.الريس : أيوه انا عايزك تتكا على حكاية اللم دي , وربنا ما يقطعش عنا معونة آدر يا كريم .

المعاون : سيادتك ,, طول ماحنا بنسمع الكلام ,, معونة امريكا لا حتغفى ولا تنام ..

=== الريس والوفد المرافق في الطائرة المقلة لسيادته والمتجهة الى واشنطون ====

المعاون يكلم المضيفة : يا مزمزيل ,, قولي للسواق ينزلنا فواشنطن ,,, وقولي له حاسب لحسن يلبس ( يصدم ) هناك في برج وهو نازل تبقى مصيبة ,, أصلها مش ناقصه

س.الريس : سواق ايه يا خيشة ,, دي طيارة بوينق مش عربية نص نأل ,, مش حتنسى شغلانة السواق ,,, كسفتنا الله يكسفك.

ووصل سيادته الى واشنطن بالسلامة والحمد لله وأجرى سيادته عدة لقاءات مع مسؤولي الادارة الأمريكية ( ولمو كويس أوي ) كما أجرى سيادته عدة لقاءات مع تلفزيونات وصحف أمريكية ( لزوم الريادة والقيادة ) وكللت الرحلة بالنجاح ,,


== في الطائرة الريس ومعاونه ,, رحلة العودة الى القاهرة ===

المعاون : انا شايف سيادتك متدايق حبتين ,, خير كفى الله الشر

الريس : اقول ايه ولا ايه يا خيشة ,, ابن العبيطة بوش

المعاون : ما له الزفت بوش ؟؟ سيادتك

س.الريس: مش كفاية لاطعني يومين ما قابلنيش ,, يجي السكرتير بتاعه ويقول لي مقابلتك لبوش مش حتزيد عن اربعين دقيقة ,, قال ايه ,, وقت سيادته ما يسمحش بأكتر من كده ,, ليه ؟؟ هو حيقابل صبي ميكانيكي ؟؟ مانا رئيس جمهوية برضه .

المعاون : سيادتك ما تاخدش فبالك ,, هو كده البروتوكول عندهم

س.الريس : بروتوكول ايه وهباب ايه ,, يعني تجي لحد عندي وتبقى بروتوكول ,, ما هو البدوي لما راح عندهم قبل كام سنة , عملوا له هوليله ,, كلنتن كان ناقص يطلع له فرقة حسب الله

المعاون : ياريس ,, الهوليلة دي عشان البدوي دوكها بيروح هناك ويدفع ,, واحنا بنروح عشان نقبض ,, واهو احنا قبضنا والحمد لله

الريس : ويا ريت جت على أد كده يا خيشة ,, أما قعدت معاه ,, أقول له المعونة ,, يقول لي الارهابيين ,, اقول له يا مستر برزدنت الحالة مأشفرة أوي ,, يقول حنسحب الجنود بتوعنا من سينا ,, اقوله ارجوك بلاش تسحبوا الألف جندي أمريكي من سينا ,, دول زي ولادنا ,, وواكلين معانا عيش وملح من عشرين سنة ,, يروح يكلمني عن مبادرة البدوي اياه ,, اقول له الجنيه واقع و متنيل بستين نيلة والحالة ناشفة ,,, يقول لي الأقباط

الريس: أقباط ايه دول اللي زالني بيهم ,, هم كانو من بقية أهله ابن الكلب ,, مش كفاية موقف لي غفير فمصر بيراقب تصرفاتنا مع الأقباط

المعاون : سيادتك , الحمد لله ان الاقباط المرة دي ما عملوش مظاهرات في امريكا زي عادتهم

س.الريس: يعملوا مظاهرات ليه ,, وزير وعينا وزير منهم ,, كنايس وخليناهم يبنوا
كنايس ,, ده حتى الشعراوي كتمنا صوته في التلفزيون لما يقول ولا الضالين ,, عايزين ايه اكتر من كده ,, مش ناقص غير يقولوا شيل المفتي وحط لنا بداله البابا شنودة

المعاون : ما تزعلش روحك يا ريس ,, أهم حاجة الأخضر (الدولار ) أهو معانا ومدفينا

س.الريس : على رأيك ,,, هي شنطة الفلوس فين ؟؟

المعاون : أهي معايا يا ريس , مكلبش فيها

س. الريس : طيب يا خيشة افتح الشنطة و عد ,, بس أوعى تخنصر حاجة مانا عارفك نتن من يومك

المعاون : خدت منهم بس عشر أساتك ( آلاف ) عشان الولاد وأمهم ,, لزوم الفرفشة

س. الريس: فكرتني والله بالواد فرفشة ,, هو فين ؟؟

المعاون : أهو متلقح ورانا قاعد بيكتب .

س. الريس: واد يا فرفشة ,,, تعالا هنا ياله ,, قاعد بتلبخ بتكتب إيه .

فرفشة : .............. تشششششششششش ( برضه معطو الفيش )

[Tamara]

ههههههههههههههههههههههههههههههههههههههههههه

ملعوبه صح هههههههههه

عنجد كان بضحك في المقابلات عالي عملوها هون عنجد مسخره

[SHADEN]

الريس : ويا ريت جت على أد كده يا خيشة ,, أما قعدت معاه ,, أقول له المعونة ,, يقول لي الارهابيين ,, اقول له يا مستر برزدنت الحالة مأشفرة أوي ,, يقول حنسحب الجنود بتوعنا من سينا ,, اقوله ارجوك بلاش تسحبوا الألف جندي أمريكي من سينا ,, دول زي ولادنا ,, وواكلين معانا عيش وملح من عشرين سنة ,, يروح يكلمني عن مبادرة البدوي اياه ,, اقول له الجنيه واقع و متنيل بستين نيلة والحالة ناشفة ,,, يقول لي الأقباط

الريس: أقباط ايه دول اللي زالني بيهم ,, هم كانو من بقية أهله ابن الكلب ,, مش كفاية موقف لي غفير فمصر بيراقب تصرفاتنا مع الأقباط
.........................................
:D :D :D :p :p ;-) ;-) ;-) ;-) ;-) ;)
رهيييييييييييييييييب