قصه عجوز

[mzar3aranb]

قعدت بالحوش ومددت كرعاني وبجنبي دوده مربوطه ..

لأن عندي بعيد عنكم وعن السامعين الرماتزن

والدختور قالي لازم تحمسني الشمس حمسا قويا تسل يوم لدقائق مع دوده ...

المهم الا ويعجون الورعان ويجي واحد عندي ...

جده جده .. قلت : سم يا جنيني ..

قال أبي عشرت أريل أبي أشتري .. فش فاش ..

قلت : يا بعد تسبدي .. وأمد يدي للخزانه الكائنه عند صدري ..

وأطلع له عشرة أريل ممزوجه بالعرق ..

وكانت صورة الملك حاطة ايده على خشمها

المهم بخرت العشرة أريل عشان الصورة ترجع ايدها ولا يتهمونن بالتزوير ..

خذاها دحيم وقحص ...

وجاب كرتون تقل كرتون قرصان .. ومكتوب علي فش فاش .. ومعه قوطيين ببس ..

المهم جا وقعد جنبي .. وفك التسرتون ...

وطلع هاك الباغه الحمر ..

وفتسه وبدا ياكل وقحن عليه ببس ..

قلت له ..

دحيم ياملا المرير اللي يمر تسبدك .. ورى ما تباشر على اللي عندك ...

جده ماحولي احد غيرك

قلت .. ايه .. ليه انا طاقعه (الله يكرمكم ) بالمسجد ؟؟

ويقرب دحيم الكرتون ... ونتقابل انا وياه عليه الين مصينا دمه ودسمه ..

يازين طعمه ... يتهفش تهفش ...

أول ما تحطه بسعابليك يذوب .. ايه الله يرحمك يا حديب .. ليتك قبل ما مت ذقت هالفش فاش ..

واقعد اماطق والحس مصابعي ... بسم الله غدت كنه حنى ما نقع لونه ...

المهم واعقبه بالببس ...

وبعدين قلت الحين ابمدد لي شوي ...

واروح عند السلجه وافرش سجيديدتي واتلطم بشيلتي

وععع والله انغلثت من ريحته ...

المهم حطيت مشبك غسيل على خيشومي وتلطمت ودقها نومه

اي ... وش ذا ... اح .. وجع ببطني تسنه سكين تطوعني تطعين ..

واقعد على حيلي واتحسس تسلوتي ...



اي يمه الحقيني ...

يا ابو حديب .. واويلي ويلاه اشهد ان لا اله الا الله ...

جاتس الموت يا مرة حديب ... ياويلي ويلاه ما بعدك ما تهنيت بشبابي ...

الحقوني يا عييلي ..

وانفرط الكونترول عندي .. وبدت ينابيع تسيل من الامام والخلف .. (من الذراقه اللي فيني )

الحقوووووني .. بعععع

ويجي ابو دحيم وهو يعدل صراويله وخشته وارمه ...

يمه وش فيتس الله يهديس ...

قلت الحقني يا جنيني بموت ..

الا ويوم غبت عن الوعي ( غبت عن الوعي هههه ما تركب الا على هند رستم )

واطيح زي اللوح ...

المهم اختبصوا أهل البيت ودقوا على 911 وجوا من امريكه

وخذوني انا وعييلي ..

المهم وصلنا لليونايتت ستيت ..

وبدوا يحللون لي الله لا يحلهم ولا يبيحهم ...

شفطوا مني هالدمان والـ ؟؟؟؟؟ (اللي يجي لما نشرب مويه كثير ) ... وغلوا فيني لين تفلت العافيه

قال الدختور توم كروز : أبد هادا انتا فيه مراره ...

قلت انا قايله ان اللي فيني مر .. وقطعة مره مع حلتيته تروحه ...

قال الدختور نيكولاس كيج : لأ لأ لأ مدام ..

هادا مرارا مو مر .. هادا تهت كبد مو جوا كبد ..

المهم وش السواة يعني ؟؟ قلتها بكل هنجعيه .. (وشي الهنجعيه )

قال د. توم .. قال يأني نبي نشعط جلدتس . ونقلع المرار قلعة وادرين ...

قلت ايه هين تمشعون جلدي ... انا توني ما اعرست ..



المهم كلم جوليا روبرتس وقاله بكلمات الاشاره (مادرا المسيكين اني متابعه جرح الزمن )

غزيها ببنج .. وغزوا البنج فيني وسوا لي العمليه ..

صحيت من البنج ورددت .. أنا فين ؟؟ (على العازه فاطن حمامه ) ...

قال لي د. نيكولس انت في ايد امينه ..

قلت وش ودان لدواجن الوطنيه ؟؟؟

قال د. نيك (اسم الدلع لنيكولاس .. صرت امون عليه الحين وتراه على فكره يسلم عليتس يا ليدي عمشا ويسألس اذا بتروحين لعزيمة البارون مناحي )

المهم بعد ان اطمأنوا على صحتي طلعوا وخلونن لحالي ..

قعدت أتأمل الغرفه ...

أنواع الاثاث المفتخر اللي ما تشوفونه الا بالأفلام ... ولقيتهم غاسلين شيلتي ومبخرينها وحاطين جنبه تولة دهن عود ...

قمت من السرير ... كديت شوشتي وجدلت قناصيعي ...

وطبعا ما لقيت كريم اهبط فيه شياطينه قمت نخمت بايدي ومسيت شعري ...

المهم قلت خلني اتمشى بهالمستشفى ...

طلعت برا والشيله بيدي ... شفتهم كلهم ايزي ...

قمت قلت عشان ما يشكون فيني خلني اطلع تسذا ...

المهم مشيت منا ومناك ... الين وصلت قسم الطوارىء كانت الساعه حول 2 بالليل ...

لقيت سماعه مجدوعه على الكنب خذيتها وحاولت ادخلها باذوني بس الشمع ساد طريقها

قمت علقتها زي الافلام ..

ولقيت كوت ابيض مجدوع (لاب كوت بس ما كنت ادري انه لاب كوت ) ...

ولبسته اتقاء للبرد ... المهم قعدت في الاستراحه مكتوب عليه
( THE DOCTORS راحهS.T

واقعد هناك واقعد اتفرج بهاك المجلات اللي خلت عيوني تسذا

واتعوذ من ابليس وارجعها واقعد استغفر ربي ..

وي وي وي ... وش ذا

صوت اسعاف .. واجي اخذ كمام واحطه على خشتي ...

خفت الجرح يستشم ...

الا هاك الممرضه المرجوجه اللي تقول (DOC. we need help )

المهم انا ما اعرف الا تسلمتين وهي يس و نو واوكي (اخبرهم ثنتين )

قلت له اوكي .. وتجي تسحبن من ايدي ..

ويدخلوني على ذيك العبده اللي بطنه وارم وتصايح هيلب مي دوك .. بليز ... اوه ماي قود

وانا بفطانتي عرفت انها تبي تولد ...

قلت جاك يا عبيد ما تمنى ..

قلت لطاقم التمريض ... يالله سموا ..

ويلبسوني القفازات .. ويعدلون كمامتي ...

قلت جهزولي ما حار ...

قالت الممرضه : وشو ؟؟ وشوله ؟؟؟

قلت أجل كيف أقطع السر ؟؟

قالت : اتس اوكي وراحت تجيبه ...

ودخلنا برنامج ولادة الفيله ..

أنواع ال؟؟؟؟ والمماغط وانا بهاالمحاولات ..



وهالخال عيا لا يطلع ..

يا دكتوره الحقينا الضغط انخفض مره .. قالته الممرضه الذروق ..

قلت يا ملا الوجع جيبي شوية ملح .. وجابت ملح ساسا وكبيته بفم العبيده ...

وبدا يرجع الضغط لطبيعته ..

المهم .. حاولت حاولت وعيا يطلع هالولد ..
وش السواة ؟؟؟



قلت : لقيتها وانا مرة حديب ...
واجي اوقف عند باب بيت الخال اللي ببطن العبيد ..

قلت له يالخال ..

يا العبيد ... يا قطار الليل

الا بسم الله يطلع لي زي الرصاصه ويمسكن من خانقي ..

قال وش قلتي ...

قلت .. أبد سلامتك يالحبيب ..

يوم يتذكر انه توه طالع من بطن امه ويقعد يصايح واء واء ...

قام كل اللي بالغرفه يصفق لي ..

ووووه وندرفل دووووختور ...

قلت ما عليكم زود ...

وها انا الان اعمل في اكبر مستشفيات اليونايتد ستيت

والفضل يعود لقرطاسة فش فاش ...