الطفولة البريئة لدحيم

[المحتزم]

أهلين منذ مبطي ماكتبت موضوع

خبركم لازم نسوي مشغولين ومهمين هع
اليوم بقول لكم عن الطفولة البريئة لدحيم

خلكم معنا

=====

دحيّم شاب مكافح كان منذ ولادته وهو يجاهد

يوم ان كان توه بزر كانت فيه حبة خال وبركبته ومن يومه صغير وهو قليل حياء يعرف ان البنات يحبن الوسامة

عشان كذا كان يبرز مفاتنه عشان كذا كان يلبس هيلاهوب برتقالي شفاف عشان تبين حبة الخال وتعطي منظر

ولأجل هدفه كان يتحمل كل ذبات عيال حارته

خاصة سعيّد أبو ضروس اللي مايناديه إلا المارج

كان دحيم يلتفت عليه بنص نظرة ويقول :

وإذا كانت النفوس كبارا ... تعبت في مرادها حبات الخال اللي بالركبة

عاد هو يقولها من هنا وسعيّد يسقطه بالزبالة من جهة

كبر دحيم وكبر طموحه معه وهو أن يعيش في عالم من حبات الخال اللي بالركبة ( مهوب عاقل كانتونا )

وعشان يطلع حبة الخال قرر يتجه للمصارعة عشان يلبس لبس يطلع ركبته

وفي يوم من الايام ودحيم كان ذاهب بالنقل الجماعي لأشيقر لمقابلة نجم حلبات المصارعة الدولية الترابية

ابوعيون

على كأس جزر القمر

ركب دحيم وهو يتخيل انه داخل للحلبة ومعه ضب رابطه بسلسلة على طرف الحلبة ( عامود الكهرب )

وهو داخل ومعه علم شقراء ويسمع التصفيق والصراخ وواحد كاتب دحيمون حتى الموت وجماهير واجد راسمين ركبة وفيها حبة خال

وهو يتخيل مادري إلا يوم لفعه واحد ببكت دخان وهو يقول له : ياابو الشباب خلك معنا ترانا اختطفنا الاتوبيس اي حركة حضرب في المليان

عاد دحيم بكل رباطة جأش قال : يابعد عمري انت والله عطنا ولاعة طيب واوقع لك ماعرفتني انا جيمي سوبر دحيم الطائر

قال ذاك اقول لك حنا مختطفين النقل يعني بي ناخذكم رهائن حتى تلبي الجهات طلباتنا وإلا كل دقيقة نبي نذبح واحد

قال دحيم : يوووه هذا انتم يالشباب مالكم داعي من جد مراهقين ماغير همكم مناظر افلام وتطبيقها

اكبروا يامال الوجع

الرجال : ياابن الناس اقول لك مختطفينكم حنا وش افلامه انت تكفى اعقل وخف خلنا نحس اننا مختطفين ناس

وش هالحظ اللي طيحنا بك

وإلا من قرادة الحظ ماقسم الله نختطف إلا هالاتوبيس اللي مافيه إلا أنت

يوم رفع راسه دحيم ويناظر الا مافيه إلا هو بالاتوبيس

يوم جلس يضحك وقال : وانا مسوي فيها مستحي ومغطي ركبتي

الله يرجكم ليه ماعلمتوني

ويفصخ سروال السنة وإلا عليه شورت برتقالي ( مشكلةاللي يحب لون زي واحد من العيال يحب الموف كل شي عنده موف لو يحصل له يصبغ ضروسه موف ماقال لا )

يوم شاف الحرامي ركبة ذاك وقال بصوت عالي : يؤ يؤ يؤ دحيم المارج

يوم قام دحيم : وقال بصوت عالي لالالالا مااصدق سعيّد أبو ضروس ويقوم ويحضنون بعض

ويطقونها سواليف
وينك يااخي اشتقت لك

ودحيم يقول : ياااااه تصدق اشتقت للزبالة

وسعيّد يقول : وشلونك يالمارج ياحبي لك يااخي

.. وش تشرب ؟

دحيم: ابد والله سلامتك ابي بس توصلوني لاشيقر لاتفوتني المباراة لايقولون خاف بعد

يوم تذكر سعيّد انه مختطف النقل ويقول بصوت عالي : اقعد لاأضرب في المليان انتبه ترانا مجرمين ومجهولين الهوية ولو ماجلست ترى نبي نعدمك

دحيم : أفا سعيد ماعندك انت وطنية ولاتشجع السعودة يااخي خلني اروح اجلد ذا الاوشيقري حرام عليك هذي فرصة العمر

هذا طموحي طول عمري ان البنات يشوفون ركبتي بالتلفزيون

لاتقتل طموحي يااخي حرام عليك

سعيّد : عاد الحين انت حسوفة الواحد يذبحك ويسوي فيك جريمة اعقل بس وش ابي بك بس لازم نهددهم

دحيم: إييييييه قل كذا الله يرجك بس احسبك تبي تذبحني خبرك شكلك مليت من الزبايل

ماعلينا خلنا نسوي اكشن شوي

وش رايك ؟

سعيّد :

دحيم : شف ياابو ضروس طلع راسي مع الدريشة ودق لطمة وقل بتلبون مطالبنا وإلا نذبح هذا النجم

ترى حنا جادين

سعيد : تصدق انك منتب سهل والله عليك حركات وش رايك تصير معي فريق

دحيم : ابو ضروس محشش انت طيب من نختطف : ؟؟؟

سعيد : اي والله صح اقعد مكانك وإلا حضرب في المليان

دحيم : اقووووووووول اهجد بس ذبحتنا يا ظلال فريد شوقي

.... جاء رئيس الرئاسة العامة لتعليم البنات ( ماكان إلا هو موجود والباقين بإجازة... لكن الضعيف حق تعليم البنات تالينه مع رقبته عاد من حين النفس شينه عليه )

وقال : يامختطف وش طلباتك

وينط سعيد ويقول : اسمي سعيد وبيتنا ... يوم جره بقوة دحيم وقال خبل انت تقول اسمك وبيتك وشوله اجل متلطم ومخفي شخصيتك

يوم سوى فيها ذيب سعيد : قال لايكون صدقت ان اسمي سعيد ترى هذا اسم حركي اموه عليكم يارخوم

قال طيب وش تبي بالضبط انت ؟

سعيد : ابيكم تسددون جوالي والثابت ذبحونا هالاتصالات ماغير فواتير لا ومسوين لي فيها منزلين تخفيض وهم من جنبها

الرئيس : يااخوي ترانا مخفضين لكم هذي ثاني مرة نخفض لك

(( ماكن المرشد قط مع الاتصالات ))

سعيد : ياحبيب اي تخفيضات حنا ترى الساعة عند غيرنا ارخص منالدقيقة عندنا

(( ياحبي لسعيّد مايعرف يفقشها ))

قال : خلاص انا اسدد عنك فاتورتك بس فكنا من شرك الحين خلنا نخلص من حقين 31

قال سعيد خلاص يالله خذ حساب لي بفرانكفورت حط فيه 1500 ريال

وحساب بكوالالمبور ولاتحط فيه شي

الرئيس : سعيد ليه تعطيني اياه دامك ماتبينا نحط فيه شي

سعيّد :هاهاهاها ضحكتني انت ووجهك ماتمشي علي حركاتك عشان أعطيكم حساب وواحد وتحجرون لي

الرئيس : طيب طيب على امرك

طيب تم وغيره ؟؟؟

سعيد :ابي هيلكوبتر ينزلنا على حلبة اشيقر ابيه إنزال سينمائي

الرئيس : طيب وهو كذلك الحين عن اذنك عندي مؤتمر عشان اقول اني حليت المشكلة غدي هالناس تنسى سالفة حريق 31

(( اما حريق 31 غطى على مخرج 13 ))

جابوا لهم هيلكوبتر ويدق عاد دحيم على منظم الحفلة بيجر ويدخل 31 ((على الموضة هالأيام ))

ويدق ذاك على جوال الطيار ويقوله دحيم انا بجي بإنزال سينمائي حركة تولموا

...... يجي المقدم ويقدم ابو عيون ويوم شاف تقل هليكوبتر ويجي يقدم دحيم مادروا إلا دحيم لابسن سروال سنه وفنيلة الهلال مكتوب عليها

( سفاري ...ولا للمخدرات )

وطاب ببرشوت

ويوم قرب يوصل للحلبة ويفصخ السروال السنة ويخلي عليه سروال القطن يوم اغمي على نص اللي بالحلبة ويجي طاير ويطب بالحلبة ويجي طاير ويستلم المنظم سوبليكس خلفي

ويجي عاد ابو عيون ويعد على المنظم .. واحد .. ثنين .. ثلاثة ..

ويفوز دحيم ويجيك ابو عيون الدبشة ويعطيه الحزام

عاد دحيم عاد يجيك طاير ويجيب الضب حقه اللي ربطه بكفر الهليكوبتر ويرفع فوق يوم تسدحوا اللي توهم صاحين
(( ودك مساكين البشر مايحضرون مصارعة ))

ويجي عاد دحيم ويدق على جوال الطيار وإلا هو انتظار ويشب عليه يدق ويسكر يزعجه (( حركات أهل الشفاء ))

يوم رد سعيد قال وش تبي

دحيم : من معك انتظار ؟؟؟

سعيد : كنت اكلم فرانكفورت أتأكد انهم دخلوا الالف وخمس ودقيت على الثاني وتاكدت ان ذاك مافيه شي لايجلسون يستهبلون خبرك الاحتياط واجب

دحيم : واجب وإلا مشاركة هع

سعيد : طيب وش تبي ياجيم كاري البديعة

دحيم : أبد جازت لي سالفة الإنزال ودي تجي وتاخذني مرتن ثانية وش قلت

سعيد : طيب طيب تولم بس عاد خل الحركة على طريقتي انت ارفع يدينك كذا وماعليك

ويجيك سعيد مسفح بالهيلوكبتر طاير ويضف دحيم ويتعلق الضب بصدر دحيم وشوي وينزل للبطن وشوي وينزل لل(...)

ويطلق يديه يبي يوخر الضب عن ذاك وذاك يوم طاح من الهليكوبتر وإلا يطيح على المنظم اللي توه صاحي

يوم تسدحوا الجماهير يحسبون الحركة مقصودة

ويعرضونها من قوة الحركة بالاخبار الاقتصادية وبنشرة الاحوال الجوية

لكن دحيم يوم شاف اللقطة خنقته العبرة وضايق صدره

توقعوا ليش ؟؟؟






لان حبة الخال اللي بالركبة ماطلعت
:D :D ;)