mzar3aranb
10-04-2002, 06:40 PM
عبدالعزيز بن فهد عطاني مليون ريال
بسم الله الرحمن الرحيم
صليت التراويح ودخلت البيت أبي أتقهوى ورن التلفون ورد الولد ونادان يبه فيه واحد اسمه العساف يبيك على التلفون شرقت ببيالة الشاهي وطاح قلبي بين رجليني وعرقت واصفر وجهي واحمر واخضر
قالت حرمتي : هوه وشفيك تغير لونك
قلت : تدرين منه العساف هذا وزير المالية ما أدري وش يبي مني
قالت : أنت حاكي عن الميزانيه بالعزيمه أمس
قلت : أبد والله ولا جبت طاري الميزانيه
أخذت السماعه وأنا أتنافض
قال : أنت مكسور الخاطر
قلت : نعم من معي
قال : معك العساف
وعلى طول قاطعته ماخليته يكمل قلت : والله العظيم ما قلت عن الميزانيه أي شي وترى الميزانيه هالسنه ممتازه وتراكم سويتو خير يوم سددتو الديون الخارجية بفائض الإيرادات وتراي ما ألومكم أنا حاس بالدين الدين هم بالليل وذل بالنهار وهم الضرس ولا هم العرس وقمت أخبص بالأمثال من غير شعور .
وقاطعني وقال : أنت وراك قمت تشخمط وش ميزانيته اللي قاعد تكلم عنها .
قلت : منتب وزير الماليه
قال : لا ياشيخ أنا العساف السكرتير الخاص للأمير عبدالعزيز بن فهد
وزادت النفاضه واشتغل جسمي على الهزاز وقامت السماعه تصفق بذني من رجفة القلب
قلت بصوت مبحوح : أكيد انك غلطان بالرقم الرجاء التأكد من الرقم الصحيح وشكراً
قال : منتب مكسور الخاطر
قلت : بصلاة أمي وابوي أني ما سويت شي وجعل كيبوردي للكسر وجعل جهازي للفيروس الي مايخليه يشتغل أبد أني ما قد كتبت بالساحة السياسية .
قال : يابن الحلال وش كيبورده يا أخي مر علينا عندنا لك شيك بقيمة مليون ريال من الأمير عبدالعزيز بن فهد أحولت عيوني وقمت أضحك وحرمتي تسمي علي .
قلت : بس مليون وشلون أنا مقدم على الأمير مبلغ مئة ألف ريال لتحسين وضع الديانه الي يطلبونن وش جاب هالصفر الزايد أكيد غلطانين ( واحد عنده ذمه ) .
قال : وشف فيك أنت هذا الشيك قدامي فيه مليون ريال تبيه والا ….
قاطعته وقلت : الا أبيه وسلم لي على ابوفهد وقله كثر الله خيرك تعطي أكثر والله يكثر أصفارك ألي على اليمين ويبعد عنك الحساد قولو أمين يا عيالي ونحمد الله جت على ما نتمنى وحطيت السماعه وقمت أعرض واضحك وعيالي يصيحون وش جاك يبه .
وجلست معهم وقصيت عليهم قصة المكالمه وطلعت مواهب العيال بالرياضيات الحديث والقديمه وقمنا نحسب المليون كم فيه من ألف والصغارين يحسبون كم فيه من ريال ، وقسمنا المليون تسديد ديون شراء بيت و غوايش وطقم للمعزبه تعويض عن ألي بعناه وقت الأزمات وأم العيال ماش كنه ضايق صدره .
قلت : وش السالفه يا أم عيالي عسى ماشر
قالت : والله يا مكسور صرت مليونير وأخاف تعرس علي
قلت : تطمني وحطي في بطنس جحه من جح السر أنا ناقص
نط الولد وقال : يبه عندي فكره ولا ما نشري كامري ( مسكين يحسب أن الكامري أحسن موتر )
سهرنا أنا والعيال نحمع ونكسر ويوم جاء الصبح و مير أشخص بثوب العيد والشماخ الجديد ابو ثلاث بصمات لا يفوتكم صار بتسعين ريال ورحت واستلمت الشيك ودعيت لبو فهد مفرج هموم المديونين وباني المراكز الإسلامية والمساجد في أنحاء العالم صراحه يستاهل الملايين ما شاء الله عليك الله لا يغير عليك .
وطيران على البنك وأمسك هاك السرى بالبنك قروي أول مره يصرف شيك بمليون والشيك صاك عليه بيديني الثنتين كني صايد لي جراده وخايف تطير ،
ويوم وصلني السرى أخذ السوداني الشيك ناظر الشيك ورفع راسه وقزني من ورى النظاره بصراحه خفت منه وأخذ الشيك وقال لي ممكن دقيقه ياطويل العمر لأول مره واحد يقول لي ياطويل العمر قلت تفضل خذ راحك بس لا تبطي علي وبعد برهة من الزمن ( حلوه هالجمله ) جاء مدير البنك وقال لي تفضل يا طويل العمر إلى مكتبي ألي مثلك ما يمسك سرى .
قلت بكل تواضع : لا أبداً إذا لم أمسك سرى بالبنك ما أحس أني داخل بنك .
حلف علي وبغى يطلق
قلت : خلاص بس عجل علي ترى مابقى من الوقت الا ربع ساعه
قال : وش عليه هالربع ساعه
قلت : أنا قايل لعيالي إذا ما جيت بعد ساعه ونصف من البنك بلغو الشرطه والدفاع المدني
قال : وش رايك نفتح لك حساب
قلت : لا لا أبغى كاش ( بيني وبينكم أخاف أحط القروش في الحساب يفلس البنك ويطلع راعي البنك صك إعسار وأروح فيها )
وأخذت المليون من أمهات خمسميه بس هذا المليون وأنا جايب معي خيشه عديته عنده وطيران على البيت ,اعلنت حالة الطواري بالبيت ممنوع الخروج أو الدخول من المنزل أو إلى المنزل يمنع منعاً باتاً إستقبال أي ضيف قطع الإتصالات الهاتفية حتى لا يتسرب خبر المليون .
ويوم صليت العشاء طيران على شمال الرياض أدور بيت وأفتك من الشفا وزحماته لقيت هاك المكتب لو ما عليه لوحه مكتب للعقارات ماصدقت أنه مكتب حشا هذا فله دخلت المكتب واثره مجمع تجار عرفت انهم تجار بكروشهم قام صاحب المكتب واستقبلني وصبولي هاك الشاهي المنعنع حطيت البياله مسوي ثقل .
قال : أمر طال عمرك
قلت : أبد ما يامر عليك عدو أبي فله
قال : بأي منطقه تبغى
قلت : أي مكان أهم شي بالشمال ( واحد متعقد من جنوب الرياض يبي الفكه من ريحة المجاري والمحرقه )
قال : كم حدك
قلت : هالخمس ( طارت عيون الجالسين )
قال : عندي لك قصر ثلاثة آلاف متر
قلت : لا كبير علينا أكيد فيه حوشه وحنا ما عندنا خدامه تكنس وتغسل
يوم قلت هالكلام كنه تغير وجهه وقال كم قلت لي حدود المبلغ الي عندك قلت خمسمائة ألف ريال
قال : يا أخي مضيع وقتنا على خمسمائة ألف ريال ما تستحي على روحك وقاعد تقهوى بعد وأخذ البياله وصبه بالترمس ومسك يدي وطلع بي عند الباب .
قال : عندي لك حي تشتر أحسن فله بهالحي بخمسمائة ألف ريال .
قلت : وشو
قال : الفيصليه
قلت : لا يا خوي ما تصلح على شارع خطر على طريق الملك فهد ولا به حوش يلعبون البزران بالسياكل
قال وهو حمقان : يا أخي ما أقصد عمارة الفيصليه أقصد حي الفيصليه
قلت : احترم نفسك شكلك ما تدري إني من سكان الشفا ( سكان الشفا مشهورين بعصبيتهم الزايده من الزحمات وقلة الأرصفة والإنارة وريحة المحرقه الله يكافي )
وطلعت مكسور الخاطر ورحت مكتب عقار بالشفا يوم درو إني أبي فله بحدود خمسمائة ألف صبو لي الشاهي والقهوه ويوم تقهويت رحنا شفنا هاك الفله الحلوه وأخذت المفتاح ، ومريت عيالي أبوريهم الفله …….. إلا والحرمه تحط الكماده على راسي وتقول لي وشفيك يامكسور الخاطر نايم وعيونك مفتحه الله لا يعيد هالفول ألي أكلته على الفطور ما خبرنا أحد يفطر على فول برمضان لا وبعد ملحقه بادية محلبيه وكاس لبن …… وأثر الدعوى كله هاجـــــــــــوس لعبي الفول لعب ……
بسم الله الرحمن الرحيم
صليت التراويح ودخلت البيت أبي أتقهوى ورن التلفون ورد الولد ونادان يبه فيه واحد اسمه العساف يبيك على التلفون شرقت ببيالة الشاهي وطاح قلبي بين رجليني وعرقت واصفر وجهي واحمر واخضر
قالت حرمتي : هوه وشفيك تغير لونك
قلت : تدرين منه العساف هذا وزير المالية ما أدري وش يبي مني
قالت : أنت حاكي عن الميزانيه بالعزيمه أمس
قلت : أبد والله ولا جبت طاري الميزانيه
أخذت السماعه وأنا أتنافض
قال : أنت مكسور الخاطر
قلت : نعم من معي
قال : معك العساف
وعلى طول قاطعته ماخليته يكمل قلت : والله العظيم ما قلت عن الميزانيه أي شي وترى الميزانيه هالسنه ممتازه وتراكم سويتو خير يوم سددتو الديون الخارجية بفائض الإيرادات وتراي ما ألومكم أنا حاس بالدين الدين هم بالليل وذل بالنهار وهم الضرس ولا هم العرس وقمت أخبص بالأمثال من غير شعور .
وقاطعني وقال : أنت وراك قمت تشخمط وش ميزانيته اللي قاعد تكلم عنها .
قلت : منتب وزير الماليه
قال : لا ياشيخ أنا العساف السكرتير الخاص للأمير عبدالعزيز بن فهد
وزادت النفاضه واشتغل جسمي على الهزاز وقامت السماعه تصفق بذني من رجفة القلب
قلت بصوت مبحوح : أكيد انك غلطان بالرقم الرجاء التأكد من الرقم الصحيح وشكراً
قال : منتب مكسور الخاطر
قلت : بصلاة أمي وابوي أني ما سويت شي وجعل كيبوردي للكسر وجعل جهازي للفيروس الي مايخليه يشتغل أبد أني ما قد كتبت بالساحة السياسية .
قال : يابن الحلال وش كيبورده يا أخي مر علينا عندنا لك شيك بقيمة مليون ريال من الأمير عبدالعزيز بن فهد أحولت عيوني وقمت أضحك وحرمتي تسمي علي .
قلت : بس مليون وشلون أنا مقدم على الأمير مبلغ مئة ألف ريال لتحسين وضع الديانه الي يطلبونن وش جاب هالصفر الزايد أكيد غلطانين ( واحد عنده ذمه ) .
قال : وشف فيك أنت هذا الشيك قدامي فيه مليون ريال تبيه والا ….
قاطعته وقلت : الا أبيه وسلم لي على ابوفهد وقله كثر الله خيرك تعطي أكثر والله يكثر أصفارك ألي على اليمين ويبعد عنك الحساد قولو أمين يا عيالي ونحمد الله جت على ما نتمنى وحطيت السماعه وقمت أعرض واضحك وعيالي يصيحون وش جاك يبه .
وجلست معهم وقصيت عليهم قصة المكالمه وطلعت مواهب العيال بالرياضيات الحديث والقديمه وقمنا نحسب المليون كم فيه من ألف والصغارين يحسبون كم فيه من ريال ، وقسمنا المليون تسديد ديون شراء بيت و غوايش وطقم للمعزبه تعويض عن ألي بعناه وقت الأزمات وأم العيال ماش كنه ضايق صدره .
قلت : وش السالفه يا أم عيالي عسى ماشر
قالت : والله يا مكسور صرت مليونير وأخاف تعرس علي
قلت : تطمني وحطي في بطنس جحه من جح السر أنا ناقص
نط الولد وقال : يبه عندي فكره ولا ما نشري كامري ( مسكين يحسب أن الكامري أحسن موتر )
سهرنا أنا والعيال نحمع ونكسر ويوم جاء الصبح و مير أشخص بثوب العيد والشماخ الجديد ابو ثلاث بصمات لا يفوتكم صار بتسعين ريال ورحت واستلمت الشيك ودعيت لبو فهد مفرج هموم المديونين وباني المراكز الإسلامية والمساجد في أنحاء العالم صراحه يستاهل الملايين ما شاء الله عليك الله لا يغير عليك .
وطيران على البنك وأمسك هاك السرى بالبنك قروي أول مره يصرف شيك بمليون والشيك صاك عليه بيديني الثنتين كني صايد لي جراده وخايف تطير ،
ويوم وصلني السرى أخذ السوداني الشيك ناظر الشيك ورفع راسه وقزني من ورى النظاره بصراحه خفت منه وأخذ الشيك وقال لي ممكن دقيقه ياطويل العمر لأول مره واحد يقول لي ياطويل العمر قلت تفضل خذ راحك بس لا تبطي علي وبعد برهة من الزمن ( حلوه هالجمله ) جاء مدير البنك وقال لي تفضل يا طويل العمر إلى مكتبي ألي مثلك ما يمسك سرى .
قلت بكل تواضع : لا أبداً إذا لم أمسك سرى بالبنك ما أحس أني داخل بنك .
حلف علي وبغى يطلق
قلت : خلاص بس عجل علي ترى مابقى من الوقت الا ربع ساعه
قال : وش عليه هالربع ساعه
قلت : أنا قايل لعيالي إذا ما جيت بعد ساعه ونصف من البنك بلغو الشرطه والدفاع المدني
قال : وش رايك نفتح لك حساب
قلت : لا لا أبغى كاش ( بيني وبينكم أخاف أحط القروش في الحساب يفلس البنك ويطلع راعي البنك صك إعسار وأروح فيها )
وأخذت المليون من أمهات خمسميه بس هذا المليون وأنا جايب معي خيشه عديته عنده وطيران على البيت ,اعلنت حالة الطواري بالبيت ممنوع الخروج أو الدخول من المنزل أو إلى المنزل يمنع منعاً باتاً إستقبال أي ضيف قطع الإتصالات الهاتفية حتى لا يتسرب خبر المليون .
ويوم صليت العشاء طيران على شمال الرياض أدور بيت وأفتك من الشفا وزحماته لقيت هاك المكتب لو ما عليه لوحه مكتب للعقارات ماصدقت أنه مكتب حشا هذا فله دخلت المكتب واثره مجمع تجار عرفت انهم تجار بكروشهم قام صاحب المكتب واستقبلني وصبولي هاك الشاهي المنعنع حطيت البياله مسوي ثقل .
قال : أمر طال عمرك
قلت : أبد ما يامر عليك عدو أبي فله
قال : بأي منطقه تبغى
قلت : أي مكان أهم شي بالشمال ( واحد متعقد من جنوب الرياض يبي الفكه من ريحة المجاري والمحرقه )
قال : كم حدك
قلت : هالخمس ( طارت عيون الجالسين )
قال : عندي لك قصر ثلاثة آلاف متر
قلت : لا كبير علينا أكيد فيه حوشه وحنا ما عندنا خدامه تكنس وتغسل
يوم قلت هالكلام كنه تغير وجهه وقال كم قلت لي حدود المبلغ الي عندك قلت خمسمائة ألف ريال
قال : يا أخي مضيع وقتنا على خمسمائة ألف ريال ما تستحي على روحك وقاعد تقهوى بعد وأخذ البياله وصبه بالترمس ومسك يدي وطلع بي عند الباب .
قال : عندي لك حي تشتر أحسن فله بهالحي بخمسمائة ألف ريال .
قلت : وشو
قال : الفيصليه
قلت : لا يا خوي ما تصلح على شارع خطر على طريق الملك فهد ولا به حوش يلعبون البزران بالسياكل
قال وهو حمقان : يا أخي ما أقصد عمارة الفيصليه أقصد حي الفيصليه
قلت : احترم نفسك شكلك ما تدري إني من سكان الشفا ( سكان الشفا مشهورين بعصبيتهم الزايده من الزحمات وقلة الأرصفة والإنارة وريحة المحرقه الله يكافي )
وطلعت مكسور الخاطر ورحت مكتب عقار بالشفا يوم درو إني أبي فله بحدود خمسمائة ألف صبو لي الشاهي والقهوه ويوم تقهويت رحنا شفنا هاك الفله الحلوه وأخذت المفتاح ، ومريت عيالي أبوريهم الفله …….. إلا والحرمه تحط الكماده على راسي وتقول لي وشفيك يامكسور الخاطر نايم وعيونك مفتحه الله لا يعيد هالفول ألي أكلته على الفطور ما خبرنا أحد يفطر على فول برمضان لا وبعد ملحقه بادية محلبيه وكاس لبن …… وأثر الدعوى كله هاجـــــــــــوس لعبي الفول لعب ……