مدخل / سعودة الوظايف شيء كويس لكن مو بالشكل هذا ( حكمه برجسيه )
عقب ماخلص حمد من الثانويه وجلس ثلاث سنين عاطل وبدون شغل، دور وظيفه بكل مكان ماحصّل، ما ترك دائره حكوميه ما مر عليهم .. مافيه شركه أو مؤسسة الا سألهم لكن مالقى أحد يوظفه .
مره من المرات كان هو وابوه معزومين في احد المناسبات العائليه، وكان من ظمن الحضور واحد مطخطخ وراعي تجاره .
دار الحديث حول السعودة وقلة الوظائف، وان الاجنبي مسيطر على الوظائف والاعمال اللي تدر ذهب .
كان هالمطخطخ واللي اسمه ابوثامر يذم الأجانب ويدعو للسعودة وتوظيف الشباب وفتح المجال لهم .
وتكلم عن تجربته في توظيف الشباب عنده في مؤسسته وفي بعض محلاته التجاريه، استغل ابوحمد هالفرصه ونط بحلقه تقل مقروص وقال : طريقتك هذي منتازه بالحيل وياليت كل التجار يسوون مثلك [ يبي يدخل عرض ويحتك ]
المطخطخ / المفروض كل التجار يسوون مثلي ويوظفون أبناء البلد .
أبوحمد / الله يجزاك خير ، مالك الا الأجر والدعاء بالتوفيق وفتح ابواب الرزق .
المطخطخ / وهذا اللي نبيه ، الله يوفق هالشباب ويلقون وظايف يساهمون من خلالها في بناء البلد ونماءه .
أبوحمد / ولدي حمد عاطل عن العمل وبدون وظيفه .. ياليتك توظفه عندك [ بدأ شغل الشحاذه ]
المطخطخ / ماعندي مانع . وين حمد ولدك ؟
آشر عليه وقال : شفه هذا .. قم سلم على عمك وأنا أبوك [ أبوووووك يالمصلحه ]
المطخطخ / وش عندك من شهادة ؟ ( يوجه كلامه لحمد )
حمد / الثانويه .
المطخطخ / جيد .. عطني أرقام تلفوناتكم وأنا ابتصل عليكم إن شاء الله .
أبوحمد / الله يجزاك خير وماتقصر .
اخذ ابوثامر رقم تلفون حمد على اساس انه يتصل عليه ويوظفه عنده .
مر شهر ، شهرين ، ثلاثه والرجال مطنشهم
شك حمد بان الرجال صرفهم ومحطهم بركبه كبر قريح .
في أحد الأيام وبينما كان حمد هو وابوه على سفرة الطعام يتغدون، سأل ابوحمد ولده : ما أتصل ابوثامر ياوليدي؟
رد حمد من غير نفس وهو يبلع اللقمه : لا ما اتصل ، الظاهر انه نصاب وماعنده سالفه .
طيّر عيونه ابوه وقال : لا تقول هالكلام .. الرجال سنافي وراعي فزعه ولا قصر .. هذا بدل ما تشكره وتثني عليه علشانه يبي يوظفك !!
رد حمد وهي قافله معه : الحين لنا ثلاثة اشهر ولا جانا منه اتصال ولا سمعنا أي خبر عنه !!
لو كان صادق بكلامه كان على طول وظفن في مؤسسته .. شكله بياع كلام .
ابوحمد / إن شاء الله يبي يتصل بس انت لاتستعجل .
قال حمد / هو وين مؤسسته فيه يايبه؟
اركد وأنا ابوك ولا تصير عجل .. أصبر لين هو يتصل علينا .. ماودنا نثقل على الرجال .
حمد بينه وبين نفسه [ شكله نصاب وخراط مشمش وراعي هرج واجد .. لكن أنا اللي أبدور مؤسسته وأروح له ]
سأل حمد بطريقته الخاصه عن المؤسسه لين عرفها ، ثم زرق لابوثامر علشان يذكره بموضوعه .
دخل عليه في مكتبه ودار بينهم الحوار التالي :
السلام عليكم .
وعليكم السلام .. ( رد ابوثامر السلام بدون مايرفع راسه )
طال عمرك .. أنا حمد ولد أبوحمد .
أبوثامر / الله يحييك .. أي خدمه؟
حمد / [ أفاااا .. نسينا ماكلينا ]
طال عمرك أنا اللي وعدتني خير وأنك توظفني عندك بالمؤسسه .
رد ابوثامر ببرود : ايييييه .. الله يحييك .. وشلون أبوك؟
حمد بينه وبين نفسه كالعاده / [ توك تذكرن ؟!! ..يجيب الله مطر ]
الوالد بخير الله يسلمك .
وش صار على موضوعنا الله يجزاك خير؟
ابوثامر / أنت وش معك شهاده؟
حمد / [ والله اللي ماجاب خبري !! ]
الثانويه طال عمرك .
ابوثامر / جيد .. موافق تشتغل في كبينة تلفون ؟
حمد بعد ان انصدم بالرد ونوعية العمل / [ هذي أخرتها يابن اللذينا؟!! .. تماطل بي كم شهر وفي النهايه كبينة تلفون؟؟!!! ]
ماعندي مانع ، المهم اني اشتغل واستفيد من وقت فراغي ولا اجلس عاطل .
قال ابوثامر : أجل رح للأخ بدر في المكتب الثاني وهو بيوضح لك كل شيء، وأنا أبكلمه .
حمد / ماقصرت < = = = قالها من غير نفس وهو مولع
طلع حمد وراح لبدر في المكتب الثاني واللي بدوره أخذ صوره من بطاقة احواله وعطاه نموذج التعيين علشان يعبيه ، ثم وصف له المحل اللي يدوام فيه .
وقاله تداوم من بكرا ، لان الكبينه اللي تبي تدوام فيها مافيها الا واحد ولا يغطي العمل .
ماصبر حمد لبكرا ، وأنطلق للمحل يشوفه على الطبيعه ( والله لو هو مساح بلديه يبي يشوف قطعة ارض )
وصل للمحل وشافه من برا ، ولان حمد راعي شرافه وينضغط بسرعه قرر انه يدخله علشان يشوف ابوزمل اللي بيتناوب هو وياه بالدوام .
دخل للمحل بكل ثقه وغرور واللي يشوفه يقول هذا راعي الكبينه ( تعرفون يبي يداوم بكرا ولازم يزعط )
راح لوحده من الكباين واتصل على البيت وقفل الخط وطلع .
جاء للموظف وقاله : كم حسابك ( وين ياعمي .. داخل مطعم بخاري؟!! )
قال الموظف : أنت ماكلمت والجهاز عندي ماحسب أي مبلغ .
رد حمد وهو منبهر : صحييييح .. تصدق كنت متوقع ان رفعة السماعه ودق الرقم تحسب بفلوس [ أمحق ... لا ويبي يمسك المحل من بكرا .. عز الله اللي خسر راعي الكبينه ]
قال الموظف : لا ماتحسب .
[ طبعا كل هالحوار السابق كان مقصد حمد أنه يحتك بالموظف ويشوف وشو من لحيه ]
قال حمد بكل ثقه وغرور وعقب ماعفط خشته كم عفطه : عموما يالغالي .. أنا زميلك اللي ابتناوب معك في المحل من بكرا ، توي جاي من ابوثامر .
رد الموظف : الله يحييك اهلا وسهلا .
حمد : متى تفتح بكرا ؟
الموظف : الساعه ثمان .
زين مع السلامه <= = = هذي اخر عباره قاله حمد قبل يطلع .
من بكرا جاء حمد وجلس مع الموظف واتفقوا على أن زميله يداوم من ثمان صباحاً الى 6 مساءً ، وحمد يدوام من 6 مساءً الى 3 صباحاً .
أستمر حمد بالكبينه كم شهر براتب وقدره 1000ريال !!!
أغلب راتبه كان يروح بتغطية النقص في الايراد ومطابقته مع الكمبيوتر ، هذا غير الهواش مع الزباين ومشاكل العماله اللي تفرك بدون ماتحاسب .
حمد الان يفكر بتحسين وضعه والبحث عن :
-
-
-
-
-
-
-
-
-
-
-
-
-
-
-
-
-
-
-
مـحــل خــضــار
