هذا هو واقعنا الان

بسم الله الرحمن الرحيم

الحمد لله


( 1 )
- سامي وين تبي تروح ؟
- يمه .. مابي غداء ابروح أنام .
- طيب ياوليدي .. إذا صحيت من النوم تحصل غداك ورى كيس السكر موزيته عن إخوانك أخاف يأكلونه عنك .
- الله لا يحرمنا منك يالغالية .

صعد سامي وهو منهك إلى غرفته بكل صعوبة ليأخذ قسطاً من الراحة بعد يوم شاق .. وما أ، دخل غرفته وخلع ثوبه وغترته حتى هبط مسرعاً يكاد ينفجر غضباً ، ،

- يمه ،، وين دبدوبي ؟ من آلي أخذه ؟؟
- مع عيال أختك .. أزعجوني وعطيتهم إياه أبي افتك من صجتهم ..
- الله يهديك يا يمه .. الحين كيف أنام ؟؟
- ياسامي ترى إلي بعمرك عندهم درزن عيال !! ورى ماتعقل وتغدي رجل ؟؟ بعدين تعال .. آبي اعرف من آلي لاعب عليك وقايل لك لازم تخم ( تضم ) دب وأنت نايم ؟؟ هذا بدل ماتقرأ وردك !! أو آية الكرسي والمعوذات ؟
- يمه .. مهب وقته هالكلام .. بعدين هالموضوع تناقشنا فيه كثير ،، وقلت لكم الذنب ذنبكم ،، حرمتوني وأنا صغير وأبي أعوض الأيام آلي فاتتني .
- لا وبعد من تالي أشوفك إذا جيت تنام تلبس مثل لباس الوجعانين (المرضى) بس مخطط !!
- هذا اسمه بجامة نوم .. وإن شاء الله مع الراتب الجاي ابشتري روب حمام آلي عليه صورة فرخ بطه !!
- إيه ماقول إلا الله يطول بعمرك وعمر أخيينك ..
- آمين .. بس مرة ثانية تكفين يا يمه .. لا تعطينهم دبدوبي خصوصا وقت نومي .
- ابشر ياوليدي بس ياليتك تكمل عاد تحضرك هذا .. وتقولي ياماما بدل يمه !!
- تامرين أمر ياماما .. ياحلوة الميلك ( الحليب ) .

استلقى سامي على فراشة محتضناً وسادته وغرق في سبات عميق ،، وما هي إلى دقائق حتى أفزعه على صوت قوي قريب منه .

- يمه وش هالصوت ؟؟ أعوذ بالله الواحد مايعرف ينام خمس دقايق في هالبيبت ؟
- وش قلنا ؟؟ ماقلنا نادني بماما ؟؟ بعدين الصوت الظاهر إنه صوت أخوانك وعيال أختك خابرتهم راح يسوون عشة حمام في الحوش .
- حمام ؟؟؟ أوريك فيهم هالشياطين .. الناس الحين تربي كلاب .. قطاوه .. وهذولا حمام .. أيش هالتخلف .
- ياوليدي ياسامي .. اشوي اشوي عليهم هذولا مهما كانوا بزران !!
- طيب ياماما على أمرك .

خرج سامي إلى فناء المنزل باحثاً عن أخوته وأبناء أخته لكنه لم يجد أحداً ولم يجد أيضاً أثاراً لعشة الطيور المزعوم صنعها فعاد لأمه المسكينة ..

- يمه اقصد ماما .. مافيه أحد بالحوش .. الصوت شكله طالع من بيت جارنا أبوسالم .. وش عنده هالشايب مانام زي عادته ؟؟
- مادريت .. الرجال تقاعد !! .. إلا ورى ماتجلس معي وتتقهوى أزين لك من نومة العصر ؟؟
- اها .. متقاعد !! مانقول إلا الفراغ شين .. ياله ياماما ابروح أنام بالملحق .

( 2 )

وبعد صلاة المغرب وبعد أن استيقظ من غفوته القصيرة التي أتت بعد عناء طويل .. ذهب سامي لجاره أبا سالم ليعرف مصدر تلك الأصوات ..

- مساك الله بالخير يابوسالم ..
- هلا والله .. حي الله ولد الجار العزيز .. وشلونك ؟؟ ووشلون الشيبان ؟
- بخير ونعمة .
- أقول ورى ماتقلط وتشرب معي فنجال قهوة ؟
- أوكيه .. شف لنا الطريق .
- تفضل اجلس بصدر المجلس .. هذي والله الساعة المباركة آلي خلتنا نشوفك ؟
- تسلم والله .. إلا أيشلون سالم وإخوانه عساهم بخير ؟ وأنت أيشلونك عقب التقاعد .؟
- العيال بخير لاهين بأشغالهم .. وأنا من المسجد للبيت ماهنا سنع ..
- الله يكون في عونك .. إلا اليوم العصر كني سمعت صوت طقطقة عندكم .. عسى ماشر ؟
- ابد والله .. أتسلى .. بعض الدواليب والرفوف قاعد اصلحهم .
- ومالقيت إلا العصر .. بهالحر ؟
- وش أسوي أم العيال خبرك .. تسير هالعصرية .. وماهنا أحد بالبيت ..
- اها .. والله مشكلة .. طيب وش رأيك .. عندي لك حل ؟
- الحقن به ؟
- أنا ناوي أفتح محل خضرة .. وأنت عارف النظام الجديد .. وأنا بيني وبينك ماعندي وقت .. وش رأيك نتشارك ؟؟ مني الفلوس ومنك الشغل ؟
- والله إنها فكرة زينه .. أزين من القعدة .
- خلاص اجل .. من بكرى العصر تروح تدور على محل يكون موقعه زين وأنا بعد أبدور .. وأول مانلقى نتوكل على الله ونشغله .. لا تنسى بكرى العصر .. العصر ..
- خير إن شاء الله بكرى الصبح مهب العصر إن بغيت .
- لا .. لا .. العصر علشان تقدر تقيم المحل هل هو بشارع تجاري وإلا لا ..
- تم .. عقب صلاة العصر .. إن الله أراد .

نجحت خطة سامي بأبعاد جاره أبو سالم وبدأ العمل بالمحل وصار ينعم بنوم هادئ دون ضجيج .

( 3 )

- سامي .. سامي .. قم وأنا أمك .. أبو سالم يستناك في المجلس يقول أنه يبغاك ضروري .
- يمه .. تكفين خليني أنام أشوي .. قولي له يجي عقب المغرب ..
- والله فشيله .. الرجال مقفل المحل وجاي لشيء ضروري وعيب نخليه ينتظر كثير .
- طيب هذاني قمت .. الله لا يوفقه لا هو ولا إلي شاركه .

ذهب سامي إلى شريكة .. دون أن يلبس ثوبه أو نظارته أو يغسل وجه .. كي لا يطير النوم من عيناه ..

- هلا أبو سالم .. وش عندك مقفل المحل وجاي .. لا يكون البلدية صادت عندك شي فاسد ؟
- لا .. الحمد لله .. الشغل زين هذا بفضل الله .. بس أنا جيت أقولك شي مهم اكتشفته عقب شغلي بالمحل ؟
- وشو ؟؟
- تصدق ياولدي .. إن الخوجات ما خلو شي ما سرقوه منا ؟؟
- الخوجات ؟؟ يسرقوننا ؟؟ وشلون ؟
- أنا أقولك .. مهب الطماط بالإنكليزي اسمه توميتز ؟؟
- إلا ..
- وتقول إلا .. الحين هالكفار اخترعوا صواريخ .. واخترعوا غنم ومو قادرين يخترعون كلمة ؟؟
- هاه .. إي والله .. بس لحظة .. الظاهر حنا إلي سارقين منهم .. مو هم الي سارقين منا .. أصلا حنا مو كفو نخترع شي علشان ينسرق .. إذا راح نخترع شي لا سمح الله .. فراح نخترع طرق جديدة للخيانة بس .
- نعم .. نعم إني أرى ذلك .. أقول بلى طهبلة .. هم آلي سارقين منا يعني هم آلي سارقين منا .. أنا من طلعتي على الدنيا .. وقبل مايطلع شي أسمه انقليزي .. وأنا أقول للطماط .. طماط .. تجي تقول حنا آلي سارقينهم .. وأزيدك من الشعر بيت .. حتى البطاطس .. بوتيتز .. والعنب .. عونيبز .. والجح .. جحيبز .. وهلم جرجر ..
- أقول أنت الحين جاي علشان تقولي توميتز وعنيبز ..؟؟ وإلا عندك شيء ثاني ؟؟
- لا .. أبد هذا آلي عندي .
- أقول .. الحين أنت رح للمحل وأنا ابروح اكمل نومي .. وعقب المغرب أجي عندك ونتحاسب .. ياله بسرعة قبل لا ارتكب .. جوريمز ( جريمة ) ..
- على أمرك .. مع السلامة .

( 4 )

عندما أوصل سامي شريكه إلى الباب .. لاحظ أن هناك سيارة تقف تحت شجرة منزلهم .. فغضب كعادته .. وقام بإفراغ الهواء من إطاراتها الأربعة .. وعاد قافلاً إلى داخل المنزل يستشيط غيظاً ..

- زيد ... زيد وصمخ .. تعال .
- وش تبي ؟؟
- رح شوف الليموزين آلي برى موقف تحت الشجرة ،، شوف من صاحبه وخله يبعده .. تراني نسمت كفراته .
- ياحبك للشر .. ليش تنسم الكفرات ؟؟ .. بعدين مافي أحد من الجيران عنده ليموزين ..
- يمكن جارنا الباكستاني الجديد .. خله يشيلها .. وإلا ترى أن رحت أنا عز الله إني ابجلده ..
- طيب .. أعصابك .

ذهب زيداً لتنفيذ أوامر أخيه .. وثم عاد مسرعاً ..

- سامي .. عطني مفتاح سيارتك ؟
- المفتاح في ثوبي .. بس ليش ؟؟
- ابطلع ماطور الهواء علشان انفخ الكفرات .
- دامنا راح ننفخ الكفرات ليش ننسمها يا غبي ؟؟ .. خله يدبر عمره هو ..
- ياخوي السيارة آلي أنت نسمتها مو سيارة جارنا .. هذي سيارتك ياحول ..
- سيارتي ؟؟ تحسبني غبي ماعرف سيارتي .. بعدين سيارتي من متى صارت ليموزين ؟
- إلا سيارتك .. وإذا مو مصدق ألبس نظارتك ورح شفها ؟
- طيب وآلي فوق التندة .. لوحة الأجرة آلي فوق .. كيف صارت على سيارتي ؟؟
- هذيك مهي لوحة .. هذيك قطو الله يصلحك ..
- ماما .. وين غداي .. موزيته ورى أي كيس اليوم ؟؟

( 5 )

- يا أبوسامي ولدك علنا .. صاير عصبي بالمرة .. مافية أحد سلم من لسانه .. أشوي ويتهاوش مع ظله .
- يا أم سامي وش أسوي فيه .. رجال أكبر مني .. أضربه يعني ؟
- لا ما قصد كذا .. أنت ما ضربته يوم أنه صغير علشان تضربه يوم كبر بس شوف له حل .
- الظاهر علاجه الزواج .. ورى ماتدورين له بنت حلال .. نلزقه فيها .. غادية يعقل ؟
- يعني قولتك .. إننا يوم عجزنا نربي ولدنا ونعقله .. تبي ندور واحد غيرنا يتولى أمره ؟ وش ذنب هالناس علشان يبتلون بجنانه وطيشه وعصبيته ؟
- لا مو هذا القصد .. بس أنتي تعرفين التفكير أوقات يخلي الواحد منا يكون عصبي .. يمكن وده بالعرس بس مستحي منا ؟؟
- ما اعتقد إنه يستحي .. هالموضوع مافية حيا .. بس ودنا نركده أشوي علشان مايفشلنا مع أرحامه بعدين ..
- صدقيني راح يركد ويعقل .. يوم يعرس .. مشكلة آلي مثله بالعمر وبظروفه .. يعني واحد درس وخلص دراسته وتوظف وظيفة زينه .. مابقى له من الأهداف غير الزواج .. هذي أهداف شبابنا .. الله يهديهم .. وظيفة وسيارة وزواج وبس ..
- على رأيك .. اتفقنا ... كفك !!

شرعت أم سامي واستنفرت جميع الأقارب والمعارف .. حتى وجدت ضالتها ؟

- سامي تعال وأنا أمك ابغاك بسالفة ؟
- سمي .. وش بغيتي ؟
- ياوليدي .. لقيت لك بنت حلال .. الصراحة .. كاملة والكامل وجه الله .. أخلاق .. وجمال .. وبنت حمايل ..
- مواصفات خليجية .. بس وش أسوي فيها طيب .. ؟؟
- تزوجها .
- ومن قال إني آبي أتزوج ؟؟
- أنت مو صغير ياوليدي .. بعدين ما ودي تفوتك هالبنت .. هالأيام البنات آلي بالمواصفات هذي يعدن على الأصابع .. وعلى فكرة أخوها صديقك .
- صديقي .. منهو ؟
- سلطان .. آلي بيتهم في راس الشارع .
- سلطان العرج .. والكوبة والله .. دريتي .. الغبي موصل سلك من دش الحلاق الهندي آلي تحت بيتهم .. علشان ما يدرون أهله ..
- وحنا وش علينا من أخوها .
- بس أخوها دلخ بقوة .. إذا هي مثله مابيها .. يكفون أخواني ..
- لا تخاف .. يقولك .. إذا شفت القرد برى .. فعرف إن الغزال جوى .. والبنت عقل وفصل وأخلاق .
- والله ما دري عن هالمثل .. شكل آلي قاله .. متوهق في بناته ويبي يصرفهن .. تدرين شورك وهداية الله .

( 6 )

- الو .. مرحبا ..
- هلا سامي ..
- سلطان .. وش تبي ؟؟
- أبد سلامتك .. بس بغيت أقولك .. أننا حطينا أغراض أختي في الشقة .. وماعليش على الاستعجال .. أدرى أنك ما بعد خلصت الفرش والتأثيث ..
- أخس ياسلطانوه .. صاير مؤدب معي .. وش السالفة .. لا يكون خايفين افركش الزواج .. وأنتم ماصدقتوا تلقون واحد مثلي ؟؟
- من زينك عاد .. بعدين أنا هذا طبعي .. مؤدب .. المهم .. شف العفش في الصالة .. وإذا بغيت تفرشها تعال قلي علشان أساعدك ونشيل العفش ونحطه في أي غرفه .
- أفرش الصالة ؟؟ الصالة وش فيها الحين .. وش أنت شفت فيها .؟
- أبد .. فيها طقم كنب .. ومكتبة وأجهزة كهربائية ..
- طيب كيف تقول أني لسى مافرشتها ؟؟
- أقصد فرش الأرضية .. الموكيت ..
- ماحد صدقني يوم قلت إنك دلخ .. أحد يمد سلك من حلاق هندي .. قال أيش قال مابي أحد يعرف أن عندي دش .. نعنبو شيطانك .. كل أهل الحارة .. عرفوا .. أجل كل أشوي فاتح دريشتك .. وتصوت للهندي .. غير القناة .. حطة القناة الفلانية .. وإلا .. أخوياك إذا بغوا ينادونك .. يسحبون السلك وعلى طول تطلع .. كنك ضب مغرق بقاز ..
- عن الغلط .. تراها وصلت معاي .. أنا مؤدب معاك علشان أختي وإلا أنت ماتستاهل .. كل هالأسف ..
- الله يقلعك أنت وأختك ... يادلخ .. الأرضية رخام .. ماينفرش عليها شي .. جعلي أفرشك قل آمين ؟؟
- اها .. طيب قول كذا من زمان .. يعني الحين .. إذا جينا عندك بعد العرس .. مانفصخ نعالنا ؟؟
- أقول .. ورى ماتنطم .. يالله مع السلامة .
منقول................................................للفائده ...................................
والسلام عليكم