هلا فيكم
أبغى اطرح عليكم موضوع آخذ رأيكم فيه ..وطبعاً نادر نادر جداً ما آخذ رأي أحد وهذا راجع لثقتي بنفسي أولاً....وجهل جميع اللي أعرفهم وعدم إلمامهم بالمعارف الأوليه ..........على العموم هذا مهو موضوعنا
الموضوع اللي بغيت آخذ رأيكم فيه....ألا وهو بخصوص توأمة نادي ريال مدريد مع نادي الهلال ( الزعيم ) على طاري الزعيم ما عجبتني المسرحيه مبالغ فيها ولا ترتقي للفكر العربي بأي شكل من الاشكال حتى الديكورات زفت ...على العموم هذا مهو موضوعنا .......أنا أشوف إن التوأمه من صالح نادي ريال مدريد ...........طبعاً ريال مدريد لا تحسبوني أمزح عشاني أنا نادر نادر جداً ما أمزح لأن رأي إن الواحد إذا قعد يمزح وهو يتكلم في موضوع هام مفروض ما يمزح ..........على العموم هذا مهو موضوعنا......أنا أقول إن ريال مدريد المستفيد الأول والأخير لأنه راح يستفيد من الاعبين السعوديين والعرب والاسيويين وهذا طبعا لان الهلال بيكون الوكيل الوحيد المعتمد من ريال مدريد بالشرق الاوسط زي طريقة مشاعل الخليج مع نوكيا لاعبين علينا قصدي عليكم لأني ما ينلعب علي أبد أبد ......على العموم نرجع لموضوعنا ريال مدريد راح يسرق مواهبنا الشابه زي ....... الشلهوب ، البيشي (مع إني ما أحب النصر بس إن الواحد زي منتم عارفين يفرض نفسه ) .....والله ماأذكر الباقين لأن معظم اللاعبين الحين نصابين يجيك الواحد عمره عمر الديناصور ويقول 27 زي الدعيع مثلاً والخليوي ........وباقي الديناصورات اللي أنتم خابرينهم ................على العموم نرجع لموضوعنا .......إنهم راح يسرقون مواهبنا لا وبلاش بعد شوفوا راتب نواف التمياط مثلاً 20 ألف اللهم لا حسد وعلى طاري الحسد أنا ما فيه أكره عندي من الناس الحسودين اللي إذا جاك الواحد منهم بالمجلس ما يقول إلا شف هذا وشسوا وهذا وين راح وهذا وش شرى .............على العموم نرجع لموضوعنا .............قلنا إن راتب نواف 20 ألف ريال وشف راتب روبرتو كارلوس 550 ألف دولار ........يعني الفرق بينهم (2042500 ) مليونين وثنين وأربعين الف وخمسميه ريال ......الفرق لحاله يساوي قيمه مقدم عقد نواف ...ياحبيبي يا نواف هذا وأنت عمرك 24 سنه تقريباً لا وأحسن لاعب بقارة آسيا بعد .............عساكم فهمتوا قصدي يوم أقول إن نادي ريال مدريد هو الكسبان .......على العموم أنا بأنهي كلامي الحين مهو لأن كلامي خلص ولاكن لأني داري إن اللي وصل إلا هذا السطر بيكون جاه النوم ......وتصبحون على خير
،،،وشكراً
