DANGERMAN

السلام عليكم ورحمة الله وبركاته

تجري أحداث هذه القصة لواحد من أقربائي وهو من الرويس.......واللي مهو من جدة فالرويس هو من أرقى الأحياء بجدة.......(والقصص كلها واقعية)

هذا الشخص اللي اتكلم عنه رايح في أم أبو عمها...........خربان مع مرتبة الشرف......والله لا يوريكم وجهه....تخيلوا أبشع وجه على الأرض......هذا أخف منه بشوي(قريبي يعني لازم أمدحه شوي)واسمه سالم وعنده زريبة في بيتهم.
واحدى القصص تقول:-

**في الثانوية.

مرة من المرات جا المدرسة متأخر( عندنا في الرويس) عالحصة الرابعة كدا وكل المدرسين والطلاب في فصولهم وما أدري كيف قدر يدخل المدرسة الظاهر البواب كان في الحمام أو شي زي كدا

وكان عندهم مدرس النحو حقهم أعمى(حمدلله عالنعمة) الزبدة أيش سوا الله يهديه

فتح باب الفصل ببطء ودخل..شوي الطلاب كلهم قاموا ضحك......ضحك بطاّل........ويضحكوا والمدرس مسكين مهو عارف أيش الهرجة........على أيش قاعدين يضحكوا.........ايش تتوقعوا اللي قاعد يسير؟

أخينا في الله داخل الفصل ويجر وراه حمارهم.........والله دخله الفصل....المدرس قام يسأل عن اللي قاعد يسير ومحد راضي يتكلم.......وليين ينهق الحمار....... المدرس قال: مين ابن ال....اللي طلّع الصوت؟؟

دريل الفصل(ترقى من مرتبة دبوس) : يا أستاذ كذا كذا كذا

والله يطالع سالم وراه ويشوف ملفه طاير جهته...خدمةexpress......وهاتك يا تبويس في المدرس والمدير

وبعد محاولات قوية أستطاع أنه يبقى في المدرسة(بس فصل أسبوعين و فلكة حلوة)

وفي نفس اليوم وقت الصلاة يستلملك الدريل السوري ويدعّس في بطن أمه

***وكيل المدرسة:عبدالله .......اذا شافك في طريقه أعرف أنك حتنام اليوم في الأنعاش واذا شافك تناظره.....جاك الموت يا تارك الصلاة***

سالم لاحظ أن الوكيل شافه وهاتك يا جري على الدور الثاني عشان يطب منه عالسور وينفذ بجلده

ويطلع الدور الثاني ومع العجلة ينقز عالسور(مهو بعيد كتير) وتنشقك رجله بأحد أعمدة السور وينزف دم

وقف الوقت لحظة وفكر خلال اللحظة **أموت موتة ربنا ولا أني أموت على يد العبد..........نااااه مهي فارقه**

ويكمل مشواره عالبيت ومنه سيدا عالمستوصف.......وحطو عليها شويت كمون عشان يوقف الدم (قال علاج طبيعي قال) والله مافي غير الدم يخرج أسرع من أول بثلاث مرات فسولو الخياطة وبلا علاج طبيعي وبلا هم.......غاب فترة أسبوعين.....

**بعد أسبوعين:

دخل المدرسة وهو في الطابور يجيه العبد**ووجهه كأنه شوكلاتة مارس**

سالم نسي الموضوع وعلى باله أن الوكيل جاه يسأل عن رجوله

جا الوكيل ويعطيه الغمزة(غمزة الموت) معناها ألحقني عالمكتب

ويجي المكتب وهو يعرج وحالته حالة**مسكين** ويدخل ويشوفلك عنتر والأنترتيكر ورامبو وغرندايزر (أعضاء هيئة الفلكة)
والابتسامة تعلو وجوههم

الأعضاء: يالله يا حبيبي شنقل......ويطيحو فيه ضرب لما عينه خرجت من محلها

ويمر اليوم كله في الفلكه.....اللي يضربوه تعبوا من كثر الضرب وهو ماله الأ الله

الزبدة المسكين أنفك الجرح اللي في رجله وغاب 3 أيام.
في اليوم الرابع حان وقت الأنتقام
قبل بدأ الطابور بساعتين يشقح سالم ويدخل الى المبنى ويمسك السبورات في المدرسة ويدهنها وحدة وحدة بالشمع( السبورة اللي ينكتب عليها بالقلم مو الطباسير.......تطور....هه)

mission accomplished

(تشوف الشرارة البيضة من عينه)

بدأ اليوم الدراسي بشكل عادي: طابور—كلمة الصباح—التفتيش عن الشعر—التوجه للفصول

بدأ الدوام ** الحصة الأولى رياضيات**

الأستاذ يكتب وما يشوف شي يرجع عن السبورة شوي(امكنه ضعف نظر)

مافي شي ويروح يبدل القلم ويرجع ونفس المشكلة ويسأل الصف ايشفيها السبورة

تشوفهم زي الملائكة ما شاء الله محد يتكلم ويعصّب المدرس ويروح للمدير عشان يشتكي وأول ما يوصل يشوف طابور من المدرسين **كأنهم ينتظرون دورهم عند الفوال في رمضان**

وضاعت 4 حصص في الهوا ولكن الأنتقام ما انتهى بس أنا انتهيت من كثر الكتابة

ان شاء الله تحوز على رضاكم

ترقبوا الأجزاء الجاية