يقول الأبنودي
مهما أقول أو تقول.. إيه راح يفيد الكلام
حكامنا صاحبوا العدو، وإحنا رحنا ننام
قالوا لنا: "حنحلها إحنا في خمس تيام"
آدي بداية انهيار الأمة قدامنا
بعنا حقيقتنا وسكنا في أوهامنا
عشنا وزادنا الخطب.. كرهتنا أحلامنا
أنا ما بنيت الدار إلا لأحارب
ودار بلا حرب.. عليا حرام!
آدي العراق منطرح على المقصلة بناسه
مستني حكم الغريب الجاي.. بمداسه
يدوس على الأمة وتسمعنا أنفاسه
وإحنا بنسأل: "صحيح فيه حرب يا إخواننا".
قال إحنا لؤما قوي وقال إيه بنتحايل
وقال بنخفي السلاح في الضل لو مايل
في لقمة الطفل أو في مشية الحامل
سلاح رهيب مستخبي فيه دمار شامل
يا ريت يا سيدي.. ماكانش الحال بقى مايل
ولا كنا نتسول التأييد من الغربا
والجرح يوسع يوماتي ولا طب ولا طببا
وأقلها كلب.. يشتمنا.. ويتطاول
حكايتكو يا الأمريكان ألغز من الألغاز
وف تبريراتكو المريبة باشم ريحة الجاز
الكدب على وشكم ما ينقصوش برواز
شعب العراق لن يموت.. الموت لكم إنتم
انتوا اللي جرتوا عليه.. وانتوا اللي أجرمتم
ولا راح نفوت طارنا مهما رجعتوا وبعدتم
يادي الرئيس اللي على قول الضلال.. أدمن
مطلوق علينا.. كإنك ديب جعان شارد
وجاي علينا.. بتتمطع قوي.. وفارد
من "كوريا" نعجبة وعلينا جاي عامل مارد
لا انت عمي.. ولا أمي.. ولا الوالد
علشان ما تنزل بلادي بكل أسلحتك
تنقذني م اللي حاكمني.. كنت عينتك؟
عارفك ما تعرف يا قاتل.. إلا مصلحتك
مش أنظمة! إنما قابلينها يا بارد!
يا أمه قومي بقى.. ده انتي فضحتينا
الأمريكان سكنوا مش وسطينا.. لأ فينا
واللا اليهود اللي سرقوا حتى أغانينا
خسرتوا الأراضي وقتلوا هناك أعز الولد
الشهدا أكوام على أكتافي.. اوعى تعد
أبدان جميلة.. بتأكلها النسور والحد
إحنا انتهينا.. تعالوا ياللي بعدينا
أنا باهيب بالشباب.. انسوا اللي قضّوا العمر
يتكلموا ويخطبوا وسابوا سنينكو.. تمر
دا انتوا القلوب الفتية والوجوه السمر
ترضوا تبيعوا الوطن بتفاهة الغايات؟
وتبقوا انتوا وأعداء الوطن إخوات؟!
متربصة بيكوا أم العولمة والجات
تتمسحوا م الكون كما مسحوا الهنود الحمر؟
بغداد..
بغداد..
الدنيا كلتها تهتف باسمك المظلوم
بكره الجراح تندمل.. عمر الظلام ما يدوم
أطفالك اللي التاريخ حيحكي قصتهم
ونساكي في صبرهم الدنيا نسيتهم
يا دي العراق العريق صحي العرب م النوم
يا طاعم المحرومين.. إزاي تبات محروم؟
ومهما كانوا الطغاة.. الدار لأهل الدار
الدار لأهل الدار
الدار لأهل الدار
