PS2 Stage In GITEX

السلام عليكم جميعأً..

امس راد من دبي و من معرض GITEX و الـPS2 و حبيت اكتب لكم تقرير بسيط عن اللي شفته هناك و الالعاب اللي جربتها

اول ما وصلنا انا و ربعي لمعرض GITEX بدبي قمنا ندور على منصة البلاي ستيشن و حصلناها ورى اخر شي و لكنها لم تكن كما توقعت...يوم بغينا ندخل وقفتنا الحرمة اللي عالباب و سئلتنا اذا خلصنا اللي نباه في المعرض عشان ندخل المنصة..فسئلناها ليش؟؟ قالت لاني انصحكم تدخلون هني بعد ما تنتهون من كل شي و تخلون منصة الـPS2 اخر شي تزورونه احنا هني تحمسنا و سوينا مثل ما قالت..

المهم:

اول ما تدخل المر المؤدي لمنصة البلاي ستيشن راح تحصل ناس يذكرونك انك اذا طفت النقطة هاي ما راح تقدر ترجع للمعرض (نفس اللي بألعاب الار بي جي) احنا قلنالهم انا خلصنا و دخلونا..

هناك راح تحصل منطقة وااااسعة و مقسمة لعدة اقسام و كل قسم بألعابه (اعتقد معظمكم عارف الالعاب المعروضة فما راح اذكر هني غير اللي جربتهم) و في النص تقريباً في مسرح كبير و عليه DJ و كم واحد (الله يعلم من وين يايبينهم :31: ) مسوين اعمارهم Rappers و من قوم واساب يقعدون يغنون و يأذون الخلق باشكالهم. و كان في بعد فرقة مسرحية ترقص (فعلاً ارف )

اقسام الالعاب كانت كالتالي:

- الرعب (HORRO):
- البحث (Quest)
- القتال (FIGHT)
- الرياضة (SPORTS)
- الالعاب الشكبية (NETWORK)
- الحرب (BATTLE)
- الرسوم المتحركة (CARTOON)
- الافلام (MOVIES)
- البلاتينية (PLATINUM)
- الاي توي (EYE TOY)

و طبعاً كل قسم عبارة عن حجرة خاصة تناسب اجواءها اجواء الالعاب المعروضة (باستثناء الاي توي كان في منطقة وااااسعة)..فمثلاً قسم العاب الرعب حاطين على مدخله تماثيل لوحوش و داخل الحجرة جهاز يطلع دخان و يخليك تحس انك بمنطقة فيها ضباب (بس ريحته كانت خاااايسة :34: ) و العاب المغامرات في منطقة تحسها تشبه الكهوف. و قسم الالعاب الرياضية تحصل ناس يلعبون كورة و كانو يسوون مسابقة في كرة السلة (ناس فاضية ).

يتبع...

تجربة خاصة:

كون ان ما كان عندي وقت كافي و كان لازم نرد بوظبي، ما قدرت العب كل الالعاب و هني راح اذكر الالعاب اللي جربتها و رايي الشخصي فيها.

1. Castlevenia: Lament Of Innocence

الصراحة اللعبة كانت مثل ما توقعتها..ما فيها اي شي مميز و اسلوبها مشابه بشكل كبيييير لـDevil May Cry خاصة طريقة خروج الوحوش( تذكرون الدايرة الحمرة اللي تطلع بالارض و يطلع منها الوحوش) هي نفسها بالضبط موجودة هني. الحركات (الضربات) اللي يسويها البطل هي افضل ما فيها و لكن المزعج فيها انك لما تقفز لضرب العدو و تضرب في نفس الوقت البطل راح يوقف بالهوا بشكل غبي و يضرب لين ما ينزل للأرض. نقطة ثانية حسيتها غبية و هي الذكاء الاصطناعي الضعيف للوحوش (افضل تسميتها بالغباء الاصطناعي) الصراحة لعبت مع رئيس ضخم على شكل اكلة الذباب و كان ضعيف و بالغصب ضربني ضربة..بس يمكن سهولة اللعبة كان بسبب كونها Demo لا اكثر. الصراحة تستحق الـ7.3 اللي حصلت عليها من Game Spot (اذا غلطان ممكن حد يصلحلي)

2. Ghost Hunter

لعبة باااائسة بكل ما تعنيه الكلمة من معنى...اسلوب تحكم سيء و كاميرا من اغبى ما يكون. اذا رحت (او حوصرت) بزاوية فانك لن ترى اي شيء و راح تتعب لين ما تعرف انت وين و تقدر تشوف شخصيتك. اسلوب التصويب سيء للغاية. الشي الوحيد اللي عجبني باللعبة رسومها.

3. Siren

الصراحة تفاجأت بنقطتين باللعبة هاي بشكل غييييييييير متوقع..ا
النقطة الاولي كون اللعبة مشابهة بشكل كبييير لـSilent Hill. الجو العام للعبة كان مظلم و مخيف بالضبط كسايلنت هيل كما ان البطلة تحمل مصباحاً مشابهاً لمصباح البطل.
النقطة الثانية هي استخدام اللعبة لاسلوب لعبة ICO (مادري اذا المعلومة هاي قديمة لاني انا ما قريت اي تقرير عن اللعبة) يعني يتوجب عليك انقاذ شخص عن طريق اصدار الاوامر و هاي بعض الاوامر اللي جربتها:

- HIDE
- RUN
- SHOUT
- COME HERE
- WAIT

تبدأ المرحلة و انت في مستشفى و تشوف بنية صغيرة جنبك. المطلوب منك هو انك توصل لحجرة الاسعافات الاولية بالطابق الاول و انقاذ الفتاة الصغيرة عن طريق اصدار الاوامر المناسبة لها. بمجرد ان تخرج من الغرفة و تمشي قليلاً راح تقابل زومبي شكله قبيح و راح يلحقك هو المفروض اني ادخل الحجرة اللي جنبي و انخش فيها هناك و لكن الزومبي سريع و الامر تطلب مني عدة محاولات لاكتشف هالامر. بس اخر محاولة بعد ما شافني الزومبي و لحقني قدرت ادخل الحجرة و توقعت اني راح اكون بأمان كونه ما راح يدخل وراي و لكني انصدمت يوم شفته وراي...انا من غبائي قلت للبنية HIDE على بالي بتنخش في مكان نفس الاوادم و لكن كل اللي سوته انها جلست على الارض فقتلها الزومبي :cray: ..و لكن اللعبة بشكل عام اكثر من راااائعة و رسومها فظيعة و راح اشتريها ان شاء الله :)

3. The Suffering(اول مرة اسمع و اشوف شي عن اللعبة هاي الصراحة):

عرض اللعبة اللي كانو حاطينها على مدخل قسم الرعب كانت رائعة و تخلي الواحد يتحمس انه يلعبها. و لكنه للأسف بعيدة كل البعد عن الحماس. رسوم اللعبة جميلة للغاية و لكن اسلوب تحكمها سيء و يحرق الاعصاب و هذا كان سبب كافي ان ما العب فيها وايد.

يتبع...

4. Jak II

انا ما لعبت الجزء الاول للعبة لذلك ما اعرف اذا في فرق كبير بينهم. و لكنها بشكل عام كانت مسلية و الاقبال عليها كان جيد. تحكمها سهل و ممتع و المرحلة الي لعبتها بدت واااااااااسعة. (على فكرة شريتها اليوم )

5. Prince Of Persia

الصدمة الثانية لي بالمعرض..اللعبة هاي اسمها كان سبب كافي اني ما ادخل اي موضوع يخصها بالمنتدى و لا اذكر اني نزلت لها اي فيديو...و حتى بالمعرض شفتها صدفة لانها كانت بقرب JAK II.
تحكم اللعبة اكثر من رااااااائع و الافكار فيها فظيعة. بس قهرني فيها شي ان البطل ما يقفز :cray: الا بمناطق معينة (يعني مثلاً اذا مشي و وصلت لحافة معينة راح تطلع ملاحظة تقولك اضغط :x: لتقفز) من الحركات المسلية باللعبة هي انك تقدر تمشي على الجدار بشكل طولي و ثم تقفز للوصل لمناطق معينة او لتجنب هجمة احد الاعداء. للأسف ما قابلت اي عدو باللعبة عشان اجرب القتال فيها و لكن الطريقة اللي يحرك بها البطل السيف بدت مسلية :09: ...الصراحة اللعبة هاي دشت قائمة الالعاب المنتظرة عندي :)

6. Legacy Of Kain: Deffiance

اللعبة هاي ما طولت فيها..الشخصية اللي كانت متاحة للعب هي KAIN. رسوم اللعبة كانت رائعة و بيئتها تشبه الموجودة بـDevil May Cry (يا كثر الالعاب اللي تقلد هاللعبة ) اسلوب القتال فيها حسيته بطيييء و ما عجبني. و التحكم فيها جيد.

7. Rise Of Honor

لعبة Jet Lie للي ما يعرف اسمها...اسلوب التحكم فيها غريب...اول لعبة ما تستخدم فيها الازرار. اللعبة تعتمد بشكل كبير على عصا الانالوج اليمنى اللي عن طرقها تضرب العدو. يعني اذا العدو وراك اضغط خلف بعصا الانالوج عشان تضربه و اذا كان يمينك تضرب يمين و هكذا..و السلاح تستخدمه عن طريق زر :r2: و انت تصوب به عن طريق عصا الانالوج ايضاً. اللعبة لم تعجبني و اسلوبها ممل و بطيء. بصراحة لم اتوقع لها النجاح.

هاي كانت الالعاب الوحيدة اللي جربتها نظراً لضيق الوقت كما ذكرت. و لكنها كانت تجربة جميلة بالنسبة لي خاصة و انه اول معرض العاب ازوره بحياتي و ما اقدر اقارن جودته بباقي المعارض (رغم اني متأكد انه برع اروع :tongue2: )

الزوار لمعرض الـPS2 الصراحة كانو اكثر مما اتوقع...يعني كنت اتوقع حضور قليل جداً و لكن بالعكس كان الحضور جيد (و لو اني حاس ان معظمهم داش بالغلط :31: ) اكثر قسم كان عليه اقبال كان قسم الرياضة (صدق عرب :tongue2: ) و لكني تفاجأت يوم شفت ان اكثر وزار هالقسم كانو يجربون لعبة معينة و هي Tony Hawk: Underground...الصراحة ما توقعت ان بالخليج (و الامارات خاصة) في اهتمام بهالشكل باللعبة هاي.

بعد ما خلصنا و قررنا نطلع اتجهنا للمر المؤدي لباب الخروج و هناك لازم تعبي استمارة (نفس الـSurvey) تكتب فيها رأيك بالمعرض و بعدها يعطونك هدية عبارة عن:

1. كتيب صغير خاص بالالعاب المعروضة بالمعرض (ليست جميعها).
2. كتيب خاص بشركة EA و اخر اصداراتها.
3. DVD يحوي على عروض (Trailers) لاخر الافلام و بعض افلام الـAnime (معظمها قديم)

قبل ما اختم حبيت اسأل سؤال حيرني..و هو بعض الالعاب المفروض تكون يابانية (Ghost Hunter, Siren, Castlvenia) صح؟؟ لكنها كانت انجليزية بالكامل (الحوارات و القوائم)..ممكن حد يفهمني السبب؟؟

و بالنهاية ردينا بوظبي على امل زيارة المعرض مرة اخرى السنة القادمة ان شاء الله :)

و شكراً

:wow: - :wow: - :bigeyes:

مشكوووووووور!!!

والله انك كذا :biggthump :biggthump
وكذا :cool:

لكن نسيت تكتب ان هذا الموضوع برعاية ميداس للاثاث :tongue2: :tongue2: :jester:

و الله امبدع أسلوبك في نقل الحدث ينم عن موهبتك التعبيرة مشكور أخوي Magenta مرة ثانية و ثالثة و رابعة بعد :biggthump :biggthump :biggthump

و شكرا :D :D :D

ماشاءلله نقلتنا هناك :biggthump

عليك موضوع إبداع..ليش ماتكتب مواضيع بسيطة :tongue2:..

لعبت الألعاب قبل ماتنزل..حظك ><

اقتباس:

---

الصراحة تستحق الـ7.3 اللي حصلت عليها من Game Spot (اذا غلطان ممكن حد يصلحلي)

---

اللعبة اخذت تقدير 9/10 من آي جي ان..للحين ماعطاها تقدير جيم سبوت ^^
لكن انا اللي متوقعه لها ان في أكبر مشكلة لها هي التكرار..وآي جي ان يقول الكاميرا فيها مشاكل بعد..

اقتباس:

---

The Suffering

---

هذي اللعبة من اكتيفيشين..لاتتوقع منها اشياء كثيرة -__-

اقتباس:

---

5. Prince Of Persia

---

هذي اللعبة قوية ^^
اخذت جائزة أفضل لعبة أكشن مغارات بمعرض الإي3..

اقتباس:

---

Ghost Hunter, Siren, Castlvenia

---

كاسلفينيا النسخة الانجليزية منها هي اللي راح تنزل أول..
سايرين..اممم ما اذكر بس حسب اللي اعرفه ان اليابانية أول :/
جويت هنتر النسخة الانجليزية أول..

صراحة الموضوع ممتع شلون لو نروح هناك :bigeyes:

مشكور ماجنيتا ^_____^

مشكور اخوي وبصراحه ممتاز انك نقلت الاخبار للناس :biggthump


===========================================
Magenta
و من قوم واساب يقعدون يغنون و يأذون الخلق باشكالهم.



whatzup :tongue2:

وأنا أقرأ الموضوع حسيت أني هناك :biggthump ..أسلوبك ممتاز في نقل الأحداث ..

خسارة ماجربت GT4 :33: ..

مشكورين جميعاً على الردود

مادري شو عيبكم في الاسلوب...نص الكلام عامي و نصه فصحة :31:

اقتباس:

---

اللعبة اخذت تقدير 9/10 من آي جي ان..للحين ماعطاها تقدير جيم سبوت ^^

---

مادري بس اذكر ان في موقع عطاها تقريباً 7.3 :33: المهم ان هالتقدير يناسبها :09:

اقتباس:

---

اخذت جائزة أفضل لعبة أكشن مغارات بمعرض الإي3..

---

الصراحة تستحق اللقب و بجدارة :biggthump

اقتباس:

---

خسارة ماجربت GT4

---

ربيعي لعبها :)
هاللعبة كانت عليها زحمة مش طبيعية :o
و مكانها غلط...كانو حاطينها قريب من المسرح عشان جي ما تقدر تلعب على راحتك :33:

اخخخخخ ما شاء الله عليك

عندكم معرض بلاي ستيشن..

تخيل هيدو كوجيما يحضره :09:

مشكور اخوي على النقل الاكثر من رائع

العفو اخوي :)

مشاري

Game Spot عطى كاسلفانيا 7.7 و القراء عطوها 7.6 :D

توني شفته بالموقع :tongue2:

ممتاز :biggthump

لو اقدر اروح هناك ما اخلي لعبة ما اجربها :09:

يعطيك الفق الف عافية على النقل المباشر :reporter:

الحمد الله

كان المعرض جيد جدا د

وكان عليه إقبال كبير

ولكن كانت ناقصتنه وايد ألعب حلوة

وافتقدت ألعاب الار بي جي (لعدم وجود اي لعبة )

واحنا نفتخر أنه يكون عدنا معرض بلاي ستيشن عدنا هني في دبي :33:

ومثل ما قالوا الاخوان من أكثر الالعاب اللي كان عليها إقبال GT4 وكان عليها زحمة وايد

والحمد الله يتني فرصة عشان العب

وكانت ممتازة :biggthump