نداء هام لجميع رسامين الانمي في المنتدى

نداء هام لجميع رسامين الانمي في المنتدى
قررت انا و بعض المشرفين في المنتدى ان ننشأ منظمة تسمى منظمة رسامي الأنمي العرب
(arabic anime artists association (AAAA
مهمة هذه المنظمة ان تكون كجاليري لجميع رسامين الأنيمي العرب الجيدين و نشر اعمالهم في جميع المواقع و المنتديات الأجنبية ليعرفوا قدرات العرب في الرسم و خصوصا في فن الانيمي. و سيكون لكل عضو معجبين من جميع أنحاء العالم و قد تأتيك فرصة العمل كرسام باحدى الشركات يوما ما.

و على كل من لديه موهبة في فن الأنيمي سواء بالرسم او التلوين (باليد او بالكمبيوتر ) او التصميم او حتى عمل مقاطع الفلاش و يريد الأنضمام بالمنظمة ان يتبع الخطوات الآتية :
1- ارسال رسالة الى العنوان animearabartists@yahoo.com
2- ارفاق افضل عمل له او اي عمل مميز بالنسبة له و متعلق بفن الأنيمي
3- أرفاق صورة توقيعه في المنتدى
4- كتابة عنوان صفحته الألكترونية (اذا وجد )

سيتم ارسال رسالة بها التعليمات المطلوبة لاحقا لكل من تم قبوله بالمنظمة.

.......للرفع

ما في داعي للرفع أخوي ولدبيان. :)

أنا بثبتلك الموضوع.


ومثل ما قلت لك على الخاص, أنا أبغي أشترك معاكم. -_^


حياك.

المهتمين يشاركون يالله. :)

شكرا جزيلا يا رواية ..انا ما وصلني رد منك فا توقعت انك مو مهتم للفكرة وايد
على العموم احنا راح انطرش دعوات لبعض الرسامين المميزين من امثالك الي راح ينقبلون بالأنضمام علطول..و الي توصله الدعوة بس يبلغنا بالمعلومات الي احنا نحتاجها و خلاص

السلام عليكم
اللي يقدّر موهبته هو بس اللي راح يشارك,المفروض كل عضو رسّام يكون مُتعدّد المشاركات في أماكن مختلفة و لو أجنبيّة,مثلاً فان آرتس و معروفين أعضاء من المنتدى لهم تجارب معاها..
المفروض الأعضاء ما يحصرو خبرتهم في مكان واحد و لا يحتكر فنّه لطبقة معيّنة..و الا ما راح تُسمّى خبرة..
و بصراحة فكرتك ما عليها كلام يا أخ ولد بَيان,الحمد لله يللي حسّستني أن في أحد على الأقل يهتم أن هالمواهب مو قاعدة تضيع هدر!
و بعدين اللي يرسم يرسم و يرسل شنو خسرانين لو شاركو الشباب!!
تخيّل لما تدخل موقع فاينل فانتسي مشهور و تشوف ناس يتداولو رسوماتك و يبحثو عنها!!
أو أشخاص يراسلوك يستأذنوك يسعرضو فنّك في موقعهم..الشرف يعود لمن في هالحال! الى اللي يستضيف رسومك عنده أو اللي يرسم و تُعرض رسومه في موقع مُحترم..
و هذي بداية و مُبادرة طيبة منكم يا اخوان أنكم تسوّو هذي المجموعة أتمنّى لكم التوفيق و النجاح..
و ان شاء الله أكون من المشاركين...

يا سلالالالالالالام....شوي شوي الأحلام تتحقق :D هذي المنظمة ما تتفوت.... :biggthump
ودي أشارك معاكم... :ciao:

شكرا اخوي الوكارد لتوضيح فكرة المنظمة اكثر للأعضاء.. و مثل ما قلت الشخص ما راح يخسر شي اذا شارك بالعكس اعاماله راح تنتشر اكثر و بيصير معروف اكثر. انا ما يهمني اني اصير رسام كبير لكن احب اني اشوف ناس مهتمه فيها و عاجبتها و تبيني ارسم لهم اكثر و اكثر
أي شخص ممكن انه ينضم بمنضمتنا و كل الي عليك انك تسويه هو الخطوات الي شرحتها في البداية و بعديم نبي اعمالك و بس..كل الشغل بيكون علينا مؤسسين المنظمة

WOW! @__@ this sounds so awsome~!

سلام عليكم .. أنا أيضا .. يسعدني أن أكون من المشاركين .. إذا تم قبولي .. و عندي سؤال أخي العزيز ولد بيان .. عادي لو تأخرت عليكم شوي ؟؟؟

اخوي ميثم ممكن اتقدم طلبك بأي وقت تبي..بس ترى الطلب ما راح ياخذ منك 5 دقائق و كل ما تصير عضو ابكر بتكون كعضو مميز اكثر

السلام عليكم
الفكرة حلوه الصراحة وعجبتني جدا! :)

عندي سؤال...
هل راح يكون في موقع خاص لهالمنظمة؟
والا مجرد جروب؟

سلام :D

لا اخوي راح انسوي انشالله موقع خاص بالمنظمة
بس المشكلة انه انا و وحدة من المشرفات الي مسؤولين عن تصميم الموقع و اهي ما تدخل النت وايد و انا ما عندي خبرة كبيرة في تصميم المواقع..اذا في احد عنده خبرة و يدخل النت بصورة مستمرة و يحب يساعدنا يريت يبلغني..و ترى الموقع راح يكو شكله بسيط لكن فني و جميل هذا في البداية طبعا و انشالله راح انكون بتطور مستمر مع الوقت

اقتباس:

---

بس المشكلة انه انا و وحدة من المشرفات الي مسؤولين عن تصميم الموقع و اهي ما تدخل النت وايد و انا ما عندي خبرة كبيرة في تصميم المواقع

---

:31: انا مشرفة؟؟؟
حدي مراقبة :o

^^ انا مع ولد بيان في الموضوع..
وبما اني اشتغل حاليا على رسوم حق موقعي اليديد بدال اللي تسكر
وطبعا مب انا اللي سويت الموقع اليديد... خبرتي في تصميم المواقع بسيطة
بنحتاج شخص يكون معانا ويكون مسؤول عن الموقع كله...

فكرة الموقع ان نحط فيه عينة من رسومات الأعضاء المشاركين معانا فيه ووصلات حق مواقعهم الشخصية والمواقع اللي ممكن تجوف فيه رسوماتهم
ممكن نحط في الموقع نفسه جاليري يشمل رسوم الأعضاء ونخليه مثلا للفان ارتس (ترى اللي يجذب الناس اكثر حق الموقع هو الفان ارتس فحاولوا تكثرون منهم)
وبعد ممكن نحط منتدى صغير في الموقع حق الاعضاء يتناقشون فيه ^^
يعني في أفكار وايد.. بس اهم شي يكون عندنا شخص ممكن يصمم لنا الموقع...

اذا حد مستعد يا ريت يقول لنا بس يكون مستعد انه يلتزم...
الطلبات ترسل على الإيميل التالي
animearabartists@yahoo.com
وأكيد بنوافق على المشارك وما في شروط الا ان يكون ملتزم ورسمه قوي..
وأغلب الرسامين معانا هني في المنتدى ما شاءالله عليهم رسمهم قوي وحرام ان العالم ما يدري عنهم

ومثل ما قال الوكاردو.. لازم ننشر رسومنا
^^ ترى تتيكم عروض.. وتييكم بعد طلبات من ناس عندهم مواقع حق الفان ارتس يطلبون منكم الاذن انكم ترسمون لهم رسوم معينة مقابل اي شي تطلبونه او الاذن انهم ينشرون رسومكم في موقعهم (صارت لي اكثر من مرة) هاذي غير رسايل الفانز اللي تيي على الايميل.. يعني شي الصراحة يفتح النفس.. خصوصا لما يكونون اجانب وينبهرون ان في العرب ناس يرسمون بهالطريقة...

:ciao:

بس في شغلة صغيرة حبيت اضيفنها على اختي اورانج رود..
فكرة المنتدى اهي ممكن انسويها بعدين يعني مو بالبداية..و مسألة الفان ارتس اصلا جميع رسوم الأعضاء هي فان ارت لأن الفان ارت هي رسمة لشخص عادي غير محترف يحب فن الأنيمي..
ترى فيه افكار وايد للموقع بس راح نبدي شوي شوي..يعني انا مثلا امفكر انسوي قسم تعليمي حيث كل عضو من المنظمة يحط شرح لطريقة هو خبير فيها كطريقة التلوين في الفوتوشوب مثلا..طبعا الأفكار هذي راح اناقش فيها الأعضاء و نطلب رايهم و افكارهم و المشاركة غير اجبارية بل اختيارية

اقتباس:

---

و مسألة الفان ارتس اصلا جميع رسوم الأعضاء هي فان ارت لأن الفان ارت هي رسمة لشخص عادي غير محترف يحب فن الأنيمي..

---

لا اخوي ولد بيان ^^
الفان ارتس هي الرسوم اللي يرسمها الهواة حق شخصيات المسلسلات او الالعاب..
بمعنى ثاني انت ترسم قصص ورسوم حق شخصيات مشهورة مب شخصياتك ^^