السلام عليكم ورحمة الله وبركاته
يعلم الله اني ساكت وماكان لي نية اتهكم على ذا القناة واخسر وقتي (طالي عمري) :tongue2: على زبالة زي كذا
لكن اللي شفته اليوم وانا اقلب بالقنوات وبالغلط وللاسف الشديد اخطأ الريموت ووصلني للقناة الرياضية
في صيف 1423 اعلن الافغاني وزير الاعلام في السعودية فارسي (حتى طبقو احتراف الاجانب في الوزارات)
عن قناة رياضية تهتم لامور شبابنا المغلوب على امره وانها ستكون متنفس للشباب وسيحصلون على حقوق دوريات العالم الاسباني الايطالي والفرنسي واذا بغيتو الانجليزي تامرون امر بعد
بعدها بعدة شهور اعلنو عن بدأ البث التجريبي واستمر البث التجريبي اكثر من سنة وبذلك يحطم الارقام القياسية العالمية كاطول فترة تجريبية في العالم
المهم يعلم جميعكم عن الوعود المنشودة من قبل فارسي سعادة طال عمره ولكن يتفاجأ ببرامج هذي القناة و بدلا من متنفس للشباب اصبح وسيلة قهر اضافية لهم
لله يامحسنين
يظهر علينا احد مسؤولين القناة ويقول القناة هي الوحيدة بلا موارد مادية
ياعيني اجل موكلين لكم ناس يبيعون مناديل عند الاشارات عشان توفرون موارد مادية
طيب ياخي وين الجمعيات الخيرية عنكم والا الضمان الاجتماعي
قالها المسؤول ليتحجج ويتعذر ولكن صدق من قال عذر اقبح من ذنب
الاستديو الخارق
يعلم جميعنا ان لكل قناة عدة استديوهات ولكن نفاجأ بقناتنا الموقرة بان كل برامجها في استديو واحد وكأنهم حاجزين غرفة بفندق
يعني باعرف برج كبر البعير وماقدرو الا على استديو طيب على الاقل استأجرو شقة في عمارة جنب البرج عشان تتوسعون :أفكر:
برامج كيف الحال
يبدأ بث القناة في الساعة 5 عصرا هههههه عسا ماشر يابوي صار ملهى ليلي موب قناة
لكن معليش يمكن برامجهم ثقيلة ونادرة عشان كذا وقتهم ثمين وقصير
يبدأ افتتاح القناة بالسلام الملكي الممل والعلم اللي له 30 سنة ماغيروه والله لو تشوفون العلم الحين صاير لونه بني
ثم الاخبار الرياضية ويبدأ المذيع يقرأ الخبر من الورقة اللي امامه يعني عينه على الارض اجل مالها داعي الكاميرا طيب وكانه من طلاب 5 ابتدائي يقرا في الاذاعة الصباحية
لكن معليش توهم بث تجريبي
برنامج شباب السخيف مفروض يغيرونه لبرنامج لقافة
اجل يطبون على واحد مسيكين ويقولون نبي نركب معك ونصير اصدقائك ويلفلفون معه دون احترام للحرية الشخصية واللي سلبت اساسا من قبل الحكومة الرشيدة
نجي للبرامج الوثائقية
البرامج المختصة للدوري الايطالي كلها تبرع من ابوظبي الرياضية وباقي البرامج نشوفها في كل القنوات يعني لاجديد
تغطيتها للدوريات
تغطية الدوري السعودي بوجود محللين قلق زي ماجد ونجيب
اوكيه لاعبين متميزين لكن موب شرط يصير متميز في التلفزيون
ماجد عبدالله وانا اتابع كل تحليلاته وكان يسولف مع اخوياه وفاقد ابجديات التحليل
ونجيب جاي من تونس وزي الببغا يردد نفس كلام ماجد
اما تحليل الدوريات العالمية
هههههه ياشباب عمركم شفتو تحليل مباشر لمباراة مسجلة ههههههه ياخي قسم بالله يوم باسجل تحليلهم ذا ومباراتهم المسجلة وارسلها لبرنامج اميركان فانييست هوم فيديو وتشوفون ان ماخذت ال100 الف دولار
لا وعاد جايبين محلل مصري يعني اني جايبين خبرة قسم بالله انه ماكان طبيب بيطري احلق شنبي ولا المقدم ياشيخ شكله كان مدرس رياضة وبما انه متخصص ويعرف واحد بالقناة وتوسط له وصار من كبار المذيعين ماشالله عليه
نجي لعرض برامج القناة بعد انتهاء الارسال
بالله عليكم ذي موسيقى تنحط في قناة رياضية ياخي تحس انك داخل مطعم خمس نجوم والا جدول البرامج جاي ثابت بدون اي فنييات اه بس يابوظبي الرياضية اذا خلص الارسال يتم عرض اخر الاخبار وجدول البرامج ويعطيك احساس بان القناة 24 ساعة
بالله عليكم شوفو جدول عرض البرامج انواع التفصيل وكان القناة موجهة لبهايم مايفهمون
اجل كاتبين (مباشر-كرة قدم-ريسنق*فيلز-الدوري الارجنتيني-حصري) ياخي طيب كان كملتو معروفكم وحطيتو تشكيلة الفريقين بعد
والا ركزو على كلمة حصري ههههههه ياهوووه ياكايدين صالح كامل اجل احتكرتو الدوري الارجنتيني ولا من زود الفرحة حاطين حصري
عقبال ما تحتكرون دوري الاكوادر وكيدون صالح كامل مرة ثانية
اعذروهم توه بث تجريبي تو الناس وش فيكم مستعجلين
معلقين بتاع كلو
يبدا المعلق الموقر بتعليق على مباراة لدوري كرة الطائرة في العصر
وبعد المغرب نفس المعلق يتجه لتعليق مباراة لكرة السلة
وبعد العشاء يستعد لتعليق مباراة لكرة القدم بسم الله عليه موهوبة الله يحفظه
مع العلم ان المعلق نفسه كان حكم سابق في كرة اليد
وبعد يوم شاق من التعليق يتجه في الصباح الباكر لعمله في الوزارة (والله من التخصص)
نجد صعوبة المعلق في نطق اسامي اللاعبين
في الدوري الفرنسي اجد المعلق الموقر اصراره على نطق اسم اللاعب سافيو (لاعب بوردو) بسافيولا وطول الوقت وهو مصر لدرجة ان برشلونة بغو يرفعون قضية عليهم
لكن تم مراعاة حالة القناة لانها لازالت في طور البث التجريبي
والقائمة تطول جدا ونتعب لو نعدها كلها
لكن اعذروهم ياناس توهم قاعدين يبثون تجريبي وش فيكم انتم
هذا ماكان في خاطري وداري ان الموضوع اي كلام لكن اعذروني
واترككم مع الصورة اللي اضحكت العالم
واذا ماكانت واضحة فيمكنكم مشاهدته عبر القناة لاني مصورها تو
لكن انتبهو من الموسيقى الشاعرية ولاتقلبون رومانسيين
صح بغيت اقولكم ترا بعض الاحيان يحطون موسيقى تايتانك (من جد) لاتفوتكم وحصرية بعد
تحياتي لكم :)
