قصيدة ساخرة :انقطاع الكهرباء سبب العنوسة في البحرين

ما في بانكة ولا في بعد ايسي .... بس امطامس ابكل برجة روّيسي !!
=============================================================

كلما نتصل للكهربا مشغول .... وكل واحد يشلّخ علهواه ويقول .........

تصليح الخلل يمكن سبوع يطول ............. ويمكن سنة ..ونوضع خطّة مدروسة !!
=============================================================
واحد قال يومين ويصلحوها ..... والـ أمّه كسيفة خل يسبحوها !!

أمهم هذي ولازم يفرحوها ....... وباجر تظل بالحر دوم مرفوسة !!
=============================================================
وواحد قال لي هلشّبْكة خربانة ............. شبكتنا عتيقة وتسوى بس آنة !!

يومين وترد الناس طربانة ............ والدّبدوب يرجع يطوي مجبوسه !!
=============================================================
وواحد قال هذا فيوز متفجّر .......... من مخّ المقاول هلّي متحجّرْ !!

وانا متزقرت وكاشخ ومتعطّر ......... لعنهم ربي يعني الكشخة معفوسة !!
=============================================================
وقالو بلإذاعة كلّه من ألبا ........... نحيسة وشافت الأجواء متقلبة ...

قامت سحبت التيار من قلبه .......... والـ راد العِرِس إمكنسلة اعروسه !!
=============================================================
دخلت اتسبّح ولنّ اسمع الريدو ............ يقول بمايكم نقصو ولا تزيدو !!

ولن خوية سحبني ويسمت بإيدو .......... حكيم اللي على مايه صبح لوسة !!
=============================================================
لن الماي بس شويّة ويخلص ...... ويظل بالعافية الحر باجر ايفلّص !!

واللي انخمد يقعد وجهه امغمّص ........ ويظل لوزار بعد الكشخة ملبوسه!!
=============================================================
أختي قاعدة اتدعّي اعلى لحكومة ............ ويمها امن لكلينس جمّعت كومة !!

تقول ااااه يقطع عمر هلبومة ............... حتّى البونياني فصخ كبوسه !!
=============================================================
وأبويي قاعد اعلى الباب بوزارة ............ يقول ااااه يلعنها من اوزارة !!

ظلام البيت ومحّد يا خلق زاره ............... عساهم ريح شوف العدلة منكوسة !!
=============================================================
وامي قاعدة بمشمر على العتبة ............ تجر بيت العزا وتقراه ولا اتكتبه !!

قِلِت قومي ادخلي وفلتت علَي خِشْبة ............... وقالت يلوكيح البيت لا تدوسه!!
=============================================================
طلعت بموتري والايسي برّدني .......... جنت راقد وحر البيت شرّدني !!

شيقعدني وفي هالحر ويش يرقّدني ؟؟......... واحس من القهر عبراتي محبوسة !!
=============================================================
رسايل بُشرى للمعرس يرسْلوها ............ وبعْد القَرَف هلملحة يغِسْلوها !!

وْتِغنّي امّ القراميل وينسْلوها ............ وابو كشّة ...فرك من فَرحته اضروسه ؟!
=============================================================
واخيرا عوّدت هلكهربا الكجرة ...................... عقب مالوّعت جبدي وعقب حسرة !!

عسى بس ما تعود وتنقطع بكرة ................ ثبت لنها سبب للحرّ والعنوسة !!
=============================================================



سامر