-
فهد & نورة
نوره بنت مملوحه وبريئه آلي درجه السباهه بأولى ثانوي عندها اخت واخ اكبر منها ( نجود-ماجد) وكم بزر اصغر منها . في رمضان كانو بيروحون لمكه بعتمرون هي وامها ونجود وماجد فيوم كانو في مطار جده من الزحمه ضاعت عنهم وزياده على كذا كانت متغطيه فانواع السباهه وجوالها بشنطتها وشنطتها مع امها تورطت قامت تناظر تروح تجي مالقتهم قال مافيه الا اني اخذ جوال أي احد مشت شويه لقت حرمه واقفه ومعها كم بزر
نوره: ياخاله انا ضايعه عن اهلي وودي بس اكلمهم عشان اشوف وينهم
الحرمه: والله ياحبيبتي جوالي مافيه بطاريه بس انتظري هنا خمس دقايق يجي ولدي فهد وتكلمين من جواله
واقل من خمس دقايق والا فهد مقبل ( يمكن عمره مايتعدى 18 سنه وسيم طوله حلو اسمر غمازاته تجنن ومركب بريسس تقويم )
ام فهد: فهد عطني جوالك هالبنيه-تأشر على نوره– ضايعه عم اهلها وتبي تكلمهم
ويطلع فهد جواله من جيبه ويعطيه نوره من الربكه نست نوره رقم ماجد اخوها تحاول تتذكر عجزت قالت مافيه الا اني اكلم جوالي دامه معهم وتدق ولا احد يرد تذكرت انها حاطته عالسايلنت ياربي وش هالورطه ماحفظت رقم جوال امها ولا نجود اختها ولا حتى ابوها اللي بالرياض ماحفظت غير رقم ماجد ونسته بعد وتناظر ساعتها والا لها ساعه ونص مضيعه اهلها وماسكه ذا الجوال تضغط رقم وترجع تمسحها
ام فهد : عسى ماشر وش فيك حبيبتي؟؟
نوره وخانقتها العبره : نسيت رقم جوال اخوي وهو الوحيد الي كنت حافظته من جوالات اهلي...
ام فهد : طيب دقي على بيتكم
نوره :مافيه احد وجوالي مع الوالده لكني حاطته عالصامت
ام فهد تناظر ساعتها : وجهه اهلك على مكه انشالله
نوره: ايه
ام فهد : اكيد حاجزين لكم سكن بس تدرين وينه فيه ؟؟
نوره: بالهوليدي ان
ام فهد : فهد ياابوي
فهد : سمي يمه
ام فهد : حجزنا وين
فهد : بالهوليدي ان
ام فهد : تدرين يا ........؟
نوره: نوره ياخاله اسمي نوره
ام فهد : توكلي معنا ومايصير خاطرك الا طيب وبنحطك عند اهلك واحتياط ارسلي مسج خبريهم انك مشيتي لمكه
نوره: بس !!
ام فهد : لا بس ولا شي بس يالله مشينا
نوره : انشالله
ويطلعون من المطارويوقف فهد تاكسي وحمل الاغراض وركبو قبل لايمشون قال واحد من البزارين انه يبي حمام ويقول الثاني انه يبي حمام بعد راحت ام فهد ومبزرتها للحمام تاركه فهد ونوره بالسياره وسواق التاكسي شافهم مطولين قام نزل يسولف مع اخوياه , فهد وده يقول شي ......
فهد : من وين يانوره ؟؟
نوره متروعه : وش عرفك في اسمي ؟؟!
فهد : سمعتك وانتي تقولينه للوالده بس ماقلتيلي من وين؟؟
نوره من دون نفس ترد لانها موصله معه ومالها خلقه : من الريـــــــاض
فهد التفت ورى عليها : وشفيك !
نوره : مافيني شي
فهد : الا فيك شي
نوره : من متى المعرفه عشان تمون وتسولف
تكتم فهد ولاعاد نطق جت ام فهد وركبت هي وعيالها السياره كانت شوي صككه فاخذت نوره بزر صغينون وحطته على رجولها على بال مايركبون كلهم المهم قامت ام فهد تقول : هاتي نواف لا يضايقك –( نواف ذا البزر اللي بحضن نوره مايتعدى ثلاث سنين عمره )- ونوره تقول : خليه ياخاله لا يضايقني ولا شي ومضت اول ربع ساعه وهم رايحين لمكه بهدوء تام مااحد ينطق نوره تسأل نواف
نوره: وش اسمك يابابا ؟
نواف : نواف ..... مين انتي ؟؟؟
نوره : انا نوره
نواف: نوره مين ؟؟
نوره : نوره الفلاني (قالت عايلتها )
لحظتها التفتت ام فهد على نوره وقالت : نوره ايش .... نوره : نوره الفلاني
ام فهد : بنت سليمان الفلاني ؟؟
نوره : ايه
ام فهد : ابو ماجد ماغيره
نوره : ايه تعرفون ابوي انتم ؟؟
ام فهد: ايييييه عشره عمر كان مع المرحوم كان رفيق له درسو سوا
نوره : ومن ينقالكم ياخاله ؟؟
ام فهد : الفلان
نوره : سعود الفلان ايييييه تذكرت هذا الله يرحمه عزيز على الوالد
وطول الطريق وهم داقينها سواليف ام فهد ونوره وفهد ساكت بس مستمع وصلو لمكه ونزلو الفندق
نوره : معليه ياخاله تخلين فهد يسأل عن اهلي ان كانو جو والا لا
ام فهد : ابشري ان جا فهد بقوله
جا فهد قالتله امه : رح واسال ان كان وصلو اهل نوره والا لا
فهد : ابشري يمَه
راح فهد وسأل والاهم مابعد وصلو ضاق صدر نوره شوي المهم رقت معهم لشقتهم ودخلو ونوره مافكت غطاها وام فهد فصخت عبايتها وااخذت راحتها وكان فهد رايح يجيب عفشهم
ام فهد : خذي راحتك يانوره اعتبري نفسك في بيتك
نوره مبتسمه : تسلمين ياخاله
ام فهد : افتشي ماعندك احد فهد مب من كبره توه بثاني ثانوي
نوره ماصدقت تطلع هالكلمه منها بلاها انكتمت , فكت نوره طرحتها وحطتها على كتوفها بس مافصخت عباتيها وقعدت على الكنبه وام فهد رايحه جايه تجمع وتحط وتشيل دخل فهد ولقى نوره بوجهه قاعده سطل حست نوره ان الولد بلم فقالت خلني اضيع اموقف
نوره : ماجو اهلي
فهد مبقق عيونه : لا بس حطيت خبر عند الرسبشن انهم اذا جو يدقون علينا هنا بالشقه ....... وطلع جواله ومده لها
نوره : وشو
فهد : خبري اهلك انك معنا
نوره : ارسلت بمسج يوم انا بمطار جده
فهد : قوليلهم انك مع اهل سعود الفلاني
نوره : طيب ... ومدت يدها بتاخذ الجوال وهو ماشال عينه عنها خاشه مزاجه مره ... ونوره قاعده تكتب مسج ويرن الجوال وتناظر والا هو رقمها وردت على طول
نوره : هلا
نجود : وينك فيه
نوره : انا مع اهل سعود الفلاني
نجود : هي هي من جدك انتي
نوره: والله العظيم
نجود : طيب للان انتي بجده
نوره : لا انا الحين بمكه ... وانتم
نجود :حنا ندور عليك يالشيخه للان بجده طيب وينك فيه بمكه
نوره: بالهوليدي ان
نجود : اوكي حنا ساعه ساعتين وبنجي الا تعالي جوال مين هذا ؟؟
نوره: جوال فهد ولد المرحوم بعدين ترى مب وقت اسئلتك الغبيه هذي
نجود : طيب باي
نوره: باي
فهد كان قاعد يسمع كل كلامها واعجبته زياده
أذن العشا جت ام فهد وقالت لنوره :بنروح نصلي تجين معنا ؟؟
نوره تنتظر فهد يشيل عينه : خاله معليه اكلمك شوي .... فهمها فهد وقال: يمَه بسبقك وباخذ فارس اخوي معي
ام فهد : توكل على الله .... وطلع فهد واخوه
ام فهد : آآآمري
نوره : خالتي انا مااصلي فخليني مع نواف بحجه اقعد مه نواف
ام فهد : ايييه على العموم كنت باخذ نواف بس دامك بتقعدين خلاص خليه معك
قعدت نوره مع نواف وصار يموت فيها ( بزر ونشب ) جت ام فهد وعيالها من الصلاه ودخلو وسلمو
فهد : شكلنا يمَه بناخذ عمرتنا الفجر اقل زحمه
ام فهد : ايه والله زحمه موووت تصدقين يانوره صليت عالدرج ... الا صح يانوره يقول فهد ان اهلك كلمو
نوره عرفت ان الاخ كان قاط اذنه : يقولون ساعه ساعه ونص وهم هنا انشالله
ام فهد : الله يوصلهم بالسلامه انا بنزل بدور أي سوبر ماركت بجيب اغراض وباخذ فارس معي تبون شي؟؟
فهد : اجي معك يمَه؟؟
ام فهد : لا خلك هنا عشان اذا جو اهلها يكون فيه احد
نوره ودها يضف وجهه : عادي ياخاله ترانا في مكه خله يروح معك
ام فهد: لالا خليه هنا ... الا وش تبون عشا
فهد : بيتزا مشتهيها من امـــس
ام فهد : يالله يافارس قم مع السلامه .... وصكت الباب
فهد كان قاعد على كنبه ونوره على كنبه ثانيه طبعا وكان على حضنها نواف وفيه النوم وكان الجو هاااادي ومحد يتكلم ... نام نواف وقامت نوره وشالته وحطته على السرير ورجعت قعدت عل كنبتها (( عاجبها فهد بس مسويه ثقل ))
فهد : نام ؟
نوره : ايه
فهد وهو يزين احرامه : عساه يكمل للصبح
نوره:......
فهد : ماتوقعت شكلك كذا
نوره باستهزاء : ليه متوقعني حلوه
فهد : لا كنت متوقعك شينه بس طلعتي العكس تماااااااما
نوره وحمرت خدودها : من ذوقك
فهد : لا والله جد
نوره وخلاااااص تقطعت : شكرا
فهد : صف كم انتي؟؟
نوره: اولى ثانوي ..... وانت؟؟
فهد : ثاني ثانوي
نوره : علمي والا ادبي؟؟
فهد : علمي اكيد
سكتو شوي ..............
نوره: كن اهلي طولو
فهد ماد جواله : خذي كلميهم
نوره قامت بتاخذ الجوال وصقعت ركبتها بالطاوله
فهد : عسى ماتعورتي
نوره: لالا
فهد مد جواله مره ثانيه : تفضلي
نوره اخذت الجوال والا هو كاتب رساله :لاتفهميني غلط بس والله اعجبتيني واسمحيلي احفظ رقمك عندي
نوره : منتب صاحي هذا واهلنا عشره
فهد : لاتردين الحين فكري
نوره : لا وانت ووجهك تبيني اكلمك هذا اللي ناقص
فهد: ولو ماتبين اكلمك من عيوني بس اسمحيلي بالمسجات
نوره : ماهقيتها تطلع منك
فهد: والله انك خشيتي مزاجي بس لو سمحتي لاتفهميني غلط
نوره : قفل على الموضوع
سكت فهد ... دقت نوره على جوالها وردت اختها
نجود : هلا
نوره : وينكم طولتو ؟؟
نجود : تونا مطولين صار فيه شويه لخبطه وتأخرنا
نوره : يعني متى بتجون
نجود : على حدود الساعه وحده
نوره مقاطعتها: وخير انشالله بقعد عند الناس
نجود : عادي كنهم اهلك ذولا ... تدرين لو صار أي شي جديد بكلمك
نوره : لحظه لحظه الحين اذا سكرت منك تقفلين جوالي فاهمه وياويلك تكلمين منه كلمي من جوالك
نجود وهي تضحك : طيب مع السلامه
نوره : بااااااي ...... وبسرعه ارسلت الرساله اللي كن كاتبها فهد لجوالها ورجعتله الجوال
فهد : بتنامين عندنا اليوم؟؟
نوره : الله لايقوله
فهد: ممكن اسأل
نوره من دون نفس : اسأل
فهد: انتي ليه كارهتني مع انك ماتعرفيني وهذي اول مره تشوفيني
نوره تصرف : انا بروح اشوف نواف عشان لو قام ماينهبل بالظلام
فهد : خليك قاعده هنا ودي اسولف
نوره: ياخي وش تبي ؟؟!
ويوم ردت عليه نوره والا هذا نواف واقف عند الباب يعرك عيونه وفيه الصيحه على طووول راحت له نوره وشالته وضمته وباسته وهو مستسلم لها ... ورجعت قعدت على الكنبه .. وفهد يقول في نفسه ( ليتني مكانه )...
فهد : شكلك اعجبتي نواف
نوره : يمكن!!!
فهد : بس مو مثل مااعجبتيني ....
نوره خلااااااص انهبلت لكنها اكتفت بابتسامه
فهد: ما احترَيتي
نوره : الا والله مت حر
فهد: افصخي عبايتك
نوره : نعـــــــم ؟!
فهد : اظنك سمعتيني
نوره : ودي بس صعبه
فهد: لاصعبه ولاشي
نوره : وش بتقول امك عني
فهد: معليك منها
نوره : لالا مااقدر فشيله
فهد : على راحتك .... نواف غني لنوره يالله
نواف : يا يا يا يايا حبيبي
فهد: لا قل يارب وش هالجنون اللي سكن دمــــي
كملها نواف وطبعا نص الكلمات غلط ولاتنفهم .. ونوره لاشعوريا قامت تغني مع نواف
فهد: نوااااااف حلوه نوره والا وعه
نواف: حلوه
سكتو شوي بعدين قال فهد: للان رافضه سالفه اني اكلمك
نوره : وماراح اقبلها
فهد: طيب بطلب منك طلب ولاترديني
نوره : وشو
فهد: ابيك تغنين وبسجل صوتك
نوره : نعم ؟!
فهد : تكفين طلبتك
نوره : لا ويـــــــــــــــــــــــن
فهد: عشاني
نوره : لالا
فهد: الله يوفقك
نوره : ياربي وبعدين معاك قلت لا يعني لا
فهد : ابد ابد
نوره : ابد
رجعو سكتو وقام فهد يستهبل على نواف وراح الوقت ودخلت الام ومعها اكياس كثيييييره قامت نوره بتاخذ منها الاكياس وفرشت سفره عشان العشا
-
مشاركة: فهد & نورة
ام فهد: نوره حبيبتي مامليتي وانتي بالعبايه
نوره : لاعادي ياخاله
ام فهد: لاتستحين من فهد تراه مادرى عنك
نوره ما صدقت قامت وفصختها فهد خلاااااااص بينهبل جسمها حلووو ولبسها ( بنطلون جينز شارلستون وبلوزه بيضا ) وشكلها كامل كان روعه قعدت نوره مقابل فهد وجنبها ام فهد من جهة وفارس من جهة وفهد بين دقيقه والثانيه يطالعها خلصت نوره قبلهم فقامت تغسل وفهد يراقبها ... نوره وهي رايحه تغسل سمعت كل الحكي الي دار بين فهد وامه
ام فهد : استح ياوليدي احرجت البنت بعدين لاتفكر تسوي أي حركه لاننا بمكه والذنب هنا مضاعف
فهد : ماسويت شي بالعكس اناا ماخذها زي اختي بعدين يمه لاتكبرين السالفه
ام فهد : شفتها انت مااكلت شي مستحيه منك انت وعيونك طيب احترمني اذا منت محترم نفسك
فهد: طيب طيب
ام فهد : الحين رح نام لاتقعد معنا والا انزل تحت بس اهم شي لااشوفك مقرب يمنا
فهد: خلاص طيب
جت نوره وقعدت تضف مع ام فهد بعدين يوم خلصو وقعدو على الكنب عطت ام فهد فهد نظره ...
فهد : استأذن انا بروح ارقد تصبحون على خير
نوره وام فهد: وانت من اهله
راح فهد التفتت ام فهد على نوره
ام فهد: عسى ماأذاك في غيبتي
نوره : لاماشاءالله عليه اخلاااااااق ماقرب ولانطق
ام فهد : غريـــــــبه عاد الله يهديه مايستحي ابد والله انه معذبني _سكتت شوي ام فهد ورجعت تكمل _ من عقب وفاه ابوه قبل سنتين وهو ماينمسك مايقعد في البيت الله يصلحه
نوره مبتسمه : آآآآآآآمين
ام فهد: اهلك متى بيجون ؟؟
نوره : على حدود الساعه وحده يعني ساعه تقريبا وهم واصلين انشالله وبيتصلون على جوال فهد ان وصلو
ام فهد: ووين جوال فهد؟؟؟؟؟
نوره : ماادري
ام فهد : معاه اكيد روحي خذيه منه قبل لاينام الحقي عليه
نوره : طيب
راحت نوره ودخلت الغرفه وشافته منسدح تحسبه نايم تناظر تدور الجوال مب موجود لاعالتسريحه ولا الكومدينه
فهد : تبين شي؟؟؟؟؟
نوره : بسم الله.. انت قايم
فهد: ايه
نوره : ممكن جوالك عشان لو دقو اهلي
فهد: ايه اكيد
نوره : طيب وينه فيه
فهد: لحظه... وقام من سريره وراح عند التسريحه وشال الكاب اللي عليها وكان تحت الكاب الجوال ومده لها تقدمت نوره يتاخذه منه ويمسك يدها
نوره متروعه : خاف ربك تراك محرم مابعد تحللت
فهد ابتسم وشال يده جت بتطلع من الغرفه قالها
فهد: سكري النور الله لايهينك وقولي لامي اني نايم
نوره : ان شالله
راحت نوره وقعدت عند ام فهد
ام فهد : وراك تأخرتي؟؟؟؟؟
نوره : مالقيت الجوال وقعدت ادوره ادوره عاد بالاخير لقيته تحت قبعه فهد
ام فهد : ليه فهد نايم ؟؟!
نوره : ايه
ام فهد:ماشاء الله امداه......................الا ينوره وش اخبار ام ماجد من عقب العزا قبل سنتين ماشفتها
نوره : والله طيبه ماعندها خلاف
ام فهد: ونجود وش علومها
نوره : الحمدلله
ام فهد: هذي نجود كان يحبها ابو فهد خاصه انه هو اللي مسميها
نوره : صحيح !!!!!!!
ام فهد : أي والله
سكتو شوي.........................
نوره : متى بتعتمرون ياخاله؟
ام فهد: والله يمكن الساعه ثلاث (الفجر ) عسى الزحمه تخف
نوره : تقبل الله مقدما
ام فهد تضحك: منا ومنكم
وراحت سواليف ويدق الجوال وتناظر نوره والا رقم مب غريب وردت والاهي اختها
نجود : هييييه ترانا تحت في الفندق
نوره: حمدلله على السلامه انا الحيييييين بنزلكم
نجود : اوكي انا بنتظرك عند المصعد
نوره : يالله الحين انا جايه باااااي
ام فهد : اجل بتروحين
نوره : ايه ... ماادري وشلون اشكرك ياخاله
ام فهد : وشدعوى ولو يانوره حنا اهل عاد لاتقاطعين حنا قاعدين هنا اسبوع انشالله تعالي لنا بين يوم والثاني
نوره : ان شاء الله طيب معليه ياخاله اجي اخذ نواف بكره اذا رحتو تصلون التراويح
ام فهد :ولاتجين فهد يجيبه لك بس كلمينا ترانا مانصدق نفتك منه – ضحكه جماعيه –
دخلت نوره بتاخذ عبايتهامن الغرفه اللي نايم فيها فهد وهي قاعده تلبس عبايتها قام فهد وقعد وقال: خلينا نشوفك
نوره : وش قصتك انت
ضحك فهد ورجع نام وطلعت نوره من الغرفه وسلمت على ام فهد ونزلت تحت ولقت اهلها وطبعا اخذت تهزيئه من امها ومن ماجد وماااااتركوها كل دقيقه والثانيه يقولون لو انهم ناس ماعندهم ذمه وليه رحت معهم وووو...
نوره على طول اخذت شنطتها وجوالها وراحت انسدحت على سريرها تفكر بهاليوم اللي كان عليها اطول من وشو ماتدري هو يوم سعيد عشانها شافت فهد وامه والا عشان كلام فهد والا انه يوم شين لانها ضاعت وانحاست وانغثت اول الوقت والتهزيئات المحترمه اللي اخذتها من اهلها ... فتحت جوالها وقعد ت تقرا مسج فهد ماعطت نفسها مجال للتفكير فهد لانها حاطه في بالها انها في مكان له احترام وان اخلاقها وتربيتها ماعودتها على فعل هالاشياءووووالخ.
راحو اهها يعتمرون وقعدت هي بالشقه مافيها نوم كانت الساعه حوالي ثنتين الا ربع وبرن جوالها نقزت بتشوف مين وتناظر والاهو رقم فهد حطت له بزي ويرجع يدق وتسوي نفس الشي المره الثالثه ردت
نوره معصبه : نعم
فهد: ليه تسكرينها بوجهي
نوره : تحاسبني انت ووجهك
فهد: عندك احد
نوره : وش دخلك
فهد : لاوالله صدق عندك احد
نوره : ايه وش عندك
فهد: نصاااااابه لو عندك احد مارديتي
نوره : تراك اقلقتني وش تبي مني
فهد: فكرتي
نوره : بوشو
فهد: اني اصير اكلمك
نوره : انت شكلك غبي ماتفهم
فهد: طالعه منك زي العسل
نوره : لاعاد تتصل فاهم وبعدين انت ماتتوب تقولك امك الذنب هنا مضاعف يالله بروح انام
وصكتها في وجهه ونامت
جا اليوم الثاني ونوره كل شوي تجي في بالها صوره فهد وتكابر وتحاول انها تفكر في شي بعيد عنه... راحت تفطر هي ونجود اختها وهم داخلين والا هذافارس ونواف واقفين بلحالهم على طول نوره شالت نواف وقعدت تبوس فيه
نوره : فارس ليه جايين لحالكم؟؟
فارس: لامع فهد بس هو راح شوي والحين بيجي
نوره : طيب تعال اقعد معنا على بال مايجي
فارس: لا مااقدر بعدين فهد يلاغيني
نوره : لاتعال معليك
راحت نوره ونجود وفارس ومعهم نواف واخذو فطور لهم وقعدو وبعد شوي سمعو فهد ينادي
فهد: فاااااااااااااارس نواااااااااااااااااااااااف
فارس يفتح البارتشن: حنا هنا مع نوره تعاااال
فهد دااااعس: صباح الخير
نوره ونجود : صباح النور
فهد يقول لفارس: يالله امش انت واخوك
نوره : لا خلهم معنا
فهد : ولله باخذهم يفطرون معي اجل يرضيك افطر لحالي
نوره : خذ فارس بس نواف خله
فهد : يانقعد كلنا يانروح كلنا
نوره : لا . اجل رح انت وياهم
فهد يضحك: امزح خلاص بجي وباخذه اذا خلصت
نوره : اوكي
راح فهد ورجعت نوره واختها يكملون اكل
نجود : مااااشالله يجنن فهد احلى اخوانه
نوره : بس لسانه طويل من امس وهو يحتك
نجود : شبكي معه يالخبله ترى الزيون كل مالهم يقضون هالايام
نوره : منتيب صاحيه اقول بس كملي اكلك وانتي ساكته
خلصو اكل وقعدو يحترون فهد يجي ياخذ نواف بس طول قامو يدورون عليه ولا لقوه
نوره : شكلنا بناخذه معنا
نجود : معك رقم جواله
نوره : منهو
نجود : تستهبلين منهو يعني فهــــــد
نوره : اظنه
نجود : دقي عليه قوليله
نوره : شرايك نوصله بيته مب احسن
نجود : على راحتك
راحو شقتهم ويدقون الباب ولا احد يفتح وقعدو ينتظرون عسى احد يجي وشافوهم راعين طويله قالت
نجود : ياشيخه دقي عليه وخلصينا
نوره : وليه انتي ماتدقين
نجود : انا مااعرفهم انتي قاعده يوم كامل عندهم
نوره تنافخ : خلاص طيب
ودقت وماكمل رنتين ويرد
فهد: هلا والله متوقع انك تدقين
نوره : لاتستانس داقه عشان اقولك وينك عشان تاخذ نواف
فهد: واله انا بعيييد خلوه عندكم ربع ساعه وانا جاي
نوره : اوكي باي
فهد : لحظه لحظه كم رقم السويت حقكم؟
نوره : 13
فهد : يالله ان ضايقكم قطوه من الشباك
نوره تضحك : مع السلامه
فهد: مع السلامه
نجود : وش يقول
نوره : يقول انه بعيد وربع ساعه وبيجي ياخذه من شقتنا
نجود : اشوفك كنك تمونين عليه
نوره : لا والله بس هو قوي وجه
نجود : يحق له مع ذا الزين
نوره : لاتبالغين عاد والله انه عادي
نجود: لا والله زين ليته اكبر كان اخذته لي
يضكون ويروحون لشقتهم وعلى الموعد دق الباب
نجود : قومي افتحي الباب
نوره : وين ماجد يفتح
نجود : والله انك غبيه ماجد وامي طالعين من الصبح قومي بس بلا عجز
نوره : اوووووف طيب
قامت وفتحت الباب وطلعت نواف برا لفهد
فهد : السلام عليكم
نوره : وعليكم السلام
فهد: عسى ماازعجك؟؟ عاد كلش ولانوره
نوره : لا ولو هذا الغالي
فهد : يمدحون اخو كبير له اسمه فهد عساه هو غالي بعد
نوره : بعدين معك ياخي ترانا بمكه اقولك للمره الالف خاف ربك
فهد وهو يضحك: بالرياض بشوف شغلي معك
نوره : مع السلامه
رجعت نوره وقعدت مع نجود
نجود : ياحبيله ذا الفهد يمون
نوره على بالها : قليل أدب
نجود : شكله عاشقك
نوره : لا وييييييييييين انا شكل معشوقه
نجود : تعلميني
مضى الوقت الى صلاه العشا يوم اذن على طول اخذت نوره جوالها ودقت على فهد
نوره : السلام عليكم
فهد : وعليكم السلام هلا وغلا
نوره : اكلم امك والا اتدري عطني رقم جوالها اصرف
فهد يضحك : خذيها
ام فهد : هلا والله بنوره حياك الله
نوره : هلابك ياخاله على وعدنا ان شاء الله بجي باخذ نواف الحين
ام فهد : ولاتجين الحين حنا بننزل نحطه عندك بس متاكده مافي مضايقه لك
نوره : لا وش دعوى ياخاله معليه تعطيني رقم جوالك بدل ماادق على فهد
ام فهد : والله اليوم الصبح انحرقت الشريحه خلاص الحين هذا نا بنطلع
جت نجود لنوره
نجود : بسألك سؤال بس جاوبيني بصراحه
نوره تستهبل : وهل يوجد شيء اجمل من الصراحه ماذا تريدين يااختي الكبيره
نجود : وشرايك بفهد؟؟؟؟
نوره : بايخ وقليل حيا وزياده على كذا قاط وجهه
نجود : طيب تحبينه؟؟
نوره : ههههههههههههههههاااااااااااااااااااااااااااااااااا
ي لا ان شاءالله
نجود : ايه هين علي يانوره
نوره : وش تبين انتي بالضبط؟؟!
نجود : شكلك منجنه عليه بس مسويتلي ثقل وتكابرين
ويدق الباب وتنقز نوره فتحت الباب والا فهد مبتسم وشايل نواف
نوره : هلا
فهد : هذي الامانه وترى الوالده هناك تسلم عليك
نوره : الله يسلمك ويسلمها وصلها سلامي
فهد : ان شاء الله
صكت الباب .... ومشى الوقت وجو اهل نوره من الصلاه وبعد ماجو بحوالي خمس دقايق ويدق الباب قام ماجد يفتح والا هو فهد
ماجد: هلا والله الوالده معك ؟
فهد : ايه هناك تنتظرني
ماجد : تفضلو نادها نادها
فهد : ماتقصر بس والله بنروح للشقه نريَح شوي
ماجد : داخلين داخلين لاتحاول حياكم الله
نادى فهد امه ودخلو طبيعي الحريم قعدو لحالهم وفهد قعد مع ماجد وتعشو عندهم ذاك اليوم نوره ماشفت فهد ولا لمحته بس هو قزها لين ماشبع
جا اليوم اللي بعده واللي بعده ونوره ماتدري عنهم لهت بروحتها وجيتها للمسجد واليوم الثالث قامت نوره وتناظر ساعتها والا مأذن الفجر من زمان على طول قومت اهلها وشافتهم بيطولون قالت لهم انها بتسبقهم ضغطت على المصعد تنتظر .. وصل وينفتح وفهد فيه بس قالت نوره في نفسها : بسوي نفسي مااعرفه
نوره (مغيَره صوتها ) : السلام عليكم
فهد : وعليكم السلام ماشالله يانوره عالوقت
نوره(متروعه ) : بسم الله وشلون عرفتني هذا وأنا مغيره صوتي
فهد : وهل يخفى القمر بس ليه جايه لحالك ماتخافين
نوره : وش بيصير يعني بعدين لو سمحت اكرمنا بسكوتك
فهد اكتفى بضحكه ولاتكلم
راحو وصلو ويوم جت الساعه تسعه كالعاده راحت نوره مع نجود يفطرون ونوره طول الطريق تدعي ربها انه تشوف فهد عشان اليوم بيرجعون للرياض دخلو وهم ينقون فطورهم والا فهد ينقي هو الثاني
نجود : نوره نوره شوفي فهد هناك يالله نروح عنده
نوره : هذي وانتي الكبيره اركدي اقول
نجود : تكفييييييين اتقطع يالثقل من متى ماشالله
نوره : دوري نواف اشتقتله
نجود : نواف والا فهد
نوره : انا لله الكلام ضايع معك انتي
وهم قاعدين يتناقرون وال فهد جاي
فهد : صباح الخير
نجود : صباح النور
نوره :فهد لو سمحت ابعد لايشوفنا احد وشيقولون علينا بعدين
فهد : ماعلي بنات صديق ابوي
نوره : الا وين نواف ولهت عليه
فهد : وانا مالي رب
نوره : ماجا معك نواف؟؟
فهد مبتسم عالتصريفه : الا قاعد مع الوالده هناك – ويأشر على المكان –
راحت نجود ونوره يسلمون وقعدو يقرقون شوي بعدين قالت نوره
نوره : عن اذنك ياخاله عاد خلونا نشوفكم بالرياض حنا ماشين اليوم ان شاء الله
ام فهد : وراكم بدري
نوره : تدرين اخواني وابوي بالرياض
ام فهد : ومتى نيتكم
نوره : بعد مانصلي الظهر بإذن الله
ام فهد : توصلون بالسلامه
نجود : الله يسلمك
نوره : الله يسلم عمرك الا ياخاله ودي بصوره نواف!!
ام فهد : اعجبك ذا الشين والله ياحبيبتي ما معي شي حاليا بس مع فهد خذيها منه
نوره : طيب
نجود ونوره : مع السلامه ياخاله
ام فهد : مع السلامه
راحت نوره لفارس
نوره: فارس حبيبي معليه تروح لفهد وتقوله ان نوره تبي صوره نواف
فارس : طيب
راح ورجع ومعه الصوره مد الصوره وقال: هذي هي صوره نواف وفهد
نوره : انا ماطلبت صوره فهد
فارس: هو يقول هديه مع صوره نواف ويقول بعد مافي داعي تدري امي
نوره : ردها له وقله نوره تقولك ما أبيها
راح فارس ورجع مره ثانيه : يقول فهد ياتاخذبن الثنتين يا لا تاخذين
نجود : خلاص قله يقولون لك شكرا
نوره : لحظه لاتروح
نجود : لا رح حبيبي خلاص
نوره : نجود وش ذا اللي سويتيه طيحتيني من عين الولد يوم خليتيني اقبل الصوره
نجود : اخس يالمهتمه اخبره مب عاجبك وبايخ
نوره : كننا تأخرنا
نوره: ياعين عالتصريف اقول عطيني اشق الصوره دامك ماتبينها
نوره : لو تموتين ماتشوفينها حتى
نجود : يالله بس نمشي ياعزيزه النفس
التفتت نوره وراها تودع المكان والا فهد يطالع من بعدي يناظرها ويبتسم
رجعت نوره للرياضومرت ايام ولاحس ولاخبر عن فهد جا يوم العيد ونوره طول الايام تفكر بفهد وماغاب لحظه عن بالها وكل ماشتاقت له قعدت تناظر صورته المهم قعدت تتلبس عشان بيروحون يعيدون ويدق جوالها وتناظر والاهو رقم فهد
نوره : هلا
فهد: هلا والله بهالصوت عسى منتيب نايمه
نوره : هلا بك لالا قايمه من زمان
فهد : اول مره احس اني فاقد احد وربي مشتاقلك كثيييييييييييير
نوره : وانا اكثر
فهد مو مصدق: عيديها
نوره : وانا اكثر
فهد : طالعه من قلبك
نوره : ايه وشفيك
فهد : خلاااااااص بذبح نفسي ايييه نسيتيني اعايدك كل عام وانتي بخير
نوره : وانت بخير وصحه وسلامه وينك مادقيت الايام اللي راحت
فهد : والله خفت تسكرينها بوجهي فصبرت نفسي عاد اليوم خلاص ماقدرت اتحمل قلت يالله ادق واتحمل اللي يصير اهم شي اني اسمع صوتك
نوره : شكلك بالصوره صراحه مررررررررررره خطير
فهد : هههههه تسلمين يابعد عمري عاد صوره جواز ذيك
نوره : الله يسلمك ... فهد
فهد : عيون فهد
نوره : انا بروح الحين مع اهلي بعايد جدي وجدتي
فهد: لحظه بقولك شي انتي داريه ان امي تدري انك عاجبتني
نوره : احلف
فهد : عقب ماعطيتك الصورة ذاك اليوم مسكتني وقعدت تقول ان نوره بنت حمايل وان شفتك لاعب عليها والا مسوي لها شي ياويلك ولاتلوم الا نفسك وخلها في حالها وان كنت جاد عقب ماتتخرج يصير خير
نوره : يوووووو احراج
فهد : معليك منها خلاص اجل اخليك بس اسمعيني تدفي ترى اليوم مره برد ومابي حبيبتي تمرض
نوره : انشالله وبوسلي نواف
فهد: انتي ليه دايم تنسين اخوه الكبير
نوره: اوكي وبوسلي فهد بعد
فهد : يقول فهد انه يبيها الحين
نوره : قله تقولك نوره استح
فهد : يقول يبيها الحين لازم
نوره : قله تقولك عيب
فهد : نوره احبك والله اني اموووووووووت فيك
نوره ماتدري وش تقول قامت صرفتها : فهد اختي تدق الباب باي
فهد : باي
طول ذاك اليوم ونوره مسرحه الناس في وادي وهي في وادي مسكتها نجود على جنب كانو ببيت جدها
نجود : وشبلاك منتيب طبيعيه اليوم فيك شي تعبانه
نوره : لا مافيني شي
نجود : وش فيك بسرعه قولي
نوره : مافيني شي
نجود : نوره انا اختك قوليلي عادي – وقعدت نجود تقنع نوره ساعه الين حكت –
نوره : اليوم اتصل فهد
نجود : ايه
نوره : وقالي انه يحبني وانه عقب مايتخرج بيخطبني
نجود : وبتستمرين تكلمينه؟؟
نوره: شكلي لاني مااقاومه صراحه
نجود : تبين نصيحه اختك
نوره : اكيد
نجود: دامه بيجي يخطبك على قولته قوليله يوزي رومانسيته وحبه لعقب الزواج
نوره : رايك
نجود: واذا ماتقدرون تخلون بعض مره مره كلميه من شهر لشهر بس لاتتعلقون ببعض اهم شي لان محد يضمن عمره
نوره اقتنعت بكلام اختها وعلى طول طلعت للحوش عشان تكلمه وتقوله هالكلام دقت ورد على طول
فهد : لحظه شوي
نوره : طيب
فهد: ايه الحين اقدر احكي اخبار الغاليه
نوره : تمام .. فهد انا داقه بقولك كلالم بس ابيك تفهمني وتقدر موقفي
فهد : خير انشالله
نوره : اسمعني فهد لو ربي احيانا بنتزوج صح؟
فهد : صح
نوره : بدل مانطلع كل عواطفنا الحين خلنا نخبيها لعقب الزواج
فهد : نوره صاحيه انتي انا مااقدر اصبر
نوره : حتى انا بس بتحمل
فهد : انا مااقدر اتحمل
نوره : طيب اسمع يصير من شهر لشهر اكلمك عشان مافي داعي نتعلق ببعض مره
فهد : آخر كلام عندك
نوره : ايه
فهد : كبرت بعيني من جد احس انك تستاهلين حبي لك.طيب ابطلب منك طلب
نوره : سم
فهد: ابي صوره لك
نوره : ترى انا بنت وييييين مااقدر اعطيك صورتي
فهد : والله يانوره بحرص عليها اكثر منك
نوره : افكر وارد لك خبر
فهد : افميني بلييييز
نوره : اوكي انا الحين لازم اسكر
فهد : اوكي باي
وبعد حوالي شهر اتصل فهد
فهد : هلا والله
نوره : اهلين
فهد : وشلونك
نوره : والله تمام انت وش اخبارك
فهد : والله تعبااااااااان من فرقا الغالي والشوق مقطعني
نوره :.........
فهد: هاه وش قلتي بموضوع الصوره ؟
نوره : اسمع انا بعد العشا بروح اليورومارشيه مع امي تقدر تجي
فهد : بتعطيني الصوره
نوره : اذا تبي
فهد : طبعا ابي مايبيلها كلام هذي اجل عقب العشا انا هناك دقي علي عشان نحدد المكان
نوره : طيب
راحت نوره ويوم وصلت قالتلها امها انها بتدخل جوا وبتخلي نوره تروح لبيبرمون (محل تغليف هدايا) تغلف هديه لوحده من قرايبهم نوره ماصدقت تصير لحالها على طول اتصلت بفهد
نوره : هلا
فهد : هلا وغلا انتي باليورومارشيه
نوره: ايه وعند بيبرمون
فهد : بلحالك
نوره : ايه وامي بعيده عني
فهد: انا جايلك هواااا
نوره : انتظرك
دخلت نوره المحل ودفعت للفلبيني وعطته يغلفلها وتنتظر فهد الين مادخل نوره خلاااص بتتسدح شكله كان مره حلو . فهد وقف جنبها مسوي نفسه يختار تجليده
فهد : حطي الصوره هنا
نوره : طيب
حطت الصوره اخذها وقام يطالع
فهد : شكلك بالصوره حلو مررره
نوره : فهد طلبتك
فهد : امري
نوره : انا مااقدر اكمل معك وزي ماقلتلك انا بنتظرك الين ماتتخرج بس ابيك توعدني انك لي
فهد : من ناحيه اني لك فانا لك بس باقي كثير مااقدر اصبر
نوره : لازم اروح الحين
ومدت يدهل بتاخذ شنطتها اللي كانت عالطاوله جا فهد ومسك يدها بقوووووه هي شدتها على طول واخذت كيسها وطلعت قام دق عليها
فهد: وش فيك زعلتي؟؟!
نوره : مالك داعي لا انت ولا حركتك تخيل لو احد شايفنا
فهد : والله آآآآآسف بس غصب ماعلي
نوره : ترانا بمكان عام مو لحالنا عشان تاخذ راحتك
فهد : نوره لا تزعلين رجيتك
نوره ساكته
فهد :زعلانه
نوره : شرايك يعني
فهد : ماراح اسكر الا ماترضين عني
نوره : انا بسكر طيب
فهد : ماتقدرين
نوره : لا تتحدى
فهد :طيب تراكي نسيتي شنطتك بالمحل
نوره: أي والله الحين بجي بس لو سمحت خلك عاقل
فهد : طيب بعطيك شي وخذيه ولاتناقشين
نوره : اشوف يالله انا الحين بجي
فهد : انتظرك باي
نوره : باي
دخلت نوره المحل والا فهد ماسك دبدوب صغينون وقاعد يكتب على كرت ,حطت نوره جوالها على اذنها كأنها تكلم
نوره : فهد عجل
فهد: طيب بس بحطه بشنطتك
نوره : لالاهاته
فهد : لا بحطه بشنطتك
مسك فهد شنطه نوره وحط الكرت والدبدوب وقرب لها الشنطه على طول اخذتها نوره وراحت . ماصدقت توصل البيت وطيرااان على غرفتها وتفتح الشنطه وتاخذ الكرت وتلاقي مكتوب فيه:
حبيبتي نوره......
مافي وقت اعبر لك عن اللي بداخلي لكني الخصها بكلمه وحده : احبك
وولله اني ماقد قلتها لغيرك وانشالله ماراح اقولها لغيرك واتمنى انك ماتنسيني لاني انا بحياتي كلها ماراح انسى اجمل واروع شخص عرفته............ فهد
*****
وتناظر الدبدوب ماسك قلب احمر مكتوب عليه (I love you)
ظلت نوره تبكي طووووووول ذاك الليله وعاهدت نفسها انها تنتظر فهد ولو طول عمرها الا لو لاقدر الله وتوفى
-
مشاركة: فهد & نورة
روووووووووووعة
ولكن هل لها من تكملة اخي.؟
جزاك الله خير
