انا ادري ان نصكم نساني وربعكم عطاني حظر .. سمعوا قصتي (آدم 2003)

مراحب

طبعا ..

انا ادري ان نصكم نساني وربعكم عطاني حظر .. و ربعكم الثاني يقول وش يبي هالغثه <-- قاعد على قلبكم
.. المهم ما علينا طبعا تسألون نفسكم عن سر اختفائي اكيد بعضكم قال ان لي يد في الارهاب ومسكت مع صدام حسين وبعضكم قال اني فطست مع المصرقعين .. ما علينا كل هذا اشاعات في اشاعات بقولكم قصتي عشان تفهمون بالضبط وعلى اي اساس وماذا صار وكيف تم هذا الكلام <-- وده يتفلسف

ادري تقولون عطنا القصه وخلصنا

تعرفون لازم مقدمات وبهارات ومهارات ..

كان يوم عمل مرهق ، وطلعت المغرب تعبان ما اشوف الدرب ، ماكان في عيوني الا فراشي . كنت محتاج نومة دسمه ونمت ....

صحيت وقعدت ارفس البطانية شوي في حالة من نشوة الصحيان من النوم . مع ان اشين في النوم . انك تقوم من النوم
كانت الساعة تشير الى الصابحة .. صباحا
بالعربي مدري كم .. المهم انه بدري مره ..
اخذت لي حمام بارد على الصبح ، وقلت لي فرصة ان الشغالات نايمين اروح المطبخ اسوي قهوتي ، تقهويت ورحت اشوف الجرايدلقيتها ما وصلت لسا .. قلت ما تفرق نقرا جرايد امس

صارت الساعة 9 وما حد صحى في البيت صارت الساعة 12 الظهر ، خبطت على الغرف .. فتحتها .. مافيها احد ؟ قلت اليوم اجازة يمكن انهم طالعين هنا والا هناك . والا يمكن انهم راحوا للمزرعة ..

.. اتصلت على جوال ابوي ، امي ، اخوي ، خواتي ، اخوياي .. ماحد يرد ؟؟ طوط .. طوط طوط .. طوط ..حتى جيرانا ما يردون ..

لا حول ولا قوة الا بالله الله يستر ..

طلعت بالسيارة بروح لأي مدري وين .. وكانت صدمتي الكبيرة : مو معقول !!

أببراج راسي بتطير .. بيصير زي الجوال ما فيه بث في رأسي الشوارع فاضية .. المحلات مفتوحة ومتروكة ..
السلك ما فبها الا القطاوة والببغاولات !! لقيت كل شيء فاضي .. فاضي يعني فــــاضي ؟؟؟

فتحت الراديو قلت يمكن الاقي خبر وإلا علم .. يمكن السالفة فيها نووي وإلا صفارات إنذار ؟
لقيت كل الاذاعات .. وووووووووششششششششششششش.
رجعت بسرعة للبيت فتحت الرسيفر والاقي كل قنوات التلفزيون .. تووووووووط
يالله ... ةش صاير في البلد ؟

في ثالث يوم كنت اسوق سيارتي راجع من الشرقية .. امشي صفر كني ادربي راسي قدامي .. ومع ان ما في الخطين إلا انا صدمتي الكبرى ، يوم رحت للشرقية وما لقيت فيها احد ...

قبل اوصل رحت للسيفوي الا باسواق صحارى ، اادور شيء اكله صار لي 3 ايام ما اكلت ولا نمت من الروعة ..

دخلت وتوسطت بين الثلاجات ، وقعدت افدغ من ذا المعلبات والمجمدات والشوكلاطات..
وعقب الشبعة اخذت لي مخدة من قسم المفارش ورحت انسدح على الكاشير .

ومن شدة التعب .. غرقت في اول نومة منذ هذيك النومة المشؤمة ..

.. فتحت عيوني والإقي بين عيوني تدودل من السقف مكتوب عليها :
(عرض خاص 2 في 1 )

تذكرت عاد حالاتي واني نايم على كاشير رقم 3 في سوبر ماركت

كانت كل المحلات فاتحة وشغالة وما فيها احد .. الاسواق ـ المعارض ، الوزارات ، محالات الذهب ، معارض السيارات
الصيدليات .. المطاعم ـ وحتى الطيارات في المطار مفاتيحها عليها ... بس ما اعرف اشغلها ..

في بداية الأيام ما كنت اعاني مشكلة من ناحية الاكل . وبس بعدين بدا الخبز يعفن .. شوي وبدت الالبان تتعفن .. وبعدين انتظر الفرن يسخن .. وكل صببح اقعد لي 4 ساعات علشان اسوي لي (بريال خبز ) ..
بعدين كنت اروح للمغسلة اغسل ثيابي .. وكل يوم اروح ادور لي شغلة.. كان العمل مرهق وممل ...

في لحظة من اللحظات حسيت اني ..

:o تعبت

:33: شوفوا بروح اكل لي شيء وبجمع افكاري وراجع إلكم ...


بررررررررررررررررررررررب ... :icon6:

مشكوووووووووووووووووووووووووووووور على القصه الرائعه ياسولجير

جمع افكارك ولاتنسي تكمل القصه تراني منتظره



اختك ندى

ثانكس نديت ..

وفي لحظة من اللحظات حسيت .. اني ملك .. املك كلل شي حتى اني حسيت اني قيصر في زماناتوووووو
كنت اسوي كل شي نفسي فيه ، ولا احد يقدر يسويه ، كنت اروح المشوار بسيارتي وما ارجع فيها ..

كنت اوقفها عند اقرب معرض سيارات والا قسم شرطة واخذ سيارة غيرها ..

كنت اذا طفشت اروح لمبني التلفزيون وادخل ستديو 2 واشغل البث الفضائي ، واشب حطب فوق طاولة الاخبار ..
واجيب دلة واركزها بجنبي .. واقعد اهذر على العالم .. اقعد اذب واقلد اصوات واسب امريكا .. واتكلم في السياسة .. بس ما اخش في الدين بصراحة حتى لو انك لحالك ، فوقك رب يحاسبك ..
.. واجي من بكرة واقول :
(بناء على طلب المشاهدين نعيد لكم سالفة امس ..)
واقعد اهذر عليهم كم جديد .. واكتب على الشاشة اعادة واهو مباشر .. حتى اني مرة من الفضاوة سويت لي فلم ، بعدين منعته ؟؟
كنت اخذ الدوريات اوحطهم عند الاشارات واشغل سفاتيهم علشان لو جاء على غفلة والا اناس رجعوا، يشوفون ان فيه ناس صاحيه في البلد ..

في شهر من الشهور طلعت في راسي فكرة امي يمكن اني اعرف الناس وين راحو ؟والا سبب اللي سوا فيهم كذا عن طريق النجوم ..

وقعدت اداوم لي شهرين في مرصد كلية العلوم الي بجامعة اللملك سعود .. طللعت النجوم برضه فاضية..

كنت اطلع العصريات بترمس شاهي واجلس على الكبرى الي في ميدان القاهرة عند تقاطع الملك فهد مع طريق خريص . واقعد اطلطل على وزارة الداخلية والمركز التخصيصي من فوق الجسر .. بس قهر (اوباجي ) اختفوا الطخوم الي فيه ..

..وفي جلستي اخذت كرتون موز مليان بيالات ..
واقعد اذب كل شوي بيالة من فوق الكبرى .. وانا اهوجس .. تطش .. بالقاهم .. تطيش .. ماني لاقي احد .. طش .. شكلي ابلقاهم .. تطاش ..) هذي الاخيرة من صوتها مهيب اصليهزمكتوب عليها بادريق (تدري .. شكلي مافيه امل الاقي احد )..

كنت لا بغيت اشرب قهوة على حطب اروح لـ كوفي شوب واشب ناري واصلح قهوتي بقسم العوائل ..
يغيت انجن خلاص ابي احد يحاكيني .. يجاوب ذاا الاسئلة اللي في في راسي..

بس المشلكة ..
ما في احد

لكني طحت في عاد جديده ،، وصرت افرش فراشي في مكتبة جامعة الملك سعود .. جايب لي تريلة من حقات المبرد
وعبيتها مواد تومونينه ومعلبات ..
وقعدت ازرع خضار وطمام في الحديقة اللي في بهو المكتبه .. لا احد ينقز لي يقول لي ان الطماط خضار ؟؟ تراه فاكهة
وسط الهدوء وتعودت على الصراخ علشان لا استاحش .. وصرت اصارخ على الكتب ..

تمسع صجتي من بعيد وانا اقول :
من جدك انت ؟ .. كمل خل نشوف .. ايوه ؟ يخرب بيتك من وين جبتها يا المنسم
والا وانا اخاكي عمر الخطييب مؤلف بنك المعلومات واقول له :
اقسم بالله ما عندك سالفة يا عمر .

... اكثر واحد حقدت عليه وتخانفت معه ( دايل كارنيجي ) حق
" كيف تكسب الاصدقاء وتؤثر في الناس "

اول ماسكنت المكتبه كنت اقراه كل يوم .. ومن البطر والفضاوة جبت كل النسخ الي بالمكتبه وصفيتهم عندي .. وصرت اقرا الكتاب مره وحده وبعدين امزع الغلاف اذا خلصت علشان اعرف النسخة الي قريتها وما ارجع اقرها مره ثانية
.. واحيانا كنت اطنقس فوق الكتب ..
اخر شي طفشت مننه وقعدت اصيح وافاحس فوق الكتب ثم فتحت خرطوم الحرييق ودفنت الكتاب بالموية ..



بعد فترة طحت على كتاب قديم .. قليت فيه راوية يقول راويها اني بيجي في اخر الزمان رجال بيقعد لحاله يحاكي الجدران

وانه امة لحاله .. يخلق قبله ناس يكون هو آخرهم .. ويجي عقبه ناس ما لحق اولهم ..
يوم بحثت وبحثت .....

لقيت واحد يقول ان هذا ما عنده سالفة .. ان هذي الحاله تجري كم شخص من البشرية .. واحد منهم بس .. هو الي بينقطعون عنده البشر ..
وان البقية تجري عليهم هالحاله . ما لهم الا احد خيارين للخلاص ..

اما انه يصوم ويصلي لربه 10 سنين ما يفتر .. واللي خلقه .. يخلق له واحد زيه يرد عليه الصوت ..
والا انه يصوم 20 سنه ويصليها ما يفطر .. ويخلق له خالقه وحده .. من اوسط الناس تونسه ...

وبحثت وبحثت ..
ولقيت ان هذي اسرائيليات وما ذكرت الا في الكتب التجارية لكن عاد انا مسلم والحكاية كلها صوم وصلاة .. وبعدين ما عندي حل الا هي ..


ولي الحين كم سنه وانا اصوم ..
بس مدري حنا الحين سنه كم .. ولا من كم سنه بدت السالفة .. ومن الطفش كتبت قصتي هذي وقعدت الصقها عند كل اشارة مرور وكل عايرة
وقلت خلني اكتبها في هالمنتدي يمكن انهم اذا رجعوا .. الاقي اخد يقران ي الحين ..

بالله تكون هذا عنواني ddsn2 @hotmial .com اي احد يلقاني او يعرف عمي شي يدق علي .. :biggrin:
هذي قصتي (( آدم 2005م))

سولجير حامي الاوطان من الضياع والسرطان :icon6:

شكرا على القصه الراااااااااااااااااااااااااااااائعه جدا

لكن قولي انت للحين قاعد لوحدك؟؟؟:biggrin:


الله يرجك على القصه الحلوه هاذي ولا تحرمنا من مواضيعك المسليه


اختك ندى

الف شكر على القصة