fainal fantasy:sad's story complete
هلا شباب .... اللي تابعوا قصتي هذي تكملتها:
بعد ما عرفت ان فاينل فانتسي الاسطورية راح تنزل على الننتندو64...شيب شعر راسي ...و صرت صدق ما انام بالليل...و اقنعت الوالد انه يشتريلي اياه و كان ابداً مهوب مقتنع(لعبة بزارين ب1300 ريال؟؟؟ويييين)..المهم بطلعة الروح وافق و شريت الننتدو المشؤوم..و لعبة واحدة و هي ماريو ..لعبتها و خلصتها و استانست ..و بعدين؟؟؟ ولا شى! الالعاب على400 ريال و كلها ما تسوى...المهم من عقبها فتحت عيوني على العاب الكمبيوتر...و صرت اتابع مجلات اجنبية و عربية...و كل اخوياي عندهم البلاي ستيشن الا انا و خوي الاولي ذاك..و كانوا كلهم مستانسين و كل يومين يخلصون لعبة...و انا ميت قهر وودي اشتريه لكن خويي يصبرني و يقول اصبر ...الالعاب الزينة بالطريق..اقوله مثل ايش؟؟؟يقول (زيلدا)..و الله يا شباب من يومها ...من 3 سنين و انا انظر زيلدا اللي ما طلعت الا قبل سنة او اكثر و من شريت الجهاز ماشريت عليه شي الا جولدن أي..المهم عقبها بشوي جتني الصدمة الكبرى ... فاينل فانتسي راح تتطلع على السوني ..عقبها انجنيت..و احاول اقنع نفسي ان السوني جهاز تعبان و البقاء للننتندو..و نزلت فاينل فانتسي 7...و شفتها عند واحد من اخوياي...و كانت هباااال...المهم خويي ذاك ...اللي هبل بي الى ان اقنعني اشتري الننتندو المشؤؤم...راح و اشترى السوني و فاينل فانتسي...و انا كنت توني شاري الننتندو ... مالي وجه اروح للوالد و اقوله ابغى سوني!!!! و الله عشت بعذاب..اروح المدرسة كل اصدقائي يتكلمون عن فاينل و انا مثل الاطرش في الزفة...
قمت احتك بالناس علشان العب عندهم فاينل فانتسي...و خويي ذاك اقوله بالله يابو... عطن السوني حقك اطقطق فيه.. يقولي تعقب و الله...اقوله افا صديقك؟؟؟كنا مسوين انا وياه منظمة ننتندو و نرد على اللي يهزؤونه..جحدني الرجال..و والله واحد من العيال قام يعطيني السوني حقه...ما كان يلعب ار بي جي الا بعدين...(الكلام ذا كله قبل اربع سنين)و الحين هو محترف ار بي جي..المهم دبرت الجهاز...باقي فاينل فانتسي...رحت طلبت واحد من العيال (و كان هو لكم عليه شوي ....كان من اول بس الحين عقل) ... المهم عطاني اياه بطلعان الروح و بعد اتفاقيات و معاهدات...تغشيش وواجبات والخ...اخذت فاينل فانتسي و كانت ..و الله ...احلى عطلة بحياتي...لعبت فاينل الى ان وصلت الدسك الثاني..و عقبها مرضت...و صرت مريض ثلاث ايام و ما اتحرك من السرير..و لما تعافيت رحت ابكمل لعب ...ادور فاينل فانتسي !!! ما لقيتها...قلبت الغرفة و كنت ابنجن..الا ان جاني اخوي و قالي في واحد جاك و اخذها...عاتبت اخوي و قلت له شلون تعطيه بدون لا تقولي؟؟و رحت كلمت على صديقي و ما كان عنده سبب انه ياخذها ...يعني بدال ما يزورني و يشوف وش فيني...جا و اخذ الدسكات(صدق انه...)المهم اخذتها منه ...و الجهاز باقي عندي لان راعيه مسافر...شغلت اللعبة...ادور التخزينة...!!ما لقيتها..
بغيت انجن من جد...لعبت اللعبة مرة ثانية و قبل لا انهي الدسك الاول جا راعي البلاي ستيشن من السفر..و قال ابغى جهازي...عطيته جهازه و جلست شهر بدون ما اكمل اللعبة...و عقبها قررت اشتري جهاز..و استقعدت للوالد و بزعل و بالرضا و بالموت...ولا رضى يشتري لي اياه!!!فضطررت..اني استعين بالوالدة...و لا هي بعد رضت...و بعدين قدرت اجمع لي قرشين..(من مالي الخاص جداً) و شريت السوني...و بدا الضحك علي...و راحوا اصدقائي يضحكون علي و يقولون وين اللي يقول السوني تعبان و الننتندو هو الزين ..و اقول حسبي الله على اللي كان السبب....و شريت فاينل فانتسي و لعبتها من اول ...و يوم قربت اني انهي الدسك الاول جاني صديقي راعي السوني و قالي لقيت تخزينتك القديمة حقت فاينل فانتسي..و قفلت معي..و بعدها انهيت فاينل فانتسي 7 ثلاث مرات من القهر...و تعلمت اني ما اخذ برأي احد ابداً...هذا الموضوع باختصار شدييييد...
و شكراً للي قرأ و اسف على الاطالة... (الازمان ملخبطة شوي,,ارجو المعذرة)
