...الكهرباء بندت ...
اليوم الناس يا عيالي لاعارفين قيمة النعمة ولا حاسين بها وإن صابهم شي بسيط تلقاهم ما يعرفون كيف يدبرون عمارهم . الواحد منهم يعصب ويشاتم ويلاعن.. ان اخترب موتره تلقاه متضيج لأنه طول السنين والايام اللي الموتر فيه صاحي يوديه ويجيبه ما يقول الحمد لله على هالنعمة ولا يحس بها ولا يقول بعدني أنا أحسن عن غيري عندي سيارة.. تلقاه يبا موتر أحسن و التراب ما يترس عيونه لو بتعطيه ما تعطيه ما بيشبع!:12:
أمسات انقطعت الكهرباء كمن ساعة واحتشروا خلق الله اللي يصيح لحقوني بموت واللي يمكن لو شي بلاد قريبة كان سافر لها .
واللي مستوي مثل السمك ما يصبر دقيقة واحدة عن البحر عيل طول هالسنتين اللي فيها الكهرباء شغالة ليل ونهار ما حسيتوا بها ولا حتى ساعدتوا ورشدتوا في الاستهلاك شرات ما يطلبون منكم الربع الكنديشنات ليل ونهار تشتغل والليتات تقول عرس على أحواش البيوت ولا حد هامنه محولات ولا ضغط ولا غيره.ويقول(دام الكهرباء عندي ما علي من غيري!)
عاد أنا اللي قهرني المسجات مال التليفون اللي قاموا يطرشونها..
نحن ترانا لو شّواب لكن هالسوالف بعد عرفنالها ..
الواحد يا عيالي ماله بد من بلاده في زين وشين ويوم عطته وما قصرت فيه وهوه بعد عليه واجب انه( يكون مواطن صالح )..:D
شفتوا الناس اللي وقفوا في الشوارع وقاموا يصابون السيايير وينظمون المرور ؟ هاذيلا لا بشرطة ولا شي لكن فيه احساس وعندهم مسؤولية ما قالوا بنشرد عن الحر وبنداور في سياييرنا ألين ترد الكهرباء..وقفوا في الشمس القايلة وبين السيايير وكان لهم موقف زين بدال إللي شردو وزبنوا في مقاهي السناتر في البراد يطرشون مسجات ويتمصخرون على خلق الله!
وأحين بعد ما تروم ترمس حد ولا تنصح حد والا بيشتكي عليك وبيسوي لك قضية لكن عاد أنا من الحرة اللي في قلبي أرمس بهالرمسة ..
