اعترافات رجل يكره يحب يعشق يبغض النساء..للكاتبه سهر الليالي

السلاااااااااام عليكم ورحمة الله و بركاته


هذي قصه قريتها و عجبتي قلت انقلها لكم >> على فكره هي مكونه من عده اجزاء :o


و اذا لقيت تفاعل كملتها :33:

************************************

كنت بموت من الغيض وأنا أشوف فيلم عدو المرأة لرشدي أباظة ونادية لطفي ..الفكرة مهضوم حقها ..لاتوجد أي عداوة تستحق اسم الفيلم ...النهاية قهرتني أكثر ...تعرفون من عدو المرأة الحقيقي ؟؟؟ أنا . ..لي عداوة مع المرأة منذ الازل ..كل النساء على الارض بدون منازع ...مافي وحده فيهم قدرت تقنعني بغير هالشي ..بالنسبة لي المرأة من جنس الافاعي ..لها نفس الطباع ..في منها المسالم .ومنها الشرس ومنها القاتل ..منها الذكي ومنها القوي ..والسلاح اللي تختبي خلفه هو الضعف ..لان احنا الرجال مهووسين بقوتنا اللي نبي نحمي المرأة فيها ..وبسرد لكم قصتي مع المرأة ....في هالكم فصل اللي جايين ...وانتو احكموا ..من هي المرأة ...

الفصل الأول ......
************

صباح يوم الاحد ..توجهت لمكتبي .. مثل عادتي طلبت من سكرتيري سمير يجهز لي مرافعاتي . اللي طبعهم الليلة اللي قبل ..
ــ استاذ يوسف ...هذي مرافعاتك ..
ـــ مشكور ... سمير لوسمحت اطلب لي جاي راسي مصدع ...
سمير ــ من عيوني استاذ ..
ــ تسلم ..
سمير ــ نسيت أقولك استاذ ..عندك موعدك الساعة تسع ونص ...مع موكله ..
من ذكر لي تاء التأنيث عقدت حواجبي ..
ــ من؟؟؟
سمير ـــ موكله اسمها خلود ابراهيم .. قضية شيكات ..
شيكات؟؟؟ فكرت في نفسي ..
ــ بدون رصيد؟؟ لاتقبلها ..أنا ما اتعامل مع زباين يوقعون شيكات بدون رصيد علشان مااكون ضحية لهم بدوري ..
سمير ــ اعرف سياستك استاذ ..بس انت متفرغ الساعة تسع ونص ..وأعتقد انك لازم تسمعها ..
ابتسم وفهمت سبب اصرار سمير وقلت ـــ هي لهالدرجة حلوة؟؟؟؟
نظرات الذهول اللي على محيا سمير ضحكتني ..فقلت له ..
ــ سمير لاتحاول ...مابفكر في الزواج ولو بعد مية سنه ..
شفت الحرج على وجهه سمير اللي احس انه اخوي اكثر من انه موظف عندي ..طول عمري أقدر الاخلاص ..وسمير كان مثال حي لها الشي ..
سمير ــ دي بتاخذ العقل ..جميلة وشكلها بنت ناس ..
ابتسمت وقدرت له اهتمامه ــ لا تحاول .. أنت عزيز على قلبي ..وما أحب أشوفك خايب ..لكن في هالموضوع لاتحاول.
سمير ــ بس يا استاذ ..
قاطعته ــ بس سمير ..بقابلها وبعتذر لها بنفسي .. في مواعيد ثانية ؟
سمير ــ اييه واحد متهم في النصب والاحتيال ..وواحد ثاني عنده مشكلة في شغله ..
هزيت له راسي ــ اوكي ..تفضل لمكتبك ..وشوف ليش تأخر الجاي ..خليني أراجع المرافعات ..
وبدت عيوني تنتقل من ملف لملف وأراجع الاتهامات ومعطيات القضايا ..لين رن تلفوني ..
سمير ــ استاذ ..الموكله ..
ـــ خلها تدخل ...
فتح الباب وللحظات ..صحيت من موجة ذهول انابتني ..ابتسمت ــ وعليكم السلام تفضلي ..
كانت آية من الجمال ..من الرقة اللي لمستها ..والعطر البسيط اللي حاطه منه تغلل للمكتب اللي ريحته سجاير ..
حسيت بانتعاش بسيط ..لكن له مفعول غريب ...لكني كنت مستغرب هالانتعاش سببه بالضبط؟؟ الابتسامة اللي على ويهها ولا الجمال الافاطوني ولا العطر ولا الكلمات ولا ايش ..ولا هذا سمها اللي تخدر فيه العقول؟؟
أعطتني ملفها ..وحسييت باحراجها من نظراتي ..
قلبت الاوراق ..مشكلة بسيطة جدا ماتستحق روحه للقاضي مثل ماتقول الوالدة الله يرحمها ,,
ــ أوراقج يامدام ماتحتاج كل هالقلق .. بس روحي للي عطيته الشيكات وخذي منه هالشيكات وأعطيه المبلغ ..ياليت تلحقين عليه قبل لايروح الشرطة ...متى موعد استحقاق الشيكات؟؟
ردت بصوتها اللي يطلع من حنجرة ذهبية ..
ــ هذي المشكله ..موعدها نهاية هالشهر ..أنا خايفه تصير قضية ..وخايفة ينصب علي ويقول ماخذت فلوس ..خايفه من اللي يصير للمغفلين ..
قلت بصوت بسيط ــ محشومة ..
ردت ــ لا ..أنا أحس أن المسألة مابتمر على خير ..ويااستاذ أنا أحب كل شي بالقانون ..
ــ لو تبين كل شي بالقانون ماكتبتي شيكات بدون رصيد..
نزلت راسها محرجة ــ كنت مضطرة ..بس كنت أعرف أني بسدد الفلوس أقرب وقت .
بنات حوا ..لو هم في قمة احراجهم ..لكن التمسكن واحد من أساليبهم القوية للتمكن ..
ــ مدام اذا سمحت لي أنا بدبر هالموضوع ..بس عطيني الرقم ..وأنا بحدد موعد.. وتعال بكره ..وخلي ملفج عند السكرتير ..
ــ والاجر ؟؟
ـــ اجر استشارة بس ..حاسبي عند السكرتير بره ..
ــ مشكور صراحة أنقذتني من ..
قاطعتها موفر على نفسي ضيقة خلق ــ ماله داعي ..تفضلي وحطي رقم الشخص عند السكرتير ..
وفتحت لها الباب وطلعت محرجة من معاملتي الجافة مثل عشرات غيرها ..بعد خمس دقايق ..دخل سمير ـ كل هذا يا استاذ تعتذر لها عن القضية..
ابتسم من نغزة سمير ــ ماعندها قضية بس استشارة اتصل في صاحب الرقم وحدد موعد ..خليه بكره ..
جلست وانا اتابع نظرات سمير الخبيثة ..طلعت سيجارة وبديت أدخن ..
سمير ــ فترة راحة ؟ اطلب لك شاي ؟؟
ــ ياليت ..
سمير ــ استاذ ..انا في غرفة النسخ ..لو تبي شي مني ..
ــ اوكي لاتنسى الجاي ..
اه ..هالخلود رجعت لي ذكريات ماكنت أحب أتذكرها ..
رجعت لي طيف هدى . رجع لي أيام غبائي ..للحظة شفت لمحة منها ..وهي تتمسكن علشان أساعدها في قضية الشيكات ..والزيارات تكررت منها ..وأنا بغبائي ساعدتها وشلت عنها اشياء شكثر ..كنت أركض ورى طيف الحب ..وبالأخير اكتشفت انها تزوجت مجرد ماخلصت قضية الشيكات ...بعد بفترة مابرى جرحي بعد لما شفت آية ..وكانت القضية لاخوها ..وسبحان من سماها آية ..كانت قطعة من الجنة ..وأنا رجل أحب الجمال ...نستني شيماء وطوايف شيماء ..كان الخجل محليها اكثر في عيوني .. سرعان ماطاحت من عيني لما شفتها تتكلم مع سمير ..كان لسانها أطول منها ..لما ناقشت معاها الاجر ..فكرت في نفسي هذي لو تزوجتها بتطين عيشتي ..اذا ريال غريب وماخلت شتيمة ما شتمته اياها ..عيل لو ريلها شتسوي فيه؟؟؟؟؟؟؟؟؟
رن التلفون ..رقم منال ..
ــ آلو ..
منال ــ السلام عليكم ..شلونك ؟؟
ــ الحمدالله ..
منال ــ تعال تغدى عندي اليوم مسوية لك كبسة تموت عليها ..
ـــ مو فاضي عندي شغل ..مشكورة على كل حال ..
منال ـــ جوزيف ..أخوي ..هذي رابع مرة ترفض عزيمتي ..ليكون للحين حاط علي ..
ــ لا ..نسيت السالفة ...
منال ــ خلاص تعال تغدى عندي اليوم ..
ــ عندي موعد ..ما اقدر..خليها ليوم ثاني ..
منال ــ جاسم بيزعل ..
ــ قولي له خل يلاقيني في القهوة الشعبية عندي سالفة معاه ..
منال ــ وانت كل ما اكلمك تبي الفكة من ويههي؟؟ الشرهه على اللي يتصل فيك ..
وصكرت التلفون معصبة ...ما فهمت سبب عصبيتها ؟؟ شفيها منال؟؟ انا نسيت سالفة المقلب السخيف اللي سوته فيني. كان يوم كئيب ..رحت لها وكانت مرة عمي غانم عندها ..بعد ما سلمت عليها قالت منال لها اني ابي وحده من بناتها ..كان موقف محرج..ما اقدر اقول ما ابي ..علشان مااحرج مرة عمي وتقول شفيهم بناتي ..كان ردي بسيط ..
اني ما افكر في الزواج ..ومؤجل هالفكرة ..ليش ياربي الكل يبي يزوجني ..توني عمري ثلاثة وثلاثين سنة ..بس ...ابتداء من سميرانتهاء باختي منال ..
دخل سمير المكتب ..
ــ استاذ في ايش سرحان؟؟ ونسيت تشرب الجاي؟؟
ــ ولاشي ..خلينا نخلص شغلنا ..

**************************

دخلت البيت الكبير ..فاضي ..فيه برودة ..مدري من الوحشة ولا الرخام ..ورحت غرفتي وأنا تعبان ..بعد حمام نعنشت فيه ..مسكت رموت التلفزيون ..وبديت أقلب ..من قناة لقناة ..واستقريت أخيرا على مسلسل رأفت الهجان ..مسلسلي المفضل ...أطالع اشكال الممثلات قبل وأضحك ..
الساعة 6:30 ..فتحت عيوني ...وكنت دايخ بالمرة ..
تذكرت اني لازم اقابل جاسم في القهوة ..قمت من سريري وبدلت ملابسي ..ضبطت الكشخة .. ولبست الجوتي المحترم ..بعد ما تأكدت ان الصبي لمعه عدل ..من ماتت امي وانا عايش في هالبيت الكبير مع هالصبي ..
ركبت سيارتي وعلى طول للقهوة ..
كان جاسم جالس مع محمد اخوي ..
ــ السلام عليكم ..
محمد +جاسم ـ وعليكم السلام ..
جاسم ـــ انت شسويت في مرتي؟؟
ابتسمت ..ــ ولاشي ..
جاسم ـ من رجعت الدوام وهي دموعها على خدها ..شمسوية لك المسكينه ..
ابتسمت ..دموع التماسيح ...السلاح الرئيسي عند الاناث ..
ــ أبد ,,قلت لها قولي لجاسم ينطرني في القهوة صكت التلفون في ويههي..
جاسم ــ ليش مادقيت عليها تعرف ليش زعلت؟؟
جاسم مايعرف بالمقلب اللي سوته منال فيني ..
ــ انت مالك شغل هذي اختي وحنا منا لبعض نصطفل ..
جاسم ــ هذي زوجتي ... ما ارضى انك تزعلها ..
محمد ـ خلونا من منال الحين ..شخبارك اخوي ليش ماتمر؟؟
ابتسمت ـ ليش ؟؟ علشان تم زوجتك مريم تحن علي بالزواج مثل مازوجت منصور؟؟العازب الاشهر على مستوى الوطن العربي؟
ضحك محمد . لكن جاسم كان معصب شوي ..
ـــ شفيك ؟؟
جاسم ـــ يعني انت تبي تكسر الريكورد مال منصور؟؟
هزيت راسي بلا ـــ شوف ..أنا مب معترض على الزواج ..وما ابي اسجل الرقم القياسي مثل ماتفضلت ..بس أنا مأجل الفكره ..بس ..
جاسم ــ لين متى؟؟
يالله ..هذا الشخص الثاني يكلمني عن الزواج اليوم ..
ـــ جاسم...أمي وصتك علي شي؟؟ ليش الكل معترض على عدم زواجي ؟؟ انا انسان ناضج ..احترموا قرارتي ..انا ما اتحمل المرة ساعة على بعض أتحملها طول العمر ؟؟ مالي خلق ..
سكت جاسم ..لكن محمد هو اللي تكلم هالمرة ..
ــ بس بتندم بعدين ..لما يوونك عيال ..تكون أكبر منهم بوايد ..ويمكن ماتلحق على حياتهم اسم الله على عمرك ..
كلام محمد مب غلط ..بس مين يكلم ؟؟
ـــ خلوني من هالسالفة اللي أتكلم فيها تقريبا كل يوم مع سمير ..خلينا نروح نتعشى بمكان أنا يوعان ماتغديت ..
جاسم ــ وهذا سبب ثاني للزواج ..
ـــ جسوم ..أرجوك ..قفل على الموضوع ..
جاسم ــ ماقلت شي ..
دخلنا المطعم وانا كنت صج يوعان قضيت على المقبلات ..
وقمت علشان أييب لي صحن ثاني.. وللحظة دخت من قوة العطر اللي دخل المطعم كله وغطى على كل ريحة ثانية سواء أكل ولا شوي ولابخور ..وشافني محمد وجاسم واضحكوا ..
ــ تشمون ..
محمد ــ هذا عطر اعتقد اسمه شانزليه أو شي جذييه ..اشتريته من كم سنة لمريم ..ريحة الجازمن ..
جاسم ــ استغفر الله هذي ماتدري انه حرام؟؟
سحبت نفس قوي ــ العطر عجيب ..
جاسم ــ جوزيف ...لو سمحت اخوي حنا في مكان عام ..
محمد ـــ تعال ..ايلس ..
لكني قلت ـــ بروح اييب مقبلات لاني صج يوعان ..
بعد العشا طرا في بالي امر محل عطور ..وسألت عن العطر واشتريته ..لاني حبيت ريحته ..وحطيته في غرفتي ..بدون ما ارش منه ..وتم على الطاولة شكله غلط بين عطورة بوس وهوغو الرجالية ..
طالعت ملفاتي ..وغرقت في شغلي لين ماحسيت ولقيت نفسي صاحي ثاني يوم ..
اليوم مر بسرعه..انتهيت من قضية خلود ..لكني ما انتهيت من نظراتها .وكان لازم أمر أختي منال ..
كانت زيارة بسيطة ..سلمت عليها شلونج شخبارج وشربت الجاي بعدين استأذنت ..
الوحدة سيئة جدا ..الحين انا فاضي ..والساعه توها سبع ..وين ؟أقضي هالساعات الباقية؟؟ البيت فاضي والتلفزيون جرعة ماقبل النوم ..مافي حل ثاني غير أني أتمشى في المجمع ..ما أحب أثقل على أخواني ..
وقفت سيارتي ..ولما طلعت ..شفتها توقف سيارتها ..ماقاومت فضولي .. وقفت أنطر نزولها ..أنا متأكد أنها هي..كان معاها ولد صغير عمره اربع سنوات ..ماقدرت اتكلم معاها مني والطريق ..لكن ...ماقدرت امنع نفسي ..
ــ آنسة شيماء ؟
التفت ..وتفاجأت بشوفتي ابتسامة مقتضبة ..
ــأستاذ يوسف ..من زمان ....شلون الحال ؟؟
ارتباكها ومحاولة انها تخبي الولد اللي معاها خلاني اشك ..
ــ الحمدالله ...وانتي ؟؟
شيماء ـ بخير ..
مسكت لها قضية من كم سنه ..فجأة انتبهت لانتفاخ بطنها ..
ــ ابنج؟؟
طالعت كل شي إلا عيوني ..ـــايه..
مافهمت ليش خوفها ..باركت لها زواجها ..ومامسكت لساني من سؤالها ..
ــ وسعيد الحظ ..
ـــ عبدالعزيز ..
ــ من ؟؟
ــ عبد العزيز ..
ــ اللي رفع عليج القضية؟؟
ــ اييه ..
ــ موفقة ..عن اذنج .؟؟
ماقدرت اكمل الوقوف هناك ..معقول؟؟ تتزوج شخص بهدلها سنتين في المحاكم ؟؟ يقولون ماتجي المحبة الا مابعد عداوة .. انتهت ليلتي بعد ماتعشيت في ماكدونالدز ..

******************************

ال قصة تمام وانا في انتظار التكملة ;)

سلام... :ciao:

"بسم الله الرحمن الرحيم"

مشكور علي القصة الجميلة...............

وأتوقع منك المزيد...............

The Fury

مشكوور على المرور

**********************

اسلام اسماعيل

العفو اخوي

أول مادخلت لمكتبي تفاجأت بكتلة سواد..مقابلة سمير ..
ــ السلام عليكم ..سمير تعال داخل ..
سمير ــ اتأخرت يا أستاذ يوسف ...
ــ نمت متأخر شوي .كنت أشوف أمس فيلم لبروس ويليس ..من هذي اللي برى؟؟
سمير ــ باشا ...
تنهدت .. لما سمير يقول باشا معناها في خبر مزعج ..
سمير ــ تذكر المتدربة ؟؟ اللي تكلمنا عنها الشهر اللي فات؟ هي بقى دي ..
ــ شسمها ؟؟
ــ ليال خالد ..
ليال ؟ تنهدت ..متدربة ...اوكي ..
ــ خلها تدخل ...نشوف صرفة معاها ..
دخلت ..بشرتها كانت بيضا أما عيونها مابينت من ورى النظارة الطبية ..شفايفها دقيقة وأنفها دقيق ..وهادئة في دخولها مب مرتبكة ولاقلقة ..
ــ السلام عليكم استاذ يوسف ..
ــ وعليكم السلام تفضلي .تشربين شي ؟؟
ــ لا مشكور ..
ــ هالمرة من دلج علي ..
عقدت حواجبها .. فابتسمت لها وشرحت ...
ــ المتدربين اللي ييوني دايما مطرودين من مكاتب ثانية ..
ليال ــ لا ..بس تقريبا كلامك صار لي ..المحامي عيسى عبدالهادي كنت متدربة عنده .. لكنه واجهه مشاكل مع زوجته ..فوصاني بمكتبك ..
ابتسمت ...رفعت سماعة التلفون واتصلت عليه .
وقبل أنطق بكلمة ..قال
عيسى ــ هي عندك ..
ــ اييه ..
عيسى ــ دخيلك يوسف انت الباتشيلور(العازب ) الوحيد اللي أعرفه الكل مايبون متدربة ..
ــ اييه ..شتوصيني ؟؟
عيسى ــ هي زينه ..تحملها شوي .. تراها عنيدة شوية . وحشرية ..ومتهورة . زوجتي أذتني كل يوم تتي وتسأل ...فكني اله يخليك ..
ـ بس ؟؟ زين ..براويك بعدين مع السلامة الحين ..
ليال ــ افهم من هالمكالمة انك ماتبي تدربني ؟؟
ابتسمت بدت الحشرية ـــ لا .. كان يتكلم عن قضية خاصة بيني وبينه ..بس وصاني فيج .. خلي يوصلج سمير مكتبج وداومي بكره ..
عبء جديد كأني ناقص ... وانتوا يالحريم شلكم في المحاماة؟؟ منتو قد هالمهنة ...الله يعيني شلون ببدأ معاها ...هذه وحده واثقة ..افعى من نوع الاصلة ..قوية ..ماتحتاج السم ..قوتها كافية انها تقضي على اللي في طريقها بسهولة ..
******************
طول ما أنا في المكتب وأنا أحاول أترجم كلمات عيسى ..عنيدة متهورة حشرية ...احاول اوصل كل صفة بالثانية لكن ماتطلع معاي نتيجة ..أبي أعرف شلون أتعامل معاها دون ما أثر فيها ولاتأثر فيني ..بعاملها بليونه مابيمشي الحال ..ببساطة بتتعقد الامور ويمكن اتوهق فيها ..مافي معاي غير طريق القسوة ..لانها متهورة فتخاف من غضبي ..ولانها حشرية ..تتجنب الاهانة ..ولانها عنيدة فتشوفني اعند منها ...فماتغلط علشان تبين لي انها صح ..وبهالشكل ما أثر بتدريبها ..وأكون أتممت مهمتي على خير مايرام مع انها بتدعي علي طول عمرها ...بس ضميري بيكون مرتاح ..أني هيئتها لجو العمل ..
طالعت الساعة اللي كانت خمس العصر .اليوم مر غريب ..غمضت عيني دقيقة ..طيف شيماء وابنها غزا مخيلتي ...شاللي خلاها تقبل على نفسها الزواج بشخص حقير ..شيماء انسانة ....فيها من العلو والفخر بنفسها ولا برنسيسه ..مع انها عادية ..فيها من الجحود تظنه امتنان ..لكنه ..جحود ..طول عمري أكره ناكرات الجميل ..لكن في شيماء.. هالخصلة تراءت لي كأنها الاخلاص ..والوفاء ...
اللي يسمع افكاري ..يقول اني متناقض ...بس أنا رجل يكره ويحب ويعشق ويبغض النساء ..جمعت كل ما اشعر به في جملة ...وتوجتها مبدأ لمشاعري ...شيماء ... كل ما اتذكرج اتالم ..........
سمير ـــ استاذ يوسف ..
طلعت من بحر افكاري ..
ــ نعم ؟؟؟
سمير ـــ مش عايز تروح؟؟
طلعت من المكتب ...ولحقني سمير ..
ـــ ماتغديتش النهار ده ليه؟؟
ابتسمت من وفاة المرحومة وانا تقريبا ما اتغدى ..
ـــ ماليش نفس يا سمير ...
سمير ــ تروح تتغدى معايا؟؟
هزيت براسي بلا ..
ـــ بمرراشد ...
سمير ـــ على راحتك...
دخلت شقته وابتسمت لما سمعت صوته وهو في الغرفة يغني ..
ـــ قالت احبك ياراشد قلت من قدي ..
طقيت باب الغرفة .فتح الباب مستغرب ..كان لابس فانيله وسروال بس وعلى كتفه منشفه ويهه كل كريم حلاقه ..
قال بصوته العالي ــ مااستحيت ودخلت الشقة بدون لاتطق الباب جاي تستحي لما وصلت الغرفة؟؟ يمكن أكون مع الجو ؟؟ شيسوى لك الاحراج؟؟
ضحكت ..وسلمت عليه ...
ـــ رشود ..للحينك ؟؟ صار عمرك اربع وثلاثين سنه ..وللحينك؟؟
راشد ـــ انت آخر واحد يتكلم ...ات عايش بعز ولاراضي ترفه نفسك..
ـــ بالحرام ؟؟ ما ابي الترفيه اللي تتكلم عنه ..
راشد ــ اي حرام الله يخليك؟؟ ورقة زواج عرفي وانتهت اسالفة ..ولامسيار ..
ـــ وليش هذا بعد حلال ؟؟
ــ جوزيف اله يخليك .مثل ما تبيني أتكلم عن زواجك لاتتكلم عن زوزاجي ,,شذكرك فيني ؟؟وخلاك تمرني ؟؟ صار لك سبع شهور تقريبا ماشفت ويههك الخايس..
ضحكت ــ مخلي الجمال لك ..يا احمد رمزي ..شفت اليوم واحد ..فتذكرتك..
راشد ــ ليش هو لها الدرجة يشبه لي ؟؟
ـــ لا . حسن تذكره.. رفيجك اللي كنت تطلع مع اخته من وراه؟؟ هي شصار لها ؟؟
راشد ــ عرست وتطلقت ورجعت عرست ورجعت تطلقت ..
وبعدين ردت لريلها الاولي ..
ــ الله متابع أخبارها ..
راشد ــ لا والله بس كل مايصير معاها جديد تتصل فيني ..
ــ علشان تتأكد انك فيلبل؟؟ متوفر ؟؟
راشد ــ لا وانت الصاج ..لانها تحبني ..وماتقدر تتخلى عني ..
ياشين خداع المرة ...الحين تحب رشود وتزوجت واحد غيره وتمت على علاقة فيه ؟؟ أي ضمير ؟؟ أي أخلاق بس مو غلطتها ..طاحت برشود الي كله غلط من راسه لرجلينه ..
الخبيثون للخبيثات ...
راشد ــ يوسف وين شردت؟؟ أدري أنك سبيتني في مخك ..وكرهت جنس المرأة ..
لذهولي ابتسم راشد وكمل ـــ أعرفك من كنا في الاعدادية ..وتتوقع بعد كل هالسنوات ما افهم اللي في مخك؟؟لاتخاف اخوك قرر يتستت ..
انصدمت ,,راشد يتزوج؟؟
قال كأن ماعنده حيله ــ بترك هالدرب بعد شهر ..ابوي خطب لي بنت عمي اللي كانت ناطرتني من عشر سنوات .. حسافة ماعندك بنت عم كبرك يا يوسف ..ولا كان خليتها ضمانه للمستقبل ..
ـــ عندي بنات عم بس كلهم يهال ..والحمدالله ماكان عندي وحده كبري كان شفتني متزوج من قرون مضت ..
خلص راشد حلاقة وغسل وجهه ونشفه ولبس ثوبه وقال ..
ــ يوسف ..أنت من صجك عازف عن الزواج؟؟ ليش ؟ صار معاك موقف كرهك في الحريم جذييه ..
ابتسمت ..أنا ماصار معاي موقف واحد ..صار معاي اكثر عشرين موقف ..اعطوني مية فكرة وفكرة عن جنس الحريم .
ـــ رشود ..خلنا نطلع .انا يوعان ماتغديت ..
راشد ــ اي مطعم هذا اللي يعطيك غدا هالحزه؟؟؟ انا مواعد وحده ..خليني اختم فيها عزوبيتي ..
ـــ من هالمرة؟؟
راشد ــ وحده ..مبتدئة,,
ـــ خاف الله فيها ولاتخرب مستقبلها .واطلع معاي ندور غدا ..
راشد كانه كان ناطر هالنصيحه ..كان متردد ..وسرح شوي ..وقال ــ هي اخت صالح ..
كأن حد قرصني ونطيت من مكاني ...صالح رفيج عمرنا ,,
ــ أنت ماقلت لي انك بطلت تواعد خوات ربعك؟؟ لولا ان اختي متزوجة كان شكيت فيها مب عدم ثقة فيها بل عدم امان منك ..الحين صالح بيكون آخر ضحاياك؟؟ نسيت المعروف اللي سواه لنا من كم سنه ؟؟ حرام عليك ..
راشد ــ ........................ماكنت ادري انها اخته لين امس ..
ــ صار بينكم شي ؟؟
راشد ــ لا ..البنت انا رسمت عليها من شهر ..مكالمات لين امس وافقت نلتقي ...
تنهدت ,.وقلت له ــ اتصل فيها وقول لها ترجع للدرب الصحيح ولا تقول لاخوها ..وخليها تغير رقم تلفونها علشان انت ماتدلها ..لما الشيطان يوزك عليها ..
راشد ــ بس ..
صرخت فيه ـ لا ..لا بس ولا اي زفت ...راشد ..هذا صالح اللي توسط لاخوك اللي كان بيروح فيها باعدام ..جذييه تجازييه؟؟ يلا قدامي الحين ..
راشد ــ زيين ...الله حطك في طريقي ..في هاليوم بالذات ..لان صالح ريال اسم على مسمى . وانا كنت متردد ..والله ماراد له الشر ..سبحان الله ..سبع شهور وانت ولا مفتكر فيني تطلع لي في اليوم وفي الساعه اللي كنت بهدم فيها حياة هالبنت ..الله يحب هالانسان ..وخلاك تمنعني من اذيته ....
كلام راشد مس شي فيني ..بعد ما تاكدت من انه نفذ اللي قلته له ..طلعت من الشقة ورحت المسجد ..وصليت العشا ..من زمان مارحت المسيد للصلوات المفروضة كنت اروح يوم الجمعه بس ..من كم سنه تورط اخو راشد في حادث ومات واحد فيه ..وطاليوا بدم اخو راشد ثار ..ورفضوا الدية ..صالح كان يعرف هالناس ..واقنعهم انهم يتنازلون ..لان حادث مب عمد ..شلون يالك قلب يا راشد تسوي جذييه في هالريال الطيب ؟؟ مسكت القرآن وتميت اقرا ..وحسيت براحه ..كنت مفتقدها من زمان ...
*****************

من الصبح ومزاجي متعكر ...السيارة بطاريتها خربانه فاضطريت اروح بالتكسي للمكتب ..التكسي الحار والوسخ ولاريحه الاسيوي اللي راكبه ..
سمير من شافني متعكر مزاجي ..اكتفى بصباح الخير وبس دون اي كلمة ..
دخلت ليال لمكتبي وكنت نسيت وجودها ..
ـــ استاذ يوسف في غلط في المرافعه اللي قلت لي عنها امس ..
بلا تفكير ..وسبحان الله بعض الاحيان الانسان يقول شي غير اللي في باله بالمره ..
ـــ يا انسه انت هنا تتدربين عندي مب انا اللي اتدرب عندك علشان تعلميني الصح والغلط؟؟حط الملف وتفضلي ..
ما ادري شلون كانت نبرة صوتي ..ولا طريقة كلامي لاني م اتذكر ..ما اعرف السبب اللي خلى الالوان تشرد من ويهها ..وطلع وهي مرتبكه وتصدم الكرسي في طريقها ... وتطيح ملف اوراق كان على الخزانة الصغيرة ..
نزلت ترتبه حسيت اني مب طايقها فقلت لها في استخفاف
ـــ خلي كل شي وتفضلي ونادي لي معاج سمير ..
تجاهلتني ..فقلت ـــ ماسمعتي كلامي ؟؟؟؟؟ اعيد يا انسة يمكن عندج مشكله في اذنج..
دخل سمير ..طالعت عيونه حسيت فيها كلام لكنه مافهمت شنوعه .وكان ساكت ..
ــ شعندك؟؟انطق الجوهرة اللي تحوس في صدرك .
قال ــ آنسة ليال ..
ــ شفيها ؟؟
سمير ـــ حرام اكلت علقة وهي بريئة ..
طالعت له بنظرة غضب ــ علقة؟؟ أنا ماهزأتها ولاضربتها ..اي زفت انت تتكلم عنه؟؟
سمير ـــ لما تروق بالك يااستاذ حقولك.. اسمح لي ..
وفتح الملف على ورقة وحطاه قدامي وطلع ..طالعت الورقة ..مالها علاقة ابدا باللي في في الملف ..هذي مرافعه قديمه ..مسودة كتبتها لقضية مشابهه وكنت ابي استفيد من بعض المعلومات ..ولما خلصت شغلي حطيتها على مايبدو بدل المرافعة الاصلية ..حطيت يدي على جبهتي وبعصبية ..فتح الشنطة وكانت الورقة الاصلية فيها ..طلعت سيجارة وبديت اسحب كم نفس ..لين مارقت فناديت سمير ...
سمير ـ رقت يااستاذ ..
ــ اييه ..سمير . خذ هالورقة وخلي ليال تطبعها ..
سمير ــ بس؟؟
ــ يعني لازم أروح أستسمح منها وأبوس راسها ؟؟ بس ..
سمير ــ بس انت يا استاذ زعقت في وشها ..
ــ أنا ما صارخت ...
سمير ــ استاذ ..
تنهدت ..كنت في قمة احراجي .. وسمير مابيتركني لين اصحح غلطي ..
ــ خلها تجي ..واتفضل انت ..
سمير ــ حاضر ..
دخلت ..وباين عليها انها مآخذه في خاطرها ...
ــ اتفضل آنسة ليال ..
جلست ..فقلت بصوت حاولت انه يكون هادي ..
ـــ هذي الورقة مسودة عن قضية قديمة ..وهذي المرافعه الاصلية انا غلطت وبدلت في الاوراق ..اطبعي لي المرافعه مع سمير وراجعيها ..وشوفي البنود اذا في شي غلط ..
ليال ـ حاضر استاذ ..
ــ تفضلي الحين ..
قامت من مكانها ..حسيت بفرحتها باعترافي بغلطي ..أكثر من امتعاضها بعدم أسفي لها ..القسوة ..لازم ما أرخي الحبل ..علشان تثبت جدارتها لي ..وتعاندني وتنجح ...وتبين أني غلطان ..
خلصت كل شغلي ..وطلعت ..وقررت أزور أخوي محمد في بيته بعد العشا ..اللي أكيد بيكون دجاج بالكاري سواه لي الصبي سراج ..
***********
مثل ماتوقعت بالضبط ..تمت مريم زوجة اخوي تحن على راسي ..
مريم ــ والله البنت زينة مرة ..أنا أحبها واشوفها زوجة ناجحة لك ...
ـ مريم ..بنعيد الاسطوانه كل مازرتج؟؟ وتشره علي ياخوي محمد وتقول ليش ماتزورنا ؟؟
مريم ــ يوسف ..عمتي الله يرحمها كانت بتزوجك هالبنت ..
ــ تقنعيني ان امي كانت معجبة بهالبنت؟؟
مريم ــ يعني أنا جذابه؟؟ قولها ...أصلا عمتي هي اللي دلتني عليها .وقالت لي بنت محسن عبدالرحمن خووش بنية ..وأشوفها زوجة لابني يوسف ..
ابتسمت ..تذكرت أخوي منصور ..قالت له مريم نفس الكلام ..عن بنت فهد حمدان ..نفسي أقول لها يامريم انت جذابه .بس ..هي تبي مصلحتي ..وماقاصده تضرني في نظرها ..
قلت لها ـــ أم جاسم ..صدقيني لابغيت أعرس بيي لج وأقولج ..بس ..الحين مالي نية زواج ..
مريم ــ يوسف ..الله يسلمك اذا كلامي غلط قول لي غلطانه ..بس حاليا ..ماتحس بفراغ في حياتك ؟؟ بعد الدوام شتسوي ؟؟ أنت مب راعي خرابيط علشان تسلي نفسك وتشغل وقتك .من وفاة المرحومة وأنا شايله همك ..من يداريك؟؟ في البيت مع من تسولف ؟؟ ربعك كلهم متزوجين ..من فيهم بيفضى لك ويسهر معاك ؟؟ على الاقل لاتزوجت ..مرتك بتشيل البيت ..وتونسك والعيال يشغلونك..وهناء بنت حبابة ..واخلاق كلش زينه ..
اسمها هناء ..أنا أتخيل نفسي أنادي زوجتي هناء؟؟ هناء تعالي يعقوب يوعان ..هناء التلفون ..هناء . حبيبتي ..
.مب لايق ..ماعندي القناعه اللي تخليني اوافق ...وأنا مزاجي في الحريم ..مايساعد .
مريم ــ ها أنا غلطانه ؟؟
ـ لا يا ام جاسم ...بس أنا ما أفكر في الزواج ..تعالي اسأليني بعد سنه ...
مريم ــ عيزت معاك يابويعقوب ..راسك صخر ..قول اذا شايف لك شوفه أو وحده مو من ثوبنا ..نزوجك المهم تكمل نص دينك ..ـــ تدرين انا عاجبتني وحده..اذا خطبتيها لي فيج الخير ..
مريم ـــ قول قول ..اخطبها لك الحين ..في هالثانية .بس أشر ..من هي ؟
ـــ بروك شيلدز ..أعطيج العنوان ؟؟
مريم ــ أعطيني مقفاك أسهل لي ..وأنا صدقت أنك أخيرا ..
ضحكت عليها وعلى الخيبة اللي على ويهها ..وقلت ـــ بروح أقعد مع خوي محمد ..من يبت سالفة الزواج وهو شرد للديوانية ... أعطيني ساره ..
ساره بنتها الصغيرة ماكملت سنه ...
مريم ــ خذها مع انها ماتتذكرك وايد .. جاسم روح مع اختك لين الديوانية علشان ماتصيح ..
جاسم ـــ زين يمه..
جاسم عمره ست سنوات ..دخلت الديوانية وكان محمد مقابل الاخبار ..
ــ صار شي جديد ؟؟
ــ لا ...ماتغير شي ..الكل في حالة حرب ..ها أقنعتك مريم بهناء ؟؟ أنا شفت البنت من ناحية الجمال ماعليها كلام ..
ــ بس انا ماشفتها يامحمد ..وما افكر بالزواج ..
محمد ــ كيفك ..بس انا اليوم مابنام في البيت لان مريم بتسندرني بسالفة عنادك ..
ــ الله يخليك صكر الموضوع ..
وبديت ألاعب سارة شوي واضحك معاها ..وتركتها عند ابوها واستأذنت وطلعت ..
مر شهر ..وحياتي مثل ماهي .. حضرت عرس راشد .. .سمير وليال نادرا ما اتكلم معاهم خارج العمل لان ماكان عندي اي كلام اقوله ..كنت قاسي مع ليال ..وكل ماتغلط ولو غلطة صغيرة ..أحسبها لها كارثة ..فصارت تتفادى الاغلاط ..
وكنت بدخل الكتب لما سمعت ليال تتكلم ..
ــ تصدقين ..خلين اخخلص هالاوراق لايدخل علي استاذ يوسف ويعطيني نظرة تخلي الشعر اللي في جسمي يوقف من الخوف ...... هو زين . تدريبه ممتاز ...بس ..يحب يهين جنس الاناث ..وأنت تعرفيني من مناصري المرأة فما اابي انه يمسك علي شغلة غلط ...اييه ..قال لي ابوي يلا توكلي ..تعالي اليوم وبكمل لج السالفة ..مع السلامة ..
كنت بدخل على طول ..بس ماحبيت اسبب لها اي احراج .
فتأخرت دقيقة ودخلت ..
ــ السلام عليكم ..
ليال ــ وعليكم السلام استاذ ..
ــ خلصت الاوراق ؟
ليال ــ الحين استاذ ..
ــ متى الحين انا عطيتج اياها من ساعتين ..شالبطء ..انا لازم اروح الحين علشان يسوي لي الزبون توكيل ..
ليال ــ دقيقة استاذ ارتاح في المكتب وأنا أييب لك الاوراق ..
حبيت اللعبة فقلت ــ لو سمير كان خلصها من اول ما اعطيته اياها مب يضيع ساعتين من وقتي في الهذرة والسوالف ...
ليال ــ أستاذ يوسف ,,سمير متمرس ..لكن أنا مبتدئة ..
قاطعتها ــ لاتضيعين وقتج في الدفاع عن بنات جنسج ..خلصي الاوراق بعد خمس دقايق ابيهم في المكتب ..
رجعت مكتبي وأنا فرحان بالانكسار اللي باين على ملامحها ...خصوصا لما لمحت لها اني سمعت المكالمة ..
دخل سمير بعد خمس دقايق مع الاوراق ونظرة عتاب على ملامحه ..
ابتسمت ..
ــ شفيك ؟؟
سمير ــ استاذ هذي الاوراق اللي كانت عند ليال ..ممكن أسال سؤال ؟؟
ابتسمت وانا عارف سؤاله ـ اسأل ...
سمير ــ استاذ عملت لك اييه البنت ديه علشان تعمل فيها كده ..دي منهاره على مكتبها ..
كان بالضبط الكلام اللي ابي اسمعه ..
ــ تبجي؟؟
سمير ــ لاء .. تزغرد ...
ضحكت ...فكمل سمير بنظرة عتاب ـــ دي بت غلبانه ..ماتكسرهاش ..يابيه ...دي تحاول تمسك دموعها وشهها اختفى منه اللون ..تقول ماسها جن ولاحاجة ..
ـــ لاتخاف عليها يا سمير ...أقوى مني ومنك ..وأنا ماتعرضت لها في شي شخصي . أنا بروح الحين ..سمير بالسلامة يابيه ....
وأنا في طريقي علشان اقابل الزبون ..رن تلفوني ..وسمعت الخبر اللي قلب حياتي كلها راسا على عقب ..
ــ ألو ...
علي ــ مرحبا يوسف أنا علي ..
ــ أهلا علي ..
في قلبي أسأل أي علي ..
علي ــ يوسف ان مادريت بس جنازة راشد الساعة أربع العصر ....
وفي ثواني الصدمة خلتني أوزن الامور علي اخو راشد .راشد الي مات ..شلون؟؟؟؟
ــ راشد مات ؟؟ أنت من صجك ؟؟
علي ــ مات اليوم ليش ماعندك خبر ؟؟
يوسف ــ لا والله آخر مرة شفته كان يوم عرسه ..شصار ؟؟ شلون ؟؟لاحول ولاقوة الا بالله ..
علي ـ في حادث .. حرام ماتهنى بزواجه اسبوع على بعض الله يرحمه .. تعال المستشفى ..
يوسف ــ الحين بس عطني نص ساعه أخلص شغالي ..
علي ــ مع السلامة ..
الصدمة زلزلت كياني ..راشد صديق العمر ..يروح بين ليلة وضحاها وهو في عز شبابه ؟؟ ماقدرت امسك دمعتي ..رجعت المكتب وانا مكتئب .
سمير ــ خير استاذ ..
ــ اتصل وكنسل كل مواعيدي ..أنا بروح ومابرجع اليوم ..
سمير ـ ليه استاذ ؟؟ ومال وشك كده ..
ـــ راشد عطاك عمره ياسمير .
سمير ـــ الله يرحمه دا كان في عز شبابه ..
ــ الله يرحمه ...

وااااااااااااااااااااو
كملي كملي اتريا الباقي ...:bigeyes: :bigeyes:
الله يرحمه راشد :( صج كان في شبابه
وبعدين يوسف هذا مشكلته كبيره :wow:
مشكله فيه والله :09:
والله يعينها ليال :D

مشكــــــــــــــــــــــوره عالقصه الرائعه
تسلمين وما قصرتي :biggthump

يلا وين الباقي
خوش قصة :congrats:
الله يرحم رشود كان خوش ريال و تقي:tongue2:
ليال بعرف ليش صابرة على هالنزغة:أفكر:
وهذي مريمو لوعت جبدي حدها حنانة:biggrin2:
وشكرا القصة تشوق:smile2: